សមាគមសម្ព័ន្ធអ្នកសារព័ត៌មានកម្ពុជា

របាយការណ៍៖ គម្រោងផ្តល់ហិរញ្ញប្បទានបរទេសផ្នែកហេដ្ឋារចនាសម្ព័ន្ធត្រូវការត្រួតពិនិត្យបន្ថែមលើការគ្រប់គ្រងគុណភាព

សកម្មភាពសាងសង់ផ្លូវជាតិលេខ២ ក្នុងខេត្តកណ្តាល។ រូបភាពថតកាលពីថ្ងៃទី២៦ ខែមេសា ឆ្នាំ២០២២។ ខេមបូចា/ ស៊ន សារ៉ាត
សកម្មភាពសាងសង់ផ្លូវជាតិលេខ២ ក្នុងខេត្តកណ្តាល។ រូបភាពថតកាលពីថ្ងៃទី២៦ ខែមេសា ឆ្នាំ២០២២។ ខេមបូចា/ ស៊ន សារ៉ាត

ស្រប​ពេល​ម្ចាស់​ជំនួយ​ផ្តល់​​ការ​​ជ្រោមជ្រែង​ពី​​គម្រោង​សាងសង់​ហេដ្ឋារចនាសម្ព័ន្ធ​ធំៗ​នៅ​កម្ពុជា បទបញ្ញត្តិ ​ដែល​មិន​ត្រូវ​គ្នាអាច​បើក​ឱកាស​ឲ្យមានការអនុវត្ត​គម្រោង​​មិនមាន​គុណភាព​ល្អ។ ​​

​កាល​ពី​ខែ​មុន​ ការ​ត្រួត​ពិនិត្យ​ដោយ​ក្រសួង​សាធារណការ​និង​ដឹកជញ្ជូន​បាន​រក​ឃើញ​ភាព​មិនប្រក្រតី​នៅ​ក្នុង​ការ​សាងសង់​ផ្លូវ​ជាតិ​លេខ ២ និង​លេខ ២២ ដែល​ទទួល​បាន​ហិរញ្ញប្បទាន​ពី​រដ្ឋាភិបាល​កូរ៉េខាងត្បូង។​

​រដ្ឋមន្រ្តី​ក្រសួងសាធារណការ ​លោក ស៊ុន ចាន់ថុល បាន​ប្រកាស​កាល​ពី​ថ្ងៃ​ទី២៣ ខែ​មេសា​ថា ផ្នែក​ជាច្រើន​​នៃ​ផ្លូវជាតិ​លេខ ២ ដែល​តភ្ជាប់​ក្រុង​តាខ្មៅ ទៅ​ខេត្ត​តាកែវ និង​ផ្លូវ​ជាតិ​លេខ ២២ ​ស្ថិត​នៅ​ក្រោម​កម្រិតស្តង់ដារ​គុណភាពដែល​មិន​​​អាច​ទទួល​យក​បាន។

​​លោកបាន​ថ្លែងថា៖ «ខ្ញុំ​បាន​បញ្ជា​ឲ្យក្រុម​ការងារ​ចាប់ផ្តើមធ្វើ​ការ​ត្រួតពិនិត្យ​គ្រប់ទាំងអស់ ហើយ​កន្លែងណា​ដែល​រកឃើញ​ថា មិនស្រប​ជាមួយ​នឹង​ស្តង់ដារ កន្លែង​ទាំងនោះ​នឹង​​ត្រូវគាស់កាយ​ធ្វើ​ឡើង​វិញ»

លោក​បាន​បន្ត​ថា គុណភាព​ស្តង់ដារ​នៃ​សំណង់​ផ្លូវ​ថ្នល់​ជា​ទូទៅ​ត្រូវ​បាន​កំណត់កម្រិតបច្ចេកទេសគឺ៤៣០ ប៉ុន្តែសម្រាប់ ​ផ្លូវជាតិ​លេខ ២ និង​​ផ្លូវជាតិ​លេខ ២២ ទទួល​បានតែ​​រវាង​ ៣៤០ ទៅ​ ៤២០ ​ប៉ុណ្ណោះ។

ការ​ប្រកាស​ជា​សាធារណៈ​ដូចនេះ​បាន​ជំរុញ​ឲ្យ​មាន​ការ​ស៊ើបអង្កេត​ពី​ស្ថានទូត​កូរ៉េខាងត្បូង​នៅ​កម្ពុជា។ នា​ពេល​បច្ចុប្បន្ន ផ្លូវ​ជាតិ​ខាង​លើ​នេះ​​ហាក់​ដូចជា​ដើរ​តួ​ជា​គំរូ​នៃ​គម្រោង​ហេដ្ឋារចនាសម្ព័ន្ធ​ ​ក្រោម​ជំនួយ​អភិវឌ្ឍន៍​ផ្លូវ​ការ​ (ODA) ដែល​ខកខន​បំពេញ​តាម​ស្តង់ដារ។ វិទ្យាស្ថាន​វេទិកា​អនាគត​ (Future Forum) ធ្លាប់​បាន​លើកឡើង​ពី​ការ​គោរព​តាម​បទដ្ឋាន​ក្នុង​កម្រិត​ទាប​តែ​ប៉ុណ្ណោះ សម្រាប់​គម្រោង​ទាំងនេះ ដែល​ជា​បញ្ហា​ចោទ​ចម្បង​ជា​ទូទៅ​មួយ។

កាល​ពី​ឆ្នាំ ២០២១ ក្រសួង​សាធារណការ​បាន​រក​ឃើញ​ថា ផ្នែក​ខ្លះ​នៃ​ផ្លូវ​ជាតិ​លេខ​៣ ​មាន​គុណភាព​ទាប ដោយ​តម្រូវ​ឲ្យធ្វើការ​កែលម្អរឡើងវិញ។

គម្រោង​ផ្លូវ​ជាតិ​ដែល​តភ្ជាប់​ពី​រាជធានី​​ភ្នំពេញ​ទៅ​ខេត្ត​កំពត ត្រូវ​បាន​ជួសជុល និង​ពង្រីក​ឡើង​វិញ​នៅ​ឆ្នាំ ២០១៨ ជាមួយ​នឹង​ហិរញ្ញប្បទាន​ចំនួន​ ២០០​លាន​ដុល្លារ​ពី​រដ្ឋាភិបាល​ចិន។ ​ផ្លូវ​នេះ​ត្រូវ​បាន​ធ្វើ​ការ​សាងសង់​ដោយ​ដោយ​ក្រុមហ៊ុន China Road and Bridge Corporation (CRBC)។

គម្រោង​សំណង់​ផ្លូវ​ជាតិ​លេខ ២ និង​ផ្លូវជាតិ​លេខ ២២ គឺ​​ត្រូវ​បាន​ស្ថាបនាដោយ ដោយ​ក្រុមហ៊ុន Hanshin Engineering & Constructions Company របស់​កូរ៉េ។ លោក​រដ្ឋមន្រ្តី​ ស៊ុន ចាន់ថុល បាន​បញ្ជាក់​ថា ក្រុមហ៊ុន​នេះ​មិនមាន​គ្រឿងយន្ត​គ្រប់គ្រាន់​ ឬ​ប្រើប្រាស់​គ្រឿង​ឧបករណ៍​គុណភាព​ទាប។

គម្រោង​សាងសង់​ផ្លូវ​​តម្លៃ​ ៥៦​លាន​ដុល្លារ​ខាង​លើ​​ត្រូវ​បាន​ផ្តល់​ហិរញ្ញប្បទាន​ដោយ​រដ្ឋាភិបាល​កូរ៉ខាងត្បូង​ ដោយ​មាន​ការ​រួម​ចំណែក​ពី​រដ្ឋាភិបាល​កម្ពុជា។ ក្រុមហ៊ុន​ Hanshin Engineering ក៏​ទទួល​បាន​កិច្ចសន្យា​ដើម្បី​សាងសង់​ផ្លូវ​ជាតិ​លេខ ២១ ដែល​បង្ហាញ​ពី​បញ្ហា​ស្រដៀងគ្នា​នេះ​ដែរ​។ នេះ​បើ​យោង​តាម​លោក​ចាន់ថុល។ លោក​បាន​ព្រមាន​ដក​ក្រុមហ៊ុន​ Hanshin Engineering ពី​ការ​ដេញ​ថ្លៃ​សម្រាប់​គម្រោង​បន្ថែម​ទៀត។

លោក​បាន​ថ្លែង​ថា៖ «ក្រុមហ៊ុន​នេះ​ជា​ក្រុមហ៊ុន​ដេញថ្លៃ​​ជោគជ័យ​មួយ​សម្រាប់​ការ​សាងសង់​ដែល​ចំណាយ​ទាប។ ប៉ុន្តែ​យើង​ក៏​បាន​កត់ចំណាំ​ទុក​ក្រុមហ៊ុន​នោះ និង​កំពុង​ពិភាក្សា​ថា​តើ​យើង​គួរ​ឲ្យ​ក្រុមហ៊ុន​ Hanshin ធ្វើ​ការ​ដេញ​ថ្លៃ​បន្ត​ទៀត​ឬ​ទេ»

សកម្មភាពសាងសង់ផ្លូវជាតិលេខ២ ក្នុងខេត្តកណ្តាល។ រូបភាពថតកាលពីថ្ងៃទី២៦ ខែមេសា ឆ្នាំ២០២២។ ខេមបូចា/ ស៊ន សារ៉ាត

លោក​ Kim Beomseo មន្រ្តី​ផ្នែក​សេដ្ឋកិច្ច​ និង​ហិរញ្ញវត្ថុ​នៅ​ស្ថានទូត​កូរ៉េខាងត្បូង​ប្រចាំ​កម្ពុជា បាន​ប្រាប់​ ខេមបូចា តាមរយៈ​អ៊ីម៉ែល​ថា លោក​កំពុង​ធ្វើ​ការ​​ស្វែងរក​ចម្លើយ​លើ​បញ្ហា​នេះ។

លោក​បាន​ប្រាប់​ថា៖ «ខ្ញុំ​កំពុង​ស្វែងរក​ការពិត​ពី​បញ្ហា​នេះ​តាមរយៈ​ការ​សម្ភាស​ជាមួយ​មន្រ្តី​នានា។ ខ្ញុំ​មិន​អាច​ឆ្លើយ​បាន​នោះ​ទេ រហូត​ដល់​ការ​ស៊ើបអង្កេត​បាន​បញ្ចប់»

ប្រព័ន្ធ​គ្រប់គ្រង​របស់​រដ្ឋាភិបាល​មិន​ច្បាស់លាស់?

ការ​ស្រាវជ្រាវ​របស់​​វិទ្យាស្ថាន​វេទិកា​អនាគត​ ដែល​តាមដាន​គម្រោង​ហេដ្ឋារចនាសម្ព័ន្ធ​ ដែល​ទទួល​បាន​មូលនិធិ​ពី​បរទេស​ នៅ​កម្ពុជា រវាង​ឆ្នាំ ២០០៥ ដល់ឆ្នាំ​២០២០ បាន​រក​ឃើញ​ថា ម្ចាស់​​ជំនួយ​ភាគច្រើន​មិនបាន​ប្រើប្រាស់​ប្រព័ន្ធ​ជំនួយអភិវឌ្ឍន៍​ផ្លូវការ (ODA )​​នោះ​ទេ​ ដើម្បី​អនុវត្ត​គម្រោង​ផ្សេងៗ។

ប្រទេស​ជប៉ុន ចិន និង​កូរ៉េខាងត្បូង​គឺ​ជា ដៃគូ​អភិវឌ្ឍន៍​គោល​របស់​កម្ពុជា​សម្រាប់​ជំនួយ​អភិវឌ្ឍន៍​ផ្នែក​ហេដ្ឋារចនាសម្ព័ន្ធ។

​​វេទិកា​អនាគត ដែល​រាយការណ៍​លើ​បញ្ហា​នេះ​ លើកឡើង​ថា ចិន​មិន​បាន​ប្រើប្រាស់​ប្រព័ន្ធជំនួយអភិវឌ្ឍន៍​ផ្លូវការ​​នោះ​ទេ​សម្រាប់​គម្រោង​ចំនួន ៧០​របស់​ខ្លួន​ ក្នុង​អំឡុងពេលនេះ។

ជប៉ុន​បាន​ប្រើប្រាស់​ប្រព័ន្ធ​នេះ​​តែ ២,៤ ភាគរយ​នៃ​គម្រោង​សរុប​ចំនួន ៥៥៤ និង​កូរ៉េខាងត្បូង​​ ១,៩ ភាគរយ​នៃ​គម្រោង​សរុប​ ៤២០​រៀង​គ្នា​ប៉ុណ្ណោះ។

​វេទិកា​អនាគត ​ក៏​បាន​រាយការណ៍​ថា​ បណ្តា​ប្រទេស​ដៃ​គូ​អភិវឌ្ឍន៍​ដទៃ​ទៀត រួម​មាន សហភាព​អឺរ៉ុប បារាំង និង​សហរដ្ឋអាមេរិក ក៏​កម្រ​នឹង​ប្រើប្រាស់​ប្រព័ន្ធ​លទ្ធកម្ម​ជាតិ​របស់កម្ពុជា​ណាស់។​

នៅ​ស្របពេល​ដូចគ្នា​នេះ វេទិកាអនាគត បាន​និយាយ​ថា គោលការណ៍​ផ្លូវការ​នៃ​ប្រព័ន្ធ​លទ្ធកម្ម​ជា​ទូទៅ​សម្រាប់​គម្រោង​ក្រោម​​ជំនួយអភិវឌ្ឍន៍​ផ្លូវការ​​នៅ​កម្ពុជា​នៅ​តែ​មិនទាន់​មាន​ភាព​ច្បាស់លាស់ ដោយ​មិនមាន​គោលការណ៍​ឬ​បទដ្ឋាន​ទូទៅ​សម្រាប់​ការ​អនុវត្ត។

​របាយការណ៍​របស់​​វេទិកា​អនាគត​បាន​លើកឡើង​ថា៖ «ការ​អនុវត្ត​ដោយ​មិនមាន​ភាព​ប្រក្រតី​​បែប​នេះ​គឺ ​ថែម​ទាំងធ្វើឲ្យ​មាន​ភាព​មិនច្បាស់លាស់​នៅ​ក្នុង​​នីយ័តកម្ម​របស់​ប្រទេស»

ម្យ៉ាង​វិញ​ទៀត របាយការណ៍​បាន​កត់សម្គាល់​ថា ធនាគារ​ពិភពលោក​ និង​ធនាគារ​អភិវឌ្ឍន៍​អាស៊ី​បាន​ប្រើប្រាស់​ប្រព័ន្ធ​លទ្ធកម្ម​របស់​រដ្ឋាភិបាល​សម្រាប់​គម្រោង​ផ្សេងៗ​នៅ​ក្នុង​រយៈពេល ១៥​ឆ្នាំ​ចុងក្រោយ​នេះ។

ស្ថានទូត​ចិន​នៅ​រាជធានី​ភ្នំពេញ​មិន​បាន​ឆ្លើយតប​សំណើ​សុំ​ការ​អធិប្បាយ​ពី​ ខេមបូចា តាម​រយៈ​ការ​ទំព័រហ្វេសប៊ុក​ផ្លូវការ​របស់​ស្ថានទូត​នោះ​ទេ។

លោក Yuji Shinohara តំណាង​ការិយាល័យ​ទីភ្នាក់ងារ​សហប្រតិបត្តិការ​អន្តរជាតិ​ជប៉ុន (JICA) នៅ​កម្ពុជា បាន​ប្រាប់​ ខេមបូចា តាម​អ៊ីម៉ែល​ថា មាន​រចនាសម្ព័ន្ធ​ចម្បង​ចំនួន​បួន​សម្រាប់​គម្រោង​របស់​ទីភ្នាក់ងារ​ JICA នៅ​កម្ពុជា ​រួម​មាន​ជំនួយ​ឥត​សំណង កិច្ចសហប្រតិបត្តិការ​ផ្នែក​បច្ចេកទេស និង​ការ​វិនិយោគ​ផ្នែក​ហិរញ្ញវត្ថុ​នៅ​ក្នុង​វិស័យ​ឯកជន។ ទី​បួន​គឺ​ប្រព័ន្ធ​កម្ចី​ដោយ​ប្រើប្រាស់​ប្រាក់​យេន។ លោក​បាន​និយាយ​ថា គម្រោង​ទាំង​នេះ​​ឆ្លងកាត់​នីតិវិធី​ផ្សេងៗ​សម្រាប់​ការ​អនុវត្ត។​

