សមាគមសម្ព័ន្ធអ្នកសារព័ត៌មានកម្ពុជា

អាជ្ញាធរមូលដ្ឋានដាក់សម្ពាធឲ្យក្រុមប្រឹក្សាឃុំគណបក្សភ្លើងទៀនចូលរួមថ្កោលទោសលោក សម រង្ស៊ី

សមាជិកគណបក្សភ្លើងទៀនប្រារព្ធខួបកិច្ចព្រមព្រៀងសន្តិភាពទីក្រុងប៉ារីស កាលពីថ្ងៃទី២៣ ខែតុលា ឆ្នាំ២០២២ ក្នុងក្រុងស្ទឹងសែន ខេត្តកំពង់ធំ។ រូបភាពបង្ហោះក្នុងហ្វេសប៊ុកផេករបស់គណបក្ស។
សមាជិកគណបក្សភ្លើងទៀនប្រារព្ធខួបកិច្ចព្រមព្រៀងសន្តិភាពទីក្រុងប៉ារីស កាលពីថ្ងៃទី២៣ ខែតុលា ឆ្នាំ២០២២ ក្នុងក្រុងស្ទឹងសែន ខេត្តកំពង់ធំ។ រូបភាពបង្ហោះក្នុងហ្វេសប៊ុកផេករបស់គណបក្ស។

គណបក្ស​ភ្លើង​ទៀន​បាន​លើក​ឡើង​ថា ​អាជ្ញាធរមូលដ្ឋាន​​បាន​បង្ខំ​ឲ្យ​ក្រុម​ប្រឹក្សា​ឃុំ​-សង្កាត់ របស់​ខ្លួនផ្តិតមេដៃ​គាំទ្រ​លើ​ញត្តិ​​ថ្កោល​ទោស​លោក សម រង្ស៊ី បន្ទាប់​ពី​លោក​នាយក​រដ្ឋមន្ត្រី ហ៊ុន សែន បាន​ប្រាប់​ទៅ​កាន់​សមាជិក​គណបក្ស​ភ្លើង​ទៀត​ឲ្យ​ថ្កោល​ទោស​លោក សម រង្ស៊ី បើមិនដូច្នេះ គណបក្សនេះ​អាច​ប្រឈម​នឹង​ការរំលាយ។

ក្នុង​សេចក្ដី​ថ្លែង​ការណ៍​មួយ​ចេញ​ផ្សាយ​កាលពី​ថ្ងៃព្រហស្បតិ៍ គណបក្ស​ភ្លើង​ទៀន បាន​បដិសេធ​ការ​ចោទ​ប្រកាន់​ថា​មាន​ជាប់​ពាក់ព័ន្ធ​នឹង​លោក សម រង្ស៊ី ស្រប​ពេល​ដែល​មេឃុំ​ចំនួន​ពីរ​នាក់​ក្នុង​ចំណោម​មេឃុំ​ចំនួន​បួន​នាក់​របស់​គណបក្ស​សមរង្ស៊ី បាន​និយាយ​ថា​អាជ្ញាធរ​មូល​ដ្ឋាន​បាន​ប្រាប់​ឲ្យ​ខ្លួន​ផ្ដិត​មេដៃ​លើ​លិខិត​ថ្កោល​ទោស​លោក​ សម រង្ស៊ី​។​ ចំណែក​មេឃុំទី​បី​បដិសេធ​ធ្វើ​អត្ថាធិប្បាយ ខណៈមេឃុំ​ទី​បួន​មិន​អាចទាក់​ទង​បាន​។​

លោក ថាច់ សេដ្ឋា អនុប្រធាន​គណបក្ស​ភ្លើង​ទៀន ថ្លែង​ថាក្រុម​ប្រឹក្សា​ឃុំ​របស់​ខ្លួន​ស្ថិត​ក្រោម​ការ​គំរាម​កំហែងពី​អាជ្ញាធរ​ស្រុក បន្ទាប់ពីការអំពាវ​នាវ​របស់​លោក​នាយក​រដ្ឋមន្ត្រី ហ៊ុន សែន ​ កាលពី​ថ្ងៃ​ពុធ​ កន្លង​ទៅ​​។​

លោកថ្លែងថា៖ «យើង​ទទួលបាន​ព័ត៌មាន​ថា​មានការចុះគំរាមកំហែងសមាជិកក្រុមប្រឹក្សា ឃុំសង្កាត់របស់​គណបក្សភ្លើងទៀន​ស្ទើរ​ទូទាំងប្រទេស​ឲ្យ​ផ្តិតមេដៃលើ​លិខិតថ្កោលទោស»។

ការ​បោះ​ឆ្នោតក្រុមប្រឹក្សា​​ឃុំ-សង្កាត់ ​ខែ​មិថុនា កន្លង​ទៅ​ គណបក្ស​ភ្លើង​ទៀន​បាន​ឈ្នះតំណែង​មេឃុំ​ចំនួន ៤ ខណៈគណបក្ស​ប្រជា​ជន​កម្ពុជាឈ្នះ​បាន​ ១ ៦៤៨​ ឃុំ-សង្កាត់​។​ គណបក្ស​​ភ្លើង​ទៀនឈ្នះបាន​អាសនៈ​​​ក្រុមប្រឹក្សាបាន​ជាង​ ២ ០០០រូប​ ខណៈ​គណបក្ស​ប្រ​ជាជន​កម្ពុជា​ឈ្នះ​បានអាសនៈ​ក្រុម​ប្រឹក្សា​ចំនួន​ ៩ ៣៧៦​រូប​។

លោក សេដ្ឋា មាន​ប្រសាសន៍​ថា គណបក្ស​នឹង​ស្វែង​រក​កិច្ច​អន្តរាគមន៍​ពី​ក្រ​សួង​មហាផ្ទៃ ដើម្បី​ទប់ស្កាត់​ការគំរាម​កំហែង​ពី​អាជ្ញាធរ​មូល​ដ្ឋាន​។​

លោកបន្តថា៖ «ខ្ញុំសូម​ជំរាបថា​ ការដែលបង្ខិតបង្ខំនេះជាការខុសច្បាប់ហើយ ហើយ​យើង​នឹងសុំអន្តរាគមន៍ពីក្រសួងមហាផ្ទៃដើម្បី​ទប់ស្កាត់​កំឲ្យមានការគំរាមកំហែបបែបនេះ គេ [អាជ្ញាធរ] ត្រូវ​គោរពឆន្ទៈរបស់​បុគ្គលម្នាក់ៗ មិនត្រូវ​ប្រើអំណាច​គំរាមគេបានទេ» ។

អ្នកនាំពាក្យ​ក្រ​សួង​មហាផ្ទៃ លោក ខៀវ សុភ័គ មិន​អាច​ទាក់​ទង​សុំ​អត្ថាធិប្បាយ​បាន​ទេ​។​

កាល​ពី​ថ្ងៃ​ពុធ លោក​នាយក​រដ្ឋមន្ត្រី ហ៊ុន សែន បាន​ព្រមាន​គណបក្សភ្លើង​ទៀន​ថា​អាច​ប្រឈម​នឹង​ការ​រំលាយបើ​មាន​ជាប់​ពាក់​ព័ន្ធ​នឹង​លោក សម រង្ស៊ី​។ លោក សម រង្ស៊ី ជា​ស្ថាបនិក​គណបក្ស​សង្គ្រោះ​ជាតិ​ដែល​ត្រូវ​បាន​រំលាយ និង​គណបក្ស​សម រង្ស៊ី ផងដែរ ដែល​ក្រោយ​មក​ប្ដូរ​ជា​គណបក្ស​ភ្លើងទៀន​កាល​ពី​ឆ្នាំ​២០១៨​។​

ការ​លើក​ឡើង​អំពី​​គណបក្ស​ភ្លើង​ទៀន​បែប​នេះ​ គឺ​បន្ទាប់​ពី​សមាជិក​សភា​របស់​គណបក្ស​ប្រជាជន​កម្ពុជា​បាន​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ​ ដោយ​បាន​កំណត់​ថា​គណបក្ស​នយោបាយ​នឹង​​ខុស​ច្បាប់ ​បើ​សិន​ជា​គណបក្ស​នោះ​ដឹក​នាំ​ដោយ​អ្នក​ដែល​ត្រូវ​កាត់​ទោស​ពី​បទ​ឧក្រិដ្ឋ។​ លោក​ សម រង្ស៊ី ត្រូវ​បានកាត់​ទោស​ពី​បទឧក្រិដ្ឋ​ជា​ច្រើន​ករណី ដែល​អ្វី​ទាំង​នេះ លោក សម រង្ស៊ី ចាត់ទុក​ថា​ជា​រឿង​នយោបាយ​។​

លោក​នាយ​រដ្ឋមន្ត្រី​ថ្លែង​ថា៖ «សមាជិក​គណបក្ស​ភ្លើង​ទៀន គួរ​ចាក​ចេញពី​គណបក្សឲ្យ​បាន​ឆាប់​ដើម្បី​កុំ​ឲ្យ​មាន​បញ្ហា»។ លោក​នាយក​រដ្ឋមន្ត្រី​បាន​​ជំរុញ​ឲ្យ​​មេដឹក​នាំ​គបក្ស​ភ្លើង​ទៀន​ថ្កោល​ទោស​លោក សម រង្ស៊ី​ បន្ទាប់ពី​លោក​​​បាន​ហៅ​ព្រះ​មហាក្សត្រ​ថា​ «ជន់ក្បត់ជាតិ»។​

នៅ​ប៉ុន្មាន​សប្ដាហ៍​នេះ លោក​នាយក​រដ្ឋមន្ត្រី បាន​វាយ​ប្រហារលើ​លោក​ សម រង្ស៊ី យ៉ាង​​ខ្លាំង និង​បាន​ហៅ​គាត់​ថាជា​ជន​ក្បត់​ជាតិ គំរាម​ចាប់​ខ្លួនបើ​សិនបើ​ចូល​មក​កម្ពុជា និង​ចោទ​ប្រកាន់​លោក សម រង្ស៊ី ថា​បាន​ជេរប្រមាថ​ព្រះ​មហាក្សត្រ​។​

នៅ​ថ្ងៃ​ព្រហស្បតិ៍ លោក សេដ្ឋា មាន​ប្រសាសន៍​ថា សេចក្ដី​ថ្លែង​ការណ៍របស់​គណបក្ស​មិន​មែន​ធ្វើ​ឡើង​តាម​ការ​ព្រមាន​របស់​លោក​នាយក​រដ្ឋមន្ត្រី​ទេ តែ​ជា​ការ​បំភ្លឺ​ទៅ​សាធារណជន​ថា​គណបក្ស​មិន​ជាប់​ពាក់ព័ន្ធ​នឹង​លោក សម រង្ស៊ី ប៉ុណ្ណោះ​។​

លោកបន្តថា៖ «យើង​មិនស្ថិតក្រោម​សម្ពាធ ហើយ​យើងមិនខ្លាចអ្វីទេ យើង​មិនមែន​បញ្ជាក់​ជំហ​តែជាមួយ​នាយករដ្ឋមន្ត្រី យើង​ក៏ត្រូវ​បញ្ជាក់​ជំហ​ជាមួយ​ប្រជាពលរដ្ឋ​ផងដែរ ដើម្បីការពារ​ស្ថាប័នព្រះមហាក្សត្រ​ និង​របបរាជានិយម»។

បើ​តាម​សេចក្ដី​ថ្លែងការណ៍ គណបក្ស​ភ្លើងទៀន៖ «​ធ្វើ​សេចក្ដី​សម្រេច​នានា​ដោយផ្អែក​លើការ​ទទួល​ខុស​ត្រូវ​ក្នុង​អធិបតេយ្យភាព​ពេញ​លេញ​របស់​ខ្លួន​ ស្រប​តាម​លក្ខន្តិកៈគណបក្ស​ ដោយ​មិន​ស្ថិត​ក្រោម​ការ​បង្គាប់បញ្ជាដោយផ្ទាល់ ឬដោយប្រយោល​ពី​បុគ្គល ឬ​គណបក្ស​ណាឡើយ»។​

ដោយ​មិន​បាន​បញ្ចេញ​ឈ្មោះ​ លោក​ សម រង្ស៊ី នៅក្នុង​ខ្លឹមសារ គណបក្ស​បាន​និយាយ​ថា ខ្លួន​គោរព​ព្រះរាជតួនាទី​របស់​ព្រះ​មហាក្សត្រ​ដែល​មាន​ចែង​ក្នុង​រដ្ឋធម្មនុញ្ញ។ សេចក្ដី​ថ្លែង​ការណ៍​បន្ត​ថា៖ «​គណបក្ស​ភ្លើងទៀន​ថ្កោល​ទោស​ចំពោះ​បុគ្គល​ទាំង​ឡាយ​ណា​ដែល​មាន​ចេតនា​ប្រមាថ​ ឬរំលោភ​បំពាន​ដល់ព្រះមហាក្សត្រ​ និង​របប​រាជានិយម»។​

ឆ្លើយ​តម​នឹង​សំណួរ​របស់​ខេមបូចាអំពី​សេចក្ដី​ថ្លែង​ការណ៍​របស់​គណបក្ស​ភ្លើង​ទៀន លោក សម រង្ស៊ី មាន​ប្រសាសន៍ថា៖ «​គណបក្ស​នយោបាយមាន​សិទ្ធិ​ពេញ​លេញ​លើជំហរ​របស់​ពួកគេចំពោះ​ប្រធានបទ​ណាមួយ»។​​

កាល​ពី​ថ្ងៃ​ពុធ លោក សម រង្ស៊ី បាន​លើកឡើងថា​ លោក ហ៊ុន សែន កំពុង​គំរាម​កំហែង​រំលាយ​គណបក្ស​ភ្លើងទៀន ព្រោះ​លោក ហ៊ុន សែន ខ្លាច «គណបក្ស​ប្រឆាំង​ដែល​ធំជាង​គេ ហើយ​គាត់​កំពុង​តែ​រក​លេស​​បង្អាក់​ការ​លូត​លាស់​របស់​គណបក្ស​នេះ»។​

ពេល​សួរ​ថា​តើ​លោក ឬ​សមាជិក​គណបក្សសង្គ្រោះជាតិ​ណាមួយ​មាន​ទំនាក់​ទំនង​​ជាមួយ​សមាជិក​គណបក្ស​ភ្លើងទៀន​ដែរទេ លោក សម រង្ស៊ី បាន​បដិសេធ​ឆ្លើយ​សំណួរ​នេះ។ លោក​បាន​ឆ្លើយ​ថា៖ «ហេតុ​អ្វី​ខ្ញុំ​ត្រូវ​ឆ្លើយ​សំណួរ​នេះ? សម្រាប់​ Scotland Yard ឬ​សម្រាប់ KGB?»។

មិន​មែន​បង្ខំ តែជាការ​ «ស្ម័គ្រចិត្ត»

លោក យ៉ាប់ យ៉ូត មេឃុំ​ទើប​ជាប់​ឆ្នោត​ថ្មី​របស់​កណបក្ស​ភ្លើងទៀន នៅឃុំក្រយា ខេត្ត​កំពង់ធំ​បាន​ឲ្យ​ដឹង​ថា​ អាជ្ញាធរ​ប្រាប់​ក្រុម​ប្រឹក្សា​ឃុំ​ចំនួន​បួន​របស់​គណបក្ស​ភ្លើង​ទៀន​​ឲ្យ​ផ្តិតមេដៃលើ​​លិខិត​ថ្កោល​ទោស​លោក សម រង្ស៊ី​។​

លោក​បន្តថា៖ «​ខ្ញុំ​មិន​ទាន់​បាន​សម្រេច​ចិត្ត​នៅ​ឡើយ ប៉ុន្តែ​ខ្ញុំ​ប្រហែល​ជា​ត្រូវ​ធ្វើ ពីព្រោះ​ថា​បើ​មិន​ធ្វើ នោះ​មាន​ន័យ​ថា​ខ្ញុំ​គាំទ្រ​លោក សម រង្ស៊ី»។ លោក​បន្ថែម​ថា៖ «គណបក្ស[ភ្លើងទៀន] មិន​តម្រូវ​ឲ្យយើង​ធ្វើ​បែប​នេះ​ទេ ប៉ុន្តែ​យើង ជាមន្ត្រី​ថ្នាក់​ក្រោម មិន​អាច​ជំទាស់​ទេ»។

លោក យ៉ូត បន្ត​ថា លោក​នៅ​តែ​ស្មោះ​ត្រង់​នឹងគណបក្ស​ភ្លើងទៀន។ លោក​ថា៖ «ខ្ញុំ​មិន​ចូល​ជាមួយ​គណបក្ស​ផ្សេង​ទេ…ខ្ញុំ​សុខចិត្ត​លាឈប់ និង​នៅ​ផ្ទះវិញ​»។​

មេឃុំ​គណបក្ស​ភ្លើង​ទៀន​ផ្សេង​ទៀត​នៅ​ក្នុង​ឃុំដូង ​លោក ពឹង សុខហន់ បាន​ឲ្យ​ដឹងថា​ ញត្តិ ​​ប្រឆាំង​លោក សម រង្ស៊ី គឺរៀប​ចំដោយ​អាជ្ញាធរ​ស្រុកប្រាសាទបល្ល័ង្ក​​។ លោក សុខហន់ បាន​បន្ត​ថា ក្រុម​ប្រឹក្សា​ឃុំ​ដូង​ពី​គណបក្ស​ភ្លើងទៀន​ផ្សេង​ទៀត​បានផ្ដិត​មេដៃ​រួច​ហើយ​។​

លោក​បន្តថា៖ «គេ​បានហៅខ្ញុំ​ទៅជួប និង​បាន​ប្រាប់​ឲ្យ​ខ្ញុំ​ប្តេជ្ញាចិត្ត ​គាំទ្រ​រដ្ឋាភិបាល និង​ធ្វើតាម​រដ្ឋាភិបាល​»។ លោកបានបន្ថែម​ថា៖ «​ខ្ញុំ​ត្រូវ​តែ​ធ្វើបែបនេះ បើ​ខ្ញុំមិនធ្វើ​ខ្ញុំនឹងមានទោស ដោយការមិន​ស្ដាប់​​បញ្ជា​រដ្ឋាភិបាល»។​

អភិបាល​ស្រុកប្រាសាទបល្ល័ង្ក លោក វណ្ណ សុផានិត​ បាន​ឲ្យ​ដឹង​ថា​មិនមាន​ការបង្ខិត​បង្ខំទេ តែគឺជា​ការ «ស្ម័គ្រចិត្ត»។​ លោក​បន្ថែម​ថា​ក្រុម​ប្រឹក្សា​ឃុំ​របស់​គណបក្ស​ភ្លើងទៀន​ទាំង​អស់​ក្នុង​ស្រុក​បាន​យល់​ព្រម​ផ្ដិត​មេដៃ​ហើយ​។​

ញត្តិ​​មួយ​ដែលខាង​ខេមបូចា​ទទួល​បាន និង​ចុះ​កាល​បរិច្ឆេទ​កាលពីថ្ងៃ​ពុធ បាន​បង្ហាញ​ពី​ការគាំទ្រ​របស់​ក្រុមប្រឹក្សា​ទាំង​ប្រាំ​រូប​របស់​គណបក្ស​ភ្លើងទៀននៅឃុំដូង។ ញត្តិ​នោះ​បាន​ថ្កោល​ទោស​លោក សម រង្ស៊ី ថាជា «ជនក្បត់​ជាតិ​បីជំនាន់» ដែល​ជា​ឃ្លា​លោក​នាយក​រដ្ឋមន្ត្រី​បាន​ប្រើ និង​បាន​ផ្សព្វ​ផ្សាយ​ជា​សាធារណៈដោយ​ស្ថាប័ន​រដ្ឋាភិបាល ថ្នាក់​ដឹក​នាំ​ខាងសាសនា និង​យោធា ដែល​សុទ្ធតែបាន​ថ្កោលទោស​លោក សម រង្ស៊ី​។​ ក្នុង​ញត្តិនោះ​បាន​បង្ហាញ​ការ​គាំទ្រ​ដល់​លោក ហ៊ុន សែន ក្នុង​ការ «កម្ទេច​»​ ក្រុម​ប្រឆាំង​ដែលជា​គូប្រជែង។​​

ក្នុង​ញត្តិ​សរសេថា៖ «​យើង​សូម​អំពាវ​នាវ​ដល់​អាជ្ញាធរ​គ្រប់​លំដាប់​ថ្នាក់​ចាត់វិធានការ​ច្បាប់​ឲ្យ​បាន​ម៉ឺងម៉ាត់ជាទីបំផុត ទៅលើជនក្បត់ជាតិបីជំនាក់ និង​​បក្ស​ពួក​ដែល​បាន​ចូល​រួម​គាំទ្រ​ប្រមាថ​​ព្រះ​មហាក្សត្រ ដោយមិនអាចលើកលែងបាន»។ ញត្តិ​​សរសេរ​ទៀត​ថា៖ «យើង​ទាំងអស់​គ្នា​សូមប្រកាសគាំទ្រយ៉ាងពេញទំហឹងចំពោះ​យុទ្ធនាការ ​នាយក​រដ្ឋមន្ត្រី​ ហ៊ុន សែន ក្នុងការ​កំចាត់ចោល​នយោបាយ​ជ្រុល​និយមរបស់​ជនក្បត់ជាតិ បីជំនាន់​ឲ្យ​អស់ពីទឹកដីកម្ពុជា  ដើម្បីរក្សា​សន្តិភាព ស្ថិរភាពសង្គម និងសេចក្តីសុខសាន្ត​របស់​​​ប្រជា​ពល​រដ្ឋខ្មែរ»៕​

ប្រែសម្រួលពីអត្ថបទភាសាអង់គ្លេស៖ Local Officials Press Candlelight Councilors to Censure Rainsy

506 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម