អាជ្ញាធរវៀតណាមនៅមិនទាន់ទទួលពលរដ្ឋខ្លួនដែលចាកចេញពីភ្នំពេញខណៈ ពួកគេកាន់តែជួបការលំបាក

ប្រជាពលរដ្ឋវៀតណាមប្រមាណ១០០គ្រួសារដែលអាជ្ញាធរកម្ពុជាតម្រូវឱ្យចាកចេញពីផ្ទៃទឹក​ក្នុងរាជធានីភ្នំពេញអះអាងថា ពួកគេកំពុងជួបការលំបាកវេទនារស់នៅលើផ្ទៃទន្លេ​ក្នុងទឹកដី​កម្ពុជាត្រង់ចណុចមួយក្នុងឃុំក្អមសំណ ខេត្តកណ្តាល ខណៈអាជ្ញាធរវៀតណាមមិន​ព្រមបើក​ព្រំដែនទទួលយកពួកគេ។​

លោក មីញ យ៉ាងកៃ ថ្លែងថា ក្នុងរយៈពេល៦ខែដែលលោកចាកចេញពីរាជធានីភ្នំពេញ ហើយ​ត្រូវជាប់គាំងនៅក្នុងខេត្តកណ្តាលជាប់ព្រំដែនវៀតណាម​នេះគឺលោកជួបការ​លំបាកខ្លាំងព្រោះ​មិនអាចប្រកបរបររកចំណូលអ្វីបាន ហើយម្យ៉ាងទៀតមួយរយៈចុងក្រោយនេះខ្យល់ខ្លាំង​បោក​បក់ផ្ទះទឹកធ្វើឱ្យពួកគាត់កាន់តែវេទនា។​

លោក យ៉ាងកៃ ថ្លែងថា លោកទន្ទឹងរង់ចាំរដ្ឋាភិបាលវៀតណាមទទួលលោកឱ្យទៅ​រស់​នៅក្នុងប្រទេសជាទឹកដីដូនតា​របស់លោកវិញ ប៉ុន្តែនៅមិនទាន់មានការឆ្លើយតបនោះទេ។​

លោក យ៉ាងកៃ៖ «ខ្ញុំសុំទៅវៀតណាមតែម្តង។ វៀតណាមគេមិនទាន់ឱ្យទៅ គេថា ចាំគិតមើល ហើយចាំប្រាប់ឱ្យយើងដឹង នៅដល់៦ខែហើយមិនទាន់ឮដំណឹងអីទេឥឡូវ»។​

ពលរដ្ឋវៀតណាមម្នាក់ទៀតដែលកំពុងរស់នៅលើផ្ទះទឹកនៅក្អមសំណលោក វ៉ វឹងវិន និយាយ​ថា បច្ចុប្បន្នដោយសារតែទឹកហូរខ្លាំង និងមានខ្យល់ផង បូករួមទាំងមិនអាច​រកចំណូលបាន​កាន់តែវេទនា។​

លោកវឹងវិន៖ «រកស៊ីអត់បានទៀត បងឯងគិតទៅ ហើយអត់មានលុយទិញអីវ៉ាន់ ទិញម្ហូបហូបផងរាល់ថ្ងៃនេះ។ អត់មានធ្វើការអីចូលលុយទេបងអើយបង វេទនាខ្លាំងណាស់បងអើយ»។​

ពលរដ្ឋវៀតណាមទាំងនេះ ដែលនិយាយភាសាខ្មែរមិនសូវច្បាស់បែបប៉ៃឡាំៗថ្លែងថា ពួកគាត់​បច្ចុប្បន្នទទួលបានការឧត្ថម្ភអង្ករពីសមាគមវៀតណាមខ្លះៗបន្តរស់ទាំងលំបាករង់ចាំដំណោះស្រាយពីខាងភាគីកម្ពុជា និងវៀតណាម។​

រហូតដល់មកដល់ចុងឆ្នាំ២០២១នេះ ទាំងរដ្ឋាភិបាលកម្ពុជា និងរដ្ឋាភិបាលវៀតណាមមិនទាន់​បង្ហាញជំហរណាមួយក្នុងការដោះស្រាយករណីជនជាតិវៀតណាមទាំងនេះនៅឡើយទេ។

អភិបាលស្រុកលើកដែក លោក ចាប ច័ន្ទវិទ្យា ទទួលស្គាល់ថា ស្ថានភាពពលរដ្ឋវៀតណាម ដែលកំពុងជាប់នៅក្នុងឃុំក្អមសំណនេះពិតជាមានការលំបាកដូចការលើកឡើងរបស់អ្នកទាំងនោះមែន។ លោកឱ្យដឹងថា ចំពោះត្រីដែលពលរដ្ឋវៀតណាមទាំងនោះចិញ្ចឹមក៏លក់មិនសូវ ដាច់ ហើយមិនសូវបានថ្លៃដែរព្រោះនៅទីនោះជាតំបន់សំបូរត្រីមិនដូចកាលនៅភ្នំពេញនោះ​ទេ។

លោក ច័ន្ទវិទ្យា ថ្លែងបន្តថា ពលរដ្ឋវៀតណាមទាំងនោះក៏តែងតែស្នើឱ្យលោកជួយអន្តរាគមន៍​ដើម្បីពន្លឿនឱ្យឆាប់បានទៅវៀតណាមដែរ ប៉ុន្តែលោកថា ការស្នើនេះហួសពីសមត្ថភាព​របស់​លោកជាភិបាលស្រុក។

លោក ច័ន្ទវិទ្យា​ មានប្រសាសន៍ថា៖ «យើងអត់មានសិទ្ធិអំណាចណាត្រូវអន្តរាគមន៍កើតទេ សំខាន់ខាងភាគីវៀតណាមទេ។ ក្នុងនាមអាជ្ញាធររបស់យើងគ្រាន់តែ រក្សាសន្តិសុខឱ្យគាត់ ហើយចាក់វ៉ាក់សាំងឱ្យគាត់ ដែលបានចាក់ដល់ដូសទី៣ទាំងអស់គ្នាហើយ»។​

អ្នកនាំពាក្យក្រសួងការបរទេសកម្ពុជាលោក កុយ គួង មិនឆ្លើយសំនួរលើបញ្ហា​ជនជាតិ​វៀតណាមទាំងនេះទេ ព្រោះថាមិនមែនជាភារកិច្ចរបស់ក្រសួងការបរទេស ដោយលោកបង្វែរ​ឱ្យសួរទៅខាងក្រសួងមហាផ្ទៃវិញ។​

ខេមបូចាមិនអាចសុំការឆ្លើយតបតាមទូរស័ព្ទពីអ្នកនាំពាក្យអគ្គនាយកដ្ឋានអន្តោប្រវេសន៍នៃ​ក្រសួងមហា​ផ្ទៃលោក កែវ វណ្ណថន បានទេ ដោយលោកទូរស័ព្ទហើយប្រាប់ថាជាប់រវល់។ ប៉ុន្តែលោកបានឆ្លើយសំណួរតាមតេឡេក្រាម​ នៅពេលក្រុមការងារខេមបូចាផ្ញើទៅ។ តែយ៉ាងណាក៏ដោយ លោកមិនបានឆ្លើយនូវសំណួរពាក់ព័ន្ធនឹងស្ថានភាពពលរដ្ឋវៀតណាម​ដែលជម្លៀសចេញពីភ្នំពេញនោះទេ គឺគ្រាន់តែប្រាប់ពីដំណើរការនីតិវិធីច្បាប់លើជន​អន្តោប្រវេសន៍នៅកម្ពុជាប៉ុណ្ណោះ។​

លោក កែវ វណ្ណថន មានប្រសាសន៍ថា៖ «កន្លងមក អគ្គនាយកដ្ឋានអន្តោប្រវេសន៍ បានធ្វើជំរឿន និងបាន​ធ្វើ​ការដកហូតឯកសាររដ្ឋបាលកម្ពុជាមិនប្រក្រតីពីជនបរទេស»។​ 

ខេមបូចា ព្យាយាមសាកសួរទៅស្ថានទូតវៀតណាមប្រចាំកម្ពុជាទាំងតាមទូរស័ព្ទ តាមអ៊ីម៉ែល និងតាមផេកហ្វេសប៊ុកប៉ុន្តែមិនមានការឆ្លើយតបនោះទេ។​

ប្រធានសមាគមវៀតណាមប្រចាំកម្ពុជា លោក ស៊ឹម ជី មានប្រសាសន៍ថា ពលរដ្ឋវៀតណាម​ដែលកំពុងជាប់គាំងនៅចំណុចក្អមសំណនោះ មិនមានឯកសារបញ្ជាក់ថា ជាពលរដ្ឋ​វៀតណាមនោះទេ។​

លោក ស៊ឹម ជី មានប្រសាសន៍ថា៖ «អត់ចាប់បញ្ជូនគាត់ទៅវៀតណាមទេ បើគាត់អត់​មាន​ឯកសារអីបញ្ជាក់ជាជនជាតិវៀតណាមផងហ្នឹង។ គាត់រស់នៅកម្ពុជាច្រើនជំនាន់ហើយ»។​

នៅថ្ងៃទី២ ខែមិថុនា ឆ្នាំ២០២១ សាលារាជធានីភ្នំពេញ បានចេញលិខិតមួយដោយតម្រូវ​ឱ្យអ្នក​រស់នៅលើទឹកជាង១ ០០០គ្រួសារភាគច្រើនជាជនជាតិវៀតណាមរើចេញក្នុងពេល១សប្តាហ៍។

បើតាមលោក ស៊ឹម ជី ជនជាតិវៀតណាមប្រមាណ១ ០០០គ្រួសារដែលជម្លៀសចេញពីផ្ទៃទឹក​ក្នុងរាជធានីភ្នំពេញនោះគឺ១០០គ្រួសារជាប់គាំងនៅព្រំដែន ជាង៤០០គ្រួសារឡើងគោក​ជួល​ដី ជួលផ្ទះស្នាក់នៅក្នុងរាជធានីភ្នំពេញ និងផ្សេងៗទៀតរស់នៅលើផ្ទៃទឹកក្នុងខេត្តកណ្តាល ក្បែរព្រំប្រទល់រាជធានីភ្នំពេញ។

កាលពីខែមិថុនា ឆ្នាំ២០២១ ក្រោយពេលអាជ្ញាធររាជធានីភ្នំពេញប្រកាសវិធានតម្រូវ​ឱ្យអ្នករស់​នៅលើទឹកចាកចេញដើម្បីរៀបចំសណ្តាប់ធ្នាប់ និងបរិស្ថាននោះ លោក Vu Quang Minh ឯកអគ្គរដ្ឋទូតវៀតណាមប្រចាំកម្ពុជា បានធ្វើដំណើរតាមទូកដើម្បីសាកសួរសុខទុក្ខពលរដ្ឋ​វៀតណាមដែលត្រូវជម្លៀសចេញ។ លោកបានសរសេរសារលើហ្វេសប៊ុកផ្ទាល់ខ្លួនរិះគន់​ចំពោះចំណាត់ការសាលារាជធានីភ្នំពេញថា ធ្វើលឿនពេកនាំឱ្យប៉ះពាល់​ដល់អ្នករស់នៅលើ​ទឹក។

ជាការកត់សម្គាល់ក្នុងដំណើរទស្សនកិច្ចរបស់ប្រធានាធិបតីវៀតណាម​លោក Nguyen Xuan Phuc នៅកម្ពុជានៅថ្ងៃទី២០ និង២១ខែធ្នូនេះ មិនបានផ្តាំផ្ញើឱ្យកម្ពុជាយកចិត្តទុកដាក់​លើ​ពលរដ្ឋវៀតណាមដូចមុនៗទេ។ ប៉ុន្តែតាមការចុះផ្សាយរបស់សារព័ត៌មានវៀតណាម​ vnexpress គឺនៅក្នុងកិច្ចប្រជុំមួយនៅក្នុងស្ថានទូតវៀតណាមក្នុងរាជធានីភ្នំពេញគឺលោក Nguyen Xuan Phuc បានប្តេជ្ញាសម្របសម្រួលឱ្យពលរដ្ឋវៀតណាមដែលជម្លៀស​ចេញ​ពី​ផ្ទៃទឹកទាំងនោះក្លាយជាពលរដ្ឋរស់នៅកម្ពុជាស្របច្បាប់។​

នៅក្នុងកិច្ចប្រជុំដែលមានតំណាងស្ថានទូតវៀតណាម អ្នកជំនួញ និងសមាគមន៍វៀតណាម​ប្រចាំកម្ពុជានេះ លោក Nguyen Xuan Phuc លើកឡើងថា នៅកម្ពុជាគ្មានសហគមន៍​ណា​ដែលលំបាកវេទនាជាងសហគមន៍វៀតណាមនោះទេ។ លោកលើកឡើងបែបនេះដោយ​សំអាងថា ពលរដ្ឋវៀតណាមដែលកើតនៅកម្ពុជាមិនមានឯកសារសម្គាល់ផ្លូវច្បាប់អ្វី​ច្បាស់​លាស់ទេ។​

លោក Nguyen Xuan Phuc មានប្រសាសន៍ថា ៖ «មិនមានឯកសារផ្លូវច្បាប់ច្បាស់លាស់។ ពួកគេភាគច្រើនមិនមានឯកសារបញ្ជាក់អត្តសញ្ញាណដូចជាអត្តសញ្ញាណប័ណ្ណ ឬ លិខិត​ឆ្លងដែននោះទេ»។​

របាយការណ៍អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបង្ហាញថា គិតត្រឹមពាក់​កណ្តាលឆ្នាំ២០២០ នៅកម្ពុជាមានជនបរទេសជាង១១ម៉ឺននាក់ក្នុងនោះជិត៧ម៉ឺននាក់ជា​ជនជាតិវៀតណាម។

លោក សឹង សែនករុណា មន្ត្រីជាន់ខ្ពស់នៃសមាគមការពារសិទ្ធិមនុស្សអាដហុក យល់ឃើញ ថា ចំណាត់ការកន្លងទៅទាំងរដ្ឋាភិបាលកម្ពុជា និងរដ្ឋាភិបាលវៀតណាម ហាក់ដូចជាមាន ភាពខ្វះចន្លោះក្នុងការគិតដល់សិទ្ធិពលរដ្ឋវៀតណាមទាំងនេះ។ លោកបន្តថា ក្នុងដំណាក់ការ​នេះ ពេលដែលពលរដ្ឋទៅដល់ព្រំដែនហើយរដ្ឋាភិបាលវៀតណាមត្រូវចេញមុខដោះស្រាយ​មិនត្រូវទម្លាក់បន្ទុកនេះឱ្យរដ្ឋាភិបាលកម្ពុជាទៀតទេ។

ទោះយ៉ាងណាលោក សែនករុណា នៅតែជំរុញឱ្យភាគីកម្ពុជានិងវៀតណាម សហការគ្នា​ដោះ​ស្រាយបញ្ហានេះឱ្យបានឆាប់។

លោក សែនករុណា បន្ថែមថា៖ «គម្បីមានការពិនិត្យ និងជជែកគ្នាឡើងវិញរវាងរដ្ឋាភិបាល​ទាំង២ ដើម្បីរកដំណោះស្រាយជូនពួកគាត់ មិនគួរណាឱ្យគាត់នៅមានភាព​តែលតោលអត់​មានភាពប្រាកដប្រជាចំពោះវាសនារបស់ពួកគាត់ចឹងទេ»៕