សមាគមសម្ព័ន្ធអ្នកសារព័ត៌មានកម្ពុជា

ការឆ្លើយតបចម្រុះចំពោះការសន្យាមួយចំនួនរបស់របបយោធាបន្ទាប់ពីដំណើរទស្សនកិច្ចរបស់លោកនាយករដ្ឋមន្ត្រីទៅមីយ៉ាន់ម៉ា

លោកនាយករដ្ឋមន្ត្រី ហ៊ុន សែន ត្រូវបានស្វាគមន៍ដោយមេដឹកនាំយោធា មីន អោង ឡាំង ក្នុងជំនួបនៅប្រទេសមីយ៉ាន់ម៉ា ថ្ងៃទី៧ ខែមករា ឆ្នាំ២០២២។ ខេមបូចា/ រូបភាពពី​លោក អាន ឃួន សំអូន ទូរទស្សន៍ជាតិកម្ពុជា
លោកនាយករដ្ឋមន្ត្រី ហ៊ុន សែន ត្រូវបានស្វាគមន៍ដោយមេដឹកនាំយោធា មីន អោង ឡាំង ក្នុងជំនួបនៅប្រទេសមីយ៉ាន់ម៉ា ថ្ងៃទី៧ ខែមករា ឆ្នាំ២០២២។ ខេមបូចា/ រូបភាពពី​លោក អាន ឃួន សំអូន ទូរទស្សន៍ជាតិកម្ពុជា

ជាមួយនឹងដំណើរទស្សនកិច្ចការទូតដែលមានការរំពឹងខ្ពស់របស់លោកនាយករដ្ឋមន្ត្រីទៅកាន់ប្រទេសមីយ៉ាន់ម៉ានាពេលកន្លងមកនេះ ក្រុមអ្នកសង្កេតការណ៍មាន​ការយល់ឃើញផ្សេងៗគ្នា​ពីដំណើរទស្សនកិច្ចនេះ។

លោកនាយករដ្ឋមន្ត្រី ហ៊ុន សែន ផ្ទាល់បានសង្កត់ធ្ងន់លើកិច្ចពិភាក្សាទ្វេភាគីប្រកប​ដោយ​ផ្លែផ្កាជាមួយមេដឹកនាំរបបយោធាទាក់ទងនឹងការពន្យាពេលបទឈប់បាញ់រវាងរបបយោធា និងក្រុមប្រដាប់អាវុធជនជាតិភាគតិច ក៏ដូចជាកិច្ចព្រមព្រៀងស្តី​​ពីការអនុញ្ញាត​ឲ្យមាន​ជំនួយ​មនុស្សធម៌ពិតប្រាកដ។

ទោះបីជាយ៉ាងណាក៏ដោយ ក្រុមសិទ្ធិមនុស្ស និងមេដឹកនាំអាស៊ានមួយចំនួនបាន​រិះគន់​ដំណើរទស្សនកិច្ចនេះថា ជាការធ្វើឲ្យរដ្ឋាភិបាលយោធាស្របច្បាប់ ដោយក្រុមបាតុករ​ប្រឆាំង​របបយោធាមីយ៉ាន់ម៉ាបានថ្កោលទោសយ៉ាងខ្លាំងក្លា​ចំពោះ​លោកនាយករដ្ឋមន្ត្រី​ដោយ​ផ្ទាល់ និងតាមអ៊ីនធឺណិត។ អ្នកវិភាគនយោ​បាយមួយចំនួននៅក្នុងប្រទេសកម្ពុជា​បាន​ធ្វើការ​រិះគន់​ដោយប្រកាន់​យកផ្លូវកណ្តាលដោយលើកឡើងថា កិច្ចព្រមព្រៀងទាំងឡាយ​ណាដែលធ្វើ​ឡើងនៅក្នុងដំណើរទស្សនកិច្ចនេះ​មានតម្លៃមិនច្បាស់លាស់ ដោយសារគ្មានការចូលរួម​ពី​ថ្នាក់ដឹកនាំស៊ីវិលដែលនៅសេសសល់​ ដែលឥឡូវបានបង្កើតជារដ្ឋាភិបាលរួបរួម​ជាតិ (NUG)។

ដំណើរ​ទស្សនកិច្ច​ទ្វេភាគី​រយៈពេល​ពីរ​ថ្ងៃ​បាន​ចាប់ផ្តើម​កាលពី​ថ្ងៃ​សុក្រ ហើយ​លោក ហ៊ុន សែន បានជួបពិភាក្សាជាមួយ​មេដឹកនាំ​របប​យោធា​លោក មីន​ អោង​​ ឡាំង។លោក​នាយក​រដ្ឋមន្ត្រីបានថ្លែងក្នុងពិធីសម្ពោធការស្តារផ្លូវថ្នល់កាលពីថ្ងៃចន្ទ​ក្នុងខេត្តបាត់ដំបងថា ភាគីទាំង​ពីរបានពិភាក្សាអំពីកិច្ចសហប្រតិបត្តិការពហុភាគី។

កិច្ចពិភាក្សា​នោះរាប់បញ្ចូលទាំងការប្តេជ្ញាចិត្តរបស់របបយោធាគោរព​តាមកិច្ចព្រមព្រៀងជា​ឯកច្ឆន្ទប្រាំចំណុចរបស់អាស៊ានដែលបានបង្កើតឡើងកាលពីខែមេសា ដែលក្នុងនោះ មេដឹកនាំក្នុងតំបន់​នេះ​បានយល់ព្រមជាឯកច្ឆន្ទ និងបានអំពាវនាវឲ្យបញ្ចប់ជាបន្ទាន់នូវ​អំពើ​ហិង្សា និងត្រឡប់ទៅរកការសន្ទនានយោបាយវិញ​។

លោក ហ៊ុន សែន បានមានប្រសាសន៍កាលពីថ្ងៃចន្ទថា លោក មីន​ អោង​​ ឡាំង​ បានយល់​ព្រមជួយសម្រួលដល់ដំណើរទស្សនកិច្ចរបស់​បេសកជនពិសេសទៅ​កាន់​ប្រទេសមីយ៉ាន់ម៉ា រួមទាំងជំនួបជាមួយក្រុមប្រដាប់អាវុធផងដែរ។ មេដឹក​នាំរបបយោធា​ក៏បានប្រាប់លោក ហ៊ុន សែន ថា ប្រទេសមីយ៉ាន់ម៉ានឹងរៀបចំការបោះឆ្នោតរបស់ខ្លួននៅខែសីហា ឆ្នាំ២០២៣ ទោះបី​ជាយ៉ាងណា នៅក្រោមលក្ខ​ខណ្ឌបច្ចុប្បន្ន សហគមន៍អន្តរជាតិមិនទំនងទាល់តែសោះថា នឹង​ចាត់ទុកការប្រ​កួតប្រជែងបែបនេះថា ស្របច្បាប់។

តាមសេចក្តីរាយការណ៍ថា លោកនាយករដ្ឋមន្ត្រីមិនបានសុំជួបជាមួយមេដឹកនាំស៊ីវិល​ដែល​កំពុងជាប់ពន្ធនាគារគឺលោកស្រី អ៊ុងសាន ស៊ូជី ដែលត្រូវបានទម្លាក់​ចេញពីអំណាច និងចាប់​ដាក់​​ពន្ធនាគារដោយរបបយោធា អំឡុងរដ្ឋប្រហារកាល​ពី​ថ្ងៃទី១ ខែកុម្ភៈរបស់​ពួកយោធា។ លោកស្រី អ៊ុងសាន ស៊ូជី កំពុងបម្រើការជាទីប្រឹក្សារដ្ឋ បន្ទាប់ពីគណបក្សរបស់លោកស្រី គឺគណបក្សសម្ព័ន្ធជាតិ ដើម្បីប្រជាធិបតេយ្យ បានទទួលជ័យជម្នះលើក្រុម​យោធានៅក្នុងការ​បោះឆ្នោតកាល​ពីខែវិច្ឆិកា ឆ្នាំ២០២០។

ប្រព័ន្ធផ្សព្វផ្សាយអន្តរជាតិបានរាយការណ៍កាលពីថ្ងៃចន្ទថា តុលាការមីយ៉ាន់ម៉ាបាន​កាត់​ទោសមេដឹកនាំដែលត្រូវបានបណ្តេញចេញឱ្យជាប់ពន្ធនាគារ​រយៈពេល ៤ឆ្នាំបន្ថែម​ទៀត​សម្រាប់ការផ្តន្ទាទោសដែលផ្តើមចេញពីការចោទប្រកាន់ពីបទកាន់កាប់ និងការនាំ​ចូល​ឧបករណ៍ walkie-talkies ដោយខុសច្បាប់​ ក៏ដូចជាការបំពានវិធានការណ៍ស្តីពីកូវីដ-១៩ ។

លោកនាយករដ្ឋមន្ត្រី ហ៊ុន សែន (ឆ្វេង) ត្រូវបានស្វាគមន៍ដោយមេដឹកនាំយោធា មីន អោង ឡាំង ក្នុងជំនួបនៅប្រទេសមីយ៉ាន់ម៉ា ថ្ងៃទី៧ ខែមករា ឆ្នាំ២០២២។ ខេមបូចា/ រូបភាពពីលោក អាន ឃួន សំអូន ទូរទស្សន៍ជាតិកម្ពុជា
លោកនាយករដ្ឋមន្ត្រី ហ៊ុន សែន (ឆ្វេង) ត្រូវបានស្វាគមន៍ដោយមេដឹកនាំយោធា មីន អោង ឡាំង ក្នុងជំនួបនៅប្រទេសមីយ៉ាន់ម៉ា ថ្ងៃទី៧ ខែមករា ឆ្នាំ២០២២។ ខេមបូចា/ រូបភាពពីលោក អាន ឃួន សំអូន ទូរទស្សន៍ជាតិកម្ពុជា

យោងតាមសារព័ត៌មាន CNN បានឱ្យដឹងថា លោកស្រី អ៊ុងសាន ស៊ូជី ត្រូវបានកាត់ទោស​ជាលើកដំបូងកាលពីខែធ្នូ និងត្រូវបានបន្ធួរបន្ថយទោសឲ្យជាប់ពន្ធនាគាររយៈពេលពីរឆ្នាំ។ ព័ត៌មានអំពីការកាត់ក្តីកាលពីថ្ងៃចន្ទក្នុងរដ្ឋធានី Naypyidaw ត្រូវបានបិទមិនឲ្យប្រព័ន្ធ​ផ្សព្វផ្សាយព័ត៌មានដឹង ហើយមេធាវីរបស់មេដឹកនាំស៊ីវិលត្រូវបានរារាំងមិនឱ្យ​ទំនាក់ទំនង​ជាមួយអ្នកកាសែត និងសាធារណៈជនទេ។

គេមិនដឹងច្បាស់ថា តើលោក ហ៊ុន សែន និងមេដឹកនាំរបបយោធាបានពិភាក្សាអំពី NUG ឬបណ្តាញយោធារបស់ខ្លួនដែលហៅថា កងកម្លាំងការពារប្រជាជន ដែលបាននិងកំពុង​ធ្វើការបះបោរប្រឆាំងនឹងរបបយោធាជាមួយក្រុមប្រដាប់អាវុធជនជាតិភាគតិចផ្សេងទៀត។​ របបយោធារងការចោទប្រកាន់ថា បានរំលោភសិទ្ធិមនុស្សធ្ងន់ធ្ងរ រួមទាំងការសម្លាប់រង្គាល​ជាច្រើនលើជនស៊ីវិល ចាប់តាំងពីការធ្វើរដ្ឋប្រហារបង្ហូរឈាមរបស់ខ្លួន។

មុន​ដំណើរ​ទស្សនកិច្ច​របស់​លោក​នាយក​រដ្ឋមន្ត្រី​ទៅកាន់​ប្រទេស​មីយ៉ាន់ម៉ា ក្រុម​​អង្គការ​សង្គម​ស៊ីវិល​ចំនួន ១៩៥ ទាំងនៅក្នុង​ប្រទេស​មីយ៉ាន់ម៉ា និង​កម្ពុជា បាន​ចេញ​សេចក្តី​ថ្លែងការណ៍​រួមមួយដោយ «ថ្កោលទោស​លោក ហ៊ុន សែន យ៉ាង​ខ្លាំង​ចំពោះ​ការ​គាំទ្រ​របប​យោធា​ឧក្រិដ្ឋកម្ម​នៅ​មីយ៉ាន់ម៉ា»

ក្នុង​សុន្ទរកថា​កាលពី​ថ្ងៃ​ចន្ទ លោក ហ៊ុន សែន បាន​បន្ថែម​ថា បេសកជន​ពិសេស​នឹង​បន្ត​ជួប​ជាមួយ​ភាគី​ដែល​ចាប់​អារម្មណ៍​ក្នុង​ការ​ដោះស្រាយ​ជម្លោះ​ស៊ីវិល​ពហុភាគី។ លោកក៏បាន​ទទួលស្គាល់ផងដែរថា ក្រុមបាតុករដែលខឹងសម្បារក្នុងប្រទេសមីយ៉ាន់ម៉ា បានដុត និងជាន់​ឈ្លីរូបភាពរបស់លោក ក៏ដូចជាសេចក្តីថ្លែងការណ៍ថ្កោលទោសដំណើរទស្សនកិច្ច​របស់​លោក។

លោកបានមានប្រសាសន៍ថា៖ «ខ្ញុំមិនចាត់ទុកជាកំហុសរបស់ប្រជាជនមីយ៉ាន់ម៉ា ដែល​បានដុតរូបខ្ញុំ ឬជាន់លើរូបរបស់ខ្ញុំនោះទេ ប៉ុន្តែអ្នកនឹងយល់ថា ជីវិតរបស់​អ្នកនឹង​ត្រូវបាន​សង្គ្រោះពីសង្រ្គាមដោយសារតែតួនាទីរបស់អាស៊ាន»

ប៉ុន្តែ​អ្នក​សង្កេតការណ៍​នយោបាយ​មួយ​ចំនួន​នៅ​កម្ពុជា​មិន​សូវ​ប្រាកដ​ថា ​ការពន្យាពេល​បទ​ឈប់​បាញ់​ដែល​បាន​ព្រមព្រៀង​គ្នា​នឹង​មានប្រសិទ្ធិភាពច្រើននោះ​ទេ។

លោក ឯម សុវណ្ណារ៉ា ជាអ្នកវិភាគនយោបាយមានប្រសាសន៍ថា ការប្រកាសរបស់​របប​យោធាមិនធានាដល់ការបញ្ចប់អំពើហិង្សានោះទេ ព្រោះវាមិនបានធ្វើឡើង​ដោយមានការ​ព្រមព្រៀងជាមួយ NUG ដែលលោកហៅថា ជារដ្ឋាភិបាលស្រមោលនោះ។

លោក សុវណ្ណារ៉ា មានប្រសាសន៍ថា​៖ «​យើង [កម្ពុជា] ​ទទួលបាន​ជោគជ័យ​​មួយចំណុច​ក្នុង​ចំណោម ៥ ចំណុច។ យើង​កំពុង​រង់​ចាំ​មើល​យន្តការ​សម្រាប់​កិច្ច​ប្រជុំ និង​ការ​ចរចា​ជាមួយ​រដ្ឋាភិបាល​ស្រមោល»

អ្នកវិភាគម្នាក់ទៀតគឺលោក គិន ភា ដែលជាអគ្គនាយកវិទ្យាស្ថានទំនាក់ទំនងអន្តរជាតិ​នៃ​​រាជបណ្ឌិត្យសភាកម្ពុជាបានស្វាគមន៍​ចំពោះការដែលរបបយោធាពន្យារពេលបទ​ឈប់បាញ់​បន្ទាប់ពីដំណើរទស្សនកិច្ចរបស់លោក ហ៊ុន សែន។

លោកជឿជាក់ថា កិច្ចប្រជុំនេះគឺជាជោគជ័យមួយក្នុងការសម្រេចបាន​នូវគោលដៅ​របស់​អាស៊ាន និងសហគមន៍អន្តរជាតិក្នុងការស្វែងរក «ការបញ្ចប់អំពើហិង្សាឱ្យបានឆាប់តាម​ដែលអាចធ្វើបាននៅក្នុងប្រទេសមីយ៉ាន់ម៉ា» រួមទាំងការផ្តល់ជំនួយមនុស្សធម៌ផងដែរ។

លោក គិន ភា បាន​មាន​ប្រសាសន៍​ថា៖ «វា​បាន​បើក​ទ្វារ​សម្រាប់​ការ​​ចរចា ការ​សន្ទនា​នយោបាយ និង​សន្តិភាព»

ប្រែសម្រួលពីអត្ថបទភាសាអង់គ្លេស៖ Mixed response, some junta promises after PM’s trip to Myanmar

61 views
ព័ត៌មានថ្មីៗ »
អត្ថបទពេញនិយម »