កម្លាំងនគរបាលខេត្តកណ្តាលបានចាប់ខ្លួនមនុស្ស ១១នាក់ពាក់ព័ន្ធនឹងរឿងជម្លោះដីធ្លី ដែលយោងទៅតាមវីដេអូបង្ហោះតាមបណ្តាញសង្គមបង្ហាញថា មានអំពើហិង្សាកើតឡើង កាលពីថ្ងៃអង្គារ ទី១៦ ខែកុម្ភៈ បន្ទាប់ពីអ្នកភូមិតវ៉ាបានដុតកង់ឡាន ហើយក្រោយមក នគរបាលបានចុះបង្រ្កាប។
មន្រ្តីសាលាខេត្តកណ្តាលមិនបានផ្តល់ព័ត៌មានលម្អិតពីការចាប់ខ្លួន ឬការតវ៉ាដែលនាំឲ្យមានការឃុំខ្លួនមនុស្សចំនួន ១១នាក់នោះទេ។ យ៉ាងណាក្តី វីដេអូបង្ហោះតាមបណ្តាញសង្គមហ្វេសប៊ុកបង្ហាញថាអ្នកភូមិព្រែកល្វា ស្រុកខ្សាច់កណ្តាល ខេត្តកណ្តាល បានដុតកង់ឡានអំឡុងពេលការតវ៉ាមួយកាលពីថ្ងៃអង្គារ។
ភ្លាមៗនោះ វីដេអូបង្ហាញពីប៉ូលិសមួយក្រុមប្រមូលផ្តុំគ្នា ហើយបន្ទាប់មកបានចូលបង្រ្កាបក្រុមអ្នកភូមិតវ៉ា ដោយបានចាប់ខ្លួនមនុស្សចំនួន១១នាក់ ក្នុងនោះមានស្រ្តី ០៤នាក់ និងបុរស ០៧នាក់។
អភិបាលស្រុកខ្សាច់កណ្តាល លោក ប៊ុន ផេង បានចោទប្រកាន់អ្នកភូមិពីការប្រើប្រាស់កម្លាំងខ្លាំងជ្រុលអំឡុងពេលតវ៉ា ដែលលោកនិយាយថា ជាបទល្មើសឧក្រិដ្ឋ។ លោកបានបន្តថា រឿងក្តីនេះត្រូវបានបញ្ជូនបន្តទៅតុលាការថ្នាក់ខេត្តរួចហើយ។
លោក រឿន ណារ៉ា ស្នងការរងនគរបាលខេត្តកណ្តាល បានបញ្ជាក់ថា មនុស្ស ១១នាក់ត្រូវបានបញ្ជូនទៅស្នងការដ្ឋាននគរបាលខេត្តកាលពីថ្ងៃពុធ ទី១៧ បន្ទាប់មកពួកគេត្រូវបានបន្តនិតិវិធីដោយបញ្ជូនទៅតុលាការខេត្តកណ្តាលនៅថ្ងៃព្រហស្បតិ៍។ លោកណារ៉ាបានលើកឡើងថា អ្នកភូមិបានចូលកាន់កាប់ដីឯកជនដោយខុសច្បាប់។
លោកបានថ្លែងថា៖ «ពួកគាត់អះអាងថា ពួកគាត់មានកម្មសិទ្ធិលើដីនោះ ហើយពួកគាត់នៅតែនិយាយថា ជាដីរបស់ពួកគាត់ ប៉ុន្តែពួកគាត់មិនមានឯកសារនោះទេ។ ដូច្នេះ ពួកគាត់ចូលកាន់កាប់ដោយខុសច្បាប់»។
អ្នកនាំពាក្យសាលាដំបូងខេត្តកណ្តាល លោក ទិន សុចិត្រា បានបញ្ជាក់នៅព្រឹកថ្ងៃសុក្រនេះថា តំណាងអយ្យការបានបញ្ចប់ការសាកសួរប្រជាពលរដ្ឋទាំង១១នាក់ និងបានបញ្ជូនទៅចៅក្រមស៊ើបសួរ ដើម្បីបន្តនិតិវិធី។
យោងទៅតាមឯកសារមួយដែលនិយាយលម្អិតអំពីជម្លោះ ដែលខេមបូចា ទទួលបាន គឺមានគ្រួសារចំនួន១០ មានជាប់ពាក់ព័ន្ធនៅក្នុងជម្លោះដីធ្លីខាងលើជាមួយបុគ្គលឈ្មោះ ហង់ រាំង។ ឯកសារនោះបានសរសេរថា គ្រួសារចំនួន ១០ត្រូវបានផ្តល់នូវដីចំនួន ០៣ហិកតាកាលពីឆ្នាំ ១៩៨៥ ក្នុងសម័យសាធារណរដ្ឋកម្ពុជា។
បន្ទាប់មក គ្រួសារខាងលើបានបន្តលក់ដីមួយផ្នែកដល់បុគ្គលឈ្មោះហង់ រាំង។ ប៉ុន្តែ ពួកគេបានចោទប្រកាន់ ហង់ រាំង ពីការររំលោភយកដីដែលខ្លួនកាន់កាប់។
របាយការណ៍បាននិយាយថា អាជ្ញាធរស្រុកបានព្យាយាមដោះស្រាយជម្លោះចំនួន ០៧លើក ហើយបានបញ្ឈប់គ្រួសារចំនួន ១០ពីការធ្វើរបងដើម្បីដាក់ខណ្ឌសីមាលើដីដែលខ្លួនកាន់កាប់។
CamboJA មិនអាចរកកន្លែងស្នាក់នៅ ឬរកឃើញលេខទំនាក់ទំនងរបស់ឈ្មោះ ហង់ រាំង នោះទេ។
លោក ញ៉េប ស៊្រុន អាយុ ២៧ឆ្នាំ ដែលឪពុកម្តាយរបស់លោកត្រូវបានចាប់ខ្លួនអំឡុងពេលការតវ៉ា បានធ្វើការតវ៉ានៅខាងក្រៅ ស្នងការដ្ឋាននគរបាលខេត្តកណ្តាល ជាមួយមនុស្ស ១០នាក់ផ្សេងទៀត ដោយទាមទារឲ្យមានការដោះលែងសាច់ញ្ញាតិរបស់លោក។
លោកបានថ្លែងថា៖ «ប៉ូលិសបានប្រើប្រាស់អំពើហិង្សាប្រឆាំងនឹងមនុស្សចាស់។ តើម្តាយរបស់ខ្ញុំអាយុ ៧០ឆ្នាំ អាចប្រើអំពើហិង្សាលើពួកគាត់បានយ៉ាងដូចម្តេចទៅ?»។
លោកបានថ្លែងបន្តថា៖ «យើងចង់បានយុត្តិធម៌ ហើយយើងស្នើឲ្យអាជ្ញាធរវិនិច្ឆ័យដោយយុត្តិធម៌ ហើយស្វែងរកយុត្តិធម៌ជូនជនក្រីក្រ» ដោយលោកលើកឡើងថា បុគ្គលឈ្មោះ ហង់ រាំង គឺមកពីគ្រួសារអ្នកមាន ដែលមានទំនាក់ទំនងជាមួយប៉ូលិស។
លោក អំ សំអាត អនុប្រធានអង្គការសិទ្ធិមនុស្សលីកាដូ បាននិយាយថា អាជ្ញាធរមិនគួរប្រញាប់ប្រញាល់បញ្ចូនមនុស្សទាំង ១១នាក់ខាងលើទៅតុលាការ ដោយមិនបានស៊ើបអង្កេតពីការចោទប្រកាន់ឲ្យបានសមស្របនោះទេ។
លោកបានថ្លែងថា៖ «ជាទូទៅ ជនក្រីកគឺជាជនរងគ្រោះពីជម្លោះដីធ្លី ហើយត្រូវការស៊ើបអង្កេតមុនការចាប់ខ្លួនដើម្បីបញ្ចៀសអំពើអយុត្តិធម៌»៕
ប្រែសម្រួលពីអត្ថបទភាសាអង់គ្លេស៖ 11 Kandal villagers detained over murky land dispute
