រដ្ឋលេខាធិការដ្ឋានកិច្ចការព្រំដែន បានជូនដំណឹងដល់ជនរួមជាតិ និងសាធារណជន ឱ្យជឿទុកចិត្តលើដំណើរការរបស់រដ្ឋាភិបាលពាក់ព័ន្ធនឹងការបោះបង្គោលព្រំដែនបណ្ដោះអាសន្នរវាងកម្ពុជានិងថៃនៅតំបន់មានជម្លោះ។
តាមសេចក្តីប្រកាសព័ត៌មានរបស់រដ្ឋលេខាធិការដ្ឋានកិច្ចការព្រំដែន កម្ពុជា និងថៃ បានបញ្ជូនក្រុមការងារចម្រុះនៃភាគីទាំងពីរចុះសិក្សាវាស់វែង ដើម្បីដោះស្រាយបញ្ហានៅភូមិជោគជ័យ និងភូមិព្រៃចាន់។
រដ្ឋលេខាធិការដ្ឋានកិច្ចការព្រំដែន បានលើកឡើងថា ការងារវាស់វែង និងស្វែងរុករកទីតាំងពិតប្រាកដនៃបង្គោលព្រំដែនដែលចន្លោះពីបង្គោលព្រំដែនលេខ៤២ដល់លេខ៤៧ ត្រូវបានអនុវត្ត«យ៉ាងហ្មត់ចត់»និង«ទទួលខុសត្រូវខ្ពស់បំផុត»ដោយផ្អែកលើឯកសារអាណាព្យាបាលបារាំងជាពិសេសកំណត់ហេតុ(Procès-Verbaux)បោះបង្គោលនៃគណៈកម្មការព្រំដែនឥណ្ឌូចិន-សៀម ឆ្នាំ១៩០៨-១៩០៩និងឆ្នាំ១៩១៩-១៩២០។
ការបោះបង្គោលព្រំដែនបណ្ដោះអាសន្នធ្វើឡើង បន្ទាប់ពីមានកិច្ចប្រជុំពិសេសនៃគណៈកម្មការចម្រុះព្រំដែនគោក កម្ពុជា-ថៃ (JBC) កាលពីខែតុលាដែលភាគីទាំងពីរបានព្រមព្រៀងគ្នាក្នុងការបោះបង្គោលព្រំដែនដែលខូចឬបាត់ចំនួន១៥ឡើងវិញនៅទីតាំងដើមរបស់ពួកវានិងនិងដាំបង្គោលដែលលិចទឹកចំនួនបីឡើងវិញ នៅពេលទីតាំងថ្មីត្រូវបានកំណត់។
លោក ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែនមិនអាចទាក់ទងសុំការអត្ថាធិប្បាយបានទេ។
នៅភូមិជោគជ័យ និងភូមិព្រៃចាន់ របាំងបន្លាលួសបានកាត់ផ្ដាច់អ្នកភូមិ ដែលពួកគេភាគច្រើនបានរស់នៅទីនោះអស់ជាយូរឆ្នាំ ពីផ្ទះសម្បែង និងដីស្រែចម្ការរបស់ពួកគេ ដែលជាលទ្ធផលបណ្ដាលឱ្យមានការប៉ះទង្គិចគ្នាជាមួយទាហានថៃទៀតផង។
អ្នកស្រី ហ៊ុល ម៉ាលីស ជាអ្នកភូមិព្រៃចាន់ ដែលផ្ទះរបស់គាត់ត្រូវបានទាហានថៃហ៊ុមព័ទ្ធដោយរបងបន្លាលួសបាននិយាយថា គាត់បានដឹងអំពីការចុះសិក្សាវាស់វែងរួមគ្នានេះ ហើយសម្រាប់ការបោះបង្គោលព្រំដែនបណ្ដោះអាសន្ន មេដឹកនាំប្រទេសកំពុងចាត់ចែងរឿងនេះ។
អ្នកបានបន្តថា៖ «ខ្ញុំមិនដឹងទេ។ វាអាស្រ័យលើថ្នាក់ដឹកនាំក្នុងការដោះស្រាយបញ្ហាហ្នឹង»។
អ្នកភូមិម្នាក់ទៀត ឈ្មោះ រស់ សារ៉ូ មកពីភូមិជោគជ័យ បាននិយាយថា ក្រុមការងារចម្រុះដែលចុះសិក្សាវាស់វែងមិនទាន់បានទៅដល់ភូមិរបស់គាត់នៅឡើយទេ។
អ្នកស្រីបានប្រាប់ថា៖ «យើងនៅតែមានការព្រួយបារម្ភ ពីព្រោះពួកគេ [អាជ្ញាធរថៃ] បាននិយាយថា យើងនឹងត្រូវបណ្ដេញចេញ ក្រោយពីព្រំដែនត្រូវបានកំណត់រួចរាល់»។
សារ៉ូ បានបន្ថែមថា៖ «យើងក៏បារម្ភអំពីសកម្មភាពយោធាដែរ ប៉ុន្តែយើងមិនដឹងថាត្រូវធ្វើអ្វីទេ។ យើងគ្រាន់តែត្រូវរង់ចាំមើលថាតើមានអ្វីកើតឡើង» ដោយបន្ថែមថា រឿងព្រំដែនជាការទទួលខុសត្រូវរបស់រដ្ឋាភិបាល។
លោក សារ៉ូ បានរស់នៅទីនោះ តាំងពីតំបន់នោះត្រូវបានរំដោះពីក្រុមខ្មែរក្រហម។
លោក ប៉ែន រិទ្ធី មេភូមិជោគជ័យ បាននិយាយថា គ្រួសារខ្លះបានវិលត្រឡប់មកពីជំរំវិញបណ្ដើរៗហើយ ខណៈដែលស្ថានការណ៍បានស្ងប់ស្ងាត់វិញ។ លោកបានបញ្ជាក់ថា ក្រុមការងារចុះសិក្សាវាស់វែងចម្រុះនៃភាគីទាំងពីរ កំពុងធ្វើការនៅភូមិព្រៃចាន់ ប៉ុន្តែមិនទាន់បានទៅដល់ភូមិរបស់លោកទេ។
នៅពេលទាក់ទងអ្នកនាំពាក្យរដ្ឋាភិបាល លោក ប៉ែន បូណា បាននិយាយបន្ទរបន្ថែមលើសេចក្ដីថ្លែងការណ៍របស់រដ្ឋលេខាធិការដ្ឋានកិច្ចការព្រំដែន ស្តីពីការបោះបង្គោលព្រំដែនបណ្ដោះអាសន្ន ដោយព្រមានក្រុមជ្រុលនិយមឱ្យបញ្ឈប់ការញុះញង់មហាជនលើរឿងព្រំដែន។
លោកបានលើកឡើងថា៖ «បញ្ហាព្រំដែន កំពុងត្រូវបានដោះស្រាយ តាមរយៈនីតិវិធីបច្ចេកទេស និងច្បាប់អន្តរជាតិ។ នៅពេលដែលវាត្រូវបានដោះស្រាយរួចរាល់ នឹងលែងមានជម្លោះបន្ថែមទៀតហើយ […] សូមទុកពេលឱ្យរដ្ឋាភិបាលធ្វើការងាររបស់គេផង»។
អង្គការនយោបាយអន្តរជាតិ Centrist Democrat International (CDI-IDC) បានសម្ដែងការគាំទ្រយ៉ាងខ្លាំង ចំពោះការដោះស្រាយដោយសន្តិវិធី រវាងកម្ពុជា និងថៃ និងការគោរពកិច្ចព្រមព្រៀងបទឈប់បាញ់ ខណៈពេលដែលអំពាវនាវឱ្យមានការដោះលែងទាហាន ១៨នាក់ដែលឃុំខ្លួនដោយកងទ័ពថៃជាបន្ទាន់ និងគ្មានលក្ខខណ្ឌ។
សេចក្ដីថ្លែងការណ៍បានសរសេរថា៖ «យើងបានកត់សម្គាល់ថា បទឈប់បាញ់ និងកិច្ចព្រមព្រៀងសន្តិភាព នៅតែមានភាពផុយស្រួយ ដូចដែលបានឃើញតាមរយៈការវាយប្រហារយ៉ាងសាហាវថ្មីៗនេះ ដោយទាហានថៃ ទៅលើជនស៊ីវិលដែលគ្មានអាវុធ»។
អ្នកនាំពាក្យខេត្តបន្ទាយមានជ័យ លោក ណង វុទ្ធី មិនអាចទាក់ទងសុំការអត្ថាធិប្បាយបានទេ៕
