សមត្ថកិច្ចចម្រុះថៃនៅថ្ងៃទី៨ ខែកក្កដា បានឆ្មក់ចូលឆែកឆេរទីតាំងចំនួន១៩កន្លែង ដើម្បីស្វែងរកចាប់ខ្លួន អ្នកឧកញ៉ា កុក អាន តាមដីការបស់តុលាការថៃ ក្រោមការចោទប្រកាន់ពីបទជាប់ពាក់ព័ន្ធនឹងក្រុមបណ្តាញឧក្រិដ្ឋកម្មឆ្លងដែន និងឧក្រិដ្ឋកម្មលាងលុយកខ្វក់។
ប្រធានព្រឹទ្ធសភាកម្ពុជា លោក ហ៊ុន សែន បានសម្តែងការអបអរសាទរចំពោះអាជ្ញាធរ និងប៉ូលិសថៃ ដែលបានបើកប្រតិបត្តិជួយកម្ទេចបទល្មើសអនឡាញ នៅលើទឹកដីរបស់ខ្លួនដោយលោកលើកឡើងថា ជាការចូលរួមចំណែកដើម្បីកាត់បន្ថយបទល្មើសអនឡាញដែលហូរចូលទឹកដីកម្ពុជា។
ទីតាំងដែលអាជ្ញាធរ និងប៉ូលិសថៃឆ្មក់ចូលបង្ក្រាមទាំង១៩កន្លែង នៅក្នុងខេត្តសាមុតប្រាកានក្បែរក្រុងបាងកកនោះ គឺជាកម្មសិទ្ធរបស់អ្នកឧកញ៉ា កុក អាន សមាជិកព្រឹទ្ធសភាកម្ពុជាដោយរឹបអូសរថយន្តទំនើបជាច្រើនគ្រឿងមានតម្លៃប្រមាណ២៧លានបាត(៨៣ម៉ឺនដុល្លារ)។ នេះបើយោងតាមសារព័ត៌មានថៃ Khaosod ។
សារព័ត៌មានថៃ Khaosod បានចុះផ្សាយនៅព្រឹកថ្ងៃទី៨ ខែកក្កដា ភ្លាមៗ បន្ទាប់ពីសមត្ថកិច្ចថៃស្វែងរកចាប់ខ្លួនអ្នកឧកញ្ញ៉ា កុក អាន ថា ការឆ្មក់ចូលឆែកឆេរទីតាំង១៩កន្លែងដែលជាកម្មសិទ្ធិរបស់អ្នកឧកញ៉ា កុក អាន នេះ ធ្វើឡើងក្រោយពីតុលាការព្រហ្មទណ្ឌថៃចេញដីកាចាប់ខ្លួន ដោយចោទប្រកាន់សមាជិកព្រឹទ្ធសភាកម្ពុជារូបនេះថា បានប្រព្រឹត្តឧក្រិដ្ឋកម្មឆ្លងដែន និងលាងលុយកខ្វក់។
ដីការបស់តុលាការថៃត្រូវបានអនុវត្តដើម្បីស្វែងរកភស្តុតាង និងចាប់ខ្លួនអ្នកឧកញ៉ា កុក អាន ម្ចាស់កាស៊ីណូ Crown Casino Resort (អគារ២៥ជាន់, អគារ១៨ជាន់) អគារ២៥ជាន់ អគារ១៨ជាន់ អគារ HISO និងកាស៊ីណូក្រោននៅក្រុងប៉ោយប៉ែត។ ទីតាំងទាំងនេះត្រូវបានក្រុមឧក្រិដ្ឋជនប្រើប្រាស់ដើម្បីធ្វើការបោកប្រាស់តាមប្រព័ន្ធអ៊ីនធឺណិតជាច្រើន រួមមាន Hybrid Scams មជ្ឈមណ្ឌលហៅទូរសព្ទ និងការលាងលុយកខ្វក់ជាដើម ខណៈដែលពលករថៃមួយចំនួនត្រូវបានបោកបញ្ឆោតឱ្យធ្វើការនៅតាមទីតាំងទាំងនេះ។
សារព័ត៌មានខេមបូចា មិនអាចទាក់ទង លោក កុក អាន ដើម្បីស្នើសុំធ្វើអត្ថាធិប្បាយលើបញ្ហានេះបានទេ។
សម្រាប់ លោក ហ៊ុន សែន បានចាត់ទុកចំណាត់ការរបស់ថៃថាជាការ «លើកដុំថ្មទម្លាក់លើជើងខ្លួនឯង»។ លោកបានបង្ហោះលើហ្វេសប៊ុករបស់លោកនៅព្រលប់ថ្ងៃទី៨ ខែកក្កដា ថា៖ «ខ្ញុំពិតជាសូមចូលរួមអបអរសាទរចំពោះអាជ្ញាធរ និងប៉ូលិសថៃ ដែលបានបើកប្រតិបត្តិជួយកម្ទេចបទល្មើសអនឡាញ នៅលើទឹកដីរបស់ខ្លួន ដែលជាការចូលរួមចំណែកដើម្បីកាត់បន្ថយបទល្មើសអនឡាញហូរចូលទឹកដីកម្ពុជា ដែលបទល្មើសទាំងនោះ នៅពាសពេញទឹកដីរបស់ខ្លួន។ ការបំផ្លាញសំបុកបទល្មើសអនឡាញនេះ គួរណាស់ធ្វើយូរហើយមិនមែនទុករហូតដល់ពេលនេះទើបធ្វើនោះទេ កន្លងមកវាបានបង្កជាបញ្ហាយ៉ាងច្រើនដល់កម្ពុជា នូវលំហូបទល្មើសដែលកើតចេញពីទឹកដីថៃ ជាពិសេសនៅព្រំដែនរបស់ថៃតែម្តង»។
បើតាមប្រធានព្រឹទ្ធសភាកម្ពុជា ចំពោះមតិលើកឡើងមានទាំងអាជ្ញាធរ សារព័ត៌មាន និងមហាជនថៃ លើកឡើងថា ការបង្រ្កាប និងស៊ើបអង្កេតលើលោក កុក អាន គឺដោយសារតែជាមនុស្សជិតស្និទ្ធជាមួយរូបលោក ដូច្នេះតុលាការគួរបើកការស៊ើបអង្កេតលើ លោក ថាក់ស៊ីន ដែរ ព្រោះអ្នកណាៗក៏ដឹងដែរថា លោកថាក់ ស៊ីន គឺជាមនុស្សស្និទ្ធបំផុតជាមួយលោក ជិតស្និទ្ធរហូតមានបន្ទប់ដេកនៅផ្ទះរបស់ខ្ញុំទៀតផង។ លោកបន្តថា ចាំមើលតើតុលាការថៃ ហ៊ានបើកការស៊ើបអង្កេតលើលោកថាក់ ស៊ីន ឬទេ?
ជាមួយគ្នានេះ លោក ជា ធីរិទ្ធ អ្នកនាំពាក្យប្រធានព្រឹទ្ធសភា ក៏បានបញ្ចេញប្រតិកម្មខ្លាំងៗតាមរយៈសារព័ត៌មានស៊ីស៊ីថាមស៍ និងFRESH NEWS ថា ក្នុងនាមអ្នកនាំពាក្យប្រធានព្រឹទ្ធសភាលោកសូមឆ្លើយតបនឹងការវាយប្រហាររបស់ភាគីថៃមកលើកម្ពុជាលើ លោក ហ៊ុន សែន ជុំវិញករណីបំភ្លើសបំផ្លៃរឿងឧក្រិដ្ឋកម្មឆបោកតាមអនឡាញនៅកម្ពុជាពីសំណាក់ភាគីថៃ។
លោកបញ្ជាក់ថា នេះគឺជាល្បែងសងសឹកហើយក៏ជាល្បិចនៃការដើរព្រួសឈាមដាក់គេពីសំណាក់ភាគីថៃ ដែលជាទម្លាប់របស់ប្រទេសមួយនេះ ដែលគេធ្វើមកលើប្រទេសជិតខាងជាពិសេសកម្ពុជា។ ថ្មីៗនេះអតីតនាយករដ្ឋមន្ត្រីថៃ ផែថងថាន ស៊ីណាវ៉ាត្រា ដែលត្រូវបានគេព្យួរពីតំណែងក៏ធ្លាប់ព្រួសឈាមដាក់កម្ពុជាដែរ ជុំវិញឧក្រិដ្ឋកម្មឆបោកតាមអនឡាញស្របពេលដែលប្រទេសថៃខ្លួនឯងទៅវិញទេ ដែលជាមជ្ឈមណ្ឌលចែកចាយឧក្រិដ្ឋកម្មពាសពេញពិភពលោក ជាពិសេសនៅតំបន់អាស៊ីអាគ្នេយ៍។
លោក ជា ធីរិទ្ធ លើកឡើងទៀតថា៖ «អង្គការសហប្រជាជាតិថ្មីៗនេះក៏បានចោទប្រកាន់ប្រទេសនេះឱ្យដោះស្រាយដោយសារប្រទេសថៃជាមជ្ឈមណ្ឌលនៃការឆបោកឧក្រិដ្ឋកម្មតាមអនឡាញ។ ដូច្នេះនេះគឺជាល្បិច គឺជារបៀបនៃការដើរព្រួសឈាមដាក់គេដែលជាមាយាទរបស់ប្រទេសមួយនេះ ដែលជាមាយាទរបស់មេដឹកនាំមួយនេះ មកលើប្រទេសដទៃជាពិសេសកម្ពុជា ក្នុងចេតនាបង្ខូចកិត្តិយសរបស់គេស្របពេលដែលខ្លួនឯងជាប្រទេសដែលប្រឡាក់ដោយលាមក»។
អ្នកនាំពាក្យរូបនេះបានជំរុញឱ្យភាគីថៃប្រើល្បិចកលដែលខ្លួនមានទាំងប៉ុន្មានឱ្យអស់បើចង់វាយប្រហារបន្តុះបង្អាប់សម្អុយកម្ពុជាដោយលោកថា កម្ពុជាមិនខ្លាចទេ ពីព្រោះមេដឹកនាំរបស់កម្ពុជាមានលោក ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត គឺអាចកំដរថៃបានជានិច្ច ពីព្រោះពិភពលោកគេដឹងហើយថា ប្រទេសថៃខ្លួនឯង គឺជាមជ្ឈមណ្ឌលចែកចាយឧក្រិដ្ឋកម្មពាសពេញពិភពលោក។
លោកទូច សុខៈ អ្នកនាំពាក្យក្រសួងមហាផ្ទៃ បានបង្ហោះនៅលើហ្វេសប៊ុករបស់លោក នៅព្រឹកថ្ងៃទី៩ ខែកក្កដានេះថា បើប្រតិបត្តិការរបស់អាជ្ញាធរថៃត្រូវបានធ្វើឡើងនៅផ្ទះអ្នកឧកញ៉ា កុក អាន ក្នុងប្រទេសថៃពិតមែន បានន័យថា ថៃ ស្រាតខោខ្លួនឯង និងទទួលស្គាល់ថាប្រទេសខ្លួនជា«មជ្ឈមណ្ឌលឧក្រិដ្ឋកម្មឆបោកតាមអនឡាញធំជាងគេនៅអាស៊ី» ដែលធ្វើឱ្យកម្ពុជា ឡាវ ភូមា រងគ្រោះដោយសារខ្លួន។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជ្យបណ្ឌិតសភា បានចាត់ទុកការចុះបង្ក្រាបទីតាំងអាជីវកម្មរបស់អ្នកឧកញ៉ា កុក អាន នៅក្នុងប្រទេសថៃ ថា ជាចំណាត់ការផ្ទៃក្នុងរបស់ថៃ កុំឱ្យតែការឆ្មក់ចូលនោះធ្វើឡើងចូលមកក្នុងទឹកដីកម្ពុជាទើបជាបញ្ហា។ ទោះយ៉ាងណាលោកថា កម្ពុជាក៏ត្រូវពិនិត្យតាមដានមើលចំពោះការចោទរបស់តុលាការថៃផងដែរ ថាតើមានចរិតជានយោបាយ ឬក៏ចោទដោយមានបទល្មើសជាក់ស្តែង។
លោកថ្លែងថា៖ «សកម្មភាព ឬក៏ការចេញដីកាចាប់ខ្លួនមនុស្សដែលមានឥទ្ធិពលក្នុងប្រទេសកម្ពុជាហើយជាសមាជិកព្រឹទ្ធសភានៃប្រទេសកម្ពុជា ទៅទៀតនោះ ខ្ញុំគិតថា ចង់ឬមិនចង់វាធ្វើឱ្យប៉ះពាល់ទៅដល់ទំនាក់ទំនងការទូតរវាងប្រទេសទាំងពីរដោយចៀសពុំរួចទេ ហើយខ្ញុំគិតថា រឿងនេះវាដកចេញពីបញ្ហាព្រំដែន វាដកចេញពីទំនាស់ការទូតរវាងប្រទេសទាំងពីរដែលវាពិបាកនឹងផ្សះផ្សាក្នុងស្ថានភាពបច្ចុប្បន្ន»។
អ្វីដែលលោក គិន ភា បារម្ភជាងនេះទៅទៀតនោះ គឺថាជំងឺដរនេះវាដរទៅផ្នែកផ្សេងទៀតឬក៏បុគ្គលផ្សេងៗទៀតដែលធ្វើឱ្យកាន់តែមានភាពតានតឹងធ្ងន់ធ្ងរទាំងផ្នែកការទូតទាំងព្រំដែនរវាងប្រទេសទាំងពីរ ដែលធ្វើឱ្យប្រជាជនរស់នៅតាមបណ្តោយព្រំដែនជាអ្នកទទួលរងផលប៉ះពាល់មុនគេ ហើយសេដ្ឋកិច្ចប្រទេសទាំងពីរក៏រងផលប៉ះពាល់ផងដែរ គ្រាន់តែថាតើប្រទេសណាស៊ូទ្រាំបានយូរជាងប៉ុណ្ណោះ។
សម្រាប់លោកបណ្ឌិត យង់ ពៅ អគ្គលេខាធិការនៃរាជបណ្ឌិតសភាកម្ពុជា បានចាត់ទុកអ្វីដែលបានកើតឡើងថា ជារបៀបវារៈនយោបាយរបស់អ្នកនយោបាយថៃដែលព្យាយាមទម្លាក់កំហុសមកលើកម្ពុជាបន្ថែមទៀតខណៈដែលអ្នកឧកញ៉ា កុក អាន គឺជាមនុស្សដែលស្និទ្ធនឹងប្រធានព្រឹទ្ធសភាកម្ពុជា។
លោកបន្តថា៖ «បើចឹងអ្នកនយោបាយថៃគាត់ព្យាយាមភ្ជាប់បុគ្គលសំខាន់ៗពាក់ព័ន្ធសម្តេច ហ៊ុន សែន ទៅនឹងអំពើទុច្ចរិតដែលគាត់បំពាក់ឱ្យ។ ហីជាការពិតខ្ញុំគិតថា អានេះជារបៀបវារៈនយោបាយរបស់គាត់ទេបើឧកញ៉ា កុក អាន រកស៊ីទទួលទានវិនិយោគនៅប្រទេសថៃយូរហើយ ហើយទើបតែពេលនេះទើបតែរកឃើញបែបនេះបែបនោះ អ៊ីចឹងខ្ញុំយល់ថាជាការមើលឃើញរូបភាពខាងក្រៅ គឺជាទិដ្ឋភាពនយោបាយមិនមែនជាទិដ្ឋភាពច្បាប់ប្រាកដនិយមនោះទេ»។
ជាមួយគ្នានេះ លោកបណ្ឌិត យង់ ពៅ បានអំពាវនាវឱ្យភាគីថៃគួរតែបញ្ឈប់ការបង្កើតរបៀបវារៈនយោបាយដើម្បីទម្លាក់កំហុសមកលើកម្ពុជាបន្តទៀតពីព្រោះវាមិនមានផលចំណេញអ្វីនោះទេ វាថែមទាំងធ្វើឱ្យកាន់តែបាត់ទំនុកចិត្តទៅលើប្រទេសថៃ ចំពោះការវិនិយោគ ឬក៏កិច្ចសហប្រតិបត្តិការជាអន្តរជាតិ។
គួររំឭកថាកាលពីពេលថ្មីៗនេះ អ្នករាយការណ៍ពិសេសអង្គការសហប្រជាជាតិ បានផ្ញើលិខិតមួយច្បាប់ទៅកាន់រដ្ឋាភិបាលថៃ ដោយជំរុញឱ្យមានការបំភ្លឺលើចំណុចសំខាន់ៗចំនួន ១០ទាក់ទងនឹងការឆបោក និងក្រុមឧក្រិដ្ឋកម្មអនឡាញ ដែលកំពុងតែមានវត្តមានក្នុងតំបន់មួយចំនួននៃប្រទេសថៃ។ លិខិតនោះបានសម្តែងការព្រួយបារម្ភយ៉ាងខ្លាំងលើការស៊ើបការណ៍សម្ងាត់ដែលបានទទួលអំពីពលរដ្ឋមកពីជុំវិញពិភពលោក ដែលត្រូវគេបោកប្រាស់បង្ខំឲ្យធ្វើការក្នុងមជ្ឈមណ្ឌលបោកប្រាស់តាមអនឡាញនៅក្នុងប្រទេសថៃ។ នេះយោងតាមកាសែត The Nation របស់ថៃចេញផ្សាយកាលពីថ្ងៃទី២៣ ខែមិថុនា ឆ្នាំ២០២៥។
បន្ថែមពីនេះ The Nation បានចុះផ្សាយនៅថ្ងៃទី៦ ខែកក្កដា ឆ្នាំ២០២៥ថា ករណីឆបោកតាមប្រព័ន្ធអនឡាញ នៅក្នុងប្រទេសថៃ បានឈានដល់កម្រិតដ៏ធ្ងន់ធ្ងរមួយ ដោយមានច្រើនជាង ១,៨៥លានករណី ត្រូវបានរាយការណ៍ទៅកាន់មជ្ឈមណ្ឌលប្រតិបត្តិការទប់ស្កាត់អំពើឆបោកអនឡាញ (AOC) គិតចាប់តាំងពីថ្ងៃទី១ ខែវិច្ឆិកា ឆ្នាំ២០២៣ រហូតមកដល់ថ្ងៃទី២៧ ខែមិថុនា ឆ្នាំ២០២៥។ ថវិកាសរុបដែលត្រូវបានបាត់បង់ដោយសារអំពើឆបោកតាមអនឡាញ នៅក្នុងប្រទេសថៃ មានចំនួនសរុបលើសពី២១,៨លានបាត។
យ៉ាងណាក្តីប្រទេសកម្ពុជាក៏ត្រូវបានស្ថាប័នអន្តរជាតិរាយការណ៍ផងដែរថា មានមជ្ឈមណ្ឌលឆបោកតាមអនឡាញចំនួន៥៣កន្លែង កំពុងដំណើរការនៅទូទាំងប្រទេស។ នេះបើតាមការរកឃើញរបស់អង្គការលើកលែងទោសអន្តរជាតិ (Amnesty International)។ អង្គការនេះបានចេញផ្សាយរបាយការណ៍ជាង២០០ទំព័រកាលពីថ្ងៃទី២៦ ខែមិថុនា ឆ្នាំ២០២៥ ស្ដីពីការរំលោភសិទ្ធិមនុស្សដោយសារការធ្វើទារុណកម្ម ការជួញដូរមនុស្ស និងអំពើទាសភាព ក្នុងទីតាំងឆបោកតាមអនឡាញនៅក្នុងប្រទេសកម្ពុជា បន្ទាប់ពីអង្គការនេះ បានបើកការស្រាវជ្រាវអស់រយៈពេល១៨ខែ រកឃើញទីតាំងឆបោកចំនួន៥៣កន្លែង និងបានសម្ភាសន៍ជនរងគ្រោះជាង៤០០ (៤២៣) នាក់។
ពាក់ព័ន្ធទៅនឹងការលើកឡើងដែលថា ប្រទេសកម្ពុជាជាមជ្ឈមណ្ឌលឧក្រិដ្ឋកម្មអនឡាញនេះលោក ហ៊ុន សែន បានថ្លែងក្នុងពិធីមួយនៅខេត្តព្រះវិហារកាលពីថ្ងៃទី២៧ ខែមិថុនា ឆ្នាំ២០២៥ ថា ប្រទេសថៃទៅវិញទេ ទើបជាមជ្ឈមណ្ឌលឧក្រិដ្ឋកម្មអនឡាញ បែរជាមកចោទកម្ពុជាដែលជាប្រទេសរងគ្រោះទៅវិញ។ ការថ្លែងរបស់ប្រធានព្រឹទ្ធសភាកម្ពុជានេះ គឺបន្ទាប់ពីអតីតនាយករដ្ឋមន្ត្រីថៃលោកស្រី ផែថងថាន ស៊ីណាវ៉ាត្រា កាលពីថ្ងៃទី២៤ ខែមិថុនា បានប្រកាសបិទច្រកព្រំដែនទាំងស្រុងជាមួយកម្ពុជា ក្រោមលេសដើម្បីបង្ក្រាបឧក្រិដ្ឋកម្មអនឡាញ។
លោក ហ៊ុន សែន បានចោទជាសំណួរទៅកាន់លោកស្រី ផែថងថាន ស៊ីណាវ៉ាត្រា ថា ហេតុអ្វីបានជាបង្វែរការឈ្លានពានរបស់ខ្លួនទៅជាការបិទច្រកព្រំដែន ដើម្បីបង្ក្រាបនូវឧក្រិដ្ឋកម្ម? ខណៈដែលថៃបានបិទព្រំដែនជាឯកតោភាគី តាំងពីថ្ងៃទី៧ ខែមិថុនា មកម៉្លេះ។
លោកបន្ថែមថា កម្ពុជាគ្រាន់តែជាប្រទេសរងគ្រោះដោយឧក្រិដ្ឋកម្មអនឡាញពីប្រទេសថៃប៉ុណ្ណោះ ខណៈមានតែប្រទេសថៃដែលមានជើងហោះហើរអន្តរជាតិ ដែលអំណោយផលដល់ការប្រព្រឹត្តបទល្មើសនេះ។ បច្ចុប្បន្នប្រទេសថៃកំពុងពោរពេញទៅដោយឧក្រិដ្ឋកម្មអនឡាញ និងជាមជ្ឈមណ្ឌលចែកចាយឧក្រិដ្ឋកម្មនេះ។
សូមបញ្ជាក់ថា ការរាប់អានគ្នាជាបងប្អូនធម៌រវាងក្រុមគ្រួសារលោកហ៊ុន សែននិងក្រុមគ្រួសារលោកថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ អស់រយៈពេលប្រមាណជា ៣០ឆ្នាំមកហើយ ត្រូវបានកាត់ផ្តាច់ បន្ទាប់ពីមានការបែកធ្លាយសារសន្ទនាមួយរវាងលោកហ៊ុន សែននិងលោកស្រីផែ ថងថាន ស៊ីណាវ៉ាត្រ កាលពីថ្ងៃទី១៨ខែមិថុនា និយាយពីការរិះរកវិធីដើម្បីបន្ធូរបន្ថយភាពតានតឹងនៅតាមព្រំដែនកម្ពុជា ថៃ នៅពេលដែលជម្លោះព្រំដែនប្រទេសទាំងពីរបានឡើងកំដៅកាន់តែខ្លាំង។
ការឡើងកំដៅ គឺចាប់តាំងពីទាហានថៃ បានឆ្មក់ចូលមកបាញ់ទាហានខ្មែរបណ្តាលឱ្យស្លាប់ម្នាក់ នៅតំបន់មុំបីក្នុងខេត្តព្រះវិហារ កាលពីថ្ងៃទី២៨ ខែឧសភា ធ្វើឱ្យកម្ពុជាខឹងយ៉ាងខ្លាំងហើយបានប្រកាសដាក់ពាក្យប្តឹងថៃពីការរំលោភដែនដីកម្ពុជានៅតំបន់មុំបី ប្រាសាទតាក្របី បាសាទតាមាន់ធំ និងប្រាសាទតាមាន់តូច ទៅតុលាការយុត្តិធម៌អន្តរជាតិ។ ដោយសារតែសារបែកធ្លាយការសន្ទនាជាមួយលោក ហ៊ុន សែន បានធ្វើឱ្យលោកស្រី ផែថងថាន ស៊ីណាវ៉ាត្រា ត្រូវតុលាការធម្មនុញ្ញថៃព្យួរតំណែងពីនាយករដ្ឋមន្ត្រីកាលពីថ្ងៃទី១ ខែកក្កដា ឆ្នាំ២០២៥។ បច្ចុប្បន្នលោកស្រីនៅកាន់តំណែងជារដ្ឋមន្ត្រីក្រសួងវប្បធម៌៕
