សមាគមសម្ព័ន្ធអ្នកសារព័ត៌មានកម្ពុជា

មេឃុំជាប់ឆ្នោតថ្មីមកពីគណបក្សភ្លើងទៀនត្រូវបានចាប់ខ្លួនជុំវិញការចោទប្រកាន់ពីបទប្លន់កាលពី២០ឆ្នាំមុន

លោក ញឹម សារ៉ុម ជាបេក្ខភាពមេឃុំទើបជាប់ឆ្នោតថ្មីមកពីគណបក្សភ្លើងទៀននៅខេត្តកំពង់ធំត្រូវបានចាប់ខ្លួនជុំវិញការចោទប្រកាន់ពីបទប្លន់។ រូបភាពថតកាលពីថ្ងៃទី៨ ខែមិថុនា ឆ្នាំ២០២២។ ខេមបូចា/ ស៊ន សារ៉ាត
លោក ញឹម សារ៉ុម ជាបេក្ខភាពមេឃុំទើបជាប់ឆ្នោតថ្មីមកពីគណបក្សភ្លើងទៀននៅខេត្តកំពង់ធំត្រូវបានចាប់ខ្លួនជុំវិញការចោទប្រកាន់ពីបទប្លន់។ រូបភាពថតកាលពីថ្ងៃទី៨ ខែមិថុនា ឆ្នាំ២០២២។ ខេមបូចា/ ស៊ន សារ៉ាត

បេក្ខភាព​មេឃុំទើបជាប់ឆ្នោតថ្មីមកពីគណបក្សភ្លើងទៀន​នៅខេត្តកំពង់ធំ​ត្រូវបានចាប់ខ្លួន​កាល​ពីថ្ងៃអង្គារពីបទប្លន់ ដែល​កើតមានតាំងពី២០ឆ្នាំមុន​ នេះបើតាមការអះអាងរបស់អាជ្ញាធរ។

លោក ញឹម សារ៉ុម អាយុ​៥២ឆ្នាំ​បានជាប់ឆ្នោតជាមេឃុំចំណាលើ អំឡុង​ការបោះឆ្នោតឃុំសង្កាត់កាលពីថ្ងៃទី​៥​ ខែមិថុនា​ ជា​បេក្ខភាពម្នាក់ក្នុងចំណោមបេក្ខភាពតែបួនរូបប៉ុណ្ណោះ​​របស់គណបក្សប្រឆាំង​ដែល​ឈ្នះ​តំណែងមេឃុំ។ គណបក្សភ្លើងទៀន​បាន​យក​ឈ្នះ​គណបក្សកាន់អំណាច​នៅក្នុង​ឃុំចំណាលើ ដោយ​ទទួល​បាន​សំឡេងឆ្នោត​ ២២៨៥ ​ទល់នឹង​ ១៧៨៩​។

លោក យ៉ង់ សំ​ ​អធិការ​នគរបាលស្រុក​ស្ទោង​បាន​បញ្ជាក់ពីការ​ចាប់ខ្លួន​នេះ ដោយ​លោកមានប្រសាសន៍ថា ការ​ចាប់ខ្លួន​នេះ​គឺធ្វើឡើង​ទាក់ទងនឹង​បទប្លន់​ដែល​កើត​ឡើងកាលពីឆ្នាំ​២០០២។

លោក​មាន​ប្រសាសន៍ថា៖ «គាត់ត្រូវបានឃាត់ខ្លួន​កាល​ពីថ្ងៃទី​២១​នៅវេលាម៉ោង​១រសៀល​ បន្ទាប់ពីត្រូវបានហៅមកសាកសួរនៅអធិការដ្ឋាននគរបាលស្រុក»។

លោក ស៊ុន ចន្ធី ប្រធានគណបក្សភ្លើងទៀន​ប្រចាំខេត្តកំពង់ធំបាន​មាន​ប្រសាសន៍ថា ការ​ចាប់ខ្លួន​លោក សារ៉ុម​ គឺជារឿងនយោបាយ​។ លោក​ថា លោក សារ៉ុម ​មាន​ប្រវត្តិជាមួយគណបក្ស​ប្រឆាំង​យូរ​អង្វែងដែល​ដំបូងឡើយ លោកជាប់ឆ្នោតជាសមាជិកក្រុមប្រឹក្សា​ឃុំសង្កាត់កាលពីឆ្នាំ​​២០១២ ជាមួយគណបក្ស​សម រង្ស៊ី​ ហើយ​បន្ទាប់មក​លោក​ជាប់ជាមេឃុំកាលពីឆ្នាំ​២០១៧​ជាមួយគណបក្ស​សង្គ្រោះជាតិ​។

លោកមានប្រសាសន៍ថា៖ «​ការចោទប្រកាន់លោក សារ៉ុម ពីបទប្លន់​កាលពីឆ្នាំ​២០០២​គឺជារឿងនយោបាយ​សុទ្ធសាធ និងជាទម្រង់នៃការ​បំភិតបំភ័យ​។ ប្រសិនបើ​គាត់​ប្រព្រឹត្ត​អំពើប្លន់​កាលពីឆ្នាំ​២០០២​ ហេតុអ្វីបានជាមិនចាប់គាត់តាំងពីពេលនោះ? គាត់មិនបានរត់ទៅណាទេ»។

អំឡុង​បទសម្ភាសជាមួយ​ខេមបូចា នៅផ្ទះរបស់លោកនៅភូមិ ត្រពាំងជ័រ ឃុំ​ចំណាលើ ​ក្នុងខេត្តកំពង់ធំ​ កាល​ពី​ដើម​ខែនេះ លោក សារ៉ុម បាន​និយាយថា លោកប្តេជ្ញា​ចិត្ត​ធ្វើជាមេឃុំគំរូ​ និង​បម្រើប្រជាពលរដ្ឋ​ដោយ​ស្មោះត្រង់។

ទោះបីជាយ៉ាងណា លោក​បាន​និយាយថា លោកបារម្ភថា សហគមន៍របស់​លោកប្រហែលជាមិនទទួលបាន​ការយកចិត្ត​ទុកដាក់គ្រប់គ្រាន់នោះទេ ជា​ទណ្ឌកម្ម​នៅពេល​លោក​កាន់តួនាទីមេឃុំនោះ។

លោក​បាន​និយាយថា៖ «ការប្តេជ្ញាចិត្តរបស់ខ្ញុំគឺ​បម្រើពលរដ្ឋទាំងអស់​ស្របតាម​គោលនយោបាយ​វិមជ្ឈការ មិនប្រព្រឹត្តអំពើពុករលួយ​។ ប្រសិនបើ​ពលរដ្ឋជឿជាក់លើយើង យើងនឹងខិតខំឲ្យអស់ពីសមត្ថភាព​និងធ្វើការងារដោយស្មោះត្រង់ ដើម្បីបម្រើ​ពួកគាត់»។

បន្ទាប់ពី​ជាប់ឆ្នោតជាមេឃុំ​កាល​ពីឆ្នាំ​២០១៧​ លោក​ត្រូវ​បាន​បង្ខំឲ្យ​បោះបង់តួនាទី​របស់​លោក​ត្រឹមតែប៉ុន្មានខែ​ ក្រោយគណបក្សសង្គ្រោះជាតិត្រូវ​បាន​រំលាយ។

ទោះបីជា​ការចោទប្រកាន់ពីបទប្លន់នេះកើត​មាន​តាំងពីឆ្នាំ​២០០២​ក៏ដោយ ប៉ុន្តែ​១០​ឆ្នាំ​ក្រោយទើប​តុលាការខេត្តកំពុងធំចេញដីកា​ចាប់ខ្លួន​នៅថ្ងៃទី​២១​ ខែមិថុនា​ ឆ្នាំ​២០១២​ គឺធ្វើឡើង​ភ្លាមៗ បន្ទាប់ពីលោក សារ៉ុម ក្លាយ​ជា​ក្រុម​ប្រឹក្សា​គណបក្ស​សម រង្ស៊ី​។

បើ​តាម​ដីការ​ដែល​ ខេមបូចា ទទួល​បាន ១០ឆ្នាំ​ក្រោយមក​ទៀត ទើប​អធិការស្រុកស្ទោង​ទទួល​មក​អនុវត្ត​នៅថ្ងៃទី​២១ មិថុនា ឆ្នាំ​២០២២ នឹង​ធ្វើការ​ចាប់ខ្លួន​តែម្តង។

លោក អំ សំអាត ជាប្រធានចាត់ការទូទៅនៃ​អង្គការសិទ្ធមនុស្ស​លីកាដូបាន​កត់សម្គាល់ថា ការចាប់ខ្លួន​គួរតែបានធ្វើតាំងពីឆ្នាំ​២០១២ តាំងពីពេលដែល​ដីកាចាប់ខ្លួន​បានចេញ​លើកដំបូង​។ លោក​បន្ត​ថា​ ការ​ចាប់ខ្លួន​នៅ​ពេលនេះ ធ្វើ​​មាន​ការចោទសួរ​ទាក់​ទង​ទៅនឹងរឿងនយោបាយច្រើនជាង។

លោក​មានប្រសាសន៍ថា៖ «វាយូរមកហើយ​។ គាត់គួរត្រូវបានចាប់ខ្លួន​នៅពេល​ [ចេញដីការចាប់ខ្លួន] មិនមែនពេលដែល​គាត់​ជាប់ឆ្នោតជាមេឃុំរបស់គណបក្ស​ភ្លើងទៀន​នោះទេ។ ការធ្វើបែបនេះនឹងធ្វើឲ្យគេចាត់ទុកថា ជា​សម្ពាធនយោបាយ​និង​ជាការបំភិតបំភ័យ»។

យោងតាមលទ្ធផល​បឋម​ដែល​ចេញផ្សាយ​ដោយ​គណៈកម្មាធិការជាតិ​រៀប​ចំការ​បោះ​​ឆ្នោត​ហៅកាត់ថា គ.ជ.ប​ បាន​ឲ្យដឹងថា នៅក្នុងចំណោម​គណបក្សនយោ​បាយ​​ទាំ​ង​១៧​ដែល​បាន​ចូលរួម​ការ​បោះឆ្នោត​កាលពីថ្ងៃទី​៥ ខែមិថុនា​ មាន​តែគណបក្ស​ប្រជាជនកម្ពុជា​និងគណបក្ស​ភ្លើងទៀន​ប៉ុណ្ណោះដែល​ឈ្នះ​អាសនៈឃុំសង្កាត់​ ដោយ​គណបក្ស​ប្រជាជនកម្ពុជា​ដណ្តើម​បានអាសនៈភាគច្រើនបំផុត។ លទ្ធផល​ផ្លូវការ​រំពឹងថា នឹង​ប្រកាសនៅថ្ងៃទី​២៦​ ខែមិថុនា​។

កាលពីសប្តាហ៍​មុន គណបក្ស​ប្រជាជនកម្ពុជា និង គ.ជ.ប បានប្តឹង​លោក សុន ឆ័យ អនុប្រធាន​គណបក្ស​ភ្លើងទៀន​ បន្ទាប់ពី​លោករិះគន់​ការ​បោះឆ្នោត​ឃុំសង្កាត់​តាម​បណ្តាញព័ត៌មាន​ ដោយចោទ​ថា ការបោះឆ្នោតនេះ​មិនសេរីនិងយុត្តិធម៌ទេ។

គណបក្ស​ប្រជាជនកម្ពុជា​ទាមទារសំណងជំងឺចិត្ត​១លានដុល្លារ​ពី​លោក ស៊ុន ឆៃ ចំណែក​គ.ជ.ប បានចោទប្រកាន់​លោកពីបទបរិហារកេរ្តិ៍និង​ទាម​ទារ​ឲ្យ​មាន​ការ​សូម​អភ័យទោស​ជា​សាធារណៈ។

លោក សុន ឆ័យ ដែល​ឥឡូវកំពុង​ស្ថិត​នៅ​ប្រទេសអូស្ត្រាលី​បាន​ប្រាប់​ខេមបូចា​ថា លោក​នឹងវិលត្រឡប់មក​ប្រទេសកម្ពុជា​វិញ​នៅ​សប្តាហ៍ក្រោយ​ ដើម្បី​តតាំងនឹង​បណ្តឹងផ្លូវ​ច្បាប់​នេះ។

លោក​បាន​មាន​ប្រសាសន៍ថា៖ «ខ្ញុំ​អត់មាន​អ្វីត្រូវបារម្ភទេ។ ប្រសិនបើ​ទាំង​គណបក្សប្រជាជន​និង​គ.ជ.ប ចង់ប្តឹងខ្ញុំ​ ជាសិទ្ធរបស់ពួកគេ»(រាយការណ៍បន្ថែម៖ ទ្រី ថានី)

ប្រែសម្រួលពីអត្ថបទភាសាអង់គ្លេស៖ New Candlelight Party commune chief arrested, accused of 20-year-old robbery

245 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម