សមាគមសម្ព័ន្ធអ្នកសារព័ត៌មានកម្ពុជា

ក្នុងទិវាសិទ្ធិលំនៅឋាន៖ សង្គមស៊ីវិលទទូចឲ្យមានដំណោះស្រាយដោយយុត្តិធម៌សម្រាប់ក្រុមគ្រួសារដែលត្រូវបណ្តេញចេញ

សហគមន៍រងការគំរាមបណ្តេញចេញតាមបណ្តោយផ្លូវរថភ្លើងនៅសង្កាតបឹងកក់២ ខណ្ឌទួលគោក រាជធានីភ្នំពេញ។ ថ្ងៃទី៣ ខែតុលា ឆ្នាំ២០២២។ ខេមបូចា/ ព្រីង សំរាំង
សហគមន៍រងការគំរាមបណ្តេញចេញតាមបណ្តោយផ្លូវរថភ្លើងនៅសង្កាតបឹងកក់២ ខណ្ឌទួលគោក រាជធានីភ្នំពេញ។ ថ្ងៃទី៣ ខែតុលា ឆ្នាំ២០២២។ ខេមបូចា/ ព្រីង សំរាំង

នៅក្នុង​សេចក្តី​ថ្លែងការណ៍រួម​មួយ​កាលពីថ្ងៃទី​៣ ខែតុលា​ ក្នុង​ទិវាសិទ្ធិ​លំនៅឋាន​ពិភព​លោក អង្គការសង្គមស៊ីវិល​ចំនួន​១៨ បាន​​អំពាវនាវ​ឲ្យ​មានការ​ផ្តល់​​សំណងនិងដំណោះ​ស្រាយ​​ប្រកបដោយ​យុត្តិធម៌សម្រាប់​សហគមន៍ដែល​ជាប់គាំង​នៅ​ក្នុង​ជម្លោះ​ដីធ្លី​ដ៏រាំរ៉ៃក្នុង​​គម្រោងអភិវឌ្ឍ​ន៍ព្រលានយន្តហោះថ្មីនៅ​​កម្ពុជា។​

អង្គការសង្គមស៊ីវិល​ទាំង​នេះក៏​បាន​ទទូច​ឲ្យ​អាជ្ញាធរ​ទម្លាក់បទចោទ​លើ​ក្រុម​អ្នក​ភូមិ​ដែល​គ្រោងនឹង​ឡើង​តុលាការ​នៅ​ថ្ងៃទី​៦ ខែ​តុលា​ ដោយ​សារតែពួកគេ​បាន​​ធ្វើ​ការតវ៉ា​ចំពោះ​ការ​បណ្តេញ ​សម្រាប់គម្រោងអភិវឌ្ឍន៍ព្រលានយន្តហោះថ្មី​នៅ​ស្រុក​កណ្តាល​ស្ទឹង​ ខេត្ត​កណ្តាល។

អង្គការសង្គមស៊ីវិល​ចំនួន​១៨ ដែល​រួម​ទាំង​អង្គការសិទ្ធិ​មនុស្ស​ CCHR និង​អង្គការលីកាដូ​ផង​បាន​លើកឡើងនៅ​ក្នុង​សេចក្តី​ថ្លែងការណ៍​ថា៖ «​ប្រជាពលរដ្ឋកំពុងរស់​ក្នុង​ភាព័ខ្លាច បាត់បង់សេរីភាព និងអស់​សង្ឃឹមសម្រាប់អនាគតរបស់ពួកគាត់ ដែលផ្ទុយនឹងគោលការណ៍សិទ្ធិមនុស្សជាសកល និងលទ្ធិប្រជាធិបតេយ្យ»។

ប្រជាពលរដ្ឋជាង៣០០​គ្រួសារ​នៅ​ស្រុក​កណ្តាល​ស្ទឹង ខេត្តកណ្តាល​ និង​នៅស្រុកបាទី ខេត្តតាកែវ​ បាន​រងផល​ប៉ះពាល់ដោយសារ គម្រោងសាងសង់ព្រលាន​យន្ត​ហោះ​ថ្មីតម្លៃ​​១,៥ពាន់លាន​ដុល្លារ​ ដែលសាងសង់ដោយ​ក្រុម​ហ៊ុនវិនិយោគទុនអនិកជនកម្ពុជា (OCIC) របស់​លោកឧកញ៉ា ពុង ឃាវសែ ដែល​មាន​ទំនាក់ ទំនង​យ៉ាង​ជិតស្និទ្ធិជាមួយរដ្ឋាភិបាល។​

​គ្រួសារប្រជាពលរដ្ឋទាំងនេះ​បាន​បដិសេធ​មិន​ទទួល​យក​ការផ្តល់សំណង៨​ដុល្លារក្នុង​មួយម៉ែត្រការ៉េ​ពីក្រុមហ៊ុន OCIC។

 ​លោក ណៃ ភន​ ពលរដ្ឋម្នាក់​ដែល​រងផល​ប៉ះពាល់ទាំងដីស្រែ និង​លំនៅឋាន​និយាយថា ​លោក​ដិសេធសំណង​ដោយ​សារតែ​តម្លៃទាបជាងទីផ្សារ។

លោក ណៃ ផន បាន​និយាយថា៖ «យើងចាប់ផ្តើម​ដោយ​ដៃទទេរ​ បន្ទាប់ពី​របបខ្មែរក្រហម​ដើម្បី​បាន​លំនៅឋាន​សមរម្យមួយ ។ នៅពេលនេះ យើង​ត្រូវ​បាន​គេបង្ខំឲ្យ​ចាកចេញ​ដោយ​សារតែគម្រោង​អភិវឌ្ឍ​ហើយ​ត្រូវ​បាន​បណ្តេញ​ចេញ​ដោយ​គ្មាន​សំណង​សមរម្យ និង​មិន​ផ្អែកលើ​ច្បាប់»។ដោយបន្ថែមថា៖ «ខ្ញុំ​មិន​គិតថា វានឹងប្រសើរជាងនេះទេ​ ពីព្រោះ​ពួកគេ​បាន​យក​ដីរបស់យើងរួច​ទៅ​ហើយ​ ដូច្នេះ​ពួកគេ​នឹង​​​មិនអើពើ​នឹងការទាម​ទាររបស់យើង​»

លោក គង់ សោភ័ណ្ឌ អភិបាលខេត្តកណ្តាល​បាន​មាន​ប្រសាសន៍ថា គោលនយោបាយ​ផ្តល់សំណងរបស់ក្រុម​ហ៊ុន​នឹងមិន​ផ្លាស់ប្តូរទេ។ 

លោក​ថ្លែង​ថា៖ «​យើង​កំពុងពិភាក្សា​ថា តើ​ត្រូវលើកទឹកចិត្ត​ប្រពលរដ្ឋ​របៀបណា​ ដើម្បី​ឲ្យ​ទទួល​យក​សំណងនេះ​ឆាប់ៗតាមដែល​អាចធ្វើទៅបាន។ អ្នក​ដែល​មិន​ទាន់ទទួល​យក​សំណងនៅពេលនេះ ពួកគេអាចមក​ទទួល​យក​សំណង​នៅពេលណាមួយដែល​ពួកគាត់ត្រូវ​ការ​ ពួកគេគង់តែយកទេ»

អាជ្ញាធរចាប់ផ្តើម​ឈូស​ឆាយ​ដីស្រែ​សហគមន៍​ក្នុង​ទ្រង់ទ្រាយធំ​កាល​ពី​ខែ​កញ្ញា ឆ្នាំ​២០២១ ដែល​បង្ក​ឲ្យ​មាន​ការតវ៉ា​ពីប្រជាពលរដ្ឋ​ និង​ការប៉ះទង្គិច​ជាមួយ​នគរបាល​។ 

សមាជិកសហគមន៍ចំនួន​៩នាក់​ដែល​បាន​ចូលរួម​នៅ​ក្នុងការ​តវ៉ានេះ​នៅពេលនេះ​កំពុង​ប្រឈម​នឹងបទចោទរួម​មាន​បទញុះញង់ឲ្យ​ប្រព្រឹត្តបទល្មើស​ជា​អាទិ៍និង​បទរារាំង​មន្ត្រីសាធារណៈ។

ក្រុមអ្នក​ភូមិបានប្រមូល​ផ្តុំ​គ្នា​កាល​ពីថ្ងៃទី​២១​ ខែកញ្ញា​ ឆ្នាំ​២០២១ ដើម្បី​ធ្វើ​បាតុកម្ម​នៅ​មុខ​របាំង​របស់នគរបាលទីដែល​អាជ្ញាធរបិទផ្លូវចូល​ទៅស្រែដីរបស់ពួកគាត់។ ដីស្រែរបស់ពួកគាត់ត្រូវបានគេឈូសឆាយសម្រាប់​គម្រោង​សាងសង់ព្រលាន​យន្ត​ហោះ​នៅស្រុកកណ្តាល​ស្ទឹង​ ខេត្តកណ្តាល​។​ ខេមបូចា/ បញ្ញា​ ឆព័ណ្ណ

យោងតាម​អង្គការ​លីកាដូបាន​ឲ្យ​ដឹងថា ចន្លោះឆ្នាំ​២០១៩​ដល់​ឆ្នាំ​២០២១​ យ៉ាងហោចណាស់​ មាន​ប្រជាពលរដ្ឋ​​ ៥ ០០​០គ្រួសារ​ប៉ះពាល់​ដោយ​សារជម្លោះ​ដីធ្លី​និង​ការ​បណ្តេញចេញដោយ​បង្ខំ​ ខណៈសកម្មជន​២១នាក់ត្រូវ​បាន​ចាប់ខ្លួន​និង​១០​នាក់ទៀត​កំពុងត្រូវ​បាន​ឃុំខ្លួន​ក្នុង​ពន្ធនាគារ។

ប្រជាពលរដ្ឋ​ជាង៤០.០០០​នាក់​ត្រូវ​បាន​បណ្តេញ​ចេញ​ពី​សហគមន៍ជាង៥០កន្លែង​នៅទូទាំង​រាជធានីភ្នំពេញចាប់តាំងពី​ទសវត្សរ៍ឆ្នាំ​១៩៨០​មក​។ នេះបើយោងតាម​ការចងក្រងរបស់​អង្គការសមាគមធាងត្នោត។

លោក អំ សំអាត នាយកចាត់ការទូទៅនៃអង្គការលីកាដូ​មាន​ប្រសាសន៍ថា សំណងតាមតម្លៃ​ទីផ្សារ​សម្រាប់ដីធ្លីដែលបាត់​បង់​ជួយបញ្ចៀស​ការរំខាន​ដល់​ស្ថិរភាពនិង​សន្តិសុខ​ហិរញ្ញវត្ថុ​របស់​ប្រជាពលរដ្ឋដែល​ត្រូវ​បាន​បណ្តេញ​ចេញ​។

លោក​ថ្លែង​ថា៖ «​យើង​ចង់​បាន​ការអភិវឌ្ឍ​ ប៉ុន្តែ​ការអភិវឌ្ឍន​ត្រូវ​តែមាន​តម្លាភាពនិងយុត្តិធម៌ ដើម្បីឲ្យ​ប្រជាពលរដ្ឋ​អាចទទួល​បាន​ដំណោះស្រាយ​សមរម្យ​និង​អាចរស់នៅ​សមរម្យក្នុងនាម​ជា​មនុស្ស​ជាតិ»

លោក សឿង សារ៉ន នាយកប្រតិបត្តិនៃអង្គការសមាគមធាងត្នោត​មាន​ប្រសាសន៍ថា ជា​ទ្រឹស្តី ប្រទេសកម្ពុជាមាន​ច្បាប់​ដែល​គាំទ្រ​ដល់សហគមន៍ដែល​រងផលប៉ះពាល់ដោយសារគម្រោងវិនិយោគ​នោះ ប៉ុន្តែ​តាមជាក់ស្តែង ច្បាប់ទាំង​នេះមិន​ត្រូវ​បាន​គេអនុវត្ត​ឲ្យ​បាន​ត្រឹមត្រូវ​ទេ។

លោក​បាន​បន្ថែម​ថា ត្រូវ​តែ​មាន​ការចូល​រួម​ពីអ្នក​ប៉ះពាល់​ទាំង​អស់​ដូចជា​ការ​សន្ទនា​ជាមួយ​នឹង​សហគមន៍​ក្នុងមូលដ្ឋាន​មុន​ពេល​ធ្វើ​ការ​អភិវឌ្ឍ​។

មិនខុសពី​សហគមន៍ប្រលានយន្តហោះទេ ប្រជាពលរដ្ឋមកពី​សហគមន៍ផ្សេងទៀត​ដែលប្រឈម​នឹងការ​​បណ្តេញ ក៏មិន​ព្រមទទួល​សំណង​ដែល​ផ្តល់​ដោយ​អាជ្ញាធរដែរ ដោយ​​ពួកគាត់​ជឿថា មិន​យុត្តិធម៌។

អ្នក​ស្រី ឈូក រតនា​ ជា​ពលរដ្ឋ​ម្នាក់​ក្នុងចំណោម​ពលរដ្ឋ​ជាច្រើនៅភ្នំពេញ​ដែល​ប៉ះពាល់​ដោយ​គម្រោងពង្រីកផ្លូវ និងប្រព័ន្ធលូនៅតាមបណ្តោយ​ផ្លូវ​ដែក​ចាប់ពី​ខណ្ឌទួលគោល​ដល់​ខណ្ឌឫស្សីកែវ​បាន​និយាយថា អ្នក​ស្រីបដិសេធ​មិន​ផ្លាស់ទីលំនៅទៅ​ខេត្ត​ផ្សេងតាមបញ្ជារបស់អាជ្ញាធរទេ។

ផ្ទុយ​ទៅវិញ​ អ្នក​ស្រី​និងពលរដ្ឋផ្សេងទៀត ​បន្ត​ស្នើសុំ​ដី​មួយប្លង់​​នៅកន្លែងផ្សេងនៅ​មិន​ឆ្ងាយ​ពីតំបន់របស់​គាត់រស់នៅ​។

អ្នក​ស្រី​និយាយថា៖ «​នៅទីនេះ យើងអាចរកបាន​ប្រាក់ខ្លះ​ដើម្បី​ចិញ្ចឹម​ជីវិត​ហើយ​នៅពេល​យើង​រើ​ទៅ​ឆ្ងាយ​ យើងនឹង​បាត់បង់អ្វីៗទាំង​អស់​។ យើង​ជា​អ្នក​ក្រ​ហើយ​បារម្ភ​អំពី​ការ​បាត់បង់​ផ្ទះរបស់យើង»

អ្នក​ស្រី ហ៊ី សុខហ៊ុយ មកពីភូមិកំបោរ​នៅក្នុងខណ្ឌឫស្សីកែវស្ថិតក្នុងចំណោមពលរដ្ឋ​២៤៤​គ្រួសារ ក៏កំពុងប្រឈមនឹងការ​​បណ្តេញចេញ​ផងដែរ​ បន្ទាប់ពី​អាជ្ញាធរ​បានសាងសង់ផ្លូវ​ទំហំ​៣០ម៉ែត្រ ហើយ​ពួកគេកំពុងរស់នៅលើ​ដី​ចំណីផ្លូវ​។​​

បន្ទាប់ពីការ​តវ៉ា​ជាបន្តបន្ទាប់មក អ្នកស្រី សុខហ៊ុយ និង​ប្រជាពលរដ្ឋ​ផ្សេងទៀតបច្ចុប្បន្ន​នៅតែបន្តរស់នៅទីតាំងនោះ​ ខណៈអាជ្ញាធរបានពន្យារពេល​ការបណ្តេញចេញ។ ប៉ុន្តែ​ពួកគេ​នៅតែរងការគំរាម​អំពី​ការ​តាំងទីលំនៅថ្មី​។

អ្នក​ស្រី​បាន​និយាយថា៖ «យើង​បាន​រស់នៅ​ទីនេះ​ច្រើន​ឆ្នាំ​មក​ហើយ​ ហើយ​ផ្លូវ​គេទើបនឹង​អភិវឌ្ឍនៅពេលក្រោយ​។​ ប្រសិន​បើ​យើង​រើទៅ​រស់នៅកន្លែងថ្មី​ យើង​នឹង​ចាប់ផ្តើម​ជីវិត​ថ្មី ដូច្នេះ​វា​មិន​អាច​ទេ»។ដោយអ្នកស្រីបន្ថែមថា៖ «ពួកគេប្រាប់​យើងឲ្យ​ផ្លាស់ទីលំនៅទៅ កន្លែងផ្សេង…ខ្ញុំមិន​ទទួល​យក​សំណើ​នេះទេ ហើយ​គ្រួសារដែលប៉ះពាល់ទាំង​អស់​នៅទីនេះ​ក៏បាន​បដិសេធដែរ យើង​ចង់រស់នៅទីនេះ​»

ប្រែសម្រួលពីអត្ថបទភាសាអង់គ្លេស៖ On World Habitat Day, Civil Society Organizations Urge Fair Treatment of Displaced Families

108 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម