កម្មករសំណង់ជាច្រើនប្រឈមនឹងការមិនបើកប្រាក់ឈ្នួលក្នុងវិបត្តិកូវីដ១៩

កម្មករសំណង់កំពុងដាក់សម្ភារៈចេញពីរថយន្តនៅការដ្ឋានសំណង់មួយក្នុងទីក្រុងភ្នំពេញ ថ្ងៃទី៨ ខែវិច្ឆិកា។ បញ្ញា ឆព័ណ្ណ
កម្មករសំណង់កំពុងដាក់សម្ភារៈចេញពីរថយន្តនៅការដ្ឋានសំណង់មួយក្នុងទីក្រុងភ្នំពេញ ថ្ងៃទី៨ ខែវិច្ឆិកា។ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

លោក មិច សារឿន មិនបានបើក​​ប្រាក់​ខែ​ជា​ច្រើន​ខែ​មក​ហើយ និង​បាន​​រស់​នៅ​​ដោយ​ពឹង​ផ្អែក​លើ​ប្រាក់​កម្ចីតិចតួច​​ខ្ចី​ពី​មេកា​ដើម្បី​ផ្គត់​ផ្គង់ជីវភាព​គ្រួសារ​របស់​លោក​។​ វិបត្តិ​កូវីដ​១៩ បាន​ប៉ះពាល់​យ៉ាង​ខ្លាំង​ដល់​វិស័យ​សំណង់ ដែលមាន​កម្មករ​ជិត​១៥០ ០០០នាក់។ យ៉ាងណា កម្មករ​សំណង់​នៅ​ក្នុង​ខណ្ឌ​ដង្កោ រាជធានី​ភ្នំពេញ រូប​នេះ បាន​ជួប​ញ្ហា​ជីវភាព​ម្ដង​ទៀត​កាលពី​ខែតុលា​ ​កន្លង​ទៅ​នេះ។​

ភ្លៀង​ជា​ច្រើន​ថ្ងៃ​នៅ​ទី​ក្រុង​ភ្នំពេញ​កាលពី​ពាក់​កណ្ដាល​ខែ​តុលា បាន​បង្ក​ឲ្យ​មាន​ទឹក​ជំនន់​លិច​ ​តំបន់​មួយ​ចំនួ​ន​ក្នុង​ទីក្រុង ជាពិសេសក្នុង​​ខណ្ឌ​ដង្កោ​។ ក្នុង​រយៈពេល​បួន​ថ្ងៃ គ្រួសារ​របស់​លោក សារឿន បានទៅរស់នៅ ​ជាន់​ទី​មួយនៃផ្ទះដ៏ទៃ ហើយ​ពួកគេ​រស់​នៅទាំង​មិន​មាន​អាហារ​គ្រប់​គ្រាន់។​

ដោយ​សារតែ​គ្មាន​ប្រាក់ ​ ​​លោក​មិន​អាច​រក​វិធី​ចេញ​ពីស្ថាន​ភាព​លំបាក​នោះ​បាន និង​ថែម​ទាំង​មិន​បាន​ដឹង​ពីការ​អំពាវ​នាវ​របស់​រដ្ឋា​ភិបាល និង​កិច្ច​ខិត​ខំ​ប្រឹង​ប្រែង​ជម្លៀស​ប្រ​ជា​ពល​រដ្ឋ​ពី​ព្យុះមួយទៀត​ដែល​នឹង​ជិត​មក​ដល់។​

លោក សារឿង និយាយថា៖ «ដំបូង​ឡើយ យើង​មិន​ដឹង​ថា​ត្រូវ​ទៅណា ឬ​ក៏​ត្រូវ​ស្នាក់​នៅទីណា​ទេ ព្រោះ​ខ្ញុំ​គ្មាន​ប្រាក់​ដើម្បី​ធ្វើដំណើរទៅស្រុក។ យើង​អត់​មាន​លុយទេ​អំឡុងពេល​ទឹកជំនន់​ហ្នឹង»។ លោក​បន្ថែម​ថា គ្រួសារ​លោក​ត្រូវ​បាន​សង្គ្រោះ​ដោយ​ក្រុមអ្នកជួយសង្គោះ។​

ប្រ​ជា​ពល​រដ្ឋ​ជា​ច្រើន​បាន​រង​ផល​ប៉ះពាល់​ដោយ​សារទឹកជំនន់​នេះ ប៉ុន្តែ​ គ្រួសារ​លោក​ សារឿន រង​ផល​ប៉ះពាល់​ផ្នែក​សេដ្ឋ​កិច្ច​កាន់​តែ​ខ្លាំង​ដោយ​សារវិបត្តិ​កូវីដ១៩។ វិបត្តិ​កូវីដ១៩ បាន​បោក​បក់​សេដ្ឋកិច្ច​កម្ពុជាយ៉ាង​ធ្ងន់ធ្ងរ ដែល​អាច​នាំ​ឲ្យ​មាន​វិបត្តិ​សេដ្ឋកិច្ច​នៅ​ក្នុង​ឆ្នាំនេះ​ផង​។​

វិស័យ​​ពឹង​ផ្អែក​លើ​ការ​នាំផលិត​ផល​​​ចេញ​​ដូច​ជា ​វិស័យ​កាត់​ដេរ​សម្លៀក​បំពាក់ ដេរស្បែកជើង និង​ទំនិញ​សម្រាប់ការ​ធ្វើ​ដំណើរ​ ​រង​ផល​ប៉ះពាល់​ខ្លាំង​ជាងគេ។ ដូច​គ្នា​ដែរ វិស័យ​សំណង់​ក៏​មិន​ខុសគ្នា​ដែរ ដោយសារ​វិស័យ​នេះ​ពឹក​ផ្អែក​លើ​ការ​វិនិយោគពីក្រៅ​ប្រទេស។​ ស្រប​ពេល​ដែល​រដ្ឋា​ភិបាល​បាន​ប្រកាស​ពីជំនួយ​សង្គ្រោះ​ប្រ​ចាំ​ខែ​ដល់កម្មករ​វិស័យ​កាត់ដេរ​ និង​ទេសចរណ៍ ក៏មាន​លេ​ចចេញជា​សំណួរ​ថាតើ​ការណ៍នេះមាន​ប្រសិទ្ធភា​ពកម្រិត​ណា ហើយ​ចំពោះ​កម្មករ​វិស័យ​​សំណង់​វិញ​មិន​បាន​ទទួល​ជំនួយ​នេះ​ទេ​។​

​លោក សារឿន ជា​អ្នក​ខេត្ត​ស្វាយ​រៀង បាន​ធ្វើ​ការ​នៅ​ការដ្ឋាន​សំណង់​លំនៅ​ដ្ឋាន​មួយ​កាលពីខែ​មិថុនា និង​អាច​រក​ប្រាក់បាន​ប្រហែល​៧,៥​ដុល្លារ​ក្នុង​មួយ​ថ្ងៃ។​ ការ​ងារ​របស់​លោក ត្រូវ​គេ​សន្យា​ថា​បើ​កប្រាក់ឈ្នួល​ពីរ​សប្ដាហ៍​ម្ដង ប៉ុន្តែ​លោក​មិន​ទាន់​បាន​ទទួល​ប្រាក់ឈ្នួល​នោះ​នៅ​ឡើយ។​ ជំនួស​មក​វិញ មេកា បាន​ឲ្យ​ខ្ចី​ប្រាក់​ខ្លះ​សម្រាប់​ផ្គត់​ផ្គង់​ជីវភាព​ប្រ​ចាំ​ថ្ងៃ​ទៅ​វិញ។​

​លោក​បន្តថា៖ «​ពេល​ខ្ញុំ​សួរ​នាំ​រឿង​ប្រាក់​ឈ្នួល មេកា ថា​គាត់​ក៏​មិន​ទាន់​បាន​ទទួល​ប្រាក់​ពី​ម្ចាស់​ផ្ទះ​ដូច​គ្នា គាត់​បាន​ប្រាប់ខ្ញុំ​ឲ្យ​រង់​ចាំ​រហូត​ផ្ទះ​ធ្វើ​រួច»។​

​សកម្មជន​ផ្នែកការ​ងារ​ក្នុង​វិស័យ​សំណង់​បានលើកឡើង​ថា​​បញ្ហាដែល​កើត​​ដដែលៗគឺ​ប្រាក់ឈ្នួលទាប និង​ការ​មិន​បើក​ប្រាក់​ឈ្នួល បើ​ទោះបីជា​វិស័យ​មួយ​នេះ​បាន​កើន​ឡើង​ការ​វិនិយោគ​ផ្ទាល់​ពីបរទេស​ក៏​ដោយ។​

​ការ​ធ្លាក់ចុះ​​វិស័យសំណង់​​ ដែល​ធនាគារ​អភិវឌ្ឍន៍​​អាស៊ី (ADB) មើល​ឃើញ​ថា​ទំនង​ជា​នៅ​បន្ត​​ទៀតនោះ​​ បាន​ធ្លាក់ចុះយ៉ាង​ខ្លាំង​នាំឲ្យ​មាន​ការ​ដ្ឋាន​ជាច្រើន​នៅ​ក្រុង​ព្រះ​សីហនុ​បាន​បិទ ដែល​កន្លង​មក​​​មាន​ចំនួន​អ្នក​វិនិយោគ​ចិន​​ជា​ច្រើន​​មក​វិនិយោគ​​នៅ​​ទី​ក្រុង​នេះ។​ កន្លង​មក សារព័ត៌មាន​ក្នុង​ស្រុក​​​បាន​រាយការណ៍​ជា​ច្រើនពី​កម្មករ​ជនជាតិ​ចិន​បាតុកម្ម​តវ៉ារឿង​មិន​បាន​ទទួល​ប្រាក់​ឈ្នួល ហើយ​ធ្វើ​ឲ្យ​ជីវភាព​រស់​នៅ​របស់​ពួកគេ​នៅ​ទីក្រុង​ជាប់មាត់​សមុទ្រ​មួយ​នេះ​ធ្លាក់​ចុះ។​

​ប្រធាន​សហព័ន្ធ​សហជីពកម្មករ​សំណង់ និង​ព្រៃ​ឈើ​កម្ពុជា​ លោក សុខ គីន មាន​ប្រ​សាសន៍​ថា វិស័យសំណង់ហាក់ពុំសូវមាននរណា​​ចាប់​អារម្មណ៍ច្រើន​លើ​​រឿង​ប្រាក់ឈ្នួល​របស់កម្មករនោះទេ។

លោក​ឲ្យ​ដឹង​ថា៖«​តាំង​ពី​​ខ្ញុំធ្វើការ​លើ​បញ្ហា​នេះ​មក យើង​បាន​ឃើញ​ជា​បន្ត​បន្ទាប់​នូវ​បញ្ហា​មិន​បើក​ប្រាក់​ឈ្នួល​​សម្រាប់​កម្មករ​សំណង់ ពេល​ខ្លះ​កម្មករ​ទាំង​នោះ​បាន​សម្រេច​បោះបង់​ប្រាក់ឈ្នួល ហើយ​ស្វែង​រក​ការងារ​​ផ្សេង​​ទៀត»។​

​​លោក មាន​ប្រ​សាសន៍ទៀតថាសហជីព​បាន​ឃើញ​ពីបណ្ដឹង​ជាច្រើន​ទាក់ទង​នឹង​ការមិន​បើក​ប្រាក់​ឈ្នួល និង​ការ​បើក​ប្រាក់ឈ្នួល​មិន​ទៀង​ទាត់ ដែល​បញ្ហា​នេះ​ស្ទើរ​តែ​ក្លាយ​ជា​ទម្លាប់​ទៅ​ហើយ និង​ថា​អាជ្ញាធរ​គួរ​តែ​គិត​គូ​ពី​បញ្ហា​នេះ។​

លោក គីន ​បន្ថែមថា៖ «អ្នក​ធ្វើ​ការ​លើ​​បញ្ហា​នេះ​ពិតជាមិន​បាន​គិតគូរ​ពី​សុខមាលភាព​របស់​កម្មករទេ ទាំងស្ថានភាព​រស់នៅ និង​ប្រាក់​ឈ្នួល ដូចនេះ​ហើយ​និយោជក​របស់​ពួកគេ​អាច​ធ្វើ​អ្វី​បាន​តាម​ចិត្ត»

​ លោក ឃុន ថារ៉ូ អ្នក​គ្រប់​គ្រង​កម្ម​វិធី​ការ​ងារ​ នៃ​មជ្ឈ​មណ្ឌល​សម្ព័ន្ធ​ភាព​ការងារ និង​សិទ្ធិ​មនុស្ស របស់អង្គការសង់ត្រាល់ មាន​ប្រសាសន៍ដែរថា​ ទោះ​បីជា​វិស័យ​សំណង់​មាន​ការ​រីក​ចំរើន និងមានអ្នក​វិនិយោគច្រើន តែ​លក្ខខណ្ឌ​ការ​ងារ និង​ការ​គាំពារ​កម្មករ​មាន​ការ​រីក​ចរើន​តិច​​តួច​។​​

លោក​បន្ថែមថា៖ «ខ្ញុំ​គិតថា​យើង​ត្រូវ​ការ​ជំរុញ​ឲ្យ​មានការអនុវត្តច្បាប់ដែល​មាន​ស្រាប់​ឲ្យ​បាន​ខ្លាំង​ថែមទៀត ដើម្បីផ្ដល់​ប្រយោជន៍​ពិត​ប្រា​កដ​ដល់​កម្មករ​…​ក្រ​សួង​ពាក់ព័ន្ធ​គួរ​អង្គុយ​ជជែក​គ្នា​ រក​វិធី​ធ្វើ​ម៉េច​ធានាថា​កម្មករ និង​និយោជក​មិន​មាន​​ការ​កេង​ប្រវ័ញ្ច​លើ​ប្រាក់ឈ្នួល»។​

របាយការណ៍​របស់​ក្រសួង​រៀបចំដែនដី​​ ចេញ​ផ្សាយ​កាលពី​ខែ​កក្កដា បាន​បង្ហាញ​ថា​ទោះបីជា​ក្នុង​វិបត្តិ​កូវីដ​១៩ ក៏​នៅមាន​គម្រោង​ចំនួន​២ ៥២២ ត្រូវបាន​អនុម័តក្នុង​ឆ្នាំនេះ គិត​ជា​ទឹក​ប្រាក់​ជិត​បួនពាន់​លាន​ដុល្លារ។ ប៉ុន្តែ​ គម្រោង​ច្រើនជាង​២ ០០០ ជា​គម្រោង​ថ្នាក់​រាជធានី និង​ខេត្ត មាន​តម្លៃ​ប្រហែល​៧៤០​លាន​ដុល្លារ​។​

អ្នកនាំពាក្យ​ក្រសួងរៀបចំ​​ដែនដី លោក សេង​ ឡូត មិន​អាច​ទាក់ទង​សុំ​ការ​អត្ថាធិប្បាយ​បាននោះទេ​​។​

ហៀង នីម មាន​វ័យ​២៩​ឆ្នាំ គឺ​ជាកម្មករ​សំណង់​ម្នាក់​ដែល​ទើប​បាន​​ត្រឡប់​មកពីប្រទេស​ថៃ បន្ទាប់​ពី​បានធ្វើការ​នៅទៅនោះអស់ពេល​១០​ឆ្នាំ។ អ្នក​ខេត្ត​ព្រះសីហនុ​រូបនេះ ក៏​ធ្លាប់​បាន​​ធ្វើ​ការ​ក្នុង​ហាង​លក់ទំនិញ​មួយ​ក្នង​ខណ្ឌ​ទួលគោក រាជធានីភ្នំពេញ។​

ស្រប​ពេល​ដែល​​វិស័យ​សំណង់​ធ្លាក់​ចុះ​នោះ លោក នីម ត្រូវ​ថៅកែ ក្រុម​ហ៊ុន​ Yuti Building Decoration Engineering Cambodia and Hong Ding Xing Tain Di ប្រាប់​ថា​ពួកគេ​មិន​មានប្រាក់​បើ​ក​ឲ្យ​លោក​តាម​ចំនួន​ដែល​ត្រូវ​បាន​ ១៥០០​ដុល្លារនោះទេ។​

លោក​ នីម ឲ្យដឹងថា៖« ពួកគេ​មិន​បាន​បើ​ក​ប្រាក់ឈ្នួល​ឲ្យ​ខ្ញុំ​បី​ខែ​ហើយ ពួកគេ​ប្រាប់​ថា​ក្រុម​ហ៊ុន​គ្មាន​លុយបើក​ឲ្យ​ខ្ញុំ និង​កម្មករ​ផ្សេងទេ​»។​

លោក នីម ធ្លាប់​បាន​ធ្វើការ​ជា​កម្មករសំណង់​នៅប្រទេស​ថៃ​រយៈពេល​១០​ឆ្នាំ ប៉ុន្តែ​លោក​បាន​វិលមក​កម្ពុជា​វិញ​ដោយសារ​ការ​ចំណាយ​លើ​ការ​រស់​នៅ​ក្នុង​ប្រទេស​ថៃ​ថ្លៃ​ពេក ហើយ​ថា​លោក​ក៏ធ្លាប់ជួប​បញ្ហា​មិន​បើក​ប្រាក់ឈ្នួល​ដូច​គ្នា​នេះ​​នៅ​ប្រទេស​ថៃ​ដែរ​​ក្នុង​នាមជា​កម្មករ​ខុស​ច្បាប់​។​

លោក​ឲ្យដឹង​ទៀតថា៖ «​វាមានការ​ពិបាក​ច្រើន​ ព្រោះ​យើងជា​កម្មករ​ខុស​ច្បាប់ ពេល​ខ្លះ​ជួប​បញ្ហា​អត់បាន​បើក​ប្រាក់​ឈ្នួល​ ប៉ុន្តែ​ទោះ​បីជា​ខ្ញុំ​មក​ធ្វើ​ការ​នៅ​ប្រទេស​កំណើតវិញ វា​នៅ​តែ​ពិបាក​ដដែល​»។​

ទោះបីជា​ធ្លាប់​មាន​បទពិសោធន៍​អាក្រក់​នៅការដ្ឋាន​ទួលគោក​ក៏​ពិត​មែន តែ​ លោក នីម បាន​រក​ការ​ងារ​ថ្មី​ធ្វើ​នៅ​ខុនដូ​៤០​ជាន់​មួយ​កន្លែង ដោយ​គ្រាន់​រំពឹង​ថា​លោក​នឹង​អាច​បាន​ប្រាក់​ខែ​នៅ​រាល់​ដំណាច់​ខែ​។​​

ងាក​មក​លោក សារឿន នៅ​ខណ្ឌដង្កោ វិញ បាន​និយាយ​ថា​លោក​បាន​ទទួល​ប្រាក់​ជំនួយ​ចំនួន​៧៥០​ដុល្លារ​ពី​សាធារណជន បន្ទាប់ពី​វីដេអូ​នៃការ​ជួយ​សង្គ្រោះ​រូប​លោក​ ​ត្រូវ​បាន​ផ្សាយ​លើ​បណ្ដាញ​សង្គម។​ មិន​សុខ​គ្នាពី​លោក នីម ដែរ លោក​សារឿន គ្មាន​ជំរើស​អ្វី​ក្រៅពី​បន្ត​ការងារ​​​ក្នុង​វិស័យ​សំណង់នេះ​ និង​សង្ឃឹម​ថា​លោក​នឹង​បាន​ទទួល​ប្រាក់​ឈ្នួល​ពី​ក្រុម​ហ៊ុន​សាង​សង់។​ លោក​បន្ថែមថា៖ «វា​ពិបាក​ណាស់​ក្នុងការ​ទទួលបាន​ប្រាក់​ឈ្នួល​​សម្រាប់កាងារ​ក្នុង​វិស័យ​សំណង់។ យ៉ាងណា​ខ្ញុំ​ក៏​មិនអាច​ចេញពីការងារ​នេះបាន បើ​មិន​អ៊ីចឹង​ខ្ញុំ​នឹង​មិន​បាន​ប្រាក់​ដែល​ក្រុម​ហ៊ុន​ជំពាក់ទេ»

Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »