ព័ត៌មានជាតិ, សង្គម

លោក អេ ភូថង៖ ជីវិតខ្ញុំកើតមកដើម្បីគុនខ្មែរ ហើយកូនចៅរបស់ខ្ញុំជាអ្នកបន្តវេន

៨ សីហា ២០២៤ ម៉ោង ៣:០១ ល្ងាច
ស៊ា បញ្ញា

លោក អេ ភូថង បានប្រលែងលេងជាមួយចៅស្រី ជាកូនរបស់ ម៉ឺន មេឃា នៅក្នុងផ្ទះប្រក់ស័ង្កសី ផ្ទុកទៅដោយខ្សែក្រវាត់ និងពានកិត្តិយស ដែលកូនៗ និងសិស្សគណទទួលបានពីការប្រកួតប្រដាល់គុនខ្មែរ។ (ខេមបូចា/ ស៊ា បញ្ញា)

អង្គុយបែបមិនសូវមានកម្លាំងក្នុងខ្លួន នៅក្នុងផ្ទះប្រក់សង្កសីតូចមួយ ដែលដាក់ពេញទៅដោយខ្សែក្រវាត់ និងពានរង្វាន់ជាច្រើន ដែលកូនៗ និងសិស្សរបស់ខ្លួនដណ្តើមបានពីការប្រកួតប្រដាល់គុនខ្មែរ លោក អេ ភូថង និងភរិយាអ្នកស្រី សាំង សុម៉ាលី បានបរិយាយយ៉ាងកម្សត់ពីខ្សែជីវិតនៃក្រុមគ្រួសារត្រកូល «អេ» ដែលបានជម្នះឧបសគ្គ និងបញ្ហារាប់មិនអស់ ក្នុងការរួមចំណែកផ្សព្វផ្សាយ«គុនខ្មែរ»។

គិតមកដល់ពេលនេះ លោក អេ ភូថង ទើបមានអាយុ៥១ឆ្នាំទេ ប៉ុន្តែសុខភាពរបស់គាត់មានការធ្លាក់ចុះច្រើន ព្រោះរាងកាយរបស់លោក បានរុំរឹតដោយជំងឺ ដែលត្រូវស្ពាយថ្នាំជាប់ខ្លួនជាប្រចាំ ហើយលោកត្រូវធ្វើដំណើរទៅប្រទេសថៃ ក្នុងចន្លោះ១ខែ ឬ៣ខែម្តង ដើម្បីពិនិត្យសុខភាព និងទិញថ្នាំពេទ្យយកមកលេបជាប្រចាំថ្ងៃ។

ពាក់អាវយឺតពណ៌ខ្មៅ ខោខ្លីពណ៌ក្រហម ហើយស្ពាយកាបូបតូចមួយ ដែលផ្ទុកទៅដោយថ្នាំពេទ្យនោះ លោក អេ ភូថង ហាក់លេងខ្វល់ថា ជីវិតខ្លួនឯងនឹងផុតនៅពេលណាហើយ ប៉ុន្តែអតីតកីឡាករជើងខ្លាំងគ្មានគូប្រៀប ដែលកំពុងមានភាពលេចធ្លោខ្លាំងជាងគេ ក្នុងការបណ្តុះបណ្តាលសិស្សគណរូបនេះ នៅតែមានគោលជំហររឹងមាំ ក្នុងការជួយផ្សព្វផ្សាយគុនខ្មែររហូតជីវិតរបស់ខ្លួនផុតរលត់។

នៅក្នុងបទសម្ភាសន៍ផ្ទាល់ជាមួយខេមបូចា លោក អេ ភូថង បាននិយាយបែបអស់សង្ឃឹម និងសុខភាពរបស់ខ្លួនបែបនេះថា៖ «ពេលនេះខ្ញុំអត់សូវមានកម្លាំងកំហែងក្នុងខ្លួនទេ ព្រោះឈឺច្រើន គឺខ្ញុំលើសជាតិអាស៊ីតផង ខ្លាញផង សរសៃឈាមផង និងទឹកនោមផ្អែមទៀត ដោយត្រូវប្រើថ្នាំជាប្រចាំ និងឡើងចុះប្រទេសថៃច្រើនលើកហើយ ដើម្បីពិនិត្យជំងឺ និងបើកថ្នាំយកមកប្រើ»។

លោកបានលើកឡើងថា៖ «ខ្ញុំមិនខ្វល់ថា ជីវិតខ្លួនឯងនឹងផុតនៅពេលណានោះទេ! ឥឡូវខ្ញុំគិតតែមើលសិស្សថា ធ្វើម៉េចឱ្យពួកគេបានហ្វឹកហាត់ដិតដល់ និងប្រកួតឱ្យបានល្អ គឺខ្ញុំសប្បាយចិត្តហើយ»។

មានឱកាសហាត់ប្រដាល់ តែ អេ ភូថង គ្មានសំណាងបានសិក្សារៀនសូត្រ

ដោយមានស្រុកកំណើតនៅខេត្តកោះកុង អេ ភូថង មិនមានវាសនាបានចូលរៀនដូចក្មេងៗឯទៀតនោះទេ ពោលគឺក្មេងប្រុសដ៏កម្សត់ម្នាក់នេះ បានចូលរៀនថ្នាក់ទី១ មិនបាន២ខែផង ក៏សម្រេចចិត្តឈប់ និងបានងាកទៅនេសាទជាមួយលោកឪពុក យិន លីន និងអ្នកម្តាយ អាត អន ដើម្បីរកកម្រៃមកផ្គត់ផ្គង់គ្រួសារ។

យ៉ាងណាក៏ដោយ ដោយសារលោកតាលោកយាយរបស់ខ្លួនជាអ្នកប្រដាល់ជំនាន់ដើម អេ ភូថង តែងឆ្លៀតពេលមកហាត់ប្រដាល់តាំងពីអាយុ៧ឆ្នាំ ចំណែកប្អូនប្រុសរបស់ខ្លួន អូត ភូថង និងប្អូនស្រី អម ភូថង បានចូលហាត់ជាបន្តបន្ទាប់គ្នាជាមួយក្មេងៗ នៅក្នុងភូមិជាច្រើនទៀត ប៉ុន្តែមិនមានការប្រកួតអ្វីទេ។

យ៉ាងណាក៏ដោយ នៅត្រឹមអាយុ១១ឆ្នាំ អេ ភូថង ត្រូវបានឃ្លាតឆ្ងាយពីក្រុមគ្រួសារ ព្រោះត្រូវត្រាច់ចរតាមលោក យុទ្ធ ភូថង ដែលជាឪពុកមា មករស់នៅខេត្តព្រៃវែង ហើយវាក៏ជាទីកន្លែងដែលក្មេងប្រុសម្នាក់នេះ ទទួលបានការបណ្តុះបណ្តាលសមត្ថភាពបន្ថែម ដើម្បីក្លាយខ្លួនជាអ្នកប្រដាល់ផងដែរ។

រំឭកដល់រឿងនេះ អេ ភូថង បាននិយាយថា៖ «លោកយាយលោកតារបស់ខ្ញុំ ជាអ្នកប្រដាល់ អ៊ីចឹងគាត់បាននាំយកក្មេងៗ ចៅៗមកហាត់ជុំគ្នាទាំងអស់ តែកាលនោះ មិនបានប្រកួតទេ គឺរហូតអាយុ១៣ឆ្នាំ ទើបខ្ញុំបានប្រកួតលើកដំបូង ក្នុងបុណ្យភូមិ នៅខេត្តព្រៃវែង។ កាលនោះខ្ញុំជិះកង់មកមើលគេទេ តែលោកគ្រូ សូយ បានអូសដៃខ្ញុំឱ្យចាប់គូរដែរ ហើយខ្ញុំប្រកួតឈ្នះបានលុយ១៥០០០រៀល»។

តាមរយៈការទទួលបានឱកាសប្រកួតដោយចៃដន្យនោះ លោក យុទ្ធ ភូថង បានមើលឃើញពីទេពកោសល្យរបស់ អេ ភូថង កាន់តែច្បាស់ ហើយលោកចាប់ផ្តើមបង្ហាត់ប្រដាល់ដល់រូបគេ ចំណែកក្មេងៗជាច្រើនទៀត នៅក្នុងខេត្តព្រៃវែង ក៏បានចូលហាត់ប្រដាល់ ក្នុងពេលជាមួយគ្នានោះដែរ។

យ៉ាងណាក៏ដោយ នៅក្នុងចំណោមក្មេងៗទាំងអស់នោះ អេ ភូថង មានសមត្ថភាពលេចធ្លោជាងគេ ធ្វើឱ្យយុវជនត្រាច់ចរម្នាក់នេះ ចាប់ផ្តើមមានឱកាសបានឡើងប្រកួតប្រដាល់ជាបន្តបន្ទាប់តាមកម្មវិធីបុណ្យផ្សេងៗ នៅតាមភូមិ ឃុំ ស្រុក និងខេត្តនានា មុនពេលទទួលបានឱកាសពង្រីកកេរ្តិ៍ឈ្មោះ សម្រាប់ការប្រកួតនៅលើសង្វៀននៅរាជធានីភ្នំពេញ ក្នុងពេលដែលសង្វៀនប្រដាល់កងយោធពលខេមរភូមិន្ទប៉ុស្តិ៍លេខ៥ ចាប់ផ្តើមបើកដំណើរការ និងមានការផ្សាយផ្ទាល់នៅឆ្នាំ១៩៩៥។

សម្រាប់ការទទួលបានឱកាសមកប្រកួតតាមសង្វៀននៅភ្នំពេញនេះ អេ ភូថង បានប្រើពេលត្រឹមជាង១ឆ្នាំ ដើម្បីសាងបានកេរ្តិ៍ឈ្មោះយ៉ាងល្បីរន្ទឺ ដោយផ្តើមចេញពីការឈ្នះបានខ្សែក្រវាត់ក្នុងប្រភេទទម្ងន់៥៤គីឡូក្រាម រួចបន្តបានឈ្នះខ្សែក្រវាត់ទម្ងន់៦០គីឡូក្រាម ៧០គីឡូក្រាម និងទម្ងន់៨០គីឡូក្រាម គឺមានន័យថា អេ ភូថង បានរក្សាភាពល្បីល្បាញ ក្នុងនាមជាកីឡាករគ្មានគូប្រៀបច្រើនជាង១០ឆ្នាំ។

ជាមួយដំណើរការប្រកួតដ៏វែងឆ្ងាយនេះ អេ ភូថង បានបញ្ជាក់ថា៖ «ខ្ញុំចាប់ផ្តើមល្បីឈ្មោះ ពេលខ្ញុំវាយដណ្តើមខ្សែក្រវាត់ ABC នៅប៉ុស្តិ៍លេខ៥។ ខ្ញុំបានវាយឈ្នះ សៀវ សុភាព តែគេឱ្យចាញ់ ហើយតាំងពីនោះមក ខ្ញុំចាប់ផ្តើមល្បីរហូត»។

លោកគ្រូ អេ ភូថង បានថតជាមួយកូនសិស្ស នៅក្នុងក្លិបប្រដាល់សសុម៉ាលីគុនខ្មែរ នាពេលកន្លងមក។ (រូបភាព៖ ហ្វេសប៊ុក អេ ភូថង)

ល្បីខ្លាំងពេក ថៃចង់បាន តែ អេ ភូថង មិនព្រមលក់ឧត្តមគតិ ដើម្បីតែលុយ

តែទោះបីជាយ៉ាងណា សមត្ថភាពល្អផ្តាច់គេរបស់ អេ ភូថង នាពេលនោះ បែរជាធ្វើឱ្យកីឡាករមានរហស្សនាម«កែងឆេះ ជង្គង់ហោះ»រូបនេះ លែងសូវមានទីផ្សារប្រកួតនៅក្នុងស្រុក ព្រោះមិនសូវមានកីឡាករណាហ៊ានប្រកួតជាមួយ។ បញ្ហានេះធ្វើឱ្យ អេ ភូថង សម្រេចចេញទៅប្រកួតនៅប្រទេសថៃ បន្ទាប់ពីរូបគេបានរៀបការជាមួយស្រីស្រស់ សាំង សុម៉ាលី ក្នុងអាយុ២១ឆ្នាំ។

ការបោះជំហានទៅប្រកួតនៅប្រទេសថៃនេះ អេ ភូថង បានចូលរួមការប្រកួតម៉ារ៉ាតុងដណ្តើមខ្សែក្រវាត់ មានកីឡាករ៨នាក់ ក្នុងពិធីបុណ្យចម្រើនព្រះជន្មស្តេចថៃ ដោយរូបគេទទួលបានចំណាត់ថ្នាក់លេខ២។ ដោយមើលឃើញថា អេ ភូថង មានសមត្ថភាពល្អ គឺខាងភាគីថៃបានទំនាក់ទំនងមកលោក យុទ្ធ ភូថង ដើម្បីសុំឱ្យ អេ ភូថង បានឡើងទៅប្រកួតនៅថៃជាបន្តបន្ទាប់ និងបានស្នើឱ្យ អេ ភូថង ហ្វឹកហាត់ និងរស់នៅនៅទីនោះ ដើម្បីប្រកួតតំណាងឱ្យថៃផងដែរ ប៉ុន្តែ អេ ភូថង មិនព្រម។

ចំពោះករណីនេះ អេ ភូថង បានបញ្ជាក់ថា៖ «កាលនោះខ្ញុំវ៉ៃឡើងដាច់គេ ដល់អ៊ីចឹងគេចង់បានខ្ញុំឱ្យវ៉ៃនៅទីនោះ ប៉ុន្តែខ្ញុំមិនព្រម។ នៅថៃ វ៉ៃបានប្រាក់ចំណូលច្រើនពិតមែន ប៉ុន្តែយើងមិនលក់ឧត្តមគតិខ្លួនឯងទេ ព្រោះគេមើលឃើញយើង តែពេលយើងនៅល្អ ដល់ពេលយើងធ្លាក់កូដ គេនឹងមើលងាយយើង អ៊ីចឹងខ្ញុំសម្រេចវិលមកស្រុកវិញ»។

យ៉ាងណាក៏ដោយ ដោយសារវ័យកាន់តែចាស់ ហើយគីឡូឡើងខ្លាំងមិនអាចប្រកួតបានល្អទៀតនោះ អេ ភូថង បានចាប់ផ្តើមឃ្លាតឆ្ងាយពីសង្វៀនប្រដាល់ ចាប់ពីអំឡុងឆ្នាំ២០១២មក ហើយបានងាកមកចាប់ជំនាញជាគ្រូបង្វឹកវិញម្តង នៅស្តាតចាស់ និងបានបើកក្លិបប្រដាល់អេភូថងទន្លេបាសាក់ នៅឆ្នាំ២០០៣ ហើយបច្ចុប្បន្ន ប្តីប្រពន្ធ អេ ភូថង បានបើកក្លិបប្រដាល់សសុម៉ាលីគុនខ្មែរ មួយទៀត។ សិស្សជាង៣០នាក់ បានមកហាត់ និងស្នាក់នៅជុំគ្នា នៅក្នុងក្លិបថ្មីតែម្តង។

នៅក្នុងដំណើរដ៏វែងឆ្ងាយនៃការបើកក្លិបផ្ទាល់ខ្លួននេះ ប្តីប្រពន្ធ អេ ភូថង បានត្រាច់ចរផ្លាស់ប្តូរកន្លែងរស់នៅជាច្រើនលើក នៅតាមផ្ទះជួល ព្រោះមិនមានផ្ទះជារបស់ខ្លួន គឺទើបតែប៉ុន្មានឆ្នាំនេះទេ ទើបមានផ្ទះ និងមានទីតាំងសាងសង់ក្លិបផ្ទាល់ខ្លួន ក្រោយសម្រេចចិត្តខ្ចីលុយធនាគារទិញដី។

លោក អេ ភូថង បាននិយាយថា៖ «ខ្ញុំបានតស៊ូជាមួយប្រដាល់គុនខ្មែរចូល៤០ឆ្នាំហើយ គឺតាំងពីនៅជាកីឡាករ រហូតក្លាយជាគ្រូបង្វឹក តែខ្ញុំគ្មានសល់អ្វីជាដុំកំភួនទេ ព្រោះចំណូលដែលទទួលបាន ខ្ញុំបានចំណាយទៅលើកូនៗ និងការទទួលយកសិស្សមកបង្ហាត់ជាច្រើននាក់។ ខ្ញុំបានឆ្លងកាត់ការពិបាកច្រើនណាស់ តែនៅក្នុងអារម្មណ៍របស់ខ្ញុំ គឺខ្ញុំសប្បាយច្រើនជាងកើតទុក្ខ»។

លោកបានបន្ថែមថា៖ «ទោះកាលនៅជាកីឡាករ ខ្ញុំវ៉ៃបានលុយតិចមែន ប៉ុន្តែយើងបានដើរប្រកួតគ្រប់ខេត្ត-ក្រុង ដោយយើងបានផ្សព្វផ្សាយគុនខ្មែរច្រើន។ អ្វីដែលខ្ញុំបានធ្វើដើម្បីគុនខ្មែរ គឺខ្ញុំកើតមកដើម្បីគុនខ្មែរ។ ពេលខ្ញុំចង់ឈប់ប្រពន្ធមិនឱ្យឈប់ ដល់ពេលប្រពន្ធឱ្យឈប់ ខ្ញុំអត់ឈប់ អ៊ីចឹងមានតែបន្តដល់កូនដល់ចៅទៀត»។

គិតមកដល់ពេលនេះ លោក អេ ភូថង មានអាយុ៥១ឆ្នាំហើយ ហើយលោកមានកូនប្រុសស្រីចំនួន៤នាក់ រួមមានកូនស្រី អេ យ៉ានុត អាយុ២៤ឆ្នាំ កូនប្រុស អេ វិរៈខាំឈិតភូថង (ម៉ឺន មេឃា អាយុ២២ឆ្នាំ កូនប្រុស អេ អាំម៉ារីនភូថង អាយុ១៩ឆ្នាំ និងកូនប្រុសពៅ អេឡិច ភូថង អាយុ១៦ឆ្នាំ។

ចំពោះកូនប្រុសស្រីរបស់លោក អេ ភូថង ទាំង៤នាក់នេះ សុទ្ធតែជាកីឡាករ កីឡាការិនីឆ្នើម ដែលធ្លាប់ជាប់ជម្រើសជាតិ និងដណ្តើមបានមេដាយជូនជាតិ ជាពិសេស ម៉ឺន មេឃា ធ្លាប់បានឈ្នះមេដាយមាសចំនួន២លើកជាប់ៗគ្នា នៅស៊ីហ្គេម លើប្រភេទកីឡាវ៉ូវីណាម គឺលើកលែងតែកីឡាករវ័យក្មេង អេឡិច ភូថង ដែលនៅមិនទាន់ដាក់ចិត្តខ្លាំងក្នុងការប្រកួតប្រដាល់។

តែទោះបីជាយ៉ាងណា លោក អេ ភូថង បានអះអាងថា កូនរបស់គាត់ទាំង៤នាក់ នឹងក្លាយជាអ្នកបន្តវេន ដើម្បីឈានទៅសម្រេចគោលដៅកាន់តែធំជូនជាតិ។ «គោលបំណងនៃការផ្សព្វផ្សាយគុនខ្មែររបស់ខ្ញុំ បានចូល៨០ភាគរយហើយ ប៉ុន្តែខ្ញុំមិនមែនឈប់ត្រឹមហ្នឹងទេ។ ខ្ញុំចង់ឱ្យកូនៗរបស់ខ្ញុំបន្តវេន ដើម្បីផ្សព្វផ្សាយគុនខ្មែរឱ្យកាន់តែកក្រើកនៅក្រៅស្រុក»។

លោកបានបន្តទៀតថា៖ «ខ្ញុំចង់ឱ្យការព្យាយាមរបស់ក្រុមគ្រួសារខ្ញុំក្លាយជាកេរមរតកក្នុងការជួយដល់គុនខ្មែរ ដើម្បីជាការចង់ចាំសម្រាប់ប្រជាជនខ្មែរ។ ខ្ញុំធ្លាប់បានដឹកនាំ ធឿន ធារ៉ា, មេឃា, អាំម៉ារីន ទៅប្រកួតនៅក្រៅប្រទេសច្រើនដងហើយ តែកម្របរាជ័យណាស់ ប៉ុន្តែខ្ញុំចង់រុញឱ្យពួកគេចេញទៅប្រកួតនៅប៉ែកអឺរ៉ុបម្តង»។

នៅក្នុងមហិច្ឆតាជំរុញកូនៗ និងសិស្សឆ្នើមៗរបស់ខ្លួន ជាពិសេសជើងខ្លាំង ធឿន ធារ៉ា ទៅប្រកួតនៅអឺរ៉ុបនេះ លោក អេ ភូថង បានមើលឃើញថា អាចមានការពិបាកដែរ ព្រោះគុណភាពការហ្វឹកហាត់របស់គេល្អជាងយើង និងមានភាពអំណោយផលជាងយើង ប៉ុន្តែលោកបញ្ជាក់ថា គុនខ្មែរ មិនអន់ជាងគេនោះដែរ គឺឱ្យតែយើងខំប្រឹងបន្ថែមទៀត យើងនឹងអាចចូលទៅកាន់ទីផ្សារប្រកួតនៅអឺរ៉ុបបានហើយ។

លោក អេ ភូថង និងភរិយា បានថតជាមួយកូនប្រុសកូនស្រីទាំង៤នាក់ ក្នុងពេល អេ អាំម៉ារីនភូថង បានឈ្នះខ្សែក្រវាត់ នៅលើសង្វៀនហនុមានគុនខ្មែរ កាលពីថ្ងៃទី៣១ ខែឧសភា ឆ្នាំ២០២៤។ (រូបភាព៖ ហ្វេសប៊ុក អេ ភូថង)

ទោះគ្រោះថ្នាក់ និងឧបសគ្គច្រើន តែប្រពន្ធ អេ ភូថង ពេញចិត្តឱ្យកូនៗដើរលើវិថីនេះ

ចំណែកអ្នកស្រី សាំង សុម៉ាលី ដែលជាភរិយា លោក អេ ភូថង ក៏បានដាក់ចិត្តខ្លាំង ក្នុងការរួមចំណែកផ្សព្វផ្សាយគុនខ្មែរ។ អ្នកស្រីបានអះអាងថា បើទោះបីជាកន្លងមកអ្នកស្រី មិនចូលចិត្តការប្រដាល់ ប៉ុន្តែអារម្មណ៍មួយនេះ បានរលាយបាត់ នៅពេលអ្នកស្រីបានរៀបការជាមួយលោក អេ ភូថង នាឆ្នាំ១៩៩៧។

អ្នកស្រីបាននិយាយថា៖ «ការចាប់ដៃជាមួយប្តីខ្ញុំ គឺខ្សែជីវិតរបស់យើង ជួបភាពជូរចត់ ច្រើនជាងរីករាយ។ ក្រោយពីបានរៀបការរួច ប្តីខ្ញុំបាននាំខ្ញុំដើរតាមខេត្តរហូត ដើម្បីប្រលូកក្នុងវិស័យប្រដាល់គុនខ្មែរ គឺទៅកាន់ខេត្តឆ្ងាយៗនៅតាមព្រំដែន ដែលកាលនោះគេទៅមិនទាន់ដល់ ដោយបានផ្សងគ្រោះថ្នាក់ច្រើនទាំងការចាញ់ទឹកចាញ់ដី និងគ្រាប់មីន»។

ជាមួយការដើរប្រលូកក្នុងវិស័យប្រដាល់ជាមួយប្តីគ្រប់ច្រកល្ហកនេះ បានធ្វើឱ្យអ្នកស្រី សាំង សុម៉ាលី ប្រែចិត្តពីការមិនចូលចិត្តគុនខ្មែរ មកជាស្រលាញ់ដកខ្លួនមិនរួច។ បើទោះបីជារបរនេះ មិនអាចរកចំណូលទ្រទ្រង់ជីវភាពឱ្យធូរធារ ហើយត្រូវប្រឈមការលំបាក និងរងសម្ពាធពីការមិនសូវឱ្យតម្លៃពីមនុស្សមួយចំនួន ប៉ុន្តែអ្នកស្រីមិនរាថយ ក្នុងការដើរតាមប្តី ដើម្បីផ្សព្វផ្សាយគុនខ្មែរ។

រំឭកដល់គ្រាលំបាកខ្លាំង កាលកូនៗមិនទាន់បានឡើងប្រកួតនោះ សាំង សុម៉ាលី បានបញ្ជាក់ថា៖ «កាលកូនៗរបស់ខ្ញុំនៅតូច ពួកខ្ញុំគ្មានសល់អ្វីទេ សូម្បីលុយទិញកង់ឱ្យកូនជិះទៅរៀនគ្មានផង។ គ្រួសារខ្ញុំវេទនាណាស់ ពេលខ្លះពួកខ្ញុំហូបបាយជាមួយអំបិល តែខ្ញុំបាននិយាយលួងលោមដល់កូនៗថា ទ្រាំហូបសិនទៅកូន ចាំម៉ាក់មានលុយ ម៉ាក់ទិញម្ហូបឆ្ងាញ់ៗឱ្យហូប គឺជីវិតពួកខ្ញុំធ្លាប់ឆ្លងកាត់គ្រប់អស់ហើយ»។

យ៉ាងណាក៏ដោយ អ្នកស្រី សុម៉ាលី បានទម្លាយថា គ្រួសាររបស់អ្នកស្រីចាប់ផ្តើមមានភាពប្រសើរបន្តិចវិញ នៅពេលកូនៗធំ អាចឡើងប្រកួតបាន ដែលអាចជួយឱ្យអ្នកស្រីសន្សំបានលុយទិញដី សម្រាប់សាងសង់ផ្ទះផ្ទាល់ខ្លួន តែក៏បានខ្ចីលុយធនាគារជាង១ម៉ឺនដុល្លារផងដែរ ដើម្បីទិញដី២ប្លង់បន្ថែមទៀត ប៉ុន្តែមកដល់ពេលនេះ បានសងរួចអស់ហើយ ហើយទាំង អេ យ៉ានុត និង ម៉ឺន មេឃា ដែលមានគ្រួសារហើយនោះ ក៏មានផ្ទះផ្ទាល់ខ្លួន។

ចំពោះរឿងនេះ អ្នកស្រី សាំង សុម៉ាលី បញ្ជាក់ថា៖ «ខ្ញុំគិតថា ការតស៊ូរបស់គ្រួសារខ្ញុំមកដល់ពេលនេះ ទទួលបានជោគជ័យច្រើន ព្រោះប្តីរបស់ខ្ញុំតស៊ូខ្លាំងណាស់ ក្នុងការជួយផ្សព្វផ្សាយពីគុនខ្មែរ ចំណែកកូនៗរបស់ខ្ញុំ ក៏ស្រលាញ់គុនខ្មែរ ដោយពួកគេនឹងមិនរកការងារថ្មី ក្រៅពីចាប់អាជីពនេះទេ ហើយខ្ញុំវិញក៏គ្មានការសោកស្តាយដែលបានប្តីជាអ្នកប្រដាល់ គឺខ្ញុំពេញចេញនូវអ្វីដែលពួកខ្ញុំមាន»។

សម្រាប់ស្ថានភាពប្រកួតប្រដាល់របស់ ម៉ឺន មេឃា និងអេ អាំម៉ារីនភូថង នៅពេលនេះ អាចរកចំណូលបានរាប់ពាន់ដុល្លារ ក្នុងមួយខែៗ ហើយភាពល្បីល្បាញរបស់ ធឿន ធារ៉ា ក៏បានបើកផ្លូវឱ្យសិស្សគណផ្សេងទៀត នៅក្នុងក្លិបប្រដាល់សសុម៉ាលីគុនខ្មែរ បានឡើងប្រកួតជាប្រចាំផងដែរ ដែលជួយឱ្យក្លិបនេះរកចំណូលបានច្រើនគួរសម។ បន្ថែមលើនេះប្តីប្រពន្ធ អេ ភូថង ក៏បានកាត់លុយ១០ភាគរយពីតម្លៃខ្លួនប្រកួតរបស់សិស្សបានឡើងប្រកួតក្នុងម្នាក់ៗ មកទ្រទ្រង់ការចំណាយក្នុងក្លិបផងដែរ។

ប៉ុន្តែអ្នកស្រី សាំង សុម៉ាលី បានអះអាងថា ការចំណាយប្រចាំខែនៅក្នុងក្លិប គឺច្រើនជាងចំណូលទទួលបាន ព្រោះអ្នកស្រីត្រូវរ៉ាប់រងគ្រប់បែបយ៉ាង ពោលគឺសិស្សជាង៣០នាក់ នៅក្នុងក្លិបនេះ អ្នកស្រីត្រូវចិញ្ចឹមបីបាច់ ផ្គត់ផ្គង់ និងមើលការខុសត្រូវដូចកូនៗរបស់អ្នកស្រីដែរ ព្រោះអ្នកមកសុំហាត់ភាគច្រើនជាក្មេងកំព្រា និងអ្នកមកពីខេត្ត ដែលគ្មានលទ្ធភាពជួលផ្ទះនៅដោយខ្លួនឯងបាន។

ស្រ្តីវ័យ៤៦ឆ្នាំ សាំង សុម៉ាលី បានបញ្ជាក់ថា៖ «វាពិតជាមានការហត់ និងលំបាកខ្លាំង ដែលត្រូវរ៉ាប់រងមនុស្សជាង៣០នាក់។ បើសិនខ្ញុំមិនចិញ្ចឹមពួកគាត់ កូនខ្ញុំឡើងវ៉ៃប៉ុននេះ ខ្ញុំមាន ខ្ញុំធូរធារ ហើយចង់បានអី ខ្ញុំបានហ្នឹង ប៉ុន្តែខ្ញុំអាណិតពួកគាត់ ហើយខ្ញុំនៅតែបន្តជួយដល់ពួកគាត់ គឺមិនបោះបង់ត្រឹមហ្នឹងទេ ព្រោះគ្រប់គ្នាខំប្រឹងដើម្បីគុនខ្មែររីកចម្រើនទៅមុខទៀត»។

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានសំណេះសំណាលសិក្ខាកាម ក្នុងពិធីវគ្គបំប៉នដល់មន្រ្តីគ្រប់គ្រងការប្រកួតអាជ្ញាកណ្តាលចៅក្រមកីឡាប្រដាល់គុនខ្មែរ នៅសាលប្រជុំនាយកដ្ឋានកីឡាជំនាញ និងកីឡាមហាជន កាលពីថ្ងៃទី៣១ ខែកក្កដា ២០២៤។ (ខេមបូចា/ ស៊ា បញ្ញា)

ប្តីប្រពន្ធ អេ ភូថង និងកូនស្រី ត្រូវបានសហព័ន្ធកីឡាប្រដាល់គុនខ្មែរ ដាក់ពិន័យ

កាលពីខែមុន ប្តីប្រពន្ធ អេ ភូថង និងអេ យ៉ានុត ត្រូវបានសហព័ន្ធកីឡាប្រដាល់គុនខ្មែរ ដាក់ពិន័យមិនឱ្យចូលរួមក្នុងព្រឹត្តិការណ៍ប្រកួតកីឡាប្រដាល់គុនខ្មែររយៈពេល៦ខែដូចគ្នា បន្ទាប់ពីអ្នកទាំង៣ បានប្រតិកម្មដោយកំហឹងទៅលើអាជ្ញាកណ្តាល ជ្រា សុភាព ដែលបានបញ្ឈប់កីឡាករ ម៉ឺន មេឃា ក្នុងពេលឡើងប្រកួតការពារខ្សែក្រវាត់ពីការដណ្តើមរបស់កីឡាករ ចាន់ ប៊ុនហឿន នៅលើសង្វៀនប្រដាល់ PNN កាលពីថ្ងៃទី២១ ខែកក្កដា ឆ្នាំ២០២៤។

ប៉ុន្តែនៅក្នុងសេចក្តីសម្រេចថ្មី កាលពីថ្ងៃទី៣០ ខែកក្កដា គឺសហព័ន្ធកីឡាប្រដាល់គុនខ្មែរ បានបន្ធូរបន្ថយការពិន័យដល់លោក អេ ភូថង អ្នកស្រី សាំង សុម៉ាលី និង អេ យ៉ានុត មួយកម្រិតវិញ បន្ទាប់ពីអ្នកទាំង៣នេះ បានធ្វើការសូមទោសជាសាធារណៈ នៅក្នុងកិច្ចប្រជុំមួយកាលពីថ្ងៃទី២៣ ខែកក្កដា។

យោងតាមសេចក្តីសម្រេចជាថ្មីនេះ លោក អេ ភូថង ត្រូវបានបន្ធូរបន្ថយការវិន័យពីរយៈពេល៦ខែ មកនៅត្រឹមរយៈពេល៣ខែ ដោយត្រូវអនុវត្តវិន័យចំនួន៤សប្តាហ៍ ចំណែកវិន័យដែលនៅសល់ត្រូវបានព្យួរ។ រីឯអ្នកស្រី សាំង សុម៉ាលី ត្រូវបានបន្ធូរបន្ថយការវិន័យពី៦ខែ មកដល់ត្រឹម៣ខែ ហើយកំណត់ឱ្យអនុវត្តការពិន័យនេះត្រឹម៦សប្តាហ៍ ចំណែកវិន័យដែលនៅសល់ត្រូវព្យួរ។

ដោយឡែកកីឡាការិនី អេ យ៉ានុត ដែលជាកូនស្រី គឺសហព័ន្ធកីឡាប្រដាល់គុនខ្មែរ នៅរក្សាការដាក់វិន័យរយៈពេល៦ខែដដែល ប៉ុន្តែកំណត់ឱ្យអនុវត្តការវិន័យនេះត្រឹម៨សប្តាហ៍ទេ រីឯការវិន័យដែលនៅសល់ត្រូវព្យួរ។

ទាក់ទងការដាក់ពិន័យនេះ លោក អេ ភូថង បានទម្លាយថា ធ្វើឱ្យលោក និងក្រុមគ្រួសារមានការបាក់ទឹកចិត្តដែរ ប៉ុន្តែលោកធ្លាប់ហែលឆ្លងការលំបាកច្រើនណាស់មកហើយ ហេតុនេះវាមិនអាចមករារាំងឆន្ទៈក្នុងការជួយគុនខ្មែររបស់ក្រុមគ្រួសារលោកបានទេ។

លោកបានសង្កត់ធ្ងន់ថា៖ «បញ្ហាទាំងអស់ហ្នឹង មិនអាចរារាំងខ្ញុំបានទេ ព្រោះឆន្ទៈរបស់ខ្ញុំចង់ឱ្យគុនខ្មែរល្បី និងឱ្យគេទទួលស្គាល់ទូទាំងពិភពលោក អ៊ីចឹងហើយការជួយផ្សព្វផ្សាយគុនខ្មែរនេះ ខ្ញុំនឹងបន្តធ្វើរហូតដល់ជីវិតចុងក្រោយ»។ លោកបន្តថា៖ «ខ្ញុំបានប្រាប់ប្រពន្ធថា ពេលខ្ញុំស្លាប់ សូមជួយដាក់ហ្គង់២គូដាក់ទៅជាមួយផង ដើម្បីបញ្ជាក់ថា អេ ភូថង កើតមកដើម្បីគុនខ្មែរ ហើយពេលស្លាប់ទៅ ក៏នៅតែនឹកឃើញដល់គុនខ្មែរ»។

ប្រធានសហព័ន្ធប្រដាល់គុនខ្មែរ ប្រកាន់ជំហររឹងមាំក្នុងការអនុវត្តច្បាប់ ដើម្បីលុបបំបាត់ភាពមិនប្រក្រតី

ជាមួយគ្នានេះ លោក ខូវ ឆាយ ដែលត្រូវបានអង្គប្រជុំគណៈកម្មាធិការប្រតិបត្តិសហព័ន្ធកីឡាប្រដាល់គុនខ្មែរ បោះឆ្នោតជ្រើសតាំងឱ្យធ្វើជាប្រធានសហព័ន្ធ ជំនួសប្រធានចាស់ គឺលោក តែម ម៉ឺន កាលពីថ្ងៃទី២៩ ខែមីនា ឆ្នាំ២០២៤ បានទទួលស្គាល់ថា ក្រុមគ្រួសារត្រកូល «អេ» ជាពិសេស លោក អេ ភូថង ពិតជាមានគុណសម្បត្តិច្រើន ក្នុងការជួយដល់គុនខ្មែរ ប៉ុន្តែលោកអះអាងថា ការអនុវត្តច្បាប់ ត្រូវតែធ្វើឱ្យបានខ្ជាប់ខ្ជួន ព្រោះគុនខ្មែរអភិវឌ្ឍន៍ទៅមុខ មិនអាចគ្មានការអនុវត្តច្បាប់បានទេ។

ដោយឡែក ការរៀបចំឱ្យមានវគ្គបំប៉នដល់មន្រ្តីគ្រប់គ្រងការប្រកួតអាជ្ញាកណ្តាលចៅក្រមកីឡាប្រដាល់គុនខ្មែរ នៅសាលប្រជុំនាយកដ្ឋានកីឡាជំនាញ និងកីឡាមហាជន រយៈពេល៣ថ្ងៃ ដែលមានសិក្ខាកាមចូលរួម១៨០នាក់ (ស្រី១៤នាក់) ហើយទើបបានបញ្ចប់ កាលពីថ្ងៃទី៣១ ខែកក្កដា ពិតជាមានសារៈសំខាន់ ក្នុងការកែសម្រួលបទបញ្ជាបច្ចេកទេសប្រកួត និងការអនុវត្តការងារ ឱ្យស្ថិតនៅលើស្តង់ដាររួមតែមួយ។

លោក ខូវ ឆាយ បានថ្លែងថា៖ «សហព័ន្ធបាននឹងកំពុងយកចិត្តទុកដាក់ក្នុងការធ្វើកំណែទម្រង់ផ្ទៃក្នុង ជាដំណាក់កាលៗ ហើយបានធ្វើការកែសម្រួលនូវបទបញ្ជាបច្ចេកទេសគ្រប់គ្រងការប្រកួតឱ្យការអនុវត្តទៅតាមស្តង់ដារតែមួយ ដើម្បីប្រសិទ្ធភាពការងារ កាត់បន្ថយបញ្ហាប្រឈមនានា ដូច្នេះបានជាយើងរៀបចំវគ្គបំប៉នដល់មន្រ្តីគ្រប់គ្រងការប្រកួតអាជ្ញាកណ្តាលចៅក្រមកីឡាប្រដាល់គុនខ្មែរ នាពេលនេះ»។

ជាមួយគ្នានេះ លោក ខូវ ឆាយ បានអះអាងក្នុងការប្រឆាំងទៅនឹងភាពមិនប្រក្រតី ដែលធ្លាប់កើតមាននៅក្នុងវិស័យកីឡាប្រដាល់កន្លងមក ហើយលោកបានប្រកាសថា លោកនឹងលាឈប់ពីតួនាទីជាប្រធានសហព័ន្ធដោយខ្លួនឯង បើសិនជាលោកគ្មានលទ្ធភាពកែប្រែវិស័យមួយនេះឱ្យកាន់តែបានល្អនោះ។

លោកបញ្ជាក់ថា៖ «ខ្ញុំមានគោលដៅច្បាស់លាស់ និងមានឆន្ទៈរឹងមាំណាស់ក្នុងការអនុវត្តការងារ ខ្ញុំអត់មានការរាថយទេ។ ខ្ញុំមិនដែលបារម្ភថា ធ្វើទៅខ្លាចមានបញ្ហា និងមានអ្នករករឿងដកខ្ញុំចោលឡើយ ព្រោះដើម្បីសម្រេចគោលដៅ និងផលប្រយោជន៍រួម គឺអ្វីដែលយើងត្រូវអនុវត្ត ត្រូវតែអនុវត្ត។ ធ្វើបានធ្វើ បើធ្វើមិនបាន ខ្ញុំសុំឈប់ដោយខ្លួនឯង មិនបាច់ឱ្យអ្នកណាមកដេញខ្ញុំទេ»។

លោកបន្ថែមថា៖ «អ្នកដែលចូលរួមអភិវឌ្ឍប្រដាល់គុនខ្មែរ សុទ្ធតែជាគ្នារបស់ខ្ញុំ រីឯអ្នកដែលបំផ្លាញសហព័ន្ធកីឡាប្រដាល់គុនខ្មែរ គឺជាសត្រូវរបស់ខ្ញុំ។ នេះជាគោលការណ៍របស់ខ្ញុំ ព្រោះក្នុងនាមយើងជាថ្នាក់ដឹកនាំ យើងត្រូវតែធ្វើរឿងដែលត្រឹមត្រូវ ហើយយើងត្រូវនាំមុខប្រឆាំងរឿងដែលមិនត្រឹមត្រូវ»។

ចំណែកគ្រូបង្វឹកមកពីប្រទេសបារាំង លោក ស ស៊ីបូលីន ដែលមានបើកក្លិបប្រដាល់គុនខ្មែរ នៅប្រទេសបារាំងនោះ បានវាយតម្លៃខ្ពស់ ដែលសហព័ន្ធកីឡាប្រដាល់គុនខ្មែរ បានបើកវគ្គបំប៉នដល់មន្រ្តីគ្រប់គ្រងការប្រកួតអាជ្ញាកណ្តាលចៅក្រមកីឡាប្រដាល់គុនខ្មែរ ដើម្បីកែសម្រួលនូវបទបញ្ជាបច្ចេកទេសគ្រប់គ្រងការប្រកួតឱ្យការអនុវត្តទៅតាមស្តង់ដាតែមួយ នៅក្នុងក្រុមគ្រួសារគុនខ្មែរ។

លោកបានប្រាប់ ខេមបូចា ថា៖ «ខ្ញុំគិតថា វគ្គបំប៉ននេះ វាជាគំរូល្អមែនទែន ព្រោះយើងត្រូវរៀបចំឱ្យមានគុណភាព ដ្បិតអីគុនខ្មែរ ជាក្បាច់គុនដួងព្រលឹងជាតិ អ៊ីចឹងយើងត្រូវរៀបចំយ៉ាងម៉េចឱ្យគ្រប់គ្នាទទួលយកបាន និងបរទេសទទួលយកបាន ស័ក្តិសមថ្លៃថ្នូរ ពោរពេញទៅដោយអត្តសញ្ញាណជាតិ»។

ចំណែកអតីតគ្រូប្រដាល់សកលជម្រើសជាតិ លោក វ៉ែន សុផល បាននិយាយថា៖ «វគ្គបំប៉ននេះ ផ្តោតសំខាន់ទៅលើការងារបច្ចេកទេសដាក់ពិន្ទុ និងបច្ចេកទេសជាច្រើនទៀត គឺវាពិតជាល្អ ព្រោះយើងបានរៀនពីបច្ចេកទេសរួមគ្នា ធ្វើម៉េចកុំឱ្យការរៀបចំរបស់គណៈកម្មការយើងខុសគ្នា តែរៀបចំដោយរលូន និងឈរលើគោលការណ៍រួមតែមួយ ដើម្បីកាត់បន្ថយនូវភាពមិនប្រក្រតី គឺខ្ញុំយល់ថា យើងនឹងអនុវត្តការងារបានល្អប្រសើរជាងមុន ដោយសិក្ខាកាមទាំងអស់ ពិតជាយកចិត្តទុកដាក់ខ្លាំងក្នុងការសិក្សារៀនសូត្រ»៕

196 views