រាជរដ្ឋាភិបាលកម្ពុជាបានប្រកាសបិទខ្ទប់ខេត្តជាប់ព្រំដែនថៃចំនួនប្រាំបី ដើម្បីទប់ស្កាត់ការឆ្លងរាលដាលវីរុសកូវីដ១៩ បំប្លែងថ្មី Delta និងបានដាក់ចេញវិធានការរឹតបន្តឹងលើភោជនីដ្ឋាន រោងភាពយន្ត សារមន្ទីរ និងកន្លែងកម្សាន្តនានា ក៏ដូចជាដាក់បំរាមគោចរ ស្របពេលដែលករណីឆ្លងនៅប្រទេសថៃកំពុងឡើងខ្ពស់។
កាលពីយប់ថ្ងៃពុធ រដ្ឋាភិបាលបានប្រកាសបិទខ្ទប់ខេត្តបន្ទាយមានជ័យ ឧត្តរមានជ័យ បាត់ដំបង ប៉ៃលិន កោះកុង ពោធិ៍សាត់ ព្រះវិហារ និងខេត្តសៀមរាប សម្រាប់រយៈពេល១៤ថ្ងៃ គិតចាប់ពីថ្ងៃទី២៩ ខែកក្កដា ដល់ថ្ងៃទី១២ ខែសីហា។
ដូចទៅនឹងវិធានការបិទខ្ទប់លើកមុនដែរ កម្រិតនៃភាពតឹងរឹងមានផ្សេងៗគ្នា មានតំបន់ក្រហម តំបន់លឿង និងតំបន់លឿងទុំ ត្រូវកំណត់ដោយផ្អែកលើករណីឆ្លងក្នុងតំបន់នីមួយៗ។
ក្នុងសេចក្ដីសម្រេច បានកំណត់ថាកន្លែងណាមានការឆ្លងរាលដាលវីរុសកូវីដ១៩ បំប្លែងថ្មី Delta ត្រូវដាក់ដោយស្វ័យប្រវត្តជាតំបន់ក្រហម ឬលឿងទុំ។
បទបញ្ជានេះ ក៏បានតម្រូវឲ្យគណៈបញ្ជាការខេត្តទាំងអស់ត្រូវគ្រប់គ្រងការធ្វើដំណើរពីខេត្តមួយទៅខេត្តមួយផងដែរ។
បន្ថែមពីនេះ ក៏បានណែនាំឲ្យអាជ្ញាធរគ្រប់ខេត្ត សម្របសម្រួលជាមួយអាជ្ញាធរថៃឲ្យជួយថែទាំសុខភាពពលករខ្មែរឆ្លងកូវីដ១៩ មុននឹងបញ្ជូនពួកគេឲ្យមកកម្ពុជាវិញ ក៏ដូចជាសម្របសម្រួលឲ្យពលករដែលមានបំណងត្រឡប់មកកម្ពុជាវិញ ត្រូវពន្យារពេលការវិលត្រឡប់សិន រហូតវិធានការបិទខ្ទប់ត្រូវបានបញ្ចប់។
សេចក្ដីសម្រេចនេះ ក៏បានស្នើឲ្យរដ្ឋមន្ត្រីក្រសួងការបរទេសកម្ពុជា ធ្វើការជាបន្ទាន់ជាមួយភាគីថៃ ដើម្បីបិទព្រំដែនបណ្ដោះអាសន្នលើគ្រប់អ្នកធ្វើដំណើរ លើកលែងតែការដឹកទំនិញឆ្លងកាត់។ ខណៈភាគីថៃ បានបិទព្រំដែនយូរមកហើយ ភាគីកម្ពុជាកន្លងមកនៅបន្តបើក សម្រាប់ទទួលពលករខ្មែរត្រឡប់ពីថៃមកវិញ។
បើតាមការឲ្យដឹងពីក្រសួងសុខាភិបាលកាលពីថ្ងៃទី២៧ ខែកក្កដា ករណីឆ្លងកូវីដ១៩ បំប្លែងថ្មី Delta ចំនួន៣៩ករណី គឺនៅក្នុងខេត្តចំនួនប្រាំខាងលើ។
លិខិតជូនដំណឹងមួយរបស់ខេត្តបន្ទាយមានជ័យ ចុះហត្ថលេខាដោយលោក អភិបាលខេត្ត លោក អ៊ុំ រាត្រី បានលើកឡើងថា រដ្ឋបាលខេត្តបានបិទច្រកព្រំដែនរវាងខេត្តបន្ទាយមានជ័យ និងខេត្តស្រះកែវ ប្រទេសថៃ ចាប់ពីថ្ងៃទី២៩ ខែកក្កដា ដល់ថ្ងៃទី១២ ខែសីហា។
លិខិតជូនដំណឹងបានសរសេរថា៖ «សូមជម្រាបមកដល់អភិបាលខេត្តស្រះកែវ នៃព្រះរាជាណាចក្រថៃអំពីការបិទព្រំដែនជាបណ្ដោះអាសន្នចាប់ពីម៉ោង២៣:៥៩នាទី ថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ សម្រាប់ការចេញចូល(កម្មករ អាជីវកម្ម និងពាណិជ្ជករ) លើកលែងតែការដឹកជញ្ជូនទំនិញ និងករណីពិសេសដែលមានការអនុញ្ញាតពីអាជ្ញាធរពាក់ព័តន្ធ ដូចជាករណីឈឺត្រូវសង្គ្រោះបន្ទាន់»។
ដូចគ្នាដែរ នៅថ្ងៃព្រហស្បតិ៍ រដ្ឋាភិបាលក៏បានប្រកាសឲ្យមានការផ្អាកដំណើរការជីវកម្មកម្សាន្តទូទាំងប្រទេសរួមមានរមនីយដ្ឋាន សារមន្ទីរ រោងភាពយន្ត និងក្លឹមហាត់ប្រាណ។ សម្រាប់ភោជនីដ្ឋានវិញ អនុញ្ញាតឲ្យនៅបើកដំណើរការជាធម្មតា ប៉ុន្តែសម្រាប់តែការវេចខ្ចប់តែប៉ុណ្ណោះ។
រដ្ឋាភិបាលក៏បានប្រកាសពីការដាក់បំរាមគោចរ សម្រាប់ទីក្រុងភ្នំពេញ ក៏ដូចជាខេត្តនានា ដោយគិតចាប់ពីម៉ោង៩យប់ ដល់ម៉ោង៣ទាបភ្លឺ លើកលែងតែករណីបន្ទាន់ណាមួយ។
រដ្ឋបាលរាជធានីភ្នំពេញ បានចេញសេចក្ដីប្រកាសមួយអំពីការដាក់បំរាមគោចរចំនួន ១៤ថ្ងៃ ដោយមិនអនុញ្ញាតឲ្យប្រជាពលរដ្ឋចាកចេញពីផ្ទះនៅចន្លោះម៉ោង ៩យប់ ដល់ម៉ោង ៣ទាបភ្លឺ។
លោក រឿន សុធី អនុប្រធានមន្ទីរសុខាភិបាល ខេត្តបន្ទាយមានជ័យមានប្រសាសន៍ថា ចំនួនពលករខ្មែរវិលត្រឡប់មកពីប្រទេសថៃមានការកើនឡើងក្នុងខែមិថុនានិងកក្កដានេះ ដោយថាមានប្រហែល៤០០ ទៅ ៥០០នាក់ក្នុងមួយថ្ងៃ។
លោកមានប្រសាសន៍ថា ចំនួនអ្នកវិជ្ជមានកូវីដ១៩ សរុប ១០៨៥៤ករណី ក្នុងនោះមានជាង ៣៥០០ករណីជាពលករខ្មែរត្រឡប់ពីប្រទេសថៃ គិតតាំងពីមានព្រឹត្តិការណ៍ ២០កុម្ភៈ និងថាជាង ៤០០០នាក់ផ្សេងទៀតកំពុងដាក់ឲ្យធ្វើចត្តាឡីស័កនៅក្នុងខេត្ត។
លោកមានប្រសាសន៍ថា៖ «អ្នកឆ្លងវីរុសកូវីដ១៩ បំប្លែងថ្មី Delta មានចំនួន១៨ករណីប៉ុណ្ណោះ ក្នុងខេត្តបន្ទាយមានជ័យ ដែលអ្នកទាំងនោះត្រឡប់មកពីប្រទេសថៃចាប់តាំងពីខែមេសា»។
លោកឲ្យដឹងដែរថា កាលមុនខែមិថុនា អ្នកឆ្លងកូវីដ១៩ ជាអ្នកនៅក្នុងសហគមន៍ ប៉ុន្តែថាគិតតាំងពីខែមិថុនា មកករណីឆ្លងភាគច្រើនមានទាក់ទងនឹងពលករខ្មែរត្រឡប់ពីប្រទេសថៃ។
លោកលើកឡើងថា៖ «ការបិទខ្ទប់អាចជួយកាត់បន្ថយការឆ្លងរាលដាលវីរុសកូវីដ១៩ បំប្លែងថ្មី Delta ចូលក្នុងសហគមន៍»។
លោក សឿម ប៊ុនរិទ្ធ អភិបាលរង និងជាអ្នកនាំពាក្យរដ្ឋបាលខេត្តបាត់ដំបង មានប្រសាសន៍ថា ករណីឆ្លងភាគច្រើនកើតមានតែលើអ្នករស់នៅក្នុងសហគមន៍ និងលើអ្នកធ្វើដំណើរពីខេត្តផ្សេង ខណៈពលករខ្មែរមិនសូវមានធ្វើដំណើរត្រឡប់មកស្រុកវិញតាមច្រកទ្វារព្រំដែនខេត្តបាត់ដំបងនោះទេ។
លោកឲ្យដឹងថា៖«កាលពីថ្ងៃពុធ មនុស្សចំនួន ១២៥នាក់ តេស្តវិជ្ជមានកូវីដ១៩ ក្នុងនោះមានពលករចំនួន៣៨នាក់ផង»។
លោកបន្ថែមថា ករណីឆ្លងវីរុសកូវីដ១៩ បំប្លែងថ្មី Delta មានចំនួនប្រាំបីករណី កើតឡើងក្នុងខែឧសភា និងខែមិថុនា ហើយអ្នកទាំងនោះ ក៏បានជាសះស្បើយហើយដែរ។
លោក ទូ សាវុធ អភិបាលរងខេត្តកោះកុង បានប្រាប់ខេមបូចា ថាតាំងពីមានការផ្ទុះរាលដាលជំងឺកូវីដ១៩ ដំបូងមក មានអ្នកឆ្លងសរុបចំនួន ៣៩៧៨ករណី និងមានអ្នកស្លាប់ចំនួន ២១នាក់ គិតមកដល់ពេលនេះ។
លោកមានប្រសាសន៍ថា៖ «ជាទូទៅ ពលករនៅតែត្រឡប់មកវិញជាបន្តបន្ទាប់ ប៉ុន្តែមានចំនួនតិច នៅថ្ងៃខ្លះមានពីរ ឬបី ឬបួននាក់»។ លោកថានៅតាមច្រកព្រំដែន មានការត្រួតពិនិត្យ និងរឹតបន្តឹងលើអ្នកធ្វើដំណើរ ក៏ដូចជាពលករដែលត្រូវចូលមកស្រុកវិញ។
លោកបានបន្ថែមថា៖ «ពេលដែលពួកគេមកដល់ យើងធ្វើតេស្តរហ័សសិន បើពួកគេមានវិជ្ជមាន យើងនាំពួកគេទៅកាន់មណ្ឌល និងមិនឲ្យពួកគេទៅតាមស្រុកនិងភូមិទេ»។
ប្រជាពលរដ្ឋដែលត្រូវរកឃើញថាមានវិជ្ជមានកូវីដ១៩ ត្រូវបញ្ជូនទៅមណ្ឌលព្យាបាលក្នុងសហគមន៍ ខណៈពលករមកពីប្រទេសថៃដែលមានវិជ្ជមានកូវីដ១៩ ត្រូវបញ្ជូនទៅមណ្ឌលដាច់ដោយឡែកសម្រាប់អ្នកទាំងនោះ ដើម្បីការពារកុំឲ្យឆ្លងវីរុសបំប្លែងថ្មី Delta។
លោក នី សុខា ប្រធានសមាគមសិទ្ធិមនុស្សអាដហុក មានប្រសានស៍ថា វិធានការបិទខ្ទប់ គឺចាំបាច់ ដើម្បីការពារការឆ្លងរាលដាលបន្ថែមទៀត ប៉ុន្តែលោកក៏បានជំរុញឲ្យរដ្ឋាភិបាល ត្រូវធានាថាប្រជាពលរដ្ឋមានអាហារគ្រប់គ្រាន់ ខណៈការប្រកបការងារត្រូវកាត់ផ្ដាច់។
លោកបន្ថែមថា៖ «រដ្ឋាភិបាលត្រូវតែផ្ដល់ម្ហូបអាហារដល់ប្រជពលរដ្ឋប្រចាំថ្ងៃ និងជាពិសេសត្រូវជួយដល់អ្នកដែលរកមួយថ្ងៃសម្រាប់ហូបតែមួយថ្ងៃ ដូចជាប្រជាពលរដ្ឋធ្វើការក្នុងសេដ្ឋកិច្ចក្រៅប្រព័ន្ធ»។
ចំណែកលោក មឿន តុលា ប្រធានអង្គការសង់ត្រាល់ ប្រាប់ខេមបូចា ដែរថាការបិទខ្ទប់នេះ ឆ្លុះបញ្ចាំងពីការទទួលស្គាល់របស់រដ្ឋាភិបាលលើភាពគ្រោះថ្នាក់របស់វីរុសបំប្លែងថ្មី Delta។
លោកមានប្រសាសន៍ថា៖«ដោយសារតែខ្លាចឆ្លងកូវីដ១៩ និងការបាត់បង់ការងារដោយសារវិបត្តិកូវីដ១៩ ពលករខ្មែរជាច្រើនបានត្រឡប់ពីប្រទេសថៃវិញ។ ដូចនេះ រដ្ឋាភិបាលកម្ពុជា ជាពិសេសអាជ្ញាធរខេត្តតាមព្រំដែន គួរតែពង្រីកមណ្ឌលធ្វើចត្តាឡីស័ក និងជួយផ្ដល់ជំនួយដល់អ្នកទាំងនោះពេលជាប់ធ្វើចត្តាឡីស័ក»។
នៅថ្ងៃសុក្រនេះ ក្រសួងសុខាភិបាលឲ្យដឹងថាមានករណីឆ្លងកូវីដ១៩ ចំនួន ៦៦៨ករណីថ្មី ក្នុងនោះមាន២៤០ ជាករណីនាំចូល ដែលធ្វើឲ្យចំនួនករណីឆ្លងសរុបគិតតាំងពីដើមឆ្នាំ២០២០ មកឡើងដល់ ៧៦៥៥៨ករណី ក្នុងនោះករណីនាំចូល ១០២៨៩ករណី។ ចំនួនករណីឆ្លងភាគច្រើន កើនឡើងក្រោយមានព្រឹត្តិការណ៍២០កុម្ភៈ ជាពេលដែលការផ្ទុះការឆ្លងរាលដាលក្នុងសហគមន៍កើតមានដំបូងនៅកម្ពុជា។ ក្រសួងឲ្យដឹងដែរថា អ្នកជាសះស្បើយមានជំនួន ៦៩១៩៨នាក់ និងអ្នកស្លាប់មានចំនួន ១៣៧៥នាក់។ (រាយការណ៍បន្ថែមដោយ ជា សុខនី និង ង៉ាយ ណៃ)
ប្រែសម្រួលពីអត្ថបទភាសាអង់គ្លេស៖ Gov’t locks down border provinces, and announces new nationwide restrictions, amid fears of spreading Delta variant