សមាគមសម្ព័ន្ធអ្នកសារព័ត៌មានកម្ពុជា

តុលាការខេត្តកំពង់ធំសម្រេចឱ្យមន្ត្រីអាវុធហត្ថ​​៣នាក់រួចទោសពាក់ព័ន្ធនឹងករណីស្លាប់អនុភូមិ

គណៈកម្មការចំពោះកិច្ចកំពុងសាកសួរអ្នកពាក់ព័ន្ធក្នុងហេតុការបណ្តាលឱ្យអនុភូមិរូង ស្លាប់កាលពីពេលកន្លងទៅ នៅឃុំក្រវ៉ា ស្រុកបារាយណ៍ ខេត្តកំពង់ធំ។ រូបភាពផ្តល់ឱ្យ
គណៈកម្មការចំពោះកិច្ចកំពុងសាកសួរអ្នកពាក់ព័ន្ធក្នុងហេតុការបណ្តាលឱ្យអនុភូមិរូង ស្លាប់កាលពីពេលកន្លងទៅ នៅឃុំក្រវ៉ា ស្រុកបារាយណ៍ ខេត្តកំពង់ធំ។ រូបភាពផ្តល់ឱ្យ

សាលាដំបូងខេត្តកំពង់ធំចេញសាលក្រមបញ្ជាក់ថា មន្ត្រី​​​​​កងរាជអាវុធហត្ថ៣នាក់មិនមាន​កំហុសទេ​ជុំវិញករណីស្លាប់អនុភូមិរូង នៅឃុំក្រវ៉ា ស្រុកបារាយណ៍ ខេត្តកំពង់ធំ ហើយពួកគេ​នឹងត្រូវដោះលែងក្នុងរយៈពេល២ខែទៀតបើសិនជាមិនមានការប្តឹងឧទ្ធរណ៍ពីអគ្គព្រះរាជអាជ្ញាសាលាឧទ្ធរណ៍។​

កាលពីថ្ងៃទី៧ ខែសីហា ឆ្នាំ២០២២ កម្លាំងកងរាជអាវុធហត្ថខេត្តកំពង់ធំ​បានបង្ក្រាបទីតាំង​ល្បែង​អនឡាញមួយកន្លែងនៅក្នុងភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ។ ការបង្ក្រាប​នេះ​បានចាប់ខ្លួនបុរស៤នាក់ ក្នុងចំណោមនោះម្នាក់ជាអនុភូមិឈ្មោះ សួង ឌ័ន បានស្លាប់​នៅ​ពេល​កំពុងដឹកយកទៅបញ្ជាការដ្ឋានអាវុធហត្ថខេត្តកំពង់ធំ។ ក្រោយករណីស្លាប់អនុភូមិរូប​នេះ មន្ត្រី​កងរាជអាវុធហត្ថ៣នាក់ត្រូវឃាត់ខ្លួនហើយបញ្ជូនទៅតុលាការ និងសម្រេចឃុំខ្លួន​បណ្តោះ​អាសន្ន​ពីបទមនុស្សឃាតដោយអចេតនា។​

​លោក សូ សុវណ្ណារ៉េត អ្នកនាំពាក្យសាលាដំបូងខេត្តកំពង់ធំ ថ្លែងថា គិតត្រឹមថ្ងៃទី២១ ខែវិច្ឆិកា ឆ្នាំ២០២២ គឺសាលក្រមរបស់សាលាដំបូងខេត្តកំពង់ធំសម្រេចលើកម្លាំង​កងរាជអាវុធហត្ថ​ទាំង៣រូបនោះបានចូលជាស្ថាពរហើយ។​ លោកបញ្ជាក់ថា សាលក្រមនោះរកមិនឃើញថា​កម្លាំង​អាវុធហត្ថទាំង៣រូបមានកំហុសទេ។​

លោក សូ សុវណ្ណារ៉េត បញ្ជាក់ថា៖ «តាមអំណាចសាលក្រមឱ្យរួចផុតពីបទចោទ។​ អំណាច​សាលក្រម១៩ច ចុះថ្ងៃទី២០ ខែតុលា ឆ្នាំ២០២២»។​

លោក សូ សុវណ្ណារ៉េត ឱ្យដឹងទៀតថា ចាប់តាំងពីសាលក្រមចេញនៅថ្ងៃទី២០ ខែតុលា ឆ្នាំ២០២២ រហូតដល់ថ្ងៃទី២១ ខែវិច្ឆិកា ឆ្នាំ ២០២២ ដែលសាលក្រមបានចូលជាស្ថាពរនេះ​មិនមានគ្រួសារ ឬភាគីណាប្តឹងជំទាស់ទេ។ លោកបន្តថា តាមផ្លូវច្បាប់បើសិនជាក្នុងរយៈ​ពេល២ខែទៀតបើមិនមានការប្តឹងឧទ្ធរណ៍ទេ នោះអ្នកទាំង៣នឹងត្រូវដោះលែងតាមអំណាច​សាលក្រមសាលាដំបូងខេត្តកំពង់ធំ។​

កញ្ញា ឌិន នារតី ជាកូនជនរងគ្រោះថ្លែងថា ដោយសារតែរូបគាត់មិនមានលុយ និងពេលវេលា​ក្នុង​ការធ្វើដំណើរទៅមកញឹកញាប់ទៅតុលាការ រូបគាត់ និងគ្រួសារក៏សម្រេចទទួលយក​សំណង​១ម៉ឺន៥ពាន់ដុល្លារ ហើយដកពាក្យបណ្តឹងវិញ។​

កញ្ញា ឌិន នារតី បញ្ជាក់ថា៖«ដោយសារខ្ញុំអត់ចង់មានបញ្ហា នៅពេលខ្ញុំយកសំណង​ទៅ​ក៏ខ្ញុំនិយាយជាមួយតុលាការថា ស្រេចតែលើតុលាការកាត់ចឹងទៅណាបង។​ ដោយសារ​ណាមួយខ្ញុំត្រូវឡើងចុះៗ ខ្ញុំនៅភ្នំពេញ ខ្ញុំត្រូវលក់នៅភ្នំពេញវាពិបាក»។

រូបថតរបស់លោក សួង ឌ័ន អនុភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ ដែលបានស្លាប់ ក្នុងយុទ្ធនាការបង្រាបល្បែងស៊ីសងមួយកន្លែងដោយមន្ត្រីកងរាជអាវុធហត្ថ ខេត្តកំពង់ធំ។ រូបភាពផ្តល់ឱ្យ

លោក អំ សំអាត នាយក​ទទួលបន្ទុក​កិច្ចការទូទៅ​នៃអង្គការ ​លីកាដូ យល់ឃើញថា ករណីនេះជា គំរូមិនល្អដែលអ្នកអនុវត្តច្បាប់អនុវត្តការងារ​ហើយមានបញ្ហា​តែមិនមាន​អ្នកទទួលខុសត្រូវ។​

លោក អំ សំអាត ថ្លែងថា៖ «បើសិនជាតុលាការសម្រេចក្តីចេញសាលក្រមមិនមានពិរុទ្ធភាព​លើរឿងហ្នឹង វាបញ្ហា​មិន​មានអ្នកទទួលខុសត្រូវ ក្នុងព្រឹត្តិការណ៍ដែលបានកើតឡើង បានន័យ​ថា ក្នុងអង្គហេតុ​ដែល​បានកើតឡើងបណ្តាលឱ្យមានមនុស្សស្លាប់។​ អាហ្នឹងជាគំរូអាក្រក់​មួយ​សម្រាប់​អ្នកអនុវត្ត​ច្បាប់តទៅទៀត»

អ្នក​នាំ​ពាក្យ​សមាគម​ការពារ​សិទ្ធិ​មនុស្ស​អាដហុក លោក សឹង សែនករុណា ជំរុញឱ្យស្ថាប័ន​ពាក់ព័ន្ធយកចិត្តទុកដាក់លើសំណុំរឿងនេះ ដើម្បីធានាកុំឱ្យមាន​ជនរងគ្រោះបន្ត និងនាំឱ្យប៉ះ​ពាល់​ដល់ដំណើរការអនុវត្តច្បាប់។​

លោក សែនករុណា បន្ថែមថា៖ «យើងចង់ឃើញការអនុវត្តន៍ច្បាប់គួរ​តែមានការ​ពិនិត្យ​មើល និង​អនុវត្តន៍ឱ្យបានតឹងរឹងចំពោះបទល្មើសបែបហ្នឹង ពាក់ព័ន្ធអំពើទារុណកម្ម ឬ ហិង្សា​ដែល​បណ្តាលឱ្យមានមនុស្សស្លាប់បែបហ្នឹងវាមិនគួរកើតមានឡើងទៀតទេនៅក្នុងសង្គម​កម្ពុជា»។​

ជុំវិញករណីនេះ លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស​មិនបកស្រាយ​ទេ ដោយលោករុញឱ្យទៅសួរតុលាការ។

លោក អេង ហ៊ី គ្រាន់តបយ៉ាងខ្លីថា៖ «សួរទៅតុលាការបង! បាទៗ! ហ្នឹងហើយ អរគុណ! ពាក់ព័ន្ធនឹងតុលាការសួរទៅតុលាការ»។  

ចំណែក មេបញ្ជាការកងរាជអាវុធហត្ថខេត្តកំពង់ធំ លោក មាស យ៉ត ក៏មិនបកស្រាយ​ដែរ។​ ក្រោយការស្លាប់លោក សួង ឌ័ន កាលពីថ្ងៃទី៧ ខែសីហា ឆ្នាំ២០២២ ភ្លាមៗ កញ្ញា ឌិន នារតី បានផ្សព្វផ្សាយសារលើហ្វេសប៊ុកបន្តបន្ទាប់ ទាមទាររកយុត្តិធម៌ដោយថា ឪពុករបស់កញ្ញា បានស្លាប់ដោយរងអំពើហិង្សាពីសមត្ថកិច្ច។ ក្រោយពីមានការផ្សព្វផ្សាយរបស់កញ្ញា ឌិន នារតី លើហ្វេសប៊ុកហើយមានការចែករំលែកច្រើនរួចមក ទើបកងរាជអាវុធហត្ថ​លើផ្ទៃ​ប្រទេសរៀបចំគណៈកម្មការចុះស្រាវជ្រាវឈានដល់ឃាត់ខ្លួនមន្ត្រីកងរាជអាវុធហត្ថ៣នាក់​បញ្ជូនទៅតុលាការ៕

137 views

ព័ត៌មានថ្មីៗ

អត្ថបទពេញនិយម