ករណីចាប់ខ្លួនកីឡាករឆ្នើម សុខ ធី ហៅ កាកា របស់សមត្ថកិច្ចនគរបាលប្រឆាំងគ្រឿងញៀន កាលពីពេលថ្មីៗនេះ បានក្លាយជាប្រធានបទក្តៅ ដែលបានប៉ះពាល់ធ្ងន់ដល់វិស័យប្រដាល់គុនខ្មែរ ហើយថ្នាក់ដឹកនាំសហព័ន្ធកីឡាប្រដាល់គុនខ្មែរ មានផែនការដាក់ចេញនូវគោលការណ៍ត្រួតពិនិត្យសារធាតុលើកកម្លាំង និងសារធាតុញៀន ចំពោះកីឡាករ កីឡាការិនីទាំងអស់ ដើម្បីបង្ក និងទប់ស្កាត់កុំឱ្យកើតមានបញ្ហាបែបនេះទៀត។
កីឡាករ សុខ ធី ត្រូវបានសមត្ថកិច្ចនគរបាលប្រឆាំងគ្រឿងញៀន នៃស្នងការដ្ឋាននគរបាលខេត្តកណ្តាល ចាប់ខ្លួន កាលពីថ្ងៃទី២៤ ខែកក្កដា ឆ្នាំ២០២៦ ក្រោយរកឃើញថា រូបគេបានជាប់ពាក់ព័ន្ធនឹងបទល្មើសប្រើប្រាស់ (ជក់) និងរក្សាទុក ដោយខុសច្បាប់នូវសារធាតុញៀន ហើយកីឡាករវ័យ២៩ឆ្នាំរូបនេះ ប្រឈមមុខនឹងការចោទប្រកាន់ក្រោមមាត្រា ៤០ និង ៤៥ នៃច្បាប់ស្តីពីការត្រួតពិនិត្យគ្រឿងញៀន ដោយចៅក្រមស៊ើបសួរបានបញ្ជាឱ្យ «ឃុំខ្លួនមុនការកាត់ក្តី»។ នេះបើយោងតាមសារព័ត៌មាន Khmer Times
ករណីចាប់ខ្លួនរបស់ សុខ ធី នៅតែជាប្រធានបទក្តៅ ដែលអ្នកគាំទ្រ និងអ្នកពាក់ព័ន្ធនៅក្នុងវិស័យកីឡាប្រដាល់គុនខ្មែរ លើកយកមកនិយាយនៅលើបណ្តាញសង្គមមិនចប់ ដោយពួកគេភាគច្រើន បានបង្ហាញការសោកស្តាយចំពោះសមត្ថភាព និងទេពកោសល្យដ៏លេចធ្លោរបស់កីឡាកររូបនេះ ហើយ សុខ ធី នេះឯង ដែលជាអ្នកបញ្ចប់ភាពខ្លាំងរបស់ ពេជ្រ សម្បត្តិ តាមរយៈការយកឈ្នះពិន្ទុ ក្នុងការប្រកួតដណ្ដើមខ្សែក្រវាត់ POWERBOOM កាលពីរសៀលថ្ងៃទី២៨ ខែមិថុនា ឆ្នាំ២០២៥។
ជាមួយគ្នានេះ សុខ ធី ក៏ធ្លាប់ដណ្តើមបានខ្សែក្រវាត់ និងពានរង្វាន់ជាច្រើនទៀតផងដែរ ហើយភាពជោគជ័យនេះ បានធ្វើឱ្យរូបគេ និងភរិយា មានលទ្ធភាពទិញឡានថ្មី តម្លៃចូល២ម៉ឺនដុល្លារ ដោយប្រើប្រាស់ថវិកាបានពីការប្រដាល់សុទ្ធសាធតែម្តង ប៉ុន្តែពេលនេះភាពល្បីល្បាញ និងកិត្តិយសរបស់ សុខ ធី ត្រូវបានរលាយអស់ ដោយសារតែរូបគេបានជាប់ពាក់ព័ន្ធនឹងការប្រើប្រាស់ និងចែកចាយគ្រឿងញៀន ហើយត្រូវបានសមត្ថកិច្ចចាប់ខ្លួន កាលពីថ្ងៃទី ២៦ ខែកក្កដា ឆ្នាំ ២០២៦។
យ៉ាងណាក៏ដោយ បើតាមប្រភពច្បាស់ការណ៍បានឱ្យដឹងថា សុខ ធី ធ្លាប់បានប្រើប្រាស់គ្រឿងញៀន តាំងពីពេលរូបគេចូលហ្វឹកហាត់ប្រដាល់នៅប្រទេសថៃ ហើយកីឡាករកម្ពុជា ដែលបានធំធាត់នៅថៃរូបនេះ ធ្លាប់ត្រូវបានតម្រួតថៃចាប់ឃាត់ខ្លួនពាក់ព័ន្ធនឹងការប្រើប្រាស់គ្រឿងញៀន កាលពីថ្ងៃទី២៩ ខែវិច្ឆិកា ឆ្នាំ២០២២។
យោងតាមការផ្សព្វផ្សាយរបស់ទូរទស្សន៍ថៃ កាលពីថ្ងៃទី៣០ ខែវិច្ឆិកា ឆ្នាំ២០២២នោះ បានឱ្យដឹងថា ការឃាត់ខ្លួន អ្នកប្រដាល់ សុខ ធី ត្រូវបានធ្វើឡើង បន្ទាប់តម្រួតថៃត្រួតពិនិត្យ និងបានដកហូតថ្នាំញៀនគ្រាប់ប្រភេទមេតំហ្វីតាមីន ចំនួន៥គ្រាប់ ដែលបានលាក់ទុក នៅក្នុងកាបូបរបស់គេ នៅតំបន់រ៉ង់ស៊ីតខ្លង១ ( Rangsit Khlong 1) នៅទីក្រុងបាងកក កាលពីថ្ងៃទី២៩ ខែ វិច្ឆិកា ឆ្នាំ២០២២។
ករណីនេះ តម្រួតថៃបានចាប់ សុខ ធី ទៅដាក់គុកនៅក្នុងប្រទេសថៃ អស់មួយរយៈពេល ប៉ុន្តែរូបគេ នៅតែមិនចោលគន្លងចាស់ ដោយនៅតែឆ្លៀតប្រើប្រាស់គ្រឿងញៀន ពេលវិលត្រឡប់មករស់នៅកម្ពុជាវិញ ព្រោះតាមលោកគ្រូ សួង បញ្ញា បានឱ្យដឹងថា នៅមុនការចាប់ខ្លួន កាលពីថ្ងៃទី២៦ ខែកក្កដានេះ សុខ ធី ធ្លាប់ត្រូវបានសមត្ថកិច្ចកម្ពុជាចាប់ខ្លួន និងបញ្ជូនទៅមណ្ឌលកែប្រែម្តងហើយ កាលពីពេលកន្លងមកនេះ។
តាមរយៈការឡាយវីដេអូ លោក សួង បញ្ញា បានលើកឡើងថា៖ «សុខ ធី ធ្លាប់ត្រូវបានចាប់ខ្លួនម្តងនៅប្រទេសថៃ ពាក់ព័ន្ធនឹងការប្រើប្រាស់គ្រឿងញៀននេះ ហើយការបាត់ខ្លួនមួយរយៈពេលមុនរបស់គាត់ ក៏ពាក់ព័ន្ធនឹងគ្រឿងញៀនដែរ ដោយត្រូវបានសមត្ថកិច្ចចាប់ខ្លួនយកទៅដាក់មណ្ឌលកែប្រែ នៅម្តុំវត្តឃ្មួញ ខណ្ឌសែនសុខ ប៉ុន្តែព័ត៌មាននេះត្រូវបានគេបិទ»។
គ្រូមហាដឹង សួង បញ្ញា បានអះអាងថា លោកបានដឹងព័ត៌មាននៃការចាប់ខ្លួនលើកទី១របស់ សុខ ធី តាមរយៈគ្រូបង្វឹករបស់ សុខ ធី ផ្ទាល់ ដែលបានឆ្លើយឆ្លងគ្នាតាមឆាត។ លោកបញ្ជាក់ថា៖ «អ៊ីចឹង សុខ ធី ត្រូវបានចាប់ខ្លួនពាក់ព័ន្ធនឹងគ្រឿងញៀន នៅខ្មែរយើង ចំនួន២ដង ទាំងលើកនេះហើយ ហើយខ្ញុំក៏មិនចង់យកគាត់មកធ្វើជាប្រធានបទនិយាយនោះដែរ ប៉ុន្តែខ្ញុំគ្រាន់តែចង់ឱ្យកីឡាករគុនខ្មែរមួយចំនួន កុំយកគំរូតាមគាត់»។
យ៉ាងណាក៏ដោយ លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ នៅតែបង្ហាញការសោកស្តាយចំពោះករណីចាប់ខ្លួន សុខ ធី ព្រោះរូបគេជាកីឡាករកម្រិត A ដ៏មានសមត្ថភាពម្នាក់។ ប៉ុន្តែលោកបានបញ្ជាក់ថា លោកគោរពទាំងស្រុងចំពោះនីតិវិធីរបស់សមត្ថកិច្ច និងតុលាការ ហើយរង់ចាំលទ្ធផលនៃការស៊ើបអង្កេត និងការសម្រេចតាមផ្លូវច្បាប់ ព្រោះនេះជាករណីរបស់បុគ្គល មិនតំណាងឱ្យសហគមន៍អ្នកប្រដាល់គុនខ្មែរទាំងមូលនោះទេ។
យ៉ាងណាក៏ដោយជុំវិញបញ្ហានេះ សហព័ន្ធកីឡាប្រដាល់គុនខ្មែរ តែងតែយកចិត្តទុកដាក់ខ្ពស់លើការអប់រំសីលធម៌ វិន័យ និងការយល់ដឹងអំពីគ្រោះថ្នាក់នៃគ្រឿងញៀន ដល់កីឡាករ គ្រូបង្វឹក និងក្លិបជាសមាជិក ដោយកន្លងមក សហព័ន្ធក៏បានសហការជាមួយអាជ្ញាធរជាតិប្រយុទ្ធប្រឆាំងគ្រឿងញៀន ក្នុងនាមជាដៃគូ MoU ដើម្បីផ្សព្វផ្សាយអប់រំពីផលប៉ះពាល់នៃសារធាតុញៀន និងគ្រឿងញៀន ការការពារ និងអនុវត្តវិធានការចាំបាច់នានា។
លោក ខូវ ឆាយ បញ្ជាក់ថា៖ «ក្នុងករណីដែលមានកីឡាករប្រព្រឹត្តល្មើសច្បាប់ ឬផ្ទុយនឹងបទបញ្ជារបស់សហព័ន្ធ សហព័ន្ធនឹងពិនិត្យ និងអនុវត្តវិធានការវិន័យស្របតាមបទបញ្ជា និងនីតិវិធីជាធរមាន ដោយមិនលើកលែងចំពោះបុគ្គលណាម្នាក់ឡើយ»។ លោកបន្ថែមថា៖ «សម្រាប់កីឡាករគុនខ្មែរទាំងអស់ ខ្ញុំសូមផ្តាំផ្ញើថា កីឡាករម្នាក់ៗមិនត្រឹមតែតំណាងឱ្យខ្លួនឯងប៉ុណ្ណោះទេ ប៉ុន្តែថែមទាំងតំណាងឱ្យគ្រួសារ ក្លិប សហព័ន្ធ និងកិត្តិយសជាតិផងដែរ ដូច្នេះ សូមចៀសឱ្យឆ្ងាយពីគ្រឿងញៀន និងអំពើខុសច្បាប់គ្រប់ប្រភេទ»។
លោកបន្ថែមទៀតថា ការខិតខំប្រឹងប្រែងហ្វឹកហាត់ដោយស្មោះត្រង់ មានវិន័យ និងរស់នៅប្រកបដោយគុណធម៌ គឺជាផ្លូវតែមួយដែលនឹងនាំឱ្យទទួលបានជោគជ័យយូរអង្វែង និងក្លាយជាគំរូល្អសម្រាប់យុវជនជំនាន់ក្រោយ។ ហេតុនេះសហព័ន្ធនឹងបន្តពង្រឹងការអប់រំ ការត្រួតពិនិត្យ និងកិច្ចសហប្រតិបត្តិការជាមួយភាគីពាក់ព័ន្ធ ដើម្បីរក្សាភាពថ្លៃថ្នូរ កិត្តិយស និងកិត្យានុភាពរបស់កីឡាគុនខ្មែរ និងធានាថា បរិយាកាសកីឡារបស់យើងនៅតែស្អាតស្អំ និងគ្មានគ្រឿងញៀន។
នៅក្នុងវិធានការនេះ លោក ខូវ ឆាយ បានសង្កត់ធ្ងន់លើការធ្វើតេស្តទៅលើគ្រប់កីឡាករកីឡាការិនីទាំងអស់ មុនឡើងប្រកួត។ «យើងកំពុងតែសិក្សាជាមួយខាងទីភ្នាក់ងារកម្ពុជាប្រឆាំងដូប៉ា Cambodia Anti-Doping Agency (CADA) អំពីវិធីសាស្ត្រត្រួតពិនិត្យសារធាតុលើកកម្លាំង និងសារធាតុញៀន និងការចំណាយទៅលើឧបករណ៍តេស្ត។ សហព័ន្ធ មានផែនការចេញគោលការណ៍ត្រួតពិនិត្យសារធាតុលើកកម្លាំង និងសារធាតុញៀន ចំពោះកីឡាករ កីឡាការិនីទាំងអស់ នូវរាល់មុនការប្រកួតគុនខ្មែរ»។
អ្នកពាក់ព័ន្ធ នៅក្នុងវិស័យកីឡាប្រដាល់គុនខ្មែរ បានបង្ហាញការគាំទ្រ ទៅលើការដាក់ចេញនូវផែនការត្រួតពិនិត្យស្វែងរកសារធាតុលើកកម្លាំង និងសារធាតុញៀន ទៅលើគ្រប់អត្តពលិកគុនខ្មែរនេះ ប៉ុន្តែពួកគេ បានស្នើឱ្យសហព័ន្ធ ធ្វើឱ្យបានច្បាស់លាស់ និងមាននិរន្តរភាព កុំធ្វើតែមួយខ្យល់ រួចក៏ឈប់វិញ។
លោក ម៉ុល នី ប្រធានរៀបចំកម្មវិធីប្រកួត និងជាប្រធានផ្គូផ្គងកីឡាករប្រចាំនៅសង្វៀនប្រដាល់ស្ថានីយទូរទស្សន៍ជាតិកម្ពុជា (ទទក) បានប្រាប់សារព័ត៌ខេមបូចា នៅថ្ងៃទី២៩ ខែកក្កដានេះថា ខាងស្ថានីយរបស់លោក មានគម្រោងស្នើទៅសហព័ន្ធយូរហើយ ជុំវិញវិធានការធ្វើតេស្តពិនិត្យរកសារធាតុញៀន ហើយបើរកឃើញថា អត្តពលិកណាជាប់ពាក់ព័ន្ធ គឺមិនអនុញ្ញាតឱ្យឡើងប្រកួតតែម្តង។
លោកបញ្ជាក់ថា៖ «ខ្ញុំឯកភាព និងគាំទ្រ១០០ភាគរយ បើសហព័ន្ធ ធ្វើតេស្តរកសារធាតុអ្វីផ្សេងៗ ជាពិសេសគ្រឿងញៀន ព្រោះមកដល់ពេលនេះ បើយើងមិនវិវឌ្ឍខ្លួនក៏មិនកើតដែរ។ នៅតាមបណ្តាប្រទេសជឿនលឿនគេធ្វើអស់ហើយ ពាក់ព័ន្ធនឹងបញ្ហាហ្នឹង នៅតែយើងទេ អ៊ីចឹងយើងត្រូវតែធ្វើរឿងនេះតែម្តង»។
ជាមួយគ្នានេះ លោក ម៉ុល នី បានស្នើឱ្យសហព័ន្ធកីឡាប្រដាល់គុនខ្មែរ មានការចងក្រងនូវច្បាប់ ហើយធ្វើឱ្យបានជាប់ជាប្រចាំ និងត្រូវមានវិធានការច្បាប់ពាក់ព័ន្ធនឹងការធ្វើតេស្តរកសារធាតុញៀននេះ។ លោកបន្តថា នៅពេលធ្វើតេស្តឃើញហើយ ត្រូវកំណត់គោលការណ៍ថា តើកីឡាកររូបនោះ ត្រូវសម្រាក និងទទួលទណ្ឌកម្មយ៉ាងម៉េច? ចំណែកក្លិបវិញ ត្រូវគិតយ៉ាងម៉េច នៅពេលកីឡាករខ្លួនជាប់ពាក់ព័ន្ធនឹងគ្រឿងញៀន?
លោកបានបញ្ជាក់ថា៖ «យើងត្រូវពិភាក្សាចងក្រងឱ្យបានច្បាស់លាស់។ បើយើងធ្វើទៅតាមតែការនឹកឃើញ ពេលចង់ក៏ធ្វើ ពេលអត់ចង់ក៏ឈប់ មិនអាចទៅមុខរួចទេ អ៊ីចឹងធ្វើហើយ យើងជជែក និងប្រជុំគ្នាយកជាផ្លូវការ រួចចងក្រងជាច្បាប់ អនុវត្តទៅតែម្តង ព្រោះនៅក្នុងកីឡា មិនត្រូវមានគ្រឿងញៀននោះទេ»។
ចំណែក លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានឱ្យដឹងថា ការគ្រប់គ្រងកីឡាករអាជីព ដូចជាប្រដាល់ ដែលឡើងប្រកួតយកតម្លៃខ្លួន មិនស្ថិតក្រោមការគ្រប់គ្រងរបស់ NOCC នោះទេ បើកីឡារបស់អូឡាំពិក និងកីឡាក្នុង Games មិនមែនអាជីព ទើបស្ថិតក្រោមការគ្រប់គ្រង ហេតុនេះការគ្រប់គ្រងកីឡាអាជីព វាអាស្រ័យទៅសហព័ន្ធជាសាមី ថាត្រូវមានវិធានការបែបណា ដើម្បីទប់ស្កាត់ការប្រើប្រាស់សារធាតុលើកកម្លាំង ជាពិសេសសារធាតុញៀន។
លោកបានបញ្ជាក់ថា៖ «យើងគ្រប់គ្រងអាទិភាពទី១ ទៅលើកីឡាករ កីឡាការិនី ក្នុងក្របខណ្ឌមិនអាជីព គឺមិនឱ្យមានការប្រើសារធាតុលើកកម្លាំង និងសារធាតុគ្រឿងញៀន ជាដាច់ខាត អ៊ីចឹងហើយរាល់អត្តពលិកទាំងអស់ មុនចូលរួមជាមួយជម្រើសជាតិ ត្រូវបានធ្វើការពិនិត្យសុខភាព និងពិនិត្យរកផលប៉ះពាល់សារធាតុហាមឃាត់នេះ»។
យ៉ាងណាក៏ដោយ រដ្ឋលេខាធិការក្រសួងអប់រំ យុវជន និងកីឡា លោក វ៉ាត់ ចំរើន បានសាទរ និងលើកទឹកចិត្តដល់សហព័ន្ធ ដែលមានឆន្ទៈក្នុងការពង្រឹងការងារទប់ស្កាត់កុំឱ្យមានការប្រើប្រាស់សារធាតុលើកកម្លាំង ជាពិសេសសារធាតុញៀន ដែលបានចូលដល់បទល្មើសព្រហ្មទណ្ឌ ចំពោះអ្នកប្រើប្រាស់ និងចែកចាយ ខុសពី Doping ដែលជាសារធាតុលើកកម្លាំង ហើយត្រូវបានអន្តរជាតិហាមឃាត់កុំឱ្យប្រើនៅក្នុងវិស័យកីឡា។
អ្នកជំនាញកីឡា លោក វ៉ាត់ ចំរើន បានថ្លែងថា៖ «យើងអបសាទរ បើសិនជាសហព័ន្ធជាតិទាំងអស់ មានការប្តេជ្ញាចិត្តក្នុងការរៀបចំកុំឱ្យកីឡាករប៉ះពាល់គ្រឿងញៀន ព្រោះអាហ្នឹងជាគោលនយោបាយរបស់ជាតិ ដោយមានការចូលរួមពីវិស័យកីឡាដែរ ហើយនៅក្នុងនោះ ក្រសួងអប់រំ យុវជន និងកីឡា ក៏ជាសមាជិក ចូលរួមចំណែកនៅក្នុងការកាត់បន្ថយ និងលុបបំបាត់គ្រឿងញៀនហ្នឹងដែរ»៕
