ប្រជាពលរដ្ឋមួយចំនួននៅក្នុងខេត្តស្វាយរៀងឱ្យដឹងថា ការស្ថាបនាផ្លូវលំជនបទនៅមូលដ្ឋានដែលពួកគេរស់នៅ មានភាពមិនប្រក្រតី និងខ្វះតម្លាភាព។ ពលរដ្ឋខ្លះប្រាប់ថាពួកគាត់មិនបានទទួលព័ត៌មានពីដំណើរការដេញថ្លៃស្ថាបនាផ្លូវទាល់តែសោះ ឯពលរដ្ឋខ្លះទៀតថាផ្លូវដែលសង់រួចនោះមានគុណភាពមិនសូវល្អ។
ពលរដ្ឋមួយភាគធំមិនបានចូលរួមដំណើរការដេញថ្លៃ
កាលពីកំឡុងខែសីហា ឆ្នាំ២០២៣ ភូមិកំពោតប្រស់ ស្ថិតក្នុងសង្កាត់ច្រកម្ទេស ក្រុងបាវិត ខេត្តស្វាយរៀង បានល្បីឈ្មោះពេញប្រទេស ដោយសារតែសារព័ត៌មានអនឡាញផ្សាយពីការស្ថាបនាផ្លូវនៅភូមិនេះមានគុណភាពមិនល្អ។
នៅកណ្ដាលថ្ងៃត្រង់ក្រោមដើមឈើខាងមុខផ្ទះស្ថិតនៅភូមិកំពោតប្រស់ សង្កាត់ច្រកម្ទេស ក្រុងបាវិត ខេត្តស្វាយរៀង ស្ត្រីវ័យជាង៤០ឆ្នាំ បានប្រាប់ថា គាត់ឈ្មោះ សុភី។ ស្ត្រីរូបនេះសុំមិនបង្ហាញទាំងនាមត្រកូលទេ ព្រោះខ្លាចអាជ្ញាធរមូលដ្ឋានស្ដីបន្ទោស។អ្នកស្រី សុភី ប្រាប់ថា គាត់មិនបានទទួលព័ត៌មានពីដំណើរការលើកគម្រោងឬដេញថ្លៃសង់ផ្លូវនេះឡើយ។
អ្នកស្រីបញ្ជាក់៖ «ខ្ញុំនៅផ្ទះរហូតតែខ្ញុំអត់ដឹងថាខាងភូមិឃុំគាត់លើកគម្រោងហ្នឹងតាំងពីអង្កាល់ទេ ដឹងនៅពេលលឺខាងភូមិមកប្រាប់ថាបានផ្លូវថ្មី ផ្លូវថ្មី»។
នៅពេលអ្នកសារព័ត៌មានសួរថា តើពលរដ្ឋផ្សេងៗទៀតដឹងរឿងដេញថ្លៃធ្វើផ្លូវហ្នឹងឬអត់?ហើយអ្នកស្រីដឹងថាពលរដ្ឋមានសិទ្ធិចូលរួមក្នុងដំណើរការដេញថ្លៃឬអត់? អ្នកស្រី សុភី ឆ្លើយថា៖ «ខ្ញុំមិនលឺអ្នកណានិយាយថាពួកគេបានទៅសាលាឃុំដេញថ្លៃទេ តែដឹងគឺដឹងទាំងអស់គ្នាពេលគេធ្វើផ្លូវហ្នឹងហ្មង។ និយាយត្រង់ទៅ ខ្ញុំតែងគិតថាការងារដេញថ្លៃអីអស់ហ្នឹងមិនមែនជាការងារពួកខ្ញុំជាប្រជាជនអ៊ីចឹង»។
បុរសវ័យជាង៥០ឆ្នាំលោក ហេង ឆន ថា លោកបានទទួលព័ត៌មានពីការផ្ដួចផ្ដើមគម្រោងស្ថាបនាផ្លូវនេះតាមរយៈក្រុមប្រឹក្សាសង្កាត់។ ប៉ុន្តែលោកថា ដំណឹងនេះជាព័ត៌មាននៅតៀមកាហ្វេប៉ុណ្ណោះ។
លោក ហេង ឆន បញ្ជាក់ថា៖ «ខ្ញុំដឹងតើ! ខ្ញុំទៅកាហ្វេរាល់ថ្ងៃ ខាងអ្នកធ្វើការសង្កាត់នោះមកប្រាប់ថាផ្លូវនេះគេធ្វើឆ្នាំនេះ ផ្លូវនោះធ្វើឆ្នាំក្រោយប៉ុន្តែពេលរៀបធ្វើផ្លូវហ្នឹងបានភូមិគាត់ដើរប្រាប់ថាធ្វើប៉ុន្មានម៉ែត្រ ទទឹងប៉ុន្មាន។ បើថាខាងភូមិឃុំមកហៅទៅប្រជុំប្រាប់អីនោះគឺអត់មានទេ»។
ទោះជាយ៉ាងណាក្ដីមេភូមិកំពោតប្រស់ប្រាប់ថា ពលរដ្ឋក្នុងភូមិមួយចំនួនក៏បានចូលរួមក្នុងដំណើរការដេញថ្លៃសង់ផ្លូវនេះដែរ។
មេភូមិកំពោតប្រស់ លោក ម៉ុត សាវ៉េត លើកឡើងថា លោកបានជូនពត៌មានទៅពលរដ្ឋតាមរយៈផ្ទាល់មាត់ និងប្រាប់តៗគ្នាពីដំណើរការស្ថាបនាផ្លូវនេះ ប៉ុន្តែពលរដ្ឋតិចតួចប៉ុណ្ណោះដែលបានចូលរួម។
លោក ម៉ុត សាវ៉េត បន្តថា៖ «ភូមិយើងខ្ញុំ ប្រាប់រហូតហ្នឹងតែអ្នកខ្លះគាត់ស្ដាប់ទៅ អ្នកខ្លះទៀតគាត់រវល់ការងារគាត់ទៅ។ ខ្ញុំចាំថាកាលដេញថ្លៃហ្នឹងមានពលរដ្ឋប្រហែលម្ភៃទៅសាមសិបនាក់ចូលរួម ដែរហេតុនេះ បើថាពលរដ្ឋភាគច្រើនមិនបានចូលរួមគឺមិនបានមែន ប៉ុន្តែមិនអត់សោះទេគឺមានខ្លះចូលរួមដែរ»។
បើតាមអាជ្ញាធរភូមិការដេញថ្លៃស្ថាបនាផ្លូវនេះមានក្រុមហ៊ុនបួនចូលរួមដេញថ្លៃ។ ក្នុងនោះក្រុមហ៊ុនឈ្មោះសុគន្ធា ជាអ្នកដេញថ្លៃឈ្នះដោយទទួលសិទ្ធិស្ថាបនាផ្លូវមួយខ្សែក្នុងភូមិកំពោតប្រស់ ជាផ្លូវបេតុងប្រវែង ១ ៥០០ម៉ែត្រ និងទទឹង៤ម៉ែត្រកន្លះ។
ផ្លូវសង់រួចមានគុណភាពមិនល្អ បង្ករឱ្យពលរដ្ឋមិនសប្បាយចិត្ត
កាលពីខែកញ្ញាដំណើរការស្ថាបនាផ្លូវនៅភូមិកំពោតប្រស់ជិតរួចរាល់បែរជាបង្ករឱ្យពលរដ្ឋមិនពេញចិត្តជាខ្លាំង។ ពលរដ្ឋបានតវ៉ា និងរិះគន់តាមរយៈបណ្ដាញព័ត៌មានអនឡាញក្រោយហេតុផលថា ផ្លូវនោះមើលទៅបេតុងស្ដើងហើយមានស្នាមប្រេះដោយកន្លែងផង។
ប្រជាពលរដ្ឋរស់នៅភូមិកំពោតប្រស់ អ្នកស្រី សុភី រំលឹកថា អ្នកភូមិបានរាយការណ៍ទៅអ្នកកាសែតបន្ទាប់ពីឃើញផ្លូវសង់រួចមិនមានគុណភាព។
អ្នកស្រី សុភី ឱ្យដឹងថា៖ «អ្នកនៅភូមិនេះគេតេហៅពូហ៊ន(អ្នកសារព័ត៌មាន) ឱ្យមកថតឡាយ(ផ្សាយ)ឡើងផ្អើលព្រោះអី? ព្រោះផ្លូវហ្នឹងមើលទៅអន់ពេក កន្លែងខ្លះប្រេះ កន្លែងខ្លះទៀតរាងស្តួច ក្រវ៉េមក្រវ៉ាមអាក្រក់មើលណាស់។ ផ្លូវហ្នឹងកាលចាក់ភ្លាមៗមិនដូចឥលូវទេ តែអន់រកមើលមិនយល់ហ្មង»។
ជំនួយការភូមិកំពោតប្រស់ លោក ម៉ៅ សំអុន លើកឡើងថា ប្រជាពលរដ្ឋទាំងអស់មិនសុខចិត្តព្រោះតែឃើញនឹងភ្នែកថាផ្លូវសង់មិនមានគុណភាព។ ទោះយ៉ាងណាលោកថានេះជាកំហុសបច្ចេកទេសរបស់ក្រុមហ៊ុនសាងសង់ផ្លូវប៉ុណ្ណោះមិនទាក់ទងនឹងអាជ្ញាធរមូលដ្ឋានឡើយ។
លោក ម៉ៅ សំអុន ថ្លែងថា៖ «ប្រជាជនយើងគាត់ឃើញជាក់ស្ដែងថាផ្លូវហ្នឹងបេតុងហ្នឹងស្ដើង ស្ដើងកម្រាស់ប្រហែល៥ទៅ៦ហ៊ុន(៥ទៅ៦សង់ទីម៉ែត្រ)។ពួកគាត់សួរខ្ញុំថាផ្លូវហ្នឹងត្រូវសង់កម្រាស់ប៉ុន្មាន?ខ្ញុំឆ្លើយតាមឯកសារថាមួយតឹកកន្លះ(១៥សង់ទីម៉ែត្រ)។ប្រជាជនខ្លះបានថតរូបផ្ញើតាមតេឡេក្រាមទៅអ្នកកាសែតទៅ ក៏គេមកឡាយផ្អើលពេញភូមិ»។
លោកម៉ៅ សំអុន បន្ថែមថា៖ «មេភូមិគាត់បញ្ជាខ្ញុំឱ្យតាមមើលក្រុមហ៊ុនធ្វើការរហូតមិនទំនេរទេ ប៉ុន្តែខ្ញុំខ្លួនឯងក៏មិនដឹងមិនយល់ពីការងារបច្ចេកទេសប៉ុន្មានឡើយ ដល់តែបេតុងរឹងយកម៉ែត្រទៅវាស់ជាក់ស្ដែងបានឃើញថាមិនគ្រប់ទើបរាយការណ៍ទៅលោកមេភូមិ»។
តំណាងក្រុមហ៊ុន សុគន្ធា ដែលទទួលសិទ្ធិស្ថាបនាផ្លូវលំចាក់បេតុងនៅភូមិកំពោតប្រស់បានបដិសេធមិនធ្វើអត្ថាធិប្បាយជុំវិញដំណើរការសង់ផ្លូវនេះឡើយ។
តំណាងក្រុមហ៊ុន សុគន្ធា៖ «សូមទោសបងខ្ញុំអត់ចង់បំភ្លឺអីទៀតទេ។ គេថាធ្វើផ្លូវអត់ល្អខ្វះបេតុងអីហ្នឹង ខាងខ្ញុំចាក់បំពេញរួចអស់ហើយ»។
ចៅសង្កាត់ច្រកម្ទេសលោក ហួត សម័យ មានប្រសាសន៍ថា បញ្ហាមិនប្រក្រតីក្នុងការស្ថាបនាផ្លូវលំនៅឃុំរបស់លោកបានដោះស្រាយរួចរាល់។
លោក ហួត សម័យ ថ្លែងថា៖ «ខ្ញុំមិនបកស្រាយអីទេថាផ្លូវអន់ ឥលូវលែងមានបញ្ហាហើយ ផ្លូវធ្វើរួចហើយ អីចឹងខ្ញុំមិនដឹងបំភ្លឺអីទេ។ បើមានរឿងអីថ្មីចាំនិយាយគ្នាទៀត»។
បើតាមការសង្កេតដោយភ្នែកទទេផ្លូវបេតុងអាមេចូលភូមិកំពោតប្រស់មានកន្លែងខ្លះស្តួចកន្លែងខ្លះធំ កន្លែងខ្លះតូច ហើយក៏មានកន្លែងខ្លះស្ដើងកន្លែងខ្លះក្រាស់ដែរ។
ប្រជាពលរដ្ឋដែលសុំមិនបញ្ចេញឈ្មោះបានប្រាប់ថា៖ «ខ្ញុំវាស់ហើយជាមួយមេភូមិ គឺថាមានមិនគ្រប់កម្រាស់មួយតឹកកន្លះហ្នឹងទេ អាទទឹងផ្លូវបួនម៉ែត្រកន្លះនោះក៏មានកន្លែងខ្លះមិនគ្រប់ដែរ ទោះបីចាក់ថែមរួចហើយក៏ដោយ។ តែគ្រាន់បើជាងមុនតែប៉ុណ្ណឹង គ្រាន់បើជាងគេមិនទាន់ផ្អើល»។
បច្ចុប្បន្នផ្លូវលំចូលភូមិកំពោតប្រស់ ស្ថាបនារួចរាល់រយៈពេលជាង២ខែមកហើយ។ តាមកិច្ចសន្យារវាងក្រុមហ៊ុនស្ថាបនាផ្លូវ និងអាជ្ញាធរសង្កាត់ ផ្លូវនេះនឹងត្រូវវាយតម្លៃម្ដងទៀតនៅប្រាំមួយខែបន្ទាប់ពីសង់រួច ឬអាចនិយាយថានាដើមឆ្នាំ២០២៤ខាងមុខ។
តាមគម្រោងមូនិធិសង្កាត់ច្រកម្ទេសក្រុងបាវិត ផ្លូវមួយខ្សែចូលភូមិកំពោតប្រស់នេះ ត្រូវកែលម្អដោយពីផ្លូវដីទៅជាផ្លូវក្រាលបេតុអាមេ មានប្រវែង១៥០០ម៉ែត្រ និងទទឹង៤ម៉ែត្រកន្លះ។ ការកែលម្អផ្លូវនេះ ត្រូវចំណាយប្រាក់មូលនិធិសង្កាត់ចំនួន២៦៦លាន៤សែន(២៦៦ ៤០០ ០០០)រៀលបូកនឹងទុនចូលរួម៦សែនរៀល សរុបផ្លូវនេះត្រូវចាយប្រាក់២៦៧លានរៀល។
អ្នកកាសែតដែលផ្សាយរឿងសង់ផ្លូវគុណភាពអន់ ជាប់បណ្ដឹងនៅតុលាការ
លោក ផាត់ ហ៊ន ជាអ្នកកាសែតល្បីឈ្មោះម្នាក់ប្រចាំខេត្តស្វាយរៀង។ លោក ផាត់ ហ៊ន ជាចាងហ្វាងការផ្សាយរបស់ទំព័រហ្វេសប៊ុក KH Plus news ដែលបានផ្សាយព័ត៌មានជាច្រើនស្ដីពីភាពមិនប្រក្រតីនានាក្នុងដំណើរការស្ថាបនាផ្លូវលំជនបទនៅខេត្តស្វាយរៀង។ លោក ផាត់ ហ៊ន ជាប់បណ្ដឹងនៅតុលាការខេត្តស្វាយរៀង បន្ទាប់ពីផ្សាយរឿងសង់ផ្លូវគុណភាពអន់នៅសង្កាត់ច្រកម្ទេស ក្រុងបាវិត និងផ្លូវនៅឃុំដូង ស្រុករមាសហែក ខេត្តស្វាយរៀង។
លោក ផាត់ ហ៊ន ឱ្យដឹងថា រដ្ឋបាលខេត្តស្វាយរៀងជាដើមបណ្ដឹងប្ដឹងរូបលោកទៅកាន់តុលាការ។ លោកថា ពាក្យបណ្ដឹងនេះជាការគំរាមកំហែងមួយចំពោះអ្នកកាសែតដូចរូបលោក និងជាការរារាំងចំពោះសេរីភាពសារព័ត៌មានទៀតផង។
លោក ផាត់ ហ៊ន លើកឡើងថា៖ «ពេលខ្ញុំផ្សាយរឿងអសកម្មរឿងផ្លូវអត់មានគុណភាព អាជ្ញាធរខេត្តបែរជាមកចោទខ្ញុំថាផ្សាយមិនពិត និងញុះញង់។ គេឱ្យប៉ូលីសកោះហៅខ្ញុំទៅព្រមាន។ បន្ទាប់មកប្ដឹងខ្ញុំឡើងតុលាការទៀត ខ្ញុំពិតជាឆ្ងល់ថាខ្ញុំខុសអី? បើផ្លូវគុណភាពល្អអ្នកណាទៅផ្សាយថាអន់កើត?»។
លោក ផាត់ ហ៊ន បន្ថែម៖ «ខ្ញុំជាអ្នកកាសែតគ្មានអីតតាំងទេ មានតែអំពាវនាវសូមឱ្យប្រជាពលរដ្ឋ និងអង្គការសង្គមស៊ីវិល ឬអាជ្ញាធរថ្នាក់ជាតិជួយរកយុត្តិធម៌ឱ្យខ្ញុំផង»។
អ្នកសារព័ត៌មានម្នាក់ទៀតនៅស្វាយរៀង លោក កែវ ឡាត់ លើកឡើងថា អ្នកកាសែតផ្សេងទៀតដូចជារូបលោកហាក់មានការខ្លាចរអារបន្ទាប់ពីឃើញដីកាកោះហៅលោក ផាត់ ហ៊ន។
លោក កែវ ឡាត់ ប្រាប់ថា៖ «តាំងពីមានរឿងលោក ហ៊ន មក យើងខ្ញុំដូចលែងចង់ហ៊ាន។ យើងខ្ញុំពិតជាមិនយល់ បើយើងខ្ញុំផ្សាយខុសផ្សាយមិនពិតនោះ គួរតែក្រុមហ៊ុនប្ដឹងយើងតែនេះអត់ទេ គឺអាជ្ញាធរក្លាយទៅជាដើមបណ្ដឹងប្ដឹងអ្នកកាសែតដែលលាតត្រដាងពីភាពមិនប្រក្រតីទៅវិញ»។
អ្នកសារព័ត៌មានខេមបូចា មិនអាចទាក់ទងសាលាខេត្តស្វាយរៀងដើម្បីបំភ្លឺជុំវិញការលើកឡើងរបស់អ្នកសារព័ត៌មានឡើយ។ កាលពីចុងខែសីហា ឆ្នាំ២០២៣ សាលាខេត្តស្វាយរៀង បានចេញសេចក្ដីប្រកាសព័ត៌មានមួយដោយច្រានចោលការផ្សាយរបស់លោក ផាត់ ហ៊ន តាមរយៈផេកហ្វេសប៊ុក Kh Plus newsដែលផ្សាយរៀបរាប់ពីភាពមិនប្រក្រតីនៃការស្ថាបនាផ្លូវលំនៅក្រុងបាវិត និងស្រុករមាសហែកថាជាការផ្សាយព័ត៌មានមិនពិត និងធ្វើឱ្យខូចកិត្តិយសរបស់មន្ត្រីរាជការសាធារណៈ។
លិខិតរបស់រដ្ឋបាលខេត្តស្វាយរៀងបញ្ជាក់៖ «ករណីការផ្សាយរបស់បុគ្គលឈ្មោះ ផាត់ ហ៊ន នេះបានធ្វើឱ្យប៉ះពាល់ដល់កិត្តិយសសេចក្ដីថ្លៃថ្នូរ និងមានចរិតញុះញង់ឱ្យសាធារណជនមានការរើសមន្ត្រីសាធារណៈ ដែលបុគ្គលរូបនេះអាចប្រឈមនឹងនឹងផ្លូវច្បាប់ជាធរមាន»។
អ្នកនាំពាក្យក្រសួងមហាផ្ទៃ លោក ទូច សុឃៈ មិនទាន់អាចអត្ថាធិប្បាយពីបញ្ហានេះបាននៅឡើយគិតត្រឹមថ្ងៃទី២ ខែវិច្ឆកា។ លោក ទូច សុឃៈ បានបញ្ជាក់ថា៖ «ខ្ញុំនឹងឆ្លើយតបវិញនៅពេលណាមួយសមស្រប»។
ទោះជាយ៉ាងណាក្ដី លិខិតជូនដំណឹងរបស់អគ្គនាយករដ្ឋបាលក្រសួងមហាផ្ទៃ ចុះកាលបរិច្ឆេទថ្ងៃទី១៩ ខែកញ្ញា និងត្រូវផ្សព្វផ្សាយជាសារធារណៈនៅដើមខែតុលា បានចេញបញ្ជាមួយទៅរដ្ឋបាលខេត្តស្វាយរៀងឱ្យធ្វើរបាយការណ៍លម្អិតជុំវិញភាពមិនប្រក្រតីនៃការស្ថាបនាផ្លូវលំជនបទនាសង្កាត់ច្រកម្ទេសក្រុងបាវិតនិងឃុំដូងក្នុងស្រុករមាសហែក ។
អគ្គនាយករដ្ឋបាលក្រសួងមហាផ្ទៃ លោក សួស ប្រាថ្នា លើកឡើងក្នុងលិខិតនោះថា ការផ្សព្វផ្សាយរបស់អ្នកកាសែតជុំវិញភាពមិនប្រក្រតីនៃការស្ថាបនាផ្លូវលំនៅខេត្តស្វាយរៀងជាការបង្ហាញពីលទ្ធផលនៃការអនុវត្តគម្រោងដែលមិនស្របតាមបទដ្ឋានបច្ចេកទេសទាំងបរិមាណ និងគុណភាព។
លោកបន្ថែមថា អាជ្ញាធរខេត្តត្រូវធ្វើរបាយការណ៍លម្អិតមកកាន់ក្រសួងមហាផ្ទៃដើម្បីបង្ហាញពីគណនេយ្យភាព និងតម្លាភាពក្នុងការប្រើប្រាស់ថវិកាមូលនិធិឃុំសង្កាត់។ លោកសួស ប្រាថ្នា តម្រូវឱ្យរដ្ឋបាលខេត្តស្វាយរៀងចុះវាស់វែងត្រួតពិនិត្យគុណភាពផ្លូវដែលមានបញ្ហានោះឡើងវិញ ព្រមទាំងផ្ញើសំណុំឯកសារពាក់ព័ន្ធនានាមកកាន់អគ្គនាយកដ្ឋានរដ្ឋបាលក្រសួងមហាផ្ទៃ ដើម្បីរាយការជូនរដ្ឋមន្ត្រីចាត់ការបន្តចំពោះបញ្ហានេះ។
ប្រជាពលរដ្ឋរស់នៅឃុំដូង ស្រុករមាសហែក ខេត្តស្វាយរៀង លោក សេក សឿន ប្រាប់តាមទូរស័ព្ទថា៖ «ខេត្តគេខឹងគេប្ដឹងអ្នកកាសែតផ្សាយពីផ្លូវយ៉ាប់ តែពួកខ្ញុំជាពលរដ្ឋអរគុណអ្នកកាសែត ព្រោះបើអ្នកកាសែតមិនឡាយទេ ផ្លូវហ្នឹងមិនដឹងប្រើបានប៉ុន្មានថ្ងៃ? បើគម្រោងចាក់ក្រួស ពេលអនុវត្តក្រុមហ៊ុនយកដីទៅចាក់។ ពួកខ្ញុំជាអ្នកស្រែអ្នកស្រុក ស្គាល់ច្បាស់ណាស់ថា អាមួយណាក្រួស អាមួយណាដី»។
ប្រជាពលរដ្ឋរស់នៅភូមិកំពោតប្រស់ អ្នកស្រី សុភី បន្ថែមទៀត៖ «ខ្ញុំថាបើសិនអ្នកកាសែតមិនផ្សាយទេ គេមិនកែទេ គេមិនចាក់បេតុងថែមទេ ផ្លូវហ្នឹងនឹងឆាប់ខូចមិនខាន។ ផ្សាយច្រើនហើយទើបកែបានប៉ុណ្ណឹង»។
នាយកមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គីមអេង មានប្រសាសន៍ថា លោកមិនអាចសន្និដ្ឋានបានទេថា ករណីស្ថាបនាផ្លូវនៅស្វាយរៀងនេះមានពាក់ព័ន្ធអំពើពុករលួយ ឬអត់នោះឡើយ។ លោកថា បើចង់ដឹងថាមានអំពើពុករលួយ ឬអត់ លុះត្រាតែមានការស៊ើបអង្កេតច្បាស់លាស់ទើបសន្និដ្ឋានបាន។
លោក គីមអេង ពន្យល់ពីតួនាទីរបស់រដ្ឋបាលខេត្តក្នុងដំណើរការអនុវត្តគម្រោងមូលនិធិឃុំសង្កាត់យ៉ាងដូច្នេះថា៖ «អាជ្ញាធរខេត្តចាំបាច់ត្រូវណែរនាំទៅក្រុមប្រឹក្សាឃុំសង្កាត់ឱ្យជូនដំណឹងបន្តទៅកាន់ប្រជាពលរដ្ឋក្នុងបំណងឱ្យពលរដ្ឋចូលរួមគ្រប់ដំណើរការទាំងអស់តាំងពីការគិតគូរថា ផ្លូវណាគួរធ្វើមុនធ្វើក្រោយរហូតដល់ដេញថ្លៃ និងតាមដានមើលគុណភាពផ្លូវថែមទៀត។ អាជ្ញាធរខេត្តមិនគួរទៅរករឿងពលរដ្ឋ ឬអ្នកកាសែតដែលហ៊ានរាយការណ៍ពីផ្លូវគុណភាពអន់ទេ គួរតែអរគុណពួកគេបានបើសម»។
លោក គីមអេង បន្ថែមថា៖ «ទាំងអាជ្ញាធរមូលដ្ឋានទាំងពលរដ្ឋគួរជួយមើលគ្នាជួយវាស់គ្នាថាផ្លូវហ្នឹងសង់គ្រប់តាមកិច្ចសន្យា ឬអត់?ជួយនិយាយទើបការចាយវាយថវិកាមូលនិធិឃុំសង្កាត់មានប្រសិទ្ធិភាព។ បើសិនជាគ្មានការចូលរួមពីពលរដ្ឋទេនោះគេអាចសន្និដ្ឋានបានថា ការអនុវត្តគម្រោងមិនមានតម្លាភាព»៕
