សមាគមសម្ព័ន្ធអ្នកសារព័ត៌មានកម្ពុជា

កម្មករកាត់ដេររាប់ពាន់នាក់កំពុងប្រឈមការលំបាកក្នុងជីវភាពប្រចាំថ្ងៃក្រោយរោងចក្រជាច្រើនបានបិទទ្វារ និងព្យួរការងារ

អ្នកស្រី លី ថារី កំពុងនិយាយជាមួយអ្នកសារព័ត៌មានខេមបូចានៅបន្ទប់ជួលរបស់អ្នកស្រីក្នុងរាជធានីភ្នំពេញ កាលពីថ្ងៃទី២៤ ខែមីនា ឆ្នាំ២០២៣។ ខេមបូចា/ព្រីង សំរាំង
អ្នកស្រី លី ថារី កំពុងនិយាយជាមួយអ្នកសារព័ត៌មានខេមបូចានៅបន្ទប់ជួលរបស់អ្នកស្រីក្នុងរាជធានីភ្នំពេញ កាលពីថ្ងៃទី២៤ ខែមីនា ឆ្នាំ២០២៣។ ខេមបូចា/ព្រីង សំរាំង

ភ្នំពេញៈ នៅ​ក្រោយ​ក្លឹប​ ខារ៉ាអូខេ (KTV) មួយ​កន្លែង​ក្នុង​សង្កាត់​ទួល​សង្កែ១ អ្នកស្រី​ លី ថារី កំពុង​លក់​ភេសជ្ជៈ និង​គ្រឿងទេស​នៅ​ខាង​មុខ​បន្ទប់​ជួល​របស់​ខ្លួន​បន្ទាប់​ពី​រោងចក្រ​ដែល​អ្នក​ស្រី ធ្វើ​ការ​បាន​បិទកាល​ពីជាងពីរខែមុន​។

​ប៉ុន្តែ​របរ​នេះ​មិន​​អាច​ជួយឲ្យ​អ្នក​ស្រី​​ផ្គត់​ផ្គង់​គ្រួសារ​បាន​ពេញ​លេញ​នោះ​ទេ។ ថារី គឺ​ជា​ម្តាយ​ទទួល​បន្ទុក​ចិញ្ចឹម​កូន៣នាក់ ក្នុង​បន្ទុក​តែឯង ដែលមាន​​ស្រុក​កំណើត​ក្នុង​ខេត្ត​កំពង់​ចាម។ អ្នកស្រី​បាន​ធ្វើ​ការ​ជាកម្មកររោងចក្រ​ជាង​១៩ឆ្នាំ ​ហើយ ថារី បាន​ចំណាយពេល​១៣ឆ្នាំ​ធ្វើ​ការ​នៅ​​រោងចក្រ ​ លីម​ឡាញ​អ៊ិនធឺណេសិនណល​(ខេមបូឌា) ហ្គាមិន ដែល​ទើប​នឹង​​បិទ​ទ្វារ​កាលពី​ពាក់កណ្ដាល​ខែ​មករា ​ជាមួយ​នឹង​រោង​ចក្រ​ជា​ច្រើន​ទៀត ដែល​បាន​បិទ​ក្នុង​ឆ្នាំនេះ។ ការ​បិទ​រោង​ចក្រ​នេះ​ធ្វើ​ឲ្យ​អ្នក​កំពុង​ជម្នះ​នឹងជីវភាពប្រចាំថ្ងៃ ខណៈ​ចំណូល​​ធ្លាក់​ចុះ​យ៉ាង​ខ្លាំង​។​​

កន្លង​មក​អ្នកស្រី​អាច​រក​ចំណូល​បាន​ប្រហែល​៤០០​ដុល្លារ​ពី​ការធ្វើ​ការ​នៅ​រោង​ចក្រ​កាត់​ដេរ ដោយរាប់បញ្ចូលទាំងការធ្វើការថែមម៉ោង និង​អត្ថប្រយោជន៍ផ្សេងៗ ប៉ុន្តែ​ពេល​នេះ​អ្នកស្រី​អាច​រក​បាន​ត្រឹម​៧៥​ដុល្លារ​ក្នុង​មួយ​ខែពីការលក់​ដូរ និងទទួល​ការដេរខោអាវ​ពីខាងក្រៅ​។ អ្នកស្រី​ក៏​បាន​បញ្ជូន​កូន​ស្រី​អាយុ​១៦ឆ្នាំ ​ឲ្យ​ទៅ​ជួយលក់ដូរ​គេនៅ​តាម​ផ្ទះដោយ​​បាន​ចំណូល​១៥០ដុល្លារក្នុងមួយខែ​សម្រាប់​ផ្គត់​ផ្គង់​គ្រួសារ​ផង​ដែរ​។​​

អ្នកស្រី​​ថ្លែង​​ថា៖ «​ក្នុង​រយៈ​ពេល​ពីរ​ខែ​នេះ ខ្ញុំ​បាន​ចំណាយ​លុយដែលខ្ញុំសន្សំក្នុង​អំឡុង​ពេល​ធ្វើការ និង​លក់​គ្រឿង​​អលង្ការ​ទាំងអស់​ដើម្បី​បង់​ធនាគារ [មីក្រូហិរញ្ញវត្ថុ]»។ អ្នកស្រី​បន្ត​ថា៖ «ខ្ញុំ​រស់​នៅ​ដោយ​ពឹង​​លើ​ការងារ​រោង​ចក្រ​អស់​រយៈពេល​​ជា​ច្រើន​ឆ្នាំ​មក​ហើយ ហើយ​ការងារ​រោងចក្រ​​បាន​ជួយ​ឲ្យ​ជីវភាព​ខ្ញុំ​ល្អ​ប្រសើរ ប៉ុន្តែ​ពេល​នេះ​ខ្ញុំ​បាន​ជួប​ការលំបាក​ជា​ថ្មី។ វា​ធ្វើ​ឲ្យ​ខ្ញុំ​បាត់​បង់​អ្វីៗ​គ្រប់​យ៉ាង​»

នៅពេល​រោងចក្រ​បិទ​ ថារី និង​កម្មករ​ផ្សេងទៀត ​​ទទួល​បានសំណង​ជា​​ប្រាក់ឈ្នួលតែ​​​មួយ​ខែ​ប៉ុណ្ណោះ ដែល​នេះ​ជា​ការ​រំលោភ​លើ​ច្បាប់​ស្ដី​ពី​ការ​ងារ​នៅ​កម្ពុជា។ ម្ចាស់​រោង​ចក្រ​មិន​អាច​​ទាក់​ទង​សុំ​ការ​អត្ថាធិប្បាយ​បាន​ទេ​។

អ្នកស្រី​បន្ថែម​ថា៖ «​ខ្ញុំ​គិត​ថា​ពេល​រោង​ចក្រ​បិទទ្វារ ខ្ញុំ​​នឹង​បាន​​សំណង​សម​រម្យ ប៉ុន្តែ​ចុង​ក្រោយ​បន្ទាប់ពី​ធ្វើការ​ជាង​១០​ឆ្នាំ ខ្ញុំ​មិន​បាន​ទទួល​អ្វី​ទាំង​អស់»។​

អ្នកស្រី លី​ ថារី កំពុង​លក់​ដូរ​គ្រឿងទេស​នៅ​ខាង​ក្រៅ​បន្ទប់​ជួល​ក្នុង​រាជធានី​ភ្នំពេញ កាលពីថ្ងៃទី​២៤ ខែ​មីនា ឆ្នាំ​២០២៣។​ ខេមបូចា/ ព្រីង សំរាំង

រោង​ចក្រ​ដែល​អ្នកស្រី​ធ្វើ​ការ​មាន​ឈ្មោះ​ថា​ លីម​ឡាញ​អ៊ិនធឺណេសិនណល​(ខេមបូឌា) ហ្គាមិន ​​ជា​រោង​ចក្រ​មួយ​ក្នុង​ចំណោម​រោង​ចក្រ​ចំនួន​៧១ ដែល​បាន​បិទ​ទ្វារ ឬ​ផ្អាក​ដំណើរ​ការ​ចន្លោះពី​ខែ​មករា និង​ខែ​កុម្ភៈ​ក្នុង​ឆ្នាំ​នេះ​។ ​ការ​បិទ​ និងព្យួរ រោង​ចក្រ​ទាំង​នេះ​បាន​ប៉ះពាល់​កម្មករ​ជាង​៣២ ០០០​នាក់​។

នៅ​ក្នុង​ឆ្នាំ​២០២២ មាន​រោង​ចក្រសរុប​​ចំនួន​៤៩០ បាន​បិទ​ទ្វារ ឬ​ផ្អាក​ដំណើរ​ការ ដែល​បាន​ប៉ះពាល់​ដល់​កម្មករ​​ជា​ង ៤០ ០០០​នាក់។ នេះ​បើ​តាម​​តួ​លេខរបស់​សហភាពការងារ​កម្ពុជា​។​​

​វិស័យ​កាត់​ដេរ​នៅ​កម្ពុជា​បាន​ផ្ដល់​ឱកាស​ការងារ​ដល់​កម្មករ​ជាង​ ៧០០ ០០០​នាក់ និង​ជួយដល់​ពលរដ្ឋ​រាប់លានគ្រួសារទូទាំងប្រទេស​ ​ដែល​កម្មករ​ភាគ​ច្រើន​មកពី​ជនបទ និង​មក​រក​ការងារ​ធ្វើ​នៅ​ទីក្រុង ពិសេស​ទីក្រុង​ភ្នំពេញ​។​

ក្នុង​ចន្លោះពីខែ​ មករា ដល់ខែ មីនា ឆ្នាំ​២០២៣ ក្រុម​ប្រឹក្សាអភិវឌ្ឍន៍​កម្ពុជា បាន​អនុម័ត​លើ​គម្រោង​វិនិយោគថ្មី​លើ​វិស័យ​កាត់​ដេរ និង​​​ស្បែក​ជើង​យ៉ាងហោចណាស់​ ​២៣​គម្រោង ដែល​គេ​រំពឹ​ងថា​នឹង​អាច​បង្កើត​ឱកាស​ការងារ​បាន​រាប់​ពាន់​កន្លែង និង​ប៉ាន់​ស្មាន​ទឹក​ប្រាក់​វិនិយោគ​មាន​តម្លៃ​១៦៨​លាន​ដុល្លារ។ នេះ​បើ​តាម​ទិន្ន័យ​ផ្សាយ​លើ​ទំព័រ​ហ្វេ​សប៊ុក​របស់​ក្រុម​ប្រឹក្សា​អភិវឌ្ឍន៍​កម្ពុជា។​

កម្មករ និង​មេ​ដឹក​នាំ​សហជីព​លើក​ឡើង​ថា បើ​ទោះ​បី​ជា​មាន​សញ្ញា​ងើប​ឡើង​វិញ​ជា​ថ្មី​​នៃ​ការ​វិនិយោគ​លើ​វិស័យ​កាត់​ដេរ ក៏​​កម្មករ​រាប់​សិប​ពាន់​​នាក់​ផ្សេង​ទៀត​ដែល​ត្រូវ​បញ្ឈប់​ពី​ការងារ ឬ​ព្យួរការងារ​នៅ​តែ​ស្ថិត​ក្នុង​ភាព​មិន​ច្បាស់​លាស់ បន្ទាប់​ពី​រោង​ចក្រ​ជា​ច្រើនបាន​បិទ​ទ្វារ និង​ព្យួរការងារ​ជាបន្តបន្ទាប់​។

ក្រៅ​តែ​ពី​ផល​ប៉ះពាល់​អវិជ្ជមាន​លើ​សេដ្ឋកិច្ច​សកល​ពី​វិបត្តិ​កូវីដ​-១៩ និង​សង្គ្រា​ម​អ៊ុយ​ក្រែន ប្រធាន​សហភាព​ការងារ​កម្ពុជា ដែល​មាន​សមាជិក​ជាង​ ១១០ ០០០​នាក់ លោក អាត់ ធន់ មាន​​ប្រសាសន៍​ថា ហេតុ​ផល​ផ្សេងទៀត គឺ​ភាព​មិន​ច្បាស់​លាស់​ជុំ​វិញ​អនាគត​របស់​កម្ពុជា លើ​ការ​ទទួល​​បាន​កិច្ច​ព្រម​ព្រៀង​ពាណិជ្ជ​កម្ម​សេរី​សម្រាប់​ការ​នាំ​ចេញ​ទៅទីផ្សារ​អាមេរិក និង​អ៊ឺរ៉ុប​។​

កាល​ពី​ឆ្នាំ​២០២០ សហភាព​អ៊ឺរ៉ុប​បាន​ដក​ប្រព័ន្ធ​​អនុគ្រោះ​ពន្ធ​ អ្វីៗ​គ្រប់​យ៉ាង​លើក​លែង​តែ​អាវុធ ឬ​ហៅ​កាត់​ថា (​EBA) ចំនួន​២០​ភាគរយ ដែល​ការ​ដក​នេះ​ធ្វើ​ឡើង​​បន្ទាប់​ពី​​មាន​ការ​ចោទ​ថា​ កម្ពុជា​មាន​ការ​រំលោភ​បំពាន​សិទ្ធិ​មនុស្ស​ជា​ច្រើន​។ នៅ​ឆ្នាំ​ដដែល ប្រព័ន្ធ​អនុគ្រោះ​ពន្ធ​របស់​អាមេរិក​ហៅ​ថា​ GSP ក៏​បានអស់​សុពល​ភាព និង​មិន​ទាន់​បាន​បន្ត​ជា​ថ្មី​នៅ​ឡើយទេមក​ដល់​ពេល​នេះ​។ បើ​តាម​ការិយាល័យ​ជំរឿន​របស់​អាមេរិក ទំនិញ​ដែល​កម្ពុជា​នាំ​ទៅ​អាមេរិក​ច្រើន​ជាង​គេ​គឺ​ផលិត​ផល​កាត់ដេរ ស្បែក​ជើង និង​ទំនិញ​សម្រាប់ធ្វើ​ដំណើរ។

កាលពីពាក់កណ្តាលខែមីនា​ សភា​​អឺរ៉ុប​បាន​​បោះ​ឆ្នោត​លើ​សេចក្ដី​សម្រេច​មួយ​ដោយ​បាន​អំពាវ​នាវ​ឲ្យ​បញ្ចប់​ការ​ធ្វើទុក​បុក​ម្នេញ​ផ្នែក​នយោបាយ និង​ដោះលែង​អ្នក​ទោស​នយោបាយ​នៅ​កម្ពុជា។ ជា​មួយ​គ្នា​នោះ​ដែរ សភា​​អ៊ឺរ៉ុប​ក៏​បាន​ព្រមាន​ពីការ​ដក​ប្រព័ន្ធ​អនុគ្រោះ​ពន្ធ​បន្ថែម​ទៀត បើ​សិន​ជា​បរិយាកាស​នយោបាយ​មិន​ល្អ​ប្រសើរ​មុន​ការ​បោះ​ឆ្នោត​ជាតិ​ខែ​កក្កដា ចូល​មក​ដល់ទេ​នោះ​។ មន្ត្រី​ជាន់​ខ្ពស់​គណបក្ស​ប្រឆាំង​​ត្រូវ​បាន​ឃុំ​ខ្លូន និង​ខ្លះ​កំពុង​ត្រូវ​ប្រឈម​នឹង​ការ​បង់​​​សំណងរាប់សិបម៉ឺនដុល្លារ។​

​លោក អាត់ ធន់ ថ្លែងថា៖ «ការ​បញ្ជា​ទិញ​បាន​ថយ​ចុះ​ដោយសារ​តែ​ភាព​មិន​ច្បាស់​លាស់​នៃ​ការ​ទទួល​បាន ​EBA និង​​ GSP ព្រម​ទាំង​ស្ថានភាព​ការ​បោះ​ឆ្នោត​ជាតិ​ខែ​កក្កដា ខាង​មុខ»។ លោក​បន្ថែម​ថា៖ «ខ្ញុំ​បាន​ជួប​ជា​មួយ​អ្នកបញ្ជា​ទិញ ហើយ​ពូកគេ​ប្រាប់​ថា​ពួកគេ​នឹង​ប្រាប់​មក​ខ្ញុំ​អំពី​ការ​សម្រេច​ចិត្ត​ជា​ថ្មី​[ក្នុង​ការ​បញ្ជា​ទិញ​] ក្រោយ​ការ​បោះ​ឆ្នោត»។​

លោក​ឲ្យ​ដឹង​ដែរថា ការ​ប្រកួត​ប្រជែង​ជា​មួយ​វៀត​ណាម​កាន់​តែ​ពិបាក ពេល​ដែល​ប្រទេសនេះ ​​បាន​ចុះ​កិច្ច​ព្រម​ព្រៀង​ពាណិជ្ជកម្ម​ទ្វេ​ភាគី​ជាមួយ​សហភាពអឺរ៉ុប​កាល​ពី​ឆ្នាំ​២០១៩ ដែល​នេះ​ក៏​ជា​ឧបសគ្គ​មួយ​ផ្សេង​ទៀត​សម្រាប់​វិស័យ​កាត់​ដេរ​នៅ​កម្ពុជា។​​

លោក អាត់ ធន់​ បាន​បន្ទោស​លើ​ភាព​ធូររលុង​នៃ​ច្បាប់​ចំពោះ​ការ​បិទ​រោង​ចក្រ​នេះ ហើយ​ថា​ក្រុម​ហ៊ុន​បាន​ព្យាយាម​រក​វិធី​គេចវេស​ពីការ​ទទួល​ខុស​ត្រូវ​សម្រាប់​កម្មករ ​ដែល​បាន​ធ្វើ​ការ​យូរ​ឆ្នាំ។ លោក​ថា កម្មករ​ជា​ច្រើន​នាក់​ត្រូវ​បាន​បន្ត​កិច្ច​សន្យារយៈ​ពេល​ខ្លី ដើម្បី​កាត់​បន្ថយ​សំណង​ផ្លូវ​ច្បាប់​លើ​ការ​បង់​ប្រាក់​បំណាច់​​។​

បុរស​ពីរ​នាក់​កំពុង​ជិះ​ម៉ូតូ​កាត់​មុខ​រោងចក្រកាត់ដេរ ​​លីមឡាញអ៊ិនធឺណេសិនណល ដែល​បាន​បិទ​ទ្វារ​ ក្នុង​រាជធានី​ភ្នំពេញ។ រូបថតនៅថ្ងៃទី​២៤ ខែមីនា ឆ្នាំ២០២៣។ ខេមបូចា/ ព្រីង សំរាំង

រាជរដ្ឋាភិបាល​បាន​ដាក់​ចេញ​គោល​នយោបាយ​ ដែល​អនុញ្ញាត​ឲ្យ​អ្នក​វិនិយោគ​ទុន​ថ្មី​អាច​រួច​ការ​បង់​ពន្ធ​កាត់ទុក​ចំនួន​ប្រាំ​ឆ្នាំ ដែល​ការណ៍​នេះ លោក អាត់​ ធត់ ថា​បាន​លើក​ទឹក​ចិត្ត​ឲ្យ​ក្រុម​ហ៊ុន​ជា​ច្រើន​បិទ​ទ្វារ និង​បើ​ក​សារ​ជាថ្មី​វិញ​ក្រោម​ឈ្មោះ​ថ្មី​មួយ​ទៀត​ដើម្បីទទួល​បាន​អត្ថ​ប្រយោជន៍​ទាំងនេះ​។ លោក​ឲ្យ​ដឹង​ដែរ​ថា ខណៈ​​ក្រុម​ហ៊ុន​ត្រូវ​បាន​អនុញ្ញាត​ឲ្យ​ព្យួរតែរយៈ​ពេល​​ពីរខែប៉ុណ្ណោះផ្អែក​លើ​ច្បាប់ តែ​ជាក់ស្តែងពួក​គេ​អាច​បន្តព្យួរ​យូរ​ជាង​នេះ​ក៏​បាន​​។​

អ្នកនាំពាក្យ​ក្រ​សូង​ការងារ លោក ហេង សួរ មិន​បាន​ឆ្លើយ​តប​សំនួរ​អ្នក​សារព័ត៌មាន​នោះ​ទេ។

​រដ្ឋាភិបាល​ក៏​បាន​សន្យា​ផ្តល់​ការ​គាំ​ទ្រ​ផ្នែក​ថវិកា​ដល់​កម្មករ​ ដែល​រង​ផល​ប៉ះពាល់​ពីការ​ផ្អាក​ការងារ​នេះដែរ ដោយកម្មករ​ទទួល​បាន​​៣០​ដុល្លារ​បាន​ពី​ម្ចាស់​រោង​ចក្រ និង​៤០​ដុល្លារ​បាន​ពី​រដ្ឋា​ភិបាល។ នេះ​បើ​តាម​ការ​ឲ្យ​ដឹង​ពី​លោក កាំង ម៉ូនីកា អគ្គលេខាធិការរង​សមាគម​វាយនភណ្ឌសម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា ហៅកាត់ថា TAFTAC​ ។

លោក​បន្ថែម​ថា៖ «​មានការផ្អាកការងារដោយផ្នែកជាបណ្តោះអាសន្នខ្លះ ហើយនៅ​ប្រទេស​ផ្សេង​ៗ​ទៀតក៏ជួបស្ថានភាពស្រដៀងៗគ្នាដែរ ដោយសាផលអវិជ្ជមាននៃសង្គ្រាម»

លោក​បន្តថា​ រដ្ឋាភិបាល​នឹង​ធ្វើ​ការ​សិក្សា​ពី​ស្ថាន​ភាព​នេះ​នៅ​បី​ខែ​ខាង​មុខ​។​ លោក​ថ្លែង​ថា៖ «យើងនឹងស្នើសុំការគាំទ្របន្ថែមទៀតពីរាជរដ្ឋភិបាលបើស្ថានភាពកាន់តែធ្ងន់ធ្ងរ។ យ៉ាងណា​ក៏ដោយ យើងសង្ឃឹមថាស្ថានភាពនឹងប្រសើរឡើងវិញក្នុងឆមាសទី២ក្នុង​ឆ្នាំនេះ

​សម្រាប់​កម្មករ ​ដែល​បាន​ចូល​ធ្វើ​ការ​ក្រោយ​រោងចក្រ​​ផ្អាក​មួយ​រយៈ ក៏​នៅ​មិន​ច្បាស់​ពី​អនាគត​ការងារ​របស់​ខ្លួន​ដែរ​។ រោងចក្រ​មួយ​ចំនួន​បាន​បើក​ដំណើរ​ការ​ឡើង​វិញ ប៉ុន្តែ​នៅ​មាន​រោង​ចក្រ​ជា​ច្រើន​ទៀត​នៅ​បន្ត​ផ្អាក​នៅ​ឡើយ​។​

អ្នកស្រី សឿន យៀក វ័យ ៤៦​ឆ្នាំ ឲ្យ​ដឹង​ថា​អ្នក​ស្រី​កំពុង​ពិបាក​ក្នុង​ការ​រក​​ការងារ​ថ្មី បន្ទាប់​ពី​រោង​ចក្រ​​លីម​ឡាញអ៊ីនធឺណេសិនណល បាន​បិទ​ទ្វារ​។ អ្នកស្រី​បានខ្ចី​​ប្រាក់​ក្នុង​អត្រា​ការ​ប្រាក់​ខ្ពស់​ពី​អ្នក​ចង​ការ​ប្រាក់​ឯក​ជន ដើម្បី​ទិញ​រឺម៉កម៉ូតូ​ ដឹក​ទឹកកកឈួស​លក់តាម​ផ្លូវ​ក្នុង​រាជធានី​ភ្នំពេញ​។

​អ្នកស្រី​បញ្ជាក់ថា៖ «​ខ្ញុំ​បាន​ដាក់​ពាក្យធ្វើការ​​នៅ​រោងចក្រ​ផ្សេង​ដែរ ប៉ុន្តែ​គេ​មិន​ទទួល​ខ្ញុំ​ទេ ពួកគេ​ថា​ខ្ញុំ​អាយុច្រើន​»។ អ្នកស្រី​ថា៖ «​ខ្ញុំ​អាច​រក​ប្រាក់​បាន​ ២០ ០០០​រៀល​ក្នុង​មួយ​ថ្ងៃ​ពី​ការ​លក់​ទឹកកកឈួស ហើយ​ខ្ញុំ​​ខាន​​​ផ្ញើ​លុយ​ទៅ​ក្មួយ​ស្រីពីរ​ខែ​​ហើយ»។​

អ្នកស្រី សឿន យៀក និយាយ​ជាមួយ​អ្នក​សារព័ត៌មានខេមបូចា ក្បែរ​បន្ទប់​ជួល​របស់អ្នកស្រី ក្នុង​រាជធានី​ភ្នំពេញ កាលពីថ្ងៃទី​២៤ ខែមីនា ឆ្នាំ​២០២៣។ ខេមបូចា/ ព្រីង សំរាំង

អ្នកស្រី យ៉ិន យ៉ុម វ័យ៤០ឆ្នាំ​ បាន​ចូល​ធ្វើ​ការ​នៅ​រោង​ចក្រ​ Yarkjin (Cambodia) Inc វិញ​ បន្ទាប់​​ពី​ផ្អាក​ការងារ​មួយ​សប្ដាហ៍ ហើយ​កំពុង​ប្រឈម​នឹង​បំណុល​​​គ្រឹះស្ថានមីក្រូហិរញ្ញវត្ថុ​ដែលបាន​ខ្ចី​សម្រាប់​សង់​ផ្ទះ​ថ្មី​ដែរ​។

អ្នកស្រីជាមួយ​នឹង​កូន​ប្រុសស្រីពីរនាក់ផ្សេងទៀត​អាច​រក​ចំណូល​សរុបប្រមាណ​៧០០ដុល្លារ​ដោយ​កូន​ធ្វើ​ជាជាង​ជួស​ជុល​ម៉ូតូ និងកូនស្រីជួយលក់បន្លែឲ្យគេ។

​អ្នកស្រី​លើក​ឡើងថា៖ «កង្វល់​របស់​ខ្ញុំ​គឺ​គ្មាន​ប្រាក់​សង​បំណុល ខ្ញុំ​រស់​នៅពឹង​លើ​ការងារ​រោង​ចក្រ​ដើម្បី​ដោះ​ស្រាយ​បំណុល បើ​គ្មានការងារ ខ្ញុំ​នឹង​គ្មាន​អ្វី​ទាំង​អស់»។ អ្នកស្រី យ៉ុម រក​ចំណូល​​បាន​៣០០​ដុល្លារ​ពី​ការងារ​នៅ​រោង​ចក្រ ប៉ុន្តែ​ការ​ចំណាយ​លើ​ការ​សង​បំណុល​មាន​រហូត​ដល់​៤៥០​ដុល្លារ​ក្នុង​មួយ​ខែ​។​

សម្រាប់​អ្នកស្រី ថារី វិញ​នៅ​តែ​មិន​ទាន់​មាន​ការងារ​ធ្វើ​នៅ​ឡើយ ព្រម​ទាំង​ប្រឈមនឹង​​ការសង​បំណុល និង​ថ្លៃ​ចំណាយ​ខ្ពស់​ជាង​ចំណូល​ដែល​មាន​បច្ចុប្បន្ន។ អ្នកស្រី​បាន​ខ្ចី​ប្រាក់ពី​មីក្រូ​ហិរញ្ញវត្ថុ​ចំនួន​ ២ ០០០​ដុល្លារ​សម្រាប់​សង់​ផ្ទះថ្មី​ តែប៉ុន្មាន​ខែ​ប៉ុណ្ណោះ​មុន​រោង​ចក្របិទ​ទ្វារ ហើយ​ត្រូវ​ចំណាយ​ថ្លៃ​ជួល​ផ្ទះ​ ថ្លៃទឹក និង​ភ្លើង ១០០​ដុល្លារ​ក្នុង​មួយ​ខែ។ អ្នក​ស្រីត្រូវបង់​កម្ចី​ ១០០​ដុល្លារ​ក្នុង​មួយ​ខែ​ទៀត​។

អ្នកស្រី​បញ្ជាក់​ថា៖ «​ជីវភាព​ប្រចាំ​ថ្ងៃ​របស់​ខ្ញុំ​គឺ​ពឹង​លើ​រោង​ចក្រ​កាត់​ដេរ ព្រោះ​វា​បាន​ធ្វើ​ឲ្យ​ជីវិត​ខ្ញុំ​បាន​ប្រសើរ​ឡើង»។ អ្នកស្រី​ថា៖ «​បើ​សិន​ជា​ខ្ញុំ​មិន​អាច​រក​ការ​ងារ​ថ្មី​បាន ខ្ញុំ​ប្រហែល​ជា​ត្រូវ​​វិល​​ទៅ​ស្រុក​កំណើត​វិញ ពីព្រោះ​ថា​រស់​នៅទីក្រុង​ចំណាយ​ច្រើនណាស់»។​

រាយការណ៍​បន្ថែម​ដោយ ផុន សុទ្ធីរ័ត្ន

ប្រែសម្រួលពីអត្ថបទភាសាអង់គ្លេស៖ Thousands of Garment Workers Struggling to Survive Following Mass Factory Closures

397 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម