រលកថ្មីជំងឺកូវីដ១៩ បង្ហាញពីចំណុចទន់ខ្សោយនៃការសិក្សាតាមប្រព័ន្ធអនឡាញ

សិស្សម្នាក់កំពុងសិក្សាតាមប្រព័ន្ធអ៊ីនធឺណិតនៅផ្ទះរបស់ខ្លួនក្នុងក្រុងភ្នំពេញ កាលពីថ្ងៃទី១១ ខែមីនា ឆ្នាំ២០២១។ ខេមបូចា/ព្រីង សំរាំង
សិស្សម្នាក់កំពុងសិក្សាតាមប្រព័ន្ធអ៊ីនធឺណិតនៅផ្ទះរបស់ខ្លួនក្នុងក្រុងភ្នំពេញ កាលពីថ្ងៃទី១១ ខែមីនា ឆ្នាំ២០២១។ ខេមបូចា/ព្រីង សំរាំង

ស្រប​ពេល​ដែល​សាលារៀនមួយ​ចំនួន​​ត្រូវ​ផ្អាកជាថ្មីម្តងទៀត ​បន្ទាប់​ពី​មាន​រលក​នៃ​ការ​ឆ្លង​ជំងឺ​កូវីដ១៩​លើក​ទីបី កុមារ​ និង​អាណាព្យាបាល​នៅ​ទូទាំង​ប្រទេស​កម្ពុជា​ត្រៀម​លក្ខណៈ​សម្រាប់​ការ​រៀន​តាម​អនឡាញសាជាថ្មី។

ប៉ុន្តែ​សម្រាប់​សិស្ស​មួយ​ចំនួន ការ​ផ្លាស់ប្តូរ​ពី​ការ​សិក្សា​នៅ​ក្នុង​ថ្នាក់មក​រៀន​តាម​អនឡាញ​សាជាថ្មីនេះ​ ​បាន​បង្អាក់​ការ​សិក្សា​របស់​ពួកគេ ហើយ​ប្រឈម​នឹង​លទ្ធភាព​ដែល​ពួកគេ​មិន​វិល​ត្រឡប់​មក​សិក្សា​ក្នុង​សាលារៀន​វិញ។ ​

​អ្នកស្រី​ សេង​ ទ្រី អ្នក​រើស​អេតចាយ​អាយុ​ ៥០​ឆ្នាំ​រស់​នៅ​សង្កាត់​ព្រៃស​ ក្រុង​ភ្នំពេញ បាននិយាយថាកូនៗអ្នកស្រីមិនមាន​ទូរសព្ទ​ស្មាតហ្វូន ឬ​កុំព្យូទ័រ​ដើម្បី​រៀន​តាម​ប្រព័ន្ធ​អ៊ីនធឺណិត​នោះ​ទេ។

អ្នកស្រី សេង​ ទ្រី និយាយថា៖ «ខ្ញុំបារម្ភថា​កូន​ខ្ញុំ​បី​នាក់​រៀន​មិន​ចេះ​អ្វី​នោះ​ទេ»​

អ្នកស្រី​បាន​និយាយ​រៀបរាប់​ពី​កូនៗ​របស់​អ្នកស្រី ដែល​រៀន​នៅ​ថ្នាក់​ទី០៥ និង​ទី០៩​ថា៖ «ពេលខ្លះពួកគេ​ជួយ​ខ្ញុំ​រើស​អេតចាយ​។ ប្រសិន​បើ​សាលា​នៅ​បិទ​យូរ ខ្ញុំ​បារម្ភ​ថា ពួកគេ​នឹង​មិន​ចេះ​អ្វី​ទេ»

​រលក​នៃ​ការ​ឆ្លង​ជំងឺ​កូវីដ១៩​ លើក​ទី៣ មាន​សភាព​ធ្ងន់ធ្ងរ​ជាង​គេ​បំផុត​នៅ​កម្ពុជា ដែល​បាន​ បណ្តាល​ឲ្យ​សាលារៀន​បិទទ្វារ​នៅ​ក្រុង​ភ្នំពេញ ខេត្ត​កណ្តាល ខេត្ត​ព្រះសីហនុ និង​ផ្នែក​ខ្លះ​នៃ​ខេត្ត​ព្រៃវែង ខេត្ត​កោះកុង និងខេត្តតាកែវ ស្រប​ពេល​ដែល​ករណី​ឆ្លង​ជំងឺ​កូវីដ១៩ ពី​ព្រឹត្តិការណ៍ «២០ កុម្ភៈ» បន្ត​កើន​ឡើង។

នៅ​ជុំវិញ​ពិភពលោក គ្រូ​បង្រៀន​ប្រឈម​នឹង​បញ្ហា​ចោទផ្សេងៗ​ដោយសារ​សាលារៀន​បាន​បិទទ្វារ​អស់រយៈពេល​ជិត​មួយ​ឆ្នាំ​មក​នេះ ជាមួយ​នឹង​​កង្វះខាត​ផ្សេងៗ​ចំពោះ​ការ​រៀន​តាម​ប្រព័ន្ធ​អ៊ីនធឺណិត​បាន​លេចឡើង ខណៈ​ក្រុម​មនុស្ស​ងាយ​រងគ្រោះ​មិនមាន​លទ្ធភាព​ចូល​រៀន​បាន។

រដ្ឋមន្រ្តី​ក្រសួង​អប់រំ លោក ហង់ ជួន​ណារ៉ុន​ មានប្រសាសន៍ថា ចំពោះ​បញ្ហា​នេះ​ កម្ពុជា​កំពុង​សម្លឹង​រក​ការ​កាត់បន្ថយ​ការ​បិទ​សាលារៀន ដែល​​ការ​បិទ​នេះ​បាន​បង្ក​ការ​គំរាមកំហែង​ទៅ​លើ​ប្រព័ន្ធ​អប់រំ​ ដែល​កំពុង​មាន​ភាព​ទន់ខ្សោយ​រួច​ទៅ​ហើយ។

លោក​បាន​មានប្រសាសន៍ថា៖ «ក្រសួង​កំពុង​ធ្វើការ​វាយតម្លៃ​ស្ថានភាព​ជាប្រចាំ យើង​ពិនិត្យ​តាម​ម៉ោង និង​​ប្រចាំ​ថ្ងៃ ជាពិសេស​នៅ​តំបន់​ជនបទ​ដែល​មិនមាន​ហានិភ័យ​ខ្ពស់​នៃ​ការ​ឆ្លង​ជំងឺ​កូវីដ១៩​»

លោកបន្ថែមថា៖ «យើង​មិន​អាច​បិទ [សាលារៀន] នៅ​ទូទាំង​ប្រទេសបាន​ទេ ដោយសារ​វា​នឹង​ប៉ះពាល់​ដល់​ការ​សិក្សា​របស់​សិស្ស​នៅ​តំបន់​ដែល​មិន​រង​ផល​ប៉ះពាល់​ដោយសារ​ជំងឺ​កូវីដ១៩»

ធនាគារ​ពិភពលោក​បាន​រាយការណ៍​កាល​ពី​ខែ​ធ្នូ​ថា ការ​រាតត្បាត​ជំងឺ​កូវីដ១៩ និង​ការ​បង្អាក់​សាលារៀន​បាន​ជំរុញ​ឲ្យ​សិស្ស​កម្រិត​បឋមសិក្សា​ចំនួន​៧២​លាន​នាក់​ថែមទៀត​ ធ្លាក់​ចូល​ទៅ​ក្នុង «ភាព​ខ្សត់ខ្សោយ​ផ្នែក​រៀនសូត្រ» ដែល​ត្រូវ​បាន​ពណ៌នា​ក្នុង​ន័យ​ថា កុមារ​មិន​អាច​អាន ឬ​យល់​សំណេរ​ធម្មតា​នៅ​អាយុ ១០​ឆ្នាំ។

លោកស្រី Katheryn Bennet ប្រធាន​ផ្នែក​អប់រំ​ប្រចាំ​​អង្គការ UNICEF នៅ​កម្ពុជា បាន​និយាយ​ថា ​កុមារ​មក​ពី​គ្រួសារ​ក្រីក្រ និង​ជនបទ​ជួប​ប្រទះ​បញ្ហា​ប្រឈម​ខ្លាំង​បំផុត។

អ្នកស្រី​បាន​ថ្លែង​ថា៖ «បញ្ហា​ប្រឈម​ទាំង​នេះ​កំពុង​តែ​ធ្វើ​ឲ្យ​កាន់តែ​អាក្រក់​លើ​អត្រា​បោះបង់​ចោល​ការ​សិក្សា​របស់​សិស្ស ​ដែល​កំពុង​មាន​ខ្ពស់​រួច​ស្រាប់​ទៅ​ហើយ លទ្ធផល​រៀន​សូត្រ​ខ្សត់ខ្សោយ វិសមភាព​ការ​អប់រំ​រវាង​តំបន់​ជនបទ និង​ទីក្រុង ការ​ទទួល​បាន​ការ​អប់រំ និង​ហេដ្ឋារចនាសម្ព័ន្ធ​សាលារៀន​មាន​កម្រិត»

ស្រ្តី​ម្នាក់​ជិះកាត់​សាលារៀន​បិទទ្វារ​មួយ​នៅ​ក្រុង​ភ្នំពេញ កាល​ពី​​ថ្ងៃ​ទី១១ ខែ​មីនា ឆ្នាំ​២០១១។ ខេមបូចា/ព្រីង សំរាំង
ស្រ្តី​ម្នាក់​ជិះកាត់​សាលារៀន​បិទទ្វារ​មួយ​នៅ​ក្រុង​ភ្នំពេញ កាល​ពី​​ថ្ងៃ​ទី១១ ខែ​មីនា ឆ្នាំ​២០១១។ ខេមបូចា/ព្រីង សំរាំង

​ទិន្នន័យ​​ពី​ក្រសួង​អប់រំ និងអង្គការ​ UNESCO ប៉ាន់ប្រមាណ​ថា សិស្ស​ប្រមាណ ៥​សែន​នាក់​មក​ពី​សាលារៀន​ប្រមាណ ៨០០​នៅ​កម្ពុជា បាន​រង​ផលប៉ះពាល់​ពី​ការ​បិទសាលារៀន​នៅ​ឆ្នាំ​២០២០។

ក្រៅ​ពី​ការ​បិទសាលារៀន​ដើម្បី​បញ្ឈប់​ការ​រីករាលដាល​ជំងឺ​កូវីដ១៩​ សាលារៀន​ប្រមាណ ៥០​នៅ​តាម​បណ្តា​ខេត្ត​ភាគខាងជើង​ប្រទេស​ជាប់​ព្រំប្រទល់​ជាមួយ​នឹង​ថៃ ត្រូវ​បាន​ប្រើប្រាស់ជា មណ្ឌល​ចត្តាឡីស័ក ស្រប​ពេល​ដែល​ពលករ​កម្ពុជា​រាប់​សិប​ម៉ឺន​នាក់​វិលត្រឡប់​មក​ពី​ប្រទេស​ថៃ​វិញ។​​

លោក​ អ៊ិន ឃិន នាយករង​វិទ្យាល័យ​មួយ​ក្នុង​​ស្រុក​សំរោង​ ខេត្ត​ឧត្ត​មានជ័យ​ បាន​និយាយ​ថា ការ​ប្រែពីសាលារៀន​ទៅជា​មណ្ឌល​ចត្តាឡីស័ក​បាន​បង្ក​ជា​បញ្ហា​ប្រឈម​មួយ​ចំនួន។​

លោក​បាន​ថ្លែង​ថា សិស្ស​ត្រូវ​បាន​បញ្ជូន​ឲ្យ​ទៅ​រៀន​នៅ​សាលាបឋមសិក្សា​ក្បែរ​នោះ ជា​ទី​ដែល​ពួកគេ​ត្រូវ​ចែកវេន​គ្នា​ដើម្បី​រៀន

លោក​បាន​និយាយ​ថា៖ «សិស្ស​មិន​អាច​រៀន​ពេញ​លេញ​បានទេ។ យើង​បាន​កាត់បន្ថយ​កាល​វិភាគ​សិក្សាមួយ​ចំនួន ដោយសារ​តែ​យើង​មិនមាន​ថ្នាក់រៀន​គ្រប់គ្រាន់»

ក្រុម​អ្នក​ជំនាញ​និយាយថា ​ដោយសារ​តែ​ការ​រាតត្បាត​ជំងឺ​​បាន​បង្ក​ជា​ភាព​មិនច្បាស់លាស់​នា​ពេល​អនាគត ហើយ​បាន​បង្អាក់ការ​រៀនសូត្រ​របស់​សិស្ស​មួយ​ចំនួន​រួច​ទៅ​ហើយ​។ គម្លាត​រវាង​អ្នកក្រ​និង​អ្នកមាន​ មាន​ទំនោរ​នឹង​កើន​ឡើង ដោយសារ​តែ​កុមារ​​មួយ​ចំនួន​ត្រូវ​បង្ខំ​ចិត្ត​​ទៅធ្វើការ​នៅ​ពេល​មិន​ចូល​រៀន ហើយ​ការណ៍​នេះ​អាច​បង្ក​ជា​លទ្ធភាព​ដែល​ថា ពួកគេ​លែង​​វិល​ត្រឡប់​មក​សិក្សា​វិញ។​​

លោក ​គួច​ ម៉េង​លី នាយក​សាលា​អន្តរជាតិ American Intercon នៅ​កម្ពុជា​បាន​និយាយ​ថា កម្ពុជា​​អាច​ស្ថិត​នៅ​ក្នុង​ចំណោម​បណ្តា​ប្រទេស​ដែល​រងការ​ប៉ះពាល់​ខ្លាំង​ជាង​គេ​ ដោយសារ​វិសមភាព និង​គម្លាត​​ដ៏​ធំនៃ​គុណភាព​រវាង​ការ​សិក្សា​តាមប្រព័ន្ធ​អ៊ីនធឺណិត​ផ្តល់​ដោយ​សាលារៀន​រដ្ឋ និង​ដោយ​សាលារៀន​ឯកជន។

លោក​បាន​មានប្រសាសន៍ថា៖ «សម្រាប់​សាលារៀន​ឯកជន​ សិស្ស​មាន​ឱកាស​ច្រើន​ជាង​នេះ ប៉ុន្តែ​ភាគច្រើន​នៃ​សិស្ស​នៅ​សាលារៀន​រដ្ឋ​ នៅ​តំបន់​ជនបទ​មិន​អាច​ទទួល​បាន​ការ​សិក្សា​តាម​ប្រព័ន្ធ​អ៊ីនធឺណិត​បាន​នោះ​ទេ»។​​​

លោក​បាន​បន្ត​ថា ការ​បិទ​សកម្មភាព​សង្គម​​ពី​ពេល​មុន​មក​បាន​បង្ហាញ​ពី​ចំណុច​ខ្សោយ​នានា​នៃ​​ការ​សិក្សា​តាម​ប្រព័ន្ធអ៊ីនធឺណិត»

លោក​មានប្រសាសន៍​ថា៖ «កុមារ​មិន​អាច​ផ្តោត​លើ​ការ​សិក្សា​តាម​ប្រព័ន្ធ​អ៊ីនធឺណិត​​បាន​លើស​ពី​ ២០ ទៅ​៣០​នាទី​ទេ ដូច្នេះ​វា​លំបាក​សម្រាប់​ពួកគេ ខណៈ​ឪពុកម្តាយ​នៅ​បណ្តា​ប្រទេស​កំពុង​អភិវឌ្ឍ​ន៍​មិន​​សូវ​យល់​ដឹង​ប៉ុន្មាន​ពី​បច្ចេកវិទ្យា»

លោក ឡេង ប៉េងសរ គ្រូ​បង្រៀន​មុខ​វិជ្ជា​រូបវិទ្យា​នៅ​វិទ្យាល័យ​កំពង់ធំ និយាយ​ថា សម្រាប់​សាលារៀន​ដែល​នៅ​បន្ត​បើក​ទ្វារ ការ​ព្រួយបារម្ភ​ពី​ជំងឺ​កូវីដ១៩ គឺ​នៅ​​ខ្ពស់។ ថ្នាក់​ដឹកនាំ​គ្រប់គ្រង​វិទ្យាល័យ​នេះ​កំពុង​ពិចារណា​កាត់បន្ថយ​ម៉ោង​សិក្សា និង​ការ​ប្រមូលផ្តុំ​ ខណៈ​រលក​ទី​បី​នៃ​ការ​ឆ្លង​ជំងឺ​កូវីដ១៩ បន្ត​កើត​មាន​ពាសពេញ​ប្រទេស។ ​

ប៉ុន្តែ​​ការ​​នៅ​បន្ត​បើកទ្វារ និង​ការ​រក្សា​ការ​ប្រុងប្រយ័ត្ន​ខ្ពស់​គឺ​ជា អាទិភាព បន្ទាប់ពី​ការ​សិក្សា​តាម​ប្រព័ន្ធ​អ៊ីនធឺណិត​បាន​បង្ហាញ​ជា​បញ្ហា​ចោទ​អំឡុងពេល​​ការ​រឹតត្បិត​សកម្មភាព​សេដ្ឋកិច្ច​កាល​ពី​គ្រា​មុន។

លោក​បាន​ថ្លែង​ថា៖ «ការ​សិក្សា​បែប​នេះ​ធ្វើ​ឲ្យ​សិស្ស​មិន​សូវ​យកចិត្ត​ទុក​ដាក់ ពីព្រោះ​យើង​មិន​អាច​តាមដាន និង​ពិនិត្យ​ពួកគេ​បាន។ នៅពេល​ប្រឡង​ប្រចាំ​ខែ​ ឬ​ឆមាស​ ពួកគាត់​​ចម្លង​គ្នា។ ប៉ុន្តែ​យើង​មិន​អាច​បន្ទោស​ពួកគាត់​បាន​ទេ ពីព្រោះ​យ៉ាងហោចណាស់ ពួកគាត់​នៅ​តែ​អាច​សិក្សា​បាន»

ស្រប​ចំនួន​ការ​ឆ្លង​ជំងឺ​កូវីដ១៩ សរុប​នៅ​កម្ពុជា​ បាន​កើនដល់ ១៥០៥​ករណី ដោយ​ក្នុង​នោះ ៩៩០​ករណី​មាន​ជាប់ពាក់ព័ន្ធ​នឹង​ព្រឹត្តិការណ៍​សហគមន៍ «២០ កុម្ភៈ» ដែល​ឥឡូវ​នេះ​បាន​ឆ្លង​ដល់​បណ្តា​ខេត្ត​មួយ​ចំនួន​ថែម​ទៀត។

លោក ហុក ស៊ីថាក់​ នាយក​អង្គការ​ Sipar ដែល​ជា​អង្គការ​ក្រៅ​រដ្ឋាភិបាល​ផ្តោត​លើ​ការ​អប់រំ​បាន​និយាយ​ថា ស្រប​ពេល​ដែល​សាលារៀន​នៅ​ខាង​ក្រៅ​តំបន់​ដែល​រង​ការ​ប៉ះពាល់​នៅ​បន្ត​បើកទា្វរ សិស្ស​ដែល​លែង​​ចូល​រៀន​តាម​ប្រព័ន្ធ​អ៊ីនធឺណិត​បាន​ងាក​ទៅ​រក​ការងារ​ធ្វើ ខណៈ​គ្រួសារ​​របស់​ពួកគេ​កំពុង​ជំនះ​នឹង​​ស្ថានភាព​ពី​ការ​រាតត្បាតជំងឺ។

​លោក​បាន​ថ្លែង​ថា៖ «ប្រសិន​បើ​សាលារៀន​នៅ​បន្ត​បិទទ្វារ​រយៈពេល​យូរ សិស្ស​មក​ពី​គ្រួសារ​ក្រីក្រ​ប្រហែល​ត្រូវ​ឈប់​រៀន ជាពិសេស​សិស្ស​ពេញវ័យ​នៅ​តាម​តំបន់​ជនបទ​ ដែល​ពេញ​កម្លាំង​ធ្វើការ​»

លោក​បាន​បន្ត​ថា៖ «ដោយសារ​តែ​ពួកគេ​មិន​អាច​រៀន​បាន​ពេញលេញ ពួកគេ​ត្រូវ​ឈប់​រៀន ហើយ​ទៅ​ធ្វើការ​ដើម្បី​ជួយ​ផ្គត់ផ្គង់​គ្រួសារ ហើយ​ពួកគេ​នឹងមិន​អាច​វិលត្រឡប់​ចូលរៀន​វិញ​បាន ក្រោយ​ពី​ពួកគេ​បាន​ចូល​ធ្វើការហើយ​នោះ​»

ប្រែសម្រួលពីអត្ថបទភាសាអង់គ្លេស៖ ‘Never go back’: Third wave of Covid exposes weaknesses of online learning

136 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »