ក្រុមអធិការកិច្ចកូរ៉េខាងត្បូងដឹកនាំដោយលោកស្រី គីម ជីណា អនុរដ្ឋមន្ត្រីការបរទេសទី២ បានមកដល់កម្ពុជានាថ្ងៃព្រហស្បតិ៍នេះ មួយថ្ងៃបន្ទាប់ពីទីក្រុងសេអ៊ូលបានចេញបម្រាមការធ្វើដំណើរទៅកាន់ផ្នែកខ្លះនៃប្រទេសកម្ពុជា ដោយសារការព្រួយបារម្ភថាពលរដ្ឋកូរ៉េកំពុងរងការជួញដូរចូលទៅក្នុងទីតាំងឆបោកតាមប្រព័ន្ធបច្ចេកវិទ្យា។
លោកស្រី គីម បានជួបពិភាក្សាជាមួយលោកនាយករដ្ឋមន្ត្រី ហ៊ុន ម៉ាណែត ដើម្បីពិភាក្សាអំពីបទឧក្រិដ្ឋដែលពាក់ព័ន្ធនឹងជនជាតិកូរ៉េ ផែនការបញ្ជូនជនដែលឃាត់ខ្លួនក្នុងប្រតិបត្តិការបង្ក្រាបការឆបោកត្រឡប់ទៅវិញ និងវិធីសាស្ត្រក្នុងការពង្រឹងកិច្ចសហប្រតិបត្តិការលើឧក្រិដ្ឋកម្មឆ្លងដែន។
ជំនួបនេះធ្វើឡើងបន្ទាប់ពីមានករណីនិស្សិតកូរ៉េម្នាក់បានស្លាប់ដែលត្រូវបានគេរាយការណ៍ថាត្រូវបានទទួលរងទារុណកម្មរហូតបាត់បង់ជីវិតពីក្រុមឧក្រិដ្ឋជនជនជាតិចិនដែលធ្វើប្រតិបត្តិការពីទីតាំងដ៏ល្បីមួយនៅកម្ពុជាហើយជាប់ពាក់ព័ន្ធនឹងមជ្ឈមណ្ឌលឆបោកតាមប្រព័ន្ធបច្ចេកវិទ្យាដែលប្រើប្រាស់កម្លាំងពលកម្មដោយបង្ខំ។ សមត្ថកិច្ចកម្ពុជាបានចាប់ខ្លួនជនសង្ស័យជាជនជាតិចិនចំនួន៣នាក់ និងកំពុងតាមចាប់ខ្លួនមនុស្ស២នាក់បន្ថែមទៀតពាក់ព័ន្ធនឹងករណីនេះ។
មន្ត្រីកូរ៉េប៉ាន់ប្រមាណថា មានពលរដ្ឋរបស់ខ្លួនប្រហែល ១ ០០០នាក់កំពុងជាប់ពាក់ព័ន្ធ ដែលមានទាំងអ្នករងគ្រោះដោយការជួញដូរ ឬដោយស្ម័គ្រចិត្ត ក្នុងបណ្ដាញឧក្រិដ្ឋកម្មដែលបានរៀបចំឡើងនៅទូទាំងប្រទេសកម្ពុជា។ គេជឿជាក់ថាទីតាំងឆបោករាប់រយកន្លែងនៅក្នុងប្រទេសនេះ ដែលភាគច្រើនគ្រប់គ្រងដោយក្រុមឧក្រិដ្ឋជនចិន បានធ្វើការជួញដូរមនុស្សជាង១៥០ ០០០នាក់មកពីបណ្ដាប្រទេសផ្សេងៗ។
កម្ពុជាកំពុងស្ថិតក្រោមសម្ពាធអន្តរជាតិកាន់តែខ្លាំងឡើងចំពោះការផ្ដល់ទីជម្រកដល់ប្រតិបត្តិការឆបោកខុសច្បាប់។ កាលពីថ្ងៃពុធ សហរដ្ឋអាមេរិកបានដាក់ទណ្ឌកម្មលើក្រុមហ៊ុន Prince ដែលមានមូលដ្ឋាននៅរាជធានីភ្នំពេញ ដោយរឹបអូសទ្រព្យសម្បត្តិរាប់ពាន់លានដុល្លារ និងចាត់ទុកថាជាអង្គការឧក្រិដ្ឋកម្មឆ្លងដែនដែលធ្វើប្រតិបត្តិការបណ្ដាញឆបោកនិងជួញដូរទ្រង់ទ្រាយធំ។
លោកនាយករដ្ឋមន្ត្រី ហ៊ុន ម៉ាណែត បានសរសេរនៅលើទំព័រហ្វេសប៊ុករបស់លោកថា ការពិភាក្សាជាមួយលោកស្រី គីម ជីណា បានផ្តល់ «លទ្ធផលវិជ្ជមានជាច្រើន»។
លោកបានបន្តថា៖ «យើងក៏បានពិភាក្សាគ្នា ពាក់ព័ន្ធនឹងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាពិសេសការឆបោកតាមប្រព័ន្ធបច្ចេកវិទ្យា ដោយបានគូសបញ្ជាក់អំពីកិច្ចសហប្រតិបត្តិការជាច្រើនឆ្នាំកន្លងមក រវាងអាជ្ញាធរកម្ពុជា និងអាជ្ញាធរកូរ៉េ ហើយដែលបានសម្រេចនូវលទ្ធផលល្អជាផ្លែផ្កាជាច្រើនរួចមកហើយ»។ លោកក៏បានកត់សម្គាល់ពីការធ្វើឱ្យប្រសើរឡើងនូវទំនាក់ទំនងទ្វេភាគីក្នុងឆ្នាំ២០២៤ផងដែរ។
លោកបានបន្ថែមថា៖ «កម្ពុជា និងកូរ៉េ នឹងបន្តពង្រឹងកិច្ចសហប្រតិបត្តិការរួមគ្នាដើម្បីបង្ការ ទប់ស្កាត់ និងប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា ឱ្យមានប្រសិទ្ធភាពខ្ពស់ សំដៅចូលរួមចំណែកថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម»។
លោកស្រី គីម មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។
រដ្ឋាភិបាលកូរ៉េខាងត្បូងក៏គ្រោងនឹងបង្កើត «ការិយាល័យពិសេស»មួយនៅកម្ពុជាដើម្បីជួយជនរងគ្រោះដែលត្រូវបានជួញដូរចូលទៅក្នុងទីតាំងបោកបញ្ឆោត។ មន្ត្រីបាននិយាយថា គំនិតផ្តួចផ្តើមនេះនឹងក្លាយជារបៀបវារៈសំខាន់មួយនៅក្នុងកិច្ចប្រជុំកំពូលនគរបាលអន្តរជាតិឆ្នាំ ២០២៥ នៅទីក្រុងសេអ៊ូល ចាប់ពីថ្ងៃទី២០ ដល់ថ្ងៃទី២៣ ខែតុលា។
កិច្ចប្រជុំរវាងមន្ត្រីអនុវត្តច្បាប់កូរ៉េខាងត្បូង និងកម្ពុជានៅក្នុងកិច្ចប្រជុំកំពូលនេះ ត្រូវបានគេរំពឹងថា នឹងបញ្ចប់ដោយការចុះហត្ថលេខាលើអនុស្សរណៈនៃការយោគយល់គ្នាដើម្បីឱ្យការបង្កើតការិយាល័យនេះមានលក្ខណៈជាផ្លូវការ។
គណៈប្រតិភូកូរ៉េខាងត្បូង ដែលរួមមានទីប្រឹក្សាសន្តិសុខផងដែរនោះ បានលើកឡើងនៅថ្ងៃព្រហស្បតិ៍ថា ពួកគេមានបំណងពិភាក្សាអំពីលទ្ធភាពនៃការបញ្ជូនជនជាតិកូរ៉េខាងត្បូងជាង ៦០នាក់ ដែលកំពុងត្រូវបានឃុំខ្លួនដោយអាជ្ញាធរអន្តោប្រវេសន៍កម្ពុជា បន្ទាប់ពីមានការបង្រ្កាបទីតាំងឆបោកកាលពីពេលកន្លងទៅ។ មន្ត្រីបាននិយាយថា ពួកគេស្ថិតក្នុងចំណោមជនជាតិកូរ៉េខាងត្បូងប្រហែល ៩០នាក់ ដែលត្រូវបានចាប់ខ្លួនកំឡុងពេលមានការបង្រ្កាបកាលពីខែកក្កដា និងខែកញ្ញា។
នគរបាលជាតិកម្ពុជាបាននិយាយនៅក្នុងសេចក្ដីថ្លែងការណ៍មួយកាលពីល្ងាចថ្ងៃព្រហស្បតិ៍ថា ជនដែលត្រូវឃុំខ្លួនចំនួន ៥៩នាក់ នឹងត្រូវបានបញ្ជូនត្រឡប់ទៅប្រទេសកូរ៉េវិញនៅថ្ងៃទី១៧ ខែតុលា។ នៅមិនទាន់ច្បាស់ថាតើបុគ្គលដែលនៅសេសសល់ដែលត្រូវបានមន្ត្រីកូរ៉េខាងត្បូងកំណត់អត្តសញ្ញាណនោះ ត្រូវបានបញ្ជូនត្រឡប់ទៅវិញហើយឬនៅនោះទេ៕
ប្រែសម្រួលពីអត្ថបទភាសាអង់គ្លេស៖ South Korean Team Visits Cambodia After Travel Ban on Scam Hotspots
