កម្ចីជិត ២៧លានដុល្លារសម្រាប់គម្រោងព្រែកជីកហ្វូណនតេជោ ត្រូវបានបញ្ចូលក្នុងសេចក្ដីព្រាងច្បាប់ថវិកាជាតិឆ្នាំ២០២៦បច្ចុប្បន្ន មុនពេលទៅដល់ដៃរដ្ឋសភា និងព្រឹទ្ធសភាពិនិត្យ។ នេះបើតាមអ្វីដែលសារព័ត៌មានខេមបូចាបានរកឃើញនៅក្នុងសេចក្ដីព្រាងថវិកាជាតិឆ្នាំ២០២៦។
ប្រាក់កម្ចីនេះ ត្រូវផ្តល់ដោយផ្ទាល់ទៅឱ្យក្រុមហ៊ុនកម្ពុជា នៅក្នុងគម្រោងបណ្ដាក់ទុនរួមគ្នាតម្លៃជិត១,២ពាន់លានដុល្លារ ហើយក៏ជាព័ត៌មានលម្អិតថ្មីបំផុតមួយនៃការផ្តល់ហិរញ្ញវត្ថុដែលបានលេចឡើង។ គម្រោងព្រែកជីកនេះត្រូវបានរៀបចំឡើង ដោយមានសេចក្ដីរាយការណ៍ថា វិនិយោគិនកម្ពុជាកាន់កាប់ចំណែក៥១ភាគរយ និងដៃគូចិន៤៩ភាគរយ បន្ទាប់ពីរដ្ឋាភិបាលបានផ្លាស់ប្តូរជំហរពីការប្រកាសមុនដំបូងថាទីក្រុងប៉េកាំងនឹងផ្តល់មូលនិធិសម្រាប់គម្រោងទាំងមូល។
គម្រោងអភិវឌ្ឍន៍ជាតិមួយនេះមានឈ្មោះផ្លូវការថា ផ្លូវនាវាចរណ៍ទន្លេបាសាក់ និងប្រព័ន្ធភស្តុភារទន្លេបាសាក់ នឹងតភ្ជាប់ទន្លេមេគង្គទៅឈូងសមុទ្រថៃ និងកាត់បន្ថយការពឹងផ្អែកលើការដឹកជញ្ជូនរបស់កម្ពុជាលើប្រទេសវៀតណាម។ ព្រែកជីកនេះបានបើកការដ្ឋានសាងសង់តាំងពីជិតមួយឆ្នាំមុនមកម្ល៉េះ ប៉ុន្តែវឌ្ឍនភាពជាក់ស្តែងនៅមានកម្រិត ហើយគម្រោងនេះបានប្រឈមមុខនឹងផលប៉ះពាល់ធ្ងន់ធ្ងរលើបរិស្ថាន ក៏ដូចជាកង្វះព័ត៌មានថ្មីៗស្តីពីសំណងដល់ប្រជាពលរដ្ឋរងផលប៉ះពាល់ដែលត្រូវផ្លាស់ទីលំនៅផងដែរ។
កាលពីខែតុលា ក្រុមប្រឹក្សាអភិវឌ្ឍន៍កម្ពុជា (CDC) បានបញ្ចូលគម្រោងព្រែកជីកហ្វូណនតេជោទៅក្នុងរបាយការណ៍របស់ខ្លួនស្តីពីគម្រោងវិនិយោគដែលបានចុះបញ្ជី ដែលមានទឹកប្រាក់សរុបប្រមាណ ១,៤ពាន់លានដុល្លារ ក្នុងខែនោះ បើទោះបីជាពេលនោះមានប្រាក់កម្ចីតែ ២៦,៨លានដុល្លារប៉ុណ្ណោះដែលត្រូវបានដាក់បញ្ចូលជាផ្លូវការ។ វិនិយោគិនចិនបាននាំមុខក្នុងការវិនិយោគលើគម្រោងនេះប្រហែល៤៩ភាគរយ រីឯដៃគូក្នុងស្រុកមានប្រហែល៤៨ភាគរយ។
ប្រាក់កម្ចីនេះ ត្រូវគ្រោងទុកសម្រាប់កំពង់ផែស្វយ័តភ្នំពេញ (PPAP) និងកំពង់ផែស្វយ័តក្រុងព្រះសីហនុ (PAS) ដែលជាសហគ្រាសរដ្ឋ ស្ថិតនៅក្រោមក្របខណ្ឌឥណទានរបស់រដ្ឋ ដែលតម្រូវឱ្យការផ្តល់ហិរញ្ញវត្ថុស្របតាមយុទ្ធសាស្ត្រអាទិភាពថ្នាក់ជាតិ និងត្រូវគ្រប់គ្រងក្នុងក្របខណ្ឌសារពើពន្ធ និងគោលនយោបាយសេដ្ឋកិច្ចរបស់រដ្ឋាភិបាល។
លោក ហឿន សំនៀង អគ្គលេខាធិការរងនៃអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជាបានបដិសេធមិនធ្វើអត្ថាធិប្បាយនៅពេលសួរអំពីមូលនិធិនៅសល់ ដែលគេរំពឹងថា កម្ពុជាត្រូវ រួមចំណែកដល់គម្រោងនេះ ហើយលោកបានបង្វែរសំណួរទៅកាន់លោក ផន រឹម អ្នកនាំពាក្យក្រសួងសាធារណការ និងដឹកជញ្ជូនវិញ។
លោក ផន រឹម ក៏បានបដិសេធផ្តល់ព័ត៌មានលម្អិតលើរឿងថវិកា ឬសំណងសម្រាប់ប្រជាពលរដ្ឋដែលរងផលប៉ះពាល់ និងត្រូវផ្លាស់ប្ដូរទីលំនៅ ដោយលោកបានបង្វែរសំណួរទៅកាន់ក្រសួងសេដ្ឋកិច្ច និងហិរញ្ញវត្ថុជំនួសវិញ ប៉ុន្តែលោកបានលើកឡើងថា ការសាងសង់អាចនឹងចាប់ផ្តើមនៅចុងខែវិច្ឆិកា ឬដើមខែធ្នូ។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានថ្លែងថា ដំណើរការផ្តល់សំណងបានចាប់ផ្តើមហើយ ទោះបីជាលោកមិនបានផ្តល់ព័ត៌មានលម្អិតបន្ថែមទៀតក៏ដោយ។ លោកក៏បានបញ្ជាក់ដែរថា ប្រាក់កម្ចីនេះគឺសម្រាប់តែដំណាក់កាលដំបូងនៃគម្រោងប៉ុណ្ណោះ។
ព្រែកជីកដែលមានតម្លៃ ១,១៥៦ពាន់លានដុល្លារនេះ ត្រូវបានកំណត់ពេលបញ្ចប់សាងសង់ត្រឹមឆ្នាំ២០២៨ ដោយកម្ពុជានឹងផ្តល់ថវិកាជាងពាក់កណ្តាលនៃថវិការបស់គម្រោងនេះ ឬប្រហែល៥៩០លានដុល្លារ។ តួលេខនោះតំណាងឱ្យប្រហែល ៥,៨ភាគរយនៃថវិកាក្នុងសេចក្តីព្រាងថវិកាជាតិឆ្នាំ២០២៦។
កំពង់ផែស្វយ័តភ្នំពេញ (PPAP) និងកំពង់ផែស្វយ័តក្រុងព្រះសីហនុ (PAS) ជាស្ថាប័នចុះបញ្ជីជាសាធារណៈ ហើយស្ថាប័នទាំងពីរបានផ្ដល់ព័ត៌មានតិចតួចអំពីតួនាទីរបស់ខ្លួនទៅកាន់ម្ចាស់ភាគហ៊ុនផ្សេងទៀត ដែលការណ៍នេះបានធ្វើឲ្យអ្នកវិនិយោគមានចម្ងល់ថា គម្រោងព្រែកជីកនេះអាចនឹងទទួលផលចំណេញដែរ ឬយ៉ាងណាក្រោមគម្រោងសាងសង់-ប្រតិបត្តិការ-ផ្ទេរ ឬហៅកាត់ថា BOT៕
ប្រែសម្រួលពីអត្ថបទភាសាអង់គ្លេស៖ $27 Million Loan Set for $1.2 billion Funan Techo Canal
