សមាគមសម្ព័ន្ធអ្នកសារព័ត៌មានកម្ពុជា

មណ្ឌលព័ត៌មាន​ស្ត្រីកម្ពុជា​មិន​សប្បាយ​ចិត្ត​ពេល​អ្នក​លួចលុយ​ស្ថាប័ន​ជាង​២០ម៉ឺនដុល្លារ​ត្រូវ​ដោះ​លែង​ឲ្យមាន​សេរីភាព

បុគ្គលិក និងអតីតបុគ្គលិកអង្គការមណ្ឌលព័ត៌មានស្ត្រីកម្ពុជា (WMC) កំពុងថ្លែងក្នុងសន្និសីទសារព័ត៌មានក្នុងរាជធានីភ្នំពេញកាលពីថ្ងៃទី២៨ ខែសីហា ឆ្នាំ២០២៣។ (ខេមបូចា/ ផុន សុទ្ធីរ័ត្ន)
បុគ្គលិក និងអតីតបុគ្គលិកអង្គការមណ្ឌលព័ត៌មានស្ត្រីកម្ពុជា (WMC) កំពុងថ្លែងក្នុងសន្និសីទសារព័ត៌មានក្នុងរាជធានីភ្នំពេញកាលពីថ្ងៃទី២៨ ខែសីហា ឆ្នាំ២០២៣។ (ខេមបូចា/ ផុន សុទ្ធីរ័ត្ន)

អង្គការ​មណ្ឌល​ព័ត៌មាន​ស្រ្តី​កម្ពុជា​ហៅ​កាត់​ថា WMC​​ បាន​រៀប​ចំ​សន្និសីទ​សារព័ត៌មាន​មួយ​កាល​ពី​រសៀល​ថ្ងៃ​ចន្ទ ដើម្បី​បង្ហាញ​ការ​មិន​ពេញ​ចិត្ត​ទៅ​នឹង​ការ​ដោះ​លែង​អ្នក​ស្រី សំប៊ុន យ៉ានី អតីត​អ្នកគ្រប់គ្រងហិរញ្ញវត្ថុ បន្ទាប់​ពី​បាន​ឃុំ​ខ្លួន​មួយ​រយៈពេល​ខ្លី ទាក់ទង​នឹង​ការ​លួច​ប្រាក់​មូល​និធិ​របស់​មណ្ឌល​ជាង​២០​ម៉ឹន​ដុល្លារ​។​

អ្នក​ស្រី សំប៊ុន យ៉ានី វ័យ​៦៦​ឆ្នាំ ត្រូវ​បាន​តុលាការ​កំពូល​សម្រេច​កាត់ទោស​ឲ្យ​ជាប់ពន្ធនាគារ​រយៈពេល​ពីរ​ឆ្នាំ​កាលពី​ខែ​ធ្នូ​ឆ្នាំ​មុន  ទោះបី​អ្នកស្រី​បាន​​រត់​គេច​ខ្លួន​​ពេល​មណ្ឌល​ព័ត៌មាន​ស្រ្តី​កម្ពុជា​បាន​ដាក់​ពាក្យ​បណ្ដឹង​នៅ​ឆ្នាំ​២០១៩​។​​

អ្នកស្រី យ៉ានី ទើប​ត្រូវ​សមត្ថកិច្ច​ចាប់​ខ្លួន​កាលពីព្រឹក​​ថ្ងៃទី​២៤ ខែសីហា នៅ​ទីក្រុង​ភ្នំពេញ។ ប៉ុន្តែ​អ្នកស្រី​ត្រូវ​បាន​ដោះ​លែង​វិញ​នៅ​ថ្ងៃបន្ទាប់​​។​

សាលា​ដំបូង​រាជធានី​ភ្នំពេញ​ដែល​បាន​បញ្ជា​ឲ្យ​ដោះ​លែង​អ្នកស្រី​ សំប៊ុន យ៉ានី បាន​ចេញ​សេចក្ដី​ថ្លែង​ការណ៍​កាលពី​ថ្ងៃអាទិត្យ​​ដោយ​បញ្ជាក់ថា ស្រ្តី​មាន​វ័យ​៦៥​ឆ្នាំ ឬ​លើស​នេះដោយ​មាន​ជំងឺ​ប្រចាំ​កាយ​ផង​មិន​អាច​ដាក់​ពន្ធនាគារ​បាន​ទេ ដោយ​សម្អាង​លើ​មាត្រា​៥៣១​នៃ​នីតិវិធី​​ព្រហ្ម​ទណ្ឌ​។​

មណ្ឌល​ព័ត៌មានស្រ្តី​កម្ពុជា​ដែល​ជា​ស្ថាប័ន​លើក​កម្ពស់​សិទ្ធិ​ស្រ្តី​តាម​រយៈ​​ប្រព័ន្ធ​ផ្សព្វ​ផ្សាយ និង​បាន​ផលិត​រឿង​អប់រំ​ជា​ច្រើន​ផង​នោះ បាន​ស្នើ​ឲ្យ​អាជ្ញាធរ​ពិចារណា​ឡើង​វិញ​លើ​ការ​ដោះ​លែង​អ្នកស្រី សំប៊ុន យ៉ានី នេះ​។​

លោកស្រី អ៊ុង ច័ន្ទថុល នាយិកាប្រតិបត្តិថ្មីនៃអង្គការមណ្ឌលព័ត៌មានស្ត្រីកម្ពុជា បានថ្លែង​ថា៖ «បើ​សិន​ជា​រឿង​អយុត្តិធម៌នេះ​កើត​ឡើង​មែន វាជាគំរូ​អាក្រក់​សម្រាប់​ប្រព័ន្ធ​យុត្តិធម៌​​[នៅ​កម្ពុជា​]របស់​យើង»។​

អ្នក​នាំពាក្យ​ក្រ​សួង​យុត្តិធម៌ លោក ជិន ម៉ាលីន មាន​ប្រសាសន៍​ថាការ​សម្រេច​របស់​ក្រ​សួង​ធ្វើ​ឡើង​ទៅ​តាម​ច្បាប់ ហើយ​ករណី​របស់​អ្នកស្រី សំប៊ុន យ៉ានី ​នៅ​បន្ត​អនុវត្ត​ការ​ព្យួរទោស​នៅ​ឡើយ​។​

លោក​ថ្លែង​ថា៖ «​តុលាការ​តាំងពី​ថ្នាក់​ទាប ដល់​ថ្នាក់​ខ្ពស់​ ទាំង​បី​ថ្នាក់​បាន​ព្យួរទោស មិន​បាន​លុប​ចោល​ការ​ព្យួរនេះទេ»។ លោកបន្ត​ថា៖ «​តាម​ច្បាប់ ការ​ឃុំ​ខ្លួន​មិន​អនុញ្ញាត​ទេ ខណៈ​ដែលទណ្ឌិត​បាន​បង្ហាញ​ឆន្ទៈ​ក្នុង​ការ​ផ្ដល់​សំណង​»​។​

អ្នកស្រី យ៉ានី ជា​ស្រ្តី​មាន​កូន​បី​នាក់ និង​បាន​ធ្វើ​ការ​ឲ្យ​មណ្ឌល​ព័ត៌មាន​ស្រ្តី​កម្ពុជា​ជាង​១០​ឆ្នាំ ហើយ​ត្រូវ​ស្ថាប័ន​រកឃើញ​ថា​បាន​លួច​ប្រាក់​របស់​ស្ថាប័ន​ពេល​ធ្វើ​សវនកម្ម​លើ​ផ្នែក​ហិរញ្ញវត្ថុ​​។​

អ្នកស្រី ហង្ស សម្ភស្ស អតីត​ប្រ​ធាន​គ្រប់​គ្រងស្ថានីយ៍វិទ្យុ​របស់​មណ្ឌល​ព័ត៌មាន​ស្រ្តី​កម្ពុជា ដែល​​បាន​ឈប់​ពីស្ថាប័ន​នេះ​កាល​ពី​ឆ្នាំ​មុន​បាន​ឲ្យ​ដឹង​ដែរថា កាលនោះ​ថ្នាក់​ដឹក​នាំ​ស្ថាប័ន​​មិន​បាន​ដាក់​ពាក្យ​បណ្ដឹង​លើ​អ្នកស្រី សំប៊ុន យ៉ានី ភ្លាមៗ​ទេ ដោយបារម្ភ​ខូច​ឈ្មោះ​របស់​ស្ថាប័ន និង​ម្យ៉ាង​អ្នកស្រី សំប៊ុន យ៉ានី ក៏​បាន​សន្យាសង​ប្រាក់​វិញ​ផង​ដែរ​។ អ្នកស្រី សំប៊ុន យ៉ានី បាន​សង​ប្រាក់​បាន​ចំនួន​ប្រាំម៉ឺន​ដុល្លារ ហើយ​ក្រោយ​មក​ក៏​បាន​បាត់ខ្លួនបន្ទាប់ពីនោះ​។​

​លោក រស់ គង់ តំណាង​​បុគ្គលិក និង​ជាផលិតករប្រតិបត្តិផ្នែកវិទ្យុឲ្យ​មណ្ឌល​ព័ត៌មាន​ស្រ្តី​កម្ពុជា មាន​ប្រសាសន៍​ថា​អង្គការ​ប្រឈម​នឹង​វិបត្តិហិរញ្ញវត្ថុ​ក្នុង​ឆ្នាំ​២០១៦ និង​បាន​កាត់​បន្ថយ​បុគ្គលិក​ពី​៨០​នាក់ មក​នៅ​ត្រឹម​១០​នាក់​។​

លោកបញ្ជាក់​ថា៖ «​យើង​ធ្វើ​ការ​ដោយ​មិន​មាន​ប្រាក់​ខែ អ្នក​ខ្លះ​រហូត​ដល់​ប្រាំ​មួយ​ខែ រួម​ទាំង​ខ្ញុំ​ដែរ​ ពីព្រោះ​យើង​មិន​មាន​ថវិកា»។​

លោក រស់ គង់ អះអាងថាអំពើលួច​របស់​អ្នកស្រី សំប៊ុន យ៉ានី មិន​ត្រឹមតែ​បានធ្វើ​ឲ្យ​ប៉ះពាល់​ដល់​បុគ្គលិក និង​ក្រុម​គ្រួសារ​បុគ្គលិក​ទេ ប៉ុន្តែ​ក៏​ប៉ះពាល់​ដល់​ម្ចាស់​ជំនួយ និង​ដៃ​គូ​ក្នុង​ស្រុក​ផង​ដែរ​។​ លោកថា​អង្គការ​លែង​សូវ​មាន​លទ្ធ​ភាព​ផលិត​រឿង​អប់​រំ​សម្រាប់​ប្រយោជន៍​សង្គម​ដូច​មុន ដែល​នេះ​បាន​ប៉ះពាល់​ដោយ​ប្រយោល​ដល់​មនុស្ស​ជា​ច្រើន​។​​

លោក​ពន្យល់​ថា អ្នកស្រី​ សំប៊ុន យ៉ានី អាច​មាន​លទ្ធភាព​លួច​លុយ​បាន​យ៉ាង​ស្រួល​ពី​ស្ថាប័ន ក៏​​ព្រោះ​តែ​ពេល​នោះមាន​តែអ្នកស្រី និង​នាយិកា​ប្រតិបត្តិ​នៅពេល​នោះ អ្នកស្រី ជា ស៊ុនដាណែត ដែលជា​អ្នក​​មាន​សិទ្ធិ​ក្នុង​ការ​ដក​ប្រាក់​មូលនិធិ​បាន​។  (​អ្នកស្រី ជា ស៊ុនដាណែត មិន​ប្រឈម​នឹង​ការ​ចោទ​ប្រកាន់​នេះទេ)

លោក​បន្តថា៖ «ក្នុង​ចម្លើយ​របស់​គាត់ [សំប៊ុន យ៉ានី] ថា​គាត់​បាន​លួច​តែ​ម្នាក់​ឯង»

អ្នកស្រី​ សំប៊ុន យ៉ានី  មិន​អាច​ទាក់ទង​សុំ​ការអត្ថាធិ​ប្បាយ​បានទេ​។​

លោក រស់ គង់ ឲ្យ​ដឹង​ទៀតថា ​ស្ថាប័ន​នឹង​នៅ​តែ​បន្ត​ទាមទារ​ឲ្យ​មាន​ការ​ចាប់​ខ្លួន​អ្នកស្រី សំប៊ុន យ៉ានី ដាក់ពន្ធនាគារ ដោយ​នឹង​បន្ត​ដាក់​បណ្ដឹង​ទៅ​ក្រុម​ប្រឹក្សាធម្មនុញ្ញ និង​ស្ថាប័ន​រដ្ឋាភិបាល​ផ្សេងៗ​ទៀត​។​

លោកបានលើកឡើងថា៖ «​បើ​សិន​ជា​តុលាការ​បន្តដោះលេង​ជនល្មើស ​យើង​នឹង​មិន​បញ្ឈប់​ទេ ពីព្រោះ​យើង​គិតថា​នេះ​មិន​យុត្តិធម៌»។ លោក​បន្ថែម​ថា ក្នុង​ករណី​ដែល​អ្នកស្រី សំប៊ុន យ៉ានី មិន​អាច​មាន​លទ្ធ​ភាព​សង «​យើង​នឹង​បន្ត​ប្ដឹង​កូន​របស់​គាត់ ដែល​មានកាតព្វកិច្ច​សង​បំណុល​ជំនួស​ម្ដាយ»

ប្រែសម្រួលពីអត្ថបទភាសាអង់គ្លេស៖ WMC Upset Over Release of Fraudster Who Stole More Than $200,000

226 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម