នៅទីបំផុតសាលាគណខេត្តបាត់ដំបងបានសម្រេចឱ្យព្រះតេជព្រះគុណ សាំង រិទ្ធី ដែលត្រូវបានព្រះចៅអធិការវត្តដំរីសបណ្តេញចេញពីវត្ត បន្ទាប់ពីបានទៅចូលរួមបុណ្យរំឭកខួបថ្ងៃបាញ់សម្លាប់លោកបណ្ឌិតកែម ឡី ឱ្យទៅគង់នៅវត្តគរវិញ។
សាលាគណខេត្តបាត់ដំបង និងតំណាងមន្ទីរធម្មការ និងសាសនាខេត្ត ព្រមទាំងភាគីពាក់ព័ន្ធ បានបើកកិច្ចប្រជុំបិទទ្វារមួយរយៈពេលជាង៣ម៉ោងនៅវត្តពោធិ៍វាលនាព្រឹកថ្ងៃទី១៨ខែកក្កដា ដើម្បីដោះស្រាយករណីព្រះគ្រូចៅអធិការវត្តដំរីសបណ្តេញព្រះសង្ឃមួយអង្គចេញពីវត្តក្រោយពីចូលរួមធម្មយាត្រារំលឹកខួបនៃការបាញ់សម្លាប់បណ្ឌិតកែម ឡី។
ព្រះអង្គ សាំង រិទ្ធី ដែលត្រូវចៅអធិការបណ្តេញចេញពីវត្តបានឱ្យដឹងថា ក្រោយពីការជជែក ដេញដោលនិងសម្របសម្រួលគ្នាព្រះអង្គត្រូវបានសាលាគណខេត្តអនុញ្ញាតឱ្យទៅគង់នៅក្នុងវត្តគរ ស្ថិតនៅសង្កាត់វត្តគរ ក្រុងបាត់ដំបងដែលមានចម្ងាយប្រមាណជិត៤គីឡូម៉ែត្រពីសាលាដែលព្រះអង្គសិក្សាជារៀងរាល់ថ្ងៃ។ព្រះតេជព្រះគុណសាំង រិទ្ធី មានសង្ឃដីកាថា ព្រះអង្គបានទទួលយល់ព្រមដោយស្ម័គ្រចិត្ត ថ្វីដ្បិតព្រះអង្គរងសម្ពាធខ្លះពីមន្រ្តីសង្ឃក៏ដោយ ។
ព្រះតេជគុណបន្ថែមថា៖ «កិច្ចប្រជុំដោះស្រាយជាង៣ម៉ោងនេះសាលាគណខេត្ត បានធ្វើលិខិតស្នើសុំឱ្យអាត្មាស្នាក់នៅវត្តគរវិញ ដោយបញ្ជាក់ពីការគង់នៅដោយសុវត្ថិភាព កុំមានការភ័យខ្លាចជាដើម។ ប៉ុន្តែមិនបានបញ្ជាក់ពីការរិតត្បិតក្នុងការចូលរួមកិច្ចការងារសង្គមផ្សេងៗក្នុងលិខិតនោះទេ»។
ទោះបីយ៉ាងណា ព្រះអង្គ សាំង រិទ្ធី បញ្ជាក់ថា ក្នុងការសម្របសម្រួលនេះ មន្រ្តីសង្ឃ បានធ្វើការសាកសួរដេញដោលពីច្បាប់ទម្លាប់ និងការប្រព្រឹត្តខុសធម៌វិន័យដូចជាចេញពីវត្តមិនបានសុំការអនុញ្ញាតិពីចៅ អធិការវត្តដើម្បីទៅចូលរួមធម្មយាត្រា និងការស្នាក់នៅក្នុងវត្តក្រៅក្របខ័ណ្ឌជាដើម។ ព្រះអង្គយល់ថា ការសាកសួរចាក់ឫសចាក់គល់ជាច្រើនពីមន្រ្តីសង្ឃហាក់ដូចមានការរៀបចំមុនធ្វើឱ្យព្រះអង្គយល់ថា រងនូវសម្ពាធហើយក៏បានសម្រេចយល់ព្រមទៅគង់នៅវត្តគរ ដើម្បីបន្តការសិក្សារៀនសូត្រ និងចូលរួមការងារសង្គមផ្សេងៗបន្តទៀតមិនចង់ប្រឆាំងតវ៉ាទៀតនោះទេ។
ព្រះអង្គ សាំង រិទ្ធី បន្ថែមថា៖ «ជំហរអាត្មានៅតែរឹងមាំមិនតក់ស្លុតនោះទេ នៅតែបន្តការធ្វើធម្មយាត្រា និងចូលរួមកិច្ចការសង្គមដូចមុនដដែល»។
ព្រះអង្គបន្ថែមថា៖ «សូមឱ្យអាជ្ញាធរ និងមន្រ្តីសង្ឃបានយល់ថា អាត្មាធ្វើធម្មយាត្រាមិនមានខុសទេ មិនបានចូលរួមធ្វើបក្សនយោបាយណាមួយទេ គឺអព្យាក្រិត្យនៅកណ្តាល និងចូលរួមដោយស្ម័គ្រចិត្តរៀងៗខ្លួន ដែលមានឆន្ទៈស្រលាញ់ស្នេហាជាតិទើបសាមគ្គីគ្នាធ្វើ»។
ព្រះតេជព្រះគុណ សាំង រិទ្ធី ត្រូវបានព្រះចៅអធិការវត្តដំរីស បណ្តេញចេញពីវត្តកាលពីព្រលប់ថ្ងៃទី១៥ខែកក្កដាឆ្នាំ២០២៤បន្ទាប់ពីព្រះអង្គ បាននិមន្តចូលរួមធម្មយាត្រាអប់រំអំពីសីល៥ដើម្បីឧទ្ទិសកុសល និងរំលឹកខួប ៨ឆ្នាំនៃអំពើឃាតកម្មលើលោកបណ្ឌិត កែម ឡី ជាមួយព្រះសង្ឃ និងក្រុមយុវជនផ្សេងទៀតប្រមាណជាង៤០នាក់កាលពីរសៀលថ្ងៃទី១០ខែកក្កដា។
ព្រះអង្គបញ្ជាក់ថា ធម្មយាត្រានេះចេញដំណើរពីបណ្ណាល័យ«សម្តេចក្រឡាហោម ស ខេង» ទៅវិមានឯករាជ្យក្រុងបាត់ដំបង ក្នុងគោលបំណងចំនួន៣ ទីមួយដើម្បីផ្សព្វផ្សាយសីល៥លើកកម្ពស់សីលធម៌សង្គម ទី២ ដើម្បីបណ្តុះស្មារីតីប្រជាពលរដ្ឋ យុវជន និងព្រះសង្ឃឱ្យចូលរួមការងារសង្គម និងទី៣ប័ង្សុកូលឧទ្ទិសកុសល ដល់លោកបណ្ឌិតកែម ឡី និងវីរជនស្នេហាជាតិគ្រប់ជំនាន់។
ព្រះតេជព្រះគុណ អិត ខែម គង់នៅវត្តប៉ាឆា ដែលនិមន្តមកជាមួយព្រះសង្ឃ និងប្រជាពលរដ្ឋផ្សេងទៀតដើម្បីលើកទឹកចិត្តដល់ព្រះតេជគុណ សាំង រិទ្ធី នៅពីក្រៅសាលាគណខេត្តបានថ្លែងថា ការដោះស្រាយរបស់មន្រ្តីសង្ឃមានភាពល្អប្រសើរ ព្រោះព្រះតេជគុណ សាំង រិទ្ធី អាចមានវត្តគង់នៅសិក្សារៀនសូត្របន្តទៀត និងក៏មិនមានការផ្តិតមេដៃហាមឃាត់មិនឱ្យព្រះអង្គចូលរួមកិច្ចការសង្គមនោះដែរ។
ព្រះអង្គ អិត ខែម បានសំណូមពរថា៖ «ក្នុងនាមអាត្មាជាយុវសង្ឃម្នាក់ សុំឱ្យព្រះអង្គគ្រូមេគណ ព្រះអនុគណ ចៅអធិការ គ្រូសូត្រឆ្វេងស្តាំ គណៈគ្រប់គ្រងវត្តទាំងអស់ក្នុងប្រទេសកម្ពុជា បើកចិត្តឱ្យទូលាយចំពោះព្រះសង្ឃដែលមានឆន្ទៈក្នុងការចូលរួមកិច្ចការងារសង្គម ការងារសាសនា សូមកុំឱ្យមានការរឹតត្បិត គាបសង្កត់ ហាមប្រាមលោក រហូតមានពាក្យមួយថា បើចូលរួមនឹងបណ្តេញចេញពីវត្តអ៊ីចឹង! កុំមានទស្សនៈនឹងរឿងបែបហ្នឹងទៀត! សូមលើកទឹកចិត្តព្រះអង្គទៅ ព្រោះជាតិត្រូវការអ្នកជួយគិតប្រយោជន៍រួមរបស់ជាតិ និងសាសនា»។
ព្រះតេជព្រះគុណ ផុន សុខគា ព្រះចៅអធិការវត្តដំរីសបានបដិសេធធ្វើអត្ថាធិប្បាយ ខណៈព្រះអង្គនិមន្តចេញពីកិច្ចប្រជុំដោះសា្រយនៅសាលាគណដោយព្រះអង្គមានសង្ឃដីកាខ្លីថា មានការដោះស្រាយបញ្ចប់អស់ហើយ ដោយព្រះអង្គរុញឱ្យទៅសួរព្រះតេជគុណ សាំង រិទ្ធី វិញ រួចក៏និមន្តឡើង Pass app ចាកចេញទៅ។
ចំណែកលោកគុណ សម្បត្តិមន្នីរ័ត្ន ប្រធានមន្ទីរធម្មការ និងសាសនាខេត្ត ដែលបានចូលរួមផ្ទាល់ក្នុងកិច្ចប្រជុំដោះស្រាយនេះដែរ ក៏បានបដិសេធធ្វើអត្ថាធិប្បាយផងដែរ ដោយលោកថា ការសម្រេចនានាជាឆន្ទានុសិទ្ធិរបស់មន្រ្តីសង្ឃ មន្ទីរមិនលូកដៃនោះទេ ហើយលោកទៅចូលរួមគ្រាន់តែក្នុងនាមជាអ្នកសង្កេតការណ៍តែប៉ុណ្ណោះមិនមានសិទ្ធសម្រេចអ្វីទេ។
ជុំវិញសំណួរសួរពីការលើកឡើងពីចូលរួមរបស់ព្រះសង្ឃក្នុងកិច្ចការសង្គម និងធម្មយាត្រាផ្សេងៗ លោកប្រធានមន្ទីរបានរុញឱ្យទៅសួរមន្រ្តីសង្ឃវិញ។ លោក គុណ សម្បត្តិមន្នីរ័ត្ន បានថ្លែងខ្លីថា៖ «សួរមន្រ្តីសង្ឃទៅល្អជាង កុំឱ្យខ្ញុំនិយាយទៅវាមានការវែងឆ្ងាយ»។
ព្រះតេជព្រះគុណ វិ សុវជ្ជា លេខាសាលាគុណខេត្តបាត់ដំបង តំណាងឱ្យសាលាគណខេត្តបាត់ដំបងបានឱ្យដឹងថា ភាគីទាំងសងខាង ទាំងព្រះអង្គ សាំង រិទ្ធី និងចៅអធិការវត្តដំរីស បានសម្របសម្រួលត្រូវរូវគ្នាដោយស្ម័គ្រចិត្តមិនមានការបង្ខិតបង្ខំនោះទេ នឹងឱ្យព្រះអង្គ សាំង រិទ្ធី ទៅស្នាក់នៅវត្តគរវិញនៅពេលដែលអនុគណក្រុង និងជាចៅអធិការវត្តគរត្រឡប់មកពីសហរដ្ឋអាមេរិកវិញនៅថ្ងៃទី២០ ខែកក្កដា ខាងមុខនេះនឹងនាំលោកទៅស្នាក់នៅទីនោះ។
ព្រះតេជព្រះគុណ វិ សុវជ្ជា បន្ថែមថា៖ «ភាគីទាំងពីរទទួលស្គាល់នូវភាពខ្វះចន្លោះរៀងៗខ្លួនយើងមិនព្យាយាមនិយាយរឿងត្រូវខុសទេ កាលណាយើងនិយាយរឿងត្រូវខុស យើងលែងសម្របសម្រួលបានហើយ បើតុលាការគេនិយាយអ្នកនេះខុសអ្នកនោះត្រូវអ៊ីចឹងទៅ! នេះយើងលក្ខណៈសម្របសម្រួលក្នុងគ្រួសារអ្នកកាន់ព្រះពុទ្ធសាសនាដូចគ្នា»។
ទាក់ទងនឹងការនិមន្តរបស់ព្រះសង្ឃចូលរួមកិច្ចការងារសង្គមផ្សេងៗ ព្រះតេជព្រះគុណ វិ សុវជ្ជា បានបញ្ជាក់ថា៖ «ការចូលរួមកិច្ចការងារសង្គម មិនមាននណាទៅហាមឃាត់ទេ ធ្វើអ្វីក៏ដោយកុំឱ្យមានការប៉ះពាល់ដល់ច្បាប់សាសនា ច្បាប់រដ្ឋ និងបទបញ្ជាផ្ទៃក្នុងរបស់វត្ត អ៊ីចឹងទៅវាមិនអីទេ»។
លោក សឿម ប៊ុនរិទ្ធ អភិបាលរងខេត្តបាត់ដំបង និងជាអ្នកនាំពាក្យរដ្ឋបាលខេត្តបាត់ដំបងបានថ្លែងថា ករណីខាងលើនេះ គាត់បានទទួលព័ត៌មានថាសាលាគណខេត្ត ធ្វើការសម្របសម្រួលរវាងព្រះសង្ឃ សាំង រិទ្ឋី និងចៅអធិការវត្ត ។ លោកថ្លែងថា៖ «នេះជារឿងកិច្ចការព្រះសង្ឃសុទ្ឋសាធ»។
លោក អ៊ិន គង់ជិត អ្នកគ្រប់គ្រងប្រចាំតំបន់នៃអង្គការ លីកាដូ ដែលមានការិយាល័យនៅខេត្តបន្ទាយមានជ័យ បានចាត់ទុកដំណោះស្រាយខាងលើនេះថា ជាដំណោះស្រាយមិនសមរម្យនោះទេ។ លោកយល់ថា ដំណោះស្រាយនេះហាក់ដូចជាការព្រមានទៅលើសង្ឃដ៏ទៃទៀតមិនឱ្យហ៊ានចូលរួមក្នុងកិច្ចការសង្គមទៀតបើចូលរួម និងមានវាសនាបណ្តេញចេញពីវត្តដូចព្រះអង្គ រិទ្ធី ដូច្នេះដែរ។
លោក គង់ជិត បន្ថែមថា៖ «ដំណោះស្រាយហាក់ដូចជាការព្រមានលើសង្ឃដទៃទៀត នរណាហ៊ានចូលរួមផ្សព្វផ្សាយការងារសង្គមផ្សេងៗ គឺរងនូវបែបហ្នឹងគឺការបណ្តេញចេញពីវត្តនៅតែមានប្រសិទ្ធភាពរឿងបែបនេះ។ ក្នុងនាមសង្គមស៊ីវិលទទូចឱ្យលោកបានគង់នៅវត្តដំរីសដដែល ព្រោះក្នុងវត្តក៏មានកុដិអាចឱ្យលោកមានសេនាសនៈនៅសមរម្យដែរ»។
ព្រះតេជគុណ សាំង រិទ្ធី មានព្រះជន្ម៣០ឆ្នាំ ព្រះអង្គកំព្រាគ្មានឪពុកម្តាយ គ្មានទីពឹង ហើយបានបួសជាភិក្ខុសង្ឃយូរឆ្នាំមកហើយ។ ព្រះអង្គតែងតែចូលរួមក្នុងកិច្ចការសង្គមផ្សេងៗ ហើយបច្ចុប្បន្នព្រះអង្គជាសាមននិស្សិតនីតិសាស្ត្រឆ្នាំទី២ នៃសាកលវិទ្យាល័យប៊ៀលប្រាយក្រុងបាត់ដំបង៕
