សមាគមសម្ព័ន្ធអ្នកសារព័ត៌មានកម្ពុជា

លោក រ៉ុង ឈុន និងសកម្មជន១៧នាក់ទៀតត្រូវដោះលែងពីពន្ធនាគារ

លោក រ៉ុង ឈុន ធ្វើសេចក្ដីថ្លែងការណ៍ភ្លាមៗទៅកាន់អ្នកគាំទ្របន្ទាប់ពីចេញពីពន្ធនាគារព្រៃស នៅរសៀលថ្ងៃទី១២វិច្ឆកាឆ្នាំ២០២១។ ខេមបូចា/ វណ្ណ វិចារ
លោក រ៉ុង ឈុន ធ្វើសេចក្ដីថ្លែងការណ៍ភ្លាមៗទៅកាន់អ្នកគាំទ្របន្ទាប់ពីចេញពីពន្ធនាគារព្រៃស នៅរសៀលថ្ងៃទី១២វិច្ឆកាឆ្នាំ២០២១។ ខេមបូចា/ វណ្ណ វិចារ

មេដឹកនាំ​សហជីព លោក រ៉ុង ឈុន  និងប្រធានបក្សខ្មែរឈ្នះ លោក សួង សុភ័ណ្ឌ  ព្រមទាំងសកម្មជនបរិស្ថាន  និងអ្នកគាំទ្របក្ស​ប្រឆាំង​​ជាច្រើននាក់ត្រូវតុលាការ​សម្រេចដោះលែង​ព្រមៗ​គ្នានៅថ្ងៃទី១២វិច្ឆកានេះ។

ក្នុងចំណោមអ្នកដែលត្រូវបានដោះលែង​ មានអ្នកខ្លះបានអនុវត្តទោសចប់ និងភាគច្រើនផ្សេង​ទៀតត្រូវតុលាការប្រើវិធីកាត់តម្រឹមទោស ដោយភ្ជាប់លក្ខខណ្ឌហាម​មិនឱ្យធ្វើដំណើរទៅក្រៅប្រទេសនិងត្រូវស្ថិតក្រោមការឃ្លាំមើលពីអាជ្ញាធរ ។

អ្នកដែលត្រូវបានដោះលែងបានបង្ហាញក្ដីសប្បាយរីករាយ ដោយរត់ឱប​សាច់ញាតិ ខ្លះទៀតស្ទុះពរកូនតូច ខ្លះទៀតស្រែកយំខ្លាំងដោយក្ដីរំភើប និងនឹករលឹកឪពុកម្ដាយ​បងប្អូន។ ទោះ​យ៉ាង​ណាអ្នកដែលបានផ្ដល់បទសម្ភាសន៍ឱ្យអ្នកសារព័ត៌មាន សុទ្ធតែអះអាង​ថាពួក​គេទទួល​រងនូវភាពអយុត្តិធម៌។

ស្លៀកខោខ្លីពាក់អាវយឺត ស្បែកជើងផ្ទាត់ ក្បាលចងខ្សែរូបទង់ជាតិខ្មែរផងនោះ លោក រ៉ុង ឈុន ដើរចេញពីពន្ធនាគារ​ព្រៃសជាមួយ លោក សួង សុភណ្ឌ ក្រោមសំឡេងស្វាគមន៍ពីអ្នកគាំ​ទ្ររាប់​សិប​​​នាក់។

  លោក រ៉ុង ឈុន ស្រែកថា​៖ «តុលាការគ្រាន់តែជាឧបករណ៍នយោបាយរបស់អ្នកកាន់អំណាចប៉ុណ្ណោះ អារម្មណ៍​ខ្ញុំនៅតែរងសម្ពាធ ព្រោះការរស់នៅរបស់ខ្ញុំនៅក្រោមរង្វង់ដែលគេគូសឱ្យដើរខ្ញុំជាប់គុក១៥​ខែ១១ថ្ងៃ​​ដោយអយុត្តិធម៌!»។

អ្នកដែលត្រូវបានដោះលែងចេញពីពន្ធនាគារនៅថ្ងៃសុក្រនេះ រួមមាន លោក រ៉ុង ឈុន ប្រធាន​សភាពសហជីពកម្ពុជា និងអតីតសមាជិកគណៈកម្មាធិការជាតិរៀបចំការបោះឆ្នោត  លោក សួង សុភ័ណ្ឌ ប្រធានគណបក្សខ្មែរឈ្នះ  យុវជនខ្មែរថាវរៈមាន លោក ហ៊ុន វណ្ណៈ កញ្ញា ឈឿន ដារ៉ាវី លោក តុន និមល និងកញ្ញា ស កន្និកា។ ចំណែកក្រុមចលនាមាតាធម្មជាតិ​ចំនួន​៦នាក់​​​រួមមាន លោក ថុន រដ្ឋា លោក យឹម​ លាងហ៊ី   កញ្ញាឡុង គន្ធា   កញ្ញាស៊ុន រដ្ឋា កញ្ញាភួន កែវរស្មី និងយុវជន លី ចាន់ដារ៉ាវុធ។ ក្រុមស្ត្រីតវ៉ាចំនួន៦នាក់ដែលតវ៉ានៅ​មុខស្ថានទូតចិនកាល​ពី​ថ្ងៃទី២៣ខែតុលាឆ្នាំ២០២០ និងក្រុមអ្នកគាំទ្របក្សប្រឆាំង​ដែល​ចូលរួមតវ៉ាឱ្យដោះលែងលោក រ៉ុងឈុន ក៏ត្រូវបានដោះលែងផងដែរ។

នៅព្រឹកថ្ងៃសុក្រ សាលាឧទ្ធរណ៍បានកាត់ទោស លោក រ៉ុង ឈុន ឱ្យជាប់ពន្ធនាគារ២ឆ្នាំ តែអនុវត្តត្រឹម១៥ខែ ១១ថ្ងៃ ហើយទោសនៅសល់៨ខែ១៩ថ្ងៃទៀត ត្រូវបានព្យួរ ពីបទញុះញង់ដោយសារតែការអះ អាងរបស់លោកថា សហគមន៍មួយនៅតាមបណ្តោយព្រំដែនវៀតណាមបានបាត់​បង់​ដីអំឡុង ពេលបោះបង្គោលព្រំដែន។លោកក៏ត្រូវតុលាការដាក់ឱ្យស្ថិតនៅក្រោមការត្រួតពិនិត្យតាម ផ្លូវតុលាការរយៈពេល៣ឆ្នាំ ដោយអំឡុងពេល៣​ឆ្នាំនេះ​ បើសិនជាលោកត្រូវផ្លាស់ប្ដូរទីលំនៅ ចេញទៅក្រៅប្រទេស ត្រូវជូនដំណឹងដោយមានការឯកភាពពីតុលាការ។

ប្រធានគណបក្សខ្មែរឈ្នះ លោក សួង សុភ័ណ្ឌ មានប្រសាសន៍ថា លោកមិនបានប្រព្រឹត្តិ​ខុសច្បាប់ឡើយ។ លោកថា លោកនៅតែបន្តឆន្ទៈបម្រើសង្គម​និងលើកស្ទួយសិទ្ធិ​សេរី​ភាព​ក្នុង​ការបញ្ចេញមតិ ព្រមទាំងធ្វើនយោបាយដើម្បីលើកស្ទួយលទ្ធិប្រជាធិបតេយ្យ។

លោក សួង សុភ័ណ្ឌ និយាយថា៖ «ខ្ញុំធ្វើការងារដើម្បីប្រយោជន៍សង្គមជាតិតែអ្នកកាន់​អំណាចគេមិន​សប្បាយគេចាប់ខ្ញុំដាក់គុក។ ខ្ញុំរងនូវអយុត្តិធម៌រួចហើយ ដូច្នេះទៅថ្ងៃមុខខ្ញុំត្រូវតែបន្តឆន្ទៈការ​ពារ យុត្តិធម៌ជូនជនស្លូតត្រង់នឹងតស៊ូដើម្បីបុព្វហេតុសង្គមជាតិតទៅទៀត»។

កំណត់ត្រាពីមន្ត្រីអង្គការសង្គមស៊ីវិលឱ្យដឹងថា នៅថ្ងៃទី១២ខែវិច្ឆកានេះ តុលាការកាន់សំណុំ​រឿងផ្សេងៗ ហើយបានសម្រេចដោះលែងអ្នកមាននិន្នាការជំទាស់រដ្ឋាភិបាល ចំនួន​១៨នាក់ ដោយភ្ជាប់លក្ខខណ្ឌផ្សេងៗគ្នា។

សកម្មជនមាតាធម្មជាតិ៦នាក់ថតរូបជុំគ្នាបន្ទាប់ពីដោះលែងពីពន្ធនាគារនៅព្រលប់ថ្ងៃទី១២វិច្ឆកាឆ្នាំ២០២១។ រូបថតដោយ៖ លោកសាន់ ម៉ាឡា

កញ្ញាឡុង គន្ធា ជាសមាជិកចលនាមាតាធម្មជាតិដែលត្រូវចាប់ខ្លួន​ព្រោះមាន​គម្រោងធ្វើ​ដំ​ណើរម្នាក់ឯង​​ទៅ​ផ្ទះលោកនាយករដ្ឋមន្ត្រី ហ៊ុន សែន ដើម្បីបង្ហាញក្តីកង្វង់ពីការលុបបឹងតាមោក។ កញ្ញាក៏ត្រូវបានដោះលែងពីពន្ធនាគារ​នៅ​ព្រលប់​ថ្ងៃទី១២វិច្ឆកាដែរ។

គន្ធា លើកឡើងថា ៖ «ខ្ញុំនៅតែចង់បានយុត្តិធម៌ ព្រោះពួកខ្ញុំអត់មាន​បានធ្វើខុសដូចការចោទប្រកាន់របស់តុលាការទេ ខ្ញុំនៅតែទទូចស្នើសុំឱ្យតុលាការលើកលែង​ការចោទប្រកាន់ចំពោះពួកខ្ញុំ»។

ដំណើការដោះលែងអ្នកជំទាស់ពីពន្ធនាគារនេះមានការឃ្លាំមើលពីមហាជនរាប់រយនាក់ ដោយរាប់តាំងពីមន្ត្រីអង្គការសង្គមស៊ីវិល ប្រជាពលរដ្ឋ អ្នកសារព័ត៌មាន អ្នកនយោបាយនិង​អា​ជ្ញាធរដ្ឋាភិបាលផង។កម្លាំងនគរបាលរាប់សិបនាក់ក៏បានដាក់ពង្រាយនៅជិតពន្ធនាគារ​។

អតីតសមាជិកព្រឹទ្ធសភាមកពីបក្សប្រឆាំងនិងជាសមាជិកជាន់ខ្ពស់គណបក្សភ្លើងទៀន លោក ថាច់ សេដ្ឋា ស្នើ​ឱ្យគណបក្សកាន់អំណាចបន្ធូរបន្ថយស្ថានការណ៍​នយោបាយដើម្បីបង្ក​លក្ខណៈ​ងាយស្រួលដល់បរិយាកាសបោះឆ្នោតឃុំសង្កាត់នៅឆ្នាំ២០២២ខាងមុខ។

លោក ថាច់ សេដ្ឋា មានប្រសាសន៍៖«ខ្ញុំយល់ឃើញថា ការដោះលែងលោក រ៉ុង ឈុន និងអ្នកដ៏ទៃទៀត​ដោយមាន​ភ្ជាប់កល្ខខណ្ឌនេះ ប្រៀបដូចជាការដោះលែងពួកគាត់ពីគុកមានជញ្ជាំង​មកគុកឥតជញ្ចាំង​ដូច្នេះដែរ។​ហេតុ​នេះរដ្ឋាភិបាលគួរណាស់តែពីចារណាឡើងវិញ ធានាឱ្យមានសេរីភាពក្នុងការ​ធ្វើនយោបាយបាយឡើងវិញ»។ 

អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍​ថា លោកស្វាគមន៍ចំពោះការដោះលែងអ្នកមាននិន្នាការជំទាស់នេះ។ ទោះយ៉ាងណា លោក​នៅតែទទូចឱ្យមានការអនុវត្តច្បាប់ដោយឈរលើគោលការណ៍គោរពសិទ្ធិមនុស្ស។

លោក ស៊ឹង សែនករុណា មានប្រសាសន៍ថា៖ «សំណុំរឿងទាំងអស់នេះ ជាសំណុំរឿងនយោបាយ ដូច្នេះបើរដ្ឋា​ភិបាលចង់បន្ធូរស្ថានការណ៍នយោបាយនោះ ផ្លូវច្បាប់ក៏ធូរស្រាលតាមនោះដែរ។​យើងជា​សង្គម​ស៊ីវិលមិនចង់​ឃើញ​បែប​នេះទេ យើងចង់ឱ្យមានការគោរពសិទ្ធិមនុស្សនិងឈរលើ​មូលដ្ឋានច្បាប់ជាធរមាន»។

ខេមបូចា មិនអាចទាក់ទងអ្នកនាំពាក្យគណបក្សប្រជាជនកម្ពុជា លោក សុខ ឥសាន្ដ បានទេ​នៅថ្ងៃសុក្រនេះ។

លោក រ៉ុង ឈុន ប្ដេជ្ញាចិត្តថា គាត់នឹងមិននៅស្ងៀមឡើយ បើទោះបីជាមានការរឹតត្បិតពី ​សំណាក់អាជ្ញាធររដ្ឋាភិបាលក៏ដោយចុះ។ លោក រ៉ុង ឈុន មានប្រសាសន៍បន្ថែមថា៖ ​«ខ្ញុំនឹងប្រើជីវភាពនៅក្រៅ​គុករបស់​ខ្ញុំដើម្បីបុព្វហេតុការពារសិទ្ធិមនុស្ស សិទ្ធិកម្មករ និងសិទ្ធិគ្រូបង្រៀននៅកម្ពុជា»

425 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម