សេវាសាធារណៈនៅតែជាបញ្ហាស្មុគស្មាញសម្រាប់ពលរដ្ឋក្នុងការស្នើសុំលិខិតផ្សេងៗ

តារាងតម្លៃសម្រាប់ផ្តល់សេវារដ្ឋបាល ដែលប្រកាសដោយអន្តរក្រសួង បិទផ្សព្វផ្សាយនៅក្នុងសង្កាត់ស្វាយដង្គំ ក្រុងសៀមរាប។ រូបភាពថត កាលពីខែសីហា ឆ្នាំ ២០២១។ នង ម៉ៃចរីយា
តារាងតម្លៃសម្រាប់ផ្តល់សេវារដ្ឋបាល ដែលប្រកាសដោយអន្តរក្រសួង បិទផ្សព្វផ្សាយនៅក្នុងសង្កាត់ស្វាយដង្គំ ក្រុងសៀមរាប។ រូបភាពថត កាលពីខែសីហា ឆ្នាំ ២០២១។ នង ម៉ៃចរីយា

សៀមរាប៖ ប្រជាពលរដ្ឋខេត្តសៀមរាប នៅតែមានក្តី​បារម្ភ ពេលស្នើសុំធ្វើលិខិតឯកសារមួយចំនួន ដោយប្រើប្រាស់សេវាសាធារណៈ ​មានភាពស្មុគស្មាញ និងភាពយឺតយ៉ាវ បើសិនមិនបង់ប្រាក់​បន្ថែម​លើតម្លៃកំណត់ ឬត្រូវចំណាយលើសេវារត់ការឱ្យជួយ​ជំនួស​វិញ។

អ្នកស្រី មុំ ដែលជាពលរដ្ឋរស់នៅក្នុងក្រុងសៀមរាបបានរៀបរាប់ថា អ្នកស្រីតែងតែ​ឱ្យថវិកា​គេបន្ថែម ឬរកអ្នករត់ការ​​ជំនួស ស្ទើរគ្រប់ពេលដែលត្រូវការឯកសារ ឬលិខិតអ្វីមួយ។ កាលខែមីនា ឆ្នាំ២០១៨ ពេលអ្នកស្រីខ្វះថវិកា ត្រូវលក់ដីជាបន្ទាន់នៅក្នុងក្រុងសៀបរាបតម្លៃ៣៥.០០០ ដុល្លារ ដោយត្រូវផ្ទេរឈ្មោះ​ឱ្យអ្នកទិញ។ អ្នកស្រីត្រូវយកលុយដែលគេកក់ មកចំណាយលើថ្លៃរត់ការ ៨២០ដុល្លារ និងថ្លៃ​ឯកសាររដ្ឋបាល​អស់២.៤៥០ដុល្លារ ដោយរង់ចាំរយៈពេល១ខែកន្លះទើបរួច ហើយអស់ថ្លៃ​កម្រៃជើងសារ​ផ្សេងទៀត។

អ្នកស្រី មុំ បានថ្លែងថា៖ «យើងត្រូវការលក់ដី យើងត្រូវការលុយត្រូវការអីដើម្បីដោះស្រាយបញ្ហាផ្សេងៗ នៅពេលដែល​យើងទៅរកសេវា​គាត់មិនមែនបានដូចចិត្ត ទៅដល់សេវាគាត់ពន្យារយូរ យើងមិនមែនថានេះណា សុទ្ធតែរាប់ខែ ចូលដល់ឆ្នាំទៀតទំរាំប្លង់ចេញ»។

ជាជម្រើសចុងក្រោយ អ្នកស្រីត្រូវពឹងអ្នករត់ការឱ្យជួយ ទោះមិនសូវមានថវិកានិងស្តាយលុយ ហើយដឹងថា នោះជា​អំពើពុករលួយ តែដោយសារត្រូវស្នើសុំច្រើនកន្លែង ហើយពិបាកធ្វើដោយខ្លួនឯង។

អ្នកស្រី មុំ បន្ថែមថា៖ «យើងចង់ទៅពឹងពាក់ធ្វើអ្វីពីអាជ្ញាធរមួយ យើងត្រូវប្រើលុយ អត់មានទៅដោយ​សមត្ថភាព​ខ្លួន​យើង​បានងាយស្រួល ទៅសមត្ថភាពខ្លួនយើងបាន ប៉ុន្តែការងារគឺវាអត់ងាយស្រួល គេអត់ផ្តល់ការងាយស្រួល​ដល់យើង ទៅដល់អត់បានភ្លាមអីអត់ទេ គឺយើងត្រូវអង្គុយរង់ចាំ គេពន្យារពេលឱ្យយើងគេទុក​ឯកសារ​យើង​ចោល និយាយទៅគេមិនរវីរវល់»។

ចំណែកពលរដ្ឋម្នាក់ទៀត ជាអ្នកលក់ខោអាវជជុសក្នុងសង្កាត់ស្វាយដង្គំ ក្រុងសៀមរាម អ្នកស្រី ដាវី ក៏មានបទពិសោធន៍មិនខុសគ្នាប៉ុន្មានដែរ ដោយសារអ្នកស្រីមិនដឹងទៅរកមន្ត្រីណា ពេលទៅដល់កន្លែង និងមិនសូវយល់ពីនិតិវិធី ។ អ្នកស្រីស្គាល់មន្ត្រីមូលដ្ឋានមួយចំនួន និងតែងតែពឹងពាក់ ដើម្បីឱ្យបានឯកសារ ហើយគេយកមកប្រគល់ជូនដល់កន្លែង។ កាលពីពីរឆ្នាំមុន អ្នកស្រីត្រូវធ្វើសៀវភៅគ្រួសារ គាត់បាន​ជូនថវិកា​ទៅមន្ត្រី​ដោយចាត់ទុកជាសាគុណ និងថ្លៃសាំងប្រហែល៣ម៉ឺនរៀល នៅពេលគេយកឯកសារមកឱ្យដល់កន្លែង។

អ្នកស្រី វី និយាយថា៖ «គេអត់ទារលុយយើងទេ គ្រាន់តែទឹកចិត្តរបស់យើងគេមិនទារអីយើងទេ សំខាន់របស់ដែលយើង​ត្រូវការអីមួយយើងចង់យករហ័ស គេមានកំណត់ឱ្យយើងចាំ  កន្លះខែមួយខែ។ បើយើងចង់ត្រូវការឡើង គឺទឹកចិត្ត​របស់យើង​ឱ្យគេលឿនទៅ ក៏គេអញ្ចឹងទៅណា វាអញ្ចឹងឯង ឱ្យតែយើងត្រូវការ»។

ជំនួយការរដ្ឋបាលសង្កាត់ស្វាយដង្គំ ក្រុងសៀមរាប លោក លឹម សារី បានមានប្រសាសន៍ថា នៅក្នុងសង្កាត់​នេះ​មានប្រជាពលរដ្ឋចំនួន១២,១២១គ្រួសារ។ ប្រជាពលរដ្ឋភាគច្រើនស្នើសុំធ្វើលិខិតអត្រានុកូលដ្ឋាន ដោយធ្វើតាម​ពេលវេលា និងតម្លៃដែលត្រូវបង់តាមសេវាដែលបានកំណត់នៅលើតារាង។ លោកថាការស្នើឯកសារខ្លះហួស ពីដែនសមត្ថកិច្ចរបស់សង្កាត់ ដែលតម្រូវទៅធ្វើនៅកន្លែងផ្សេង។

លោកថា កន្លងមកមានប្រជាពលរដ្ឋមួយចំនួនដែលចង់បានសេវារហ័ស ពួកគាត់មាន​បំណង​ផ្តល់ថវិកា​ខ្លះ​ដល់មន្ត្រី ប៉ុន្តែពួកគេបដិសេធ ព្រោះ​មន្ត្រីទាំងអស់​បានទទួលការណែនាំ​ពីថ្នាក់ជាតិមិនឲ្យ​យកថវិកា​បន្ថែម​នោះ​ទេ។

លោក  សារី មានប្រសាសន៍ថា៖ «ប្រជាពលរដ្ឋមួយចំនួនចេះតែថាឃុំសង្កាត់ពុករលួយៗ ពេលខ្ញុំមកនៅទីនេះ​ដូចជា​គ្មានអ្វី​រលួយ ឬពុកតាមពាក្យគេថាទេ»។ ដោយលោកបន្ថែមថា៖ «ហើយមតិមួយចំនួនចេះតែរិះគន់ថា ឃុំសង្កាត់ពុករលួយ មើលទៅមិនដឹង​រលួយពុក​ឯណា អត់មានតម្រូវថាស៊ីញ៉េអានេះសុំ១ម៉ឺន សុំពីរម៉ឺន សុំបីម៉ឺន[រៀល] អត់ដែរ​ សូម្បីតែចៅសង្កាត់​ក៏មិនដែលទារអីទេ អត់ក៏អត់ចុះ»។

លោក ហ៊ី សាយ ​ប្រធាន​មន្ទីរ​រៀបចំ​ដែនដី​ នគរូបនីយកម្ម ​សំណង់ ​និង​សុរិយោដី​ខេត្តសៀមរាប បានបដិសេធការចោទប្រកាន់របស់ប្រជាពលរដ្ឋដែលបានលើកឡើងថា មានមន្ត្រីមួយចំនួនយកលុយបន្ថែមជាថ្នូរនឹងការរត់ឯកសារឲ្យបានលឿន។

លោក ហ៊ី សាយ មានប្រសាសន៍ថា៖​ «អត់មានបញ្ហាដូចពួកគាត់មានប្រសាសន៍អញ្ចឹងទេ»។

ទោះជាយ៉ាងណា លោកបានទទួលស្គាល់ថា ការផ្តល់សេវានៅមានការយឺតយ៉ាវខ្លះពាក់ព័ន្ធនឹងឯកសារមិនគ្រប់គាន់។

លោកមានប្រសាសន៍ថា៖​«ជួនកាលមានការយឺតយ៉ាវខ្លះដែរ ដោយសារពេលយកមកខ្វះឯកសារមួយចំនួន ឬក៏អាចយឺតដោយប្រការណាមួយផ្សេងទៀត។ តែបើកយឺតយ៉ាវបណ្តាលមកពីថវិកា គឺមិនអាចបណ្តាលមកពីផ្នែកនឹងទេ ព្រោះគាត់បានបង់ថវិកានៅច្រកចេញចូលតែមួយរបស់ខេត្តរួចហើយ»។

លោក ហ៊ី សាយ លើកទឹកចិត្តឲ្យប្រជាពលរដ្ឋទៅរកសេវាច្រកចេញចូលតែមួយនៅសាលាខេត្តសៀមរាប ព្រោះនៅទីនោះមានផ្តល់គ្រប់សេវា និងមានកំណត់តម្លៃច្បាស់លាស់។

លោក មានប្រសាសន៍បន្ថែមថា៖ «ខ្ញុំសូមឲ្យប្រជាពលរដ្ឋនៅពេលដែលគាត់ចង់បានសេវាសុរិយោដី សូមឲ្យគាត់ទៅច្រកចេញចូលតែមួយនៅសាលាខេត្ត ក្នុងនោះគេកំណត់ថាគាត់ត្រូវបង់ប៉ុន្មាន គាត់បង់តែប៉ុណ្ណឹងទេ»។

ការិយាល័យច្រកចេញចូលតែមួយ នៅក្នុងក្រុងសៀបរាប។ រូបភាពថត កាលពីខែសីហា ឆ្នាំ ២០២១។ នង ម៉ៃចរីយា

លោក​ ប៉ិច​ ពិសី​ នាយកប្រតិបត្តិនៃអង្គការតម្លាភាពកម្ពុជាមានប្រសាសន៍ថា បទពិសោធន៍​ដែលប្រជាពលរដ្ឋ​លើកឡើង គឺដូចការស្រាវជ្រាវដែលបានរកឃើញថា អំពើពុករលួយ និងការសូកប៉ាន់គឺនៅតែជាបញ្ហាធំ។ 

លោក ប៉ិច​ ពិសី​ មានប្រសាសន៍ថា៖ «សេវាអត់គិតលុយ គាត់បំពេញការងារអត់មានប្រសិទ្ធភាពទេ អញ្ចឹងពលរដ្ឋណា​ដែលគាត់ចង់​ឱ្យ​ឯកសារ​ណា​ គាត់រត់បានលឿន គាត់មានតែប្រើលុយ។ គាត់ឱ្យលុយគេទៅដើម្បីឱ្យគេធ្វើលឿន បានន័យថា​កំសោយភាព​នៃការផ្តល់សេវាសាធារណៈជាមូលហេតុមួយ ហើយមួយទៀត​គឺដោយសារ​មិនមានការ​ដាក់ទោសទណ្ឌ​ពីអ្នកអនុវត្តច្បាប់»។

ចំណែក លោក ស្រឿន ជាប្រជាពលរដ្ឋរស់នៅក្នុងក្រុងសៀមរាបដែរនោះបានឲ្យដឹងថា លោកត្រូវចំណាយលុយ​បន្ថែមទៅមន្ត្រីមូលដ្ឋាន​ដើម្បីឱ្យជួយក្នុង​ការធ្វើឯកសារ ចុះវាស់វែងសម្រាប់ធ្វើប្លង់ដី​កម្មសិទ្ធិ​​ កាលពីខែកក្កដា ឆ្នាំ២០២១។ លោកថា​ រដ្ឋមិនតម្រូវឱ្យបង់ថវិកាទេ តែព័ត៌មាននេះលោកបានដឹង​យឺតពេលបន្តិច​​។ លោកតម្រូវឲ្យបង់៣០០ដុល្លារ សម្រាប់តែការចុះវាស់ប៉ុណ្ណោះ តែលោកស្នើសុំចុះថ្លៃ ​ដោយ​បង់ចំនួន២០០ដុល្លារអាមេរិក ។ ក្រៅពីនោះ លោកត្រូវបន្តរត់ការដោយខ្លួនឯង​ ដោយសារមិនចង់ចំណាយ​បន្ថែម​ទៀត ប៉ុន្តែលោកបានជួបបញ្ហា​ស្មុគស្មាញ​ជាច្រើន​ដោយមិនសូវយល់ ហើយ​មន្ត្រីពាក់ព័ន្ធ​មិនបាន​បញ្ជាក់​​ឱ្យ​ដឹងជាមុនថាត្រូវការឯកសារអ្វីខ្លះ។

លោក ស្រឿន បាននិយាយថា៖ «ពិបាក ដល់អ្នកក្រោមគេធ្វើរៀបចំអស់ហើយ ដល់អ្នកលើដូចជាអត់មើល ដូចប្រធានភូមិឃុំគេស៊ីញ៉េ គេសរសេរឈ្មោះវៃត្រាតាមត្រឹមត្រូវ ដូចថាយើងទិញពីអ្នកឈ្មោះអី ហើយគេកត់ទាំ​ងលេខអត្តសញ្ញាណបណ្ណ ភូមិកំណើត រៀបរាប់អស់ហើយ គេដឹងថាភូមិនេះអ្នកទទួលស្គាល់ដឹងលឺ ដល់ពេល​យើង​យក​មកសុរិយោដី ដូចគេអត់ទទួលស្គាល់ម៉េច»។  ដោយលោកបន្ថែមថា៖​ «មូលហេតុ​ប្រហែល​យើងមិនបាន​​ឱ្យលុយ​គេ​មើលទៅ បានគេចេះតែដេញឱ្យយើងរកម្តងនេះម្តងនោះរករហូត ។ គេឱ្យយើង​រកមួយចំនុច ពេលយើង​រកបានគេឱ្យទៅរកមួយចំនុចទៀត ពេលបានគេប្រាប់ឱ្យរកមួយចំនុចទៀត»។

លោក ស្រឿន បានប្រាប់ពីបញ្ហាមួយករណីទៀត គឺនៅពេលដែលលោកស្នើសុំ​លិខិតផ្ទេរទីលំ​នៅពីខេត្ត​ដែលលោកធ្លាប់​​រស់​នៅពីមុនមកទីលំនៅបច្ចុប្បន្ន ក្នុងខែឧសភា ឆ្នាំ២០២០។  នៅក្នុងប៉ុស្តិ៍នគរបាលរដ្ឋបាល លោកត្រូវបង់ប្រាក់ជូនសាគុណឱ្យមន្ត្រីចំនួនបួនម៉ឺនរៀលពេលទៅទទួល និងរង់ចាំប្រហែល២អាទិត្យ ដោយសារ​ពេលលោកស្នើសុំធ្វើដំបូង មន្ត្រីថាអស់លិខិតសម្រាប់ធ្វើហើយ ។

លោក ស្រឿន និយាយថា៖​ « គេប្រាប់ខ្ញុំថា បើខ្ញុំចង់បានសៀវភៅផ្ទេរការស្នាក់នៅហ្នឹង ឥឡូវហ្នឹង​អត់មានទេ​អស់ហើយ។ បើខ្ញុំចង់បានទាល់តែខ្ញុំឱ្យ ឱ្យខ្ញុំពឹងឱ្យគេរកឱ្យ [ ] ធម្មតាបើគេនិយាយអញ្ជឹងហើយ ​បានន័យថា​មានតែ​ពឹងគេ​ហ្នឹងហើយ។ យើងមិនពឹងគេម៉េច បើគេអាជ្ងាធរដែនដីកន្លែងយើងរស់នៅហើយ បើយើងមិនពឹង​គេ​យើង​ទៅពឹង​អ្នកណា»។

លោក លឹម សារី បានមានប្រសាសន៍ថា អាជ្ញាធរមូលដ្ឋានតែងតែផ្សព្វផ្សាយពីសេវាសាធារណៈ តាមរយៈវិទ្យុ ទូរទស្សន៍ បណ្តាញសង្គមហ្វេសប៊ុក និងជាពិសេសបិទនៅលើក្តារព័ត៌មាន។ ប៉ុន្តែលោកថា ពេលខ្លះ​ប្រជាពលរដ្ឋ​ហាក់ពុំចាប់អារម្មណ៍។

លោក  សារី មានប្រសាសន៍ថា៖ «តាមសង្កេតគាត់មិនសូវស្តាប់ការផ្សព្វផ្សាយរបស់យើង ដូចព័ត៌មាន​ក្នុងទូរទស្សន៍ គាត់អត់សូវស្តាប់ ជួនកាលរំលងទៅ អត់សូវយកចិត្តទុកដាក់ទេ ដល់ពេល​ត្រូវការ​បាន​គាត់មក។ ដូចថា​សុរិយោដី​គាត់ត្រូវការឱ្យធ្វើអាពាហ៍ពិពាហ៍ ចុះអេតាស៊ីវិលបានគាត់មក ដល់ពេលយើង​ផ្សព្វផ្សាយតាមវិទ្យុ ឬក៏ទូរទស្សន៍ តាមហ្វេសប៊ុក ជួនកាលគាត់ក៏មើលខ្លះក៏អត់»។

ចំណែក លោក ប៉ិច​ ពិសី មានប្រសាសន៍បន្ថែមថា​ យុទ្ធសាស្ត្រប្រឆាំង​អំពើពុករលួយ​មានច្រើនចំនុច ដែលត្រូវអនុវត្តរួមមាន អប់រំផ្សព្វផ្សាយ​ដល់មន្ត្រី ប្រជាពលរដ្ឋ និងអនុវត្តច្បាប់ឱ្យតឹងរ៉ឹងចំពោះអ្នកប្រព្រឹត្តខុស។ លោកថា កត្តាមួយទៀត​ គឺកើតចេញពី​ប្រជាពលរដ្ឋ​បង់ប្រាក់ក្រៅ​បន្ថែម។ ដូច្នេះ ពលរដ្ឋត្រូវចូលរួមតស៊ូមតិ ដើម្បីឱ្យ​សេវាកម្ម​អាចមានតម្លាភាព និងឈប់បង់ប្រាក់​ក្រៅប្រព័ន្ធ។

លោក​ ប៉ិច ពិសី មានប្រសាសន៍ថា៖ «ទាល់តែយើងទៅយកសេវាកុំទម្លាប់ឱ្យលុយគេ។  ប្រជាពលរដ្ឋក៏មានការចូលរួម​ចំណែក​ក្នុងការជំរុញសូកប៉ាន់ដែរ អ្នកខ្លះគាត់មានលុយទៅគាត់អត់សុខចាំ ជួនកាលមន្ត្រីរាជការហ្នឹងគាត់អត់ទារ​លុយ​ទេ តែយើងទម្លាប់ឱ្យគាត់ ទម្លាប់ឱ្យ១ម៉ឺន[រៀល] ២ម៉ឺន[រៀល] លុយទឹកតែ គិតថាអាហ្នឹងតែមួយទេ»។ ដោយបន្ថែមថា៖ «ហើយមន្ត្រីរាជការ​ ឥឡូវគាត់រាងពន្យា​ជាងមុនក្នុងការទារលុយដែរ ប៉ុន្តែបើសិនយើងឱ្យគាត់យក ដល់ពេលអញ្ចឹងបានន័យថា ជាទម្រង់ថ្មីមួយទៀត​ហើយ មានន័យថាគេត្រូវតែឱ្យហើយមិនបាច់ទារ »។

យោងតាមប្រកាសរបស់ក្រសួងមហាផ្ទៃ និង ក្រសួងសេដ្ឋកិច្ច និងហិរញ្ញវត្ថុ ចុះឆ្នាំ ២០១៦ ក្រុមប្រឹក្សា​រដ្ឋបាល​ថ្នាក់ក្រោមជាតិ​នីមួយៗ ត្រូវដាក់ចេញដីការកំណត់តម្លៃសេវារដ្ឋបាលជាក់ស្តែង សម្រាប់​ប្រតិបត្តិ​ដោយផ្អែកតាម​ស្ថានភាព និងជីវភាពរស់នៅរបស់ប្រជាពលរដ្ឋមូលដ្ឋាន​។ ពាក្យស្នើសុំ​សេវារដ្ឋបាល​សាធារណៈ និងត្រូវផ្តល់ជូនដោយមិនគិតថ្លៃ ហើយមិនឱ្យលើសពីតម្លៃអតិបរមា ដែលមានរាយលម្អិត​អំពីតម្លៃ​សេវាផ្សេងៗដែលមានចែងកំណត់តម្លៃជាក់លាក់ និងរយៈពេលអតិបរមាទៅតាមប្រភេទសេវានីមួយៗ​​ ដែលកំណត់នៅក្នុងតារាងឧបសម្ព័ន្ធភ្ជាប់ និងត្រូវបិទផ្សាយជាសាធារណៈ​លើក្តារ​ព័ត៌មាន​នៅតាមកន្លែង​ផ្តល់សេវា​ថ្នាក់រដ្ឋបាលនីមួយៗ​។

អ្នកនាង តាំង ជឿន ប្រធានក្រុមស្ម័គ្រចិត្តគណនេយ្យភាព​សហគមន៍ នៅក្នុងខេត្តសៀមរាប ​ដែលបច្ចុប្បន្ន ធ្វើការសម្រសម្រួល​ជាមួយមន្ត្រីមូលដ្ឋាននិងការផ្សព្វផ្សាយតាមតំបន់គោលដៅ លើសេវាសាធារណៈរួមាន សេវារដ្ឋបាលសាធារណៈភូមិឃុំ លិខិតអាត្រានុកូលដ្ឋាន មណ្ឌលសុខភាព និងសាលាបឋមសិក្សា។ អ្នកនាង បានលើកឡើងថា ប្រជាពលរដ្ឋ និងមន្ត្រីមូលដ្ឋាន​មានការយល់ដឹង​ប្រសើរច្រើនជាងមុន តែដំបូងៗ​មានការពិបាក និងការប្រកាន់ច្រើន​ពីមន្ត្រីមូលដ្ឋាន​ដោយគេចោទថា ជាអង្គការមកចាប់កំហុស។ អ្នកនាងថា មានសេវាមួយចំនួនទៀតគឺហួសពីដែននៃការផ្សព្វផ្សាយ ដូច្នេះពលរដ្ឋនៅមានចម្ងល់​ចង់ឱ្យមានការផ្សព្វផ្សាយបន្ថែមទៀត​ដែលជាតម្រូវការចំាបាច់ផងដែរ។

អ្នកនាង ជឿន មានប្រសាសន៍ថា៖ «គឺគាត់ទាមទារចង់ឱ្យយើងពង្រីកសេវា ទៅសេវាផ្សេងទៀត ដើម្បី​ឱ្យទទួលបាន​សេវាល្អទាំងអស់ដូចគ្នា» ដោយបន្ថែមថា៖ «ហើយទី១គាត់ចង់ឱ្យការផ្តល់សេវាវិស័យ​ទាំងអស់​ឱ្យមាន​ភាពរីកចំរើន​ដូចគ្នា ឱ្យគាត់យល់ពីគណនេយ្យភាពក្នុងសង្គមដូចគ្នា មិនថាសេវាមួយណាទេ ជាពិសេស គាត់ផ្តោតសំខាន់​លើ​​សេវាប៉ុស្តិ៍ប៉ូលិសហើយនឹងសេវា ដូចជាច្រកចេញចូលតែមួយ ហើយនិងសេវានៅសាលាអនុវិទ្យាល័យ​និងវិទ្យាល័យ។»

ព័ត៌មានសម្រាប់ប្រជាពលរដ្ឋ  ពីផែនការសកម្មភាពស្តីពីការងារគណនេយ្យភាពសង្គម ដាក់បង្ហាញនៅក្នុងសង្កាត់ស្វាយដង្គំ ក្រុងសៀមរាប។ រូបភាពថត កាលពីខែសីហា ឆ្នាំ ២០២១។ នង ម៉ៃចរីយា

លោក យក់ ប៊ុនណា រដ្ឋលេខាធិការក្រសួងមុខងារសាធារណៈ បានទទួលស្គាល់ថា អ្នកទទួលសេវា​ដែលឆ្លងមួយកន្លែង​ទៅមួយកន្លែង​មានការលំបាកខ្លះ ដោយសារការឆ្លងពីស្ថាប័ន​ពាក់ព័ន្ធ​មួយចំនួន​មិនទាន់មាន​ការសម្រប​សម្រួល​និតីវិធីផ្ទៃក្នុងឱ្យបានស៊ីសង្វាក់គ្នា។  លោកថា ការកែសម្រួលនិងការពិនិត្យ កំពុងដំណើរការជាបន្តបន្ទាប់ ដើម្បីកាត់បន្ថយភាពលំបាក និងចំណាយពេលវេលាច្រើនរបស់ប្រជាពលរដ្ឋ ។

លោក ប៊ុនណា​ មានប្រសាសន៍ថា ៖ «ការជំរុញដែលយើងបានអនុវត្ត​ហើយ​ ដូចជាការិយាល័យច្រកចេញ​ចូលតែមួយ ការតម្រូវឱ្យមានការផ្សព្វផ្សាយព័ត៌មាននៅកន្លែងតាមកន្លែងផ្តល់សេវា ការប្រើប្រាស់យន្តការ​ប្រព័ន្ធអេឡិកត្រូនិច ឬផ្តល់ព័ត៌មានដល់ប្រជាពលរដ្ឋពីសេវា ការកាត់បន្ថយបែបបទនិតិវិធី និងជាកិច្ចការ​ដែលយើងកំពុងបន្តធ្វើ»។ ដោយលោកបន្ថែមថា៖ «ការផ្សារ​ភ្ជាប់​រវាង​អង្គភាព​ដែលពាក់ព័ន្ធ ដែលយើងហៅថា ការិយាល័យ​ចុងក្រោយ គឺតភ្ជាប់គ្នាក្នុងការពិនិត្យឯកសារ»។

លោកបន្តថា ពលរដ្ឋចង់ទទួលបានសេវាមានតំលៃថោក មានភាពងាយស្រួល និងមិនស្មុគស្មាញ។ លោកថាការប្រាស់ប្រព័ន្ធបច្ចេកវិទ្យាដែលរដ្ឋាភិបាលកំពុងជំរុញ និងរៀបចំដើម្បីជួយឱ្យបាន​សេវា​មាន​ភាពប្រសើរឡើង។

លោក ប៊ុន ណា​ បានថ្លែងថា ៖ «ខ្ញុំសង្ឃឹមថា ទៅថ្ងៃមុខ​នៅពេលយើ​ង​អាចប្រើប្រាស់ប្រព័ន្ធបច្ចេកវិទ្យា ជាជំនួយយើងអាច​និងជួយជំរុញគុណភាព​នៃសេវាបាន​ប្រសើរ​ជាងមុន ហើយនិងក៏អាចដោះស្រាយបញ្ហារឿងការបង់ប្រាក់ដែលអាចថាមានភាពមិនប្រក្រតី មានអ្នករត់ការ ឬមួយក៏ថាមានភាពស្មុគស្មាញច្រើន»។

រដ្ឋាភិបាលកម្ពុជា បានដាក់អនុវត្តសាកល្បងនូវប្រព័ន្ធរដ្ឋាបាលថ្មី ក្នុងឆ្នាំ២០០៣ ដោយមានជំនួយហិរញ្ញវត្ថុ​ពីអង្គការ​ក្រៅ​រដ្ឋាភិបាល​មួយចំនួន ។​​ គម្រោងអនុវត្តពីឆ្នាំ២០០៤ ​លទ្ធផលនៃការសិក្សាបានបង្ហាញថា ការិយាល័យ​​ច្រកចេញចូលតែមួយ និងការិយាល័យប្រជាពលរដ្ឋ បានទទួលការគាំទ្រ ​និងពេញចិត្ត​យ៉ាងច្រើន លើសលប់​ពីសំណាក់ប្រជាពលរដ្ឋ។ អាជ្ងាធរមូលដ្ឋាន និងភាគីនានា គាំទ្រផ្នែកគោលនយោបាយ​និងបច្ចេកទេស។

លោកនាយករដ្ឋមន្ត្រី ហ៊ុន សែន បានថ្លែងរំលឹកមន្ត្រីថ្នាក់ជាតិ និងមូលដ្ឋាន កាលពីខែកុម្ភៈ ឆ្នាំ២០២០ថា ពួគេគឺជាអ្នកបំរើប្រជាពលរដ្ឋ មិនមែនជាចៅហ្វាយទេ និងគំរាមធ្វើការដកតំណែងដល់មន្ត្រីណាដែលរកឃើញថាមានកំហុស ប្រព្រឹត្តិអំពើពុករលួយ ចរិតឆ្មើងឆ្មៃ ប្រមាថ និងមិនស្មោះត្រង់ចំពោះពលរដ្ឋ។

លោក ហ៊ុន សែន មានប្រសាសន៍ថា ៖«រឿងនេះជារឿងដែលខ្ញុំត្រូវធ្វើការវះកាត់ហើយ សូមផ្តាំផ្ញើរថាមិនឱ្យទេ ឃើញហើយ​ខ្ញុំដាក់​ហើយ។ ខ្ញុំបាននិយាយនៅក្រសួងមហាផ្ទៃការកាលពីប៉ុន្មានថ្ងៃមុន បើចៅហ្វាយខេត្តខ្ញុំ​ត្រូវការ​បីម៉ោង អនុខេត្តឬចៅហ្វាយស្រុកខ្ញុំត្រូវការ១៥នាទី សំរាប់ការដកចេញពីតំណែងនោះ។ អញ្ចឹងទេ​កុំឱ្យមានឱ្យសោះ សម័យនេះសម័យហ្វេសប៊ុកព័ត៌មានលឿនណាស់»។

ច្បាប់ប្រឆាំងអំពើពុករលួយនៅកម្ពុជាបានអនុម័ត ក្នុងខែមីនាឆ្នាំ២០១០។ មាត្រា៣២ នៃបទល្មើស​ពុករលួយ​មានបញ្ញត្ត​នៅក្នុងក្រមព្រហ្មទណ្ឌ​តាមមាត្រាផ្សេងៗនៃច្បាប់ព្រហ្មទណ្ឌមាត្រា២៨៩ បទស៊ីសំណូករបស់អភិបាល ជាអាទិ៍ បទរំលោភលើទំនុកចិត្ត ពិសេសដោយអភិបាល​ឬ​បុគ្គលផ្សេងទៀត ក្នុងគោលបំណង​ទទួល​ផលប្រយោជន៍​ដល់ខ្លួន ត្រូវផ្តន្ទាទោសដាក់ពន្ធនាគារពី ពីរឆ្នាំទៅប្រាំឆ្នាំ និងពិន័យជាប្រាក់ពី បួនលាន ទៅ១០លានរៀល​។ ការប៉ុនប៉ងប្រព្រឹត្តបទល្មើសដែលបានកំណត់ក្នុងកថាខណ្ឌទី១និងទី២នៃមាត្រា ៣៩៣ត្រូវផ្តន្ទាទោសដូចគ្នា។

អ្នកស្រីមុំ សំណូមពរដល់អាជ្ងាធរមូលដ្ឋានយ៉ាងដូច្នេះថា ៖ «ចង់ឱ្យខាងអាជ្ញាធរ​ផ្តល់ការ​ងាយស្រួល​ឱ្យ​ប្រជាជន មិនថាសេវាផ្ទេរប្លង់ដី សេវាគ្រប់កន្លែងទាំងអស់ គឺឱ្យងាយស្រួល! ទៅដល់ដូចថា​ ខ្នះខ្នែងជួយ​ប្រជាពលរដ្ឋ ធ្វើឱ្យលឿនៗឱ្យ កុំឱ្យទុកពន្យាពេល»។ ដោយបន្ថែមថា៖​ «ពេលប្រជាពលរដ្ឋឱ្យលុយទើបបានខ្នះខ្នែងធ្វើឡើង បើសិនតែអត់ឱ្យលុយទេ គឺទុកពន្យាពេលនៅហ្នឹង។ អ្នកដែលឱ្យលុយទៅគឺបានសេវារហ័ស អ្នកដែលអត់លុយ គឺទុកគ្នា​ចោលនៅហ្នឹង និយាយទៅឡើងចុះៗ ធ្វើទៅយកមួយកន្លែងៗវាមិនងាយស្រួល»៕

553 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »