សកម្មភាពប្រកួតបាល់ទាត់ហ្វុតសាល(ក្នុងសាល)របស់មហាជននៅក្នុងប្រទេសកម្ពុជា នាពេលបច្ចុប្បន្ន ត្រូវបានគេមើលឃើញថា មានភាពផុសផុលខ្លាំង ដោយមានទាំងការប្រកួតដណ្តើមពានរង្វាន់ជាលក្ខណៈឯកជន និងការលេងដើម្បីសុខភាព ហើយទីលានបាល់ទាត់តារាងតូចនេះ ក៏មានបើកស្ទើរគ្រប់ទីកន្លែងផងដែរ ជាពិសេសនៅរាជធានីភ្នំពេញ។
ប៉ុន្តែ ចំពោះការប្រកួតបាល់ទាត់ក្នុងសាលថ្នាក់ជាតិ ដែលរៀបចំដោយសហព័ន្ធកីឡាបាល់ទាត់កម្ពុជា ហាក់មិនដំណើរការបានល្អនោះទេ ហើយកំពុងដាំក្បាលចុះផងដែរ បន្ទាប់ពីក្លិបបាល់ទាត់ហ្វុតសាលធំៗមួយចំនួន បានបិទទ្វារជាបន្តបន្ទាប់ ព្រោះក្ស័យធន គ្មានអ្នកជួយឧបត្ថម្ភ ហើយបញ្ហានេះ បានជះឥទ្ធិពលមិនល្អនោះឡើយ ក្នុងការពង្រឹងសមត្ថភាពដល់កីឡាករ សម្រាប់ប្រកួតតំណាងឱ្យប្រទេសជាតិ នៅលើឆាកអន្តរជាតិ។
សម្រាប់ការបាល់ទាត់ក្នុងសាលជម្រើសជើងឯកថ្នាក់ជាតិប្រចាំឆ្នាំ ដែលគេប្រសិទ្ធនាមឈ្មោះថ្មីថា Tiger Futsal Cup នោះ គឺនៅតែមានចំនួនក្រុមចូលច្រើន ចន្លោះពី១៥ក្រុមឡើងទៅ ប៉ុន្តែក្រុមដែលបានចូលរួមទាំងនោះ បានរំសាយទៅវិញជាបណ្តើរៗ ហើយជំនួសវិញដោយក្រុមថ្មី ដែលមិនមានមូលដ្ឋានទ្រទ្រង់រឹងមាំដូចគ្នា។
ជាក់ស្តែងក្រុមមហាហង្ស និង ក្រុម The Blue Warrior ដែលធ្លាប់ឈ្នះពានរង្វាន់ Tiger Futsal Cup កាលពីឆ្នាំ២០២០ និងឆ្នាំ២០២១ សុទ្ធតែបានរំសាយក្រុម ព្រោះគ្មានលទ្ធភាពបន្តបាន ចំណែកក្រុមមួយចំនួនទៀត ក៏បានបាត់វត្តមានពីការប្រកួតក្នុងសាលថ្នាក់ជាតិនេះដូចគ្នា។ ចំណែកថ្មីៗនេះ ក្លិបបាល់ទាត់ដោនថោនស្ពត (Down Town Sports) ដែលបង្កើតបានឡើងចូល១០ឆ្នាំមកហើយនោះ ក៏ត្រូវបានផ្អាកដំណើរការ ព្រោះក្ស័យធន់ផងដែរ។
គ្រប់គ្នានៅក្នុងវិស័យបាល់ទាត់ក្នុងសាល មានការភ្ញាក់ផ្អើលខ្លាំង និងស្ទើរតែមិនចង់ជឿ នៅពេល Down Town Sports បានប្រកាសពីការផ្អាកដំណើរការ ព្រោះកន្លងមកក្លិបមួយនេះមានភាពរឹងមាំទាំងការរៀបចំរចនាសម្ព័ន្ធគ្រប់គ្រង និងការប្រកួត ហើយជាក្លិបតែមួយគត់ ដែលទទួលបានលទ្ធផលល្អជាងគេ សម្រាប់ការចេញទៅប្រកួតតំណាងឱ្យកម្ពុជា នៅក្នុងតំបន់អាស៊ាន។
មូលហេតុចម្បងនាំឱ្យក្លិបបាល់ទាត់ក្នុងសាលនៅកម្ពុជា សម្រេចបិទទ្វារបន្តកន្ទុយគ្នា
តែទោះបីជាយ៉ាងណា លោក ហ៊ល សុភ័ក្ដ្រ ស្ថាបនិកក្លិបបាល់ទាត់ដោនថោនស្ពត បានទម្លាយថា លោកពិតជាមិនអាចទ្រទ្រង់ការចំណាយបានទៅទៀតទេ ព្រោះក្នុង១សប្តាហ៍ក្លិបត្រូវចំណាយពី៣០០ទៅ៥០០ដុល្លារ ហើយក្នុងមួយខែៗចូលខ្ទង់២ពាន់ដុល្លារ ខណៈបច្ចុប្បន្ន Down Town Sports រកមិនបានអ្នកឧបត្ថម្ភ និងសហការទៀតទេ។
លោកបានថ្លែងថា៖ «ធម្មតាយើងជាអ្នកស្រលាញ់បាល់ទាត់ ហើយខ្ញុំក៏បានបង្កើតអាជីវកម្មខាងផ្នែកបាល់ទាត់នេះ អ៊ីចឹងខ្ញុំពិតជាសោកស្តាយ និងមិនចង់ឱ្យបាត់បង់ក្រុម បាត់បង់ការប្រកួតប្រជែងនៅក្នុងទីលាននោះទេ ប៉ុន្តែបញ្ហាចម្បងវាពាក់ព័ន្ធនឹងហិរញ្ញវត្ថុ។ យើងអត់មានអ្នកឧបត្ថម្ភ អ្នកសហការជួយ គឺយើងអត់អាចទៅមុខបានទៀតទេ!»។
សម្រាប់ការប្រកាសផ្អាកដំណើរការក្លិបដោនថោនស្ពតនេះ លោក ហ៊ល សុភ័ក្ដ្រ ចាត់ទុកថា ជាសារដ៏សំខាន់មួយ ក្នុងការអំពាវនាវឱ្យអ្នកស្រឡាញ់បាល់ទាត់ហ្វុតសាល មកជួយជំរុញ និងសហការ ដើម្បីឱ្យវិស័យបាល់ទាត់ក្នុងសាលរបស់កម្ពុជារស់ឡើងវិញ ដូចវិស័យប្រដាល់ និងបាល់ទាត់តារាងធំជាដើម។
លោកបានបញ្ជាក់ថា៖ «វិស័យបាល់ទាត់តារាងធំយើងដើរហើយ ហើយវិស័យកីឡាផ្សេងៗទៀត ដូចជាប្រដាល់គុនខ្មែរ ក៏ដើរទៅមុខដែរ ប៉ុន្តែដោយឡែកបាល់ទាត់ក្នុងសាលយើងឃើញថា អត់ទាន់មានក្រុមណា ដែលលេចធ្លោ ដើម្បីធ្វើឱ្យវិស័យហ្នឹងដើរទៅមុខទេ»។
លោក សុភ័ក្ត្រ លើកឡើងថា៖ «ខ្ញុំខំវិនិយោគលើការសាងសង់ទីលានអស់ច្រើនដែរ ដោយគិតថា ថ្ងៃក្រោយនឹងមានការប្រកួតប្រជែងជាលក្ខណៈតំបន់ ឬលក្ខណៈអន្តរជាតិ ប៉ុន្តែ ជាក់ស្តែងមួយរយៈនេះ យើងជួបវិបត្តិហិរញ្ញវត្ថុ សេដ្ឋកិច្ចយើងមិនសូវល្អ ធ្វើឱ្យយើងបង្ខំចិត្តផ្អាកជាបណ្តោះអាសន្ន តែបើយើងមានដៃគូសហការល្អមកវិញ យើងនឹងត្រឡប់មកវិញម្តងទៀត ហើយខ្លាំងជាងមុន»។
នៅមុនឈានដល់ការប្រកាសផ្អាកដំណើរក្រុមដោនថោនស្ពតនេះ លោក ហ៊ល សុភ័ក្ដ្រ បានអះអាងថា លោកបានព្យាយាមទំនាក់ទំនងទៅដល់ក្រុមហ៊ុន និងក្រុមបាល់ទាត់ជាច្រើនដែរ ដើម្បីជួយឧបត្ថម្ភទៅដល់ក្រុមដោនថោនស្ពត ប៉ុន្តែលោករកមិនបានអ្នកគាំទ្រទេ ព្រោះខាងគេក៏បានជួបវិបត្តិហិរញ្ញវត្ថុដូចគ្នា។
ស្ថាបនិកក្លិបរូបនេះ បានសង្កត់ធ្ងន់ថា៖ «នៅពេលគេផ្អាកគ្រប់គ្នា យើងនៅបន្ត ឃើញថា កីឡាករយើងរាងខ្សោយ ព្រោះជាធម្មតាគាត់ត្រូវមានថ្លៃសាំង និងថ្លៃកម្លាំងពលកម្មតិចតួចដែរ តែនៅពេលយើងអត់មានឱ្យគាត់គ្រប់គ្រាន់ គាត់ក៏អត់សូវលះបង់កម្លាំងកាយចិត្តពេញ មកលេងដូចមុនដូចគ្នា ប៉ុន្តែខ្ញុំសង្ឃឹមថា ទៅថ្ងៃមុខនឹងមានក្រុមល្អ ឬក៏មានអ្នកស្រលាញ់បាល់ទាត់ជួយឱ្យវិស័យបាល់ទាត់ក្នុងសាលរីកមកវិញ»។
ចំណែកលោក យិន សុខុម ជាអគ្គលេខាធិការ និងជាគ្រូបង្វឹកក្លិបបាល់ទាត់ដោនថោនស្ពត បានឱ្យដឹងថា៖ «គ្រប់គ្នានៅក្នុងក្រុមដោនថោនស្ពត មានការប្តូរផ្តាច់ និងស្វាមីភក្តិជាមួយក្លិបយូរឆ្នាំហើយ ប៉ុន្តែវាពិតជាគួរឱ្យសោកស្តាយ ដែលយើងមិនមានដើមទុន ក្នុងការបន្តដំណើរទៅមុខទៀត ព្រោះមិនមានអ្នកឧបត្ថម្ភ ធ្វើឱ្យលោក ហ៊ល សុភ័ក្ដ្រ អស់លទ្ធភាពបើកដំណើរការក្លិបបន្តទៀត»។
លោក យិន សុខុម ដែលធ្លាប់ដឹកនាំក្រុមមហាហង្ស និងក្រុម The Blue Warrior ឱ្យលើកពានការប្រកួតបាល់ទាត់ក្នុងសាលថ្នាក់ជាតិ កាលពីឆ្នាំ២០២០ និងឆ្នាំ២០២១ ហើយក៏ធ្លាប់ដឹកនាំក្រុម Home Sport និងក្រុមហ្វុតសាលមួយចំនួនទៀតនោះ បានមើលឃើញថា វិស័យបាល់ទាត់ក្នុងសាលនៅកម្ពុជា មិនអាចដំណើរទៅមុខ និងតាមទាន់ប្រទេសជិតខាងនោះទេ បើសិនជាគ្មានការឧបត្ថម្ភពីវិស័យឯកជន និងអ្នកមានទ្រព្យធន។
គ្រូបង្វឹកដ៏មានបទពិសោធន៍ម្នាក់នេះ បានអះអាងថា វិស័យបាល់ទាត់ក្នុងសាលរបស់ប្រទេសជិតខាងពិសេសថៃ និងឥណ្ឌូនេស៊ី ដែលមានការរីកចម្រើនខ្លាំងនោះ គឺគេមានរៀបចំការប្រកួតរហូតដល់លីគអាជីព និងមានការបណ្តុះថ្នាក់ថ្នាលជាច្រើនកម្រិត ហើយក្លិបនីមួយៗក៏បានផ្តល់ប្រាក់បៀវត្សសមរម្យ ទៅដល់គ្រូបង្វឹក និងកីឡាករ គឺខុសពីកម្ពុជា ដែលបានធ្វើឡើងជាលក្ខណៈស្ម័គ្រចិត្ត។
លោកបញ្ជាក់ថា៖ «ប្រទេសជិតខាងយើង គេធ្វើបានល្អ គេមានថ្នាល និងមានលីគប្រកួតជាប្រចាំ ហើយមានប្រាក់ខែសម្រាប់ការហ្វឹកហាត់នៅក្នុងក្លិប ចំណែកយើងវិញ អត់ទាន់មានទេ គឺស្ទើរគ្រប់ក្លិបជាការស្ម័គ្រចិត្ត ដោយមានការផ្គត់ផ្គង់តិចតួចបំផុត ត្រឹមថ្លៃចាក់សាំងអីទេ អ៊ីចឹងហើយធ្វើឱ្យវិស័យក្នុងសាលនេះនៅខ្សោយ ហើយទទួលបានលទ្ធផលមិនសូវល្អ ពេលប្រកួតជាមួយគេនៅក្នុងតំបន់»។
ភាពរង្គោះរង្គើក្នុងវិស័យបាល់ទាត់ក្នុងសាល នឹងផ្តល់ផលអវិជ្ជមានបន្ថែមទៀតដល់ក្រុមជម្រើសជាតិកម្ពុជា
សម្រាប់ការប្រកួតប្រជែងនៅក្នុងតំបន់ជាច្រើនឆ្នាំមកនេះ ក្រុមជម្រើសជាតិបាល់ទាត់ក្នុងសាលកម្ពុជា តែងតែបានធ្លាក់ត្រឹមវគ្គជម្រុះតាមពូល ទាំងពានរង្វាន់ AFF Futsal Championship និង AFC Futsal Asian Cup ចំណែកការប្រកួតក្របខ័ណ្ឌក្លិបតំបន់អាស៊ានវិញ គឺមានតែក្រុមដោនថោនស្ពតមួយទេ ធ្លាប់បានឡើងទៅដល់វគ្គពាក់កណ្តាលផ្តាច់ព្រ័ត្រ ក្នុងពាន AFF Futsal Club Championship 2019 តែពួកគេបានចាញ់ក្រុម PTT Chonburi Bluewave របស់ថៃ ១៧-០ និងបានបន្តចាញ់ក្រុម MIU របស់មីយ៉ាន់ម៉ា ៩-៥ ក្នុងការប្រកួតដណ្តើមយកលេខ៣ និងលេខ៤។
ជាកីឡាករម្នាក់ បានចូលរួមការប្រកួត AFF Futsal Club Championship 2019 នៅប្រទេសថៃនោះ ហើយក៏ជាបេក្ខភាព ដែលធ្លាប់បានចូលរួមការប្រកួតថ្នាក់តំបន់ជាមួយក្រុមជម្រើសជាតិក្នុងសាលកម្ពុជា ចូល៥ឆ្នាំមកនេះ កែវ ជាតួ បានមើលឃើញយ៉ាងច្បាស់ពីគម្លាតខុសគ្នានៃគុណភាពលេងរវាងក្រុមបាល់ទាត់ក្នុងសាលកម្ពុជា និងក្រុមតំណាងឱ្យប្រទេសផ្សេងៗទៀត នៅក្នុងតំបន់អាស៊ាន ជាពិសេសថៃ និងឥណ្ឌូនេស៊ី ដែលបច្ចុប្បន្នកំពុងមានភាពលេចធ្លោជាងគេ។
កែវ ជាតួ បានប្រាប់ ខេមបូចា ថា៖ «ប្រទេសនៅក្នុងតំបន់ជាពិសេសថៃ និងឥណ្ឌូនេស៊ី មានកម្រិតលេងខ្ពស់ ដែលអាចលេងដល់ Futsal World Cup ទៅហើយ គឺយើងមិនទាន់អាចប្រជែងជាមួយគេបានទេ ក៏ប៉ុន្តែបើសិននៅកម្ពុជា មានការប្រកួតលីគជាប្រចាំ និងមានក្លិបអាជីព ដែលអាចផ្តល់ប្រាក់ខែដល់កីឡាករបានសមរម្យ គឺកម្រិតលេងយើងអាចកើនឡើង និងលេងជាមួយប្រទេសជិតខាងបាន»។
កីឡាករធ្លាប់លេងឱ្យក្រុម Home Sports និងធ្លាប់ជួយឱ្យក្រុមមហាហង្ស ក្រុម The Blue Warrior និងក្រុមឪម៉ាល់ លើកពានការប្រកួតបាល់ទាត់ក្នុងសាលថ្នាក់ជាតិ កែវ ជាតួ បានទម្លាយថា វិស័យបាល់ទាត់ក្នុងសាលនៅកម្ពុជា មានត្រឹមក្លិបពាក់កណ្តាលអាជីព ហើយកីឡាករបានត្រឹមថ្លៃសាំងតិចតួច សម្រាប់ការចូលរួមហាត់ និងប្រកួត ដែលទាមទារឱ្យមានការវិនិយោគពីអ្នកឧបត្ថម្ភធំៗ ព្រោះក្លិបធំៗមួយចំនួន ដែលបានបិទទ្វារ ក៏ព្រោះតែគ្មានអ្នកឧបត្ថម្ភនេះឯង និងធ្វើឱ្យបាល់ទាត់ក្នុងសាល មានការធ្លាក់ចុះ។
កីឡាករវ័យ២៨ឆ្នាំរូបនេះបញ្ជាក់ថា៖ «ការប្រកាសក្ស័យធន់របស់ក្លិបធំៗជាបន្តបន្ទាប់គ្នា អាចជាហេតុផលមួយធ្វើឱ្យហ្វុតសាលយើងរាងធ្លាក់ចុះ ព្រោះបាត់ក្រុមខ្លាំងៗច្រើន។ បើសិនជាយើងមានការឧបត្ថម្ភ និងមានក្លិបអាជីពពិតប្រាកដ គឺកីឡាករយើង អាចប្រកួតប្រជែងជាមួយប្រទេសជិតខាងបាន ព្រោះបទពិសោធន៍ ការបុកពាំង និងជែងយកបាល់ គេអត់លើសយើងទេ គ្រាន់តែគេមានប្លង់លេងរាប់ឆ្នាំមកហើយ អ៊ីចឹងយើងរាងពិបាកចាប់គេ»។
ចំណែកកីឡាករវ័យ២៦ឆ្នាំ កែវ សុចិត្រា បានមើលឃើញថា វិស័យបាល់ទាត់ក្នុងសាលនៅកម្ពុជា មិនមានអ្វីប្រែប្រួលទេ ព្រោះក្លិបនីមួយៗ មិនទាន់មានអ្នកឧបត្ថម្ភ ដែលអាចនៅជាមួយគាត់បានយូរ ក្នុងការអភិវឌ្ឍទៅជាក្លិបអាជីព ហើយបញ្ហានេះ ក៏បានធ្វើឱ្យកីឡាករ គ្មានស្ថិរភាពច្បាស់លាស់ក្នុងការពង្រឹងគុណភាពលេងរបស់ខ្លួនបានល្អដូចគ្នា។
កីឡាករជម្រើសជាតិបាល់ទាត់ក្នុងសាល ដែលធ្លាប់លេងឱ្យក្រុមមហាហង្ស, The Blue Warrior និងក្រុមដោនថោនស្ពត ដែលទើបបានរំសាយថ្មីៗ កែវ សុចិត្រា បញ្ជាក់ថា៖ «វិស័យបាល់ទាត់ក្នុងសាល អាចមានហានិភ័យ នៅពេលក្លិបមិនមែនអាជីពបានបិទទៅម្តងមួយៗបែបនេះ ហើយការផ្លាស់ប្តូរពីក្លិបមួយទៅក្លិបមួយក្នុងរយៈពេលខ្លីៗពេក ក៏ធ្វើឱ្យកីឡាករមិនមានមូលដ្ឋានរឹងមាំ ក្នុងការពង្រឹងសមត្ថភាពឱ្យបានខ្លាំងដូចគ្នា»។
ជាមួយគ្នានេះគ្រូបង្វឹកបាល់ទាត់ក្នុងសាល លោក នៃ ប៊ុនសុភ័ត្រា ដែលធ្លាប់ដឹកនាំក្រុមមហាហង្ស និងក្រុមឪម៉ាល់ ឱ្យលើកពានការប្រកួតបាល់ទាត់ក្នុងសាលថ្នាក់ជាតិ ហើយក៏បានដឹកនាំក្រុមជម្រើសជាតិក្នុងសាលកម្ពុជា ចេញទៅប្រកួតវគ្គជម្រុះពាន AFC Futsal Asian Cup 2024 នៅប្រទេសអ៊ូសបេគីស្ថាន កាលពីតុលា ឆ្នាំ២០២៣ បានអះអាងថា បាល់ទាត់ក្នុងសាលនៅកម្ពុជា កំពុងជួបវិបត្តិដែលបានជះឥទ្ធិពលមិនល្អនោះទេ ក្នុងការជ្រើសរើសកីឡាករ សម្រាប់ប្រកួតតំណាងឱ្យជាតិ។
លោក នៃ ប៊ុនសុភ័ត្រា បញ្ជាក់ថា៖ «ការមិនមានអ្នកស្ពនស័រច្បាស់លាស់ ដែលនាំឱ្យក្លិបធំៗបិទជាបន្តបន្ទាប់គ្នានេះ វាជះឥទ្ធិពលខ្លាំងទៅលើការប្រមូលផ្តុំក្រុមជម្រើសជាតិ ព្រោះកាលណាក្លិបអត់មានលុយ ក៏អត់សូវមានការហ្វឹកហាត់ អ៊ីចឹងគុណភាពលេងរបស់កីឡាករក៏ធ្លាក់ទៅតាមហ្នឹងដែរ។ ផ្ទុយទៅវិញ បើសិនជាមានស្ពនស័រ ហើយក្លិបមានលទ្ធភាពគ្រប់គ្រាន់ ក្នុងការអភិវឌ្ឍកីឡាករទៅជាអាជីពបាន នោះហ្វុតសាលយើងនឹងឈានទៅមុខមួយកម្រិតទៀត»។
ថ្នាក់ដឹកនាំ គ្រូបង្វឹក និងកីឡាករ សុំចិត្តអ្នកមានទ្រព្យជួយសង្រ្គោះបាល់ទាត់ក្នុងសាលឱ្យបន្តមានជីវិត
ជុំវិញក្តីកង្វល់ការធ្លាក់ចុះនៃវិស័យបាល់ទាត់ក្នុងសាលនៅកម្ពុជានេះ លោក ហ៊ល សុភ័ក្ដ្រ លោក យិន សុខុម និងអ្នកពាក់ព័ន្ធជាច្រើនទៀត បានអំពាវនាវដល់ក្រុមហ៊ុនឯកជន និងអ្នកមានទ្រព្យធន ឱ្យងាកមកជួយឧបត្ថម្ភដល់បាល់ទាត់ក្នុងសាល ដើម្បីឱ្យក្លិបដែលខំក្រាញននៀលលើវិស័យនេះ មានលទ្ធភាពអភិវឌ្ឍខ្លួនទៅជាក្លិបអាជីព អាចបង្កើតជាក្រុមថ្នាល និងមានលទ្ធភាពផ្គត់ផ្គង់ដល់កីឡាករ ដើម្បីឱ្យពួកគេបានពង្រឹងសមត្ថភាពប្រកបដោយភាពជឿជាក់ ក្នុងការឈានទៅប្រកួតតំណាងឱ្យជាតិ។
លោក យិន សុខុម បានចាប់អារម្មណ៍ខ្លាំងទៅលើ «អ្នកឧកញ៉ា» ៣នាក់ ដែលកំពុងមានភាពសកម្មខ្លាំងក្នុងការឧបត្ថម្ភដល់បាល់ទាត់ បាល់ទះ និងប្រដាល់។ លោកបញ្ជាក់ថា៖ «ខ្ញុំមើលឃើញថា អ្នកឧកញ៉ា សំអាង វឌ្ឍនៈ អ្នកឧកញ៉ា លាង ម៉េង និងអ្នកឧកញ៉ា លាង ឃុន គឺមានភាពសកម្មខ្លាំងក្នុងការជួយដល់វិស័យកីឡារបស់យើង ហេតុនេះខ្ញុំសូមសំណូពរដល់ពួកគាត់ និងអ្នកមានព្រទ្យធនផ្សេងទៀត ងាកមកឧបត្ថម្ភដល់វិស័យបាល់ទាត់ក្នុងសាលផង ដើម្បីកុំឱ្យវិស័យនេះដាច់ដង្ហើម»។
ចំណែកលោក ហ៊ល សុភ័ក្ដ្រ បានលើកជាទស្សនៈផ្ទាល់ខ្លួនថា វិស័យបាល់ទាត់ក្នុងសាលកម្ពុជា នឹងអាចរីកចម្រើនបានលឿន បើសិនជាក្លិបបាល់ទាត់ធំៗ ដែលកំពុងលេងនៅលីគកំពូលកម្ពុជា ដូចជា ព្រះខ័នរាជស្វាយរៀង ភ្នំពេញក្រោន វិសាខា និងណាហ្គាវើលដ៍ ជាដើម កាត់យកកីឡាករ ដែលមិនបានលេងនៅតារាងធំ ឱ្យមកលេងហ្វុតសាលជំនួសវិញ ព្រោះកីឡាករទាំងអស់នេះ មានមូលដ្ឋានគ្រឹះលេងបាល់ទាត់រួចហើយ មិនពិបាកក្នុងការកែទម្លាប់មកលេងបែបហ្វុតសាលឡើយ អ៊ីចឹងពួកគេបានលេងពង្រឹងសមត្ថភាពផង និងបានរួមចំណែកលើកកម្ពស់បាល់ទាត់ហ្វុតសាលផង។
លោកបានបញ្ជាក់ថា៖ «ខ្ញុំជឿថា បើសិនជាក្លិបធំៗ គាត់លះបង់ បង្កើតក្រុមមកចូលរួមប្រកួតបាល់ទាត់ហ្វុតសាលថែមទៀត ខ្ញុំគិតថា នឹងធ្វើឱ្យវិស័យបាល់ទាត់ហ្វុតសាលនៅក្នុងប្រទេសកម្ពុជា មានការរីកចម្រើនលឿនដូចបណ្តាប្រទេសជិតខាង មានថៃ និងវៀតណាម ជាដើម»។
នៅត្រង់ចំណុចនេះ លោក យិន សុខុម បានបន្ថែមថា៖ «ពិតណាស់ ការចូលរួមរបស់ក្លិបធំៗ ដែលលេងនៅតារាងធំ នឹងធ្វើឱ្យបាល់ទាត់ហ្វុតសាល មានការរីកចម្រើនឡើងវិញ ព្រោះបើចង់ឱ្យវិស័យហ្វុតសាលខ្លាំង លុះត្រាតែយើងមានការបណ្តុះថ្នាលតាំងពីអាយុក្រោម៨ឆ្នាំរហូតដល់អាយុក្រោម២៣ឆ្នាំ ហើយខ្ញុំជឿថា ក្លិបធំៗលេងនៅតារាងធំ គាត់មានកីឡដ្ឋាន និងមានមូលដ្ឋានរឹងមាំ ក្នុងការជំរុញផ្នែកនេះបាន»។
សហព័ន្ធកីឡាបាល់ទាត់កម្ពុជា ក៏គួរអើពើលើបាល់ទាត់ហ្វុតសាលឱ្យដូចបាល់ទាត់តារាងធំ
ចំណែកលោក នៃ ប៊ុនសុភ័ត្រា ព្រមទាំងកីឡាករធ្លាប់លេងឱ្យជម្រើសជាតិ កែវ ជាតួ និង កែវ សុចិត្រា ដែលបច្ចុប្បន្នបានទៅរួមរស់ជាមួយក្លិបថ្មី Lucky Futsal Club នោះ ក៏បានស្នើដល់សហព័ន្ធកីឡាបាល់ទាត់កម្ពុជា ឱ្យយកចិត្តទុកដាក់អភិវឌ្ឍបាល់ទាត់ក្នុងសាលឱ្យបានខ្លាំងជាងមុន ព្រមទាំងរៀបចំការប្រកួតថ្នាក់ជាតិឱ្យបានទៀងទាត់ និងផ្តល់ឱកាសឱ្យកីឡាករជម្រើសជាតិ ក៏ដូចជាក្រុមតំណាងឱ្យកម្ពុជា ចេញទៅប្រកួតនៅក្រៅប្រទេសឱ្យបានច្រើន ដើម្បីទទួលបានបទពិសោធន៍ និងបច្ចេកទេសថ្មីៗមកអភិវឌ្ឍខ្លួនឯងបន្ថែមទៀត។
កីឡាករ កែវ សុចិត្រា បាននិយាយថា៖ «បើសិនជាសហព័ន្ធ មានការអើពើខាងហ្វុតសាលខ្លាំងជាងនេះបន្តិច ខ្ញុំគិតថា ក៏ពួកយើងខ្លាំងទៅតាមហ្នឹងដែរ ព្រោះថា នៅពេលសហព័ន្ធជាមេគ្រួសារ មិនឱ្យពួកយើងចេញទៅណា ក៏យើងមិនអាចចេញទៅកើតដូចគ្នា»។
ចំណែកកីឡាករហ្វុតសាលផ្សេងទៀត បាននិយាយដោយសុំមិនបញ្ចេញឈ្មោះថា៖ «ខ្ញុំមើលឃើញថា បាល់ទាត់ក្នុងសាលនេះ សហព័ន្ធ មិនបានជំរុញឱ្យបានខ្លាំងដូចបាល់ទាត់តារាងធំទេ។ តារាងធំ មានទាំងការប្រកួតលីគកំពូល លីគយុវជនច្រើនកម្រិត និងលីគនារី ចំណែកហ្វុតសាលវិញ ការប្រកួតថ្នាក់ជាតិប្រចាំឆ្នាំ ក៏មិនបានទៀងទាត់ ហើយហ្វុតសាលផ្នែកនារីគ្មានតែម្តង។ ចំណុចទាំងអស់នេះហើយ ទើបធ្វើឱ្យវិស័យនេះ មិនអាចរីកចម្រើនទៅមុខបាន»។
ជុំវិញក្តីកង្វល់ និងបញ្ហា ដែលថ្នាក់ដឹកនាំក្លិប គ្រូបង្វឹក និងកីឡាករ បានលើកឡើងទាំងអស់នេះ លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា (FFC) បានទទួលស្គាល់ថា វាពិតជាមានបញ្ហាច្រើនបានកើតឡើង នៅក្នុងវិស័យបាល់ទាត់ហ្វុតសាល ហើយលោកក៏បានសម្តែងការសោកស្តាយ នៅពេលឃើញក្លិបធំៗមួយចំនួនបានបិទទ្វារជាបន្តបន្ទាប់ ធ្វើឱ្យការអភិវឌ្ឍធនធានកីឡាករ មិនទាន់មានភាពច្បាស់លាស់។
យ៉ាងណាក៏ដោយ លោក កែវ សារ៉េត បានថ្លែងថា៖ «បាល់ទាត់ហ្វុតសាល ក៏ស្ថិតនៅក្នុងផែនការអភិវឌ្ឍរយៈពេលវែងរបស់សហព័ន្ធដែរ ក៏ប៉ុន្តែចាប់តាំងពីសម័យកូវីដ១៩មកដល់ពេលនេះ ថវិកាដែលយើងរកបានពីស្ពនស័រដោយខ្លួនឯង វាខ្វះខាត ជាពិសេសលើហ្វុតសាលហ្នឹង គឺពិបាករកស្ពនស័រណាស់ អ៊ីចឹងយើងអត់មានថវិកាសម្រាប់ជួយទ្រទ្រង់ទេ»។
ចំពោះថវិកា ដែល FFC ទទួលបានពីសហព័ន្ធបាល់ទាត់អន្តរជាតិ (FIFA) និងសហព័ន្ធបាល់ទាត់ទ្វីបអាស៊ី (AFC) ក្តី លោក កែវ សារ៉េត បានឱ្យដឹងថា បានត្រឹមជួយរៀបចំបើកវគ្គបណ្តុះបណ្តាលមួយចំនួន ប៉ុន្តែបើរៀបចំជាការប្រកួតផ្សេងៗ លុះត្រាតែ FFC មានស្ពនស័រ ហើយចំណុចនេះហើយ ដែលធ្វើឱ្យមានការអាក់ខាន និងលែងមានសកម្មភាព ចំណែកក្លិបហ្វុតសាលមួយចំនួន ក៏បានជួបបញ្ហាអត់ស្ពនស័រដូចគ្នា។
លោកបញ្ជាក់ថា៖ «បញ្ហាពិបាកវានៅកន្លែងហ្នឹង ហើយសហព័ន្ធ ក៏ជួបការពិបាកដូចគ្នា ព្រោះក្រុមការងារផ្នែកទីផ្សារ គាត់ខំស្វះស្វែងរកអ្នកឧបត្ថម្ភណាស់ ដោយយើងដាក់ទិសដៅថា ក្នុង១ឆ្នាំយ៉ាងហោចមានការប្រកួត (បាល់ទាត់ក្នុងសាលថ្នាក់ជាតិ) ឱ្យបានម្តង ដើម្បីឱ្យមានការជ្រើសរើសកីឡាករ ប៉ុន្តែការរង់ចាំរបស់យើង នៅមិនទាន់ឃើញភាគីណា ឬក្រុមហ៊ុនណាឆ្លើយតបមកវិញទេ។ នេះជាការពិបាក មិនអាចគេចផុត»។
លោក កែវ សារ៉េត បានបន្ថែមថា៖ «នៅពេលខ្វះថវិកា យើងធ្វើអីមិនកើតទេ ហើយបញ្ហាហ្នឹងហើយដែលធ្វើឱ្យក្លិបមិនសូវសប្បាយចិត្តជាមួយសហព័ន្ធ។ សម្រាប់គម្រោងបាល់ទាត់១១នាក់(តារាងធំ) គឺមានការចាប់អារម្មណ៍ពីស្ពនស័រមកខ្លះ ធ្វើឱ្យយើងនៅសល់ថវិកា សម្រាប់រៀបចំព្រឹត្តិការណ៍ ចំណែកហ្វុតសាល យើងពិបាករកអ្នកឧបត្ថម្ភ ហើយសហព័ន្ធអត់មានថវិកាបម្រុងទៀត»៕
