សាលាដំបូងខេត្តរតនគិរី នឹងប្រកាសសាលក្រមនៅថ្ងៃទី១៥ ខែមករា លើសំណុំរឿង លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា និងសហការី២នាក់ពីបទ«រួមគំនិតក្បត់ និងញុះញង់» ក្រោយការជំនុំជម្រះចប់នៅល្ងាចថ្ងៃទី៨ ខែមករា ឆ្នាំ២០២៣ យោងអ្នកនាំពាក្យតុលាការ។
លោក ថេង សាវឿន និងសហការី២នាក់ទៀត គឺលោក ថាន់ ហាច មន្ត្រីសម្របសម្រួលសហគមន៍ និងលោក ញ៉ិល ភាព មន្ត្រីជាន់ខ្ពស់នៃសមាគម ត្រូវបានចោទប្រកាន់ពីបទ«រួមគំនិតក្បត់ និងញុះញង់» ដោយយោងតាមបញ្ញត្តិមាត្រា៤៥៣ និង៤៩៥ នៃក្រមព្រហ្មទណ្ឌ។
ពួកគេត្រូវបានឃាត់ខ្លួនកាលពីពាក់កណ្តាលខែឧសភា ឆ្នាំ២០២៣ បន្ទាប់ពីលោក និងក្រុមការងារលោកបានបញ្ចប់វគ្គបណ្តុះបណ្តាលពង្រឹងសមត្ថភាពបុគ្គលិកសមាគមដែលរៀបចំឡើងនៅខេត្តរតនគិរី ជាទីដែលអាជ្ញាធរមូលដ្ឋាននៅទីនោះ សង្ស័យថា សមាគមលោក ថេង សាវឿន បានលួចប្រជុំស្កាត់ៗក្នុងសណ្ឋាគារមួយក្នុងក្រុងបានលុង ហើយមានផែនការធ្វើបដិវត្តន៍កសិករ។
លោក កែវ ភក្ដី ព្រះរាជអាជ្ញារង និងអ្នកនាំពាក្យសាលាដំបូងខេត្ដរតនគីរី បានថ្លែងនៅព្រឹកថ្ងៃទី៩ ខែមករានេះថា តុលាការនឹងប្រកាសសាលក្រមថា លោក ថេង សាវឿន និងសហការី២នាក់ គឺលោក ញ៉ិល ភាព និងលោក ថាន់ ហាច នៅថ្ងៃទី១៥ ខែមករា ខាងមុខនេះ ថាគួរមានទោស ឬយ៉ាងណា។ លោកបន្ដថា ការសម្រេចបែបណានោះ វាជាការសម្រេចរបស់តុលាការ។
លោកបន្ដថា៖ «បាទបង តុលាការគេនឹងប្រកាសសាលក្រមនៅទី១៥នេះបង ថាគាត់មានទោស ឬយ៉ាងណាបង។ វាគឺជាឆន្ទានុសិទ្ធិរបស់ចៅក្រម»។
ជុំវិញរឿងនេះដែរ លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា បាន ថ្លែងប្រាប់ ខេមបូចា ភ្លាមៗក្រោយពីលោកចេញពីតុលាការថា ក្រោយពីតុលាការសួររូបលោកអស់ជារយៈពេលជិត២ម៉ោង លោកថា លោកហាក់មានសង្ឃឹមលើការសម្រេចរបស់តុលាការនៅថ្ងៃខាងមុខអាចនឹងទម្លាក់បទចោទប្រកាន់ផ្សេងៗលើរូបលោក និងសហការី២នាក់ផ្សេងទៀត។
លោកបន្ដថា៖ «ខ្ញុំទើបចេញមុនហ្នឹង ហើយខ្ញុំសង្ឃឹមថាការប្រកាសសាលក្រមថ្ងៃទី១៥ខាងមុខនឹងទម្លាក់បទចោទទាំងអស់លើពួកខ្ញុំ»។
លោក សាវឿន បន្ថែមថា តែទោះជាយ៉ាងណា តំណាងអយ្យការក៏បានស្នើសុំអង្គជំនុំជម្រះឱ្យពិចារណាផងដែរទៅលើទោស និងស្នើឱ្យចៅក្រមជំនុំជម្រះបន្ធូរបន្ថយទោសសម្រាប់ពួកគាត់ទាំងបីផងដែរ ដោយតំណាងអយ្យការមើលឃើញថា ពួកគាត់ទាំងបី កំឡុងពេលដាក់ឱ្យនៅក្រៅឃុំ និងស្ថិតក្រោមការត្រួតពិនិត្យរបស់ព្រះរាជអាជ្ញា ពួកគាត់បានអនុវត្តតាមវិធាន និងគោលការណ៍របស់អយ្យការបានយ៉ាងល្អប្រសើរហាក់មិនមានបញ្ហាណាមួយគួរឱ្យកត់សម្គាល់នោះឡើយ។
ចំណែកអ្នកស្រី សាម សុគន្ធា មេធាវីការពារក្ដីឱ្យជនជាប់ចោទទាំងបីនាក់ បានថ្លែងថា ក្រោយពីបញ្ចប់សវនាការនៅល្ងាចថ្ងៃចន្ទដោយអ្នកស្រីថា ករណីកូនក្ដីរបស់អ្នកស្រីហាក់មានភាពល្អប្រសើរច្រើន។ អ្នកស្រីបន្ដថា ក្នុងនាមជាមេធាវីសង្ឃឹមថា ការប្រកាសសាលក្រមថ្ងៃទី១៥ខាងមុខនៅឱ្យកូនក្ដីមានសេរីភាពឡើងវិញ ដោយទម្លាក់បទចោទទាំងអស់។
អ្នកស្រីមេធាវីបន្ដថា៖ «បានបញ្ចប់មុននេះបន្ដិច ខ្ញុំមិននិយាយបន្ថែមទេ គេនឹងប្រកាសសាលក្រមថ្ងៃ១៥ខាងមុននេះ។ ខ្ញុំសង្ឃឹមថាតុលាការនឹងទម្លាក់បទចោទទាំងអស់លើកូនក្ដីខ្ញុំ»។
នៅថ្ងៃទី១៨ ខែឧសភា ឆ្នាំ២០២៣លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា រួមទាំងក្រុមការងារសមាគមចំនួន១៦រូបទៀត ត្រូវបានសមត្ថកិច្ចនគរបាលខេត្តក្រចេះឃាត់ខ្លួន តាមការស្នើឱ្យឃាត់ខ្លួនពីខាងស្នងការនគរបាលខេត្តរតនគីរី។
យ៉ាងណាមិញ ការឃាត់ខ្លួននេះត្រូវបានអភិបាលខេត្តរតនគិរី លោក ញ៉ែម សំអឿន បញ្ជាក់ថា ដោយសារតែក្រុមលោក ថេង សាវឿន ចុះធ្វើសកម្មភាពការងារមានភាពមិនប្រក្រតីដែលគួរឱ្យសង្ស័យនៅខេត្តរតនគិរី ហើយ១៤រូបត្រូវបានដោះលែង ប៉ុន្ដែ៣រូបត្រូវបានបញ្ជូនទៅសាលាដំបូងខេត្ដរតនគីរី រួមមាន លោក ថេង សាវឿន លោក ញ៉ិល ភាព និងលោក ថាន់ ហាច ។
កាលពីថ្ងៃទី ២២ ខែឧសភា លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា(CCFC) និងសហការី២នាក់ទៀត ត្រូវបានតុលាការខេត្តរតនគិរី សម្រេចឱ្យនាំយកទៅឃុំខ្លួនក្នុងពន្ធនាគារខេត្តជាបណ្ដោះអាសន្ន ដោយចោទប្រកាន់ក្នុងម្នាក់ៗ២បទល្មើស។
សមាគមសម្ព័ន្ធសហគមន៍កសិករកម្ពុជា មានវគ្គសិក្ខាសាលាបណ្តុះបណ្តាលបុគ្គលិកពីថ្ងៃទី១៤ដល់ថ្ងៃទី១៧ ខែឧសភា នៅក្នុងខេត្តរតនគិរីមានអ្នកចូលរួម៣៩នាក់។ កម្មវិធីនេះបានបញ្ចប់ និងធ្វើដំណើរវិលត្រលប់ទៅភ្នំពេញវិញ ក៏ត្រូវសមត្ថកិច្ចខេត្តក្រចេះឃាត់រថយន្តក្រុងជិះរួមគ្នានេះនៅថ្ងៃទី១៧ ខែដដែល តាមសំណើរបស់សមត្ថកិច្ចខេត្តរតនគិរី។
តុលាការខេត្តរតនគិរីបានសម្រេចដោះលែង លោក ថេង សាវឿន និងសហការី របស់លោក ២នាក់ ឱ្យនៅក្រៅឃុំបណ្តោះអាសន្ន។ ក្រោយត្រូវបានដោះលែងនៅលើហ្វេសប៊ុករបស់ លោក ថេង សាវឿន មានការបង្ហោះសារថា«ការវិលត្រឡប់ទាំងដោយទំនួលខុសត្រូវ និងកាតព្វកិច្ចបន្ថែម»។
ការដោះលែងនេះធ្វើឡើងបន្ទាប់ពីប្រធានសមាគមសម្ព័ន្ធសហគមន៍កសិករកម្ពុជា(CCFC) លោក ថេង សាវឿន បានចេញសារជាលិខិត និងវីដេអូដ៏គួរឱ្យភ្ញាក់ផ្អើលប្រកាសទទួលស្គាល់ កំហុសក្នុងសំណុំរឿងចោទប្រកាន់ «បដិវត្តន៍កសិករ»។
បើតាមលោក អំ សំអាត នាយកចាត់ការទូទៅនៃអង្គការ លីកាដូ បានថ្លែងថា បើមើលជាក់ស្ដែងសកម្មភាពរបស់សមាគមលោក ថេង សាវឿន វាមិនមានបទល្មើសទេ ព្រោះជាសិទ្ធិទទួលបាននូវចំណេះ។ លោកថា ការចោទប្រកាន់របស់តុលាការខេត្ដរតនគីរីជារឿងមិនត្រឹមត្រូវ និងគ្មានអង្គហេតុច្បាស់លាស់ដើម្បីដាក់បន្ទុក។
លោកបន្ដថា តុលាការគួរទម្លាក់បទចោទទាំងអស់លើអង្គការសង្គមស៊ីវិល និងឈប់ប្រើរូបភាពគំរាមកំហែង បំផិតបំភ័យ ជាពិសេសេការយកប្រព័ន្ធតុលាការក្នុងការដាក់បន្ទុកដើម្បីឱ្យសង្គមស៊ីវិលផ្អាកសកម្មភាពរបស់ខ្លួន។
លោក សំអាត លើកឡើងថា៖ «ខ្ញុំគិតថាគួរដល់ពេលឈប់យកប្រព័ន្ធតុលាការដើម្បីគំរាមកំហែង និងធ្វើទុក្ខបុកម្នេញលើអង្គការសង្គមស៊ីវិលទៀតហើយ។ សង្ឃឹមថាតុលាការនឹងទម្លាក់បទចោទទាំងអស់លើCCFC[សមាគមសម្ព័ន្ធសហគមន៍កសិករកម្ពុជា]»៕