សមាគមសម្ព័ន្ធអ្នកសារព័ត៌មានកម្ពុជា

បេក្ខជនឃុំសង្កាត់គណបក្សភ្លើងទៀនជាច្រើនទៀតត្រូវបានកាត់ចេញពីការបោះឆ្នោត

(ពីខាងឆ្វេង) អនុប្រធានគណបក្សភ្លើងទៀនលោក ថាច់ សេដ្ឋា និង លោក សុន ឆ័យ និងអគ្គលេខាធិការលោក លី សុធារ៉ាយុទ្ធ ចូលរួមក្នុងសន្និសីទសារព័ត៌មានមួយនៅរាជធានីភ្នំពេញ កាលពីថ្ងៃទី៤ ខែមេសា ឆ្នាំ២០២២។ ខេមបូចា/ ព្រីង សំរាំង
(ពីខាងឆ្វេង) អនុប្រធានគណបក្សភ្លើងទៀនលោក ថាច់ សេដ្ឋា និង លោក សុន ឆ័យ និងអគ្គលេខាធិការលោក លី សុធារ៉ាយុទ្ធ ចូលរួមក្នុងសន្និសីទសារព័ត៌មានមួយនៅរាជធានីភ្នំពេញ កាលពីថ្ងៃទី៤ ខែមេសា ឆ្នាំ២០២២។ ខេមបូចា/ ព្រីង សំរាំង

គណៈកម្មាធិការជាតិ​រៀបចំ​ការ​បោះឆ្នោត (គ.ជ.ប) បាន​ដក​បេក្ខជន​ឈរ​ឈ្មោះ​ឃុំសង្កាត់​ចំនួន ១៥០​នាក់​ចេញ​ពី​គណបក្ស​ភ្លើង​ទៀត នៅ​មុន​ការ​បោះឆ្នោត​ក្រុម​ប្រឹក្សា​ឃុំ​សង្កាត់ នៅ​ខែ​មិថុនា​ខាង​មុខ ដោយ​បង្ក​ឲ្យ​មាន​ការ​រិះគន់​ពី​មន្រ្តី​គណបក្ស​មួយ​នេះ។

មេដឹកនាំ​គណបក្ស​ភ្លើងទៀន​បាន​ចាត់​ទុក​ការ​ដក​បេក្ខជន​ខាង​លើ​នេះ​ថា មាន​ហេតុផល​ជំរុញ​ពី​ក្រោយ​ដោយ​នយោបាយ​ និង​ស្នើ​ឲ្យ​គ.ជ.ប​ពិចារណា​ឡើង​វិញ។ យោង​តាម​គណបក្ស​នេះ​ បេក្ខជន​មក​ពី​ឃុំ​សង្កាត់​ចំនួន១១ ត្រូវ​បាន​ដកចេញ​ពី​ការ​ឈរ​ឈ្មោះ ក្នុង​នោះ​ ៨​សង្កាត់​​នៅ​រាជធានី​ភ្នំពេញ (បេក្ខជន​សរុប​ ១១៦) ពីរ​ឃុំ​នៅ​ខេត្ត​កំពង់ចាម (បេក្ខជន​សរុប​ ២៤​នាក់) និង​មួយ​ឃុំ​នៅ​ខេត្ត​ពោធិ៍សាត់​ (បេក្ខជន​សរុប ១០​នាក់)។

លោក​ សុន ឆ័យ អនុប្រធាន​គណបក្ស​ភ្លើង​ទៀន បាន​ប្រាប់​អ្នកសារព័ត៌មាន​អំឡុងពេល​សន្និសីទ​សារព័ត៌មាន​កាល​ពី​ថ្ងៃ​ចន្ទ​ថា អាជ្ញាធរ​មូលដ្ឋាន​បាន​បង្ក​ជា​ឧបសគ្គ​សម្រាប់​គណបក្ស​ប្រឆាំង ដោយ​បំពាន​លើ​សិទ្ធិ​នយោបាយ​របស់​ពួកគេ។

​ប៉ុន្តែ​លោក​អះអាង​ថា គណបក្ស​ភ្លើង​ទៀន​នឹង​បន្ត​តស៊ូ​ឈរ​ឈ្មោះ​លើ​សន្លឹកឆ្នោត។

​លោក​បាន​ថ្លែង​ថា៖ «យើង​នឹង​មិន​នៅ​ស្ងៀម​នោះ​ទេ យើង​តស៊ូមតិ យើង​ទាមទារ​ឲ្យ​ធ្វើ​ឲ្យ​ស្ថានភាព​ប្រសើរ​ឡើង​វិញ។ យើង​នឹង​ចូលរួម​នៅ​​ក្នុង​ការ​បោះឆ្នោត» ដោយ​បន្ថែម​ថា ការ​គំរាមកំហែង​ជំរុញ​ដោយ​នយោបាយ​នឹង​បង្ក​បញ្ហា​កាន់​តែ​ច្រើន​ជាង​នេះ​មក​លើ​គណបក្ស​ប្រឆាំង។ ​

​លោក​បាន​បន្ត​ថា៖ «ឥឡូវ​នេះ​គឺ​ ចាប់ផ្តើម​ពី​ការ​លុបបញ្ជី​បេក្ខជន​ទាំងស្រុង​ដោយ​មិនមាន​ក្បួន​ខ្នាត ដែល​នេះ​បង្ក​ឲ្យ​មាន​ភាព​កាន់​តែ​មិន​ជឿ​ទុក​ចិត្ត​នៅ​ពេល​រាប់​សន្លឹក​ឆ្នោត»

​លោក​ក៏​បាន​លើក​ឡើង​ពី​ការ​លំបាក​នៅ​ក្នុង​រៀបចំ​ភ្នាក់ងារ​អង្កេតការណ៍​លើ​ការ​បោះឆ្នោត​ចេញ​ពី​គណបក្ស​ ដោយសារ​តែ​សកម្មជន​របស់​គណបក្ស​ធ្លាប់​រង​ការ​គំរាមកំហែង។

លោក​បាន​និយាយ​ថា៖ «យើង​សុំ​ឲ្យ​អាជ្ញាធរ​ជួយ​សម្រួល​រឿង​នេះ។ ប្រសិន​បើ​យើង​មិនមាន​អ្នក​អង្កេតការណ៍​នៅការិយាល័យ​​​បោះឆ្នោត​នោះ​ទេ តើ​លទ្ធផល​នឹង​ទៅ​ជា​យ៉ាង​ណា? តើ​នឹង​បង្ក​ជា​មន្ទិល​ប៉ុណ្ណា? វា​នឹង​មាន​ការ​តវ៉ាទេ ហើយ​យើង​មិនចង់​ឲ្យ​មាន​ការ​តវ៉ា​ក្រោយ​ការ​បោះឆ្នោត​នោះ​ទេ»។ ​

​គណបក្ស​ភ្លើងទៀន​បាន​ជំរុញ​ឲ្យ​គ.ជ.ប​ពិចារណា​ឡើង​វិញ និង​រក្សា​បញ្ជី​បេក្ខជន​នៅ​ក្នុង​ឃុំសង្កាត់​ទាំង ១១។

​គណបក្ស​នេះ​ក៏​បាន​អំពាវនាវ​ទៅ​កាន់​សហគមន៍​អន្តរជាតិ ជាពិសេស​រដ្ឋាភិបាល​ជប៉ុន ដែល​បាន​ប្តេជ្ញា​លើកកម្ពស់​ដំណើរការ​បោះឆ្នោត​នៅ​កម្ពុជា ឲ្យ​តាមដាន​និង​ធានា​នូវ​អព្យាក្រឹត្យភាព​របស់​គ.ជ.ប​ដើម្បី​ឲ្យ​ការ​បោះឆ្នោត​ត្រូវ​បាន​ទទួលស្គាល់​ដោយ​គ្រប់​គណបក្ស​នយោបាយ និង​អ្នក​អង្កេតការណ៍​អន្តរជាតិ។

​បើ​តាម​លោក សុន ឆ័យ គណបក្ស​ភ្លើង​ទៀន​នឹង​ជួប​ជាមួយ​ប្រធាន​គ.ជ.ប​ដើម្បី​ពិភាក្សា​ និង​ស្វែងរក​មធ្យោបាយ​ដើម្បី​សម្រួល​បញ្ហា។ អ្នកនាំពាក្យ​គ.ជ.ប​បាន​និយាយ​​កាល​ពី​ថ្ងៃ​ចន្ទ​ថា គ.ជ.ប​បាន​លុបចោល​បេក្ខជន​ពី​សន្លឹកឆ្នោត​រួចរាល់​ហើយ។

​យោង​ទៅ​តាម​របាយការណ៍​ពាក់ព័ន្ធ​នឹង​ការ​បង្អាក់​ផ្នែក​នយោបាយ​មក​លើ​គណបក្ស​កាល​ពី​ខែ​មីនា​ បេក្ខជន​គណបក្ស​ភ្លើងទៀន​បាន​ប្រឈម​នឹង​ការ​ធ្វើ​ទុក្ខបុកម្នេញ និង​គំរាមកំហែង​ពី​អាជ្ញាធរ​មូលដ្ឋាន​តាម​រូបភាព​ផ្សេងៗ រួម​មាន​ ការ​ទាមទារ​ឲ្យ​លាលែង​ពី​តំណែង​ជា​បេក្ខជន​គណបក្ស ការ​កោះហៅ​ដោយ​ប៉ូលិស​ដោយ​មិនមាន​ហេតុផល បទចោទប្រកាន់​ពី​ការ​ក្លែងបន្លំ និង​គំរាម​ដក​ហូត​សេវាកម្ម​សាធារណៈ ដូចជា ការ​ដកហូត​បណ្ណ​ក្រីក្រ​ជា​ដើម។

អ្នកសារព័ត៌មាន​ថតរូប​អនុប្រធាន​គណបក្ស​ភ្លើង​ទៀន​លោក ថាច់ សេដ្ឋា និង​លោក សុន ឆ័យ និង​អគ្គលេខាធិការ​លោក លី សុធារ៉ាយុទ្ធ នៅ​អំឡុងពេល​សន្និសីទ​សារព័ត៌មាន​នៅ​រាជធានីភ្នំពេញ កាល​ពី​ថ្ងៃ​ទី៤ ខែ​មេសា ឆ្នាំ​២០២២។ ខេមបូចា/ ព្រីង សំរាំង

របាយការណ៍​បាន​និយាយ​ថា មក​ទល់​ពេល​នេះ សមាជិក​គណបក្ស​ភ្លើង​ទៀន​ចំនួន​បួន​នាក់​ត្រូវ​បាន​ចាប់ខ្លួន​ចាប់តាំង​ពី​ចូលរួម​ជាមួយ​គណបក្ស។

កម្ពុជា​នឹង​រៀបចំ​ការ​បោះឆ្នោត​ក្រុមប្រឹក្សា​ឃុំសង្កាត់​នៅ​ថ្ងៃ​ទី៥ ខែ​មិថុនា ទូទាំង​ឃុំ​សង្កាត់​សរុប​ ១.៦៥២។ យោង​តាម​ព័ត៌មាន​ពី​គ.ជ.ប​ មាន​បេក្ខជន​ ៨២.៧៨៦ នាក់​បាន​ចុះ​ឈ្មោះ​ពី​គណបក្ស​នយោបាយ ១៧ ទូទាំង​ប្រទេស។

​អ្នកនាំពាក្យ​គ.ជ.ប​លោក​ ហង្ស ពុទ្ធា​ បាន​ប្រាប់​ ខេមបូចា ថា គ.ជ.ប​សម្រេច​លុបឈ្មោះ​បេក្ខជន​មិនត្រឹម​តែ​មក​ពី​គណបក្ស​ភ្លើង​ទៀន​ប៉ុណ្ណោះ​ទេ ក៏​មាន​ពី​គណបក្ស​ឆន្ទៈខ្មែរ និង​គណបក្ស​សំបុកឃ្មុំផង​ដែរ

​លោក​បាន​បន្ត​ថា បេក្ខជន​ទាំង​នោះ​មិនបាន​បំពេញ​បែបបទ​ដើម្បី​ចុះ​ឈ្មោះ​លើ​សន្លឹក​ឆ្នោត​នោះ​ទេ ដែល​ការណ៍​​នេះ​បាន​បង្ហាញ​មន្ទិល​ពាក់ព័ន្ធ​នឹង​អក្ខរកម្ម​របស់​ពួកគេ។

លោក​បាន​ថ្លែង​ថា៖ «យើង​បាន​លុប​បេក្ខជន​ទាំង​នោះ​ចេញ​ពី​បញ្ជី ពីព្រោះ​យើង​សង្កេត​ឃើញជាទូទៅ​​ថា ពួកគេ​មិន​ចេះ​សរសេរ​អក្សរ​ខ្មែរ ហើយ​ចំណុច​នេះគឺ​តម្រូវ​ដោយ​ច្បាប់»។ ​

បើ​ទោះ​បី​ជា​អក្ខរកម្ម​ជា​តម្រូវ​ការ​សម្រាប់​ការ​ឈរឈ្មោះ​បោះឆ្នោត​នៅ​កម្ពុជា នៅ​ឆ្នាំ​នេះ​ គ.ជ.ប​បាន​លុប​ចោល​បញ្ជី​ឈ្មោះ​បេក្ខជន​ឈរ​ឈ្មោះ​ឃុំ​សង្កាត់​ទាំងស្រុង ជាជាង​ការ​ដក​ចេញ​នូវ​បេក្ខជន​ដែល​មិន​បំពេញ​លក្ខខណ្ឌ​ជា​លក្ខណៈ​បុគ្គល។ ការ​ធ្វើ​ដូចនេះ​អាច​ចាត់ទុក​ជា​រឿង​ចម្លែក​មួយ​បើ​ប្រៀប​ជាមួយ​នឹង​ការ​បោះឆ្នោត​កាល​ពី​គ្រាមុនៗ។

​លោក​ ហង្ស ពុទ្ធា បាន​បន្ថែម​ថា ក្រុមប្រឹក្សា​ជំនុំជម្រះ​បាន​បិទផ្លូវ​តវ៉ារួចទៅហើយ ហើយ​គណបក្ស​ទាំង​នោះ​មិនត្រូវ​បំពាន​ច្បាប់​នោះ​ទេ។

យោង​ទៅ​តាម​លោក​ គង់ ម៉ូនីកា ប្រធាន​គណបក្ស​ឆន្ទៈ​ខ្មែរ បានឲ្យដឹងថា បេក្ខជន​ ៣៣​នាក់​ពី​គណបក្ស​របស់​លោក​នៅ​រាជធានី​ភ្នំពេញ​ ត្រូវ​បាន​លុបឈ្មោះ​ចេញ​ពី​បញ្ជី​បោះឆ្នោត​មក​ទល់​ពេល​នេះ។

​អ្នកនាំពាក្យ​គណបក្ស​ប្រជាជន​កម្ពុជា​លោក សុខ ឥសាន និយាយ​ថា គណបក្ស​​ប្រឆាំង​តែង​តែ​តវ៉ា​លើ​បញ្ហា​នេះ ដោយសារ​តែ​ពួកគេ​មិន​ព្រម​ទទួល​ខុសត្រូវ​លើ​កំហុស​របស់​ខ្លួន។

លោក​បាន​ថ្លែង​ថា៖ «បើ​និយាយថា គណបក្ស​ប្រជាជន​កម្ពុជា​ព្រួយបារម្ភ​ពី​ប្រជាប្រិយ​ភាព​របស់​គណបក្ស​ភ្លើងទៀន​គឺ​ មិន​ពិត​នោះ​ទេ។ ដោយសារ​តែ​យើង​ដឹង​ថា គណបក្ស​នេះ​គឺ​គ្រាន់​តែ​ជា​ចំណែក​តូច​មួយ​នៃ​អតីត​គណបក្ស​សង្រ្គោះជាតិ ដែល​បាន​ចាញ់​រួច​ទៅ​ហើយ ចាប់​តាំង​ពី​ឆ្នាំ ២០១៣​មក​»។ ​

​លោក កន សាវាង្ស មន្ដ្រី​ជាន់ខ្ពស់​នៃ​កម្មវិធី​ផ្នែក​អង្កេត​របស់​អង្គការ​ខុមហ្វ្រែល និយាយ​ថា គ.ជ.ប​គួរ​តែ​ផ្តល់​ឱកាស​ដល់​គណបក្ស​នយោបាយ​ដើម្បី​ជំនួស​​បេក្ខជន​ទាំង​នោះ ជាជាង​លុប​បញ្ជី​ឈ្មោះ​ទាំងស្រុង។ ​

​​លោក​បាន​បន្ត​ថា នេះ​ជា​លើកដំបូង​ហើយ​ដែល​គ.ជ.ប​បាន​ធ្វើ​ដូចនេះ ដែល​ការណ៍​នេះ​​បាន​ប៉ះពាល់​ដល់​សិទ្ធិ​របស់​ពលរដ្ឋ​នៅ​ក្នុង​ការ​ជ្រើសរើស​តំណាង​របស់​ពួកគេ។

​​លោក​បាន​ថ្លែង​ថា៖ «ពលរដ្ឋ​ត្រូវ​ការ​គណបក្ស​នយោបាយ​ច្រើន​ជាង​នេះ ពួកគេ​ត្រូវ​ការ​នរណា​ម្នាក់​ដែល​ពួកគេ​ពេញចិត្ត​នៅ​ក្នុង​សហគមន៍​របស់​ពួកគេ។ ពួកគេ​ត្រូវ​ការ​សិទ្ធិ​នយោបាយ​ក្នុង​ការ​ជ្រើសរើស»(រាយការណ៍បន្ថែមដោយ ទ្រី ថានី)

ប្រែសម្រួលពីអត្ថបទភាសាអង់គ្លេស៖ More Candlelight Party commune candidates cut from election

1,389 views

ព័ត៌មានទាក់ទង

ព័ត៌មានថ្មី

អត្ថបទពេញនិយម