លោក​ Shinohara បាន​បន្ត​ថា សម្រាប់​គម្រោង​ជំនួយ​ឥតសំណង​គឺមានតែ​​​ក្រុមហ៊ុន​ជប៉ុន ប៉ុណ្ណោះ​ដែល​​មាន​សិទ្ធិ​ចូលរួម​ដេញថ្លៃគម្រោង ប៉ុន្តែ​ការ​បើក​ដេញ​ថ្លៃ​នៅ​តែ​​ត្រូវ​ធ្វើ​ឡើង​នៅ​កម្ពុជា។

លោក​បាន​ថ្លែង​ថា៖ «ខ្ញុំ​គិត​ថា គម្រោង​ទាំងនោះ​ត្រូវ​បាន​ធ្វើ​ឡើង​ក្រោម​ប្រព័ន្ធ​លទ្ធកម្ម​របស់​រដ្ឋាភិបាល» លោក​​បន្ថែម​ថា ប៉ុន្តែ​គម្រោង​កិច្ចសហប្រតិបត្តិការ​ផ្នែក​បច្ចេកទេស​មិនបាន​ធ្វើ​ក្រោម​ប្រព័ន្ធ​លទ្ធកម្មរដ្ឋាភិបាល​​នោះ​ទេ។

មាត្រា​ទី​៣ នៃ​ច្បាប់​ស្តី​ពី​លទ្ធកម្ម​ឆ្នាំ​ ២០១២ របស់​កម្ពុជា​ចែងថា ដៃគូ​អភិវឌ្ឍន៍​អាច​គោរព​តាម​ច្បាប់ ឬ​គោរព​តាម​កិច្ចសន្យា​នៃ​​ភាគីពាក់ព័ន្ធ។ នេះ​បើ​យោង​តាម​របាយការណ៍​របស់​​វេទិកា​អនាគត។

ប៉ុន្តែ​របាយការណ៍​ក៏​បាន​លើកឡើងថា ស្រប​ពេល​កម្ពុជា​មិនមាន​ច្បាប់​​​ធ្វើ​និយ័តកម្ម​លើ​ជំនួយ​អភិវឌ្ឍន៍ ឬ​គម្រោង​ជំនួយ​ផ្សេងៗ គម្រោង​ទាំង​នោះ​គឺ​ត្រូវ​បាន​គ្រប់គ្រង​ដោយ​គណៈកម្មាធិការ​សម្រាប់​ការ​ដឹកនាំ​ការ​កែទម្រង់​និង​​គ្រប់គ្រង​ការ​អភិវឌ្ឍ​នៅ​កម្ពុជា​ នៃ​ក្រុមប្រឹក្សា​អភិវឌ្ឍន៍​កម្ពុជា។

​​អ្នកនាំពាក្យ​ក្រសួង​សាធារណការ​ លោក វ៉ាស៊ីម សូរិយា បាន​ប្រាប់​ ខេមបូចា ថា ការ​ប្រើប្រាស់​ជំនួយ​បរទេស​គឺ​ស្រប​ជាមួយ​ទិសដៅ​របស់​រដ្ឋាភិបាល និង​ម្ចាស់ជំនួយ។

​​លោក​​​បាន​ច្រានច្រោល​របាយការណ៍​របស់​វិទ្យាស្ថាន​វេទិកា​អនាគត ​ដោយ​អះអាង​ថា រាល់​គម្រោង​ទាំងអស់​គឺ​ត្រូវ​បាន​អនុវត្ត​ដោយ​ស្រប​តាម​កិច្ចសន្យា និង​កិច្ចព្រមព្រៀង​រវាង​រដ្ឋាភិបាល និង​ក្រុមហ៊ុន​ពាក់ព័ន្ធ។

​លោក​បាន​ថ្លែង​ថា៖ «យើង​មិនដឹង​ថា របាយការណ៍​នោះវា​ត្រឹម​ត្រូវ​ប៉ុណ្ណាទេ​ និងបាន​​ប្រភព​មក​ពីណាទេ។ គ្រប់​គម្រោង​ទាំងអស់​គឺ​ស្រប​ជាមួយ​នីតិវិធី​ និង​កិច្ចព្រមព្រៀង​ត្រឹមត្រូវ ហើយ​មិនមាន​ជា​ការ​ខ្ជះខ្ជាយ​លុយ​នោះ​ទេ»។

​លោក​បាន​បន្ត​ថា ម្ចាស់ជំនួយ​ជា​រឿយៗ​តែងតែ​បញ្ជូន​មន្រ្តី​ជំនាញ​ដើម្បី​តាមដាន​ការ​អនុវត្ត​គម្រោង​ និង​ការ​ប្រើប្រាស់​កញ្ចប់​ថវិកា​របស់​ពួកគេ។

សកម្មភាពសាងសង់ផ្លូវជាតិលេខ២ ក្នុងខេត្តកណ្តាល។ រូបភាពថតកាលពីថ្ងៃទី២៦ ខែមេសា ឆ្នាំ២០២២។ ខេមបូចា/ ស៊ន សារ៉ាត

នាយកប្រតិបត្តិ​អង្គការ​តម្លាភាព​អន្តរជាតិ​ប្រចាំ​នៅ​កម្ពុជា លោក ប៉ិច ពិសី  បាន​និយាយ​ថា សំណង់​ផ្លូវ​ថ្នល់​គុណភាព​អន់​ថយ​​បាន​បង្ក​ការ​ខាតបង់​ដល់​សេដ្ឋកិច្ច​ប្រទេស។

លោក​បាន​បន្ត​ថា ការ​វិនិយោគ​សាធារណៈ​តម្រូវ​ឲ្យ​មាន​តម្លាភាព​នៅ​ក្នុង​ផ្នែក​លទ្ធកម្ម ដើម្បី​ជ្រើសរើស​ក្រុមហ៊ុន​ដែល​បំពេញ​លក្ខខណ្ឌ​ត្រឹមត្រូវ ក្នុង​គោលបំណង​​បញ្ចៀស​ការ​ប្រើប្រាស់​កញ្ចប់​ថវិកា​ជាតិ​ដើម្បី​ជួសជុល​ផ្លូវ​ថ្នល់​ម្តងហើយ​ម្តង​ទៀត។

​លោក​បាន​ថ្លែង​ថា៖ «គណនេយ្យភាព​ និង​តម្លាភាព​ពី​ការ​ចាប់ផ្តើម​នៃ​ការ​ដេញថ្លៃ​រហូត​ដល់​ការ​អនុវត្តគម្រោង​គឺ​ជា​រឿងសំខាន់ »។ ដោយលោកបន្ថែមថា៖ «កាល​ពី​គ្រា​មុន យើង​ក៏​បាន​ឃើញ​ភាព​មិនប្រក្រតី​មួយ​ចំនួន​នៅ​ក្នុង​ដំណើរការ​ដេញថ្លៃ​ផង​ដែរ ដែល​មាន​ពាក់ព័ន្ធ​​ទៅ​នឹង​ការ​សូកប៉ាន់»។ ​

លោក​បាន​បន្ថែម​ថា ក្រុមហ៊ុន​ខ្លះ​មិនមាន​សមត្ថភាព​គ្រប់គ្រាន់​ដើម្បី​​ដេញថ្លៃ ប៉ុន្តែ​នៅ​តែ​ត្រូវ​បាន​អនុញ្ញាត​ឲ្យ​ចូលរួម​ដេញថ្លៃ។

លោក​បាន​ថ្លែង​ថា៖ «ដូច្នេះ យើង​ស្នើ​ឲ្យ​រដ្ឋាភិបាល​ពិនិត្យ​មើល​ហេដ្ឋារចនាសម្ព័ន្ធ​សាធារណៈ ដែល​មាន​គុណភាព​ទាប ហើយ [ស្វែងរក​វិធី​ផ្សេងៗ] ដើម្បី​កាត់បន្ថយ​ចំណាយ​ ដើម្បី​សន្សំ​ថវិកា​ជាតិ»

សន្ទស្សន៍​ការ​យល់ឃើញ​ពី​អំពើ​ពុករលួយ​ឆ្នាំ ២០២១ របស់​អង្គការ​តម្លាភាព​អន្តរជាតិ បាន​ចាត់​ចំណាត់ថ្នាក់​កម្ពុជា​ជា​ប្រទេស​ដែល​មាន​អំពើ​ពុករលួយ​ខ្លាំង​ជាង​គេ​បំផុត​នៅ​អាស៊ាន ដោយ​ដាក់​កម្ពុជា​នៅ​ចំណាត់ថ្នាក់​លេខ​ ១៥៧ ក្នុង​ចំណោម​បណ្តា​ប្រទេស ១៨០ ទូទាំង​សាកលលោក។

​នាយ​ក​ប្រតិបត្តិ​នៃ​សម្ព័ន្ធ​គណនេយ្យ​ភាព​សង្គម​កម្ពុជា​ លោក​ សន ជ័យ បាន​និយាយ​ថា ស្រប​ពេល​ដែល​រាល់គម្រោង​ហេដ្ឋារចនាសម្ព័ន្ធ​ទាំង​អស់​ត្រូវ​ស្ថិត​នៅ​ក្នុង​ក្រោម​ច្បាប់​លទ្ធកម្ម​សាធារណៈ​កម្ពុជា ការ​អនុវត្ត​មិន​ទាន់​គោរព​តាម​គោលការណ៍​ច្បាប់​ពេញលេញ​នោះទេ។

​លោក​បាន​ថ្លែង​ថា៖ «ខ្ញុំ​គិត​ថា ផ្លូវ​ថ្នល់​គុណភាព​ទាប​គឺ​ ដោយសារ​ឥរិយាបទ​​របស់​ក្រុមហ៊ុនខ្លួនឯងផ្ទាល់ និង​ការ​មិនអើពើ​របស់​រដ្ឋាភិបាល​នៅ​ក្នុង​ការ​តាមដាន​ពិនិត្យ​តាម​ដំណាក់កាល​នីមួយៗ »។ លោកបន្ថែមថា៖ «រដ្ឋាភិបាល​គួរ​ពិចារណា​មិន​អនុញ្ញាត​ឲ្យ​មាន​ក្រុមហ៊ុនដែល​ទទួលបាន​គម្រោងណាមួយទៅ​ជួល​ក្រុម​ហ៊ុន​​ម៉ៅការបន្ត​ ដែល​ធ្វើ​ឲ្យ​ប៉ះពាល់​ដល់​គុណភាព​ផ្លូវ»។

​យ៉ាងណាក្តី ពលរដ្ឋ​ដូចជា លោក សេង គ្រឿន ដែល​រស់នៅ​តាម​បណ្តោយ​ផ្លូវ​ជាតិ​លេខ​ ២ ក្នុង​ស្រុក​កណ្តាល​ស្ទឹង​ ក្នុង​ខេត្ត​កណ្តាល​ បាន​និយាយ​ថា លោក​មិនបាន​ដឹង​ពី​​បញ្ហា​ពាក់ព័ន្ធ​នឹងគុណភាព​​ផ្លូវ​​នោះ​ទេ ហើយ​លោក​សប្បាយចិត្ត​នៅ​ពេល​ឃើញ​មាន​ការ​សាងសង់​ផ្លូវ​ថ្មី។

លោក​បាន​ថ្លែង​ថា៖ «មាន​ផ្លូវ​ថ្មី​ធ្វើ​ឲ្យ​ការ​រស់នៅ​ ប្រកបរបរ និង​ធ្វើ​ដំណើរ​ងាយស្រួល​ជាង​មុន»

ចំណែក​​អ្នកស្រី​ សៀក លីម អ្នក​ភូមិ​មួយ​រូប​ទៀត​រស់​នៅ​តាម​បណ្តោយ​ផ្លូវជាតិ​លេខ ២ ក្នុង​ស្រុក​កណ្តាល​ស្ទឹង ក៏​បាន​បង្ហាញ​អារម្មណ៍​ដូចគ្នា​នេះ​ដែរ។

​អ្នកស្រី​បាន​ថ្លែង​ថា៖ «នៅ​ពេល​យើង​មាន​ផ្លូវ​ថ្មី​ យើង​អាច​ប្រកបរបរ​រក​ស៊ី​ប្រចាំថ្ងៃ​បាន»

ប្រែសម្រួលពីអត្ថបទភាសាអង់គ្លេស៖ Report: Foreign-funded infrastructure projects need more scrutiny for quality control

143 views

ព័ត៌មានថ្មី

អត្ថបទពេញនិយម