សាលាដំបូងរាជធានីភ្នំពេញ បានបង្គាប់ឱ្យទីប្រឹក្សាជាន់ខ្ពស់គណបក្សកម្លាំងជាតិ លោក រ៉ុង ឈុន លក់ផ្ទះដោយបង្ខំដើម្បីសងសំណងជូនគណៈកម្មាធិការចម្រុះកិច្ចការព្រំដែន បច្ចុប្បន្នប្តូរមកជា រដ្ឋលេខាធិការដ្ឋានកិច្ចការព្រំដែន។ យោងតាមដីកាសាលាដំបូងរាជធានីភ្នំពេញ។
យោងតាមដីកាតុលាការចុះថ្ងៃទី២៧ ខែមីនា ឆ្នាំ២០២៥ ដែលលោក រ៉ុង ឈុន ទទួលបាននៅថ្ងៃព្រហស្បតិ៍នេះ សាលាដំបូងរាជធានីភ្នំពេញសំណើសុំលក់ដោយបង្ខំដោយផ្ទាល់ចំពោះអចលនវត្ថុ(ផ្ទះ)ដែលមានទីតាំងនៅភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ កម្មសិទ្ធិរបស់ឈ្មោះ រ៉ុង ឈុន។
សាលាដំបូងរាជធានីភ្នំពេញ នៅថ្ងៃទី១១ ខែកុម្ភៈ បង្គាប់ឱ្យលោក រ៉ុង ឈុន បច្ចុប្បន្នជាទីប្រឹក្សាជាន់ខ្ពស់គណបក្សកម្លាំងជាតិ និងសកម្មជនពីរនាក់ទៀតរួមគ្នាសងសំណងការខូចខាតចំនួនបួនរយលានរៀល [ប្រហែល៩,៨ម៉ឺនដុល្លារ]ទៅគណៈកម្មាធិការចម្រុះកិច្ចការព្រំដែន។ យោងតាមលិខិតជូនដំណឹងរបស់សាលាដំបូងរាជធានីភ្នំពេញ។
សំណុំរឿងនេះកើតឡើងក្នុង២០២០ ហើយការចាប់ខ្លួនលោក រ៉ុង ឈុន បានកើតឡើងនៅថ្ងៃទី៣១ ខែកក្កដា បន្ទាប់ពីលោកបានសរសេរសារបង្ហោះលើបណ្តាញសង្គមហ្វេសប៊ុក និងធ្វើអត្ថាធិប្បាយផ្សេងទៀតតាមវិទ្យុអាស៊ីសេរី (RFA) ដែលក្នុងនោះលោកអះអាងថា កសិករនៅខេត្តត្បូងឃ្មុំជាប់ព្រំដែនបានបាត់បង់ដីធ្លីអំឡុងពេលបោះបង្គោលព្រំដែនជាមួយវៀតណាម។ លោក ឈុន បានធ្វើដំណើរទៅតំបន់ព្រំដែនកាលពីថ្ងៃទី២០ ខែកក្កដា ដើម្បីពិនិត្យមើលតាមការអះអាងរបស់ប្រជាពលរដ្ឋ និងបានចេញសេចក្តីថ្លែងការណ៍មួយនៅថ្ងៃបន្ទាប់នៅលើហ្វេសប៊ុក។ កញ្ញា ស កណិការ និងលោក និមល ត្រូវបានចាប់ខ្លួនកាលពីខែសីហា បន្ទាប់ពីបានចូលរួមក្នុងការតវ៉ាដោយសន្តិវិធីទាមទារឱ្យដោះលែងប្រធានសហជីពរូបនេះ។
កាលពីថ្ងៃទី១៨ ខែសីហា ឆ្នាំ២០២១ មេដឹកនាំសហជីព លោក រ៉ុង ឈុន ត្រូវបានផ្តន្ទាទោសឲ្យជាប់ពន្ធនាគាររយៈពេល២ឆ្នាំពីបទញុះញង់ដោយសាលាដំបូងរាជធានីភ្នំពេញ ចំពោះការអត្ថាធិប្បាយអំពីសហគមន៍មួយនៅតាមបណ្តោយព្រំដែនវៀតណាមបានបាត់បង់ដីអំឡុងពេលដំណើរការបោះបង្គោលព្រំដែន។
ជាមួយគ្នានោះដែរ សកម្មជន ស កណិការ និង តុន និមល ត្រូវបានផ្តន្ទាទោសដាក់ពន្ធនាគារ២០ខែពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ដោយសារតែពួកគេបានអំពាវនាវជាសាធារណៈឲ្យមានការដោះលែងមេដឹកនាំសហជីពដែលកំពុងជាប់ពន្ធនាគារ។
បន្ទាប់មក នៅថ្ងៃទី១២ ខែវិច្ឆិកា ឆ្នាំ២០២១ សាលាឧទ្ធរណ៍ បានតម្កល់សាលក្រមរបស់សាលាដំបូងរាជធានីភ្នំពេញ ហើយនៅថ្ងៃទី២៩ ខែកក្កដា ឆ្នាំ២០២២ តុលាការកំពូលតម្កល់សាលដីកាសាលាឧទ្ធរណ៍ទុកជាបានការ។
សូមបញ្ជាក់ថា លោក រ៉ុង ឈុន បានថ្លែងក្នុងការធ្វើសន្និសីទកាសែត នៅថ្ងៃទី១២ ខែមីនា ឆ្នាំ២០២៥ ថា រហូតមកដល់ពេលនោះ មានប្រជាពលរដ្ឋដែលប្រើQR ចំនួន ២ ១៣៣ នាក់បានចូលរួមជួយគាំទ្រជាថវិកាដល់លោក ហើយថវិកាដែលទទួលបានសរុប ២១០៣៧,៥៤ ដុលារ និង ៧ ៧៤៣ ៥១០លានរៀលទៀត។ លោកបន្តថា ទោះបីពលរដ្ឋខ្លះចូលរួមជួយជាថវិកាតិចតួចមែន ប៉ុន្តែទឹកចិត្តគាត់ធំធេងណាស់ គឺពួកគាត់ស្រឡាញ់យុត្តិធម៌។
លោកបន្ថែមទៀតថា នៅថ្ងៃទី២៤ ខែកុម្ភៈ ឆ្នាំ២០២៥ មេធាវីរបស់លោកបានដាក់ពាក្យទៅតុលាការសុំបង់បណ្តើរៗ ប៉ុន្តែក្រឡាបញ្ជីប្រាប់ថា មិនទទួលទេ ចាំដល់ថ្ងៃបង់សិន។ នៅថ្ងៃទី១១ ខែមីនា លោកមេធាវីបាននាំយកថវិការមួយចំនួនទៅបង់ជូនតុលាការ ប៉ុន្តែក្រឡាបញ្ជីមិនទទួល ដោយប្រាប់ថា ទាល់តែគ្រប់ចំនួន ហើយក្រឡាបញ្ជីក៏ប្រាប់ទៀតថា ចៅក្រមដែលកាន់សំណុំរឿងហ្នឹងជាប់បេសកកម្មទៅក្រៅប្រទេស៕
