ព្រះវិហារ៖ យ៉ាងហោចណាស់មានខេត្តចំនួនបីដែលទាហានថៃបានបើកការវាយប្រហារកាលពីថ្ងៃព្រហស្បតិ៍ដោយបានប្រើយន្តហោះទម្លាក់គ្រាប់ចូលជ្រៅក្នុងទឹកដីកម្ពុជា ក្រោយពីមានជម្លោះប្រដាប់អាវុធកើតឡើងនៅតាមព្រំដែនជាថ្មីអស់រយៈពេលប្រាំថ្ងៃមកនេះ ដែលការទម្លាក់គ្រាប់មានចម្ងាយយ៉ាងតិច៦៣គីឡូម៉ែត្រពីព្រំដែន។ នេះបើតាមសេចក្ដីរាយការណ៍ពីអ្នកប្រើប្រាស់បណ្ដាញសង្គមហ្វេសប៊ុក សេចក្ដីថ្លែងការណ៍របស់មន្ត្រីរដ្ឋាភិបាល និងពីប្រជាពលរដ្ឋផ្ទាល់។
កាលពីល្ងាចថ្ងៃព្រហស្បតិ៍សារព័ត៌មានក្នុងស្រុក និងអ្នកភូមិដែលរស់នៅជិតកន្លែងទម្លាក់គ្រាប់បានឲ្យដឹងថា យន្តហោះចម្បាំង F-16 ថៃបានទម្លាក់គ្រាប់បែកលើបន្ទាយទាហានខ្មែរមួយកន្លែងដែលមានចម្ងាយតែប៉ុន្មានគីឡូម៉ែត្រភាគខាងត្បូងក្រុងព្រះវិហារ ដែលការទម្លាក់គ្រាប់បែកនេះមានចម្ងាយប្រហែល៦៣គីឡូម៉ែត្រពីព្រំដែនកម្ពុជាថៃ។
នៅល្ងាចថ្ងៃព្រហស្បតិ៍ មន្ទីរសុខាភិបាលខេត្តព្រះវិហារបានឲ្យដឹងថា ចំនួនអ្នករងគ្រោះក្នុងហេតុការណ៍នោះគឺមានទាហានក្នុងបន្ទាយម្នាក់បានរងរបួស។
ការទម្លាក់គ្រាប់បែកពីយន្តហោះចម្បាំងថៃនេះ បានធ្វើឲ្យប្រជាពលរដ្ឋក្នុងក្រុងព្រះវិហារមានការភ័យខ្លាច ហើយសាលារៀន ហាងលក់ទំនិញ និងស្ថានីយប្រេងឥន្ធៈបានបិទទ្វារ ខណៈដែលប្រជាពលរដ្ឋជាច្រើនបានចាកចេញពីផ្ទះសម្បែងគិតតាំងពីថ្ងៃព្រហស្បត្តិ៍ ដល់ថ្ងៃសុក្រនេះ។
លោក ហួន សៀងហៃ ជាអ្នកភូមិរស់នៅភូមិដូង ចម្ងាយប្រហែល៣គីឡូម៉ែត្រពីបន្ទាយទាហាន។ លោកបាននិយាយថា លោកបានឮសំឡេងផ្ទុះចំនួនពីរដងនៅម៉ោងប្រហែល៤ល្ងាច កាលពីថ្ងៃព្រហស្បតិ៍។ អាជ្ញាធរបានប្រាប់ប្រជាពលរដ្ឋដែលរស់នៅក្បែរបន្ទាយទាហានឲ្យជម្លៀសចេញពីផ្ទះជាបណ្ដោះអាសន្ន។ លោកបន្ថែមថា លោកបានរៀបចំឲ្យម្ដាយ និងកូនៗ ពីរនាក់ចាកចេញពីខេត្តព្រះវិហារនៅថ្ងៃសុក្រនេះ។
លោកបន្តថា៖ «ខ្ញុំខ្លាចពេលខ្ញុំឮសំឡេងគ្រាប់បែកផ្ទុះភ្លាមៗ ពីព្រោះយើងមិនដឹងថាពួកវាមកទេ ហើយពីព្រំដែនមកនេះមានចម្ងាយឆ្ងាយ»។
អ្នកនាំពាក្យរដ្ឋបាលខេត្តព្រះវិហារ លោក គឹម ចាន់បញ្ញា មានប្រសាសន៍ថា អាជ្ញាធរបានជំរុញឲ្យប្រជាពលរដ្ឋនៅឆ្ងាយពីមូលដ្ឋានកងទ័ព និងបង្កើនការប្រុងប្រយ័ត្ន។ លោកបន្តថា ប្រជាពលរដ្ឋខ្លះបានចាកចេញពីក្រុងព្រះវិហារដោយសារភាពភ័យខ្លាច ប៉ុន្តែលោកមិនទាន់មានតួលេខជាក់ស្ដែងនោះទេ។
បើតាមសារព័ត៌មានក្នុងស្រុក ទាហានថៃក៏បានបាញ់ផ្លោងដល់ព្រំដែនរវាងស្រុកអន្លង់វែងខេត្តឧត្តរមានជ័យ និងខេត្តសៀមរាបផងដែរកាលពីថ្ងៃព្រហស្បតិ៍។
អភិបាលរងខេត្តសៀមរាប លោក សុខ ថុល មានប្រសាសន៍ថាគ្រាប់ផ្លោងរបស់ថៃបានធ្លាក់ក្នុងទឹកដីខេត្តឧត្តរមានជ័យ ប្រហែលជា៤២គីឡូម៉ែត្រពីព្រំដែនថៃ និងប្រហែល១០០គីឡូម៉ែត្រពីតំបន់ប្រយុទ្ធគ្នានៅអូស្មាច់។
អ្នកនាំពាក្យរដ្ឋបាលខេត្តឧត្តរមានជ័យលោក ម៉េត មាសភក្ដី មិនទាន់អាចសុំការអត្ថាធិប្បាយភ្លាមៗបាននៅឡើយ។
ពេលសួរអំពីការទម្លាក់គ្រាប់បែកពីយន្តហោះចម្បាំងថៃនៅស្រុកស្វាយចេក ខេត្តបន្ទាយមានជ័យកាលពីថ្ងៃព្រហស្បតិ៍ អ្នកពាក្យរដ្ឋបាលខេត្តលោក ណង វុទ្ធី បញ្ជាក់ថា ពិតជាមានការទម្លាក់គ្រាប់បែកមែន ប៉ុន្តែបដិសេដផ្ដល់ព័ត៌មានលម្អិតអំពីទីតាំងដោយថា «ជាបញ្ហាសន្តិសុខ» និងបានបង្វែរសំណួរទៅកាន់អ្នកនាំពាក្យក្រសួងការពារជាតិវិញ។
អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា បដិសេធអត្ថាធិប្បាយលើការទម្លាក់គ្រាប់បែងរបស់ទាហានថៃ និងបានឲ្យអ្នកសារព័ត៌មានស្វែងរកព័ត៌មានបច្ចុប្បន្នភាពនៅក្នុងឆាណែលតេឡេក្រាមរបស់ក្រសួង។
ក្រសួងមហាផ្ទៃបានឲ្យដឹងនៅថ្ងៃសុក្រនេះថាជនស៊ីវិល និងហេដ្ឋារចនាសម្ព័ន្ធសាធារណៈក្នុងខេត្តព្រះវិហារបន្តរងការខូចខាតដោយសារតែអ្វីដែលក្រសួងអះអាងថា «ការបំផ្លិចបំផ្លាញពីការបាញ់ផ្លោង និងការទម្លាក់គ្រាប់បែកពីយន្តហោះF-16 របស់ថៃ» ហើយក្រសួងថាការទម្លាក់គ្រាប់បែកនេះចូលជ្រៅក្នុងដីកម្ពុជាប្រហែលពី៨០ទៅ៩០គីឡូម៉ែតពីព្រំដែនថៃ។
ក្រុមអ្នកសារព័ត៌មានមិនទាន់អាចស្វែងរកការបញ្ជាក់ច្បាស់ថាមានកន្លែងណាដែលគួរឲ្យសង្ស័យថាត្រូវយន្តហោះចម្បាំងថៃទម្លាក់គ្រាប់បែកទៀតនោះទេ ក្រៅតែពីបន្ទាយទាហានមួយកន្លែងនៅជាយក្រុងព្រះវិហារ៕
(រាយការណ៍បន្ថែមដោយ៖ឃួន ណារីម)
ប្រែសម្រួលពីអត្ថបទភាសាអង់គ្លេស៖ Reports of Deep Thai Strikes Prompt More to Flee in Krong Preah Vihear
