អ្នកសម្របសម្រួលឲ្យទូរទស្សន៍ RT ដែលទើបត្រូវបានដោះលែងពីពន្ធនាគារផ្តោតលើការជម្រះក្តីឡើងវិញ និងការជួបជុំគ្រួសារ

លោក រ៉ាត់ រត្នមុន្នី ជាអ្នកសម្របសម្រួលឲ្យបណ្តាញផ្សព្វផ្សាយបានរៀបរាប់អំពីពេលវេលារបស់លោកនៅក្នុងពន្ធនាគារក្នុងរាជធានីភ្នំពេញកាលពីថ្ងៃសៅរ៍ បន្ទាប់ពីលោកបានអនុវត្តទោសពីរឆ្នាំពីបទញុះញង់។ បញ្ញា ឆព័ណ្ណ
លោក រ៉ាត់ រត្នមុន្នី ជាអ្នកសម្របសម្រួលឲ្យបណ្តាញផ្សព្វផ្សាយបានរៀបរាប់អំពីពេលវេលារបស់លោកនៅក្នុងពន្ធនាគារក្នុងរាជធានីភ្នំពេញកាលពីថ្ងៃសៅរ៍ បន្ទាប់ពីលោកបានអនុវត្តទោសពីរឆ្នាំពីបទញុះញង់។ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

លោក រ៉ាត់ រត្នមុនី អង្គុយ​នៅ​ហាងកាហ្វេមួយ​ក្នុង​ក្រុងភ្នំពេញ​កាល​ពី​ចុងសប្តាហ៍​ដោយ​ពាក់​អាវខៀវ​​និង​ស្លៀក​ខោ​ប្រផេះ​ដោយ​បំភ្លេច​ចោល​សម្លៀកបំពាក់​អ្នក​ទោស​ពណ៌​ទឹក​ក្រូច​។ អ្នក​សម្របសម្រួល​និងជា​អ្នក​បកប្រែ​រូបនេះ​ត្រូវ​បាន​ដោះ​លែង​ពី​ពន្ធ​នាគារ​កាល​ពីថ្ងៃ​សុក្រ​សប្តាហ៍មុន។

បុរស​អាយុ​៤៩​ឆ្នាំ​រូបនេះត្រូវ​បាន​ចាប់ខ្លួន​និង​ផ្តន្ទា​ទោស​ដោយ​សាលាដំបូង​រាជធានីភ្នំពេញ​កាល​ពីឆ្នាំ​មុន​ដោយ​សារតែ​លោកបាន​ជួយ​ដល់​ការ​ផលិត​ភាព​យន្ត​ឯក​សារ​សម្រាប់​ទូរទស្សន៍​រុស្ស៊ី RT ដែល​ភាព​យន្តឯក​សារនេះនិយាយ​អំពី​ការ​ជួញដូរ​ផ្លូវ​ភេទ​នៅកម្ពុជា​។ លោក​ត្រូវ​បាន​ចោទ​ប្រកាន់​ពី​បទ​ញុះ​ញង់​និង​ត្រូវ​បាន​ផ្តន្ទា​ទោស​ឲ្យ​ជាប់​ពន្ធ​នាគារ​រយៈ​ពេល​ពីរ​ឆ្នាំ​។

លោក​សប្បាយ​រីករាយ​ដែល​បាន​ចាកចេញ​ពី​ពន្ធនាគារ​ ប៉ុន្តែ​លោកនៅ​តែ​បារម្ភ​អំពី​ការ​ក្លាយ​ជា​គោលដៅ​ ប្រសិនបើ​លោក​បន្ត​ការងារ​ចាស់​របស់​លោក​។

លោក រ៉ាត់ រត្នមុនី បាន​និយាយថា៖ «​ខ្ញុំ​សោក​ស្តាយ​ដែល​ខ្ញុំ​ត្រូវ​ជាប់​ពន្ធនាគារ​រយៈ​ពេល​ពីរ​ឆ្នាំ​ ដោយសារខ្ញុំ​ជា​អ្នក​សម្របសម្រួល​។ ខ្ញុំ​បារម្ភ​អំពី​សុវត្ថិភាព​របស់ខ្ញុំ​​ពីព្រោះ​សុវត្ថិភាព​របស់​ខ្ញុំនៅ​មិន​ទាន់​ច្បាស់​ ខណៈ​ពេល​ដែល​តុលា​ការ​​មិន​ទាន់​ជម្រះ​ក្តីឡើង​វិញ​នៅឡើយ​»

នៅឆ្នាំ​នេះ តុលាការកំពូល​បាន​បង្វែរ​សំណុំរឿង​របស់​លោក​មកជម្រះ​ជា​ថ្មី ដោយ​ជំទាស់​នឹង​សេចក្តី​សម្រេចរបស់​សាលាឧទ្ធរណ៍​ដែល​ថា ការផ្តន្ទា​ទោស​របស់​សាលាដំបូង​រាជធានីភ្នំពេញ​គឺ​ត្រឹម​ត្រូវ​តាម​ច្បាប់​។​ បើទោះបីជា​លោក រ័ត្ន​មុនី​ ត្រូវ​បាន​ដោះ​លែង​ក៏ដោយ ក៏លោក​នៅ​រង់ចាំ​ការ​ជម្រះ​ឡើង​វិញ​ក្នុង​សំណុំរឿង​នេះ ហើយ​លោក​អាចនឹង​ទទួល​បាន​ការ​ផ្តន្ទាទោស​តិច​ជាងនេះ បន្ទាប់ពីការជម្រះ​ឡើង​វិញ ពីព្រោះការ​ផ្តន្ទាទោស​នេះ​ត្រូវ​បាន​ប្តឹង​ឧទ្ធរណ៍​ដោយ​ជន​ជាប់​ចោទ​ហើយ​មិន​មែន​ជាតំណាង​​អយ្យការនោះទេ។​

ការ​ត្រឡប់​ចូល​ក្នុង​សង្គមកម្ពុជា​វិញបាន​ធ្វើ​ឲ្យ​ លោក រត្នមុនី ប្រឈមមុខ​ជាមួយនឹង​​ពិសោធន៍​មួយ​ទៀត​សម្រាប់គ្រួសារ​។​ បន្ទាប់ពី​រដ្ឋាភិបាល​សម្តែង​ការ​ខឹងសម្បានឹង​ខ្សែភាព​យន្ត​ឯក​សាររបស់ទូរទស្សន៍​ RT អ្នក​សម្របសម្រួល​រូប​នេះ​បាន​ភៀសខ្លួន​ទៅ​ប្រ​ទេស​ថៃ​ ដើម្បី​ស្វែង​រក​សិទ្ធិ​ជ្រក​កោន​ ប៉ុន្តែ​ត្រូវ​បាន​អាជ្ញាធរថៃ​ចាប់បញ្ចូនមកវិញកាល​ពី​ខែ​ធ្នូ ឆ្នាំ​២០១៨​។​​

ភ្នាមៗ​ បន្ទាប់ពី​ការ​ផ្តន្ទា​ទោស​លោក រត្នមុនី ភរិយារបស់លោក គឺអ្នក​ស្រី ឡុង គីមហ៊ាង​ ​​ក៏បាន​ចាកចេញទៅ​កាន់​ប្រទេស​ថៃ​ជាមួយ​កូន​របស់​ពួកគាត់​និង​បាន​លាក់​ខ្លួន​ចាប់តាំងពីពេ​ល​នោះមក។

លោក រត្នមុនី បាន​និយាយថា៖ «វាធ្វើ​ឲ្យ​ខ្ញុំមាន​ការ​ព្រួយ​បារម្ភ​យ៉ាងខ្លាំង​ចំពោះ​ភរិយា​និង​កូន​ប្រុសរបស់​ខ្ញុំ។​ ខ្ញុំ​នឹក​ប្រពន្ធ​និង​កូន​ប្រុស​របស់​ខ្ញុំ​ ពីព្រោះ​ខ្ញុំ​មិន​បាន​ជួប​ពួកគេ​យូរ​មក​ហើយ​»

លោក​និយាយថា ភរិយា​របស់​លោក​ចង់​វិលត្រឡប់​មក​ប្រទេស​កម្ពុជា​វិញ ដោយ​ភរិយា​​របស់​​លោក​​មិនត្រូវ​បាន​តុលាការ​ចោទប្រកាន់ពីបទ​ល្មើស​ណាមួយ​ទេ​ ប៉ុន្តែ​លោក​មិនដឹងថា តើអាជ្ញាធរ​នឹងអនុញ្ញាតឲ្យ​ភរិយា​របស់​លោក​វិលត្រឡប់​មក​វិញ​ឬយ៉ាងណា​ទេ។

លោក​បារម្ភ​ថា អាជ្ញាធរកម្ពុជា​នឹង​មិន​សប្បាយ​ចិត្ត​ទេ ដែល​ភរិយា​របស់​លោក​គឺ​អ្នក​ស្រី គីមហ៊ាង បាន​ដាក់​ញត្តិ​ទាមទារ​ឲ្យ​មាន​ការ​ដោះ​លែង​លោក​និង​បាន​តវ៉ា​ច្រើន​លើក​ច្រើនសា​នៅក្រៅ​ស្ថានទូត​រុស្ស៊ី​ក្នុងទីក្រុងភ្នំពេញ​ចាប់តាំងពី​ចុងឆ្នាំ​២០១៨​ដល់​ដើម​ឆ្នាំ​២០១៩​។

លោក រត្នមុនី បាន​និយាយថា ភរិយា​របស់​លោក​ស្ថិតនៅក្រោម​ការ​តាម​ដានពី​សំណាក់​អាជ្ញា​ធរ​ថៃ​ហើយ​កម្រ​ចាកចេញពី​បន្ទប់​ស្នាក់​នៅរបស់គាត់​ណាស់​។

លោក​ រ៉ាត់ រត្នមុនី បក់ដៃនៅពេលដែល​លោកមកដល់​តុលាការកំពូល កាលពីថ្ងៃទី១៥ ខែកក្កដា ។ បញ្ញា ឆព័ណ្ណ
លោក រ៉ាត់ រត្នមុនី លើកដៃខណៈដែលលោកមកដល់តុលាការកំពូល​នាថ្ងៃទី១៥ ខែកក្កដា​។ រូបថត បញ្ញា ឆព័ណ្ណ

លោក នី សុខា ប្រធាន​ផ្នែក​ឃ្លាំមើល​នៃ​សមាគមការពារសិទ្ធិ​មនុស្ស​អាដហុក​បាន​មាន​ប្រសាសន៍​ថា តុលាការ​ហាក់ដូចជា​យឺតយ៉ាវ​​នៅក្នុង​ដំណើរ​ការ​រឿង​ក្តី​របស់​លោក រត្នមុនី ដោយ​សារថា លោក​បាន​អនុវត្តទោសចប់​មុន​ពេលដែលលោក​​​អាច​ជំទាស់​នឹងការ​ផ្តន្ទា​ទោស​របស់​គាត់​។​

ដោយ​សួរ​ថា តើ​សាលាឧទ្ធរណ៍​នឹងផ្តល់​សំណង​ណាមួយ​ដល់​លោក រត្នមុនី ​ ទេ ប្រសិនបើ​លោក​ត្រូវ​បាន​រកឃើញ​ថា លោក​គ្មាន​ពិរុទ្ធភាព​ចំពោះ​បទចោទ​ទាំង​នេះ​ លោក នី សុខា បាន​មាន​ប្រសាសន៍ថា៖ «​វា​ជា​ការ​សោក​ស្តាយ​ ដែល​នីតិវិធី​របស់​តុលាការ​ដំណើរ​ការទៅយឺត ដែល​ធ្វើ​ឲ្យ​ជន​ជាប់​ចោទ​បាត់​បង់​ប្រយោជន៍របស់​ខ្លួន​»។​

លោក​បាន​មាន​ប្រសាសន៍​ថា តុលាការ​គួរ​តែ​អនុវត្តវិធានការ​កែ​តម្រូវ​ ដើម្បី​ធានា​ថា ជនជាប់ចោទ​មិន​ត្រូវ​បញ្ចប់​ការអនុវត្ត​ទោស​របស់ខ្លួន​មុន​ពេល​ពួកគេ​អាច​បញ្ចប់​ដំណើរការតុលាការ​និង​បណ្តឹងឧទ្ធរណ៍​ទាំង​មូល​។

លោក នី សុខា​ បាន​មាន​ប្រសាសន៍​ថា ការផ្តន្ទា​ទោស​លោក រ័ត្ន​មុនី គឺជា​ការ​ប៉ះ​ពាល់​ដល់​សេរីភាព​សារព័ត៌មាន​នៅ​កម្ពុជា​ ដោយ​បង្ហាញ​ថា អ្នក​សារព័ត៌មាន​និង​អ្នក​សម្របសម្រួល​អាច​មាន​បញ្ហា​ផ្លូវ​ច្បាប់​ដោយសារ​ការ​ងារ​របស់​ពួកគេ។​

លោក នី សុខា មាន​ប្រសាសន៍​ថា៖ «ខ្ញុំគិត​ថា វា​ប៉ះពាល់​ដល់​ស្មារតី​របស់​អ្នក​សារព័ត៌មាន»​​។

លោក ជិន ម៉ាលីន អ្នក​នាំពាក្យ​​ក្រសួង​យុត្តិធម៌​​មិន​យល់​ស្រប​នឹង​ការ​ចោទ​ប្រកាន់​របស់​លោក រ័ត្ន​មុនី ជុំវិញ​ការ​ផ្តន្ទា​ទោស​មិន​ត្រឹម​ត្រូវ​ឬ​ដំណើរ​ការ​យឺត​យ៉ាវ​រឿងក្តីនេះទេ។ លោក​បាន​មាន​ប្រសាសន៍​ថា តុលាការ​តែងតែ​គោរពតាម​នីតិវិធី​ដែល​មាន​ចែ​ងក្នុង​ច្បាប់​និង​ការ​វិនិច្ឆ័យ​ដោយ​ផ្អែក​លើ​ភស្តុ​តាង​ ដោយ​ចង្អុល​បញ្ជាក់​ថា ការ​ដោះ​លែង​លោករត្នមុនី ពីពន្ធនាគារ​នៅ​ពេល​គាត់​បញ្ចប់​ការ​អនុវត្ត​ទោស​នៅក្នុង​ពន្ធនាគារ​នោះ ក៏​ជាការ​អនុវត្តនីតិវិធីរបស់​តុលាការដែរ​។​​​

លោក ជិន ម៉ាលីន បាន​មាន​ប្រសាសន៍​ថា៖ «​ដំណើរ​ការ​នីតិវិធី​របស់តុលាការជា​ធម្មតា​ទេ ហើយ​តែកាលណា​គាត់​អនុវត្តទោសចប់ហើយ​ ត្រូវតែឲ្យ​គេនៅក្រៅឃុំ​»

លោក ណុប​ វី នាយកប្រតិបត្តិ​នៃសម្ព័ន្ធ​អ្នក​សារព័ត៌មានកម្ពុជា ​បាន​មាន​ប្រសាសន៍​ថា ការ​ផ្តន្ទា​ទោស​នេះ​ គឺអយុត្តិធម៌​ចំពោះ​លោក រ័ត្ន​មុនី ពីព្រោះ​គាត់​គ្រាន់​តែ​ជា​អ្នក​សម្របសម្រួល ហើយ​គ្រាន់តែ​ជួយ​អ្នក​កាសែត​បរទេស​លើ​គម្រោង​ផលិត​ភាព​យន្ត​ឯក​សារ​នេះប៉ុណ្ណោះ​។​

លោកបាន​មានប្រសាសន៍ថា វានឹង​ជះឥទ្ធិពល​ដល់​អ្នក​សម្រប​សម្រួល​ផ្សេងទៀត​ ដែល​នឹង​ស្ទាក់ស្ទើរ​​ធ្វើ​ការងារ​ជាមួយ​អ្នក​សារព័ត៌មាន។

លោក ណុប វី មានប្រសាសន៍ថា៖ «​តុលាការ​គួរ​តែ​ទម្លាក់​ការ​ចោទ​ប្រកាន់​លើ​រូបគាត់​​ពីព្រោះ​វានឹង​ធ្វើ​ឲ្យ​អ្នក​សម្រេបសម្រួល​និង​អ្នកសារព័ត៌មាន​ភ័យ​ខ្លាចក្នុងការ​បំពេញ​ការ​ងារ​របស់​ពួកគេ​»

រដ្ឋាភិបាល​កម្ពុជា​មិនដែល​និយាយ​អ្វីជា​សាធារណៈអំពី​បណ្តាញព័ត៌មាន​ RT ហើ​យ​ក៏មិន​ដែល​លើក​បញ្ហា​នេះ​ទៅកាន់ស្ថានទូត​រុស្ស៊ី​ប្រចាំ​នៅទីក្រុង​ភ្នំពេញ​ដែរ​​​។​ ភាព​យន្ត​ឯកសារនេះ​នៅ​មាន​តាមប្រព័ន្ធ​អ៊ីនធើណិតនៅឡើយ​ហើយ​គេអាចចូល​មើល​បាន​។

បណ្តាញផ្សព្វផ្សាយ​ព័ត៌មាន​រដ្ឋ​របស់​រុស្ស៊ី​នេះ​ថែមទាំង​បាន​ផ្ញើ​លិខិត​ទៅ​ស្ថានទូត​កម្ពុជា​នៅទីក្រុង​មូស្គូ​ ដោយ​បញ្ជាក់ថា លោក រត្នមុនី គឺគ្រាន់តែ​ជា​ «អ្នក​សម្រប​សម្រួល​និង​អ្នក​បកប្រែ​»​ សម្រាប់​ក្រុម​កាងារផលិត​ភាព​យន្ត​ឯក​សារនេះតែ​ប៉ុណ្ណោះ​ ហើយ​មាន​លិខិត​ព្រមព្រៀង​ពីស្ត្រី​ដែលបានបង្ហាញមុខ​ក្នុង​វីដេអូឯកសារនេះផងដែរ។ តួអង្គសំខាន់​ពី​ររូប​​ក្នុង​ភាព​យន្តឯកសារនេះ​បាន​បដិសេធ​ការ​អះអាង​ដែលបាន​ធ្វើឡើង​ក្នុងវីដេអូ​នេះ ហើយ​បាន​និយាយថា ពួកគេត្រូវ​បាន​ផ្តល់​ប្រាក់​ ដើម្បីនិយាយនៅចំពោះមុខ​កាម៉េរ៉ា។​

រដ្ឋាភិបាល​កម្ពុជា​មាន​ភាពរ​សើប​ខ្លាំង​ចំពោះ​ភាពយន្តឯក​សារ​ស្តី​ពី​​ការ​ជួញដូរ​ផ្លូវ​ភេទ​ក្នុង​ប្រទេស​នេះ​។​ កាលពីឆ្នាំ​២០១៧​ រដ្ឋាភិបាល​កម្ពុជា​បាន​គំរាម​បិទ​អង្គ​ការ​ក្រៅរដ្ឋាភិបាល​ប្រឆាំង​ការ​ជួញដូរ​មនុស្ស​ Agape International Missions ដែល​តាម​ចោទ​ថា បាន​ភាន់ច្រឡំ​ក្មេងស្រីបីនាក់​ដែលត្រូវ​បាន​លក់​ជា​ទាសករផ្លូវ​ភេទថា ជា​ជនជាតិខ្មែរ​ ដែលតាមពិតពួកគេ​គឺជា​ជនជាតិ​វៀត​ណាម។

ស្រដៀងគ្នា​ទៅនឹងភាព​យន្តឯកសារ​របស់​បណ្តាញ​ទូរទស្សន៍ RT ដែរ បណ្តាញ ផ្សព្វផ្សាយ​អន្តរជាតិ​ CNN បានផ្សព្វផ្សាយ​រឿង​រ៉ាវ​របស់​ក្មេង​ស្រី​បីនាក់​នៅក្នុង​កម្មវិធី “​CNN Freedom Project”​ ជា​យុទ្ធនាការព័ត៌មាន​អន្តរជាតិ​របស់​បណ្តាញ​ទូរទស្សន៍​ដែល​មាន​មូល​ដ្ឋាន​នៅ​អាមេរិក​ ដើម្បី​បញ្ចប់​ទាសករក្នុង​សម័យ​ទំនើប​។​

មន្ត្រីរដ្ឋាភិបាលរហូតដល់លោកនាយករដ្ឋមន្ត្រី ហ៊ុន សែន ផងដែរបានវាយប្រហារបណ្តាញទូរទស្សន៍ CNN ដោយសារតែចុះផ្សាយពីរឿងនេះដែលធ្វើឲ្យមានកំហឹង។ ប៉ុន្តែបណ្តាញទូរទស្សន៍ RT ដែលពីមុនគេស្គាល់ថា Russia Today នោះគេចផុតកាលពីឆ្នាំ២០១៨។

ងាក​មក​ហាងកាហ្វេវិញ លោក រត្នមុនី មិន​ខ្មាស់អៀន​នឹង​រៀបរាប់ពីពេលវេលា​របស់​លោក​នៅក្នុង​ពន្ធនាគារ​នោះទេ​។ លោក​បាន​និយាយថា ដំបូង​គេយក​លោក​ទៅ​ដាក់​ក្នុង​បន្ទប់​តូច​ចង្អៀតជាមួយ​អ្នក​ទោស​ដែល​ត្រូវ​បាន​ផ្តន្ទាទោស​ពីបទ​ល្មើស​ផ្សេងៗ ប៉ុន្តែ​ក្រោយ​មក​លោក​ត្រូវ​បាន​គេផ្លាស់ទៅ​កន្លែង​មួយ​ទៀត​ដែលមានអ្នក​ទោសនយោបាយនិង​អ្នក​ទោស​ “​មនសិការ”។

លោក​បាន​និយាយថា លោក​បាន​ចំណាយ​យ៉ាងហោចណាស់​១៧៥​ដុល្លារ​ទៅ​២០០​ដុល្លារ​ក្នុង​មួយ​ខែ​ ដើម្បី​ទិញ​អាហារ​និង​របស់របរផ្សេងៗ​ដែល​លោកត្រូវ​ការ​នៅក្នុង​ពន្ធនាគារ​។​ ក្រោយមក​ លោក រ័ត្ន​មុនី ត្រូវ​បាន​គេហៅ​ថា ជា​លោកគ្រូ​ ក្រោយ​ពី​លោក​ចាប់ផ្តើម​ជួយ​បង្រៀន​ភាសាអង់គ្លេស​ដល់អ្នក​ទោស​ប្រហែលជាប្រាំបីនាក់។

លោក​បាន​និយាយថា៖ «ហើយ​នៅ​ពេល​ខ្ញុំ​បង្រៀន​ភាសាអង់គ្លេស​ដល់​អ្នក​ទោស​ខ្លះ​ ខ្ញុំ​ក៏រៀន​ភាសាថៃនិងវៀតណាម​ពី​អ្នក​ទោស​ផ្សេងទៀតដែរ​ ហើយ​នៅ​ពេល​នេះ ខ្ញុំ​អាច​និយាយ​ភាសាថៃ​និង​ភាសាវៀតណាម​បាន​»​

បើទោះបី​ជា​វាមាន​រយៈ​ពេល​ច្រើន​ថ្ងៃ​ហើយ​ក៏ដោយ ចាប់តាំងពី​លោក​ត្រូវ​បាន​ដោះ​លែង​ ក៏​លោក​ រត្នមុនី ដូចជា​មិនចង់គេចវេសពីការវិលត្រឡប់​ទៅកាន់អាជីព​ជាអ្នកសារព័ត៌មានវិញ​នោះទេ​។ លោក​បាន​និយាយថា លោកធ្លាប់​​ទទួល​បាន​អាជ្ញាបណ្ណ​ព័ត៌មាន​សម្រាប់​ប្រព័ន្ធផ្សព្វផ្សាយ​តាម​អ៊ីនធើណិត​ដែល​លោកបាន​បង្កើតឡើង​និង​ដាក់ឈ្មោះថា “​សំឡេង​បក្សី” ។ ខណៈប្រព័ន្ធផ្សព្វផ្សាយ​មួយនេះត្រៀមនឹង​ចាប់ផ្តើម​ផ្សព្វផ្សាយ​ព័ត៌មាន​កាល​ពីឆ្នាំ​២០១៨​នោះ ការ​ចាប់ខ្លួន​លោក រ័ត្ន​មុនី  ធ្វើឲ្យលោកមិនមានឱកាស​ប្រើប្រាស់អាជ្ញាបណ្ណ​នេះទេ។

លោក រត្នមុនី បាន​និយាយថា៖ «​​ប្រសិនបើ​ខ្ញុំ​មាន​សមត្ថភាព​ ខ្ញុំ​ចង់​ក្លាយ​ជា​អ្នក​សារព័ត៌មាន​នាពេល​អនាគត​»

ប្រែសម្រួលពីអត្ថបទភាសាអង់គ្លេស៖ Released RT media fixer shifts focus to his retrial, uniting with exiled family

288 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »