ថ្ងៃទីមួយនៃការជំនុំជម្រះក្តីតាមវេនជាក្រុមលើសំណុំរឿងដែលត្រូវបានបំបែកដាច់ដោយឡែកពីគ្នាសម្រាប់សកម្មជនជិត៤០នាក់ដែលត្រូវបានឃុំខ្លួនមុនការជំនុំជម្រះជាងមួយឆ្នាំ ពីបទញុះញង់ទាក់ទងនឹងការតវ៉ាប្រឆាំងនឹងកិច្ចព្រមព្រៀងអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម (CLV-DTA) បានចាប់ផ្តើមនៅថ្ងៃពុធ។
លោក ស្រ៊ុន ស្រ៊ន ជនជាប់ចោទទីមួយ ត្រូវបានចាប់ខ្លួននៅខែកក្កដាឆ្នាំមុន បន្ទាប់ពីបង្ហោះវីដេអូរិះគន់កិច្ចព្រមព្រៀង CLV-DTA ដែលក្រោយមករដ្ឋាភិបាលបានដកខ្លួនចេញពីកិច្ចព្រមព្រៀងនេះ។ ត្រូវបានបដិសេធការនៅក្រៅឃុំជាលើកទីពីរ លោក ស្រ៊ន បាននិយាយទាញហេតុផលពីករណីរបស់ខ្លួនជាងបីម៉ោងនៅសាលាដំបូងរាជធានីភ្នំពេញ។
ជនជាប់ចោទបីនាក់ផ្សេងទៀតដែលប្រឈមមុខនឹងបទចោទញុះញង់ដូចគ្នាគឺ ភឹង សោភា, លោក សាន សិទ្ធ និង ចក់ បានមុន្នី ស្ថិតក្នុងក្រុមទីមួយដែលត្រូវកាត់ក្តីជាមួយនឹងលោក ស្រ៊ុន ស្រ៊ន។ ពួកគេជាក្រុមដំបូងដែលត្រូវបានចែកជាប្រាំក្រុមសម្រាប់សវនាការក្នុងចំណោមសកម្មជនចំនួន៣៧នាក់ដែលត្រូវបានចាប់ខ្លួនបន្ទាប់ពីអាជ្ញាធរបង្ក្រាបការតវ៉ាកាលពីឆ្នាំមុន។
អង្គការសិទ្ធិមនុស្សបាននិយាយថា ការចាប់ខ្លួននេះ ដែលដំបូងឡើយបានធ្វើឡើងទៅលើមនុស្សជិត ១០០នាក់ រួមទាំងកុមារផងនោះ គឺជាការចាប់ខ្លួនដោយបំពាន និងខុសច្បាប់ ហើយបានអំពាវនាវឱ្យអាជ្ញាធរទម្លាក់ចោលបទចោទប្រកាន់ទាំងប្រឆាំងពួកគេ។
ជនជាប់ចោទភាគច្រើនប្រឈមមុខនឹងបទញុះញង់ដែលតែងតែត្រូវរិះគន់ថា ប្រើជាញឹកញាប់ដើម្បីគំរាមកំហែងអ្នករិះគន់ អ្នកមានមតិផ្ទុយ អ្នកសារព័ត៌មាន និងសកម្មជន។
ចៅក្រមជំនុំជម្រះក៏បានបដិសេធសំណើរសុំនៅក្រៅឃុំរបស់ជនជាប់ចោទ ១១នាក់ផ្សេងទៀតដោយមិនបានបញ្ជាក់មូលហេតុឡើយ។
មេធាវីការពារក្ដីឱ្យជនជាប់ចោទ លោក សឺន ជុំជួន បានសម្តែងការខកចិត្ត និងបាននិយាយថាកូនក្តីរបស់លោកជាច្រើនគ្រោងនឹងប្តឹងឧទ្ធរណ៍ ដែលនេះជាការតវ៉ាលើកទីពីរសម្រាប់ពួកគេភាគច្រើន។
នាយកប្រតិបត្តិមជ្ឈមណ្ឌលសិទ្ធិមនុស្សកម្ពុជា (CCHR) លោក សេង សុវឌ្ឍនា បានសម្តែងក្តីបារម្ភចំពោះវិធីសាស្ត្រជំនុំជម្រះជាក្រុមតាមវេន ដែលករណីចំនួនប្រាំត្រូវបានជំនុំជម្រះរួមគ្នាក្នុងពេលតែមួយ ជាជាងជំនុំជម្រះជាលក្ខណៈបុគ្គល។
លោកក៏បានរិះគន់ចំពោះការបដិសេធសំណើរសុំនៅក្រៅឃុំជាបន្តបន្ទាប់ ដោយហៅវាថាជាការព្រួយបារម្ភជាពិសេស ដោយសារសវនាការនេះត្រូវបានគេរំពឹងថានឹងអូសបន្លាយពេលយូរ។
លោក សុវឌ្ឍនា បានសង្កត់ធ្ងន់ថា យោងតាមច្បាប់ជាតិ ជនជាប់ចោទដែលប្រឈមមុខនឹងបទមជ្ឈិម មិនអាចត្រូវបានឃុំខ្លួនមុនការកាត់ទោសលើសពីប្រាំមួយខែទេ។ សកម្មជនដែលជាប់ឃុំទាំង ៣៧នាក់ បានចំណាយពេលយ៉ាងតិចពាក់កណ្តាលនៃទោសអតិបរមាសម្រាប់ការផ្តន្ទាទោសពីបទញុះញង់នៅក្នុងពន្ធនាគារ៕
ប្រែសម្រួលពីអត្ថបទភាសាអង់គ្លេស៖ Bail Denied as Staggered Trial Begins for Activists Jailed Over Blocked CLV-DTA Protest
