សមត្ថកិច្ចប៉ូលិសបានចាប់ខ្លួន កញ្ញា សេង ធារី ជាមេធាវីនិងជាសកម្មជនសិទ្ធិមនុស្ស បន្ទាប់ពីសាលាដំបូងរាជធានីភ្នំពេញបានសម្រេចផ្តន្ទាទោសគាត់ដាក់ពន្ធនាគារចំនួន៦ឆ្នាំពីបទ«រួមគំនិតក្បត់» និង «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ជុំវិញគម្រោងវិលត្រឡប់មកស្រុកខ្មែរមិនបានសម្រេចរបស់លោក សម រង្សុី នៅថ្ងៃទី៩ ខែវិច្ឆិកា ឆ្នាំ២០១៩។
សាលាដំបូងរាជធានីភ្នំពេញបានសម្រេចផ្តន្ទាទោស កញ្ញា សេង ធារី ដាក់ពន្ធនាគារចំនួន៦ឆ្នាំ និងចេញដីកាបង្គាប់ឱ្យចាប់ខ្លួនភ្លាមៗ ដូច្នេះប៉ូលិសក៍បានចាប់ខ្លួនគាត់ភ្លាមៗដែរនៅមុខសាលាដំបូងរាជធានីភ្នំពេញ បន្ទាប់តុលាការប្រកាសផ្តន្ទាទោសគាត់។
នៅក្នុងការប្រកាសសាលក្រម តុលាការក្រុងភ្នំពេញក៏បានសម្រេចផ្តន្ទាទោស អតីតមេបក្សប្រឆាំង លោក សម រង្សុី និង មន្ត្រីជាន់ខ្ពស់ ព្រមទាំងសកម្មជនរបស់គណបក្សសង្គ្រោះជាតិផ្សេងទៀតចន្លោះពី៥ ទៅ ៨ឆ្នាំ ពីបទរួមគំនិតក្បត់និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមផងដែរ។
ជុំវិញដំណើរមាតុភូមិនិវត្តន៍របស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩ គឺត្រូវអ្នកនយោបាយបក្សកាន់អំណាច ចោទប្រកាន់លោក សម រង្សុី និងអ្នកគាំទ្រ ថាចូលរួមក្នុងផែនការប៉ុនប៉ងធ្វើរដ្ឋប្រហារផ្តួលរំលំ រាជរដ្ឋាភិបាលស្របច្បាប់។
ក្នុងរយៈពេលពីរឆ្នាំកន្លងមកនេះ មានសកម្មជនរបស់អតីតគណបក្សសង្គ្រោះជាតិជាច្រើននាក់ ត្រូវចាប់ឃាត់ខ្លួន និងចោទប្រកាន់ដោយតុលាការ។
នៅដើមខែមីនា ឆ្នាំ២០២១នេះ តុលាការក្រុងភ្នំពេញបានប្រកាសសាលក្រមកាត់ទោសលោក សម រង្សុី ឱ្យជាប់ពន្ធនាគាររយៈពេល ២៥ឆ្នាំ ព្រមទាំងដកហូតសិទ្ធិជាមូលដ្ឋានមួយចំនួន។ ចំពោះអតីតមន្ត្រីជាន់ខ្ពស់បក្សសង្គ្រោះជាតិនិងសកម្មជនមួយចំនួន ក៏ត្រូវកាត់ទោស ដោយអ្នកខ្លះតម្រូវឱ្យជាប់ពន្ធនាគារចន្លោះពី២០ ទៅ ២២ឆ្នាំ៕
