សមាគមសម្ព័ន្ធអ្នកសារព័ត៌មានកម្ពុជា

កម្មករសំណង់ភាគច្រើននៅមិនទាន់បានចុះឈ្មោះសម្រាប់ការទទួលបានអត្ថប្រយោជន៍ពីរដ្ឋាភិបាល

កម្មករធ្វើការនៅការដ្ឋានសំណង់មួយកន្លែងក្នុងរាជធានីភ្នំពេញ នៅថ្ងៃទី១៣ ខែមីនា ឆ្នាំ២០២៣។ (ខេមបូចា/ព្រីង សំរាំង)
កម្មករធ្វើការនៅការដ្ឋានសំណង់មួយកន្លែងក្នុងរាជធានីភ្នំពេញ នៅថ្ងៃទី១៣ ខែមីនា ឆ្នាំ២០២៣។ (ខេមបូចា/ព្រីង សំរាំង)

នៅ​រ​សៀល​ថ្ងៃ​សុក្រ លោក ហ៊ឹម ប៊ុនឆយ កំពុងធ្វើការក្រោម​កំដៅថ្ងៃដោយ​មិន​បាន​ពាក់​ឧបករណ៍​សុវត្ថិភាពអ្វី​ទាំងអស់ ខណៈ​​លោក​​រៀប​​​ឥដ្ឋ​នៅ​ជាន់​ទី២ នៃ​ការដ្ឋាន​សំណង់​លំនៅឋាន​មួយ​ក្នុង​ខណ្ឌ​ច្បារអំពៅ រាជធានី​ភ្នំពេញ។

ទោះបីជាប្រឈម​គ្រោះថ្នាក់ដោយសារការងារដែលលោក​អាចរកប្រាក់ចំណូលបាន១២,៥ដុល្លារក្នុងមួយថ្ងៃក៏ដោយ ក៏លោក ប៊ុនឆយ បាន​ដឹងតិចតួចណាស់​អំពីអត្ថប្រ​យោជន៍នៃការធានារ៉ាប់រង​សុខភាព និងគ្រោះថ្នាក់ការងារ ​ដែលលោក​មានសិទ្ធិ​ទទួល​បាន​តាមរយៈរបប​សន្តិសុខសង្គម ឬ ប.ស.ស​ ដែលដំណើរ​ការ​ដោយរដ្ឋាភិបាល។

យោងតាមច្បាប់ការងារ កម្មករនិយោជិតទាំងអស់ត្រូវទទួលបានអត្ថប្រយោជន៍ពី​បេឡាជាតិរបបសន្តិសុខសង្គម។ ប៉ុន្តែកម្មករសំណង់ជាច្រើននៅតែមិនដឹងអំពីអ្វីដែលនិយោជកត្រូវ​ផ្តល់​ឲ្យ​ពួកគេ ហើយកម្មករសំណង់ភាគច្រើនមិនត្រូវបានចុះ​ឈ្មោះ ដើម្បីទទួលបានអត្ថប្រយោជន៍បេឡាជាតិរបបសន្តិសុខសង្គមទេ។

តាមច្បាប់ការងារនៃ​បេឡាជាតិរបបសន្តិសុខសង្គម និយោជកត្រូវចុះឈ្មោះនិយោជិត និងបង់វិភាគទានឲ្យ​បេឡាជាតិរបបសន្តិសុខសង្គមដើម្បី​ទទួលបាន​អត្ថប្រយោជន៍ធានារ៉ាប់រងសុខភាព ឬ​គ្រោះថ្នាក់ការងារ។

លោក ប៊ុនឆយ បាននិយាយថា៖ «ខ្ញុំបាន​ឮខ្លះដែរ ​អំពី ប.ស.ស. ប៉ុន្តែនៅកន្លែងធ្វើការរបស់ខ្ញុំ អត់ដែលមាន​អ្នក​ណានិយាយរឿងនេះទេ សូម្បីតែមេការរបស់ខ្ញុំ»។ លោក ប៊ុនឆយ បាន​បន្ថែម​​ថា ការងារ​ក្នុង​វិស័យ​សំណង់​ដែល​លោក​បាន​ធ្វើ​ការ​១០​ឆ្នាំ​មក​នេះ​ ប្រឈម​នឹងគ្រោះថ្នាក់និង​បញ្ហា​សុខភាព ហើយ​បាន​កើត​មាន​ចំពោះ​កម្មករជា​ធម្មតា​ទៅ​ហើយ​។

លោក ហ៊ឹម ប៊ុនឆយ ធ្វើការនៅការដ្ឋានសំណង់ក្នុងរាជធានីភ្នំពេញ ថ្ងៃទី១០ ខែមីនា ឆ្នាំ២០២៣។ (ខេមបូចា/ស៊ន សារ៉ាត)

ការ​រីកចម្រើន​នៅ​ក្នុង​ឧស្សាហកម្មសំណង់របស់កម្ពុជាបានផ្តល់​ការងារ​ដល់​កម្មករ​ប្រមាណ២៥០ ០០០នាក់ ដែលភាគច្រើនបានផ្លាស់ប្តូរទីលំនៅពីតំបន់ជនបទដើម្បីស្វែងរកការងារនៅក្នុងវិស័យសំណង់ដ៏គ្រោះ​ថ្នាក់​នៅក្នុងរាជធានីភ្នំពេញ។​ រដ្ឋាភិបាលបានអនុម័តគម្រោងសាងសង់ចំនួន ៤ ២៧៦គម្រោង​នៅ​ឆ្នាំ២០២២ ដែលមានតម្លៃសរុបជិត៣ពាន់លានដុល្លារ។ នេះបើយោងតាមរបាយការណ៍របស់ក្រសួងរៀបចំដែនដី។

លោក ហេង សុផាន់ណារិទ្ធ អគ្គនាយករងនៃបេឡាជាតិសន្តិសុខសង្គមបាន​ឲ្យ​ដឹង​ថា​ មានតែសហគ្រាសសំណង់ចំនួន៤៦៥ប៉ុណ្ណោះបានចុះបញ្ជី ដែលមាន​ម្មករចំនួន ៣២ ២៧៣នាក់ ដើម្បីទទួលបានអត្ថប្រយោជន៍ពីបេឡាជាតិបសន្តិ​សុខសង្គមគិតត្រឹមខែមីនា។

លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជា បានប៉ាន់ប្រមាណថា ក្នុង​ចំណោម​កម្មករសំណង់​​ ៦០០០នាក់នៅក្នុងសហជីពរបស់លោកមានតិចតួចណាស់​ដែល​បានចុះឈ្មោះសម្រាប់ ប.ស.ស ដែលភាគច្រើន​ជា​បុគ្គលិកក្រុមហ៊ុន។ លោក​បានកត់សម្គាល់ថា ស្ទើរតែ​មិន​មានការសម្រួល​សម្រាប់​ការចុះឈ្មោះដល់កម្មករ ដែលធ្វើការ​តាមរយៈ​អ្នក​​ម៉ៅការ​បន្តនោះទេ​។

លោក​ថ្លែង​ថា៖ «កម្មករ​កំពុង​ប្រឈម​នឹង​ហានិភ័យ​ខ្ពស់​នៅ​កន្លែង​ការងារ។ ពេល​ពួកគាត់​មាន​គ្រោះថ្នាក់ ឬ​បញ្ហា​សុខភាព ពួកគាត់​ចំណាយ​ប្រាក់​ផ្ទាល់ខ្លួន ​ដើម្បី​ព្យាបាល ខណៈ​បាត់បង់​ការងារ​ផង​ដែរ​។ ពួកគាត់​មិនមានអា​ហា​រ​ល្អគ្រប់គ្រាន់សម្រាប់បរិភោគ ហើយនៅពេលដែលពួកគាត់​ធ្លាក់ខ្លួនឈឺ ពួកគាត់​គ្មាន​ប្រាក់ ដូច្នេះ​ហើយ​វាចាំបាច់ដែល​ពួកគាត់ត្រូវ​ទទួលបាន ប.ស.ស»។

លោក អូន គុណ មេការសំណង់ដែលគ្រប់គ្រងលើ​កម្មករ ៨នាក់នៅការដ្ឋានសំណង់នៅខណ្ឌច្បារអំពៅ​បាននិយាយថា លោកមិនដែលបានទទួលព័ត៌មានអំពីបេឡាជាតិសន្តិសុខសង្គមពីអាជ្ញាធរ ឬម្ចាស់គម្រោងនោះទេ។

លោក​បាននិយាយថា៖ «គ្មាននរណាមកប្រាប់ខ្ញុំអំពីរឿងនេះទេ ហើយខ្ញុំក៏មិនដឹងថា វាដំណើរការយ៉ាងដូចម្តេចដែរ ខណៈដែលកម្មករសំណង់ភាគច្រើនតែងតែផ្លាស់ប្តូរពីកន្លែងមួយទៅកន្លែងមួយ ដែលពិបាកសម្រាប់ពួកគាត់​»​ ។

ឧស្សាហកម្មសំណង់បានរីកដុះដាលនៅក្នុងទីក្រុងភ្នំពេញ ដែលមានគម្រោងជាង៦១ ០០០ ដែលមានទឹក​ប្រាក់​៦៩ពាន់លានដុល្លារត្រូវបានអនុម័តតាំងពីឆ្នាំ២០០០ ប៉ុន្តែវិស័យនេះនៅតែជាវិស័យដែល​ឆក់​យក​ជីវិត​កម្មករច្រើន​ជាងគេ។ 

អង្គការពលកម្មអន្តរជាតិ (ILO) ប៉ាន់ប្រមាណថា កម្មករជាង១ ៥០០នាក់ត្រូវបានស្លាប់​ជារៀងរាល់ឆ្នាំដោយសារ​គ្រោះថ្នាក់ការងារនៅក្នុងប្រទេសកម្ពុជា ដែលភាគ​ច្រើននៅក្នុងការដ្ឋានសំណង់ ឡឥដ្ឋ និងសហគ្រាសធុនតូច «ដែលគ្មាន​ចំណេះ​ដឹងនិងគ្មាន​ប្រព័ន្ធការពារកម្មករ»។

លោក សុខ គីន ប្រធាន​សហជីព​បានមាន​ប្រសាសន៍​ថា កម្មកររបស់​ក្រុមហ៊ុន​​ម៉ៅ​ការ​បន្ត​ភាគ​ច្រើន​​ខ្វះ​ឧបករណ៍​សុវត្ថិភាព។ ក្នុង​ករណីមាន​​គ្រោះ​ថ្នាក់ ​ក្រុម​គ្រួសារ​ពិបាក​ទទួលបាន​​សំណង​។បើគ្មានការចុះឈ្មោះសម្រាប់បេឡាជាតិរបបសន្តិសុខសង្គមទេ គ្រួសាររបស់កម្មករប្រហែលជាមិនអាចទាមទារអត្ថប្រយោជន៍​​បានទេ។

ក្នុងឆ្នាំ២០២២ ក្រសួងការងារបានចុះបញ្ជីសហគ្រាសចំនួន ២០ ១៧៥ ដែលមាននិយោជិតចំនួន ២ ៥៦៧ ៩៥៣នាក់ ដែលមានសិទ្ធិទទួលបានសេវាធានារ៉ាប់រងគ្រោះថ្នាក់ និងការ​ធានារ៉ាប់រងសុខភាពតាមរយៈបេឡាជាតិរបបសន្តិសុខសង្គម​។

រដ្ឋាភិបាលបានខិតខំប្រឹងប្រែងពង្រីកលទ្ធភាពទទួលបានអត្ថប្រយោជន៍បេឡាជាតិរបបសន្តិសុខសង្គម ដោយអនុញ្ញាតឱ្យអ្នកបើកបររ៉ឺម៉កកង់បី និងអ្នកធ្វើការតាមផ្ទះក្នុងវិស័យសេដ្ឋកិច្ច​ក្រៅប្រព័ន្ធ​អាចចុះឈ្មោះតាមរយៈកម្មវិធីសាកល្បងដែលបានចាប់ផ្តើមដំណើរ​ការ​កាលពីខែតុលាឆ្នាំមុន។

លោក សុផាន់ណារិទ្ធ បាន​បន្ថែម​ថា កម្មករ​សំណង់​របស់​ក្រុមហ៊ុនម៉ៅការ​បន្ត​​ក៏​ទទួល​បាន​អត្ថប្រយោជន៍ដែរ​តាម​​ច្បាប់​ដែល​មាន​ស្រាប់ ប៉ុន្តែ​មាន​ការ​លំបាក​ក្នុង​ការ​ចុះ​បញ្ជី។

លោក សុផាន់ណារិទ្ធ បាន​មាន​ប្រសាសន៍ថា៖ «កម្មករ​សំណង់​ផ្លាស់​ប្តូរ​ការងារ​ជា​ញឹក​​ញាប់។​ពួកគេ​ភាគ​ច្រើន​មិន​មាន​អត្តសញ្ញាណប័ណ្ណ។ យើង​កំពុង​ធ្វើ​ការ​អប់រំ​ពួក​គាត់​​ឱ្យ​យល់​ពី​អត្ថប្រយោជន៍​នៃ​ប្រព័ន្ធ​បេឡាជាតិ​របប​សន្តិសុខ​សង្គម»។

កម្មករសំណង់ធ្វើការជាមួយ លោក ហ៊ឹម ប៊ុនឆយ នៅ​ការដ្ឋាន​សំណង់មួយ​ក្នុង​រាជធានី​ភ្នំពេញ ថ្ងៃទី ១០ ខែមីនា ឆ្នាំ២០២៣។ (ខេមបូចា/ស៊ន សារ៉ាត)

កម្មករសំណង់ជាប់កិច្ចសន្យាម៉ៅការ​បន្តជាច្រើនត្រូវបានបង្ខំឱ្យធ្វើជាកម្មករដែល​ចល័តពីកន្លែងមួយទៅកន្លែង​មួយ​ទៅ​តាម​ការងាររបស់ពួកគេ ដែលជារឿយៗត្រូវបានបញ្ចប់នៅពេលដែលគម្រោងត្រូវបានបញ្ចប់។

លោក ប៊ុនឆយ បាន​និយាយថា៖ «យើង [កម្មករ] ធ្វើការក្រោមកំដៅ​ថ្ងៃជារៀងរាល់ថ្ងៃ ហើយប្រើប្រាស់កម្លាំង​ច្រើន។ យើងប្រឈមនឹងបញ្ហាសុខភាព ហើយងាយធ្លាក់ខ្លួនឈឺ។ យើងត្រូវចំណាយលើការព្យាបាលដោយខ្លួនឯង។ ដូច្នេះ ខ្ញុំ​ពិត​ជា​ចង់​ទទួល​បាន​​ ប.ស.ស. ព្រោះ​វា​អាច​កាត់​បន្ថយ​ការ​ចំណាយ​ពេល​ខ្ញុំ​ឈឺ ឬ​ជួប​គ្រោះ​ថ្នាក់​ជាយថាហេតុណាមួយ»។

លោក សយ សេង អាយុ២៨ឆ្នាំ ជាកម្មករសំណង់មកពីខេត្តស្វាយរៀង បាននិយាយ​ថា លោក​ត្រូវបានចុះឈ្មោះសម្រាប់បេឡាជាតិរបបសន្តិសុខសង្គម នៅពេលដែលលោក​ធ្វើការក្នុងឧស្សាហកម្មកាត់ដេរ ប៉ុន្តែចាប់តាំងពីចេញពីរោងចក្រ​មក លោក​មិនបាន​ទទួល​អត្ថប្រយោជន៍ពីប.ស.ស.ទេ​។ លោកតែងបារម្ភ​អំពី​សុវត្ថិភាពការងាររបស់លោក។

លោក​បាននិយាយថា៖ «ខ្ញុំតែងតែមានអាការៈងងឹតមុខ ហើយខ្ញុំបារម្ភថា ពេលឡើងដល់ជាន់ខ្ពស់ វាអាចមានគ្រោះថ្នាក់សម្រាប់ខ្ញុំ ព្រោះគ្រោះថ្នាក់មើល​មិនឃើញទេ»។ លោកបានបន្ថែមថា៖ «ប្រ​សិនបើកម្មករសំណង់អាចទទួល​បាន​សេវា [ប.ស.ស.] ដូចកម្មកររោងចក្រ ខ្ញុំសប្បាយចិត្តហើយ​មានអារម្មណ៍ថា មានសុវត្ថិភាព។ ខ្ញុំមានអារម្មណ៍ថា ត្រូវបានការពារដូចបុគ្គលិកដទៃទៀតដែរ»

ប្រែសម្រួលពីអត្ថបទភាសាអង់គ្លេស៖ The Majority of Construction Workers Are Still Not Registered for Government Benefits

 
434 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម