ភូមិវប្បធម៌កម្ពុជា ជាកន្លែងទេសចណ៍ដ៏ពេញនិយមមួយក្នុងខេត្តសៀមរាប បានបិទទ្វារកាលពីសប្ដាហ៍មុន ដោយសារតែចំនួនភ្ញៀវទេសចរបានធ្លាក់ចុះអំឡុងវិបត្តិកូវីដ១៩ តែអតីតបុគ្គលិករបស់ក្រុមហ៊ុននេះនៅបន្តការទាមទារប្រាក់អត្ថប្រយោជន៍ដែលមិនទាន់ទទួលបាន។
កាលពីខែតុលា ភូមិវប្បធម៌កម្ពុជា ដែលគេដឹងថាជាកម្មសិទ្ធរបស់ឧកញ៉ាល្បីឈ្មោះ លោក ពង់ ឃាវសែ បានប្រកាសបិទប្រតិបត្តិការរបស់ខ្លួននៅថ្ងៃទី៧ ខែវិច្ឆិកា ដោយសារតែវិបត្តិកូវីដ១៩។ បើតាមស្ថិតិរបស់រដ្ឋាភិបាល ភ្ញៀវទេសចរបរទេសបានធ្លាក់ចុះ៧០ភាគរយនៅឆ្នាំនេះ ខណៈភ្ញៀវទេសចរក្នុងស្រុកទើបមានសន្ទុះបន្តិចនៅពេលថ្មីៗនេះប៉ុណ្ណោះ។
បុគ្គលិកភូមិវប្បធម៌ជាច្រើនរយនាក់បាននាំគ្នាតវ៉ាទាមទារប្រាក់ឈ្នួល និងអត្ថប្រយោជន៍ផ្សេងៗតាំងពីខែសីហា បន្ទាប់ពីអាជ្ញាធរបានស្នើឲ្យពួកគេបញ្ឈប់ការតវ៉ានេះម្ដងកាលពីខែមេសា។ ក្រុមបុគ្គលិកទាំង៣១៨នាក់ បានទទួលប្រាក់ឈ្នួល និងប្រាក់អត្ថប្រយោជន៍ផ្សេងៗហើយកាលពីសប្ដាហ៍មុន តែអ្នកទាំងនោះបានអះអាងថាពួកគាត់នៅមិនទាន់បានទទួលប្រាក់សំណងជំងឺចិត្ត និងប្រាក់បំណាច់អតីតភាពការងារក្នុងឆ្នាំ២០២០នេះនៅឡើយ។
អ្នកស្រី មុំ សុភ័ក្រ វ័យ៣៥ឆ្នាំ ដែលបានបម្រើការនៅភូមិវប្បធម៌អស់ពេល១៧ឆ្នាំមកហើយនោះបាននិយាយថា អ្នកស្រី បានទួលប្រាក់ឈ្នួលហើយកាលពីសប្ដាហ៍មុន។
អ្នកស្រី សុភ័ក្រ ឲ្យដឹងថា៖ «ខ្ញុំបានទទួលប្រាក់សំណងជាង៥ ០០០ដុល្លារពីក្រុមហ៊ុនកាលពីថ្ងៃទី៧ ខែវិច្ឆិកា»។
អ្នកស្រីបន្ថែមថាបុគ្គលិកប្រហែល៧០នាក់ ដែលសកម្មក្នុងការតវ៉ា មិនទាន់ទួលបានប្រាក់សំណងជំងឺចិត្តក្នុងឆ្នាំ២០២០នៅឡើយ។ សុភ័ក្រ បន្តថាបុគ្គលិកដែលមិនបានចូលរូមការតវ៉ា បានព្រមទទួលយកសំណងជាកញ្ចប់ពីក្រុមហ៊ុន ហើយមិនបន្តទាមទារអត្ថប្រយោជន៍ដែលនៅសេសសល់នោះទេ។
អ្នស្រីនិយាយថា៖ «ពួកយើងនឹងដាក់ពាក្យប្ដឹង ទាមទារអត្ថប្រយោជន៍ខ្លះទៀតដែលក្រុមហ៊ុនមិនទាន់ផ្ដល់ឲ្យនៅឡើយ»។
ចំណែកលោក មាស ម៉ាប់ វ័យ៣០ឆ្នាំ ជាជាងម៉ាស៊ីន និងជាអ្នកមិនចូលរួមការតវ៉ា បាននិយាយថាលោកបានយល់ព្រមទទួលសំណងពីក្រុមហ៊ុនភូមិវប្បធម៌កម្ពុជា។ លោកថា លោកបានទទួលប្រាក់ចំនួន៩០០ដុល្លារ។
លោកថា៖ «ខ្ញុំព្រមទទួលសំណងនេះ។ ដូចនេះខ្ញុំមិនទាមទារសំណងអ្វីបន្ថែមពីក្រុមហ៊ុនទេ»។
បើតាមតំណាងបុគ្គលិក ប្រាក់ខែរបស់បុគ្គលិកត្រូវបានកាត់ចំនួន២០ភាគរយ បន្ទាប់ពីវិបត្តិកូវីដ១៩ ចាប់ផ្ដើមធ្វើឲ្យវិស័យទេសចរណ៍ក្នុងខេត្តសៀមរាបរងគ្រោះ។
ក្នុងអំឡុងការតវ៉ាកាលពីខែសីហា បុគ្គលិកបានទាមទារបីចំណុចគឺប្រាក់ឈ្នួលប្រចាំខែ និងប្រាក់ថ្លៃអាហារដែលក្រុមហ៊ុនបានកាត់កាលពីដើមឆ្នាំ ចរចារកកិច្ចព្រមព្រៀងមួយជាមួយសហជីព និងរក្សាការិយាល័យផ្នែកសិល្បៈ និងបុគ្គលិកដូចដើម។
អ្នកស្រី លឹម សុភ័ក្រ អតីតអ្នកចាត់ការទូទៅនៅភូមិវប្បធម៌កម្ពុជា បាននិយាយថាខាងក្រុមហ៊ុនបានបើកប្រាក់អត្ថប្រយោជន៍ដល់បុគ្គលិករួចរាល់ហើយ តែអ្នកស្រី បដិសេធផ្ដល់ព័ត៌មានបន្ថែម ដោយថាអ្នកស្រីលែងជាបុគ្គលិករបស់ក្រុមហ៊ុនទៀតហើយ។
អ្នកស្រីបន្ថែមថា៖ «សូមអធ្យាស្រ័យ ខ្ញុំមិនអាចផ្ដល់ព័ត៌មានពីក្រុមហ៊ុនភូមិវប្បធម៌ទេ ព្រោះតាំងពីថ្ងៃទី៧ ខែវិច្ឆិកា ខ្ញុំលែងធ្វើការនៅទីនោះទៀតហើយ»។
លោក លឹម សុផា ប្រធានសហជីពប្រចាំក្រុមហ៊ុនភូមិវប្បធម៌កម្ពុជា ដែលតំណាងឲ្យបុគ្គលិក៦៩នាក់ផ្សេងទៀតថានឹងបន្តការទាមទារអត្ថប្រយោជន៍ដែលក្រុមហ៊ុនមិនទាន់ផ្ដល់ឲ្យ។
លោកនិយាយថា៖ «បុគ្គលិករបស់យើង បានទទួលយកសំណង ប៉ុន្តែសំណងដែលនៅសេសសល់ យើងនឹងទាមទារដោយផ្អែកតាមច្បាប់ស្តីពីការងារ»។
ប៉ុន្តែមន្ត្រីមន្ទីរការងារខេត្ត បាននិយាយថាការផ្ដល់ប្រាក់សំណងកាលពីសប្ដាហ៍មុន គឺស្របទៅតាមច្បាប់ស្ដីពីការងារ និងថាជម្លោះបានបញ្ចប់។
ប្រធានមន្ទីរការងារខេត្តសៀមរាប លោក ច័ន្ទ សុខុម ចិត្តា មានប្រសាសន៍ថាក្រុមហ៊ុនបានផ្ដល់សំណងដល់បុគ្គលិករួចរាល់អស់ហើយ រួមទាំងក្រុមបុគ្គលិកដែលបានតវ៉ាប្រឆាំងនឹងអ្នកគ្រប់គ្រងផងដែរ។
លោកបន្ថែមថា៖«ក្រុមហ៊ុនបានដោះស្រាយសំណងជូនបុគ្គលិកកាលពីថ្ងៃទី៦ និងទី៧ ខែវិច្ឆិកា ហើយបុគ្គលិកទាំងអស់បានចុះហត្ថលេខាថាពួកគេបានទទួលសំណងពីក្រុមហ៊ុន»។
លោកឲ្យដឹងដែរថាសម្រាប់ការទាមទារដែលនៅសេសសល់របស់បុគ្គលិកទំនងជាមិនអាចយកមកពិចារណាទេ ព្រោះថាអ្នកទាំងនោះបានយល់ព្រមទទួលសំណងរបស់គេរួចហើយ។
សម្រាប់អភិបាលខេត្តសៀម លោក ទៀ សីហា បានឯកភាពនឹងប្រធានមន្ទីរការងារ ហើយថាបុគ្គលិកគួរទទួលស្គាល់ស្ថានភាពហិរញ្ញវត្ថុដែលក្រុមហ៊ុនជួបប្រទះក្នុងវិបត្តិកូវីដ១៩។ លោកមានប្រសាសន៍ថា៖ «ដូចនេះ ខ្ញុំគិតថាគ្មានអ្វីត្រូវតវ៉ាទៀតទេ ហើយសំណងក៏បានផ្ដល់ឲ្យទៅបុគ្គលិកដែលបានតវ៉ារួចហើយដែរ»។
