អង្គភាពប្រឆាំងអំពើពុករលួយ (ACU) បានបើកឯកសារប្រកាសទ្រព្យសម្បត្តិលើអនុប្រធាន ACU គឺលោក ស៊ាន បូរ៉ាត ដែលត្រូវបានផ្អាកការងារ ហើយបានឆែកឆេរការិយាល័យរបស់គាត់ ដែលជាផ្នែកមួយនៃការស៊ើបអង្កេតលើទំនាក់ទំនងរបស់គាត់ទៅនឹងគម្រោងឆបោកចំនួន ២០០លានដុល្លារ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន កាលពីថ្ងៃទី៣០ ខែតុលា។
លោក បូរ៉ាត ត្រូវបានផ្អាកការងារ កាលពីខែសីហា បន្ទាប់ពី ACU បានដាក់ឈ្មោះគាត់ថាជាជនសង្ស័យគប់គិតគ្នាក្នុងការឆបោកវិនិយោគនៅខេត្តសៀមរាប។ គម្រោងនេះ ដែលដឹកនាំដោយឧកញ៉ាល្បីឈ្មោះ ឡេង ចាន់ណា ដែលកំពុងជាប់ឃុំឃាំងមុនការកាត់ទោស បានបោកប្រាស់គ្រួសាររាប់ពាន់គ្រួសាររាប់រយលានដុល្លារក្នុងគម្រោងអចលនទ្រព្យឆបោក។
គ្រួសារជាច្រើនបានខ្ចីប្រាក់ដើម្បីវិនិយោគក្នុងគម្រោងនេះ ដោយបានមិនដឹងថាវាជាការឆបោក ដែលធ្វើឱ្យពួកគេមានបំណុលរាប់ពាន់ដុល្លារ។ មូលនិធិដែលត្រូវបានលួចមិនទាន់ត្រូវបានរកឃើញ ឬប្រគល់មកវិញនៅឡើយទេ។
នៅក្នុងសេចក្តីថ្លែងការណ៍មួយនៅថ្ងៃទី៣០ ខែតុលា ACU បាននិយាយថា ខ្លួនបានទទួលសក្ខីកម្មចាប់តាំងពីខែមុនពីជំនួយការរបស់លោក បូរ៉ាត គឺលោកស្រី ចាន់ណា និងអតីតស្វាមីរបស់គាត់ និងលោក ស ថាវី ដែលជាជនសង្ស័យម្នាក់ទៀតដែលជាអនុរដ្ឋលេខាធិការក្រសួងការពារជាតិ។
ភរិយារបស់លោក បូរ៉ាត់ ក៏ត្រូវបានបញ្ជាឱ្យដាក់លិខិតប្រកាសទ្រព្យសម្បត្តិ និងបំណុលបន្ថែមផងដែរ បន្ទាប់ពីបានដាក់ជូនរួចហើយ។
ជនសង្ស័យចំនួនប្រាំពីរនាក់ផ្សេងទៀតនៅក្នុងពន្ធនាគារខេត្តសៀមរាប ត្រូវបានសួរចម្លើយនៅដើមខែកញ្ញា នេះបើយោងតាម ACU។
លោក ថាវី បានបដិសេធមិនធ្វើអត្ថាធិប្បាយ ដោយដាក់ទូរសព្ទចុះ ខណៈដែលការហៅទូរសព្ទទៅកាន់លោក បូរ៉ាត មិនត្រូវបានឆ្លើយតប។
លោក សយ ចន្ទវិចិត្រ អ្នកនាំពាក្យរបស់ ACU បានថ្លែងថា ទីភ្នាក់ងារនេះកំពុងបន្តការស៊ើបអង្កេត ប៉ុន្តែមិនអាចផ្តល់ព័ត៌មានលម្អិតបន្ថែមបានទេ។
លោក ហាន សីហួន ដែលជាជនរងគ្រោះនៃការឆបោកវិនិយោគ បាននិយាយថា គាត់បានខ្ចីប្រាក់ជាង ៤០ ០០០ដុល្លារពីធនាគារមួយ ដើម្បីវិនិយោគជាមួយក្រុមហ៊ុនរបស់លោក ចាន់ណា គឺក្រុមហ៊ុន Brilliant City ដោយជឿជាក់លើភាពស្របច្បាប់នៃគម្រោងនេះ ពីព្រោះមន្ត្រីរដ្ឋាភិបាលជាន់ខ្ពស់ស្ថិតនៅក្នុងក្រុមប្រឹក្សាភិបាលរបស់ខ្លួន។
លោកបានមានប្រសាសន៍ថា៖ «ឥឡូវនេះវាស្ងាត់ឈឹង។ ខ្ញុំមិនទាន់បានឮអំពីសំណងណាមួយនៅឡើយទេ»។ លោកបន្តថា៖ «ខ្ញុំសូមអង្វរតុលាការឱ្យពន្លឿនសំណុំរឿងនេះ។ យើងជាពលរដ្ឋសាមញ្ញ ហើយមិនមានប្រាក់គ្រប់គ្រាន់ដើម្បីសងធនាគារវិញទេ»។
លោក យិន ស្រាង អ្នកនាំពាក្យសាលាដំបូងខេត្តសៀមរាប បានមានប្រសាសន៍ថា តុលាការកំពុងបន្តការស៊ើបអង្កេតលើករណីនេះ ប៉ុន្តែមិនបានផ្តល់ព័ត៌មានលម្អិតអំពីពេលណា ឬថាតើជនរងគ្រោះនឹងទទួលបានសំណង ឬទទួលបានសំណងជំងឺចិត្តឬអត់នោះទេ។ ក្នុងរយៈពេលប៉ុន្មានឆ្នាំចុងក្រោយនេះ មហាសេដ្ឋីល្បីៗមួយចំនួនត្រូវបានចោទប្រកាន់ពីបទរឿងអាស្រូវវិនិយោគ ដោយគ្រួសាររាប់រយបានដាក់ពាក្យបណ្តឹងពាក់ព័ន្ទនឹងការឆបោកដីធ្លី៕
ប្រែសម្រួលពីអត្ថបទភាសាអង់គ្លេស៖ $200 Million Fraud Probe: ACU Deputy’s Office Searched, Asset File Opened
