សមាគមសម្ព័ន្ធអ្នកសារព័ត៌មានកម្ពុជា

របាយការណ៍បង្ហាញថាភាពចន្លោះប្រហោងនិងការខកខានអនុវត្តច្បាប់ ជាមូលហេតុនាំឲ្យមានអំពើហិង្សានិងឃាតកម្ម

អ្នកលក់រៀបចំផ្កាទុកលក់សម្រាប់ពិធីបុណ្យសពក្នុងរាជធានីភ្នំពេញថ្ងៃទី៧ ខែមីនា ឆ្នាំ២០២៣។ (ខេមបូចា/ព្រីង សំរាំង)
អ្នកលក់រៀបចំផ្កាទុកលក់សម្រាប់ពិធីបុណ្យសពក្នុងរាជធានីភ្នំពេញថ្ងៃទី៧ ខែមីនា ឆ្នាំ២០២៣។ (ខេមបូចា/ព្រីង សំរាំង)

របាយការណ៍​ថ្មី​មួយ​របស់​អង្គការ​លីកាដូ​ បាន​និយាយ​លម្អិត​ពី​ករណី​ឃាតកម្ម​លើ​ស្រ្តី​ចំនួន​២៦​រូប និង​កុមារ​៦​រូប​នៅចន្លោះខែ​មករា ឆ្នាំ​២០២០ ដល់​ខែ​មិថុនា ឆ្នាំ២០២២ បង្ក​ដោយដៃគូស្និទ្ធស្នាលបច្ចុប្បន្ន ឬអតីត​ដៃគូ​​។ របាយការណ៍​ថា​នេះ​បាន​បង្ហាញ​ពី​ការ​កើនឡើង​​នូវ​អំពើ​ហិង្សា​ក្នុង​គ្រួសារ និងអនុវត្ត​ច្បាប់។​

ក្រុម​អ្នក​តាម​ដាន​បញ្ហា​នេះ​បាន​រក​ឃើញ​ថា​មាន​ស្រ្តី​៦​រូប និង​កុមារ​ម្នាក់​ត្រូវ​បាន​សម្លាប់​ក្នុង​ឆ្នាំ​២០២០ ចំណែកស្រ្តី​១៣រូប និង​កុមារ៤​រូប​ត្រូវ​បាន​សម្លាប់​ក្នុង​ឆ្នាំ​២០២១ និង​ស្រ្តី​ចំនួន​៧រូប​​ត្រូវ​បាន​សម្លាប់​ក្នុង​ឆមាសទីមួយ​​នៃ​ឆ្នាំ​២០២២។ របាយការណ៍​បញ្ជាក់ថា​ករណី​ឃាតកម្ម​លើ​ស្រ្តី​ចំនួន​២៦​ករណី​ មាន​១៦​ករណី​បង្ក​ឡើង​ដោយស្វាមី ៥ករណីបង្កឡើងដោយដៃគូស្និទ្ធស្នាល ២ករណី​បង្កឡើង​ដោយ​អតីត​ស្វាមី និង៣​ករណី​​ទៀត​បង្ក​ឡើង​ដោយ​អតីតដៃគូ​។​ របាយការណ៍​ដែល​មាន​ចំណង​ជើង​ថា «គ្មាន​ច្រកសុវត្ថិភាព៖ បរាជ័យ​ក្នុងការទប់​ស្កាត់ឃាតកម្មដោយដៃគូស្និទ្ធស្នាល» បាន​បញ្ជាក់​ថាតួលេខទាំងនេះ​​អង្គការ​លីកាដូ បាន​ប្រមូល​តាម​រយៈ​សាច់ញាតិ​ជន​រងគ្រោះ បណ្ដាញ​សង្គម តាមរយៈសារព័ត៌មាន​ផ្សេងៗ របាយការណ៍​សមត្ថកិច្ច និង​ប្រភព​ជា​ច្រើន​ទៀត ហើយ​បាន​សង្កេត​ឃើញ​ពី​​ភាព​ទន់ខ្សោយ​របស់​សមត្ថកិច្ច​រដ្ឋ​ចំពោះ​អំពើហិង្សា​ក្នុង​គ្រួសារ​។​

របាយការណ៍​បញ្ជាក់​ថា​មាន​តែ​១៧​ករណី​ក្នុង​ចំណោម​២៦​ករណី ឬ៦៥​ភាគរយ​ប៉ុណ្ណោះ ដែល​ជនល្មើស​ត្រូវបានផ្តន្ទាទោស​គិត​ត្រឹម​ខែ​មករា ឆ្នាំ​២០២៣ ហើយ​​ជនសង្ស័យ​ផ្សេង​ទៀត​កំពុង​មាន​សេរីភាព ឬ​កំពុង​ជាប់​ឃុំបណ្ដោះអាសន្ន ឬ​បាន​បាត់​បង់ជីវិត​។​

របាយការណ៍​បាន​ដក​ស្រង់​សម្ដី​ស្រ្តី​ជា​ម្ដាយ​របស់​ជន​រងគ្រោះ​ដែល​ត្រូវ​អតីត​ស្វាមី​សម្លាប់​ដោយ​ថា៖ «​គ្មានការអន្តរាគមន៍អីទេ គេ (អាជ្ញាធរ) មិនមកទេ»។ អ្នកស្រី​បន្ត​ថា៖ «​កូន​ស្រី​ខ្ញុំ​បាន​ស្លាប់ទៅហើយ ជនល្មើសនៅតែរួចខ្លួន»។​

លោក អំ សំអាត នាយកកិច្ចការទូទៅ​អង្គការលីកាដូ​​ មាន​ប្រសាសន៍​ថា​មាន​ករណី​អំពើ​ហិង្សា​ក្នុង​គ្រួសារ​មួយ​ចំនួន​បាន​ចប់​ត្រឹម​ការ​ស៊ើប​អង្កេត​របស់​សមត្ថកិច្ច និង​​ជា​ញឹក​ញាប់​តែងតែ​ត្រូវ​បាន​សម្រប​សម្រួល​ដោយ​អាជ្ញាធរ​មូល​ដ្ឋាន​។  លោក​ថា​មធ្យោបាយ​នេះ​គឺ​មាន​បំណង​ចង់​ឲ្យ​គ្រួសារ​នៅ​រួម​រស់ជា​មួយ​គ្នា ប៉ុន្តែ​វា​ត្រូវ​ប្រើ​ច្រើន​លើស​លុប​ពេក ហើយ​ក៏​បាន​ក្លាយ​ជា​ភាព​បរាជ័យ​មួយ​ក្នុង​ការ​ទប់​ស្កាត់អំពើ​ហិង្សា។​ លោក​កត់​សម្គាល់​ឃើញ​ថា​ ជនល្មើស​តែងតែជឿ​ថា​វាមិន​មែន​ជា​រឿង​បំពាន​ច្បាប់​នោះទេ​នៅពេល​គេ​ប្រើ​ហិង្សា​លើ​ដៃគូ​របស់​ខ្លួន​។​

លោក​បន្ថែម​ថា៖ «អំពើ​ហិង្សា​ក្នុង​គ្រួសារ​អាច​នឹង​កាន់​តែ​អាក្រក់ ហើយ​ករណី​ខ្លះ មាន​រហូត​ដល់​សម្លាប់ បើ​សិន​ជា​មិន​ដោះ​ស្រាយ​តាម​ផ្លូវ​ច្បាប់​ទេ»។​

របាយការណ៍​បាន​សិក្សា​ស៊ីជម្រៅ​លើ​ប្រព័ន្ធដែល​ទន់ខ្សោយ​ដែល​នាំ​ឲ្យ​មាន​ឃាតកម្ម​កើត​ឡើង​។  បើ​ទោះ​បី​ជា​វាមិន​បាន​ឆ្លុះបញ្ចាំង​ទិដ្ឋភាព​​នៃ​អំពើ​ហិង្សា​ក្នុង​គ្រួសារ​ដែល​បាន​កើត​ឡើង​ក្នុង​ប្រទេស​កម្ពុជា​ទាំង​ស្រុង វាក៏បានបង្ហាញ​ថា​​បទដ្ឋាន​យេនឌ័រ​មិន​ត្រឹមតែ​បានគាំទ្រ និង​ជំរុញ​ឲ្យ​មាន​អំពើហិង្សា​នេះទេ​ តែ​ថែម​ទាំង​បាន​រួម​ចំណែក​ដល់​ការ​មិន​យក​ចិត្ត​ទុក​ដាក់អន្តរាគមន៍​ពី​ស្ថាប័ន​ពាក់ព័ន្ធ​ផង​ដែរ។​

សង្គម​ស៊ីវិល​តែ​ងតែ​ពិភាក្សា​​ច្រើន​ពី​ភាព​ទន់​ខ្សោយ​របស់​ច្បាប់​ស្ដី​អំពី​ ការទប់ស្កាត់អំពើហិង្សា​ក្នុង​គ្រួសារ និងកិច្ច​គាំពារ​ជន​រងគ្រោះ ឆ្នាំ​២០០៥។ តែចាប់​តាំង​ពី​ច្បាប់​បាន​អនុម័ត​ក្នុង​ឆ្នាំ​២០០៥​មក គ្មាន​ការ​យក​ចិត្ត​ទុក​ដាក់​ឲ្យ​ច្បាស់​លាស់​លើ​បញ្ហា​អំពើ​ហិង្សា​នេះទេ​។​

ច្បាប់​ស្ដី​ពី​អំពើ​ហិង្សា​ក្នុង​គ្រួសារ​នៅ​មាន​ភាព​មិន​ស៊ីគ្នា និង​មាន​ចន្លោះ​ខ្វះខាត ហើយ​នីតិវិធី​លែង​លះ​ក៏​មិន​សូវ​ល្អ ទើប​ធ្វើ​ឲ្យ​ស្ដ្រី​ស្ថិត​ក្នុង​ស្ថាន​ភាព​រំលោភ​បំពាន​។​

លោក អំ សំអាត មាន​ប្រសាសន៍​ថាគេ​ឃើញ​មាន​​ទាំង​ភាព​ខ្វះ​ចន្លោះ​ក្នុង​ការ​អនុវត្ត​ច្បាប់ និងការ​ប្រកាន់​យក​ការ​សម្រប​សម្រួលជាអាទិភាព​​ច្រើន​ក្នុង​ករណី​អំពើហិងក្សា​ក្នុង​គ្រួសារ​។  បើ​ទោះបី​ជា​ស្រ្តី​បាន​ដាក់ពាក្យ​បណ្ដឹង​លើ​បញ្ហាជម្លោះ ការ​វាយ​ដំដែលបង្ក​បញ្ហា​របួស ក៏​សមត្ថកិច្ច​នគរបាល​តែងចាត់ទុក​ថា​ជារឿង​តូច​តាច ហើយ​បាន​ណែនាំ​ឲ្យ​គ្រួសារ​ធ្វើ​ការ​សម្រប​សម្រួល ដែល​ខុស​ពី​បំណង​របស់​ជន​រង​គ្រោះ​។​ ​

លោក​ឲ្យ​ដឹងថា​វិធី​សម្រប​សម្រួល​នេះ​កើត​ចេញ​ពី​ការ​ជឿ​ថា​អំពើ​ហិង្សា​ក្នុង​គ្រួសារ​ជា​រឿង​បុគ្គល ជាជាង​ចាត់ទុក​ថា​ជា​បញ្ហា​សង្គម​។​

លោក​បន្ថែម​ថា៖ «បើ​សិន​ជា​មាន​ការ​សម្រប​សម្រួល​កាន់​តែ​ច្រើន​ចំពោះអ្នកប្រព្រឹត្តបទល្មើសហិង្សា វា​នឹង​នាំ​ឲ្យមាន​អំពើ​ហិង្សា​កាន់​តែ​ច្រើន​»។ លោក​ថា ​អ្នក​ដែល​រងគ្រោះ​ខ្លាំង​ជាង​គេ​គឺ​ស្រ្តី និង​កុមារ​ដែល​នឹង​ធ្វើ​ឲ្យ​ប៉ះពាល់​កាន់​តែ​ខ្លាំងលើ​សង្គម​គ្រួសារ សង្គមជាតិ​ និង​ធនធានមនុស្ស​​។​

លោកស្រី ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ លើក​ឡើងក្នុង​របាយការណ៍​​ថា៖ «កិច្ចគាំពារ និង​សេវាចាំបាច់មួយចំនួន ផ្តល់អំណាចដល់ស្រ្តី ដើម្បីមាន​សុវត្ថិភាព​ក្នុងការ​ចាកចេញ​ពី​ទំនាក់​ទំនងស្និទ្ធស្នាលដែលប្រឈមនឹង​ការ​រំលោភ​បំពាន»។​ លោក​ស្រ្តី​បន្ថែម​ថា៖ «វា​ពិត​ជាចាំបាច់ណាស់​​ដែល​ស្រ្តី​អាចស្វែករក និងដឹង​ពី​សិទ្ធិ​ស្រប​ច្បាប់ និង​ជម្រើស​របស់ពួកគេ​មាន​ក្នុងការប្រើប្រាស់សិទ្ធិរបស់ពួកគេក្នុងកាលៈទេសៈសំខាន់បែបនេះ​​»។​

អ្នកស្រី គ្រី ស៊ុយហៀង នាយិកាប្រតិបត្តិនៃអង្គការនារីដើម្បីសន្តិភាព បាន​គាំទ្រ​ចំពោះ​ការ​លើក​ឡើង​របស់ អង្គការ​លីកាដូ ដែល​បាន​អំពាវនាវ​ឲ្យ​មាន​ការ​អនុវត្ត​ច្បាប់​ឲ្យ​កាន់​តែ​ប្រសើរ និង​ផ្ដោត​លើ​ការ​ស្វែង​រក​យុត្តិធម៌​សម្រាប់​ជន​រងគ្រោះ​ដែល​ត្រូវ​ដៃគូ​ជិតស្និទ្ធ​បង្ក​ហិង្សា​លើ​។​

អ្នកស្រី​បន្ថែម​ថា៖ ​«​យើង​មាន​ច្បាប់ ប៉ុន្តែ​តើ​យើង​ត្រូវ​ពង្រឹង​ច្បាប់​បែប​ណា? ហើយ​យើង​ត្រូវ​ពង្រឹង​ការ​អនុវត្ត​បែបម៉េច? ហើយ​តើ​ប្រព័ន្ធ​ច្បាប់​នោះ​ទៀត​សោត​ដំណើរ​ការ​យ៉ាង​ម៉េច?»។​

អ្នក​នាំពាក្យ​ក្រ​សួង​មហាផ្ទៃ លោក ខៀវ សុភ័គ ប្រាប់​ខេមបូចាថា​រដ្ឋាភិបាល​បាន​នឹងកំពុងធ្វើ​ការ​​ទប់​ស្ដាត់អំពើ​ហិង្សា​ក្នុង​គ្រួសារ​តាម​រយៈ​ច្បាប់​ស្ដី​ពី​អំពើ​ហិង្សា​ក្នុង​គ្រួសារ​។ ប៉ុន្តែ​លោក​ថា​ក្នុងករណី​ឃាត​កម្ម​ដែលមិន​ទាន់​ឈាន​ដល់​ការ​កាត់​ទោស វា​គឺ​ដោយសារតែ​ជន​ល្មើសបានរត់គេចខ្លួន ។ ​

លោក​បន្ថែម​ថា៖ «​ខ្ញុំ​មិន​គិត​ថា​វាជា​ការ​បរាជ័យ[លើការអនុវត្តច្បាប់]​ទេ…​ក្នុង​ករណី​ណា​ដែល​ជន​ល្មើស​មិន​ទាន់​ចាប់​ខ្លួន​បាន សំណុំ​រឿង​មិន​ទាន់​បិទបញ្ចប់​ទេ»។​

យ៉ាង​ណា​លោក​លើក​ឡើង​ដែរថា របាយការណ៍​ហាក់​មាន​ភាព​លម្អៀង និង​មិន​បាន​ឆ្លុះ​បញ្ចាំង​ពី​កិច្ច​ខិត​ខំ​របស់​រដ្ឋាភិបាល​ទេ។​

​លោក​បានមានប្រសាសន៍ថា៖ «​ពេល​ដែល​លីកាដូ​រិះគន់ យើង​សប្បាយ​ចិត្ត ពីព្រោះ​ថា​យើង​បាន​ខិត​ខំធ្វើ​ការ ហើយ​កិច្ច​ខិត​ខំរបស់​យើង​អាច​នឹងត្រូវ​ទទួល​ស្គាល់»។

​អ្នកនាំពាក្យ​ក្រ​សួង​កិច្ច​ការ​នារី លោក​ស្រី ម៉ាន ចិន្តា បដិសេធអត្ថាធិប្បាយ​លើ​រឿង​នេះ ៕

ប្រែសម្រួលពីអត្ថបទភាសាអង់គ្លេស៖ Report Points to Inadequate Enforcement, Legal Flaws as Reasons for Entrenched Domestic Violence

534 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម