សមាគមសម្ព័ន្ធអ្នកសារព័ត៌មានកម្ពុជា

ក្រសួងវប្បធម៌ស្នើឱ្យអាជ្ញាធរចាត់វិធានការទប់ស្កាត់ការផ្សាយ​បទចម្រៀងមានចំណងជើងថា «ឈាមបាតុករ»

បទចម្រៀងមានចំណងជើងថា «ឈាមបាតុករ» ដែលបណ្តាញព័ត៌មានសង្គមចំនួនបានបង្ហោះផ្សព្វផ្សាយកាលពីថ្ងៃទី៣ ខែមករា ឆ្នាំ២០២៣ ត្រូវបានក្រសួងវប្បធម៌ និងវិចិត្រសិល្បៈ ស្នើឱ្យអគ្គស្នងការនរគបាលជាតិចាត់វិធានការទប់ស្កាត់។ រូបថតនៅថ្ងៃទី៦ ខែមករា ឆ្នាំ២០២៣។ ខេមបូចា/ ព្រីង សំរាំង
បទចម្រៀងមានចំណងជើងថា «ឈាមបាតុករ» ដែលបណ្តាញព័ត៌មានសង្គមចំនួនបានបង្ហោះផ្សព្វផ្សាយកាលពីថ្ងៃទី៣ ខែមករា ឆ្នាំ២០២៣ ត្រូវបានក្រសួងវប្បធម៌ និងវិចិត្រសិល្បៈ ស្នើឱ្យអគ្គស្នងការនរគបាលជាតិចាត់វិធានការទប់ស្កាត់។ រូបថតនៅថ្ងៃទី៦ ខែមករា ឆ្នាំ២០២៣។ ខេមបូចា/ ព្រីង សំរាំង

ក្រសួងវប្បធម៌ និងវិចិត្រសិល្បៈបានស្នើឱ្យអាជ្ញាធរចាត់វិធានការទប់ស្កាត់ការ​ផ្សព្វផ្សាយ​ឡើងវិញនូវវីដេអូចម្រៀងរ៉េប ក្រោមចំណងជើងថា «ឈាមបាតុករ» ដែលបង្ហាញ​ពីសកម្មភាព​នៃការបង្ក្រាបដោយហិង្សារបស់កងកម្លាំងប្រដាប់អាវុធទៅលើក្រុមបាតុកររោងចក្រ​កាត់ដេរនៅផ្លូវ វេង ស្រេង និងតំបន់សេដ្ឋកិច្ចពិសេសក្នុងឆ្នាំ២០១៤។ 

នៅក្នុងលិខិតដែលក្រសួងវប្បធម៌ផ្ញើរទៅអគ្គស្នងការនគបាលជាតិថ្ងៃទី៦ ខែមករា បានឱ្យដឹង​ថា ចម្រៀងបែបរ៉េប ច្រៀងដោយតារារ៉េបវ័យក្មេង គា សុគន្ធ ត្រូវបានទំព័រហ្វេសប៊ុក​មួយចំនួន​យកមកបង្ហោះឡើងវិញ ដោយមានខ្លឹមសារ និងវីដេអូ មានលក្ខណៈ អុជអាល ញុះញង់ និង​អាច​បង្កអសន្តិសុខដល់សង្គម។

ក្រសួងបញ្ចាក់ថា៖ «ដើម្បីទប់ស្កាត់នូវភាពមិនប្រក្រតីដែលអាចនឹងកើតមានឡើង​ជាយថា​ហេតុ​តាមរយៈបទចម្រៀងដែលមានខ្លឹមសារ អុជអាល ញុះញង់នេះ»

អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បានបដិសេធមិនឆ្លើយតបគ្រប់​សំណួរ​របស់អ្នកសារព័ត៌មានខេមបូចា ដោយលោកថា ករណីនេះកំពុងស្ថិតនៅក្នុង​ប្រតិបត្តិការ។

វីដេអូនេះត្រូវបានបង្ហោះឡើងវិញនៅលើទំព័រហ្វេសប៊ុករបស់អង្គការ លីកាដូ និង សង់ត្រាល់ កាលពីថ្ងៃទី៣ ដើម្បីរំលឹកខួប ៩ឆ្នាំនៃការបង្ក្រាបដោយហិង្សាកាលពីឆ្នាំ២០១៤។

លោក​ មឿន តុលា នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ​និង​សិទ្ធិ​មនុស្ស (សង់ត្រាល់) បានយល់ឃើញថា ការបង្ហោះនូវវីដេអូចម្រៀងនេះ មិនមែនជាការអុជអាល ញុះញង់ និងចេតនាបង្កអសន្តិសុខសណ្ដាប់ធ្នាប់សង្គម​ដូចតាមការលើកឡើង​របស់ក្រសួង​នោះ​ឡើយ។ តែលោកថា ដើម្បីជាការរំលឹក​ដល់ព្រឹត្តិការណ៍ដែលកើតឡើងកាលពីថ្ងៃទី២-៣ ខែមករា ឆ្នាំ​២០១៤ ក៏ដូចជាដើម្បីឱ្យអាជ្ញាធរបានដឹងនឹងបើកការស៊ើបអង្កេតច្បាស់មួយ និង​ដើម្បី​ឆ្លុះបញ្ចាំងកុំឱ្យកើតមានអំពើហិង្សាបន្តទៅទៀត។

លោកបន្ថែមថា៖ «ហើយចេតនារបស់សង្គមស៊ីវិលយើងគ្រាន់តែចង់រំលឹកអាហ្នឹង ហើយសូមឱ្យអាជ្ញាធរគាត់បើកការស៊ើបអង្កេតមួយឱ្យបានច្បាស់លាស់។ ថាតើអ្នកណា ជាអ្នកប្រព្រឹត្តអំពើហិង្សាហ្នឹង។ ហើយគួរតែមានការទទួលខុសត្រូវឱ្យច្បាស់លាស់»

លោក តុលា បន្តថា​ តាមពិតទៅគឺអាជ្ញាធរអាចរកវិធីអហិង្សាដើម្បីធ្វើការដោះស្រាយ​បញ្ហា​នៅក្នុងសង្គមដោយមិនគួរប្រើអំពើហិង្សានោះទេ។ លោកបន្ថែមថា រយៈពេល៩ឆ្នាំនេះ គឺ​លោក​នៅពុំទាន់ឃើញជនរងគ្រោះដែលរងការបង្រា្កបដោយអំពើហិង្សាននោះ បានទទួល​នូវយុត្តិធម៌នៅឡើយទេ។

ទោះថាក្រសួងគិតក្នុងការណ៌អ្វីក៏ដោយ ប៉ុន្តែលោក តុលា យល់ឃើញថា ការចេញលិខិត​បែបនេះវាអាចនឹងប៉ះពាល់ឫគំរាមកំហែងដល់សិទ្ធិសេរីភាពក្នុងការបញ្ចេញមតិ។

លោកបន្តថា៖ «ជាធម្មតាការបញ្ចេញមតិគឺអាចធ្វើទៅបាននៅក្នុងរូបភាពផ្សេងៗគ្នា ដូចជា ការចេញជាចម្រៀង ការសរសេរជាអត្ថបទសារព័ត៌មាន អត្ថបទនៃគំនិត និងការនិយាយ​ចេញជាដើម»

យ៉ាងណាលោកថា មកទល់ពេលនេះ លោកមិនដឹងថានឹងធ្វើរបៀបណានោះទេ ដោយថា លោកពុំទាន់បានទទួលលិខិតជាផ្លូវការអ្វីនោះទេ ដោយគ្រាន់តែលឺគេមកប្រាប់តែប៉ុណ្ណោះ។

បទចម្រៀងមានចំណងជើងថា​ «ឈាមបាតុករ» ដែលបណ្តាញព័ត៌មានសង្គម​ចំនួន​បានបង្ហោះផ្សព្វផ្សាយ​កាលពីថ្ងៃទី៣​ ខែមករា ឆ្នាំ២០២៣ ត្រូវបានក្រសួងវប្បធម៌ និង​វិចិត្រសិល្បៈ ស្នើឱ្យ​អគ្គស្នងការ​នរគបាលជាតិចាត់វិធានការទប់ស្កាត់។ រូបថតនៅថ្ងៃទី៦ ខែមករា ឆ្នាំ២០២៣។ ខេមបូចា/ ព្រីង សំរាំង

លោក អំ សំអាត នាយកទទួលបន្ទុកចាត់ការទូទៅនៃអង្គការ លីកាដូ បានឱ្យដឹងថា ការចាក់​ផ្សាយឡើងវិញនូវវីដេអូនេះ គឺគ្រាន់តែជាការរំលឹកខួប៩ឆ្នាំនៃក្រុមកម្មករ​ដែលធ្វើបាតុកម្ម​ទាមទារ​តំឡើងប្រាក់ខែដែលរងការបាញ់រះពីសំណាក់កងកម្លាំងចម្រុះដែលកំពុងតវ៉ានៅ មហាវិថី វេង ស្រេង កាលពីដើមឆ្នាំ២០១៤ប៉ុណ្ណោះ។ លោកឱ្យដឹងបន្ថែមថា ហេតុការណ៍នោះ​បានសម្លាប់មនុស្សយ៉ាងតិច៤នាក់ និងបណ្តាលឱ្យមនុស្សយ៉ាងតិច៣ទៅ៨នាក់ ផ្សេងទៀត​រងរបួស។

លោកបានបន្តទៀតថា ព្រឹត្តិការណ៍នេះហាក់បីដូចជាត្រូវបានគេបំភ្លេចចោល ខណៈ​ជនរងគ្រោះ​នៅមិនទាន់បានទទួលយុត្តិធម៌នៅឡើយ។ ដូច្នេះ លោកថា អាជ្ញាធរនិងស្ថាប័ន​ពាក់ព័ន្ធ​គួរតែស៊ើបអង្កេតរកការពិត និងផ្ដល់យុត្តិធម៌ដល់ជនរងគ្រោះ។

ជាមួយគ្នា ចំពោះរូបភាពនិងអត្ថន័យក្នុងវីដេអូ លោក សំអាត ថាគឺមិន​មានន័យញុះញង់​អ្វី​ឡើយ ដោយលោកថាតាមពិត គឺគ្រាន់តែអំពាវនាវដល់អាជ្ញាធរឱ្យស្វែងរកយុត្តិធម៌​នៅក្នុង​ព្រឹត្តិការណ៍នេះ ក៏ដើម្បីទប់ស្កាត់កុំអោយមានអំពើហិង្សាបែបនេះទៀត។

វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ថ្លែងថា លោកមិនទាន់ឃើញការណែនាំពីសមត្ថកិច្ចដែលសមាគមលោកបង្ហោះបទចម្រៀងមានចំណងជើងថា «ឈាមបាតុករ» ស្តីពីការបង្រ្កាបយ៉ាងហិង្សាពីសំណាក់កងកម្លាំងប្រដាប់អាវុធប្រឆាំង​កម្មករកម្មការិនីតវ៉ាទាមទាដំឡើងប្រាក់ខែក្នុងឆ្នាំ២០១៤។

លោក វន់ ពៅ បន្តថា៖ «ខ្ញុំគិតថាការបង្ហោះវីដេអូនេះវាគ្រាន់តែជា​បទចំរៀង​រំលឹក​ពី​អតីតកាល​ប៉ុណ្ណោះមិនមែនជារឿងញុះញង់ឱ្យមានភាពអសន្តិសុខ បាត់បង់សណ្តាប់ធ្នាប់សង្គមអីទេ។ វាគ្រាន់ជាបែបអក្សរសិល្បិ៍ខ្មែរប៉ុណ្ណោះ វាមិនមែនរឿងប៉ះពាល់សង្គមធ្ងន់ធ្ងរអីទេ»។ លោកបន្ថែមថា៖ «យើងតែងតែមានការព្រួយបារម្ភព្រោះស្រុកយើងគេមិនគិតថាអាហ្នឹង​ជា​សេរីភាពបញ្ចេញមតិទេកាលណាគេចង់ចាត់ការរឿងអីមួយគេចាត់ការបាន។ ធម្មតាយើង​ព្រួយ​បារម្ភ តែទាំងអស់នេះ​វាជាសេរីភាពបញ្ចេញមតិរបស់ប្រជាពលរដ្ឋ របស់យើងសង្គមស៊ីវិល យើងសហជីព»

លោក វន់ ពៅ ឱ្យដឹងទៀតថា វាជារឿងពិតមិនមែនប្រឌិតអីទេ [ហិង្សាផ្លូវ វេង ស្រេង] បើសិន​ជា​ចាត់វិធានកា​រមែន មាន​ន័យ​ថា​សេរីភាពបញ្ចេញមតិរបស់ពលរដ្ឋត្រូវបានរឹតត្បិតទាំងស្រុងតែ​ម្តង។ សូម្បីបណ្តាញសង្គម​និយាយ​ សរសេរបទចំរៀងរឿងពីអតីតកាលក៏ត្រូវបានដាក់ទោស​ដែរ អាហ្នឹងរឿងមួយហួសកម្រិតទទួលយកបាន។

លោក វន់ ពៅ បានចូលរួមតវ៉ាទាមទារប្រាក់ឈ្នួលអប្បបរមា​របស់កម្មករនៅ​រាជធានីភ្នំពេញ នៅថ្ងៃទី៣ ខែមករា ឆ្នាំ២០១៤។  លោកត្រូវបានឃាត់ខ្លួន និងកាត់ទោសក្នុងឆ្នាំ២០១៤ ពីបទញុះញង់ឱ្យប្រព្រឹត្តបទល្មើសជាអាទិ និងទោសដាក់ពន្ធនាគាររយៈពេល៤ឆ្នាំ៦ខែ តែអនុវត្តន៍ទោសរយៈពេល៥ខែក្នុងពន្ធនាគារ។

លោក គា សុគន្ធ និង ឡុង ពុទ្ធារា ដែលជាតារាចម្រៀងរ៉េបបែបសង្កម ត្រូវបានតុលាការ​ខេត្តសៀមរាបកាត់ទោសកាលពីខែធ្នូ ឆ្នាំ២០២០ ដោយសារការច្រៀង​ចម្រៀងបែបរិះគន់​រដ្ឋាភិបាល ដូចជាបញ្ហាសេដ្ឋកិច្ច ដីធ្លី និងបូរណៈភាពទឹកដី។ ក្រសួងវប្បធម៌ ដែលជា​ដើម​បណ្តឹង​ក្នុងករណីនេះ បានហាមការចាក់ផ្សាយចម្រៀងបែបរិៈគន់ទាំងនោះ។

កាលពីថ្ងៃទី៣ ខែមករា ឆ្នាំ២០១៤ កងកម្លាំងប្រដាប់អាវុធបានបាញ់ប្រហារ​កម្មកររោងចក្រ​កាត់ដេរ​ដែលចេញតវ៉ារាប់ពាន់នាក់នៅលើផ្លូវ វេង ស្រេង រាជធានីភ្នំពេញ ដែលបណ្តាលឱ្យ​មនុស្សយ៉ាងហោចណាស់៥នាក់បានស្លាប់ ដោយសារការតវ៉ារបស់កម្មកររោងចក្រកាត់ដេរ និងសហជីព មិនគាំទ្ររដ្ឋាភិបាល នៅពេលនោះធ្វើឡើងដើម្បីទាមទារប្រាក់ឈ្នួល​គោល​អប្បបរមា១៦០ដុល្លារក្នុងមួយខែ។

នៅពេលនោះដែរ គណបក្សសង្គ្រោះជាតិដែលឈ្នះបាន៥៥អសនៈក្នុងការបោះឆ្នោត២០១៣ ស្ថិតក្នុងការធ្វើពហិការមិនចូលសភា ហើយបានធ្វើការតវ៉ាលើលទ្ធផលបោះឆ្នោត ដែលខ្លួន​អះអាងថាមានភាពមិនប្រកក្រតី៕

រាយការណ៍បន្ថែមដោយ៖ អ៊ូ លាងឆាយ និងឃួន ណារីម

1,232 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម