សមាគមសម្ព័ន្ធអ្នកសារព័ត៌មានកម្ពុជា

វិវាទការងារនៅណាហ្គាវើលដ៍ក្លាយជាបញ្ហារ៉ាំរ៉ៃ ដោយសារក្រុមហ៊ុនមិនទទួលយក​បុគ្គលិកឱ្យចូលធ្វើការវិញ

កូដករក្រុមហ៊ុនណាហ្គាវើលដ៍ស្រែកសុំឲ្យជួយ ខណៈអាជ្ញាធរបានចាប់ខ្លួនពួកគេដាក់ចូលក្នុងឡានក្រុង នៅពេលដែលពួកគេព្យាយាមទៅធ្វើកូដកម្មនៅមុខសណ្ឋាគារ និងកាស៊ីណូណាហ្គាវើលដ៍ ក្នុងរាជធានីភ្នំពេញ។ រូបថតនៅថ្ងៃទី២០ ខែមេសា ឆ្នាំ២០២២។ ខេមបូចា/ព្រីង សំរាំង
កូដករក្រុមហ៊ុនណាហ្គាវើលដ៍ស្រែកសុំឲ្យជួយ ខណៈអាជ្ញាធរបានចាប់ខ្លួនពួកគេដាក់ចូលក្នុងឡានក្រុង នៅពេលដែលពួកគេព្យាយាមទៅធ្វើកូដកម្មនៅមុខសណ្ឋាគារ និងកាស៊ីណូណាហ្គាវើលដ៍ ក្នុងរាជធានីភ្នំពេញ។ រូបថតនៅថ្ងៃទី២០ ខែមេសា ឆ្នាំ២០២២។ ខេមបូចា/ព្រីង សំរាំង

បុគ្គលិកណាហ្គាវើលដ៍នៅតែតស៊ូជំនះចេញធ្វើកូដកម្មដោយសន្តិវិធីនៅមុខក្រុមហ៊ុន​ណាហ្គាវើលដ៍ ដើម្បីទាមទារឱ្យ​ក្រុមហ៊ុនទទួល​យកបុគ្គលិកឱ្យចូលធ្វើការវិញ​ ទោះបីជា​មាន​ការចាប់ពីសំណាក់អាជ្ញាធរក្ដី ស្របពេលដែលកិច្ចប្រជុំចរចាកន្លងទៅក្រុមហ៊ុនបានបដិសេធ ដូច្នេះបញ្ហានេះមានការវិវត្តទៅជាវិវាទរ៉ាំរ៉ៃ។​

គិតមកត្រឹមថ្ងៃទី២០ ខែមេសា ឆ្នាំ២០២២នេះ វិវាទការងាររវាងបុគ្គលិក និងក្រុមហ៊ុន​ណាហ្គាវើលដ៍ មិនទាន់ឈានទៅរកដំណោះស្រាយរួមនៅឡើយទេ ដោយភាគីទាំងពីរ​នៅរក្សាជំហររៀងខ្លួន ទោះបីមានកិច្ចប្រជុំជាច្រើនលើកច្រើនសារក្ដី។

ចំពោះភាពឈរទ្រឹងមួយកន្លែងនេះ ទើបបុគ្គលិកណាហ្គាវើលដ៍នៅតែបន្តធ្វើកូដកម្ម​ជា​រៀង​រាល់​ថ្ងៃ។ ជាក់ស្ដែង នារសៀលម៉ោង២នេះ មានបុគ្គលិកស្រីប្រុសចំនួន១១៩នាក់ បាន​ព្យាយាមដើរទៅតវ៉ាមុខក្រុមហ៊ុន តែត្រូវអាជ្ញាធរចាប់ដាក់ឡានបញ្ជូនទៅម្ដុំសួនសត្វសាហ្វារី រាជធានីភ្នំពេញ។

បើតាម អ្នកស្រីម៉ម សុវឌ្ឍិន ជាបុគ្គលិកនៃក្រុមហ៊ុនណាហ្គាវើលដ៍ ដែលបន្តធ្វើកូដកម្មមក​ទល់ថ្ងៃនេះ បានឱ្យដឹងថា មូលហេតុដែលអ្នកស្រីចេញធ្វើកូដកម្ម ដោយសារតែអ្នកស្រី​យល់​ថាកម្មកររាប់រយនាក់រងភាពអយុត្តិធម៌ពីការបញ្ឈប់ការងារពីសំណាក់ថៅកែ។ ហើយមកទល់​ពេលនេះពួកគេមិនទាន់ទទួលបានដំណោះស្រាយសមរម្យណាមួយ ដែលអាចទទួលយក​បានឡើយ។

អ្នកស្រីបន្តថា ទន្ទឹមនឹងមិនទាន់មានដំណោះស្រាយ គឺខាងតុលាការមិនទាន់ទម្លាក់បទចោទ មកលើថ្នាក់ដឹកនាំសហជីពនៅឡើយទេ។

អ្នកស្រីប្រាប់ថា៖«ការចេញធ្វើកូដកម្មនេះរយៈពេល៤ខែមកហើយ ហើយទោះបីជាមាន​ការ​ដោះលែងថ្នាក់ដឹកនាំសហជីពឱ្យនៅក្រៅឃុំ តែអត់ទាន់ទម្លាក់បទចោទ ហើយអត់បាន​ដោះស្រាយចេញសូម្បីមួយចំណុច»។

ថ្វីបើមកទល់ពេលនេះមិនទាន់មានដំណោះស្រាយរួម តែអ្នកស្រីសុវឌ្ឍិន នៅតែមាន​សុទិដ្ឋិនិយមខ្ពស់ទៅលើក្រសួងពាក់ព័ន្ធ ក្នុងនោះគឺក្រសួងការងារជាពិសេស ថានឹងអាច​ចូលរួមឈឺឆ្អាលពីសុខទុក្ខរបស់បុគ្គលិក ហើយស្វែងរកយុត្តិធម៌ឱ្យពួកគេ ដោយយក​ច្បាប់ការងារដែលបានចែងមកប្រើ ដោយកុំអូសបន្លាយពេលយូរដូច្នេះ។

បុគ្គលិករូបនេះបន្ថែមថា៖«ក្រសួងការងារគួរតែយកច្បាប់ដែលបានចែងក្នុងរដ្ឋធម្មនុញ្ញ និងគោរពអនុសញ្ញាស្នូល ILO យកទាំងអស់ហ្នឹងមកប្រើ កុំអូសបន្លាយយូរទៀត ងាប់គឺ​ងាប់កម្មករខ្មែរ»។

អ្នកស្រីសុវឌ្ឍិនអះអាងថា អ្នកស្រី និងកម្មករផ្សេងទៀត ចេញមកធ្វើកូដកម្មដោយសន្តិវិធី ហើយអ្នកស្រីមិនយល់ទាល់តែសោះថាហេតុអ្វីបានជាអាជ្ញាធរ នៅតែចាប់កម្មករ​ដាក់​ឡានក្រុង​ឱ្យយកទៅទុកចោលយ៉ាងដូច្នេះ។ អ្នកស្រីបន្ថែមថា ការចេញធ្វើកូដកម្មនេះ គឺជាជម្រើសតែមួយគត់ ដែលពួកគេមានសិទ្ធិពេញលេញក្នុងការតតាំងជាមួយក្រុមហ៊ុន ស្របតាមច្បាប់រដ្ឋធម្មនុញ្ញ។

អ្នកស្រីបន្ថែមថា៖«បងៗអាជ្ញាធរនៅតែចាប់ អត់ដឹងថាពួកបងខុសអី?សួរនាំអីក៏មិនឆ្លើយ​ទាំងអស់ ដឹងតែចូលឡានទៅៗ សម្លុតដាក់ចូលឡាន។ ចឹងរឿងហ្នឹងវាអត់ត្រឹមត្រូវសិទ្ធិ​ក្នុងការធ្វើកូដកម្ម ពួកគាត់បំបិទសិទ្ធិកូដករខ្លាំង»។

កូដករក្រុមហ៊ុនណាហ្គាវើលដ៍ស្រែកសុំឲ្យជួយ ខណៈអាជ្ញាធរបានចាប់ខ្លួនពួកគេ​ដាក់ចូលក្នុងឡានក្រុង នៅពេលដែលពួកគេព្យាយាមទៅធ្វើកូដកម្មនៅមុខសណ្ឋាគារ និងកាស៊ីណូណាហ្គាវើលដ៍ ក្នុងរាជធានីភ្នំពេញ។ រូបថតនៅថ្ងៃទី២០ ខែមេសា ឆ្នាំ២០២២។ ខេមបូចា/ព្រីង សំរាំង

ថ្លែងប្រាប់ខេមបូចា នៅរសៀលនេះ​អ្នកស្រី ឈឹម សុខន បានឱ្យដឹងថា នៅថ្ងៃទី២២ ខែមេសា ខាងមុខនេះ នឹងមានកិច្ចចរចាម្ដងទៀតរវាងតំណាងសហជីព និងក្រុមហ៊ុន។ អ្នកស្រីថា ពី​ខាង​សហជីពនៅតែមានក្ដីរំពឹងថានឹងមានដំណោះស្រាយ ពីព្រោះថាប្រសិនបើ​បញ្ហានេះ​អូស​បន្លាយទៅមុខទៀត វានឹងប៉ះពាល់ដល់មុខមាត់រដ្ឋាភិបាល។

អ្នកស្រីបន្តថា  ខាងក្រុមហ៊ុនគប្បីចូលតុចរចាប្រកបដោយភាពស្មោះត្រង់ ជាជាងទៅចូលរួម​ចរចាហើយចាំតែបដិសេធសំណើររបស់តំណាងកម្មករ។ ចំណែកខាងក្រសួងការងារ បាន​ត្រឹម​តែតាំងខ្លួនជាអ្នកសម្របសម្រួល មិនបានប្រើច្បាប់ការងារ​ជំរុញឱ្យក្រុមហ៊ុនដោះស្រាយ​ទៅតាមច្បាប់ឡើយ។

អ្នកស្រី សុខន បញ្ជាក់ថា៖«ប្រសិនជាគាត់នៅតែបន្តចឹងទៀត មុខមាត់ប្រទេសជាតិយើង និងមុខមាត់រដ្ឋាភិបាលវាអត់ល្អទេ។ ហើយគាត់គួរតែរកវិធានការដើម្បីដោះស្រាយ ឬជំរុញ​ឱ្យភាគីក្រុមហ៊ុនចូលតុចរចាដោយស្មោះត្រង់គោរពតាមច្បាប់»។​

អ្នកស្រីសុខនថ្លែងថា នៅតែមិនយល់ថា ហេតុអ្វីបានជាក្រុមហ៊ុនមិនព្រម​ទទួលបុគ្គលិក​ដែលសុំចូលធ្វើការវិញ ខណៈបុគ្គលិកដែលកំពុងធ្វើការស្ម័គ្រចិត្តឈប់មាន​ច្រើនលើស​បុគ្គលិកដែលសុំចូលធ្វើការ។

អ្នកស្រីឱ្យដឹងទៀតថា៖«ដំណោះស្រាយដែលយើងដាក់ទៅ គឺយើងឃើញថាក្រុមហ៊ុន​អត់ប៉ះពាល់អីទេ ហើយបុគ្គលិកដែលស្ម័គ្រចិត្តច្រើនជាងអ្នកចង់ចូលធ្វើការ យើងក៏វា​អត់យល់ដែរហ្នឹងណា»។

ចំណែកលោក ម៉េត មាសភក្ដី អ្នកនាំពាក្យសាលារាជធានីភ្នំពេញ បានមានប្រសាសន៍ថា សាលាក្រុងធ្លាប់បានចេញសេចក្ដីជូនដំណឹងជាច្រើនដងមកហើយ ជុំវិញការចេញ​ធ្វើ​បាតុកម្ម​ដោយខុសច្បាប់របស់បុគ្គលិកណាហ្គាវើលដ៍។ លោកបន្តថា ការធ្វើបាតុកម្ម​នៅតាម​ដងផ្លូវ​សាធារណៈជារឿងមិនត្រូវ ដែលបង្កឱ្យប៉ះពាល់ទៅដល់អ្នកដទៃទៀត ខណៈបុគ្គលិក​ទាំង​នោះ​មានជម្រើសផ្សេងទៀត។

លោក មាសភក្ដី ថ្លែងយ៉ាងដូច្នេះថា៖«មិនគួរណាគាត់យកជម្រើសហ្នឹង​សម្រាប់ដោះស្រាយ​បញ្ហាខ្លួនឯង ព្រោះថាមានជម្រើសផ្សេងៗទៀតដូចជាទៅក្រសួងការងារ»។

លោក មាសភក្ដីបន្តថា ការធ្វើកូដកម្មនេះគឺខុសច្បាប់ ឱ្យលោកមិនចង់​ឱ្យបុគ្គលិកកម្មករ​ធ្លាក់ទៅផ្លូវផ្សេង ដោយសារតែបញ្ហានេះគឺមានតែមួយទេ គឺវិវាទការងារ ប៉ុន្តែដោយសារតែ​ការអនុវត្តន៍វិធីសាស្រ្តក្នុងការដោះស្រាយមិនត្រឹមត្រូវទើបរុញច្រានទៅសកម្មភាពមិនល្អមួយផ្សេងទៀត។

លោក មាសភក្ដី ឱ្យដឹងទៀតថា ប្រសិនបើបុគ្គលិកណាហ្គាវើលដ៍ ចង់សម្ដែង​មតិស្រប​តាម​ច្បាប់ គប្បីធ្វើជាលាយលក្ខណ៍អក្សរទៅសាលាក្រុង ហើយទៅបញ្ចេញមតិ​នៅទីលាន​ប្រជាធិបតេយ្យ មិនមែនប្រមូលផ្ដុំគ្នានៅតាមផ្លូវសាធារណៈទេ។ ដូច្នះ អាជ្ញាធរមិនបានរឹតត្បិត បំបិទសិទ្ធិសេរីភាព ក្នុងការសម្ដែងមតិឡើយ​ គឺធ្វើទៅតាមច្បាប់តែប៉ុណ្ណោះ។

លោកបន្ថែមថា៖«យើងមានសិទ្ធិ តែកុំប្រើសិទ្ធិនេះទៅប៉ះនឹងសិទ្ធិគេ  ចង់ធ្វើការសម្ដែងមតិ​ដែលស្របតាមច្បាប់ ត្រូវអនុវត្តតាមច្បាប់ ហើយច្បាប់បង្ហាញថាឱ្យបងប្អូន​ដាក់ពាក្យមក​អាជ្ញាធរដែនដី ប្រាប់ពីគោលបំណងការសម្ដែងមតិ»។

ចំណែក លោក ហេង សួរ អ្នកនាំពាក្យក្រសួងការងារ​ មានប្រសាសន៍ថា អ្នកសារព័ត៌មាន​យើងបានទាក់ទងទៅជាច្រើនដងដែរ ប៉ុន្តែមិនមានការឆ្លើយតបឡើយ។

លោក អំ សំអាត នាយកទទួលបន្ទុកកិច្ចការទូទៅ នៃអង្គការលីកាដូ បានឱ្យដឹងថា ការអូស​បន្លាយនៃវិវាទនេះ គឺដោយសារតែការគិតផលប្រយោជន៍ជាធំ មានន័យថា​ខាងក្រុមហ៊ុន​មាន​ប្រភពចំណូលរាប់លាន ដោយគិតទៅលើផលប្រយោជន៍ធំ ជាជាងការដោះស្រាយ​ជូន​កម្មករ។

លោកសំអាតបន្ថែមថា តាមការសង្កេតរបស់លោក កន្លងមក ការរិះគន់ច្រើនជុំវិញ​បញ្ហាវិវាទ​ការងារ ដែលវាប្រែក្លាយទៅជាគូបដិបក្ស និងទំនាស់។ ហើយយូរទៅៗ​ក្រុមហ៊ុន​ណាហ្គាវើលដ៍​មិនមានបញ្ហាអ្វីជាមួយកម្មករឡើយ ទៅជាអាជ្ញាធរមានបញ្ហាជាមួយនឹង​បុគ្គលិក​ណាហ្គាវើលដ៍ប្រឈមមុខដាក់គ្នាទៅវិញ។

លោកសំអាតមានប្រសាសន៍ថា៖«ចឹងវាប្រែក្លាយកាន់តែធំទៅៗ  ខាងក្រុមអង្គការសិទ្ធិ និងអង្គការសហប្រជាជាតិ អង្គការក្រៅរដ្ឋាភិបាលជាតិ និងអន្តរជាតិ មើលឃើញថា វាជារឿងប៉ះពាល់ទៅដល់សេរីភាព ការរំលោភសិទ្ធិសហជីព និងបុគ្គលិកណាហ្គាវើលដ៍»។

លោកថា ក្នុងនាមជាអង្គការសង្គមស៊ីវិលល មានការបារម្ភថា ការអូសបន្លាយនៃការចរចា​ច្រើនលើកច្រើនសារ ដែលមិនទាន់មានចំណុចរួមណាអាចជាសះនឹងគ្នាបាននេះ  អាចនឹង​មានការចាប់ខ្លួនជាថ្មី ឬការចាប់ខ្លួនបន្ថែមដាក់ពន្ធនាគារជាដើម។

លោក សំអាត មានប្រសាសន៍បន្ថែមថា៖«យើងបារម្ភថាមានបាតុភាពផ្សេងៗ យើងមិនចង់​ឃើញរឿងហ្នឹងទៀតទេ យើងចង់ឃើញការស្វែងរកដំណោះស្រាយ​នៃការចរចា​ដោយ​សន្តិវិធីដើម្បីបញ្ចប់វិវាទការងារនេះ»។

គួរជម្រាបជូនថា ចាប់តាំងពីបុគ្គលិកក្រុមហ៊ុនណាហ្គាវើលដ៍ត្រូវបានបញ្ឈប់ពីការងារ ពួកគេ​បានចេញធ្វើកូដកម្មដោយសន្តិវិធីអស់រយៈពេលជាច្រើនខែ តែមកទល់ពេលនេះ​នៅតែ​មិន​ទាន់ទទួលបានលទ្ធផលនៅឡើយទេ។ ហើយបើតាមកម្មករ ពួកគេអះអាងថា នៅតែបន្តធ្វើ​កូដកម្មដដែលដរាបណាដំណោះស្រាយមិនទាន់មាន៕

231 views

ព័ត៌មានទាក់ទង

ព័ត៌មានថ្មី

អត្ថបទពេញនិយម