សមាគមសម្ព័ន្ធអ្នកសារព័ត៌មានកម្ពុជា

នាយក​រដ្ឋមន្ត្រី​ថា ការ​បិទសារព័ត៌មាន​VOD គឺជួយ​ពង្រឹង​វិស័យ​សារព័ត៌មាន ហើយ​ប្រកាស​​ផ្តល់​​ការងារ​ដល់​អ្នក​សារព័ត៌មាន

សកម្មជនសិទ្ធិមនុស្សមួយក្រុមប្រមូលផ្តុំគ្នានៅមុខការិយាល័យសារព័ត៌មាន VOD ដើម្បីតវ៉ានឹងការសម្រេចចិត្តរបស់រដ្ឋាភិបាលក្នុងការដកហូតអាជ្ញាប័ណ្ណ របស់សារព័ត៌មាន VOD កាលពីថ្ងៃទី១៣ ខែកុម្ភៈ ឆ្នាំ២០២៣។ (ខេមបូចា / ព្រីង សំរាំង)
សកម្មជនសិទ្ធិមនុស្សមួយក្រុមប្រមូលផ្តុំគ្នានៅមុខការិយាល័យសារព័ត៌មាន VOD ដើម្បីតវ៉ានឹងការសម្រេចចិត្តរបស់រដ្ឋាភិបាលក្នុងការដកហូតអាជ្ញាប័ណ្ណ របស់សារព័ត៌មាន VOD កាលពីថ្ងៃទី១៣ ខែកុម្ភៈ ឆ្នាំ២០២៣។ (ខេមបូចា / ព្រីង សំរាំង)

បើទោះជាមានការព្រួយបារម្ភពីអន្តរជាតិជា​ច្រើន​ជុំវិញការបិទប្រព័ន្ធផ្សព្វផ្សាយឯករាជ្យគឺ​វិទ្យុសំឡេងប្រជាធិបតេយ្យ (VOD) ក៏ដោយ លោកនាយករដ្ឋមន្ត្រី ហ៊ុន សែន មានប្រសាសន៍ថា អាជ្ញាប័ណ្ណរបស់ប្រព័ន្ធ​ផ្សព្វផ្សាយ​ព័ត៌មាន​មួយនេះ​ នឹងមិនត្រូវបានផ្តល់​ឡើងវិញនោះ​ទេ ហើយជំនួស​មក​វិញ​ លោក​ប្រកាស​ផ្តល់​ការងាររដ្ឋដល់​អ្នកសារព័ត៌មាន VOD តាមបណ្តាញ​ហ្វេសប៊ុកកាលពីថ្ងៃអង្គារ​។

អង្គការសហប្រជាជាតិ និងក្រសួងការបរទេសសហរដ្ឋអាមេរិកបានទទូច​ឱ្យផ្តល់អាជ្ញាប័ណ្ណរបស់ VOD ឡើងវិញនៅក្នុងសេចក្តីថ្លែងការណ៍ដាច់ដោយឡែកពីគ្នាកាលពីថ្ងៃអង្គារ។

លោក ហ៊ុន សែន បានសរសេរ​​សារ​តាម​ហ្វេសប៊ុក​របស់​លោក​ថា​៖ «ដោយសារតែ​វិទ្យុវីអូឌីត្រូវ​បាន​បិទនិង​គ្មាន​ឱកាស​បើក​ឡើង​វិញ​និង​ដោយ​គិត​ទៅ​ដល់​ជីវភាពបុគ្គលិកដែលបាត់បង់ការងារដោយកំហុសមេដឹកនាំ។ ខ្ញុំ​​សម្រេច​​ផ្តល់​​ក្របខ័ណ្ឌរដ្ឋ​សម្រាប់​បងប្អូន​ដែល​មាន​បំណង​ចូល​បំរើ​កិច្ច​ការ​រដ្ឋ​»។

លោកស្រី​ ឆន សុគន្ធា នាយិកាស្តីទីមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯក​រាជ្យ (CCIM)​ បានបដិសេធមិនធ្វើអត្ថាធិប្បាយលើ​ការ​ផ្តល់​ការ​ងារ​របស់លោក ហ៊ុន សែន ចំណែក​លោក អ៊ិត សូធឿត នាយកផ្នែក​ផ្សព្វផ្សាយព័ត៌មាន​របស់ CCIM មានប្រសាសន៍ថា ការសម្រេចចិត្ត គឺអាស្រ័យលើបុគ្គលិក VOD ម្នាក់ៗ​។

លោក សូធឿត មាន​ប្រសាសន៍​ថា៖ «ទោះ​ជា​យ៉ាង​ណា យើង​សង្ឃឹម​ថា បុគ្គលិក​របស់​យើង​នឹង​នៅ​ជាមួយ​យើង ខណៈ​ដែល​យើង​ព្យាយាម​រក​ដំណោះ​ស្រាយ​ឲ្យ​បាន​ឆាប់​តាម​ដែល​អាច​ធ្វើ​ទៅ​បាន»។

អ្នកនាង Danielle Keeton-Olsen ជា​ការីនិពន្ធ​វីអូឌីផ្នែក​ភាសាអង់គ្លេសមានប្រសាសន៍ថា អ្នកនាង​មានអារម្មណ៍ថា អ្នកយកព័ត៌មានវីអូឌី​បាន​ «ក្លាយ​ជា​គោលដៅ​នៃ​ការ​វាយប្រហារជា​លក្ខណៈ​បុគ្គល» ហើយសង្ឃឹមថា រដ្ឋាភិបាលនឹងមិន​យក​អតីតបុគ្គលិកវីអូឌី​ទៅដាក់​នៅ​ «កន្លែងធ្វើការដែលគ្មាន​ការ​រាក់ទាក់​​» នោះ​ទេ​។

​Danielle Keeton-Olsen បាននិយាយថា៖ «តាមការ​យល់​ឃើញ​ផ្ទាល់ខ្លួន ខ្ញុំ​មិនជឿថា ការផ្តល់ជូននេះគឺ​ពិតជាការ​ផ្តល់ឱកាសដល់បុគ្គលិករបស់យើងនោះ​ទេ។ ច្បាស់ណាស់ វាគ្រាន់​តែ​ ដើម្បី​ធ្វើ​ឲ្យ​ស្ងប់​ចិត្ត​ទាំងក្នុងស្រុកនិងក្រៅស្រុក ដែលមានការភ្ញាក់ផ្អើល និងខឹងសម្បារចំពោះការសម្រេចចិត្តដកហូតអាជ្ញា​ប័ណ្ណរបស់យើង»។

លោក ហ៊ុន សែន ទំនង​ជា​ច្រាន​ចោល​ការ​ព្រួយ​បារម្ភ​របស់​ស្ថានទូត​បរទេស​អំពី​ការ​បាត់​បង់​ប្រព័ន្ធ​ផ្សព្វផ្សាយ​ឯករាជ្យ​មួយ​ដែល​នៅ​សេសសល់​ចុងក្រោយ​របស់​កម្ពុជា។

លោក ហ៊ុន សែន មាន​ប្រសាសន៍ថា៖ «​ជន​បរទេស​គ្មាន​សិទ្ធិមកបង្គាប់​​បញ្ជា​ឲ្យ​យើង​ធ្វើ​បែប​នេះ ឬ​ធ្វើ​​នោះតាម​ការ​ចង់​បាន​របស់​ពួកគេឡើយ​​ព្រោះ​នេះ​​ជា​កិច្ចការ​ផ្ទៃក្នុង​របស់​យើង។ ការបិទចោល​វិទ្យុដែល​គ្មានក្រម​សីលធម៌ [VOD] មួយ វាមិនធ្វើ​ឲ្យ​ស្លាប់​សេរីភាពសារព័ត៌មាននៅកម្ពុជានោះ​ឡើយ​ ប៉ុន្តែផ្ទុយទៅ​វិញ​ វានឹង​ជួយដល់​ការ​អនុវត្តច្បាប់ និងពង្រឹងក្រមសីលធម៌វិជ្ជា​ជីវៈសារព័ត៌មាននៅកម្ពុជាថែម​ទៀត​ផង»។

ក្រសួងការបរទេសអះអាងថា ការបិទវិទ្យុ​វីអូឌី​ស្របតាមច្បាប់កម្ពុជា ពីព្រោះវីអូឌី​បានកំពុងផ្សាយព័ត៌មានក្លែងក្លាយ។

ក្រសួងបាន​ឲ្យ​ដឹង​នៅក្នុងសេចក្តីថ្លែងការណ៍មួយកាលពីថ្ងៃអង្គារថា៖ «ចំណាត់ការ​រដ្ឋបាលចំពោះ​អង្គភាពដែលបំពានច្បាប់មិនសមនឹងទទួលបានការព្រួយបារម្ភអ្វីទាំងអស់ ។ អ្វី​ដែល​គួរ​ឲ្យ​បារម្ភ​នោះ ​គឺការផ្សាយ​​ព័ត៌មាន​មិន​ពិត​ដែល​កំពុង​កើន​ឡើង និង​ការ​បង្កាច់​បង្ខូចជា​អន្តរជាតិ»។

ក្រសួង​អះអាង​ថា ស្ថានទូតបរទេស​មួយចំនួន​ ដែល​ចេញ​សេចក្តី​ថ្លែង​ការណ៍បង្ហាញការ​ព្រួយ​បារម្ភ​ចំពោះ​ការ​បិទវិទ្យុ​វីអូឌី​​ ដែល​ធ្វើ​ឡើង​ដោយ​ ​ការ​ថ្លែង​លម្អៀង​ បង្ហាញពី​ការ​ធ្វើ​មិន​ដឹង​​មិនឮចំពោះការ​ពិត​មិន​អាចប្រកែក​បាន​ គឺបជ្ឈមណ្ឌល​នេះ​ [ វីអូឌី ] បាន​បំពាន​វិជ្ជាជីវៈសារ​ព័ត៌មាន​យ៉ាងធ្ងន់ធ្ងរ​។​

ក្រសួង​បាន​ព្រមាន​ថា ស្ថានទូត​បរទេស​ទាំងនោះ​មិន​ត្រូវ​ជ្រៀតជ្រែក​ ដោយ​លើក​ឡើង​ពី​អនុសញ្ញា​ទីក្រុងវីយែន​ស្តីពី​ទំនាក់ទំនង​ការទូត​។

សេចក្តីថ្លែង​ការណ៍​នេះ​ក៏​បាន​លើក​ឡើង​ផងដែរ​ថា សេចក្តី​រាយការណ៍​របស់​វីអូឌី «បាន​ធ្វើ​ឲ្យ​ប៉ះពាល់​ដល់​កិតិ្តយស​និង​កិត្យានុភាព​របស់រាជរដ្ឋាភិបាល​កម្ពុជា​​» និង​បាន​លើក​ឡើង​មាត្រា​១០​នៃច្បាប់​ស្តីពីរបបសារព័ត៌មាន​ ដោយ​អះអាងថា វីអូឌី​បាន​ចុះផ្សាយ​ «​ក្នុងចេតនា​ទម្លាក់​កំហុស​​​» ។​

ប៉ុន្តែ​លោក Volker Türk ជា​ឧត្តម​ស្នង​ការ​អង្គការសហប្រជាជាតិ​ទទួល​បន្ទុក​សិទ្ធិ​មនុស្ស​បាន​លើក​​ឡើង​នៅក្នុង​សេចក្តី​ថ្លែង​ការណ៍​កាល​ពីថ្ងៃអង្គារ​ថា ការ​សម្រេចចិត្ត​របស់​រដ្ឋាភិបាល​ដើម្បី​បិទ​វិទ្យុ​វីអូឌី​ គឺមិន​ស្រប​ទៅ​តាម​ច្បាប់​ទេ។​

លោក​មាន​ប្រសាសន៍ថា អំពីការបិទនេះ​ថា៖ «​មិន​ត្រូវ​បាន​ដំណើរដោយ​​ហ្មត់ចត់និង​តម្លាភាព​ដូចដែល​​ច្បាប់​សារព័ត៌មាន​របស់​ប្រទេស​កម្ពុជាតម្រូវ​នោះ​ឡើយ ហើយ​ខកខានមិនបាន​ឆ្លើយ​តប​ទៅនឹង​តម្រូវ​ការ​នៃ​ច្បាប់ ភាពចាំបាច់ និងសមាមាត្រដែលច្បាប់សិទ្ធិមនុស្សអន្តរជាតិដែល​តម្រូវ​ឲ្យមាន​​ចំពោះ​ការរឹតបន្តឹងលើសេរីភាពនៃការបញ្ចេញមតិដែល​អាចមាន​​ណាមួ​យ​​​»។

ក្រុមអង្គការ​សិទ្ធិមនុស្សកម្ពុជា​បាន​លើក​ឡើង​ថា រដ្ឋាភិបាល​ទំនងជា​បកស្រាយ​ច្បាប់ស្តីពីរបបសារព័ត៌មាន​ខុស​ក្នុងបំណង​បង្ហាញថា ការ​បិទវិទ្យុវីអូឌី​ គឺត្រឹម​ត្រូវ​តាម​ច្បាប់។

លោក សឹង សែនករុណា ជាអ្នក​ស៊ើបអង្កេតជាន់ខ្ពស់​នៃអង្គការ​សិទ្ធិ​មនុស្សអាដហុក​បាន​គូសបញ្ជាក់ថា អ្នក​នាំពាក្យ​រដ្ឋាភិបាល​ត្រូវ​បាន​ដកស្រង់សម្តីនៅ​ក្នុង​អត្ថបទ​ភាសាខ្មែរ​របស់​វីអូឌី​ដែល​ទំនងជា​បញ្ជាក់ពីតួនាទី​របស់​លោក ហ៊ុន ម៉ាណែត​ នៅក្នុង​ការ​អនុញ្ញាត​ផ្តល់​ជំនួយ​ ដែល​ជា​ការ​អះអាងមួយ​ ដែល​ឈានទៅ​ការ​បិទ​បណ្តាញព័ត៌មាន​មួយនេះ។

លោក សែនករុណា មាន​ប្រសាសន៍ថា៖ «​នៅ​ពេល​អ្នក​សារព័ត៌មាន​មាន​ប្រភព​ ហើយ​ប្រភព​បញ្ជាក់ច្បាល់លាល់​បែប​នេះ​ ហើយ​ពួកគេបាន​ចុះផ្សាយ​ដូចអ្វីដែល​ប្រភព​បាន​និយាយ​ ខ្ញុំគិត​ថា វាមិន​មែនជា​កំហុស​របស់វីអូឌី​ទេ ហើយ​សំខាន់​គឺថា ប្រភព​នោះ​ទេ​ដែលជាអ្នកទួលខុសត្រូវលើការផ្តល់​ព័ត៌មាន​ដល់​បណ្តាញ​ផ្សព្វផ្សាយ​ព័ត៌មាននោះ​»។

លោក ប៉ែន បូណា ជា​រដ្ឋលេខាធិការ​ក្រសួងព័ត៌មាន​បាន​អះអាងថា លោក ផៃ ស៊ីផាន​ មិនដែល​បញ្ជាក់​ថា លោក ហ៊ុន ម៉ាណែត បាន​ចុះហត្ថលេខាលើ​ការផ្តល់ជំនួយនោះទេ។ ប៉ុន្តែ​អត្ថបទនេះបាន​ដកស្រង់​សម្តីរបស់​លោក ស៊ីផាន ដោយលោក​គ្រាន់តែ​និយាយថា «វាមិន​ខុស​ទេ» ដែល​លោក​ ហ៊ុន ម៉ាណែត ដើរ​តួនាទី​ជំនួស​ឪពុក​របស់​លោក។ លោក ផៃ ស៊ីផាន មិនអាចទាក់ទង ដើម្បី​សុំការ​អត្ថាធិប្បាយ​បានទេ។

លោក ប៉ែន បូណា បាន​បន្ថែមថា កូន​ប្រុសរបស់​លោក​នាយករដ្ឋមន្ត្រី​គឺ​​ជា​ «ជនរងគ្រោះ» ហើយ​បាន​បដិសេធ​ព័ត៌មាន​នៅ​ក្នុងអត្ថបទ​នេះ។ វីអូឌី​ភាសាខ្មែរ​ក្រោយ​មក​ក៏មិនបាន​ចុះផ្សាយ​អត្ថបទមួយបន្ត​ដោយ​បញ្ជាក់ពីការ​បដិសេធ​របស់​លោក ហ៊ុន ម៉ាណែត។​

លោក អំ សំអាត ជា​នាយកទទួលបន្ទុកកិច្ចការទូទៅនៃ​អង្គការលីកាដូ​បាន​បញ្ជាក់ថា មា​ត្រា១០ នៃច្បាប់សារព័ត៌មានកម្ពុជា ផ្តល់មធ្យោបាយផ្លូវច្បាប់សម្រាប់បុគ្គលសាធារណៈ ក្នុងការស្វែងរកការកែតម្រូវ​ និងការ​ឆ្លើយតប​ពីអ្នកបោះពុម្ពផ្សាយ ក្នុងករណីដែលព័ត៌មានមិនពិតត្រូវបានផ្សព្វផ្សាយ។

លោកស្រី ចក់ សុភាព នាយិកាប្រតិបត្តិ​មជ្ឈមណ្ឌល​សិទ្ធិ​មនុស្ស​កម្ពុជា​មាន​ប្រសាសន៍ថា៖ «​នៅ​ពេល​ប្រើប្រាស់​ច្បាប់​ស្តីពី​របបសារព័ត៌មាន​ក្នុងការ​លុប​អាជ្ញាប័ណ្ណ​វិទ្យុវីអូឌី​ រដ្ឋាភិបាល​គួរថ្លឹងថ្លែង​ពីគោល​បំណង​នៃច្បាប់​ ដោយ​មិនត្រូវ​​ធ្វើ​ការ​សម្រេចចិត្ត​បិទ​វីអូឌីដោយ​មិន​ត្រឹម​ត្រូវ​​នោះ​ទេ ប៉ុន្តែ​គួរ​ដក​អត្ថបទ​ដែល​មាន​បញ្ហា​នោះ​ចេញ»។

លោកស្រី បានបន្ថែមថា៖ «​ប្រសិនបើ​រដ្ឋាភិបាល​អះអាងថា ដើម្បី​ការ​ពារសេរីភាព​សារព័ត៌មាន​នៅ​កម្ពុជា លិខិតសុំអភ័យទោស​ [ចេញដោយ​វីអូឌី] គួរ​តែ​គ្រប់គ្រាន់​ ដោយ​មិន​ចាំ​បាច់ធ្វើ​ឲ្យ​ប៉ះពាល់​ដល់​វិស័យព័ត៌មាន​ដែល​កំពុងតែ​យ៉ាប់​យ៉ឺន​ស្រាប់ទៅហើយ​នោះទេ»។

លោក Ned Price ជា​អ្នក​នាំពាក្យ​ក្រសួង​ការបរទេស​សហរដ្ឋអាមេរិក​បាន​ចូល​រួម​នៅក្នុងចំណោម​សង្គម​ស៊ីវិល​និង​ស្ថានទូត​បរទេស​ដោយ​លោក​បាន​លើក​ឡើង​កាល​ពីថ្ងៃអង្គារ​ថា សហរដ្ឋអាមេរិក​មាន «​កង្វល់ខ្លាំង» ជុំវិញ​ការ​បិទ​វិទ្យុ​វីអូឌី​។​

លោកស្រី Stephanie Arzate អ្នក​នាំពាក្យ​ស្ថានទូត​អាមេរិក​បាន​ប្រាប់​ខេមបូចា​តាម​អ៊ីម៉េល​ថា សហរដ្ឋអាមេរិក​បាន​គាំទ្រ​វីអូឌី «​តាម​រយៈការ​បណ្តុះបណ្តាល​និង​សកម្មភាពកសាង​សមត្ថភាព»។

លោក​ Price បាន​និយាយថា៖ «​ការ​សម្រេចចិត្ត [ បិទ​វីអូឌី] គឺពិតជា​រំខាន​ចិត្ត​ដោយ​សារតែ​ផលប៉ះពាល់​នឹង​កើត​មាន​ចំពោះ​សេរីភាព​នៃការ​បញ្ចេញមតិ​និង​ចំពោះ​សិទ្ធិ​នៃការ​ទទួល​បាន​ព័ត៌មាន​នៅ​មុន​ការ​បោះ​ឆ្នោត​ក្នុងខែ​កក្កដា​»។

លោកបាន​បន្ថែមថា៖ «យើងទទូច​ឲ្យ​អាជ្ញាធរកម្ពុជា​កែប្រែ​ការ​សម្រេចចិត្ត​នេះ»

637 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម