នយោបាយ, ព័ត៌មានជាតិ

គណបក្សទាំង១៨សន្យាអនុវត្តតាមគោលនយោបាយអាទិភាពរបស់ខ្លួន នៅពេលឈ្នះឆ្នោតជ្រើសតាំងតំណាងរាស្ត្រអាណត្តិទី៧

២១ កក្កដា ២០២៣ ម៉ោង ៤:១៦ ល្ងាច
ពក ពន្លឺ

បេក្ខជនមកពីគណបក្សនយោបាយចំនួន១៨នឹងត្រូវចូលរួមបោះឆ្នោតជាតិនៅថ្ងៃទី២៣ ខែកក្កដា បើទោះបីជាអ្នកសង្កេតការណ៍អន្តរជាតិ និងក្រុមសិទ្ធិមនុស្សបានរិះគន់យ៉ាងទូលំទូលាយថា ដំណើរការបោះឆ្នោតខ្វះតម្លាភាព និងយុត្តិធម៌ ស្របពេលគណបក្សប្រជាជនកម្ពុជាដែលកំពុងកាន់អំណាចសង្ឃឹមឈ្នះ១០០ភាគរយ។

នៅក្នុងការបោះឆ្នោតឃុំសង្កាត់ឆ្នាំ២០២២ គណបក្សថ្មីចាស់ទាំងអស់ ដោយមិនរាប់បញ្ចូលគណបក្សភ្លើងទៀន បានទទួលសំឡេងឆ្នោតតិចជាង៤% ។ ដោយឡែកគណបក្សភ្លើងទៀនបានឈ្នះប្រហែល២២% ដែលចាត់ទុកជាគណបក្សមានប្រជាប្រិយភាព និងកម្លាំងគ្រប់គ្រាន់អាចប្រកួតប្រជែងជាមួយគណបក្សកាន់អំណាច ប៉ុន្តែជាអកុសលត្រូវបានដកសិទ្ធិពីការបោះឆ្នោតជ្រើសតាំងតំណាងរាស្ត្រអាណត្តិទី៧នេះ កាលពីខែឧសភា។

ទន្ទឹមនឹងនេះលោក មាស នី អ្នកតាមដានការអភិវឌ្ឍសង្គម លើកឡើងថា ទោះបីការបោះឆ្នោតក្នុងអាណត្តិទី៧នេះ មានគណបក្ស១៨ចូលរួមប្រកួតប្រជែងក៏ដោយ ក៏គណបក្សទាំងអស់នោះ មិនមានកម្លាំង ឬឥទ្ធិពលគ្រប់គ្រាន់ដែលអាចប្រកួតប្រជែងជាមួយគណបក្សកាន់អំណាចឡើយ។ សូម្បីការធ្វើយុទ្ធនាការឃោសនាបោះឆ្នោត ក៏មានគណបក្សមួយចំនួនមិនមានធនធានគ្រប់គ្រាន់ ដើម្បីទ្រទ្រង់ផង។

លោកបន្តថា៖ «តាមដែលខ្ញុំមើលទៅ ក៏អាចសន្និដ្ឋានតាំងពីឥឡូវទៅហើយថា ជ័យជម្នះស្ទើរតែ១០០ភាគរយបានទៅគណបក្សកាន់អំណាចរួចជាស្រេចបាត់ហើយ។ ព្រោះយើងមើលទៅមិនឃើញមានគណបក្សណា ដែលអាចនឹងមានកម្លាំងទៅប្រកួតប្រហាក់ប្រហែលជាមួយគណបក្សអំណាចបានទេ»។

លោកបន្ថែមថា បើរាប់តាមចំនួនគណបក្ស វាអាចបង្ហាញជាពហុបក្ស ប៉ុន្តែលំហការប្រកួតប្រជែងហាក់មិនអនុញ្ញាតឱ្យបានគ្រប់គ្រាន់ ដែលលោក មាស នី ប្រៀបធៀបលទ្ធិប្រជាធិបតេយ្យកម្ពុជាបច្ចុប្បន្នស្រដៀងនឹងរដ្ឋកុម្មុយនិស្តមួយចំនួន។

ទោះជាយ៉ាងនេះក្តី គណបក្សដែលចូលរួមក្នុងការបោះឆ្នោតបានផ្តល់ការសន្យា និងគោលនយោបាយមួយចំនួនក្នុងអំឡុងពេលយុទ្ធនាការឃោសនាបោះឆ្នោតដល់អ្នកគាំទ្រ ដូចជាការទទួលបានការថែទាំសុខភាពមានតម្លៃសមរម្យ កំណែទម្រង់ប្រព័ន្ធតុលាការ និងការបង្កើនប្រាក់ឈ្នួលអប្បបរមា។ នេះជាការលើកឡើងរបស់គណបក្សទាំង១៨ ដែលមានបេក្ខជននៅក្នុងការបោះឆ្នោតនាពេលខាងមុខ ដោយតាមលំដាប់លំដោយនៃតារាងលេខលើសន្លឹកឆ្នោត រួមជាមួយនឹងគោលនយោបាយអាទិភាពមួយចំនួន។

គណបក្សសំបុកឃ្មុំសង្គមប្រជាធិបតេយ្យ (លេខរៀងទី១ក្នុងសន្លឹកឆ្នោត)

លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ នឹងផ្តល់អាទិភាពដល់ការបង្កើតមូលនិធិកិច្ចការសង្គម ដែលផ្តោតលើការអភិវឌ្ឍន៍ និងជួយប្រជាពលរដ្ឋក្រីក្រ នេះបើតាមការបញ្ជាក់របស់លោក ម៉ម សូណង់ដូ បានប្រាប់ BTV News Cambodia ។

គណបក្សខ្មែរតែមួយ (លេខរៀងទី២ក្នុងសន្លឹកឆ្នោត)

គណបក្សខ្មែរតែមួយ បានសន្យាផ្តល់ប្រាក់បៀវត្សរ៍ចំនួន២៦ម៉ឺនរៀលក្នុងមួយខែដល់មនុស្សចាស់។ ប្រធានគណបក្សខ្មែរតែមួយ លោក គុជ លី ក៏ចង់ដំឡើងប្រាក់ខែគ្រូពេទ្យ ពង្រឹងក្រមសីលធម៌ និងវិជ្ជាជីវៈក្នុងវិស័យវេជ្ជសាស្ត្រផងដែរ។

លោក គុជ លី ប្រធានគណបក្សខ្មែរតែមួយ ធ្វើយុទ្ធនាការឃោសនាបោះឆ្នោតនៅខេត្តកណ្តាល នៅថ្ងៃទី១៤ ខែកក្កដា ឆ្នាំ២០២៣។

គណបក្សសញ្ជាតិកម្ពុជា (លេខរៀងទី៣ក្នុងសន្លឹកឆ្នោត)

លោក សេង សុខេង ប្រធានគណបក្សសញ្ជាតិកម្ពុជា មានប្រសាសន៍ថា គណបក្សរបស់លោកនឹងផ្តោតលើកិច្ចសហប្រតិបត្តិការរវាងប្រជាពលរដ្ឋ និងមន្ត្រីរដ្ឋាភិបាល ដើម្បីធានាបាននូវសុខសន្តិភាពក្នុងប្រទេស។ លោកបានប្រាប់សារព័ត៌មានRFI ថា មានគោលនយោបាយសំខាន់ៗដែលផ្សារភ្ជាប់ទៅនឹងព្រះពុទ្ធសាសនា តាមរយៈសាមគ្គីធម៌ ធ្វើបុណ្យ និងការរក្សាសីលជាដើម។ លោក សេង សុខេង លើកឡើងថា បើបោះឆ្នោតឱ្យគណបក្សសញ្ជាតិកម្ពុជា អ្នកចាញ់ក៏សុខ អ្នកឈ្នះក៏សុខ។

ប្រធានគណបក្សសញ្ជាតិកម្ពុជា លោក សេង សុខេង ធ្វើយុទ្ធនាការឃោសនាបោះឆ្នោតនៅខេត្តកណ្ដាល នៅថ្ងៃទី៤ ខែកក្កដា ឆ្នាំ២០២៣។

គណបក្សខ្មែររួបរួមជាតិ (លេខរៀងទី៤ក្នុងសន្លឹកឆ្នោត)

គណបក្សខ្មែររួបរួមជាតិ ក្រោមការដឹកនាំរបស់លោក ញឹក ប៊ុនឆៃ ប្រធានគណបក្សនេះ បានសន្យានឹងបង្កើតគោលនយោបាយមួយ ដែលនឹងកំណត់ថ្លៃព្យាបាលជំងឺនៅមន្ទីរពេទ្យចំនួន ១០ ០០០រៀល សម្រាប់ព្យាបាលជំងឺគ្រប់ប្រភេទនៅតាមមន្ទីរពេទ្យរដ្ឋ។ លោកថា នេះជាគោលនយោបាយសំខាន់បំផុតរបស់គណបក្ស។

លោកបញ្ជាក់ថា៖ «(គោលនយោបាយនេះ) គឺជាការពេញនិយមបំផុតក្នុងចំណោមប្រជាជន ព្រោះវានឹងរួមបញ្ចូលទាំងគ្លីនិកកម្ពុជាគ្រប់ប្រភេទ និងមន្ទីរពេទ្យរដ្ឋ»។

បើតាមប្រធានគណបក្សរូបនេះអះអាងថា សម្រាប់ការព្យាបាលជំងឺជូនប្រជាពលរដ្ឋដោយឥតគិតថ្លៃនេះ បណ្ដាប្រទេសមួយចំនួនបានធ្វើរួចទៅហើយ។ ជាក់ស្តែង ប្រទេសថៃ គឺព្យាបាលជំងឺជូនប្រជាពលរដ្ឋនៅតាមមន្ទីរពេទ្យរដ្ឋ គ្រាន់តែបង់ថ្លៃត្រឹម៣០បាតស្មើនឹង១ដុល្លារប៉ុណ្ណោះ។

អ្នកគាំទ្រគណបក្សខ្មែររួបរួមជាតិ ធ្វើយុទ្ធនាការនៅរាជធានីភ្នំពេញ ថ្ងៃទី១ ខែកក្កដា ឆ្នាំ២០២៣។ (ខេមបូចា/សុវណ្ណ ស្រីពេជ្រ)

គណបក្សកម្លាំងប្រជាធិបតេយ្យ (លេខរៀងទី៥ក្នុងសន្លឹកឆ្នោត)

នេះជាលើកទីមួយហើយដែលគណបក្សកម្លាំងប្រជាធិបតេយ្យ មានបេក្ខជនឈរឈ្មោះក្នុងការបោះឆ្នោតសកល បន្ទាប់ពីត្រូវបានទទួលស្គាល់ជាផ្លូវការដោយរដ្ឋាភិបាលក្នុងឆ្នាំ ២០២០។ ចំពោះលោក អ៊ុន វិសិទ្ធគុណ ប្រធានគណបក្ស ថ្លែងថា សុខភាពគឺជាបញ្ហាសំខាន់ ហើយគណបក្សចង់បង្កើតគោលនយោបាយ ដែលរាល់ការចំណាយលើមន្ទីរពេទ្យត្រូវបានរ៉ាប់រងដោយរដ្ឋាភិបាល។

លោកបន្តថា៖ «វិស័យសុខាភិបាលជាអាទិភាពមួយដែលត្រូវផ្លាស់ប្តូរប្រសិនបើគណបក្សឈ្នះឆ្នោត»។

គណបក្សនេះមានគោលនយោបាយអាទិភាពផ្សេងទៀតសម្រាប់គណបក្ស រួមមានការរក្សាវប្បធម៌ខ្មែរ ក៏ដូចជាការកែលម្អការគ្រប់គ្រងចំណូលរបស់រដ្ឋាភិបាល និងប្រាក់បៀវត្សរ៍មន្ត្រីរាជការជាដើម។

ប្រធានគណបក្សកម្លាំងប្រជាធិបតេយ្យ លោក អ៊ុន វិសិទ្ធគុណ ធ្វើយុទ្ធនាការនៅខេត្តកំពត នៅថ្ងៃទី៩ ខែកក្កដា ឆ្នាំ២០២៣។

គណបក្សកសិករ (លេខរៀងទី៦ក្នុងសន្លឹកឆ្នោត)

លោក មាស បូពៅ ប្រធានគណបក្សកសិករ បានលើកឡើងថា គណបក្សនឹងផ្តោតលើការពង្រឹងវិស័យកសិកម្មរបស់ប្រទេស ដោយមួយផ្នែកតាមរយៈរដ្ឋទិញស្រូវពីកសិករ នៅពេលពួកគាត់គ្មានទីផ្សារលក់ផលិតផល។ លោកបន្តថា គណបក្សនឹងធ្វើការកែលម្អប្រព័ន្ធធារាសាស្ត្រក្នុងប្រទេសផងដែរ។

លោកបន្ថែមថា៖ «គោលនយោបាយអាទិភាពរបស់យើង គឺយើងបានកំណត់យក១០ចំណុច ដែលយើងបានដាក់នៅក្រសួងមហាផ្ទៃ ក៏ដូចជាគោលនយោបាយបច្ចុប្បន្នភាពដែលយើងត្រូវការផ្សព្វផ្សាយដល់ប្រជាពលរដ្ឋ»។

សមាជិកគណបក្សកសិករ ធ្វើយុទ្ធនាការនៅខេត្តកំពង់ធំ ថ្ងៃទី៤ ខែកក្កដា ឆ្នាំ២០២៣។

គណបក្សស្ត្រីដើម្បីស្ត្រី (លេខរៀងទី៧ក្នុងសន្លឹកឆ្នោត)

គណបក្សស្ត្រីដើម្បីស្ត្រី ដឹកនាំដោយលោកស្រី ស៊ឹង សុធីគឺផ្តោតលើការជំរុញស្ត្រីឱ្យចូលរួមក្នុងការអភិវឌ្ឍប្រទេស។គណបក្សនេះត្រូវបានបង្កើតដំបូងក្នុងឆ្នាំ១៩៩៩ មានឈ្មោះថាគណបក្សកួរស្រូវ ប៉ុន្តែបានដូរឈ្មោះជាគណបក្សស្ត្រីដើម្បីស្ត្រីនៅឆ្នាំ២០២៣។

លោកស្រី សុធី បញ្ជាក់ថា៖«ខ្ញុំចង់ឱ្យស្ត្រីទាំងអស់ក្រោកឈរ ហើយកុំគិតថា ខ្លួនទន់ខ្សោយ ត្រូវនៅចាំផ្ទះ ហើយពឹងផ្អែកលើប្ដី»។ លោកស្រីបន្តថា៖«ដោយសារទំនៀមទម្លាប់ប្រពៃណី ស្ត្រីគិតថា តួនាទីរបស់ពួកគាត់គឺគ្រាន់តែជាស្ត្រីមេផ្ទះប៉ុណ្ណោះ ដែលជាហេតុផលមួយក្នុងចំណោមហេតុផល ដែលធ្វើឱ្យពួកគេបាត់បង់កម្លាំងរបស់ខ្លួន»។

លោកស្រីចង់ឱ្យស្ត្រីចូលរួមកាន់តែច្រើនក្នុងការដោះស្រាយបញ្ហាសង្គម ទន្ទឹមនឹងនេះលោកស្រីមានអារម្មណ៍ថាស្ត្រីត្រូវបានផ្តល់តម្លៃទាប ខ្វះការអប់រំ និងឱកាសការងារនៅឡើយ។ ប្រសិនបើលោកស្រីជានាយករដ្ឋមន្ត្រី នឹងកសាងសហគមន៍មួយដែលងាយចូលទៅកាន់ទីផ្សារ ជួយលើកកម្ពស់ស្ថានភាពសេដ្ឋកិច្ចរបស់ប្រជាពលរដ្ឋផងដែរ។

គណបក្សនេះក៏ចូលរួមកាត់បន្ថយអសន្តិសុខស្បៀង ទប់ស្កាត់ការផ្សព្វផ្សាយគ្រឿងស្រវឹងដល់សាធារណជន តស៊ូមតិដើម្បីសិទ្ធិអ្នកទោស ជួយជនចាស់ជរាជំពាក់បំណុល និងលុបបំបាត់ល្បែងស៊ីសងក្នុងសហគមន៍។

អ្នកស្រី សឿង សុធី ប្រធានគណបក្សស្ត្រីដើម្បីស្ត្រី ចុះជួបប្រជាពលរដ្ឋនៅខណ្ឌមានជ័យ រាជធានីភ្នំពេញ នៅថ្ងៃទី២៣ ខែមិថុនា ឆ្នាំ២០២៣។ (ខេមបូចា/ ព្រីង សំរាំង)

គណបក្សខ្មែរឈប់ក្រ (លេខរៀងទី៨ក្នុងសន្លឹកឆ្នោត)

លោក ក្រវ៉ាញ ដារ៉ន ប្រធានគណបក្សខ្មែរឈប់ក្រ ប្រាប់សារព័ត៌មានCambodianess ថា ប្រសិនបើគណបក្សរបស់លោកឈ្នះការបោះឆ្នោតសកលនោះ គ្រោងនឹងផ្តល់ប្រាក់ឧបត្ថម្ភប្រចាំខែ និងបណ្ណថែទាំសុខភាពដល់ជនពិការ មនុស្សចាស់ កុមារ និងស្ត្រីមានផ្ទៃពោះ។ គណបក្សនេះក៏មានបំណងផ្តល់ឱ្យប្រជាជននូវ Wi-Fi ដោយឥតគិតថ្លៃជាមួយនឹងអ៊ីនធឺណិត6G ។ គោលនយោបាយពិសេសមួយទៀត បក្សខ្មែរឈប់ក្រនឹងនាំអ្នកចូលនិវត្តន៍ធ្វើទស្សនកិច្ចនៅក្រៅប្រទេស។

ប្រធានគណបក្សខ្មែរឈប់ក្រ លោក ក្រវ៉ាញ ដារ៉ន (រូបថតពីទំព័រហ្វេសប៊ុករបស់លោក ដារ៉ន)

គណបក្សហ៊្វុនស៊ិនប៉ិច (លេខរៀងទី៩ក្នុងសន្លឹកឆ្នោត)

គណបក្សហ៊្វុនស៊ិនប៉ិច មានគោលនយោបាយផ្តោតលើការការពាររបបរាជានិយម និងគោរពកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១។ គណបក្សហ្វ៊ុនស៊ិនប៉ិចដែលជាគណបក្សរាជានិយមមានវ័យចំណាស់បំផុត បន្សល់ទុកពីព្រះបរមរតនកោដ្ឋ និងពីសម្តេចក្រុមព្រះ ដែលបច្ចុប្បន្នមានព្រះអង្គម្ចាស់ នរោត្តម ចក្រាវុធ ជាព្រះប្រធានគណបក្សបន្តដឹកនាំពីព្រះបិតា។

លោក ញឿន រ៉ាដែន អ្នកនាំពាក្យគណបក្សហ្វុនស៊ិនប៉ិច លើកឡើងថា គោលនយោបាយទី១ដែលមានការគាំទ្រច្រើនពីប្រជាពលរដ្ឋ គឺរបបរាជានិយម និងការគោរពច្បាប់កិច្ចព្រមព្រៀងសន្តិភាពទីក្រុងប៉ារីស ដែលគោលនយោបាយនេះអាចធ្វើឱ្យប្រទេសមានសន្តិភាពនិងរីកចម្រើន។

លោកបានបន្តថា របបរាជានិយមត្រូវបានផ្តួលរំលំក្នុងឆ្នាំ១៩៧០ ដែលធ្វើឱ្យប្រទេសមានសង្រ្គាម និងធ្វើឱ្យសេដ្ឋកិច្ចជាតិធ្លាក់ដល់ចំណុចសូន្យ ហើយប្រជាពលរដ្ឋទាំងអស់ត្រូវបាត់បង់សេរីភាព ប៉ុន្តែបន្ទាប់ពីរបបរាជានិយមបានដឹកនាំប្រទេសវិញប្រជាជនទទួលបានសិទ្ធិសេរីភាព ហើយក្នុងប្រទេសទទួលបានសន្តិភាព។

លោក រ៉ាដែន ថ្លែងថា៖ «ក្រោយពីឆ្នាំ១៩៩៣ គណបក្សហ៊្វុនស៊ិនប៉ិច ទទួលបានជោគជ័យ របបរាជានិយមក៏បានរស់ឡើងវិញ ហើយប្រជារាស្រ្តមានសិទ្ធិសេរីភាព និងសង្គមជាតិមានការអភិវឌ្ឍរីកចម្រើន»។

គណបក្សហ៊្វុនស៊ិនប៉ិច ក៏មានគោលនយោបាយ បញ្ចុះតម្លៃជី អគ្គិសនី ប្រេងឥន្ធនៈ ឱ្យបានថោក និងបង្រ្កោបការជួញដូរគ្រឿងញៀន និងប្រមូលជនរងគ្រោះមកព្យាបាលដោយឥតបង់ប្រាក់។

នរោត្តម ចក្រាវុធ ព្រះប្រធានគណបក្សហ៊្វុនស៊ិនប៉ិច ជួបអ្នកគាំទ្ររបស់ព្រះអង្គនៅរាជធានីភ្នំពេញ ថ្ងៃទី១២ ខែកក្កដា ឆ្នាំ២០២៣។ (ខេមបូចា/ ព្រីង សំរាំង)

គណបក្សធម្មាធិបតេយ្យ (លេខរៀងទី១០ក្នុងសន្លឹកឆ្នោត)

គណបក្សធម្មាធិបតេយ្យ ដែលមានលោកស្រី ពោធិតី សាវត្ថី ជាមេដឹកនាំគណបក្សបានចេញគោលនយោបាយថា គណបក្សប្តេជ្ញានឹងចូលរួមលុបបំបាត់អំពើពុករលួយ ឱ្យមានប្រសិទ្ធភាពខ្ពស់ក្នុងប្រទេស។ លោកស្រីបានកំណត់ថា នៅពេលជាប់ឆ្នោតដឹកនាំរាជរដ្ឋាភិបាល ឬត្រឹមទទួលបានអាសនៈក្នុងសភា នឹងចូលរួមបំបាត់អំពើពុករលួយ ដែលមានក្នុងសង្គម ប៉ុន្តែលោកស្រីថា មុនលុបបំបាត់អំពើពុករលួយក្នុងសង្គមទាំងមូល ត្រូវផ្តើមចេញពីខ្លួនឯង ជាមុនសិន តាមរយៈការមិនយកថវិកា ពីតំណាងរាស្រ្តបក្សជាថ្នូរនឹងការបានតំណែងនេះ គឺពួកគាត់ចូលដោយសមត្ថភាព និងការតស៊ូជាមួយបក្ស ។

លោកស្រីបញ្ជាក់បន្ថែមថា៖ «យើងអត់ទទួលលុយពីសមាជិកទេ នេះគឺជាការបំបាត់អំពើពុករលួយខ្លួនឯងសិន»។

គោលនយោបាយផ្សេងទៀតរួមមាន កែតម្រូវប្រព័ន្ធតុលាការឱ្យមានយុត្តិធម៌ពិតប្រាកដ កែទម្រង់ប្រព័ន្ធកសិកម្ម និងរៀបចំប្រព័ន្ធធារាសាស្ត្រឱ្យបានត្រឹមត្រូវ រកទីផ្សារសម្រាប់កសិផល និងឧស្សាហផល កែទម្រង់ប្រព័ន្ធសុខាភិបាលឱ្យមានប្រសិទ្ធភាព កែទម្រង់ប្រព័ន្ធអប់រំឱ្យល្អប្រសើរ និងអ្នកនយោបាយត្រូវមានសញ្ជាតិខ្មែរតែមួយ គឺខ្មែរពីកំណើត។

យុទ្ធនាការឃោសនាបោះឆ្នោតរបស់គណបក្សព្រះធម្មាធិបតេយ្យនៅខេត្តបន្ទាយមានជ័យ នៅថ្ងៃទី៤ ខែកក្កដា ឆ្នាំ២០២៣។

គណបក្សប្រជាធិបតេយ្យមូលដ្ឋាន (លេខរៀងទី១១ក្នុងសន្លឹកឆ្នោត)

ចំពោះគណបក្សប្រជាធិបតេយ្យមូលដ្ឋាន ដឹកនាំដោយ លោក យ៉េង វីរៈ ការកំណត់អាណត្តិនាយករដ្ឋមន្ត្រីត្រឹមតែ២អាណត្តិ គឺជាគោលនយោបាយដ៏សំខាន់។

លោក សេក សុខា ប្រធានគណៈកម្មាធិការនាយកនៃគណបក្សមូលដ្ឋាន លើកឡើងថា ដើម្បីមានការផ្លាស់ប្តូរ លទ្ធិប្រជាធិបតេយ្យរស់ឡើងវិញ និងវិសោធនកម្មច្បាប់ណាមិនបម្រើប្រយោជន៍ជាតិបាន លុះត្រាមានសភាមានពហុបក្ស ហើយគណបក្សនីមួយៗដឹកនាំប្រទេសបានត្រឹមតែ២អាណត្តិ។

លោកបញ្ជាក់ថា៖ «យើងផ្តោតសំខាន់ទៅលើការកំណត់អាណត្តិនាយករដ្ឋមន្ត្រីត្រឹម២អាណត្តិ ហើយយើងគណបក្សប្រជាធិបតេយ្យមូលដ្ឋានតម្កល់ និងចាត់ទុកប្រយោជន៍ជាតិជាធំ អត់គិតរឿងបក្សពួកអីទេ»។

គណបក្សក៏មានគោលនយោបាយស្តីពីដោះស្រាយបញ្ហាគ្រឿងញៀន កាត់បន្ថយការកកស្ទះ និងគ្រោះថ្នាក់ចរាចរណ៍។ ការពារ និងអភិរក្សព្រៃឈើ ព្រៃលិចទឹក និងស្តារប្រឡាយ បឹង ព្រែក និងផ្តល់ទឹកគ្រប់គ្រាន់ប្រើប្រាស់លើវិស័យកសិករ ដែលគោលនយោបាយអាទិភាពទាំងពីរនេះ ហាក់ប្លែកពីគោលនយោបាយរបស់គណបក្សដទៃ។ ដែលពលរដ្ឋកំពុងប្រឈម និងត្អួញត្អែរជារៀងរាល់ថ្ងៃ ត្រូវការដំណោះស្រាយសម្រាប់ពួកគាត់ផងដែរ។

គណបក្សប្រជាធិបតេយ្យមូលដ្ឋាន (GDP) ធ្វើយុទ្ធនាការឃោសនាបោះឆ្នោតនៅតាមដងផ្លូវក្នុងរាជធានីភ្នំពេញ ថ្ងៃទី១០ ខែកក្កដា ឆ្នាំ២០២៣។ (ខេមបូចា/ ព្រីង សំរាំង)

គណបក្សបំណងពលរដ្ឋ (លេខរៀងទី១២ក្នុងសន្លឹកឆ្នោត)

លោក អ៊ិត សារម្យ ប្រធានគណបក្សបំណងពលរដ្ឋ បាននិយាយនៅលើ បណ្តាញ YouTube របស់គណបក្ស ថា គោលនយោបាយរបស់គណបក្សនឹងផ្តល់អាទិភាពដល់ការកែលម្អវិស័យអប់រំឱ្យមានគុណភាព ការអភិវឌ្ឍវិស័យសុខាភិបាល និងធ្វើឱ្យវិស័យសេដ្ឋកិច្ចក្នុងប្រទេសមានភាពរីកចម្រើន ។

លោកបានមានប្រសាសន៍ថា៖ «ការធានានូវគុណភាពនៃវិស័យអប់រំ វិស័យសុខាភិបាល វិស័យពាណិជ្ជកម្ម ទំនាក់ទំនងការបរទេស (ទំនាក់ទំនងរវាងជាតិ និងអន្តរជាតិ) ជាកិច្ចការងារមួយដែលរដ្ឋាភិបាលរបស់គណបក្សបំណងពលរដ្ឋត្រូវតែបំពេញ»។

យុទ្ធនាការឃោសនាបោះឆ្នោតរបស់គណបក្សគោលបំណងប្រជាជនខេត្តកំពង់ឆ្នាំង នៅថ្ងៃទី១៤ ខែកក្កដា ឆ្នាំ២០២៣។

គណបក្សខ្មែរអភិវឌ្ឍន៍សេដ្ឋកិច្ច (លេខរៀងទី១៣ក្នុងសន្លឹកឆ្នោត)

លោក ហួន ច័ន្ទថុន ប្រធានគណបក្សខ្មែរអភិវឌ្ឍន៍សេដ្ឋកិច្ច បានលើកឡើងថា គោលនយោបាយធំៗ របស់គណបក្ស គឺផ្តោតទៅលើ អភិវឌ្ឍន៍ធនធានមនុស្ស អភិវឌ្ឍន៍កសិកម្ម និងកសិឧស្សាហកម្ម អភិវឌ្ឍន៍វិស័យទេសចរណ៍ អភិវឌ្ឍន៍សេដ្ឋកិច្ចជាតិ និងអភិវឌ្ឍន៍ដំណើរការប្រព័ន្ធយុត្តិធម៌ នៅកម្ពុជា។

លោកបន្តថា គោលនយោបាយដែលមានអាទិភាព ដែលគណបក្សគ្រោងនឹងជម្រុញឱ្យមានការអនុវត្តឱ្យបានមុនគេ គឺគោលនយោបាយ អនុវត្តន៍ដំណើរការប្រព័ន្ធយុត្តិធម៌ ។

លោក ច័ន្ទថុន បញ្ជាក់ថា៖ «ពុកម៉ែបងប្អូនជាទីគោរព នៅពេលដែលគណបក្សខ្មែរអភិវឌ្ឍន៍សេដ្ឋកិច្ច ទទួលបានការគាំទ្រពីពុកម៉ែបងប្អូន ឱ្យបានក្លាយជារាជរដ្ឋាភិបាល យើងនឹងអនុវត្តនូវគោលនយោបាយមួយនេះ ឱ្យកាន់តែស៊ីជម្រៅបំផុត សម្រាប់ផ្តល់ជាភាពយុត្តិធម៌ និងកក់ក្តៅជូនសង្គម»។

យុទ្ធនាការឃោសនាបោះឆ្នោតរបស់គណបក្សខ្មែរអភិវឌ្ឍន៍សេដ្ឋកិច្ច ថ្ងៃទី១៤ ខែកក្កដា ឆ្នាំ២០២៣។

គណបក្សឯកភាពជាតិខ្មែរ (លេខរៀងទី១៤ក្នុងសន្លឹកឆ្នោត)

គណបក្សឯកភាពជាតិខ្មែរ សន្យាផ្តល់ប្រាក់ឧបត្ថម្ភ៣សែនរៀលក្នុង១ខែ ដល់មនុស្សមានអាយុចាប់ពី៦៥ឆ្នាំឡើង និងកុមារនៃគ្រួសារក្រីក្រក្រោមអាយុ៦ឆ្នាំ ទទួលបានប្រាក់ឧបត្ថម្ភ៤ម៉ឺនរៀលក្នុង១ខែ។

លោក អ៊ុន ជីម មានប្រសាសន៍ថា៖ «ចំពោះចាស់ជរាដែលអាយុ៦៥ឆ្នាំគ្មានទីជម្រកគ្មានកូនចៅមើលថែ យើងមិនអាចទុកឱ្យគាត់ដើរសុំទានពេញតែផ្លូវបានចឹងទេ។ លោក អ៊ុន ជីម បន្តថា៖ «ម្តាយឪពុកក្រីក្រគ្មានចំណូលគ្មានអ្វីៗទាំងអស់ កូនត្រូវការទឹកដោះគោ កូនត្រូវការវីតាមីន តើរដ្ឋយើងគួរគិតយ៉ាងម៉េច?…..កន្លែងនេះហើយដែលយើងត្រូវគិតគូរក្នុងនាមជាគណបក្សនយោបាយ»។

គណបក្សឯកភាពជាតិខ្មែរក៏មានគោលនយោបាយផ្តល់បណ្ណថែទាំសុខភាពដល់ប្រជាពលរដ្ឋក្រីក្រសម្រាប់ការពិនិត្យ និងព្យាបាលជំងឺដោយឥតគិតថ្លៃ ព្រមទាំងដំឡើងប្រាក់បៀវត្សរ៍មន្ត្រីរាជការតាមមូលដ្ឋាន ទាបបំផុត២លាន៥សែនរៀល និងកម្មករ ទាបបំផុត១លាន៥សែនរៀល។

យុទ្ធនាការឃោសនាបោះឆ្នោតរបស់គណបក្សឯកភាពជាតិខ្មែរ នៅថ្ងៃទី២ ខែកក្កដា ឆ្នាំ២០២៣។

គណបក្សខ្មែរអភិរក្ស (លេខរៀងទី១៥ក្នុងសន្លឹកឆ្នោត)

គណបក្សខ្មែរអភិរក្ស ដែលដឹកនាំដោយលោក រៀល ខេមរិន្ទ្រ ជាប្រធានគណបក្សមានគោលនយោបាយផ្តោតលើការបំបាត់អំពើពុករលួយក្នុងប្រទេស លុបបំបាត់គ្រឿងញៀន លើកស្ទួយវិស័យអប់រំ លើកស្ទួយជីវភាពប្រជាពលរដ្ឋដើម្បីកាត់បន្ថយភាពក្រីក្រ គោរពសិទ្ធិម្ចាស់ឆ្នោត។ គណបក្សក៏ចង់ផ្តល់សេវាព្យាបាលជំងឺមិនគិតថ្លៃដល់ប្រជាពលរដ្ឋដែលមានជីវភាពក្រីក្រផងដែរ។

យុទ្ធនាការឃោសនាបោះឆ្នោតរបស់គណបក្សខ្មែរអភិរក្សនិយម នៅថ្ងៃទី៩ ខែកក្កដា ឆ្នាំ២០២៣។

គណបក្សយុវជនកម្ពុជា (លេខរៀងទី១៦ក្នុងសន្លឹកឆ្នោត)

គណបក្សយុវជនកម្ពុជា ដែលមានលោក ពេជ្រ ស្រស់ ជាប្រធាន បានបង្ហាញការយកចិត្តទុកដាក់ខ្ពស់លើការអនុវត្តច្បាប់អន្តោប្រវេសន៍សម្រាប់ជនអន្តោប្រវេសន៍ទាំងអស់ដែលរស់នៅក្នុងប្រទេសកម្ពុជា។ នៅឆ្នាំ២០១៧ គណបក្សនេះបានដាក់ពាក្យបណ្តឹងប្រឆាំងនឹងគណបក្សសង្គ្រោះជាតិ ដែលនាំឱ្យមានការរំលាយគណបក្សប្រឆាំង។

គណបក្សយុវជនកម្ពុជាក៏មានគោលនយោបាយផ្តោតទៅលើការ បញ្ចុះថ្លៃសាំង និងកំណត់ប្រាក់ឈ្នួលអប្បបរមាជូនមន្ត្រីរាជការ ២លាន៨០ម៉ឺនរៀលឡើងទៅ និងកម្មករចាប់ពី១លាន៤០ម៉ឺនរៀលឡើងទៅ។មនុស្សចាស់អាយុ៦០ឆ្នាំឡើងទៅនឹងទទួលបានប្រាក់ឧបត្ថម្ភ៣០ម៉ឺនរៀលរៀងរាល់ខែ។ តាមគោលនយោបាយរបស់គណបក្សនេះ គណបក្សក៏ចង់លុបបំបាត់ការផ្សាយគ្រឿងស្រវឹងដោយអណាធិបតេយ្យ និងបោសសម្អាតការលក់ ការប្រើប្រាស់គ្រឿងញៀន និងលុបបំបាត់រាល់ការរើសអើងចំពោះអ្នកជំងឺក្រីក្រនៅតាមគ្រប់មន្ទីរពេទ្យរដ្ឋ និងព្យាបាលដោយមិនបង់ថ្លៃឡើយ។

យុទ្ធនាការឃោសនាបោះឆ្នោតរបស់គណបក្សយុវជនកម្ពុជា នៅខេត្តព្រះសីហនុ កាលពីថ្ងៃទី១៥ ខែកក្កដា ឆ្នាំ២០២៣។

គណបក្សជនជាតិដើមប្រជាធិបតេយ្យកម្ពុជា (លេខរៀងទី១៧ក្នុងសន្លឹកឆ្នោត)

លោក ប្លាង សីន ជាប្រធានគណបក្សជនជាតិដើមប្រជាធិបតេយ្យកម្ពុជា ហើយគណបក្សនេះមានគោលនយោបាយផ្តោតលើការការពារអត្តសញ្ញាណជនជាតិដើមមិនឲ្យបាត់បង់។ ជាពិសេស គណបក្សមានចក្ខុវិស័យវែងឆ្ងាយក្នុងការរៀងចំចងក្រង និងការដាក់បង្ហាញអំពីអត្តសញ្ញាណមិនឱ្យបាត់បង់ និងការពារអត្តសញ្ញាណជនជាតិដើម តាមរយៈការផ្សព្វផ្សាយ និងដាក់នៅក្នុងកម្មវិធីអប់រំសិក្សាធិការ។ ការការពារនូវកន្លែងសក្ការៈស័ក្តិសិទ្ធនានា មិនឱ្យមានការបំផ្លាញ។ ការរៀបចំឡើងវិញនូវ កន្លែងផលិតសម្ភារៈអត្តសញ្ញាណ និងការបង្ហាត់បង្ហាញនូវការតម្បាញប្រពៃណីឱ្យមានឡើងវិញនៅតាមសហគមន៍ជនជាតិដើម នៅក្នុងព្រះរាជាណាចក្រកម្ពុជា។

លោក ស្រូយ ខេត អនុប្រធានគណបក្សជនជាតិដើមប្រជាធិបតេយ្យ មានប្រសាសន៍ថា៖ «គណបក្សជនជាតិដើម ប្តេជ្ញាចិត្តខ្ពស់១០០% ក្នុងការអនុវត្តគោលនយោបាយ បើគណបក្សមានសំឡេងក្នុងរដ្ឋសភា មិនឱ្យបងប្អូនម្ចាស់ឆ្នោតខកចិត្តចំពោះគណបក្សជនជាតិដើមនោះទេ»។

គណបក្សប្រជាជនកម្ពុជា (លេខរៀងទី១៨ក្នុងសន្លឹកឆ្នោត)

គណបក្សប្រជាជនកម្ពុជា ដែលមានលោកនាយករដ្ឋមន្រ្តី ហ៊ុន សែន ជាប្រធានគណបក្ស និងកំពុងដឹកនាំរដ្ឋាភិបាល បានបង្ហាញពីការផ្តល់តម្លៃរបស់ខ្លួន លើយុត្តិធម៌ ការពារសន្តិភាព បូរណភាពទឹកដី គ្មានអំពើពុករលួយ និងពង្រាយអ្នកជំនាញកសិកម្ម នៅគ្រប់ឃុំទូទាំងប្រទេសជាដើម។

លោក សុខ ឥសាន អ្នកនាំពាក្យគណបក្សប្រជាជនកម្ពុជា មានប្រសាសន៍ថា គោលនយោបាយដែលជាអាទិភាពរបស់គណបក្ស គឺផ្តោតសំខាន់ទៅលើការផ្តល់សេវាថែទាំសុខភាពសាធារណៈដល់ប្រជាពលរដ្ឋ ឱ្យមានភាពងាយស្រួល និងបណ្តុះបណ្តាលជំនាញវិជ្ជាជីវៈដល់យុវជនមកពីគ្រួសារក្រីក្រ ដោយមិនបង់ថ្លៃ និងទទួលបានប្រាក់ឧបត្ថម្ភប្រាក់ប្រចាំខែ។ លោកបន្ថែមថា កម្មវិធីគោលនយោបាយទាំងអស់ គឺត្រូវបានយកទៅអនុវត្តជាក់ស្តែង និងបានរំលេចទៅលើគ្រប់វិស័យទាំងអស់ព្រោះគណបក្សប្រជាជនកម្ពុជាកំពុងកាន់អំណាច។

លោកបានបន្ថែមថា៖ «ផ្លូវ ស្ពាន សាលារៀន ភ្លើងអគ្គិសនី និង អាគារ ជាច្រើនក្នុងប្រទេសកម្ពុជា គឺជាការខិតខំអភិវឌ្ឍរបស់គណបក្សប្រជាជនកម្ពុជា»។

អ្នកនាំពាក្យរូបនេះបន្ថែមថា គណបក្សប្រជាជនមានគោលនយោបាយលើការពង្រឹងផ្នែកកសិកម្មក្នុងប្រទេសកម្ពុជាឱ្យមានភាពប្រសើរឡើងតាមរយៈការបញ្ជូនមន្រ្តីជំនាញចុះទៅបណ្តុះបណ្តាលប្រជាពលរដ្ឋនៅតាមជនបទ ហើយដើម្បីឱ្យវិស័យកសិកម្មកាន់តែរីកចម្រើនគណបក្សបានរៀបចំប្រព័ន្ធទឹកដើម្បីបម្រើឱ្យវិស័យកសិកម្ម។ លោកបន្តថា គោលនយោបាយរបស់គណបក្ស គឺមិនយកពន្ធទៅលើដីស្រែសម្រាប់ធ្វើកសិកម្មលក្ខណគ្រួសារ និង ផ្តល់សម្បទានដីសង្គមកិច្ច ដល់ប្រជាពលរដ្ឋដែលមិនដីសម្រាប់ធ្វើកសិកម្ម។

គោលនយោបាយអាទិភាពបន្ថែមទៀតរបស់គណបក្សនេះ រួមមាន ការពារសន្តិភាព ការពារឯករាជ្យ អធិបតេយ្យ បូរណភាពទឹកដី ឱ្យបានគង់វង្ស។ កសាងប្រព័ន្ធគាំពារសង្គមប្រកបដោយបរិយាប័ន្ន ប្រសិទ្ធភាព និងចីរភាពហិរញ្ញវត្ថុ ដែលធានាការផ្ដល់ការគាំពារដល់ប្រជាជន ក្នុងការឆ្លើយតបចំពោះហានិភ័យសេដ្ឋកិច្ច ហានិភ័យសុខភាពសាធារណៈ។ ជំរុញការអនុវត្ត «កម្ពុជាគ្មានមីនត្រឹមឆ្នាំ ២០២៥ និងកាត់បន្ថយគ្រាប់មិនទាន់ផ្ទុះឱ្យបានជាអតិបរមា។ បន្តអនុវត្តនយោបាយការបរទេសឯករាជ្យដោយផ្អែកលើច្បាប់កសាងមិត្តភាព និងកិច្ចសហប្រតិបត្តិការល្អប្រសើរ រវាងកម្ពុជាជាមួយប្រទេសទាំងអស់នៅលើសកលលោក និងអង្គការអន្តរជាតិនានា»៕