លោក ស ឡុងដេត ដែលជាមន្ត្រីជាន់ខ្ពស់នៃគណបក្សភ្លើងទៀន បានសុំទោសលោកនាយករដ្ឋមន្ត្រី ហ៊ុន សែន បន្ទាប់ពីគាត់ត្រូវបានគំរាមមិនឱ្យចាកចេញពីប្រទេសកម្ពុជានៅថ្ងៃទី១៣ ខែមិថុនា ខណៈដែលលោកព្យាយាមចាកចេញទៅប្រទេសថៃ។
លោក ស ឡុងដេត ជាប្រធានប្រតិបត្តិរាជធានីភ្នំពេញ និងជាសមាជិកគណៈកម្មការនាយក នៃគណបក្សភ្លើងទៀន បានចេញវីដេអូ សុំទោសលោកនាយករដ្ឋមន្រ្តី ហ៊ុន សែន និង រដ្ឋាភិបាល ដោយបានសារភាពថា ខ្លួនបាននិយាយជ្រុលហួសក្នុងពេលកន្លងមក។ ក្នុងវីដេអូ ដដែល លោកបានសុំលាឈប់ពីសមាជិកគណៈកម្មការនាយក និងសុំលាឈប់ ពីប្រធាន ប្រតិបត្តិគណបក្សភ្លើងទៀនក្នុងរាជធានីភ្នំពេញ និងសុំផ្តាច់ខ្លួនចេញពីលោក សម រង្ស៊ី។
លោកបញ្ជាក់ថា៖ «ខ្ញុំសុំសំណូមពរដល់សម្តេច ទទួលខ្ញុំបាទ ខ្ញុំសុំចូលរួមជាមួយគណបក្សប្រជាជន ជាពិសេសសុំចូលរួមជាមួយសម្តេចក្នុងនាមជាកូនខ្មែរម្នាក់ដើម្បីធ្វើការងារបម្រើប្រទេសជាតិ»។
លោក ឡុងដេត ត្រូវបានលោក ហ៊ុន សែន បញ្ជាឱ្យចូលមកឆ្លើយជាមួយតុលាការបន្ទាប់លោកព្យាយាមចាកចេញទៅប្រទេសថៃ ប៉ុន្តែមិនបានសម្រេច។
នៅព្រឹកថ្ងៃទី១៣ ខែមិថុនា ឆ្នាំ២០២៣ ក្នុងពេលជួបសំណេះសំណាលជាមួយកម្មកររោងចក្រប្រមាណជិត២ម៉ឺននាក់ ក្នុងខណ្ឌពោធិ៍សែនជ័យ រាជធានីភ្នំពេញ លោកនាយករដ្ឋមន្រ្តី ហ៊ុន សែន បានថ្លែងថា លោកបានស្នើឱ្យលោក ស ឡុងដេត ត្រឡប់មកផ្ទះវិញហើយត្រូវចូលខ្លួនទៅឆ្លើយជាមួយតុលាការ រឿងលោកចោទប្រកាន់គណៈកម្មការស៊ីហ្គេមមានភាពធ្ងន់ធ្ងរពេក។
ក្នុងការអំពាវនាវនោះលោកនាយករដ្ឋមន្រ្តីបន្តថា កាលពីយប់ថ្ងៃទី១២ ខែមិថុនា នេះ លោក ឡុងដេត បានចាកចេញពីភ្នំពេញ ដើម្បីឆ្លងចូលទៅប្រទេសថៃ តែថៃមិនបានឱ្យលោកឆ្លងចូលទៅទេ ដូច្នេះមិនបាច់ព្យាយាមរត់ទេ បើរត់ទៅប្រទេសថៃលោកនឹងសុំឱ្យថៃចាប់ខ្លួនមកវិញដដែល។
លោកនាយករដ្ឋមន្រ្តីលើកឡើងថា ដីកាតុលាការបានហាមលោក ឡុងដេត ទៅក្រៅប្រទេស បើចេញទៅក្រៅប្រទេសនឹងត្រូវចាប់ខ្លួនភ្លាមនៅតាមទល់ដែន។
លោក ហ៊ុន សែន បន្ថែមថា៖ «អ្នកឯងនិយាយក្នុងចំណោមមនុស្ស៣០នាក់ចាត់ទុកថា ជាការបរិហារកេរ្តិ៍ហើយ ចឹងបាច់ចាំរត់ទេ ស ឡុងដេត អើយ លោកឯងចេញទៅណាក៏អត់រួចដែរ ចេញទៅណាក៏មិនរួចដែរ អញ្ជើញមកវិញមក»។
គួរបញ្ជាក់ថា លោក ស ឡុងដេត ត្រូវបានគណៈកម្មការរៀបចំការប្រកួតកីឡាអាស៊ីអាគ្នេយ៍លើកទី៣២ ថ្កោលទោសយ៉ាងដាច់អហង្ការ ដោយចោទថា លោកបាននិយាយបំភ្លើសខុសពីការពិត ក្នុងគោលបំណងកេងចំណេញខាងនយោបាយ និងបង្ខូចកិត្តិយស សេចក្តីថ្លៃថ្នូរ និងកិច្ចខិតខំប្រឹងប្រែង របស់ គ.ជ.ប.អ និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្រោមការដឹកនាំរបស់លោកនាយករដ្ឋមន្រ្តី ហ៊ុន សែន ក្នុងការរៀបចំព្រឹត្តិការណ៍ស៊ីហ្គេម និងប៉ារ៉ាហ្គេម ឆ្នាំ២០២៣។
នៅក្នុងសេចក្តីថ្លែងការណ៍ព័ត៌មានរបស់ គ.ជ.ប.អ បង្ហាញពីពាក្យសម្តីដែលត្រូវចោទប្រកាន់ទៅលើលោក ស ឡុងដេត ដែលលោកបាននិយាយនៅក្នុងបន្ទប់ប្រជុំមួយក្នុងខណ្ឌឫស្សីកែវ កាលពីថ្ងៃទី១០ ខែមិថុនា ឆ្នាំ២០២៣ កន្លងទៅដែលមានអត្ថន័យថា៖ «ស៊ីហ្គេម (រៀបចំដោយ គ.ជ.ប.អ)ទាំងមូលមិនដែលបានបង្ហាញអំពីវប្បធម៌ ពីប្រពៃណី បង្ហាញពីសក្តានុពលនៃវប្បធម៌សេដ្ឋកិច្ចរបស់ខ្មែរទេ… និងមានមនុស្សតែប៉ុន្មាននាក់តែប៉ុណ្ណោះបានទៅមើល [ព្រឹត្តិការណ៍ស៊ីហ្គេម] និងអ្វីៗជារឿងក្លែងក្លាយទាំងអស»។
លោក គីមសួរ ភីរិទ្ធ អ្នកនាំពាក្យគណបក្សភ្លើងទៀន យល់ថា ការដកខ្លួនចេញពីបក្សភ្លើងទៀនរបស់លោក ស ឡុងដេត គឺជាសិទ្ធិរបស់បុគ្គលទេ ហើយការចេញវីដេអូ សុំទោស និងសុំដកខ្លួនអាចជាការដឹងកំហុសទើបលោក ឡុងដេត ធ្វើបែបនេះ។ លោកបន្តថា ទោះបីជាមានអ្នកដកខ្លួនចេញពីបក្សក្តីក៏ធនធានមនុស្សគឺនៅតែមាន ហើយការដកខ្លួននេះក៏មិនប៉ះពាល់ដល់សមាជិកដទៃទៀតដែរ។
លោកបន្ថែមថា៖ «វាមិនអីទេព្រោះអីគណបក្សភ្លើងទៀនអត់បានឈរឈ្មោះបោះឆ្នោតអីផងហ្នឹង វាមានទៅប៉ះពាល់អី ហើយគាត់មានបញ្ហាផ្ទាល់ខ្លួនចឹងគេយល់ហើយ»។
លោក ភីរិទ្ធ ក៏បានថ្លែងអំណរគុណចំពោះលោក ឡុងដេត ដែលធ្លាប់បានជួយគណបក្សភ្លើងទៀនរហូតមកពេលនេះហើយសង្ឃឹមថាលោក ឡុងដេត អាចដោះស្រាយបញ្ហាដែលកំពុងជួបនេះរួចចុះ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ថ្លែងថា កន្លងមកលោកនាយករដ្ឋមន្រ្តី ហ៊ុន សែន ធ្លាប់បានប្រកាសជាចំំហរួចហើយថាចំពោះបងប្អូនប្រជាពលរដ្ឋទូទៅទោះបីជាមាននិន្នាការនយោបាយផ្សេងគ្នា ឬនៅគណបក្សណាក៏ដោយជាពិសេសអ្នកដែលនៅក្នុងគណបក្សប្រឆាំងដែលធ្លាប់មានប្រវត្តិជូរចត់ជាមួយលោកនាយករដ្ឋមន្រ្តី ឬគណបក្សប្រជាជនកម្ពុជាប្រសិនបើសមីជនផ្តាច់ខ្លួនចេញពីលោក សម រង្ស៊ី គឺសម្តេចនឹងស្វាគមន៍។
លោក សុខ ឥសាន បានបន្តថា លោក ស ឡុងដេត ត្រូវបានស្វាគមន៍ឱ្យចូលមប្រើជីវភាពនយោបាយជាមួយគណបក្សប្រជាជនកម្ពុជា បន្ទាប់ពីលោកបានចេញវីដេអូសុំទោស និងដកខ្លួនចេញពីគណបក្សភ្លើងទៀន និងលោក សម រង្ស៊ី។
លោក សុខ ឥសាន បានបន្ថែមថា៖ «យើងឃើញថាគាត់បានបង្ហោះវីដេអូសុំទោសហើយ និងសូមស្ម័គ្រចិត្តចូលរួមជាមួយជីវភាពនយោបាយជាមួយគណបក្សប្រជាជនកម្ពុជាហើយហើយ ហើយឆ្លើយតបទៅនឹងការសុំទោសរបស់លោក [ស ឡុងដេត] នេះយើងឃើញថា សម្តេចលោកស្វាគមន៍ហើយ ហើយលោកបានណែនាំឱ្យរដ្ឋមន្រ្តីក្រសួងយុត្តិធម៌ធ្វើការជាមួយតុលាការដើម្បីដោះស្រាយបញ្ហា [ស ឡុងដេត] រួចហើយ»។
