សៀមរាប៖ ចំនួនអ្នកទៅទស្សនា«សមរាត្រី»នៅប្រាសាទអង្គរវត្តក្នុងរយៈពេល ៣ថ្ងៃ នាខែកញ្ញា ឆ្នាំ២០២៦នេះកើនឡើងជិត ៧០ភាគរយ បើធៀបឆ្នាំមុន។ ប៉ុន្តែ ពលរដ្ឋមួយចំនួនដែលធ្វើដំណើរពីបណ្តាលខេត្តឆ្ងាយៗរាប់រយគីឡូម៉ែត្រ ត្រូវត្រឡប់ទៅផ្ទះវិញទាំងស្តាយ ដោយសារនៅថ្ងៃទី១ និងទី២ នៃព្រឹត្តិការណ៍នេះ មិនមានវត្តមានព្រះអាទិត្យរះលើកំពូលប្រាសាទ។
ព្រឹត្តិការណ៍សមរាត្រី ឬហៅថាថ្ងៃរះចំកំពូលប្រសាទអង្គរវត្ត បានប្រព្រឹត្តទៅចាប់ពីថ្ងៃទី២១ ដល់ថ្ងៃទី២៣ ខែកញ្ញាថ្មីៗនេះ។ នៅថ្ងៃនីមួយៗមានមនុស្សជាច្រើនប្រមូលផ្តុំគ្នានៅមុខប្រសាទអង្គរវត្តដើម្បីរង់ចាំមើល និងថត តាំងពីម៉ោងទាបភ្លឺដូចលើកមុនៗដែរ។ ក៏ប៉ុន្តែដោយសារកត្តាអាកាសធាតុនៅថ្ងៃទី១ និងទី២ នៃព្រឹត្តការណ៍នេះ ព្រះអាទិត្យពុំបានបង្ហាញវត្តមានរះចំកំពូលប្រាសាទអង្គរវត្តឡើយ ខណៈនៅថ្ងៃទី៣ អ្នកទស្សនាអាចមើលឃើញព្រះអាទិត្យនៅលើកំពូលប្រាសាទ។
ពលរដ្ឋវ័យ ៦៩ឆ្នាំមកពីស្រុកស្អាង ខេត្តកណ្តាល អ្នកស្រី ញឹប រឿន បង្ហាញការសោកស្តាយ ដែលមកទស្សនានៅទី២១ ខែកញ្ញា ដែលជាថ្ងៃទី១នៃព្រឹត្តិការណ៍នេះ ប៉ុន្តែមិនបានឃើញថ្ងៃរះចំកំពូលប្រាសាទ និងត្រូវត្រឡប់ទៅផ្ទះវិញនៅថ្ងៃនោះ។ អ្នកស្រីឱ្យដឹងថា ដំបូងឡើយគាត់មកចូលរួមមង្គលការចៅជាទាហាននៅខេត្តឧត្តរមានជ័យ ប៉ុន្តែក្រោយលឺគេនិយាយតៗគ្នា គាត់ក៏ធ្វើដំណើរពីខេត្តឧត្តរមានជ័យស្កាត់មកខេត្តសៀមរាប។
ស្ត្រីវ័យ៦៩ឆ្នាំរូបនេះបន្តថា៖ «សោកស្តាយណាស់អត់បានឃើញ ខំស្កាត់មកពីណាពីណីមក។ ចង់មកឃើញថាដឹងរះបែបម៉េចៗ ព្រោះមិនដែលឃើញសោះ មិនដឹងចំឡែកបែបម៉េច មិនដែលឃើញសោះ ឃើញតែថ្ងៃរះធម្មតារាល់ថ្ងៃ អត់ដែលឃើញថ្ងៃរះចំកំពូល»។
ចំណែកពលរដ្ឋវ័យ ៥៤ឆ្នាំម្នាក់ទៀត អ្នកស្រី អ៊ូច សារុំ ឱ្យដឹងថា គាត់និងអ្នកភូមិសរុបជាង ៣០នាក់ផ្សេងទៀត បានជួលរថយន្តជិះមកពីស្រុកគងពិសី ខេត្តកំពង់ស្ពឺ ដើម្បីចង់ឃើញព្រឹត្តិការណ៍នេះជាលើកដំបូង។ អ្នកស្រីបន្តថា ធ្លាប់តែឃើញគេបង្ហោះលើហ្វេសប៊ុក និងយូធូប ដូច្នេះបានរៀបចំគម្រោងមកកម្សាន្ត និងថតរូប ប៉ុន្តែដោយសារមិនមានថ្ងៃរះដូចការគ្រោងទុក គាត់និងអ្នកភូមិបានសម្រេចចិត្តទៅផ្ទះទាំងសោកស្តាយ ដោយសារមិនអាចរង់ចាំនៅថ្ងៃទី២ និងទី៣បាន។
អ្នកស្រីថា៖ «បានតែដើរមើលដូចថាអង្គរតូច អង្គរធំ ភ្នំគូលេន ក៏ប៉ុន្តែសំខាន់បំផុតចង់មកមើលថ្ងៃរះ។ ក៏ប៉ុន្តែអត់បានមើលអ៊ីចឹង សោកស្តាយ មានតែចាំមកខែ៣ម្តងទៀត»។ អ្នកស្រីបន្តថា៖ «អ៊ីនឹងមកម្តងទៀតនៅខែ៣ ដោយសារយើងថ្ងៃនេះខកខាន អ៊ីចឹងខែ ៣មកម្តងទៀត»។
នៅពេលរំលឹកដល់បុព្វបុរសដែលសាងសង់ប្រាសាទអង្គរវត្ត ពលរដ្ឋមកពីខេត្តកណ្តាល អ្នកស្រី យន់ កែម ស្រាប់តែរំជួលចិត្តស្រក់ទឹកភ្នែកភ្លាមៗ។ អ្នកស្រីអះអាងថា កន្លងមកគាត់តែងគិតថានៅថ្ងៃណាមួយនឹងបានទស្សនាព្រឹត្តិការណ៍នេះផ្ទាល់ ប៉ុន្តែលើកនេះមិនបានដូចបំណង។
អ្នកស្រីបន្ថែមថា៖ «ឃើញហើយមានអារម្មណ៍ថា អណ្តែតបេះដូងគួរឱ្យរំភើប គ្មានអ្វីប្រៀបផ្ទឹមមិនបាន ព្រោះអីមានអច្ឆរិយដ៏ស្ងប់ស្ងែងស្រុកខ្មែរយើង មិនមានកន្លែងណាមានដូច»។
មិនមែនតែអ្នកដែលមិនធ្លាប់មកទស្សនាទេដែលចង់ឃើញព្រឹត្តិការណ៍នេះ ប៉ុន្តែព្រះតេជគុណ ឆេង គឹមសាន គង់នៅវត្តព្រះដាក់ ក្នុងស្រុកបន្ទាយស្រី មានសង្ឃដីកាថា ធ្លាប់បាននិមន្តមកទស្សនា ៤ដងមកហើយ ប៉ុន្តែព្រះអង្គនៅតែចង់និមន្តមកទៀត ដោយសារភាពអស្ចារ្យ ដែលឃើញហើយចង់ឃើញទៀត។
ព្រះអង្គមានសង្ឃដីកាថា៖ «អាត្មាគិតថា ថ្ងៃរះមានរាល់ថ្ងៃ ប៉ុន្តែព្រឹត្តិការណ៍ដែលសំខាន់គឺ ក្នុងមួយឆ្នាំយើងមិនងាយបានឃើញទេ។ អ៊ីចឹងឱកាសហ្នឹង ក្នុងមួយឆ្នាំមានតែ២ដងទេ អ៊ីចឹងបានន័យថាបើយើងមិនបានមក យើងខាត»។
ព្រះតេជគុណបន្តថា៖ «វាជាព្រឹត្តិការណ៍ដែលយើងសឹងមិនគួរឱ្យជឿ។ យើងធ្លាប់តែលឺគេនិយាយ តែដល់ពេលយើងមកឃើញផ្ទាល់បានអារម្មណ៍យើងរំភើប ញាប់ញ័រ មិនមានអ្វីដែលអាចយកមកប្រៀបស្មើបាន ព្រោះជាព្រឹត្តិការណ៍ដែលអស្ចារ្យ ដែលនឹកស្មានមិនដល់»។
ប្រធានមន្ទីរទេសចរណ៍ខេត្តសៀមរាប លោក ធិម សេរីវុឌ្ឍ ឱ្យដឹងថា ក្នុងរយៈពេល ៣ថ្ងៃនៃព្រឹត្តិការណ៍សមរាត្រីចាប់ពីថ្ងៃទី២១ ដល់ថ្ងៃទី២៣ ខែកញ្ញា ឆ្នាំ២០២៦នេះ មានភ្ញៀវទេសចរណ៍ជាតិ អន្តរជាតិ និងប្រជាពលរដ្ឋសរុបប្រមាណ ៣៧ ៥៣៣ នាក់ បានចូលទស្សនាប្រាសាទអង្គរវត្ត។ ចំនួននេះលោកថា មានការកើនឡើងជាង ៦៧ភាគរយ បើធៀបនឹងឆ្នាំ២០២៥កន្លងទៅ។ ក្នុងនោះមានប្រជាពលរដ្ឋ និងភ្ញៀវទេសចរជាតិប្រមាណជាង ៣៥ ០០០នាក់ កើនឡើងជាង ៧៣ភាគរយ និងភ្ញៀវទេសចរបរទេសមានប្រមាណជាង ២ ១០០ នាក់ កើនឡើងជាង ៦ភាគរយ។
បើតាមលោក សេរីវុឌ្ឍ ការកើនឡើងនេះ ដោយសាររដ្ឋបាលខេត្តសៀមរាប និងក្រសួងទេសចរណ៍ បានរៀបចំព្រឹត្តិការណ៍អមមួយចំនួនដូចជាការជិះកង់រួមគ្នា យុទ្ធនាការរត់ ១ម៉ឺននាក់ ១ម៉ឺនរូបភាព ១ម៉ឺនសារ និងដំណើរផ្សងព្រេងនៅលើភ្នំគូលេន។ មិនតែប៉ុណ្ណោះ លោកថាការផ្សព្វផ្សាយចម្រុះបានធ្វើឱ្យមហាជនផ្សេងៗកាន់តែចាប់អារម្មណ៍ចង់ទស្សនាភាពអស្ចារ្យនេះ។
ប្រធានមន្ទីរទេសចរណ៍រូបនេះថា ពលរដ្ឋមួយចំនួនត្រឡប់ទៅផ្ទះទាំងស្តាយមែន ប៉ុន្តែលោកលើកទឹកចិត្តឱ្យពួកគេមកទស្សនានៅអំឡុងខែមីនា ដើម្បីអាចទស្សនាព្រឹត្តិការណ៍នេះបាន ដោយគ្មានការរំខានពីអាកាសធាតុ។
លោកថ្លែងថា៖ «សូមឱ្យគាត់អញ្ជើញមកខែ៣ ពិតជាបានឃើញហើយ ព្រោះថាខែ៣ ជាខែប្រាំង អ៊ីចឹង៣ថ្ងៃហ្នឹងពិតជាបានឃើញ។ ប៉ុន្តែខែ៩នេះជារៀងរាល់ឆ្នាំ គឺបានឃើញខ្លះ មិនបានឃើញខ្លះ ក៏ប៉ុន្តែបើបានឃើញ គឺស្អាត។ សំណូមពរឱ្យគាត់អញ្ជើញមកម្តងទៀត នេះជាភាពអស្ចារ្យ ដែលសឹងតែថាមួយជីវិតនេះគួរតែត្រូវបានឃើញសម្រាប់ប្រជាពលរដ្ឋខ្មែរ»។
អ្នកនាំពាក្យក្រសួងទេសចរណ៍ លោក តុប សុភ័ក និងប្រធានសមាគមទីភ្នាក់ងារទេសចរណ៍កម្ពុជា(CATA) អ្នកស្រី ឆាយ ស៊ីវលីន បានបញ្ជាក់ថា ការរៀបចំកម្មវិធីផ្សេងៗដើម្បីអមក្នុងអំឡុងព្រឹត្តិការណ៍នេះ បានរួមចំណែកទទួលស្វាគមន៍ភ្ញៀវទេសចរជាតិ និងអន្តរជាតិយ៉ាងកក់ក្តៅ។ ក្រៅពីនេះ ក្រសួងទេសចរណ៍ក៏បានដាក់បំរាមមិនឱ្យមានការដំឡើងថ្លៃ ជាពិសេសបានរៀបចំទាំងអ្នកជំនាញថតរូបជូនភ្ញៀវទេសចរដោយឥតគិតថ្លៃផង។
របាយការណ៍មន្ទីរទេសចរណ៍ខេត្តសៀមរាបបង្ហាញថា ព្រឹត្តិការណ៍សមរាត្រីកាលពីឆ្នាំ២០២៥ មានប្រជាពលរដ្ឋ ភ្ញៀវទេសចរជាតិ និងអន្តរជាតិសរុបចំនួន ២២ ៣៨៦ នាក់។ ក្នុងនោះទេសចរជាតិ និងបងប្អូនប្រជាពលរដ្ឋមានចំនួនប្រមាណ ២០ ៣៧០ នាក់ និងទេសចរបរទេសមានចំនួនប្រមាណ ២ ០១៦ នាក់។
ដោយឡែក របាយការណ៍របស់ក្រសួងទេសចរណ៍បង្ហាញថា រយៈពេល ៨ខែដំបូងនៃឆ្នាំ២០២៦ ភ្ញៀវទេសចរជាតិសរុបមានជាង ២៥លាននាក់ កើនជាង ៤៨ភាគរយ។ រីឯភ្ញៀវទេសចរណ៍អន្តរជាតិចូលមកកម្ពុជាមានជាង ២ ២៥លាននាក់ ថយចុះជាង ៤៤ភាគរយ បើធៀបនឹងរយៈពេលដូចគ្នានៃឆ្នាំ២០២៥៕
