មន្ត្រីកម្ពុជាបានលើកឡើងថា អាជ្ញាធរថៃបានបិទច្រករបៀងទាំងអស់ និងកាត់បន្ថយម៉ោងចេញចូលតាមច្រកតំបន់ និងច្រកអន្តរជាតិក្នុងខេត្តបន្ទាយមានជ័យ កាលពីរសៀលថ្ងៃសៅរ៍ ដែលបណ្តាលឱ្យមានភាពតានតឹងខ្លាំងឡើង បន្ទាប់ពីមានការប៉ះទង្គិចគ្នាយ៉ាងសាហាវនៅជិតតំបន់មានជម្លោះតាមបណ្តោយព្រំដែនខេត្តព្រះវិហារកាលពីជាងមួយសប្តាហ៍មុន។
លោក អ៊ុំ រាត្រី អភិបាលខេត្តបន្ទាយមានជ័យ បានប្រាប់ សារព័ត៌មានខេមបូចា ថា នៅវេលាម៉ោង៤៖១៦នាទីរសៀល ថ្ងៃទី៧ ខែមិថុនា ភាគីថៃបានបិទច្រកទ្វារអន្តរជាតិប៉ោយប៉ែត ខណៈយោធាថៃសម្រេចបិទច្រករបៀងតាមព្រំដែនដែលស្ថិតនៅក្នុងខេត្តបន្ទាយមានជ័យជាឯកតោភាគី។
យោងតាមសារព័ត៌មានក្នុងស្រុកពីទីក្រុងប៉ោយប៉ែត ដែលបានបង្ហោះវីដេអូ ពលរដ្ឋខ្មែរប្រញាប់ប្រញាល់ចាកចេញពីច្រកទ្វារអន្តរជាតិប៉ោយប៉ែត បានឲ្យដឹងថា ភាគីថៃបានបញ្ជាឲ្យពលរដ្ឋខ្មែរចាកចេញនៅម៉ោង៤ល្ងាច ហើយវីដេអូនេះក៏បង្ហាញពីហ្វូងមនុស្សនៅច្រកព្រំដែន ខណៈពលរដ្ឋខ្មែរចាកចេញពីប្រទេសថៃ ហើយពលរដ្ឋថៃជាច្រើននាក់ក៏កំពុងចាកចេញពីកម្ពុជាផងដែរ។
នាយឧត្តមសេនីយ៍ទោ ប៉ិច វណ្ណា ប្រធានទំនាក់ទំនងព្រំដែនកម្ពុជា-ថៃ នៃកងយោធពលខេមរភូមិន្ទ បានលើកឡើងថា ច្រករបៀងទាំងអស់រវាងខេត្តបន្ទាយមានជ័យ និងខេត្តថៃ ត្រូវបានបិទតាំងពីព្រឹកថ្ងៃទី៧ ខែមិថុនា ឆ្នាំ២០២៥ ប៉ុន្តែច្រកតំបន់ រួមមាន ច្រកបឹងត្រកួន ម៉ាឡៃ និងច្រកស្ទឹងបត់ ព្រមទាំងច្រកទ្វារអន្តរជាតិប៉ោយប៉ែត ត្រូវបានកាត់បន្ថយម៉ោងចេញចូល។
លោក វណ្ណា មានប្រសាសន៍ថា៖ «ជាការពិត ច្រករបៀងទាំងអស់ក្នុងខេត្តបន្ទាយមានជ័យត្រូវបានបិទដោយអាជ្ញាធរថៃបិទតាំងពីព្រឹកមិញ ហើយច្រកតំបន់និងអន្តរជាតិក៏ត្រូវបានកាត់បន្ថយម៉ោងចេញចូល»។
លោកបានបន្តថា ជាធម្មតា ច្រកទ្វារអន្តរជាតិប៉ោយប៉ែត បើកពីម៉ោង ៧ព្រឹក ដល់ម៉ោង ៦ល្ងាច ប៉ុន្តែពេលនេះ អាជ្ញាធរថៃ បើកពីម៉ោង ៨ព្រឹក ដល់ម៉ោង ១២ថ្ងៃត្រង់ ហើយជាធម្មតា ច្រកទ្វារអន្តរជាតិប៉ោយប៉ែត បើកពីម៉ោង ៦ព្រឹក ដល់ម៉ោង ១០យប់ ប៉ុន្តែចាប់ពីថ្ងៃស្អែក ថៃនឹងចាប់បើកពីម៉ោង ៨ព្រឹក ដល់ម៉ោង ៤រសៀល។
លោក វណ្ណា បន្តថា លោកមិនទាន់ដឹងនៅឡើយទេថាតើសម្រាប់ច្រកនៅខេត្តផ្សេងទៀតដែលជាប់ជាមួយខេត្តមួយចំនួននៃប្រទេសថៃបានបិទ ឬអត់នោះទេ ព្រោះលោកមិនទាន់ទទួលបានព័ត៌មានច្បាស់នៅឡើយ ហើយសម្រាប់ខេត្តបន្ទាយមានជ័យលោកទទួលបានព័ត៌មាននៅរសៀលថ្ងៃនេះ។
លោកបានបន្ថែមថា ការបិទច្រករបៀង និង កាត់បន្ថយម៉ោងចេញចូលនៃច្រកតំបន់ និងច្រកអន្តរជាតិ បានធ្វើឱ្យប៉ះពាល់ដល់ប្រជាជននៃប្រទេសទាំងពីរ ដែលធ្វើដំណើរទៅមកប្រកបរបររកស៊ីប្រចាំថ្ងៃ និងជាពិសេស ប្រជាពលរដ្ឋខ្មែរដែលរស់នៅតាមខេត្តជាប់ព្រំដែនកម្ពុជា-ថៃ ដែលពួកគេទៅធ្វើការនៅក្នុងប្រទេសថៃនៅពេលព្រឹក ហើយពួកគេត្រឡប់មកផ្ទះវិញនៅពេលល្ងាច។
លោក វណ្ណា បានថ្លែងថា៖ «ការបិទច្រករបៀង គឺធ្វើឱ្យប៉ះពាល់ដល់ប្រជាជននៃប្រទេសទាំងពីរ»។ ប៉ុន្តែលោកមិនបានធ្វើអត្ថាធិប្បាយថា ប្រជាជនប្រទេសណាមួយដែលប៉ះពាល់ខ្លាំងជាងនោះទេ។
លោក វណ្ណា បានបន្ថែមថា លោក និងក្រុមការងារបានព្យាយាមពិភាក្សាជាមួយអាជ្ញាធរព្រំដែនថៃជាច្រើនដងក្នុងពេលថ្មីៗនេះ ដើម្បីឲ្យប្រជាពលរដ្ឋនៃប្រទេសទាំងពីរចេញចូលក្នុងការប្រកបរបររកស៊ីប្រចាំថ្ងៃងាយស្រួល ប៉ុន្តែអាជ្ញាធរព្រំដែនថៃបានប្រាប់ថានេះជាបញ្ជារបស់មន្ត្រីជាន់ខ្ពស់របស់ពួកគេ។
អ្នកនាំពាក្យរដ្ឋាភិបាល លោក ប៉ែន បូណា បានបញ្ជាក់ថា ពិតជាមានការបិទច្រកព្រំដែន ដែលនៅតែបន្តកើតមាន ដោយមិនមានការជូនដំណឹងពីភាគីថៃឡើយ។
លោក បូណា បានថ្លែងថា៖ «យើងមិនមានចំនួនពិតប្រាកដទេរហូតដល់យើងទទួលបានរបាយការណ៍ពីខេត្ត ព្រោះច្រកព្រំដែនខ្លះនៅតែដំណើរការហើយខ្លះបានបិទ»។
ទាក់ទិននឹងស្ថានការណ៍នៅខេត្តកោះកុងនេះដែរ លោកស្រី មិថុនា ភូថង អភិបាលខេត្តកោះកុង បានប្រាប់ សារព័ត៌មានខេមបូចា ថា ច្រកព្រំដែនក្នុងខេត្តកោះកុង គឺដំណើរការជាធម្មតា មិនមានអ្វីខុសប្រក្រតីទេ គិតត្រឹមថ្ងៃនេះ។
ជាមួយគ្នានេះ លោក សុខ លូ អភិបាលខេត្តបាត់ដំបង មានប្រសាសន៍ថា ភាគីថៃបានបិទច្រករបៀងពីរជាឯកតោភាគី។
យ៉ាងណាក៏ដោយ សម្រាប់ច្រកអន្តរជាតិ និងច្រកតំបន់ ភាគីថៃបានជូនដំណឹងដល់អាជ្ញាធរខេត្តបាត់ដំបងថា នឹងបើកដំណើរការចាប់ពីម៉ោង៨ព្រឹក ដល់ម៉ោង ៤រសៀល។
លោក គឹម សុវណ្ណា អគ្គកុងស៊ុលកម្ពុជាប្រចាំខេត្តស្រះកែវ តាមរយៈលិខិតផ្ញើជូនក្រសួងការបរទេសបានអះអាងថា យោធាថៃដែលឈរជើងនៅតំបន់ព្រំដែនខេត្តស្រះកែវ បានបញ្ជាក់ថា ចាប់ពីថ្ងៃទី៧ ខែមិថុនា ឆ្នាំ២០២៥ តទៅ ច្រកប្រចាំតំបន់ និងច្រករបៀងព្រំដែនថៃ និងកម្ពុជា ត្រូវបានបិទជាបណ្ដោះអាសន្ន (ជាឯកតោភាគី) រង់ចាំការដោះស្រាយជម្លោះព្រំដែនរវាងកម្ពុជា និងថៃ។
លោកបន្ថែមថា ការបិទបណ្តោះអាសន្ននេះ ធ្វើឡើងបន្ទាប់ពីភាគីកម្ពុជា មិនព្រមចរចា៤ចំណុច គឺតំបន់តាមាន់តូច តាមាន់ធំ តាក្របី និងមុំបី ក្នុងកិច្ចប្រជុំពេញអង្គរបស់គណៈកម្មាធិការព្រំដែនរួម (JBC) ដែលនឹងប្រព្រឹត្តទៅនៅថ្ងៃទី១៤ ខែមិថុនា ឆ្នាំ២០២៥ ដោយទាមទារឱ្យភាគីថៃ ដោះស្រាយបញ្ហានៅតុលាការយុត្តិធម៌អន្តរជាតិ (ICJ)។
លោកនាយករដ្ឋមន្ត្រី ហ៊ុន ម៉ាណែត បានមានប្រសាសន៍កាលពីម្សិលមិញថា កម្ពុជានឹងនាំយកតែចំណុចជម្លោះទាំងបួនទៅកាន់តុលាការ ICJ ហើយនឹងបន្តប្រើប្រាស់យន្តការ MoU សម្រាប់ការកំណត់ព្រំដែនផ្សេងទៀតទាំងអស់។
ចាប់តាំងពីការប៉ះទង្គិចគ្នាដ៏សាហាវមួយកាលពីថ្ងៃទី២៨ ខែឧសភា នៅជិតប្រាសាទព្រះវិហារដែលមានជម្លោះដ៏យូរដែលបានសម្លាប់ទាហានកម្ពុជាម្នាក់ ភាគីទាំងពីរបានធ្វើការស្តីបន្ទោសគ្នាទៅវិញទៅមក ប៉ុន្តែក៏បានស្វែងរកការបន្ធូរបន្ថយភាពតានតឹងតាមរយៈការចរចាទ្វេភាគីដែលមានស្រាប់។
កាលពីថ្ងៃព្រហស្បតិ៍ រដ្ឋមន្ត្រីក្រសួងការពារជាតិកម្ពុជា លោក ទៀ សីហា បានជួបជាមួយសមភាគីថៃ លោក Phumtham Wechayachai រដ្ឋមន្ត្រីការពារជាតិថៃ។ លោក សីហា បញ្ជាក់ជាថ្មីពីការបដិសេធរបស់កម្ពុជាក្នុងការដកទ័ពចេញពីទីតាំងក្បែរប្រាសាទព្រះវិហារ ដែលជាតំបន់បេតិកភណ្ឌពិភពលោករបស់អង្គការយូណេស្កូ ដែលអង្គការសហប្រជាជាតិទទួលស្គាល់អធិបតេយ្យភាពរបស់កម្ពុជា ប៉ុន្តែប្រទេសថៃបានបដិសេធ។ ការប៉ះទង្គិចគ្នាបានកើតឡើងនៅជុំវិញតំបន់ដែលមានការប្រកួតប្រជែងនេះ ដែលកម្ពុជាទទូចថាជាតំបន់យោធាឈរជើងរបស់ខ្លួន៕
