ពលរដ្ឋរងគ្រោះនៃអំពើហិង្សាក្នុងជម្លោះដីធ្លីនៅខេត្តកំពតធ្លាក់ខ្លួនឈឺនិងខ្វះថវិកាព្យាបាល

អ្នកស្រី ង៉ែត យឿន រត់ឡើងលើត្រាក់ទ័រដើម្បីគេចពីអំពើហិង្សា ដែលកើតឡើងកាលពីថ្ងៃទី១៣ ខែកញ្ញា ឆ្នាំ២០២១។ រូបភាពផ្តល់ឲ្យ
អ្នកស្រី ង៉ែត យឿន រត់ឡើងលើត្រាក់ទ័រដើម្បីគេចពីអំពើហិង្សា ដែលកើតឡើងកាលពីថ្ងៃទី១៣ ខែកញ្ញា ឆ្នាំ២០២១។ រូបភាពផ្តល់ឲ្យ

បុរសវ័យ​ ៦០ឆ្នាំម្នាក់​ក្នុងចំណោមពលរដ្ឋទំនាស់ដីធ្លីចំនួន ៣៧គ្រួសារផ្សេងទៀតរស់នៅ​ភូមិ​ព្រៃ​ពាយ​ ឃុំ​ត្រពាំង​ភ្លាំង ស្រុក​ឈូក​ ខេត្តកំពត បាននឹងកំពុងធ្លាក់ខ្លួនឈឺធ្ងន់ដោយគ្មានលុយ​ស​ម្រា​ប់​បង់ថ្លៃព្យា​បា​ល បន្ទាប់ពីរងរបួសក្នុងហេតុការណ៍ប៉ះទង្គិចគ្នារវាងក្រុមឈ្មួញទិញដី កាល​ពី​ថ្ងៃទី១៣ ខែកញ្ញា។

ពលរដ្ឋចំនួន ៣៧គ្រួសារ កំពុងអាស្រ័យផលលើដីប្រមាណជិត ៥០ហិកតា បាននាំគ្នា​ចេញតវ៉ា ស្របពេ​ល​​ឈ្មួញមួយក្រុមយកត្រាក់ទ័រមកឈូសឆាយដីធ្លីដែលពួកគេអះ​អាងថា ជាដីរបស់ខ្លួន។ ក្នុងអំឡុងពេលតវ៉ានោះ បានឈានដល់ការប្រើ​ហិង្សាដោយរុញច្រានគ្នាទៅវិញទៅមកបង្កឱ្យមានពលរដ្ឋចំនួន ៣នា​ក់រងរបួសធ្ងន់ ខណៈ​នោះមានស្រ្តីម្នាក់រត់ឡើងលើដៃត្រាក់ទ័រដែលកំពុងកាយដី។

អ្នកស្រី ង៉ែត យឿន អាយុជាង ៥០ឆ្នាំដែលជាអ្នករត់ឡើងលើដៃត្រាក់ទ័រ និងត្រូវជា​ភរិយាលោក លឹម រុំ ដែលជាអ្នករងរបួសធ្ងន់ម្នាក់ក្នុងចំណោម ៣នាក់ផ្សេងទៀតក្នុងហេតុការណ៍ប៉ះទង្គិចគ្នានោះ។

អ្នកស្រីបាននិយាយទាំងអួលដើមកថា ប្ដីអ្នកស្រី​រងរបួសជើងខាងឆ្វេង និងដើមទ្រូង​ធ្ងន់ធ្ងរ ដោយសារ​ការរុ​ញច្រានគ្នាជាមួយ​ក្រុមឈ្មួញទិញដីជិត ១០នាក់។ បន្ទាប់មកប្ដីអ្នកស្រីបានដួលនៅលើដី ហើយពួកគេបាននាំគ្នា​ជាន់ជើង និង​ជាន់ដើមទ្រូងប្ដីអ្នកស្រីរហូតដល់សន្លប់។

អ្នកស្រីបន្តថា ភ្លាមៗនោះអ្នកស្រីរត់ទៅជួយលើកប្ដីអ្នកស្រី ប៉ុន្ដែពួកគេបានមកចាប់​ ហើយ​អ្នក​ស្រី​​បានប្រឹងស្រវ៉ារត់ឡើងលើដៃត្រាក់ទ័រ ដើម្បីគេចចេញពីក្រុមឈ្មួញទាំងអស់នោះ។

អ្នកស្រី យឿន និយាយថា៖ «ពេលហ្នឹង ខ្ញុំ​មិនដឹងត្រូវរត់ទៅណាទេ គឺមានតែស្រវ៉ារត់ឡើងលើដៃត្រាក់ទ័រ ដើម្បីគេចខ្លួនពីពួកគេ ប៉ុន្ដែមានក្រុម​ឈ្មួញម្នាក់ស្រែកឱ្យគ្នាគេហ្នឹង ចាប់ខ្លួនខ្ញុំបោកឱ្យស្លាប់នៅនឹងត្រាក់ទ័រ តែខ្ញុំរត់ឡើងត្រាក់ទ័រទាន់​ពេល​»។

ស្រ្តីវ័យជាង​ ៥០ឆ្នាំរូបនេះបន្តថា ប្ដីអ្នកស្រីបានចេញពីមន្ទីរពេទ្យនៅថ្ងៃទី ២១ខែកញ្ញានេះ ដោយ​ទៅ​សម្រាកព្យាបាលនៅផ្ទះវិញ ព្រោះគ្មានលុយសម្រាប់បង់ថ្លៃដេកនៅមន្ទីរពេទ្យ​ទេ។

អ្នកស្រីបានបន្តថា៖ «សុខភាពគាត់(ប្ដី)មិនទាន់បានធូរស្រាលទេ គឺជើងនៅឈឺដើរមិនរួច តែដើមទ្រូងលែងសូវឈឺខ្លាំងដូចមុនហើយ ឥឡូវ​មាន​តែយកគាត់ទៅលេបថ្នាំនៅផ្ទះវិញ ព្រោះគ្មានលុយដេកនៅពេទ្យទេ»។

បើតាមអ្នកស្រី ង៉ែត យឿន បញ្ជាក់ថា មុនពេលមានហេតុការណ៍នេះ មានបុរសពីរ ទៅបីនាក់(មិនស្គាល់​ឈ្មោះ)ដែលអះអាងថា ខ្លួនជាតំណាង​លោកឧកញ៉ា ប៉ែន នួន មកចរចាសុំទិញដីពលរដ្ឋ​ជា​ច្រើន​លើក ប៉ុន្ដែពលរដ្ឋមិនព្រមលក់។ ស្រាប់តែនៅថ្ងៃទី១៣ ខែកញ្ញា ពួកគេបានយកគ្រឿងចក្រមក​ឈូសឆាយដីពួកគាត់ ទើបឈានដល់ប្រើអំពើហិង្សាបែបនេះ។

ចំណែកលោក អឿន សុខនៅ​ ដែលជាអ្នករងរបួសធ្ងន់ត្រង់ដៃ និងលើដងខ្លួនជាច្រើនកន្លែងនៅក្នុងហេតុការណ៍នោះ ក៏ត្រូវ​បាន​ក្រុម​គ្រួ​សា​រ​​យ​ក​ទៅ​​​សម្រាក​​នៅ​ផ្ទះ​វិញ​ដែរ ព្រោះ​គ្មាន​​​លទ្ធភាព​បង់​ថ្លៃ​​សេវា​​ព្យាបាល​នៅ​មន្ទីរ​ពេទ្យ​បន្ត​ទៀត​។ រីឯជនរងគ្រោះម្នាក់ទៀតឈ្មោះ រ៉ា ក៏ត្រូវបានសាច់ញាតិយកមក​ព្យាបាលនៅផ្ទះវិញដូចគ្នា​ ព្រោះគ្មានលទ្ធភាពបង់ថ្លៃព្យាបាល ហើយងាកទៅរកថ្នាំបុរាណខ្មែរ​សម្រាប់​ព្យាបាលវិញ។​

លោក សុង ថន តំណាងពលរដ្ឋទំនាស់ដីធ្លីនៅភូមិព្រៃពាយ ឃុំត្រពាំងភ្លាំង ស្រុកឈូកបាននិយាយនៅ​​ថ្ងៃទី ២១ខែកញ្ញាថា ប្រជាពលរដ្ឋចំនួន ៣៧នាក់ បានប្រឆាំងក្រុមឈ្មួញមួយក្រុមដែលយកត្រា​ក់ទ័រ​ឈួសឆាយដីធ្លីរបស់អ្នកភូមិនៅតំបន់នោះ ដោយបានប៉ះទង្គិចគ្នាបង្កឱ្យមានរបួសធ្ងន់បីនាក់ ហើយត្រូវ​អ្នកភូមិដឹកទៅមន្ទីរពេទ្យបង្អែកខេត្តកំពតព្យាបាលបន្ទាន់។

លោកបន្តថា ក្រុមឈ្មួញបានយកត្រាក់ទ័រចំនួន ២គ្រឿងមកកាយដីស្រែចម្ការពួកគាត់ ហើយមួយគ្រឿ​ង​​កំពុ​ងកាយដីធ្វើផ្លូវ។ ដោយអ្នកភូមិបាន​នាំគ្នាចេញមកតវ៉ា ហាមឃាត់ឱ្យបញ្ឈប់សកម្មភាព​ឈូសឆា​យ ព្រមទាំងស្នើសុំ​ឱ្យ​យក​គ្រឿងចក្រ​ចេញ​ពីដី​តំបន់​មាន​ជម្លោះនោះ។

លោក សុង ថន និយាយថា៖ «ខ្ញុំសូមស្នើឱ្យអាជ្ញាធរគ្រប់ជាន់ថ្នាក់ទាំងអស់ មេត្តាជួយដោះស្រាយ​បញ្ហា​ទំនាស់ដីធ្លីដ៏រ៉ាំរ៉ៃនេះ។ ពួកខ្ញុំមួយថ្ងៃៗ នៅរង់ចាំតែការពារដីរបស់ខ្លួនមិនបានចេញទៅប្រកបមុខរបរអ្វី​ស​ម្រា​ប់​ចិញ្ចឹមគ្រួសារទេ។ ដូច្នេះសូមមេត្តាជួយដោះស្រាយឱ្យពួកខ្ញុំបានចប់សព្វគ្រប់​ផង ពួកខ្ញុំ​ជា​ជន​ក្រីក្រ​ទេ​»។

លោកឧកញ៉ា ប៉ែន នួន ដែលអ្នក​ភូមិ​អះអាង​ថា​ ជាអ្នកនៅពីក្រោយខ្នង​​​ក្នុង​ករណី​ជម្លោះដីធ្លីនេះមិន​​ទាន់អាចទាក់ទងសុំការឆ្លើយតបជុំវិញការចោទប្រកាន់នៅឡើយ។

​​ចំណែកលោក ថាវ វណ្ណារ៉េត មេឃុំ​ត្រពាំង​ភ្លាំង នៅថ្ងៃទី២១ ខែកញ្ញានេះ​ក៏មិនទាន់​អាច​ស្វែងរក​ប្រភពទាក់ទង​សុំ​ការ​បញ្ជាក់​ពីបញ្ហានេះបានដែរ។

លោក ខៀវ រិទ្ធិភ័ណ្ឌ អភិបាលស្រុកឈូក បានថ្លែងថា ពិតជាមានករណីវិវាទដីធ្លីនៅក្នុងតំប​ន់​នោះពិតមែន ប៉ុន្ដែក្រោយពីទទួលព័ត៌មាននេះលោកបានចាត់ក្រុមមន្រ្តី​ជំនាញចុះទៅសម្របសម្រួលឱ្យផ្អាកសកម្មភាពឈូសឆាសដីធ្លី និងបញ្ឈប់សកម្មភាពតវ៉ារបស់​ពលរដ្ឋ ដើម្បីទុកពេលវេលាឱ្យអាជ្ញាធរជំនាញចុះ​ដោះស្រាយ។

លោកបញ្ជាក់ថា៖«ពួកគាត់មានការប៉ះទង្គិចគ្នាមួយសន្ទុះដែរ ហើយក៏មានអ្នករងរបួសខ្លះ ប៉ុន្ដែខ្ញុំ​មិនបាន​ចាំចំនួនប៉ុន្មាននាក់ទេ។ ក្រោយមក ខ្ញុំក៏បានចាត់មន្រ្តីជំនាញចុះទៅសម្របសម្រួល ដើម្បី​ធ្វើ​ការ​ដោះស្រាយតាមនីតិវិធីច្បាប់»។

លោកបន្ថែមថា ចំពោះជនបង្កឱ្យមានរបួសស្នាមទៅលើប្រជាពលរដ្ឋនោះ លោកបានចាត់ឱ្យមន្រ្តីជំនាញ​ស្រាវ​ជ្រាវតាមឃាត់ខ្លួនយកមកផ្ដន្ទាទោសទៅតាមច្បាប់ ប៉ុន្ដែរហូតមកដល់ពេលនេះ លោកមិនទាន់បានទទួលដំណឹងពីសមត្ថកិច្ចជំនាញនៅឡើយ​។

លោក ប៉ោ យ៉ា អធិការនគរបាលស្រុកឈូក មិនទាន់អាចទាក់ទងសុំការបញ្ជាក់​បន្ថែមជុំវិញករណីនេះបានទេ។

ចំណែក លោក ជាវ តាយ អភិបាលខេត្តកំពត មិនបានការធ្វើអត្ថាធិប្បាយនោះទេ ដោយលោកបានអះអាងថា កំពុងជាប់រវល់ប្រជុំ ហើយមិនអាចនិយាយទូរសព្ទបានទេ។

លោក ប៉ែន វុទ្ធា មន្រ្តីសម្របសម្រួលផ្នែកសិទ្ធិមនុស្សនៃអង្គការលីកាដូប្រចាំខេត្តកំពតបានថ្លែងថា លោកបានទទួលដំណឹងនេះ ប៉ុន្ដែមិនទាន់បានសិក្សាស៊ីជម្រៅនៅឡើយ។ លោកថា ដីនៅតំបន់នោះមានទំនាស់យូរឆ្នាំ​ហើយ ដោះស្រាយមិនចេញ ដោយក្រុមខ្លះត្រូវបានពលរដ្ឋមកពីតំបន់ផ្សេងរំលោភបំពានយកដី ក្រុមខ្លះត្រូវបានក្រុមហ៊ុនឯកជនរំលោភយក រីឯក្រុមខ្លះទៀត ត្រូវបានអ្នកមានអំណាច និង​ងារជា​ឧកញ៉ា រំលោភបំពាន​យកដែរ។ ដូច្នេះធ្វើឱ្យពិបាកដោះ​ស្រាយ និងមានភាពស្មុគស្មាញ។

លោក វុទ្ធា មានប្រសាសន៍ថា៖ «ករណីនេះ ខ្ញុំក៏កំពុងតាមដានដែរ ហើយតាមរយៈសម្ភាសន៍ជាមួយពលរដ្ឋ គឺពិត​ជា​មាន​បុរសពីរ ឬបីនាក់ មកអះអាងថា គាត់ជាតំណាងឧកញ៉ា ប៉ែន នួន ពិតមែន ប៉ុន្ដែខ្ញុំនឹងនៅបន្ត​ស្រា​យ​​ជ្រា​វ​បន្ថែមទៀតជុំវិញករណីនេះ​»។

ចំណែកលោក យន់ ផល្លី ​មន្ត្រី​សម្របសម្រួល​របស់​អង្គការសិទ្ធិមនុស្ស​អាដហុក​ប្រចាំ​ខេត្ត​កំពត​បានថ្លែ​ង​ថា លោក​ព្រួយ​​បារម្ភ​ថាករណីហិង្សានេះ នឹងបន្តកើតឡើងទៀត ប្រសិនបើ​អាជ្ញាធរ​មិន​ប្រញាប់​ដោះស្រា​យ​ឱ្យបានទាន់ពេលវេលាទេ។ ពលរដ្ឋ​បានចូលទៅកាន់កាប់ដី​គម្របព្រៃឈើរបស់​រដ្ឋ ដើម្បីបង្កបង្កើន​ផលនៅភូមិព្រៃពាយច្រើនឆ្នាំហើយ ប៉ុន្តែក្រោយ​មកមានក្រុមឈ្មួញជាច្រើន​សុទ្ធ​សឹងតែជាអ្នកមាន​លុយ និងមានអំណាចបានចូលទៅដណ្ដើមដីនោះ​បន្តពីអ្នកភូមិ​ ទើបបណ្ដាលឱ្យកើតមានជម្លោះហិង្សា​ដល់សព្វថ្ងៃ។

លោក ផល្លី មានប្រសាសន៍ថា៖ «ករណីនេះ ខ្ញុំគិតថាអាជ្ញាធរដើរនាទីយ៉ាងសំខាន់ គឺត្រូវបញ្ឈប់សកម្មភាពរាល់​ភាគីទាំង​អស់បណ្ដោះអាសន្នសិន បន្ទាប់មក គឺចាត់មន្រ្តីជំនាញចុះវ៉ាស់​វែង ស្រាវជ្រាវ ពិនិត្យតាមស្ថាន​ភា​ពជាក់ស្ដែង ហើយត្រូវកាត់ក្ដីផ្អែកលើភស្ដុតាងច្បាស់លាស់ និងយុត្តិធម៌​ឱ្យអ្នករងគ្រោះពិត​ប្រាកដ​»។

លោកជំរុញឱ្យមន្រ្តីជំនាញដោះស្រាយវិវាទដីធ្លីនេះឱ្យបានឆាប់ចប់ ហើយប្រញាប់ចេញបណ្ណកម្មសិទ្ធស្របច្បាប់ជូនពួកគាត់ ដើម្បីពួកគាត់មានពេលវេលាដាំដំណាំផ្សេងៗ និង​មានឱកាសចេញ​ទៅ​ធ្វើការងារក្រៅផ្ទះដោយមិនព្រួយបារម្ភខ្លាចបាត់ដីរបស់​ខ្លួន។

គួររំឭកថា សាលាដំបូងខេត្តកំពត កាលពីខែវិច្ឆិកា ឆ្នាំ២០១៧ បានចេញដីកាសម្រេចឃុំខ្លួន​ជន​សង្ស័យម្នាក់​ឈ្មោះ អ៊ឹង លី ដែលជាមេខ្លោងប្រឌិតរឿងក្នុងការញុះញង់ និងកេណ្ឌប្រជាពលរដ្ឋ នៅ​ទីជិតឆ្ងាយរាប់សិបនាក់ឱ្យ​ទៅចាប់រំលោភយកដីប្រជាពលរដ្ឋក្នុង​មូលដ្ឋានភូមិព្រៃពាយ ឃុំត្រពាំងភ្លាំង ស្រុកឈូក នាពេលកន្លងមកនេះ។

សកម្មភាពរបស់គាត់ បានធ្វើឱ្យ​មានការអូសបន្លាយ​ចេញបណ្ណកម្មសិទ្ធដីធ្លីរហូតមកដល់សព្វថ្ងៃ។ បើទោះបីជា កាលពីថ្ងៃទី០៨ ខែធ្នូ ឆ្នាំ២០១៥ ទីស្តីការគណ:រដ្ឋមន្ត្រី បានចេញសេចក្តីជូនដំណឹង (សជណ) ដែលមានចំណារលោកនាយករដ្ឋមន្រ្តី ហ៊ុន សែន ឱ្យកាត់ឈ្វៀលដីចំនួន ៥២៣,១៣ហិកតា ចេញពីគម្របព្រៃឈើឆ្នាំ២០០២ និងធ្វើអនុបយោគជាដីឯកជនរបស់រដ្ឋ សម្រាប់ផ្តល់ជាកម្មសិទ្ធ ជូនប្រជាពលរដ្ឋ ១០៣គ្រួសារ នៅក្នុងមូលដ្ឋាននេះក៏ដោយ។

ក្នុងនោះ​​រដ្ឋាភិបាលបានសម្រេចយល់ព្រមតាមសំណើររបស់លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរបនីយកម្ម និងសំណង់ ដើម្បីអនុញ្ញាតឱ្យអាជ្ញាធរខេត្តកំពត ធ្វើការចុះបញ្ជី ដោយត្រូវអនុវត្តនីតិវិធីនៃការចុះ​បញ្ជីដីស្របតាមសេចក្តីណែនាំចុះថ្ងៃទី២០ ខែកក្កដា ឆ្នាំ២០១២ របស់ក្រុមប្រឹក្សាគោលនយោបាយដីធ្លី ដូចដែលបានអនុវត្តន៍ក្នុងយុទ្ធនាការកន្លងមកផងដែរ៕

148 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »