សមាគមសម្ព័ន្ធអ្នកសារព័ត៌មានកម្ពុជា

សហគមន៍ព្រៃឡង់មិនសង្ឃឹមលើមេឃុំជាប់ឆ្នោតថ្មីអាចជួយ​បង្រ្កាប​បទល្មើសព្រៃឈើក្នុងតំបន់ព្រៃឡង់

ឈើដែលក្រុមជនល្មើសកាប់បំរុងដឹកចេញពីតំបន់ព្រៃឡង់ ស្ថិតនៅក្នុងស្រុកសំបូរ ខេត្តក្រចេះ។ រូបថតនៅថ្ងៃទី១ ខែមិថុនា ឆ្នាំ២០២២។ រូបភាពផ្តល់ឱ្យ
ឈើដែលក្រុមជនល្មើសកាប់បំរុងដឹកចេញពីតំបន់ព្រៃឡង់ ស្ថិតនៅក្នុងស្រុកសំបូរ ខេត្តក្រចេះ។ រូបថតនៅថ្ងៃទី១ ខែមិថុនា ឆ្នាំ២០២២។ រូបភាពផ្តល់ឱ្យ

ប្រជាសហគមន៍ព្រៃឡង់មិនសង្ឃឹមលើមេឃុំជាប់ឆ្នោតថ្មីក្នុងការជួយបង្រ្កាបបទល្មើស​ព្រៃឈើនៅតំបន់ព្រៃឡង់ ខណៈប្រជាពលរដ្ឋមូលដ្ឋានរកឃើញថាព្រៃឡង់​កំពុង​រងការកាប់​បំផ្លាញ​យ៉ាងអាណាធិបតេយ្យពីសំណាក់ជនល្មើស​។

បន្ទាប់ពីការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ កាល​ពី​ថ្ងៃទី៥​ ខែឧសភា​រួចមក។ ប្រជាពលរដ្ឋភាគច្រើនរំពឹងថាមេឃុំថ្មីមកពី​គ្រប់​បក្សនយោយនឹង​ផ្លាស់ប្ដូរឥរិយាបថ និងបន្តប្រឹងប្រែងធ្វើកិច្ចការងារដើម្បីផលប្រយោជន៍ជាតិ​ជាធំ​ដូចអ្វី​ដែល​គ្រប់បក្សនយោបាយ​នីមួយៗបានសន្យា។ ចំណែកពលរដ្ឋរស់នៅតំបន់ព្រៃឡង់​នៅមិនទាន់​ជឿ​លើ​មេឃុំជាប់ឆ្នោត​ថ្មី​ទាំងនោះថា អាចចូលរួមទប់ស្កាត់បទល្មើសព្រៃឈើ និង​បញ្ឈប់​អំពើ​ពុករលួយ​រវាងមន្រ្តី​អាជ្ញាធរ និងក្រុមហ៊ុនដឹកឈើផ្សេងៗនោះទេ។

តំណាងបណ្ដាញសហគមន៍ព្រៃឡង់ លោក ហឿន សុភាព រស់នៅ​ឃុំសណ្ដាន់ ស្រុកសណ្តាន់ ខេត្តកំពង់ធំ បានឱ្យដឹងថា លោកមិនមានជំនឿចិត្តចំពោះមេឃុំថ្មី​ដែល​ទើប​ជាប់ឆ្នោត​មក​ពី​បក្ស​កាន់អំណាចនោះទេ ព្រោះជាមេឃុំចាស់ដដែល។ លោកមើល​ឃើញថា កន្លងមក​មេឃុំ​មិន​ដែលចូលរួមទប់ស្កាត់និងបង្រ្កាបបទល្មើសព្រៃឈើនោះទេ ផ្ទុយ​ទៅវិញ តែងតែ​និយាយ​ចោទ​ប្រកាន់​ប្រជាសហគមន៍ព្រៃឡង់ថាមានចេតនាមិនល្អលើអាជ្ញាធរ​មូលដ្ឋាន ហើយ​និយាយ​​ការពារជនល្មើសទៅវិញ។

លោកថ្លែងថា៖ «ខ្ញុំដូចជាមិនសង្ឃឹមសោះឡើយសម្រាប់ខ្ញុំ ខ្ញុំគិតថាវាពិបាក​ក្នុងការ​ផ្លាស់ប្តូរ ព្រោះឥឡូវនឹង យើងឃើញដំណើរការមួយចំនួនមិនប្រក្រតីស្រាប់ហើយ ហើយ​អាណត្តិ​ថ្មីនេះខ្ញុំគិតថាវាមិនអាចចោលពីលំអានចាស់អាណត្តិចាស់ដែរ(មេឃុំដដែល) វានៅតែ​មានការដឹកនាំប្រហាក់ប្រហែលគ្នាដដែល»។

ទោះយ៉ាងណា លោក សុភាព សង្ឃឹមថា រដ្ឋាភិបាលនឹងយកចិត្តទុកដាក់លើបញ្ហា​ព្រៃឡង់ តាម​រយៈការលុបបំបាត់អំពើពុករលួយធ្ងន់ធ្ងរពីសំណាកអាជ្ញាធរមូលដ្ឋាន។ លោក​រំពឹងថា មេឃុំថ្មីនឹងផ្លាស់ប្ដូរឥរិយាបថដែលគិតលើផលប្រជាជាតិជាធំ។ លោក​ចង់​ឃើញ​មេឃុំ​ចូលរួម​សហការជាមួយសហគមន៍និងអង្គការផ្សេងៗ ដើម្បីចូល​រួម​ការ​អភិវឌ្ឍប្រកបដោយចីរភាព។

 លោកឱ្យដឹងថា៖ «លោកមេឃុំចៅសង្កាត់ទាំងអស់ គឺជួយយ៉ាងណាគឺជំរុញនិង​រឹតបណ្តឹង​នៃការកាប់បំផ្លាញព្រៃឈើ ឬក៏ជួយនៃការដំណើរនៃការរៀបចំ​នៃការពារធនធាន​ធម្មជាតិ»។ លោកបន្តថា៖ «ជាពិសេសគឺសុំឱ្យមានការចូលរួមយ៉ាងសកម្មជាមួយប្រជាពលរដ្ឋ​ជាមួយ​សហគមន៍ ជាមួយអង្គការសង្គមស៊ីវិលជាមួយនឹងដៃគូផ្សេងៗក្នុងការអភិវឌ្ឍ​វិស័យព្រៃឈើ​ហ្នឹង ខ្ញុំគិតថាសូមឱ្យមេឃុំចៅសង្កាត់ទាំងអស់លើកទឹកចិត្តសហគមន៍​ជួយជ្រោមជ្រែង​ធ្វើយ៉ាងម៉េចឱ្យមានគម្របព្រៃឈើឡើងវិញ ព្រោះប្រទេសកម្ពុជាយើងមាន​កម្តៅខ្លាំងជាង​មុន»

សារព័ត៌មានខេមបូចា មិនអាចទាក់ទង មេឃុំសណ្តាន់ ស្រុកសណ្តាន់ ខេត្តកំពង់ធំ លោក បាន​ ហេង ដើម្បីឆ្លើយតបទៅនឹងបញ្ហានៃការលើកឡើងរបស់ម្ចាស់ឆ្នោតដែលស្នើសុំឱ្យ លោកជួយដោះស្រាយរឿងបទល្មើសព្រៃឡង់នោះទេ ដោយលោកឆ្លើយ​យ៉ាងខ្លីថា៖ «ខ្ញុំរវល់ប្រជុំ»

ចំណែក អភិបាលខេត្តកំពង់ធំលោក ងួន រតនៈ ប្រាប់សារព័ត៌មានខេមបូចាយ៉ាងខ្លីថា លោកនឹងចុះពិនិត្យដោយផ្ទាល់ដើម្បីដោះស្រាយឱ្យឆ្លើយតបនឹងអ្វីដែលពលរដ្ឋចង់បាន។

លោកមានប្រសាសន៍ថា៖«សូមចុះទៅឱ្យស្គាល់កន្លែងសិន ព្រោះការសំណូមពររបស់ពលរដ្ឋ អ៊ីងចឹងយើងចង់មើលភាពជាក់ស្ដែងណ៎ា»។

សាលាឃុំកាំងចាម​ ស្រុក​ថាឡាបរិវ៉ាត់​ ខេត្តស្ទឹងត្រែង។​ រូបថតនៅថ្ងៃទី១០ ខែមិថុនា ឆ្នាំ២០២២។ រូបភាពផ្ដល់ឱ្យ

ប្រជាសហគមន៍ព្រៃឡង់ខេត្តស្ទឹងត្រែង លោក ខេង ខូ ឯណោះវិញ បានឱ្យដឹងថា ស្ថានភាព​នៅតំបន់ព្រៃឡង់មានការកាប់ទន្ទ្រានកាន់តែខ្លាំងរយៈពេលចុងក្រោយនេះ ខណៈដែល​ក្រុមហ៊ុនអារឈើមួយចំនួនមិនត្រូវបានហាមឃាត់ ឬបិទនោះទេ ដែលបណ្ដាលឱ្យ​មានការ​ចូល​កាប់​ទន្រ្ទានឈានទៅដល់ភាពហិនហោចកាន់តែខ្លាំង។ លោកបន្តថា រដ្ឋាភិបាល​គួរ​តែ​រៀបចំ​គោលនយោបាយឱ្យបានត្រឹមត្រូវ និងលុបបំបាត់ការអភិវឌ្ឍទាំងឡាយណា​ដែល​មិនប៉ះពាល់​ដល់ធនធានធម្មជាតិ។

លោក ខូ បន្តថា ប្រជាពលរដ្ឋដែលបានបោះឆ្នោតឱ្យមេឃុំ អាណត្តិថ្មីនេះ ពិតជាចង់បាន​មេដឹកនាំដែលល្អ ហើយចូលរួមដោះស្រាយបញ្ហាដែលកើតមាននៅក្នុងមូលដ្ឋានរបស់ខ្លួន។ លោកបន្តទៀតថា អ្វីដែលពលរដ្ឋព្រួយបារម្ភនោះគឺការដើរផ្ទុយនឹងគោលនបោយាយ​ដែលខ្លួនធ្លាប់បានសន្យា។

លោកប្រាប់ថា៖ «អាស្រ័យលើយើងតាមដានពួកគាត់បន្តទៀត តែបើគាត់​មិន​អនុវត្ត​ចូលរួម​ការពារព្រៃឡង់ទេ ខ្ញុំមានការខកចិត្តខ្លាំងចំពោះអាជ្ញាធរមូលដ្ឋាន​[មេឃុំថ្មី] ដែលគាត់មិនមាន​ឆន្ទៈនិងបេះដូងការពារធនធានធម្មជាតិក្នុងតំបន់ព្រៃឡង់ទេនោះ»។

ឆ្លើយតបនឹងបញ្ហាខាងលើនេះ មេឃុំដែលទើបនឹងជាប់ថ្មីមកពីបក្សប្រជាជនកម្ពុជា ឃុំកាំងចាម ស្រុកថាឡាបរិវ៉ាត់ ខេត្តស្ទឹងត្រែង លោក ឃឹម សុខា មានប្រសាសន៍ថា ការ​ទប់ស្កាត់បទល្មើសព្រៃឈើនៅតំបន់ព្រៃឡង់ លោកមិនហ៊ានលូកដៃជ្រៀតជ្រែកនោះទេ ទោះបីលោកជាមេឃុំនៅក្នុងតំបន់នេះក៏ដោយ។ លោកបន្តថានៅក្នុងដែនសមត្ថកិច្ច​តំបន់​ព្រៃឡង់លោកមិនអាចគ្រប់គ្រងបានទេ​ វាជាតួនាទីរបស់មន្រ្តីបរិស្ថានខេត្ត។

 លោកថ្លែងថា៖ «ដូចខ្ញុំបានជម្រាបជូនខាងដើមពាក់ព័ន្ធនឹងបញ្ហាព្រៃឡង់មិនមែន​ជា​ដែន​សមត្ថកិច្ចរបស់ខ្ញុំទេ គឺដែនសមត្ថកិច្ចរបស់មន្ទីរពាក់ព័ន្ធផ្សេងៗ (មន្ទីរបរិស្ថាន) ចឹងបញ្ហា​ព្រៃឡង់ទាំងមូលគឺខ្ញុំមិនអាចទទួលយកបានទេ ដោយសារខ្ញុំមិនមានសមត្ថកិច្ចគ្រប់គ្រាន់»។

ចំណែកមេភូមិកាំងចាម​ ស្រុកថាឡាបរិវ៉ាត់  លោកអ៊ឹម សួន មានប្រសាសន៍ថា អ្វីដែល​ពលរដ្ឋ​លើកឡើងនេះ គឺជារឿងដែលសំខាន់ ហើយលោកនឹង​អនុវត្តតាម​បញ្ជាមន្រ្តីថ្នាក់លើ ជាពិសេស​មេឃុំដែលជាប់ឆ្នោតថ្មីនៃអាណត្តិទី៥នេះ។ លោកបន្តថាលោកនឹង​ប្តេជ្ញាចិត្ត​ជួយដោះស្រាយបញ្ហាបទល្មើសនៅក្នុងដីព្រៃសហគមន៍ជូនប្រជាពលរដ្ឋ។

លោកមានប្រសាសន៍ថា៖ «សម្រាប់ខ្ញុំបេ្តជ្ញាថា ជួយដោះស្រាយបទល្មើសព្រៃឈើ ដោះស្រាយ​កុំឱ្យមានបទល្មើស កាប់ទន្រ្ទានព្រៃឈើ ហើយធ្វើការណែនាំ​ដល់ជនល្មើស​កុំឱ្យកាប់ព្រៃឈើ​នៅកន្លែងដីព្រៃសហគមន៍ជាដើម»។

ប្រជាសហគមន៍ព្រៃឡង់ លោក ខេម សុឃី ប្រាប់សាព័ត៌បានរៀបរាប់ថា ប្រជាពលរដ្ឋ​មានការរំពឹង និងចង់ឃើញមេឃុំថ្មីដែលមកពីបក្សប្រជាជនកម្ពុជា​ផ្លាស់ប្ដូរឥរិយាបថ​ឡើង​វិញក្រោយពីជាប់ឆ្នោតជាមេឃុំ ដើម្បីចូលរួមទប់ស្កាត់បទល្មើសព្រៃឈើ​ដែលកំពុងកើត​មាន​យ៉ាងអនាធិបតេយ្យ។

លោក ខេម សុឃី រស់នៅឃុំរុងរឿង ស្រុករវៀង ខេត្តព្រះវិហារ សង្ឃឹមថា អាណត្តិថ្មីនេះ អាជ្ញាធរមិនពាក់ព័ន្ធនឹងអំពើពុករលួយ ខណៈដែលកន្លងមកប្រជាពលរដ្ឋ​រកឃើញថា​បទល្មើស​ច្រើនកើតចេញពីការគប់គិតគ្នារវាងអាជ្ញាធរមូលដ្ឋាន និង​ក្រុមហ៊ុនអារឈើ ដែល​ធ្វើឱ្យការកាប់ទន្រ្ទានយកដីនៅតំបន់ព្រៃឡង់ពីសំណាក់​អ្នកមាន​អំណាច និងពលរដ្ឋកាន់​តែកើន​ឡើងជាបន្តបន្ទាប់។

លោកស្នើទៅអាជ្ញាធរមូលដ្ឋានថា៖ «ក្នុងនាមពួកខ្ញុំដែលជាបណ្តាញព្រៃឡង់​សុំសំណូមពរ​ដល់ចៅសង្កាត់ ឬក៏មេឃុំដែលជាប់ឆ្នោតថ្មីក្នុងអាណត្តិនេះ​គឺសុំឱ្យលោកហ្នឹង​ជួយសហការ​ឬក៏​បង្រ្កាបនូវបទល្មើសឈើ ចរាចរឈើបទល្មើសដែលចេញពីតំបន់អភិរក្ស​គឺតំបន់ព្រៃឡង់​ឱ្យ​បានច្រើនជាងមុន»។

ឈើដែលក្រុមជនល្មើសកាប់បំរុងដឹកចេញពីតំបន់ព្រៃឡង់ ដែលស្ថិតនៅក្នង​ខេត្តព្រះវិហារ។​ រូបថតនៅថ្ងៃទី២ ខែមិថុនា ឆ្នាំ២០២២។ រូបភាពផ្តល់ឱ្យ

ដោយឡែក ប្រជាសហគមន៍ព្រៃឡង់ម្នាក់ទៀតមកពីភូមិទន្សោងធ្លាក់ ស្រុកសំបូរ ខេត្តក្រចេះ លោក ហ៊ឹម ជំនោរ សង្កេតឃើញថា សឹងតែគ្រប់អាណត្តិទៅហើយ មិនដែលឃើញមាន​មេឃុំ​ណាមួយ​ដែលយកចិត្តទុកដាក់បញ្ហាព្រៃឈើនោះទេ។ លោក​បន្ត​ថា ខណៈពេលពលរដ្ឋ​ចេញ​ទៅ​បោះឆ្នោតឃុំសង្កាត់ មានករណីដឹកឈើចេញពី​តំបន់​ព្រៃឡង់​តាមគោយន្ត និងម៉ូតូជា​ហូរហែ តែគ្មានអាជ្ញាធរណាទៅហាមឃាត់​ឬទប់ស្កាត់​នោះ​ទេ។

លោកលើកឡើងថា៖ «បោះឆ្នោតហើយតែងតែចង់បានមេឃុំដែលជាប់ឆ្នោតថ្មីនេះ ចង់ឱ្យ​គាត់ជួយមើល ជាពិសេសទាក់ទងទៅនឹងបទល្មើសព្រៃឈើ ក៏ដូចជាជួយបងប្អូន​ប្រជាជន​ដែលមានដីនៅក្នុងក្រុមហ៊ុនហ្នឹង សូមឱ្យគាត់ពិនិត្យមើលសារឡើងវិញ កុំឱ្យ​ចោទដូចមេឃុំ​មុនៗ ថាប្រជាជនទៅលួចដីពីក្រុមហ៊ុនមកវិញ»។

ជុំវិញបញ្ហានេះ មន្រ្តីសម្របសម្រួលគម្រោងនៃបណ្ដាញយុវជនកម្ពុជាហៅកាត់ថា CYN​ លោក អូត ឡាទីន ប្រាប់ខេមបូចាថា បញ្ហាព្រៃឡង់នៅពេលនេះកំពុងតែរង់ការគំរាមកំហែង​កាន់តែ​ខ្លាំងពីសំណាក់អ្នកមានលុយ មានអំណាច ខណៈដែលអាជ្ញាធរមូលដ្ឋាន​មួយចំនួន​គិតតែ​ពី​ចំណូលដែលទទួលពីជនល្មើស។ ដូច្នេះលោកសង្ឃឹមថា ក្រោយពីការ​បោះឆ្នោត​ជ្រើសរើសក្រុបប្រឹក្សាឃុំសង្កាត់នេះរួចមក អាជ្ញាធរនឹងប្រឹងប្រែងការពារ​ធនធានធម្មជាតិ​ដ៏កម្រង​ទាំងនោះឡើងវិញ។

លោកមានប្រសាសន៍ថា៖ «កន្លងទៅមេឃុំ ចៅសង្កាត់ដែលបានជាប់ឆ្នោត តាមការ​សង្កេត​របស់ខ្ញុំ ហើយបទពិសោធធ្វើការងារជាក់ស្ដែងនៅតំបន់ព្រៃឡង់។​ ខ្ញុំសង្កេតឃើញថាមេឃុំ ចៅសង្កាត់ទាំងនោះគាត់មិនបានយកចិត្តទុកដាក់ក្នុងកិច្ចការពារធនធានធម្មជាតិដូចកិច្ច​ការងារបក្សរបស់ពួកគាត់នោះទេ»។

អង្គការលើកលែងទោសអន្តរជាតិ ហៅថា Amnesty International ក្នុងឆ្នាំ២០២១ ព្រៃឈើ​ជាង៦ពាន់ហិកតាក្នុងដែនជម្រកសត្វព្រៃធំៗចំនួន២ គឺព្រៃឡង់ និងព្រៃព្រះរកា ត្រូវបានកាប់​បំផ្លាញ តាមរយៈការទទួលសំណូក និងការប្រព្រឹត្តអំពើពុករលួយរបស់អាជ្ញាធរពាក់ព័ន្ធ។

នៅ​ក្នុងរបាយការណ៍ដដែល បានថែមទាំងចោទប្រកាន់ចំៗទៅលើអាជ្ញាធរពាក់ព័ន្ធ និងជា​ពិសេសមន្ត្រីក្រសួងបរិស្ថានថា មិនបានអើពើនឹងការរាយការណ៍បទល្មើសពីប្រជាពលរដ្ឋ។ និងថា ពេលខ្លះ មន្ត្រីក្រសួងបរិស្ថានទាំងនោះ បានចុះទៅស៊ើបអង្កេត ប៉ុន្តែគ្រាន់តែស៊ើប​អង្កេត​ដើម្បីទទួលលុយក្រោមតុពីជនល្មើសតែប៉ុណ្ណោះ៕

227 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម