លោកនាយករដ្ឋមន្ត្រី ហ៊ុន សែន បានថ្លែងថា ការចេញផ្សាយព័ត៌មានផ្ទាល់ខ្លួនរបស់អ្នកដែលត្រូវបានធ្វើរោគវិនិច្ឆ័យរកឃើញវិជ្ជមានវីរុសកូវីដ-១៩ និងផ្នែកនៃចង្កោមចម្លងក្នុងសហគមន៍នាពេលថ្មីៗនេះ គឺជារឿងចាំបាច់ ខណៈពេលអ្នកវិជ្ជមានសរុបកើនដល់២៩នាក់កាលពីថ្ងៃសៅរ៍ បន្ទាប់ពីបុគ្គលិក៦នាក់នៅក្នុងហាងសំលៀកបំពាក់នៅក្រុងភ្នំពេញនេះតេស្តឃើញវិជ្ជមាន។
ក្រសួងសុខាភិបាលបានប្រកាសនៅព្រឹកថ្ងៃសៅរ៍ថា បុគ្គលិក៦នាក់ទៀតមកពីហាង Pedro ជាហាងលក់ស្បែកជើងនិងសម្ភារៈប្រើប្រាស់បន្ទាប់បន្សំនៅមហាវិថីព្រះសីហនុ តេស្តឃើញវិជ្ជាមាន បន្ទាប់ពីពួកគេបានប៉ះពាល់ជាមួយនឹងអតិថិជនម្នាក់ ដែលបានឆ្លងវីរុសកូវីដ-១៩។
នៅក្នុងខ្សែអាត់សំឡេងដែលចេញផ្សាយកាលពីយប់ថ្ងៃសុក្រ លោកនាយករដ្ឋមន្ត្រី ហ៊ុន សែន បានមានប្រសាសន៍ថា អត្តសញ្ញាណរបស់បុគ្គលដែលវិជ្ជមានកូវីដ-១៩ នឹងត្រូវផ្សាយជាសាធារណៈ ដើម្បីឲ្យអ្នកដែលបានទាក់ទងជាមួយនឹងពួកគេបានដឹងនិងអាចមកធ្វើតេស្ត។
លោកបានមានប្រសាសន៍ថា៖ «យើងចាំបាច់ត្រូវបង្ហាញរូបភាព ឈ្មោះនិងអសយដ្ឋានរបស់អ្នកដែលត្រូវបានរកឃើញវិជ្ជមានកូវីដ-១៩ ដូច្នេះអ្នកផ្សេងទៀត ដែលបានប៉ះពាល់ជាមួយពួកគេ ត្រូវចេញមកធ្វើតេស្តនិងធ្វើចត្តាឡីស័កតាមពេលវេលាកំណត់»។
លោក ហ៊ុន សែន បានការពារចំណាត់ការក្នុងការបង្ហាញព័ត៌មានសម្ងាត់ផ្នែកវេជ្ជសាស្ត្រនេះ ដោយអះអាងថា លោកធ្លាប់បានបង្ហាញអំពីលទ្ធផលតេស្តរបស់លោករួចមកហើយ អំឡុងពេលមានការធ្វើតេស្តជាទ្រង់ទ្រាយធំដោយសារតែមានការភ័យខ្លាចចំពោះការឆ្លងវីរុសកូវីដ-១៩ កាលពីដើមខែវិច្ឆិកា។
លោកបានមានប្រសាសន៍ថា៖ «បញ្ហានៅពេលនេះគឺជីវិតរបស់បងប្អូន។ សិទ្ធិរស់រានមានជីវិត»។
កាលពីល្ងាចថ្ងៃសៅរ៍ ក្រសួងសុខាភិបាលបានចេញផ្សាយរូបភាពរបស់មនុស្សពីរនាក់ដែលស្ថិតក្នុងក្រុមឆ្លងជាចង្កោម ដែលគេជឿថា ជាប្រភពដំបូងនៃការផ្ទុះឡើងនាពេលថ្មីៗនេះ ប៉ុន្តែបើតាមក្រសួងសុខាភិបាលថា អ្នកទាំងពីរបានជាសះស្បើយ។ ម្នាក់ក្នុងចំណោមអ្នកទាំងពីរគឺជាកូនស្រីរបស់លោក ឆែម សាវុធ ជាអគ្គនាយកនៃអគ្គនាយកដ្ឋានពន្ធនាគារនិងជាករណីដំបូងដែលត្រូវបានបញ្ជាក់នៅក្នុងការចម្លងជាចង្កោមនេះដែរ។
ក្រសួងបានស្នើឲ្យអ្នកដែលប៉ះពាក់ជាមួយនឹងអ្នកទាំងពីរផ្តល់សំណាក ដែលទំនងជាវិធានការណ៍មួយ ដើម្បីតាមរកប្រភពនៃវីរុសនេះ។
លោកនាយករដ្ឋមន្ត្រី ហ៊ុន សែន បានបន្ថែមថា ក្រុមគ្រួសាររបស់លោក ឆែម សាវុធ អាចប៉ះពាល់ជាមួយនឹងអ្នកដែលធ្វើដំណើរមកពីក្រៅប្រទេស ដោយលោកបានបន្ថែមថា វិធានការណ៍ចត្តាឡីស័កសម្រាប់ធុរជនដែលចូលមកប្រទេសកម្ពុជានឹងត្រូវរឹតបន្តឹង ហើយពួកគេត្រូវតែធ្វើចត្តាឡីស័ករយៈពេល១៤ថ្ងៃ។
លោក អំ សំអាត នាយករងនៃអង្គការសិទ្ធិមនុស្សលីកាដូ មានប្រសាសន៍ថា ការចេញផ្សាយព័ត៌មានរបស់អ្នកជំងឺគឺជាការរំលោភលើឯកជនភាពរបស់ពួកគេហើយអាចនាំឲ្យមានការរើសអើងចំពោះពួកគេផងដែរ។
លោកបានមានប្រសាសន៍ថា៖ «នៅក្នុងបរិបទនៃជំងឺកូវីដ-១៩ ខ្ញុំយល់ថា រដ្ឋាភិបាលប្រហែលជាគិតថា ត្រូវការដាស់តឿនដល់សាធារណៈជនឲ្យមានការប្រុងប្រយ័ត្នជាងមុន ជាពិសេសសម្រាប់អ្នកដែលបានប៉ះពាល់ជាមួយអ្នកឆ្លងវីរុសនេះ។ ប៉ុន្តែអ្វីដែលសំខាន់គឺមិនត្រូវមានការរើសអើង [លើពួកគាត់] ទេ»។
គិតត្រឹមព្រឹកថ្ងៃសៅរ៍នេះ ប្រទេសកម្ពុជាមានអ្នកឆ្លងកូវីដ-១៩សរុប៣៤៥នាក់ ដែលក្នុងនោះ មាន២៩នាក់ស្ថិតក្នុងក្រុមឆ្លងជាចង្កោម។
ដោយមើលឃើញពីការកើនឡើងនៃករណីឆ្លងនេះ លោក ផៃ ស៊ីផាន ជាអ្នកនាំពាក្យទីស្តីការគណៈរដ្ឋមន្ត្រីបានមានប្រសាសន៍ថា គ្មានសញ្ញាណាមួយនៃការត្រៀមបិទប្រទេសនោះទេ។ លោកមានប្រសាសន៍ថា ក្រសួងសុខាភិបាលបានផ្តល់ព័ត៌មានសង្ខេបនិងផ្តល់ការវិភាគជុំវិញស្ថានការណ៍នេះជូនលោកនាយករដ្ឋមន្ត្រី។
លោកបានមានប្រសាសន៍ថា៖ «នៅពេលក្រសួងធ្វើការវាយតម្លៃច្បាស់អំពីស្ថានការណ៍នេះ បន្ទាប់មកក្រសួងនឹងលើកបញ្ហានេះទៅសម្តេចនាយករដ្ឋមន្ត្រី ហើយមានតែសម្តេចនាយករដ្ឋមន្ត្រីម្នាក់គត់ដែលអាចសម្រេចថា តើត្រូវបិទប្រទេសឬក៏អត់»។
លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា អាជ្ញាធរតែងតែត្រៀមខ្លួនជាស្រេច ប៉ុន្តែថា អាជ្ញាធរមិនទាន់ទទួលបានដំណឹងឲ្យត្រៀមសម្រាប់លទ្ធភាពនៃការបិទប្រទេសនោះទេ។
លោកបានមានប្រសាសន៍ថា៖ «រហូតមកដល់ពេលនេះ មិនទាន់មានបទបញ្ជាណាមួយពីរដ្ឋាភិបាលឲ្យត្រៀមបិទផ្នែកណាមួយនៃប្រទេសឬរាជធានីភ្នំពេញនោះទេ»។
កាលពីខែមេសា ប្រទេសកម្ពុជាបានអនុម័តច្បាប់ស្តីពី «ការដាក់ប្រទេសក្នុងគ្រាអាសន្ន» ទាំងប្រញាប់ប្រញាល់ ដែលរួមបញ្ចូលស្ថានភាពជាច្រើនចាប់តាំងពីជម្លោះប្រដាប់អាវុធដល់បញ្ហាសុខភាពសាធារណៈ។ ច្បាប់នេះផ្តល់អំណាចដល់រដ្ឋាភិបាលទូលំទូលាយនិងរឹតត្បិតសេរីភាពជាមូលដ្ឋានមួយចំនួន។
រហូតមកដល់ពេលនេះ រដ្ឋាភិបាលនិងលោក ហ៊ុន សែន បានថ្លែងជាសាធារណៈថា ខ្លួនស្ទាក់ស្ទើរក្នុងការប្រកាសដាក់ប្រទេសក្នុងគ្រាអាសន្ន។
លោកស្រី ចក់ សុភាព នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា (CCHR) បានមានប្រសាសន៍ថា រដ្ឋាភិបាលត្រូវតែដាក់ចេញនូវគោលនយោបាយកាត់បន្ថយការឆ្លងវីរុសកូវីដ-១៩ ដែលចាំបាច់បំផុត ដើម្បីដោះស្រាយនឹងស្ថានភាពសុខភាពសាធារណៈតែប៉ុណ្ណោះ។
លោកស្រីបានមានប្រសាសន៍ថា៖ «នេះតម្រូវឲ្យមានតុល្យភាពនៃសិទ្ធិទទួលបានសុខភាពនឹងសិទ្ធិមនុស្សផ្សេងទៀតដែលអាចត្រូវបានរារាំងដោយគោលនយោយបាយនេះ»។
លោកស្រីបានមានប្រសាសន៍ថា៖ «ការប្រកាសដាក់ប្រទេសក្នុងគ្រាអាសន្នមិនមែនជាសិទ្ធិសេរីភាពសម្រាប់មនុស្សគ្រប់គ្នានោះទេ ហើយវិធានការណ៍សមស្របនិងគោលការណ៍ណែនាំ ដែលមានចែងក្នុងច្បាប់អន្តរជាតិត្រូវតែអនុវត្ត»។
លោក Anthony Galliano ជានាយកប្រតិបត្តិនៃក្រុមហ៊ុន Cambodian Investment Management Holding បានមានប្រសាសន៍ថា រយៈពេលនៃការធ្វើចត្តាឡីស័កយូរចំពោះភ្ញៀវខាងធុរកិច្ចនឹងរំខានដល់ការធ្វើដំណើរទាំងគោលបំណងធុរកិច្ចឬទេសចរណ៍ បើទោះបីជាវាមិនរារាំងទាំងស្រុងក៏ដោយ។
លោកបានមានប្រសាសន៍ថា៖ «ប្រទេសភាគច្រើនមានទម្រង់នៃការធ្វើចត្តាឡីស័កផ្សេងគ្នា ដូច្នេះវាមិនមែនជារឿងចម្លែកនោះទេ។ គោលនយោបាយចូលប្រទេសគឺប្រែប្រួលនិងសម្រួលទៅតាមស្ថាភាពបច្ចុប្បន្ន ហើយស្របពេលវ៉ាក់សាំងជិតនឹងកើតមានពិតប្រាកដនោះ។ ផលប៉ះពាល់សេដ្ឋកិច្ចរយៈពេលខ្លីគឺមានតម្លៃផ្នែកសុខភាពនិងសុវត្ថិភាពដល់ប្រជាពលរដ្ឋយូរអង្វែង»។
លោកស្រី Ailan Li តំណាងអង្គការសុខភាពពិភពលោកប្រចាំនៅប្រទេសកម្ពុជាបានលើកឡើងថា ការឆ្លងជាចង្កោមថ្មីៗនៅកម្ពុជាបានបង្ហាញពីតម្រូវការនៃវិធានការណ៍ឆ្លើយតបដែលមានគោលដៅច្បាស់លាស់ ដែលផ្តោតលើការតាមដាន ធ្វើតេស្ត ការកាត់ផ្តាច់ករណី តាមរកអ្នកប៉ះពាល់និងការធ្វើចត្តាឡីស័កអ្នកប៉ះពាល់។
លោកស្រីបានមានប្រសាសន៍ថា៖ «ប្រសិនបើគ្រប់គ្នាចូលរួមចំណែកនិងបង្ហាញសាមគ្គីភាព យើងសង្ឃឹមថា នឹងទប់ស្កាត់ការឆ្លងក្នុងមូលដ្ឋានបានឆាប់និង ចៀសវាងការបិទប្រទេសក្នុងទ្រង់ទ្រាយធំ ដែលបង្កផលប៉ះពាល់ធ្ងន់ធ្ងរដល់សេដ្ឋកិច្ចសង្គម»៕
ប្រែសម្រួលពីអត្ថបទភាសាអង់គ្លេស៖ CamboJA News
