អាជ្ញាធររាជធានីភ្នំពេញ បានប្រកាសបន្តបិទខ្ទប់មួយសប្តាហ៍ទៀតនៅតំបន់មួយចំនួន រួមទាំងតំបន់ខ្លះត្រូវបានបិទខ្ទប់ជាងមួយខែមកហើយ។
ក្នុងសេចក្ដីសម្រេចមួយចុះហត្ថលេខាដោយអភិបាលរាជធានីភ្នំពេញ លោក ឃួង ស្រេង នៅថ្ងៃទី១២ ខែឧសភា បានធ្វើបច្ចុប្បន្នភាពលើការកំណត់ទីតាំងតំបន់លឿងក្នុងទីក្រុង ដែលជាតំបន់សុវត្ថិភាពក្នុងការបើកឲ្យមានដំណើរការជាប្រក្រតីឡើងវិញ។ ប៉ុន្តែនៅមានផ្នែកខ្លះក្នុងខណ្ឌទួលគោក មានជ័យ ឫស្សីកែវ និងពោធិ៍សែនជ័យ នៅត្រូវកំណត់ជាតំបន់ក្រហមនៅឡើយ និងត្រូវស្ថិតក្នុងការបិទខ្ទប់រហូតដល់ថ្ងៃទី១៩ ខែឧសភា។ ការសម្រេចបន្ថែមរយៈពេលបិទខ្ទប់នេះ ធ្វើឡើងបន្ទាប់ពីទីក្រុងទាំងមូលបានបិទខ្ទប់ទាំងស្រុងពីថ្ងៃទី១៥ ខែមេសា ដល់ថ្ងៃទី៥ ខែឧសភា។ តំបន់ក្រហមខ្លះ ត្រូវបានបិទខ្ទប់តាំងពីថ្ងៃទី៩ ខែមេសា។
អ្នកស្រី កែវ នួន វ័យ៥២ឆ្នាំ ជាកម្មកររោងចក្ររស់នៅបន្ទប់ជួលក្នុងភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ បានឲ្យដឹងថា អ្នកស្រីបានទទួលអំណោយជាស្បៀងអាហារអំឡុងពេលបិទខ្ទប់ក្នុងរយៈមួយខែមកនេះ។ អ្នកស្រី បានទទួលអង្ករ២៥គីឡូក្រាម មីមួយកេស ទឹកត្រី និងត្រីខកំប៉ុងមួយយួរពីរាជរដ្ឋាភិបាល និងបានអង្ករចំនួន៥គីឡូក្រាម មី១០កញ្ចប់ និងត្រីខបួនកំប៉ុង ពីអង្គការមិនមែនរដ្ឋាភិបាល។ ប៉ុន្តែអ្នកស្រីថា ស្បៀងទាំងនេះមិនគ្រប់គ្រាន់នោះទេ។
អ្នកស្រីបន្ថែមថា៖ «ពឹងលើជំនួយនេះ យើងមិនអាចមានអាហារហូបគ្រប់គ្រាន់ទេ ពីព្រោះខ្ញុំមានសមាជិកប្រាំនាក់នៅក្នុងបន្ទប់សម្រាប់រយៈពេលមួយខែ ប៉ុន្តែប្រសិនបើគ្រួសារណាមានសមាជិកម្នាក់ ឬពីរនាក់ វាអាចគ្រប់…ឥឡូវនេះយើងមិនមានប្រាក់ដើម្បីទិញម្ហូបអាហារទេ ពីព្រោះយើងមិនបានធ្វើការរយៈពេលមួយខែមកហើយ»។
អ្នកស្រីឲ្យដឹងដែរថា ទើបបានទទួលវិក្កយបត្រថ្លៃជួលបន្ទប់ និងទឹកភ្លើងហើយ៖ «ប៉ុន្តែខ្ញុំមិនមានលុយសម្រាប់បង់នោះទេ»។
អ្នកស្រី បានស្នើដល់អាជ្ញាធរឲ្យជួយផ្ដល់ជំនួយជាស្បៀងអាហារបន្ថែម និងជួយគាំទ្រជាថវិកាខ្លះផង។
អ្នកស្រីត្អូញត្អែរថា៖ «ខ្ញុំមានអារម្មណ៍ធុញថប់ ព្រោះនៅតែក្នុងបន្ទប់ ហើយយើងមិនមានអ្វីធ្វើ ហើយយើងមិនមានចំណូលទៀត…បើសិនជាអាជ្ញាធរបន្តបិទខ្ទប់មួយសប្ដាហ៍ទៀត យើងនឹងជួបការលំបាកកាន់ខ្លាំង»។
កញ្ញា អ៊ុន សុផាន់ណា វ័យ២៣ឆ្នាំ ធ្វើការនៅហាងប្តូរប្រាក់ និងរស់នៅក្នុងសង្កាត់ស្ទឹងមានជ័យ៣។ កញ្ញា បានឲ្យដឹងថា ខណៈពេលដែលខ្លួនអាចរស់នៅបានដោយពឹងផ្អែកលើប្រាក់សន្សំ កញ្ញា ជឿថា ការបន្តបិទខ្ទប់មួយសប្ដាហ៍ទៀត អ្នកជិតខាងដែលជាកម្មកររោងចក្រ កញ្ញា ជាច្រើនផ្សេងទៀតអាចនឹងជួបការលំបាក។
កញ្ញា លើកឡើងថា៖ «ខ្ញុំគិតថាបើសិនជាអាជ្ញាធរបន្តបិទខ្ទប់មួយសប្ដាហ៍ទៀត ប្រជាពលរដ្ឋក្នុងតំបន់ក្រហម និងជាពិសេសកម្មកររោងចក្រនឹងជួបការលំបាកច្រើន ពីព្រោះពួកគាត់មិនមានប្រាក់សម្រាប់ទិញម្ហូប និងបន្លែ»។
កញ្ញា បន្ថែម៖ «ទោះបីជាពេលខ្លះខ្ញុំមានអារម្មណ៍ធុញថប់ ប៉ុន្តែខ្ញុំនៅតែគោរពតាមវិធានការរបស់រាជរដ្ឋាភិបាល និងការណែនាំរបស់ក្រសួងសុខាភិបាល ដោយស្នាក់នៅក្នុងបន្ទប់ដើម្បីជួយកាត់បន្ថយការរីករាលដាលកូវីដ១៩»។
នៅថ្ងៃអង្គារ លោកនាយករដ្ឋមន្ត្រី ហ៊ុន សែន បានចុះហត្ថលេខាលើកម្មវិធីជំនួយគាំទ្រដល់គ្រួសារមានប្រាក់ចំណូលទាប ដែលបានរងការលំបាកអំឡុងពេល និងក្រោយពេលបិទខ្ទប់។ កម្មវិធីជំនួយនេះ ក៏នឹងជួយដល់ក្រុមគ្រួសារប្រឈមការលំបាកផ្នែកហិរញ្ញវត្ថុបន្ទាប់ពីមានអ្នកស្លាប់ ឬឆ្លងកូវីដ១៩។
កម្មវិធីជំនួយនេះផ្ដោតសំខាន់លើអ្នកទាំងឡាយណាដែលជួបការលំបាកក្នុងពេលរាជធានីភ្នំពេញ និងក្រុងតាខ្មៅ ត្រូវបិទខ្ទប់ និងខេត្តព្រះសីហនុ រួមទាំងក្រុមគ្រួសារអ្នកបើករថយន្ត កម្មករសំណង់ អ្នកលក់ដូរតាមផ្លូវ អ្នករើសសំរាម និងអ្នកបម្រើការក្នុងសេវាកម្សាន្ត។ ការកំណត់អត្តសញ្ញាណ នឹងត្រូវធ្វើឡើងដោយអាជ្ញាធរមូលដ្ឋាន និងគាំទ្រដោយក្រុមស្ម័គ្រចិត្ត សម្របសម្រួលដោយក្រសួងផែនការ។
បើតាមសេចក្ដីសម្រេចនេះឲ្យដឹងថា គ្រួសារដែលនឹងត្រូវទទួលបានជំនួយនេះ គឺផ្អែកលើទំហំគ្រួសារនីមួយៗ។ ចំពោះបុគ្គលម្នាក់អាចទទួលបានជំនួយជាសាច់ប្រាក់មួយលើក សរុប១៥៦ ០០០រៀល សម្រាប់ថ្លៃអាហារ ទឹក ភ្លើង និងបន្ទប់ជួល។ ចំណែកគ្រួសារមានគ្នាពីរ ឬបីនាក់ អាចទទួលបានសាច់ប្រាក់ចំនួន២៤៣ ៧០០រៀល ហើយគ្រួសារមានសមាជិកបួននាក់ ឬច្រើនជាងនេះនឹងទទួលបានប្រាក់ចំនួន៣១១ ០០០រៀល មួយលើកគត់ដូចគ្នា។
ដូចគ្នាដែរ សម្រាប់កម្មករកាត់ដេរ សម្លៀកបំពាក់ ដេរស្បែកជើង និងការបូប អាចទទួលបានជំនួយមួយលើកគត់ចំនួន១៦០ ០០០រៀល តាមរយៈយន្តការមានស្រាប់របស់ក្រសួងការងារ។ សម្រាប់អ្នកមានបណ្ណក្រីក្រ នឹងទទួលបានជំនួយប្រចាំខែ។
ចំពោះគ្រួសារមានសមាជិកស្លាប់ដោយសារកូវីដ១៩ រដ្ឋាភិបាលនឹងផ្តល់ជំនួយជាសាច់ប្រាក់ចំនួន ៣០០ ០០០រៀល និងបូកបន្ថែមថ្លៃទឹក និងភ្លើង សម្រាប់រយៈពេលប្រាំខែ។ ចំណែក គ្រួសារមានសមាជិកឆ្លងកូវីដ១៩ នឹងទទួលជំនួយដូចការផ្ដល់ជូនអ្នកងាយរងគ្រោះផ្សេងទៀត ដូចដែលបានបញ្ជាក់ខាងលើដែរ។
លោក កើត ឆែ អភិបាលរងរាជធានីភ្នំពេញ មានប្រសាសន៍ថា ការកំណត់គោលដៅតំបន់បិទខ្ទប់ បានធ្វើឲ្យមានការកំណត់តំបន់ដែលឆ្លងកាន់តែច្បាស់ ខណៈពេលដែលតំបន់ផ្សេងទៀតក្នុងទីក្រុងបើកឲ្យដំណើរការឡើងវិញជាប្រក្រតី។ លោក បន្តថារដ្ឋាភិបាលបានផ្ដល់ជាស្បៀងអាហារ យ៉ាងហោចណាស់ម្ដងទៅគ្រប់គ្រួសារដែលត្រូវការចាំបាច់នៅក្នុងតំបន់ក្រហម និងបន្តចែកទៀតសម្រាប់អ្នកដែលត្រូវការ។
លោកឲ្យដឹងថា៖ «បើបងប្អូនជួបបញ្ហាខ្វះស្បៀង សូមផ្ដល់ព័ត៌មានទៅកាន់អាជ្ញាធរដែលនៅជិតផ្ទះរបស់ខ្លួន»។
លោកបន្ថែមថា សាលារាជធានីក៏នឹងរៀបចំកិច្ចប្រជុំនៅថ្ងៃព្រហស្បតិ៍ ដើម្បីពិភាក្សារកវិធីល្អមួយដើម្បីអនុវត្តផែនការផ្ដល់ជំនួយសាច់ប្រាក់។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា អំពាវនាវឲ្យរដ្ឋាភិបាលផ្ដល់ជំនួយឲ្យបានឆាប់រហ័ស និងលោកសង្ឃឹមថាការបង្រួមនៃតំបន់ក្រហម កាន់តែធ្វើឲ្យអាជ្ញាធរងាយស្រួលគ្រប់គ្រងជាងមុន។
លោកបន្ថែមថា៖ «ខ្ញុំគិតថានៅពេលដែលតំបន់ក្រហម និងលឿងទុំបង្រួមឲ្យនៅតូចជាងមុន រដ្ឋាភិបាល គួរតែមានភាពងាយស្រួលក្នុងការគ្រប់គ្រង ដូចនេះពួកគាត់នឹងផ្ដល់សេវាបានឆាប់រហ័ស»។
នៅថ្ងៃពុធនេះ ក្រសួងសុខាភិបាលបានឲ្យដឹងថាចំនួនអ្នកឆ្លងកូវីដ១៩ មាន៤៧២ករណីបន្ថែមទៀត នាំឲ្យចំនួនឆ្លងសរុបឡើងដល់២០ ៦៩៥ករណី គិតតាំងពីដើមឆ្នាំ២០២០ មក។ ក្រសួងឲ្យដឹងដែរថា ចំនួនអ្នកជាសះស្បើយមាន៨ ៥៣៩ករណី និងអ្នកស្លាប់មានចំនួន១៣៦នាក់៕
ប្រែសម្រួលពីអត្ថបទភាសាអង់គ្លេស៖ Another week of lockdowns for some Phnom Penh red zones, but area shrinks
