តុលាការខេត្តកណ្តាលបានផ្តន្ទាទោសស្ត្រីជនជាតិហ្វីលីពីនមានផ្ទៃពោះចំនួន១៣នាក់ឱ្យជាប់ពន្ធនាគាររយៈពេល៤ឆ្នាំពីបទប៉ុនប៉ងជួញដូរមនុស្ស ព្រមទាំងស្ត្រីមេផ្ទះជនជាតិខ្មែរម្នាក់ឱ្យជាប់ពន្ធនាគារ៦ខែពីបទមិនរាយការណ៍អំពីបទឧក្រិដ្ឋ។
យោងតាមសាលាដំបូងខេត្តកណ្តាល ស្ត្រីត្រូវបានផ្តន្ទាទោសពីបទប៉ុនប៉ងជួញដូរមនុស្សឆ្លងដែន តាមមាត្រា២៧ និង២៩ នៃក្រមព្រហ្មទណ្ឌ និងមាត្រា១៦ នៃច្បាប់ស្តីពីការបង្ក្រាបការជួញដូរមនុស្ស និងអំពើធ្វើអាជីវកម្មផ្លូវភេទ។ ទោះបីជាយ៉ាងណា ការផ្តន្ទាទោសពួកគេរយៈ៤ឆ្នាំ ក្នុងនោះពីរឆ្នាំត្រូវបានព្យួរ។ ស្រដៀងនឹងការដាក់ទោសស្ត្រីអ្នកធ្វើការផ្ទះកម្ពុជា នាងនឹងត្រូវជាប់ទោសក្នុងពន្ធនាគារតែរយៈពីរខែ និងមួយថ្ងៃប៉ុណ្ណោះ ដោយឡែកទោសដែលនៅសល់ត្រូវព្យួរ។
សេចក្តីថ្លែងការណ៍របស់តុលាការ ដែលចុះហត្ថលេខាដោយអ្នកនាំពាក្យ បានបញ្ជាក់ថា ទង្វើដែលបានប្រព្រឹត្តដោយជនជាតិហ្វីលីពីនបង្កើតជាការប៉ុនប៉ងក្នុងអំពើលក់-ដូរមនុស្សសម្រាប់នាំឆ្លងដែន។ ពួកគេត្រូវផ្តន្ទាទោសតាមក្រមព្រហ្មទណ្ឌ និងច្បាប់ស្តីពីការបង្ក្រាបការជួញដូរមនុស្ស និងការធ្វើអាជីវកម្មផ្លូវភេទ។
សេចក្តីថ្លែងការណ៍នេះបានសង្កត់ធ្ងន់ថា ឧក្រិដ្ឋកម្មបែបនេះបង្កការគំរាមកំហែងយ៉ាងសំខាន់ដល់សន្តិសុខ និងសណ្តាប់ធ្នាប់សាធារណៈ និងរំលោភយ៉ាងធ្ងន់ធ្ងរដល់សិទ្ធិរបស់ទារក និងកុមារ ដែលត្រូវបានការពារដោយច្បាប់ជាតិ និងអន្តរជាតិ។ គូសបញ្ជាក់ផងដែរថា តាមមាត្រា ៩៨៧ នៃក្រមរដ្ឋប្បវេណី «ស្ត្រីដែលបានសម្រាលកូនគឺជាម្តាយរបស់កូន»។
តុលាការបញ្ជាក់ថា មានភ័ស្តុតាងច្បាស់លាស់ និងរឹងមាំដែលស្ត្រីទាំង១៣នាក់ មានចេតនាពពោះជំនួសដើម្បីបង្កើតកូន ក្នុងគោលបំណងលក់ឱ្យភាគីទី៣ ជាថ្នូរនឹងប្រាក់ដែលចាត់ទុកថាជាឧក្រិដ្ឋកម្មនៃការជួញដូរមនុស្ស។
ក្នុងសេចក្តីថ្លែងការណ៍បញ្ជាក់ថា៖ «ហេតុដូច្នេះហើយ ស្ត្រីដែលពពោះជំនួសក្នុងគោលបំណងបង្កើតកូនដើម្បីលក់-ដូរ ទទួលប្រាក់កម្រៃ ត្រូវចាត់ទុកជាជនល្មើសតាមច្បាប់នៃព្រះរាជាណាចក្រកម្ពុជា»។
យោងតាមស្ថានទូតហ្វីលីពីនប្រចាំទីក្រុងភ្នំពេញ កាលពីថ្ងៃទី៣ ខែធ្នូ ស្ត្រីទាំងនោះត្រូវបានឃុំខ្លួននៅមណ្ឌលសុខភាពដែលបានកំណត់នៅថ្ងៃទី២៣ ខែកញ្ញា ឆ្នាំ២០២៤ ហើយដាក់នៅក្រោមការការពាររបស់ប៉ូលិស។ ពួកគេបានទទួលការថែទាំសុខភាព និងជំនួយសុខុមាលភាពពីប្រទេសហ្វីលីពីន និងអាជ្ញាធរកម្ពុជា ខណៈពេលដែលកំពុងរង់ចាំការបញ្ចប់ដំណើរការតុលាការ។
ស្ថានទូតបានកត់សម្គាល់ថា ការរំលោភលើបម្រាមលើការពពោះជំនួសត្រូវបានចាត់ទុកថា ជាបទឧក្រិដ្ឋនៅក្នុងប្រទេសកម្ពុជា ហើយច្បាប់នេះត្រូវផ្តន្ទាទោសអតិបរមាពី១៥ ទៅ ២០ឆ្នាំ។
វាក៏បានទទួលស្គាល់ផងដែរនូវការកាត់បន្ថយការពិន័យមកត្រឹមពីរឆ្នាំ ដោយសារការបន្ធូរបន្ថយស្ថានការណ៍ ដែលត្រូវបានប្រកែកយ៉ាងតឹងរ៉ឹងដោយទីប្រឹក្សាដែលតែងតាំងដោយស្ថានទូត ដើម្បីបន្តលទ្ធផលល្អបំផុតក្នុងក្របខណ្ឌនៃច្បាប់កម្ពុជា។
រដ្ឋាភិបាលហ្វីលីពីន តាមរយៈស្ថានទូតរបស់ខ្លួន បានសន្យាបន្តផ្តល់ការគាំទ្រសមរម្យ រួមទាំងជំនួយផ្នែកច្បាប់ និងកុងស៊ុល ដល់ស្ត្រីហ្វីលីពីន ក្នុងដំណើរការកាត់ទោសរបស់ពួកគេនៅកម្ពុជា។
សរុបមក ស្ត្រីជនជាតិហ្វីលីពីន និងស្ត្រីមេផ្ទះខ្មែរ ត្រូវបានសមត្ថកិច្ចឃាត់ខ្លួន អំឡុងពេលឆ្មក់ចូលផ្ទះវីឡាមួយកន្លែង ក្នុងបុរីវិមានភ្នំពេញ ស្ថិតក្នុងឃុំព្រែកអញ្ចាញ ស្រុកមុខកំពូល ខេត្តកណ្តាល។ គេបានរកឃើញថា ស្ត្រីទាំង១៣នាក់ដែលមានផ្ទៃពោះចាប់ពី១ខែដល់៧ខែ។
កាលពីថ្ងៃទី៨ ខែតុលា រដ្ឋាភិបាលហ្វីលីពីន បានអំពាវនាវដល់ប្រទេសកម្ពុជា «កុំដាក់ទោសលើស្ត្រីពពោះជំនួសទាំង១៣នាក់» ដែលត្រូវបានគេជួញដូរចូលប្រទេស។ រដ្ឋាភិបាលរបស់ពួកគេនឹងផ្តល់ជំនួយផ្នែកច្បាប់ដល់ស្ត្រីដើម្បីសហការជាមួយប្រទេសកម្ពុជាដើម្បីដោះស្រាយករណីនេះ។
នៅពេលសួរថា តើការព្យួរទោសពីរឆ្នាំពីការជាប់ពន្ធនាគារមកពីការពិភាក្សាជាមួយស្ថានទូតហ្វីលីពីន លោក សូ សារិន អ្នកនាំពាក្យសាលាដំបូងខេត្តកណ្តាលបានឆ្លើយថា «វាជាការសម្រេចរបស់ចៅក្រម»។
លោក សារិន បាននិយាយថា ការថែទាំទារកទើបនឹងកើតគឺអាស្រ័យលើស្ថានទូតហ្វីលីពីន ដោយបន្ថែមថា៖ «យើងទទួលខុសត្រូវចំពោះដំណើរការផ្លូវច្បាប់តែប៉ុណ្ណោះ»។
កាលពីខែតុលា លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានប្រាប់ សារព័ត៌មានខេមបូចា ថា៖ «ការបង្កកំណើតរបស់ស្ត្រីមិនមែនធ្វើឡើងនៅក្នុងប្រទេសកម្ពុជាទេ គឺធ្វើឡើងដោយអ្នកជួញដូរនៅប្រទេសថៃ»។
កាលពីថ្ងៃពុធ លោក គឹមខឿន បានប្រាប់ សារព័ត៌មានខេមបូចា ថា មិនមានព័ត៌មានវិជ្ចមានអ្វីគួរឲ្យកត់សម្គាល់ពីកិច្ចសហប្រតិបត្តិការស៊ើបអង្កេតរវាងអាជ្ញាធរកម្ពុជា និងថៃ។ ទោះជាយ៉ាងណា លោកបញ្ជាក់ថា ការពិភាក្សាកំពុងបន្តរួមជាមួយនឹងការខិតខំដោះស្រាយបញ្ហានេះ៕
ប្រែសម្រួលពីអត្ថបទភាសាអង់គ្លេស៖ Thirteen Pregnant Filipinas to Serve Four-Year Jail Term For Attempted Human Trafficking
