ក្រសួងព័ត៌មានផ្ដល់អំណាចដល់អាជ្ញាធរមូលដ្ឋានចាត់វិធានការផ្លូវច្បាប់លើអ្នកសារព័ត៌មាន

ស្រ្តីម្នាក់កំពុងផ្សាយព័ត៌មានផ្ទាល់តាមហ្វេសប៊ុកអំពីការធ្វើការតវ៉ានៅខាងក្រៅការិយាល័យអង្គការសហប្រជាជាតិក្នុងប្រទេសកម្ពុជារៀបចំដោយសមាជិកគ្រួសារអតីតសកម្មជនបក្សប្រឆាំង រូបភាពថតកាលពីថ្ងៃទី៤ ខែមិថុនា ឆ្នាំ២០២១។ ខេមបូចា/ ព្រីង សំរាំង
ស្រ្តីម្នាក់កំពុងផ្សាយព័ត៌មានផ្ទាល់តាមហ្វេសប៊ុកអំពីការធ្វើការតវ៉ានៅខាងក្រៅការិយាល័យអង្គការសហប្រជាជាតិក្នុងប្រទេសកម្ពុជារៀបចំដោយសមាជិកគ្រួសារអតីតសកម្មជនបក្សប្រឆាំង រូបភាពថតកាលពីថ្ងៃទី៤ ខែមិថុនា ឆ្នាំ២០២១។ ខេមបូចា/ ព្រីង សំរាំង
Share on facebook
Share on twitter
Share on linkedin
Share on telegram
Share on whatsapp

ក្រសួងព័ត៌មាន​​បាន​ផ្ដល់​ភ្លើង​ខៀវ​ដល់​អាជ្ញាធរ​មូល​ដ្ឋាន​ចាត់​វិធានការ​ច្បាប់លើ​អ្នក​សារព័ត៌មាន ដែលថា​បាន​បំពេញ​ការងារ​គ្មាន​វិជ្ជាជីវៈ និង​ផ្សព្វ​ផ្សាយព័ត៌មាន​មិន​ពិត ប៉ះពាល់​ដល់​ការ​អនុវត្ត​ច្បាប់របស់​អាជ្ញាធរ​មូល​ដ្ឋាន​​។​​​

ការ​សម្រេច​របស់​ក្រសួងព័ត៌មាន​នេះ​ធ្វើ​ឡើង​បន្ទាប់​ពី​អាជ្ញាធរ​ខេត្ត​កណ្ដាល​បាន​សរសេរ​លិខិត​មួយ​ច្បាប់​មក​កាន់​ក្រ​សួង​កាលពី​ខែ​មិថុនា ដោយ​ស្នើ​ឲ្យ​មាន​វិធានការ​ច្បាប់​លើ​អ្នក​សារព័ត៌មាន​មួយ​ចំនួន​ដែល​បាន​ផ្សាយ​ផ្ទាល់​ពី​ការ​តវ៉ា​ប្រឆាំង​ការ​អភិវឌ្ឍ​អាកាសយានដ្ឋាន​អន្តរជាតិ​ថ្មី​នៅ​ស្រុក​កណ្ដាល​ស្ទឹង​។ ជា​ការ​ឆ្លើយ​តប ក្រ​សួង​បាន​​អនុញ្ញាត​ឲ្យ​រដ្ឋបាល​ខេត្ត​បន្ត​វិធានការ​ច្បាប់​ដោយពុំ​ចាំ​បាច់​សុំ​គោល​ការណ៍​ជាមុន​ពី​ក្រ​សួង​ព័ត៌មាន​នោះ​ទេ​។​

លិខិត​សរសេរ​ទៀត​ថា​៖ «[ក្នុង​ករណី​] អ្នក​សារព័ត៌មាន​ធ្វើ​សកម្មភាពដោយ​​គ្មា​ន​វិជ្ជាជីវៈ​ល្មើស​​ច្បាប់​ ដែល​ធ្វើ​ឲ្យ​រំខាន​ការ​អនុវត្តការងារ​តាមផ្លូវ​​​ច្បាប់​ ឬ​បង្ក​គ្រោះ​ថ្នាក់​ដល់​កិច្ច​ប្រតិបត្តិ​ការ​របស់​អាជ្ញាធរ​​សមត្ថកិច្ច ឬ​ផ្សាយ​ព័ត៌មាន​មិន​ពិត​ ញ៉ុះ​ញង់​ឲ្យ​ប្រឆាំង​នឹង​ការ​អនុវត្ត​ការងារ​តាម​ផ្លូវ​ច្បាប់​​របស់​អាជ្ញាធរ​មាន​សមត្ថកិច្ច ឬ​ធ្វើ​ឲ្យ​ប៉ះពាល់​ប្រយោជន៍​បុគ្គល​ណាម្នាក់ បុគ្គល ឬ ស្ថានប័ន​នោះ​អាច​ចាត់​វិធានការតាម​នីតិវិធី​​ច្បាប់»។

ក្នុង​លិខិត​ដើម​ស្នើ​ទៅ​កាន់​ក្រ​សួង​ព័ត៌មាន អភិបាល​ខេត្ត​កណ្ដាល លោក គង់ សោភ័ណ្ឌ បាន​ចោទអ្នកសារ​ព័ត៌មាន​ថា​បាន​ធ្វើ​ការ​ដោយ​គ្មាន​វិជ្ជាជីវៈ ផ្សព្វ​ផ្សាយ​ព័​ត៌មាន​មិន​ពិត និង​រំខាន​ដល់​អាជ្ញាធរ​ក្នុង​ការ​ដោះ​ស្រាយ​ទំនាស់​។​​

លោក លួស សេង ចាងហ្វាង​សារព័ត៌មាន​អនឡាញ ​LSN News TV និង​ជា​អ្នក​សារព័ត៌មាន​ម្នាក់​ដែល​អាជ្ញាធរ​បានធ្វើទុក្ខបុក​ម្នេញ​ដែរ​នោះ បាន​និយាយ​ថា​ក្រុម​ការងារ​របស់​លោក​បាន​ទទួល​ការ​ព្រមាន​តាំងពី​លោក​បាន​ផ្សាយ​ផ្ទាល់​ពី​ការ​ប្រឈម​មុខ​ដាក់​គ្នា​លើ​បណ្ដាញ​សង្គម​ហ្វេស​ប៊ុក​។

លោក​ឲ្យ​ដឹង​ថា៖ «​អាជ្ញាធរ​មិន​​បាន​រារាំង​អ្នកសារព័ត៌មាន​ចូល​ទី​តាំង​ដែល​មាន​ប្រ​ជា​ពល​រដ្ឋ​ប្រមូល​ផ្ដុំ​នោះទេ»។ លោក​បន្ថែម​ថា៖ «​ប៉ុន្តែ​​ពួកគេ​បាន​ប្ដឹង​ខ្ញុំ​ទៅ​ក្រ​សូង​ព័ត៌មាន​ពីបទ​ញ៉ុះ​ញង់ ហើយ​ក្រ​សួង​បាន​បង្វែរ​សំណុំ​រឿង​នេះ​ទៅ​កាន់​តុលាការ​»។​

លោក​អះអាងថា ការ​សម្រេច​នេះ គឺ​ជា​ការ​គំរាម​កំហែង​ដល់​អ្នក​សារព័ត៌មាន​ដែល​រាយ​ការណ៍​ព័ត៌មាន​ពិត​ទៅ​កាន់​សាធារណជន។​

លោក​ឲ្យ​ដឹង​ទៀត​ថា៖ «​អាជ្ញាធរ​បាន​គំរាម​ប្ដឹង​ខ្ញុំ​ ពេល​ខ្ញុំ​រាយការណ៍​ពីជម្លោះ​ដីធ្លី​រវាង​ប្រ​ជា​ពល​រដ្ឋ និង​គម្រោង​អភិវឌ្ឍន៍​អាកាសយានដ្ឋាន​នៅ​ស្រុក​កណ្ដាល​ស្ទឹង ខេត្ត​កណ្ដាល»។ លោក​បន្ថែម​ទៀត​ថា៖ «ខ្ញុំ​មិន​ដឹង​ថា​អាជ្ញាធរ​គិត​យ៉ាង​ម៉េច​ថា​ជា​ការ​ញ៉ុះ​ញង់ ពីព្រោះ​ខ្ញុំ​រាយ​ការណ៍​តាម​ពាក្យ​របស់​ប្រ​ជា​ពល​រដ្ឋ។ ខ្ញុំ​គិត​ថា​អាជ្ញាធរ​ចង់​បិទ​បាំង​រឿង​អ្វី​មូយ»។​

ប្រ​ជា​ពល​រដ្ឋ​ជាង​៣០០​គ្រួសារ​កំពុង​រស់​នៅ​លើ​ដី​៤០០​ហិកតា ក្នុង​ឃុំ​ចំនួន​បី​ក្នុង​ស្រុក​កណ្ដាលស្ទឹង និង​ឃុំ​មួយ​ក្នុង​ស្រុក​បាទី​ ខេត្ត​តាកែវ បានជាប់​ក្នុង​ជម្លោះ​ដី​ធ្លី​រយៈ​ពេល​បី​ឆ្នាំ មក​ហើយ តាំងពីចាប់​ផ្ដើម​គម្រោង​អាកាសយានដ្ឋាន​តម្លៃ​១,៥ពាន់លាន​ដុល្លារ ដែល​អភិវឌ្ឍ​រួម​គ្នា​ដោយ​ក្រុម​ហ៊ុន​OCIC និង​លេខាធិការដ្ឋាន​​អាកាសចរណ៍​ស៊ីវិល​។ ការ​ចរចា​រវាង​អាជ្ញាធរ និង​ប្រ​ជា​ពល​បាន​បរាជ័យ​រហូត​មក​ដល់ពេល​នេះ ដោយ​អាជ្ញាធរ​ប្រកាន់​ជំហរ​ផ្ដល់​តំលៃ​សំណង ដែល​ប្រ​ជា​ពល​រដ្ឋ​បាន​បដិសេធ​ទទួល​។​

កាល​ពី​ពាក់​កណ្ដាល​ខែ​ឧសភា ប្រ​ជា​ពល​រដ្ឋ​រាប់​សិប​នាក់​បាន​តវ៉ា​នៅ​នឹង​ដីជម្លោះ​បន្ទាប់​ពី​ក្រុម​ហ៊ុន​បាន​បញ្ជូន​គ្រឿង​ចក្រ​ទៅ​ឈូស​ឆាយ​ដីស្រែ​របស់​ពួកគេ និង​បាន​ធ្វើ​ឲ្យ​ខូច​ខាតស្រូវ​​​អស់​ជាង​មួយ​ហិកតា​។ ប្រ​ជា​ពល​រដ្ឋ​បាន​បោះតង់​នៅ​ចាំដី និង​បិទ​ផ្លូវ​ចូល​ទៅ​ក្នុង​ដី​គម្រោង​។​

លោក គង់ សោភ័ណ្ឌ អភិបាល​ខេត្ត​កណ្ដាល ប្រាប់​ខេមបូចា​ថា មាន​អ្នក​សារព័ត៌មាន​មួយ​ចំនួន ​បាន​ធ្វើ​ការ​ដោយ​គ្មានវិជ្ជាជីវៈ និង​អាច​ធ្វើ​ឲ្យ​ប៉ះពាល់​ដល់​ការ​អនុវត្ត​ច្បាប់​របស់​អាជ្ញាធរ​។​

លោក​មាន​ប្រ​សាសន៍​ថា៖ «​ពួកគេ​ធ្វើ​ហួស​ពី​តួនាទី ដោយ​គ្រាន់​តែចង់​បាន​ការ​ចាប់អារម្មណ៍​​លើ​ស្ថាប័ន​ព័ត៌មាន​របស់​ពួកគេ»។  ដោយលោកបន្ថែម​ថា៖ «​ពួកគេ​បាន​ថតវីដេអូ​ផ្សាយ​ផ្ទាល់​ពី​ជម្លោះ​ដែល​កំពុង​ដោះ​ស្រាយ និង​បាន​បំប៉ោង​បញ្ហា»។ លោក​ថា​ការ​ធ្វើ​ដូច​នេះ អាច​បង្កើត​ជា​ការ​យល់​ច្រលំធំ​ចំពោះ​សាធារណជន​។

លោក គង់ សោភ័ណ្ឌ ឲ្យ​ដឹង​ទៀតថា អាជ្ញាធរ​មិន​ទាន់​បាន​ដាក់​ពាក្យ​បណ្ដឹង​ប្រឆាំង​នឹង​អ្នក​សារព័ត៌មាន​ណា​ម្នាក់​នៅ​ឡើយ​ទេ ប៉ុន្តែ​បាន​ព្រមាន​អ្នក​ទាំង​នោះ​ថា​ការ​បន្ត​រាយការណ៍​ព័ត៌មាន​បង្ក​បញ្ហា​ដល់​អាជ្ញាធរ អាច​នឹង​ទទួល​ផលវិបាក​វិញ​។​

លោកមានប្រសាសន៍​ថា៖ «យើង​មិន​ចង់​ធ្វើឲ្យ​មាន​បញ្ហា​ជាមួយ​អ្នក​សារព័ត៌មាន​ទេ ពួកគេ​ជា​ដៃ​គូរ​ដ៏​សំខាន់​ក្នុង​ការងារ​របស់​យើង…ប៉ុន្តែ​បើ​អ្នក​សារព័ត៌មាន​ប្រព្រឹត្ត​ខុស​ច្បាប់ និង​ធ្វើ​ឲ្យ​ខូច​ខាត​ប្រយោជន៍​សាធារណៈ យើង​គ្មាន​ជម្រើសទេ មាន​តែ​ការ​អនុវត្ត​ច្បាប់»។

លោក មាស សុភ័ណ្ឌ អ្ន​ក​នាំពាក្យ​ក្រ​សួងព័ត៌មាន មាន​ប្រសាសន៍​ថា ក្រ​សួង​តែ​ងតែ​អនុវត្ត​វិធានការ​បត់​បែន​លើ​​​អ្នក​សារព័ត៌មាន និង​បាន​ជំ​រុញ​ឲ្យ​អ្នក​សារព័ត៌មាន​ប្រកាន់​ខ្ជាប់​នូវ​ក្រម​សីលធម៌​វិជ្ជាជីវៈ និង​រាយការណ៍​ព័ត៌មាន​ពិត​។​

លោកមានប្រសាសន៍​ថា៖ «ក្រ​សួង​តែង​តែ​ផ្ដល់​ឱកាស​ឲ្យ​អ្នក​សារព័ត៌មាន​ធ្វើ​ការ​កែតម្រូវ និង​អប់​រំ​ពួកគេ​ឲ្យ​អនុវត្ត​តាម​ក្រម​សីល​ធម៌​វិជ្ជាជីវៈ»។ លោក​បន្ថែមថា៖ «​ប៉ុន្តែ​ពេល​អ្នក​សារព័ត៌មាន​ប្រព្រឹត្ត​ខុស ពួកគេ​ត្រូវ​ទទួល​សុខ​សត្រូវ​ចំពោះ​មុខ​ច្បាប់»។​

លោក ណុប វី នាយក​ប្រតិបត្តិ​សមាគមសម្ព័ន្ធអ្នកសារព័ត៌មានកម្ពុជា​ មាន​ប្រ​សាសន៍​ថា អ្នក​សារព័ត៌មាន​ដែល​បាន​ប្រព្រឹត្ត​កំហុសពេល​កំពុង​រាយការណ៍​ព័ត៌មាន​ គួរតែ​ទទួល​ការ​ដាក់​ទោស​តាម​ច្បាប់​ស្តីពីរបបសារព័ត៌មាន​ មិនមែន​ក្រម​ព្រហ្មទណ្ឌ​​នោះទេ​។​​

លោក​មានប្រសាសន៍ថា៖ «​ខ្ញុំ​គិត​ថា​នេះ​ជា​រូប​ភាព​គំរាម​កំហែង​ដល់​អ្នក​សារព័ត៌មាន ដែល​មិន​មែន​ជារឿង​ថ្មី ហើយ​វា​នៅ​តែ​កើត​ឡើង​ដដែលៗ»។ លោក​បន្ត​ទៀត​ថា៖ «យើង​គួរ​តែ​បណ្ដុះ​បណ្ដាល​ និង​អប់រំ​ពួកគេ​ឲ្យ​បាន​កាន់​តែ​ប្រសើរ​លើ​ក្រម​សីលធម៌ និង​វិជ្ជាជីវៈ ជាជាង​បន្ត​គំរាម​កំហែង​ពួកគេ»។​

លោក​លើក​ឡើង​ដែរថា ចេតនា​ហាម​ឃាត់​​អ្នក​សារព័ត៌មាន​ចូល​ទៅ​កាន់​ទីតាំង​ណា​មួយ​គួរតែ​មាន​កំណត់​ដោយ​ច្បាប់​។

លោក​បន្ថែម​ទៀត​ថា៖ «ហើយ​បើ​សិន​ជា​អាជ្ញាធរ​បន្ត​រារាំង​អ្នក​សារព័ត៌មាន​ចូល​ទៅ​កាន់​តំបន់​ណាមួយ វា​គឺ​ជា​ការ​រឹតត្បិត​លើ​សេរីភាពសារព័ត៌មាន»។

ក​ម្ពុជា​ជា​ប្រទេស​មួយ​ក្នុង​ចំណោម​ប្រទេស​ទាំង​៣៧ ដែល​ត្រូវ​បាន​អង្គការ​អ្នក​សារព័ត៌មាន​គ្មាន​ព្រំដែន(RSF) រាយការណ៍​កាលពី​ថ្ងៃទី​២ ខែមិថុនា ថា​បាន​បង្ក្រាប​យ៉ាង​ខ្លាំងក្លា​លើ​សេរីភាព​សារព័ត៌មាន​។

លោកស្រី ចក់ សុភាព នាយិកា​ប្រតិបត្តិមជ្ឈមណ្ឌល​សិទ្ធិ​មនុស្ស​កម្ពុជា មាន​ប្រសាសន៍​ថា ការ​សម្រេច​របស់​ក្រ​សួង​បង្ក​ជា​ក្ដី​បារម្ភ​មួយ​ ជាពិសេស​នៅពេល​ដែល​រដ្ឋាភិបាល​នៅ​បន្ត​ការ​បង្រ្កាម​លើ​អ្នក​សារព័ត៌មាន។

លោកស្រី​លើក​ឡើង​ថា៖ «​ការ​ប្រឆាំង​នឹង​ការ​រាយការណ៍​ព័ត៌មាន​គ្មានវិជ្ជាជីវៈ ត្រូវ​តែ​ធ្វើ​ឡើង​ដោយ​ស្មោះ​ត្រង់ និង​មិន​មែន​ប្រើ​ការ​ចោទ​ប្រកាន់​ដើម្បី​បំបិទ​សេរីភាព​បញ្ចេញ​មតិ និង​ការ​រិះគន់​នោះទេ»។ លោកស្រី​បន្ថែម​ថា៖ «រដ្ឋាភិបាល​គួរ​តែ​ពិចារណា​បន្ធូរ​បន្ថយ​វិធានការដាក់ទោស​នេះ»។ (រាយការណ៍​បន្ថែម​ដោយ ង៉ាយ ណៃ)

ប្រែសម្រួលពីអត្ថបទភាសាអង់គ្លេស៖ Ministry of Information empowers local authorities to take legal action against journalists

318 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានថ្មីៗ »
អត្ថបទពេញនិយម »