សាលាដំបូងរាជធានីភ្នំពេញនៅថ្ងៃពុធ បានបើកសវនាការលើសំណុំរឿងប្រធានសហជីពលោក ម៉ម រិទ្ធី បន្ទាប់ពីលោកសម្តែងការខកចិត្តដែលតុលាការបានបើកសវនាការកាត់ទោសកំបាំងមុខលោកឱ្យជាប់ពន្ធនាគាររយៈពេល១៨ខែ។
ការចោទប្រកាន់ទៅលើគាត់គឺទាក់ទងនឹងការលើកឡើងដែលគាត់បានរិះគន់ការចាប់ខ្លួនបុគ្គលិកកាស៊ីណូម្នាក់ក្នុងអំឡុងពេលផ្សាយផ្ទាល់តាមហ្វេសប៊ុកកាលពីពីរឆ្នាំមុន។ លោក រិទ្ធី បានស្នើសុំឲ្យតុលាការទម្លាក់ការចោទប្រកាន់ និងប្រកាសថាលោកគ្មានទោស។
ក្នុងសវនាការដែលបានបន្តកាលពីថ្ងៃពុធ លោក រិទ្ធី ដែលជាប្រធានសហព័ន្ធកម្មករទេសចរណ៍ និងសេវាកម្មកម្ពុជា (CTSWF) និងជាអនុប្រធានសហភាពការងារកម្ពុជា (CLC) បានអំពាវនាវដល់តុលាការឲ្យដោះលែងគាត់ឲ្យមានសេរីភាពឡើងវិញ ដោយសារគាត់គ្មានចេតនាប្រមាថមាក់ងាយ ឬបង្ខូចឈ្មោះប្រព័ន្ធតុលាការនៅកម្ពុជាឡើយ។
លោក រិទ្ធី បាននិយាយនៅក្នុងសវនាការថា៖ «កុំធ្វើបាបខ្ញុំ! ខ្ញុំមិនបាននិយាយអ្វីដែលមិនគោរពតុលាការទេ។ ខ្ញុំនិយាយទៅកាន់អ្នកដែលធ្វើខុស។ អ្វីដែលខ្ញុំនិយាយគឺស្របតាមច្បាប់។ ខ្ញុំសុំឲ្យចៅក្រមលើកលែងទោសខ្ញុំ ហើយដោះលែងខ្ញុំវិញ ព្រោះគ្រួសារខ្ញុំឥឡូវក្រីក្រណាស់។ ផ្ទះរបស់ខ្ញុំលក់អស់ហើយ ភរិយានិងកូនរបស់ខ្ញុំកំពុងរស់នៅក្នុងស្ថានភាពយ៉ាងលំបាក»។
ចៅក្រម ធន់ ដារិទ្ធ បានគូសបញ្ជាក់ពីការអត្ថាធិប្បាយរបស់ រិទ្ធី ក្នុងការផ្សាយផ្ទាល់តាមហ្វេសប៊ុកកាលពីឆ្នាំ២០២២ ដោយកត់សម្គាល់ថា អ្វីដែលលោក រិទ្ធី និយាយកាលនោះ ហាក់ដូចជាជំរុញឱ្យ«សាធារណជនបាត់បង់ជំនឿលើប្រព័ន្ធតុលាការ ហើយដែលប៉ះពាល់ដល់ភាពជឿជាក់នៃស្ថាប័នតុលាការ»។
លោកស្រី ផាត់ សុគន្ធា ព្រះរាជអាជ្ញាចោទសួរថាលោក រិទ្ធី ថា ក្នុងនាមជាប្រធានសហជីពដែលមានចំណេះដឹងមួយរូបហេតុអ្វីមិនប្រើវិធីផ្សេងទៀត ដូចជាការដាក់លិខិតជំរុញឲ្យភាគីពាក់ព័ន្ធជួយអន្តរាគមន៍ក្នុងសំណុំរឿង បុគ្គលិកកាស៊ីណូ គឺអ្នកស្រី ម៉ម ស្រីល័ក្ខ។
លោកស្រី សុគន្ធា ក៏បានសួរលោក រិទ្ធី អំពីទំនាក់ទំនងរបស់លោកជាមួយ ស្រីល័ក្ខ និងបញ្ជាក់ពីអ្វីដែលលោករិទ្ធីបាននិយាយមិនមានភស្តុតាងច្បាស់លាស់ និងមិនមានវត្តមានក្នុងឧប្បត្តិហេតុកាស៊ីណូកាលពីឆ្នាំ២០២២នោះទេ។
លោកស្រី សុគន្ធា និយាយថា៖ «តើបងដឹងទេថាអ្វីដែលអ្នកបាននិយាយនៅលើ Facebook នឹងផ្តល់ផលប្រយោជន៍អ្វីខ្លះដល់បង? ហើយអ្វីដែលបងនិយាយ គឺប៉ះពាល់ដល់ប្រព័ន្ធតុលាការ»។
ទោះជាយ៉ាងណា លោក រិទ្ធី បានឆ្លើយតបភ្លាមៗថា លោកមិនមានចេតនាអាក្រក់ធ្វើឲ្យខូចកិត្តិយសតុលាការទេ។ លោកថាការបញ្ចេញមតិតាមហ្វេសប៊ុករបស់លោកធ្វើឡើងដើម្បីរកដំណោះស្រាយ និងស្នើទៅតុលាការខេត្តព្រះសីហនុ ឲ្យដោះលែងសមាជិកសហជីពរូបនេះឲ្យនៅក្រៅឃុំ។ ផ្អែកតាមអ្វីដែលលោកបានដឹង និងការសួរដេញដោលចំពោះអ្នកពាក់ព័ន្ធក្នុងករណីកាស៊ីណូនិងពាក់ព័ន្ធជាមួយនឹងស្រីល័ក្ខ។ លោក រិទ្ធី បញ្ជាក់ទៀតថា សកម្មភាពលើបុគ្គលិកកាស៊ីណូនេះ គឺផ្ទុយនឹងច្បាប់ការងារ។
លោក រិទ្ធី លើកឡើងថា ការចែករំលែកមតិ ដែលស្ថិតក្នុងអំឡុងការរាតត្បាត កូវីដ-១៩ គឺជាសិទ្ធិរបស់គាត់។ លោកបានព្យាយាមបញ្ចេញយោបល់ដើម្បីឲ្យអាជ្ញាធរដឹងពីបញ្ហាស្ត្រីរងការចោទប្រកាន់ដោយអយុត្តិធម៌។
យ៉ាងណាក៏ដោយ លោកស្រីព្រះរាជអាជ្ញាបានរំលឹកលោក រិទ្ធី ថា ការបញ្ចេញមតិជាសិទ្ធិ ប៉ុន្តែ«បើការនិយាយប៉ះពាល់ដល់អ្នកដទៃ វាខុសច្បាប់»។
សរុបសេចក្តីមក លោកស្រី សុគន្ធា បានបន្ថែមថា ការលើកឡើងរបស់លោក រិទ្ធី ត្រូវបានបកស្រាយថា បរិហាកេរ្តិ៍តាមមាត្រា៣០៥ និងមាត្រា៥២៣ ដែលធ្វើឲ្យប៉ះពាល់ដល់តុលាការនៃក្រមព្រហ្មទណ្ឌ។ លោកស្រីស្នើឲ្យតុលាការផ្ដន្ទាទោសលោក រិទ្ធី ទៅតាមច្បាប់។
ដោយឡែក លោកចៅក្រម ធន់ ដារិទ្ធ បានបញ្ជាក់នៅក្នុងអង្គសវនាការថាដើមបណ្ដឹង ដែលមានឈ្មោះថា អឹង ដារ៉ា បានដកពាក្យបណ្ដឹង និងលុបចោលការទាមទារសំណងចំនួន១០ម៉ឺនដុល្លារសហរដ្ឋអាមេរិកពីលោក រិទ្ធី ផងដែរ។
កាលពីថ្ងៃទី៧ ខែឧសភា ឆ្នាំ២០២៤ លោក រិទ្ធី ត្រូវបាននគរបាលសង្កាត់បឹងទំពុន២ ចាប់ខ្លួន និងចោទប្រកាន់ពីបទ«ញុះញង់ឲ្យប្រព្រឹត្តបទឧក្រិដ្ឋជាអាទិ៍» និងពីបទ«ធ្វើឲ្យបាត់បង់ជំនឿលើប្រព័ន្ធតុលាការ»។
នៅក្នុងសាលក្រមរបស់តុលាការកាលពីពេលថ្មីៗនេះ បានលើកឡើងថា រិទ្ធី បានប្រព្រឹត្តបទល្មើសតាមរយៈ Facebook កាលពីថ្ងៃទី២៤ ខែកុម្ភៈ ឆ្នាំ២០២២ ដែលគាត់បានរិះគន់កាស៊ីណូ Jin Bei 2 ដោយចោទប្រកាន់ អ្នកស្រី ម៉ម ស្រីល័ក្ខ ពីបទ «ជួយ» ភ្ញៀវបោកប្រាស់ និងឈ្នះទឹកប្រាក់ពីកាស៊ីណូប្រហែល ១៨ ០០០ដុល្លារ ហើយមិនចូលមកលេង កាស៊ីណូម្តងទៀត។
លោក សំ ចំរើន មេធាវីរបស់លោក រិទ្ធី បានជំទាស់នឹងការសន្និដ្ឋានរបស់អយ្យការដោយហៅការសន្និដ្ឋាននេះថា ជាការសន្មត់មិនស៊ីជម្រៅ។ លោក ចំរើន ពន្យល់ថា អ្វីដែលលោក រិទ្ធី និយាយនៅលើ Facebook គឺស្របតាមច្បាប់សហជីព ហើយមិនមានអ្វីដែលបង្ហាញថាកូនក្តីរបស់គាត់ប្រមាថដល់តុលាការនោះទេ។
មេធាវី ចំរើន និយាយថា៖ «តើកូនក្តីរបស់ខ្ញុំបាននិយាយអ្វីដើម្បីញុះញង់សាធារណជនឱ្យធ្វើអ្វីមួយ ដូចជាដុតផ្ទះ ឬកាស៊ីណូ? ទេ! ព្រោះគ្មានសកម្មភាពខុសច្បាប់កើតឡើងបន្ទាប់ពីកូនក្តីខ្ញុំនិយាយ។ គាត់គ្រាន់តែសុំដំណោះស្រាយប៉ុណ្ណោះ។ ដូច្នេះខ្ញុំសុំឲ្យចៅក្រមពិចារណាឡើងវិញ»។
លោក យី សុខសាន្ត មន្ត្រីស៊ើបអង្កេតជាន់ខ្ពស់នៃសមាគមការពារសិទ្ធិមនុស្សអាដហុក មានប្រសាសន៍ថា លោក រិទ្ធី បានធ្វើអត្ថាធិប្បាយទាក់ទងនឹងការចាប់ខ្លួនសមាជិកសហជីពរបស់ខ្លួនឈ្មោះ ម៉ម ស្រីល័ក្ខ ដើម្បីស្វែងរកដំណោះស្រាយដោយសារកាលនោះកាស៊ីណូ បានឃុំខ្លួនស្រ្តីនោះជាមួយបុរសជនជាតិចិនប្រមាណ៣០នាក់។
លោក សុខសាន បន្តទៀតថា លោក រិទ្ធី គ្រាន់តែមានក្ដីអាណិតចំពោះស្រ្តីនោះ និងមិនពេញចិត្តចំពោះចំណាត់ការដោយមិនមានការស៊ើបអង្កេតច្បាស់លាស់ ដោយលោកបន្ថែមថា វាជារឿងអយុត្តិធម៌ដែលបុគ្គលិកសង្គមដូចជាលោករិទ្ធីត្រូវបានចោទប្រកាន់។
លោក សុខសាន បន្ថែមទៀតថា ជារឿងដែលមិនទាស់ខុសទេ ក្នុងការនិយាយរិះគន់មន្ត្រីសាធារណៈដើម្បីធានាថាពួកគេកែលម្អ។ លោកបានកត់សម្គាល់ថា ការរិះគន់របស់លោក រិទ្ធី ចំពោះការឃុំខ្លួន ម៉ម ស្រីល័ក្ខ របស់សាលាដំបូងខេត្តព្រះសីហនុ ដោយគ្មានភស្តុតាងគ្រប់គ្រាន់ គឺធ្វើឡើងក្នុងចេតនាល្អ និងជាការឆ្លុះបញ្ចាំងពីសង្គម។
លោក សុខសាន មានប្រសាសន៍ថា៖ «ខ្ញុំគិតថា បើអ្នកមិនមែនជាមន្ត្រីសាធារណៈទេ គ្មាននរណារិះគន់ទេ។ សេរីភាពនៃការបញ្ចេញមតិជាមូលដ្ឋានគ្រឹះនៃប្រទេសប្រជាធិបតេយ្យ»។
ចំណែក លោក អាត់ ធន់ ស្ថាបនិក និងជាអតីតប្រធានសហភាពការងារកម្ពុជា (CLC) បានសម្តែងការសោកស្ដាយចំពោះការសម្រេចចិត្តរបស់ព្រះរាជអាជ្ញាក្នុងការបន្តការចោទប្រកាន់លើលោក រិទ្ធី បើទោះបីជាលោក រិទ្ធី បានបង្ហាញចេតនា និងពន្យល់ការពិតក្នុងអំឡុងពេលសវនាការក៏ដោយ។ លោក អាត់ ធន់ យល់ឃើញថា រិទ្ធី មិនមានចេតនាប្រមាថប្រព័ន្ធតុលាការទេ ហើយការចោទប្រកាន់លើ រិទ្ធី មិនផ្អែកលើភស្តុតាងគ្រប់គ្រាន់ទេ។
លោក អាត់ ធន់ បានថ្លែងថា៖ «ព្រះរាជអាជ្ញានៅតែជំរុញឲ្យផ្ដន្ទាទោសគាត់ ប៉ុន្តែចៅក្រមនឹងធ្វើការសម្រេចចុងក្រោយលើសំណុំរឿងនេះ»។
ទោះជាយ៉ាងនេះក្តី លោកសង្ឃឹមថា នៅពេលប្រកាសសាលក្រមនៅថ្ងៃទី៤ ខែធ្នូ តុលាការនឹងធានាយុត្តិធម៌ជូនលោក រិទ្ធី ដោយទម្លាក់សំណុំរឿង និងដោះលែងលោក រិទ្ធី ព្រោះអ្វីដែល រិទ្ធីនិយាយក្នុងច្បាប់ និងមានចេតនាល្អក្នុងការស្វែងរកដំណោះស្រាយ។
អ្នកស្រី គង់ សុដា ភរិយារបស់លោក រិទ្ធី សំណូមពរឲ្យតុលាការទម្លាក់ចោលការចោទប្រកាន់លើប្តីរបស់អ្នកស្រីដោយទទូចថា ប្តីរបស់នាងមិនមានចេតនាប្រមាថប្រព័ន្ធតុលាការទេ គឺគ្រាន់តែចង់រកដំណោះស្រាយជូនបុគ្គលិកកាស៊ីណូតែប៉ុណ្ណោះ។
អ្នកស្រី សុដា រៀបរាប់ទៀតថា គ្រួសាររបស់នាងកំពុងប្រឈមមុខនឹងបញ្ហាដោយគ្មានវត្តមាន រិទ្ធី ដែលជាមេគ្រួសារ ព្រោះនាងត្រូវមើលថែទាំកូនៗទាំងបួននាក់ដោយខ្លួនឯង។
អ្នកស្រី សុដា និយាយថា៖ «ខ្ញុំសំណូមពរទៅតុលាការឲ្យដោះលែងគាត់។ គាត់មិនបានធ្វើអ្វីខុស ឬក៏មានបំណងប៉ះពាល់ស្ថាប័នណាទេ។ ពួកខ្ញុំពិតជាត្រូវការគាត់ណាស់ គាត់គឺជាមេគ្រួសារ គ្មានគាត់ ខ្ញុំពិបាកក្នុងការចិញ្ចឹមកូនម្នាក់ឯងណាស់។ ខ្ញុំមិនអាចទប់ទល់នឹងស្ថានការដ៏លំបាកនេះបានទេ»។
ប្រែសម្រួលពីអត្ថបទភាសាអង់គ្លេស៖ Union Leader Morm Rithy Pleads For Charges To Be Dropped
