ធ្វើបច្ចុប្បន្នភាពព័ត៌មាន(ថ្ងៃពុធ ទី៦ ខែវិច្ឆិកា)៖ សាលាដំបូងរាជធានីភ្នំពេញចោទប្រកាន់ លោក លី សាម៉េត អតីតទីប្រឹក្សាប្រធានព្រឹទ្ធសភា លោក ហ៊ុន សែន ពីបទឆបោក និងសម្រេចឃុំខ្លួននៅមណ្ឌលអប់រំកែប្រែទី១ (ម១) កាលពីថ្ងៃទី៥ ខែវិច្ឆិកា។ មុនពេលចាប់ខ្លួនថ្ងៃទី៤ ខែវិច្ឆិកា លោកបានចេញវីដេអូសារភាពកំហុសរបស់ខ្លួន និងសុំទោស។
យោងតាមដីកាសម្រេចឃុំខ្លួនរបស់សាលាដំបូងរាជធានីភ្នំពេញ ដែលផ្សព្វផ្សាយលើបណ្តាញសង្គម និងប្រព័ន្ធផ្សព្វផ្សាយក្នុងស្រុក លោក លី សាម៉េត អតីតទីប្រឹក្សាលោកប្រធានព្រឹទ្ធសភា ហ៊ុន សែន ត្រូវបានដាក់ឱ្យស្ថិតក្រោមការត្រួតពិនិត្យពីបទឆបោក និងសម្រេចឃុំខ្លួននៅមណ្ឌលអប់រំកែប្រែទី១ (ម១) កាលពីថ្ងៃទី៥ ខែវិច្ឆិកា។
លោក សំ វិច្ឆិកា អ្នកនាំពាក្យស្នងការរាជធានីភ្នំពេញបានបញ្ជាក់ថា លោក សាម៉េត ត្រូវបានចាប់ខ្លួននៅខេត្តព្រះសីហនុ ហើយបញ្ជូនមករាជធានីភ្នំពេញកាលពីល្ងាចថ្ងៃទី៤ វិច្ឆិកា ។
លោក វិច្ឆិកា បានប្រាប់ ខេមបូចា ថា ការចាប់ខ្លួននេះធ្វើឡើងតាមនីតិវិធីច្បាប់ ខណៈបច្ចុប្បន្នសមត្ថកិច្ចកំពុងបន្តនីតិវិធី។
លោក វិច្ឆិកា ថ្លែងថា៖ «យប់មិញយើងនាំខ្លួនគាត់ពីខេត្តព្រះសីហនុមកស្នងការនគរបាលភ្នំពេញ ដើម្បីអនុវត្តតាមកិច្ចការងារ ហើយសមត្ថិកិច្ចកំពុងធ្វើការ»។
លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ មិនមានការឆ្លើយតបជាមួយអ្នកសារព័ត៌មានខេមបូចា ទាំងការហៅតាមទូរសព្ទ និងដាក់សំនួរតាមតេឡេក្រាម កាលពីថ្ងៃទី៥ ខែវិច្ឆិកា។
បើតាម Freshnews លោក សាម៉េត ត្រូវបានបញ្ជូនទៅកាន់សាលាដំបូងរាជធានីភ្នំពេញ នៅវេលាម៉ោង១០ព្រឹកថ្ងៃទី៥ ខែវិច្ឆិកា។
លោក សាម៉េត ត្រូវបានគេចោទថា រត់គេចអស់រយៈជាងបីសប្តាហ៍ ប៉ុន្តែនៅរសៀលថ្ងៃទី៤ ខែវិច្ឆិកា លោកបានចេញវីដេអូសុំទោសលោក ហ៊ុន សែន ចំពោះការប្រើឈ្មោះមេដឹកនាំដើម្បីបោកប្រាស់អ្នកដទៃជាច្រើនដង។
ក្នុងវីដេអូសុំទោស លោក សាម៉េត បានទទួលស្គាល់ថា រឿងដែលលោក ហ៊ុន សែន បង្ហោះលើទំព័រហ្វេសប៊ុករបស់លោកគឺ «ពិតទាំងស្រុង»។
លោកនិយាយថា៖ «ខ្ញុំបាទបានយកឈ្មោះសម្តេចទៅប្រើដើម្បីយកលុយគេនេះជារឿងពិតហើយក៏មិនមែនជាលើកទីមួយដែលមិនតែប៉ុណ្ណោះថាថវិការលុយទាំងអស់នោះយកទៅជូនសម្តេចទៀត នេះសុទ្ធជារឿងខ្ញុំបាទប្រឌិត»។
ភ្លាមៗបន្ទាប់ពីចេញវីដេអូរបស់លោក សាម៉េត លោក ហ៊ុន សែន បានស្នើសុំឱ្យអាជ្ញាធរចាប់ខ្លួនលោក សាម៉េត បញ្ជូនទៅកាន់តុលាការ ដើម្បីចាត់ការតាមផ្លូវច្បាប់ជាបន្ទាន់ ទោះបីជាលោក សាម៉េត បានស្នើសុំការព្យាបាលនៅផ្ទះមុននឹងឡើងតុលាការក៏ដោយ។
លោក សាម៉េត បាននិយាយថា គាត់មានជំងឺ ហើយកំពុងស្នាក់នៅផ្ទះកូនគាត់។ គាត់មានជំងឺទឹកនោមផ្អែម និងឈឺក្រពះ ប៉ុន្តែបញ្ហាចម្បង គឺជំងឺទឹកនោមប្រៃ ដែលបណ្តាលឱ្យហើមធ្ងន់ធ្ងរ ហើយធ្វើឱ្យគាត់ដើរមិនបាន ។
លោកសុំពេលបន្តិចទៀតដើម្បីសង្គ្រោះ និងសន្យាសារភាពចំពោះមុខអាជ្ញាធរ និងតុលាការតាមច្បាប់។ គាត់បានធានាថាគាត់ថា៖ «សុំពេលខ្លី មិនសុំពេលយូរទេ ហើយខ្ញុំបាទមិនរត់ទៅណាទេ»។
កាលពីថ្ងៃទី៧ ខែតុលា ឆ្នាំ២០២៤ លោក ហ៊ុន សែន បានបង្ហោះសារនៅលើទំព័រហ្វេសប៊ុករបស់លោក ដោយបញ្ជាក់ថា លោក សាម៉េត បានប្រើឈ្មោះរបស់លោក ដើម្បីបោកប្រាស់ប្រជាពលរដ្ឋ។ លោក ហ៊ុន សែន ស្នើឱ្យតុលាការចេញដីកាការពារទ្រព្យសម្បត្តិលោក សាម៉េត និងបញ្ជាឱ្យលោក គី តិច ប្រធានមេធាវីស្ម័គ្រចិត្តសម្តេចតេជោ កត់ត្រាពាក្យបណ្តឹងពីជនរងគ្រោះ ដើម្បីទាមទារសំណងជំងឺចិត្ត។
មួយថ្ងៃក្រោយការបង្ហោះតាមបណ្តាញសង្គម ប៉ូលិសបានឆ្មក់ចូលផ្ទះលោក សាម៉េត ក្នុងខណ្ឌឬស្សីកែវ ប៉ុន្តែរកមិនឃើញ។
លោក គី តិច ដែលជាប្រធានក្រុមមេធាវីរដ្ឋាភិបាលដែលបង្កើតដោយលោក ហ៊ុន សែន បានបដិសេធមិនធ្វើអត្ថាធិប្បាយអំពីលោក សាម៉េត ដោយលោកថ្លែងថា៖ «សុំរក្សាការសម្ងាត់ ក្នុងវិជ្ជាជីវៈ»។
អ្នកនាំពាក្យអង្គភាពប្រឆាំងអំពើពុករលួយ (ACU) លោក សយ ច័ន្ទវិចិត្រ បានប្រាប់ ខេមបូចា ថា ករណីលោក សាម៉េត កំពុងស្ថិតនៅក្រោមការស៊ើបអង្កេតរបស់សមត្ថកិច្ច ហើយពួកគេនឹងបញ្ជាក់ថាតើវាពាក់ព័ន្ធអំពើពុករលួយដែរឬទេ។ ACU នឹងធ្វើការលើករណីនេះ។
លោក ច័ន្ទវិចិត្រ ថ្លែងថា៖ «ករណីនេះមិនទាន់ស្ថិតក្រោមការតាមដានរបស់យើងនៅឡើយទេ។ ពួកយើងកំពុងតែប្រមូលព័ត៌មាន ហើយនៅពេលនេះប៉ូលិសកំពុងធ្វើការ»។
សូមរំលឹកថា អភិបាលស្រុកល្វាឯម លោក កន សុខកាយ បានផ្តល់ប្រាក់ចំនួន៣០ម៉ឺនដុល្លារ ដល់លោក សាម៉េត ដើម្បីក្លាយជាអភិបាលក្រុង។
បន្ទាប់ពីករណីនេះផ្ទុះឡើង លោកនាយករដ្ឋមន្ត្រី ហ៊ុន ម៉ាណែត បានចេញអនុក្រឹត្យបញ្ចប់លោក សុខ កាយ ជាអភិបាលស្រុកល្វាឯម ពីបទប្រព្រឹត្ត «អំពើអសីលធម៌ធ្ងន់ធ្ងរ» ផ្ទុយនឹងច្បាប់ស្តីពីលក្ខន្តិកៈមន្ត្រីរាជការស៊ីវិលកម្ពុជា។
ជាមួយគ្នានេះ លោក ហ៊ុន សែន បានចេញសេចក្តីថ្លែងការណ៍បន្ថែមនៅថ្ងៃទី៤ ខែវិច្ឆិកា ដោយបញ្ជាក់ថា វីដេអូសុំទោស និងចម្លើយសារភាពមួយនេះ លី សាម៉េត ត្រូវរួចខ្លួននោះទេ ។ លោក ហ៊ុន សែន បានថ្លែងបន្តថា អតីតជំនួយការរបស់លោក ដួង តារា ក៏ត្រូវបានឃុំខ្លួនផងដែរ ដោយរង់ចាំការកាត់ក្តីពាក់ព័ន្ធនឹងករណីឆបោកពាក់ព័ន្ធនឹងលោក សាម៉េត។ ដារ៉ា ត្រូវបានគេដាក់នៅពន្ធនាគាររាជធានីភ្នំពេញ ឬហៅកាត់ថា PJ នៅថ្ងៃទី១៤ ខែតុលា បន្ទាប់ពីត្រូវបានចោទប្រកាន់ពីបទឆបោក។
លោក ហ៊ុន សែន ថ្លែងថា៖ «សូមសមត្ថកិច្ចដែលជានរគបាល ឬកងរាជអាវុធហត្ថ ទៅនាំខ្លួន លី សាម៉េត បញ្ជូនទៅតុលាការដើម្បីកាត់ទោសតាមច្បាប់។ ខ្ញុំសង្ឃឹមថា សមត្ថកិច្ចមិនបន្តឱ្យ លី សាម៉េត បានស្ថិតនៅក្រៅសំណាញ់ច្បាប់ទៀតទេ»។
គណបក្សប្រជាជនកម្ពុជាបានតែងតាំងលោក សាម៉េត ជាទីប្រឹក្សាលោក ហ៊ុន សែន នៅឆ្នាំ២០២២។ ការសម្រេចតែងតាំងនេះធ្វើឡើងតាមសំណើរបស់គណបក្ស និងការយល់ឃើញរបស់លោក ហ៊ុន សែន ប្រធានគណបក្សប្រជាជនកម្ពុជា។
លោក មាស នី អ្នកវិភាគនយោបាយបានលើកឡើងពីសុភាសិតខ្មែរមួយថា៖ «បើបំបោសផ្ទះគេ បំបោសពីលើមក» ពាក់ព័ន្ធនឹងករណីរបស់លោក សាម៉េត ដែលបង្ហាញពីការពិនិត្យរបស់រដ្ឋាភិបាលលើជំនួយការថ្នាក់ដឹកនាំជាន់ខ្ពស់។
លោកបានបន្ថែមថា ករណីនេះបានបង្ហាញពីឆន្ទៈរបស់រដ្ឋាភិបាលក្នុងការដោះស្រាយការរំលោភអំណាច និងធ្វើឱ្យមេដឹកនាំទទួលខុសត្រូវ ជាពិសេសនៅពេលដែលវិធានការដែលមានស្រាប់ក្នុងការទប់ស្កាត់ការរំលោភបំពានបែបនេះអវត្តមាន។
លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជា (TIC) មានប្រសាសន៍ថា ទិដ្ឋភាពសំខាន់បំផុតនៃសំណុំរឿងនេះគឺការអនុវត្តប្រកបដោយប្រសិទ្ធភាពប្រឆាំងនឹងជនសង្ស័យ ដើម្បីវែកមុខការពិត និងប្រមូលភស្តុតាងប្រឆាំងនឹងពួកគេ។
ទោះជាយ៉ាងនេះក្តី លោក ពិសី បានកត់សម្គាល់ថា សន្ទស្សន៍ការយល់ឃើញពីអំពើពុករលួយឆ្នាំ២០២៣ បានបង្ហាញថា ប្រទេសកម្ពុជានៅតែរងផលប៉ះពាល់ពីអំពើពុករលួយធ្ងន់ធ្ងរ ដូចដែលបានបង្ហាញដោយចំណាត់ថ្នាក់ទាប។ លោកបន្តថា៖ «យើងមានតែ ២២ លើ១០០ពិន្ទុទេ។ សូន្យមានន័យថាពុករលួយខ្លាំងបំផុត ចំណែក១០០ មានន័យថាស្អាតស្អំ»៕
ប្រែសម្រួលពីអត្ថបទភាសាអង់គ្លេស៖ Police Arrest Ly Sameth Who Was In Hiding, Currently Questioned in Phnom Penh Municipal Court
